ქუდოსქიდით სულიერო მტკიცას გურაფაშ დროს

1, 2. ა) მუ ოკო გაფუდან გინოჭყვიდილ დამატებით განათლებაშ მეღებაშ დროს? ბ) მუს ნიშნენს „წიმი ულა“? (ფილ. 3:16).

ᲘᲔᲰᲝᲕᲐᲨ ნამთინე მსახურქ გინოჭყვიდ სკოლას სავალდებულო საბაზო განათლებაშ მეღებაშ უკულ დამატებით განათლება ხოლო მეუღებუდუკო, მუშენდა ფიქრენა, ნამდა თენა მეხვარებ დუდიშ ეჯუმალას დო იეჰოვაშ მსახურებას მეტიშ კეთებას. დამატებით განათლებაშ მეღება სი ხოლო გინოჭყვიდილ ქუგაფუნ-და, მუ მიგეხვარებ, გურაფაშ დროს ხოლო ვადინუე იეჰოვაწკუმა ხოლოშიან ურთიერთობა? (იაკ. 4:8ა). მუშო ოკო რაგად, გურაფაშ დროს აიშახ ხოლო ქეშეხვადუდ რწმენაშ გამოცდეფს, მარა იეჰოვაშ ართგურქ ქუდოსქიდ. საჭირო რე, ანწ ხოლო ვემიოტუე „წიმი ულა“, შხვანერო ქოფთქუათინ, ართგურო გაგრძელე იეჰოვაშ მსახურება (წეკითხით ფილიპელეფიშ 3:16).

² ბერძნულ ზმნა, ნამუთ თარგმნილ რე, მუჭოთ „წიმი ულა“, ხშირას გიმირინუაფუდ სამხედრო მარშიშ ეიოჭარალო, მუჟამსით ჯარიშკოჩეფ ართო ეკონწყილო მწყობრას მეულა. დამატებით განათლებაშ მეღებას გეგნოჭყვიდუნქ-და, სი ხოლო, თაშ ქოფთქუათინ, იშენით „ქრისტიანულ მარშის“ ოკო რდე, იეჰოვაშ მსახურებას ვართ ართ ადგილს ოკო გესქიდე დო ვართ უკახალე ოკო დიკინე. თე სტატიას გარჩიებულ იჸუაფ ოთხ ბიბლიურ პრინციპ, ნამუთ თეშ კეთებას მიგეხვარებ. შილებე თე პრინციპეფ ახალ ვა რდასჷ სქანო დო უკვე გიმნარნეფ გაფუდას, ათეშენ თინეფ დამატებით განათლებაშ მეღებაშ დროს დო თიშ უკულ ხოლო მიგეხვარებ, ვადინუე იეჰოვაწკუმა ხოლოშიან ურთიერთობა.

ᲕᲔᲛᲘᲝᲢᲣᲐ ᲡᲣᲚᲘᲔᲠ ᲒᲐᲜᲠᲘᲒᲘᲨ ᲛᲔᲸᲣᲜᲐ

3. მუ სირთულეს შილებე შეხვადე დამატებით განათლებაშ მეღებაშ დროს?

³ სირთულე. დამატებით განათლებაშ მეღებაშ დროს უმოს საქმე გიგაძინუ, მუთ ირდღაშიან განრიგის დოითირანს. რახანს გოკო, ჯგირო იგურუე, შილებე ჭიე-ჭიეთ გურაფა ქიგიორინუე იეჰოვაშ წოხოლე. ინა ვარ, შილებე კრებაშ შეხვალამეფიშ გოჩილითაფა ქიდიჭყე, მოურკე ქადაგებას, ბიბლიაშ პირად გურაფას დო ლოცვას (გიმოცხ. 2:4).

4. მუს ნიშნენს სიტყვეფ „ბრელ იხანდით უფალიშ საქმეს“? (1 კორ. 15:58).

⁴ წეკითხით 1 კორინთელეფიშ 15:58. ველისპეტ წონასწორობას ვადინუანს ონდო მეურს. თეშნერო, იეჰოვაწკუმა ხოლოშიან ურთიერთობას ვადინუანქ, ონდო სულიერო წიმი მეურქ, შხვანერო ქოფთქუათინ, ბრელს ხანდენქ იეჰოვაშ მსახურებას. ბრელ ხანდას უბრალოთ სულიერ საქმეეფშა ბრელ დროშ დათმება ვეგულისხმებ. მთავარ რე, სულიერს თიშენ უთმენდე დროს, ნამდა თინა სქანო არძაშ უმოს მნიშვნელოვან რე. ვაგგოჭყორდას, ნამდა პირველ რიგის იეჰოვაშ მსახურ რექჷ დო უკულ რექჷ მოსწავლე (მათ. 22:37). ახალგაზრდა და, სამანტა, იჩიებ: „ჩქიმ დუდის სიტყვა მეფჩჷ, ნამდა გურაფა მუთუნ დროს იეჰოვაშ მსახურებას ქიმეცილებუდ-და, ხეთე მივოტენდ თის“.

5. მუშ კეთება შეილებ, ნამდა გურაფაშ დროს აქტიურ რდე იეჰოვაშ მსახურებას?

⁵ მუ ოკო აკეთე დამატებით განათლებაშ მეღებაშ დოჭყაფაშახ. გინოჭყვიდილ გაფუდას, ნამდა იეჰოვა ირიათო პირველ ადგილს გერდას სქან ცხოვრებას. ქოკითხ სქან დუდის: „მუ გეგმა მიღჷ თიშო, ნამდა ვა მურკე კრებაშ შეხვალამეფშა გილულას, პირად გურაფას დო ქადაგებას?“ (იეს. 1:8; მათ. 28:19, 20; ებრ. 10:25). დეფიქრ ულირშე ხოლო, მუჭო ახერხენდჷ აიშახ სკოლას გურაფაშ დროს სულიერიშ პირველ ადგილშა გერინაფას. მუდგარენეფიშ უჯგუშო კეთება შეილებუდუნ, ქოფიქრენქ-და, ასე მუშ გაუჯგუშება შეილებ თი კუნთხუთ? გინოჭყვიდილ გაფუდას, ნამდა გურაფაშ დროს აქტიურო მიღე მონაწილება იეჰოვაშ მსახურებას. მუშო ოკო რაგად, გურაფას ხოლო საჭირო დრო ოკო დუთმე, მარა თენა იეჰოვაშ მსახურებაშ ხარჯშა ოკო ვაკეთეa (მათ. 6:24).

6. ნამ კითხვეფიშ საშვალებათ შეილებ დუდიშ შემოწმება? (ქოძირით სურათ).

⁶ დამატებით განათლებაშ მეღებაშ დროს ხშირას შეამოწმ სქან დუდ, მაგალთო, შილებე თუთაშე ართშა. ქოკითხ სქან დუდის: „კინ პირველ ადგილშა ქიგემრენო იეჰოვა?“. მაგალთო, ხშირას ხომ ვაიჩირთუ კრებაშ შეხვალამეფ ვარდა ხშირას ხომ ვეგვიანუანქ? კრებას მიკოხექინ, პროგრამაშ რჩქილაშ მანგიორო, სქან დავალებეფიშ აზრ ხომ ვაიღ? შეხვალამეფს ხვალე ვიდეოკონფერენციათ ხომ ვასწრუქ? ხომ ვა მურკჷ ლოცვას ვარდა ბიბლიაშ კითხირს? მსახურებაშა მოვალეობაშ გურშენ ხომ ვემურქ დო, მეურქინ თიმწკუმა, მიკოსურებაშა ხომ ვა რექჷ? თენეფშე ნამთინს სქან დუდის ქატყუაფუქ-და, უყურადღებოთ მუთუნით ვედიტუა თინა დო უცფას ქიმოქმედ. მუთუნით ვეცილუა გურაფა იეჰოვაშ მსახურებაშ პირველ ადგილშა გერინაფას.

ᲛᲣᲗᲣᲜᲡ ᲕᲔᲛᲔᲩᲐ ᲡᲐᲨᲕᲐᲚᲔᲑᲐ, ᲓᲘᲝᲗᲘᲠᲣᲐᲡ ᲐᲖᲠᲝᲕᲜᲔᲑᲐ

7. მუჭო შილებე გურაფაშ ნამთინე პროგრამაქ იმოქმედას სქან აზროვნებაშა?

⁷ სირთულე. ნამთინე დამატებით გურაფაშ კურსშა მიშურს თიცალ მასალა, ნამუთ ოგურუანს ფილოსოფიას დო თიცალ მუდგარენეფს, მუდგას ბიბლია „ტყურა დო მუთუნიშ მოღე ვა რენ ფერ“ აზრეფს უძახ, მაგალთო, მუნერით რე ათეიზმ დო ევოლუციაშ თეორია (კოლ. 2:8). ნამთინე პროგრამას მოსწავლეეფს თის ხოლო ოგურუანა, ნამდა ხვალე მუნეფიშ დუდიშ იმენდ ოკო უღუდან. ართ ახალგაზრდა ჯიმა იშინანს: „გურაფაშ დროს ხვალე უნარეფს ვარინ, შხვანერო აზროვნებას ხოლო მოგურუანდეს, თიცალს, ნამუთ უმენტაშო ვემურდჷ იეჰოვაშ აზროვნებას. მაგალთო, მოგურუანდეს, ნამდა წარმატებაშ მეჭირნაფა ხვალე ჩქინდა რდჷ დამოკიდებულ. თეშ შედეგო ჭიე-ჭიეთ თიცალ აზროვნებაქ გემევითარ, ნამდა იეჰოვაშ უმშო ხოლო შემლებუდ წარმატებაშ დო ბედნერობაშ მეჭირნაფა. თაშ ნამდა, უმოსო დო უმოსო მიჭირდჷ იეჰოვაშა მენდება“.

8. მუშენ რე მნიშვნელოვან, დითხილუე „სწორას აზროვნებაშ უნარ“? (იგავ. 3:21).

⁸ წეკითხით იგავეფიშ 3:21. ბიბლია მაფრთხილენა, ნამდა დიფთხილუათ „სწორას აზროვნებაშ უნარ“. მუდგარენს თიშენ ფთხილანთ, ნამდა შილებე თინა მიდგაინქ გილამლუან ვარდა მიდამღან. ჩქინ აზროვნებაშ უნარს ხოლო თხილუა თიშენ ოსაჭირ, ნამდა სატანა დო თიშ ქიანა ირიათო ოცადუნა, გილამლუან თინა (1 პეტ. 5:8). სატანაშ ქიანას გავრცელებურ აზროვნებაქ ჯგირ დო ფურიშ გურშენ, სიცოცხლეშ გორჩქინაშ გურშენ, ღორონთიშ არსებობაშ გურშენ, შეულებ ეჭვ გემშგოღალაფუას თიშა, მუდგას თე საკითხეფშენ ბიბლია ოგურუანს. მასწავლებერეფქ დოვარ შხვეფქ თე საკითხეფწკუმა დაკავშირებით მუნეფიშ აზრ შილებე თეშ მუკარჩქინან, ითამ უმოს ჭკვერულ რე. მარა თენა თაშ ვა რე. სინამდვილეს, თინეფიშ აზროვნება „ღორონთიშ თოლს სიბორუე რე“ (1 კორ. 3:18–20).

9. მუჭო შეილებ დითხილუე სწორას აზროვნებაშ უნარ?

⁹ მუ ოკო აკეთე დამატებით განათლებაშ მეღებაშ დოჭყაფაშახ. სწორას აზროვნებაშ უნარქ ვაიდინასინ, გურაფაშ დოჭყაფაშახ ქიდეკვირ, მტკიცას ქორწანს დო ვარ, ნამდა, მუდგას ბიბლია ოგურუანს, სიმართლე რე. მაგალთო, დეფიქრ თეცალ კითხვეფშე: „მუშენ პწანსჷ, ნამდა ღორონთ არსებენს? სოვრეშე მიჩქჷ, ნამდა ბიბლია ღორონთიშ სიტყვა რე? მუ მარწმუნენს, ნამდა ჯგირ დო ფურიშ გურშენ ბიბლიაშ დამოკიდებულება ბრელით უჯგუშ რე თე ქიანაშ ნორმეფშე?“. დეფიქრ ულირშე ხოლო. მუშო ოკო რაგად, თე ქიანაშ აზროვნებაშა სკოლას აიშახ ხოლო გაჸიდ ობრძოლებერ. შხვეფს ევოლუციაშ თეორიაშ წანდესინ თიშ გურშენ სი ხოლო ხომ ვედგეეჭვჷ ღორონთიშ არსებობაქ? ხომ ვაიჭირდჷ, ვეიაჸუნიკო სქან ამხანაგეფიშ გლახა საქციელს? მუდგარენეფიშ უჯგუშო კეთება შეილებუდუნ, ქოფიქრენქ-და, ასე მუშ კეთება შეილებ სქან რწმენაშ გამანგარებელო? მტკიცას გაფუდას გინოჭყვიდილ, დოთხილუე სქან აზროვნებაშ უნარ დამატებით განათლებაშ მეღებაშ დროს (2 ტიმ. 2:16–18).b

10. მუჭო შეილებ განათლებაშ მეღებაშ დროს დითხილუე სწორას აზროვნებაშ უნარ?

¹⁰ დამატებით განათლებაშ მეღებაშ დროს ირიათო შეამოწმ სქან დუდ თეცალ კითხვეფით: „ჭიე-ჭიეთ ხომ ვეგნმადვჷ თე ქიანაშ აზროვნებაქ დო ხომ ვა ფიფქრენქ, ნამდა, მართალ რე, შხვეფ ბიბლიურ ნორმეფით ვა ცხოვრენა, მარა თინეფიშ ცხოვრებაშ წეს იშენდოიშენ გლახა ვა რე? ქუმარჩქილენო, ნამდა, მუდგას თე ქიანა ოგურუანს უბრალოთ ადამიანურ სიბრძნე რე დო ვართ ხოლო ნამდვილ სიბრძნე? ბოლოშა ქობჯერსო, ნამდა ხვალე ღორონთიშ სამეფოს შეულებ კაცობრიობაშ პრობლემეფიშ მოგვარება?“. სწორას აზროვნებაშ უნარ დითხილუენ, ღორონთიშ სიტყვას გურგედვალირო ოკო გურაფლენდე. ბიბლიაშ გურაფა დო თიშე ფიქრ მიგეხვარებ, ხოლო უმოსო დერწმუნე, ნამდა, მუდგას თინა იჩიებ, სიმართლე რე (1 ტიმ. 4:15).

ᲭᲙᲕᲔᲠᲣᲚᲝ ᲒᲔᲒᲛᲘᲠᲘᲜᲔ ᲓᲠᲝ

11. გურაფაშ დროს მუშენ შილებე გაიჭირდას დროშ ჭკვერულო განაწილებაქ?

¹¹ სირთულე. დამატებით განათლებაშ მეღებაქ შილებე ბრელ დრო მიდაიღას, განსაკუთრებულო თიმწკუმა, მუჟამსით გამოცდეფ გიღჷ ვარდა დავალებაშ ოკეთებელო კონკრეტულ დროს ოკო ენინტირე. ათეშენ, დროს გონივრულო ვა განაწილენქ-და, შილებე სტრესის ქენოლე დო გვალო გეგნიჭვე. თაშ ნამდა, მნიშვნელოვან რე, ყურადღება ქიმიაქცუე სქან ფიზიკურ დო ემოციურ ჯანმრთელობას.

12. მუ საქმეეფს ოკო დუთმე დრო, მუდგათ ოძირანქ, ნამდა ჭკვერულო ირინუანქ თის? (ეფეს. 5:15, 16).

¹² წეკითხით ეფესოელეფიშ 5:15, 16. მუშო ოკო რაგად, ადვილ ვა რე, ჭკვერულო გიმირინუე დრო, მუშენდა ბრელ მუდგარენშა გაფჷ ყურადღება მიოქციებელ. მაგალთო, ყურადღება ოკო მიაქცუე გაკვეთილეფს, მარა თეშე უმოს მნიშვნელოვან რე, დრო გეგმურთე თანამორწმუნეეფს დო ოჯახიშ წევრეფს (ფსალმ. 133:1; იგავ. 18:1). მუშო ოკო რაგად, არძაშ უმოს მთავარ რე, იეჰოვაწკუმა დაახლოებას გეგმურთე დრო (მათ. 6:33). თეწკუმა ართო, შილებე ოჯახურ პასუხიშმგებლობეფ ვარდა სამუშა გიღუდას; თეს გეძინელ, ოკო ქიმკაჯინე ჯანმრთელობას, მუდგაშა მიშურს მოსვანჯა დო ვარჯიშ (ეკლ. 4:6; 1 ტიმ. 4:8). მუშო ოკო რაგად, თე ირფელს დროშ სწორას განაწილება ოსაჭირ.

13. მუშ კეთება შეილებ, ნამდა ჭკვერულო გეგმირინუე დრო?

¹³ მუ ოკო აკეთე დამატებით განათლებაშ მეღებაშ დოჭყაფაშახ. ბიბლია იჩიებ, ნამდა წარმატებულქ ქიჸუენ, გეგმა ოკო გიღუდას (იგავ. 21:5). ათეშენ გურაფაშ დოჭყაფაშახ შეადგინ განრიგ. თეს ულირშენ ფიქრ მიგეხვარებ. მაგალთო, სკოლას გურაფაშ დროს მუსხით ქახერხენდჷ, არძა მნიშვნელოვან საქმეს გეგმურთიკო დრო? თენა იშენ-იშენ ჯგირო ვეგშგალედუნ თეს ქოფიქრენქ-და, ასე მუშ კეთება შეილებ, ნამდა კინ თიქ ვა გაღოლას? გინოჭყვიდილ გაფუდას, სი აკონტროლე დრო დო ვართ ხოლო დროქ გაკონტროლას სი.c

14. მუ კითხვეფით შეილებ შეამოწმე სქან დუდ?

¹⁴ გურაფაშ დროს რეგულარულო შეამოწმ სქან დუდ. დეფიქრ: „ქუმარზენსო ჩქიმ გრაფიკ თიშ საშვალებას, ნამდა დასაბაღ დრო გეგმურთე მოსვანჯას დო ვარჯიშის? კინ ქუმოსქიდუნო დრო თანაქრისტიანეფწკუმა ურთიერთობაშო? ქინიმნტირექო დროს დავალებეფიშ ოკეთებელო? ვენიმნტირექ-და, თენა თიშენ ხვადუნო, ნამდა ბრელ დავალება მიღჷ დოვარ თიშენ, ნამდა ბოლო წუთშახ მემიღ თინეფიშ კეთება? ჩქიმ მეგობრეფ ვარდა ოჯახიშ წევრეფ ხომ ვა ფიქრენა, ნამდა მუდგარენ ოთირალ მაფჷ?“. განრიგის მუდგარენ ოთირალ გაფჷ ვარდა მეტ თვითდისციპლინა გოსაჭირუნ თეს ქატყუაფუქ-და, დრო ვეღა! შილებე რჩევა თინეფს ხოლო ქელაკითხუე, მიდგას ჯგირო გიშალე დროშ ჭკვერულო განაწილება (იგავ. 11:14).

„ᲒᲘᲚᲐᲠᲗᲘᲗ ᲭᲙᲕᲔᲠᲔᲤᲬᲙᲣᲛᲐ ᲐᲠᲗᲝ“

15. მუ სირთულეს შილებე შეხვადე გურაფაშ დროს?

¹⁵ სირთულე. გურაფაშ დროს სქანწკუმა ართო გურაფლენან თინეფს შილებე ოკოდან, მუნეფწკუმა ართო გატარე დრო. შილებე სი ხოლო გაფუდას თეშა გურ, მუშენდა ართო გურაფლენთ დო ბრელ საერთო გიღუნა. შილებე თის ხოლო ფიქრენდე, ნამდა თინეფწკუმა უმოს საერთო გიღჷ, ვინემ ნამთინე თანამორწმუნეწკუმა. მარა ფრთხილას რდა, თქვა ართ აუდიტორიას მილახეთ, მარა ართ ფასეულობეფ ვაიღუნა. მუთ უმოს დროს გატარენქ თინეფწკუმა, თით უმოსო გეგნგადვალუ თინეფიშ აზროვნება (1 კორ. 15:33). თექ აღოლ მაიკლის, ნამდგაქ ელექტრიკობაშ ოთხწანიან კურს მიკორთჷ. თინა იჩიებ: „მარაშე ხუთ დღას თიცალ ხალხწკუმა ართო ვორდჷ, მიდგაშ დამოკიდებულებაქ საპირისპირო სქესიშ მიმართ, გიშაგორილ მუსიკაქ დო უწმაწურ ჩიებაქ ჩქიმ აზროვნებაშა ხოლო ქიმოქმედ“.

16. მუს ბგურაფლენთ იგავეფიშ 13:20-შე?

¹⁶ წეკითხით იგავეფიშ 13:20. ბიბლია მაფრთხილენა, მუნერ მოცილე რე გლახა საზოგადოებაწკუმა ურთიერთობა, მარა თის ხოლო მირაგადუნა, ნამდა „მით ჭკვერეფწკუმა გილურს, მუ ხოლო დეჭკვერებ“. ართ მუდგარენ არგამა რე: ვაგურუთ თის, მიდგაწკუმა დროს ვატარენთ, თინა ჯგირ იჸუაფ დოვარ ფურ! ათეშენ ხოლოშიან ურთიერთობა გავითარ თინეფწკუმა, მიდგას მართალო ჯგირ ოკო სქანო – თინეფწკუმა, მით სქანცალო მთელ გურით ომსახურ იეჰოვას (ფსალმ. 101:6, 7; 119:63).

17. მუშ კეთება შეილებ, ნამდა დუდ ეუჩილითუე გლახა საზოგადოებაწკუმა ხოლოშიან ურთიერთობას?

¹⁷ მუ ოკო აკეთე დამატებით განათლებაშ მეღებაშ დოჭყაფაშახ? წინასწარ ქიფიქრ, მუსხი დროს დუთმენქ თინეფწკუმა ურთიერთობას, მით სქანწკუმა ართო გურაფლენს დო მუზმათ დეახლოებუქ თინეფს. ტრენტონ იჩიებ: „მართალ რე, ჯგუფელეფწკუმა ჯგირ ურთიერთობა მიღჷ, მარა გურაფაშ უკულ დროს თინეფწკუმა ვა ვატარენქ. თინეფ უბრალოთ ჩქიმ ჯგუფელეფ რენა დო ვართ ხოლოშიან მეგობრეფ“. სი მუშ კეთება გილამ, ნამდა ნაბეტანო ვედეახლოვე თინეფს, მიდგაწკუმა ართო გაჸი ოგურაფალ? ართ-ართ, მუთ თეშ კეთებას მიგეხვარებ, ულირშენ ფიქრ რე. მაგალთო, ულირ წანეფს სკოლას გურაფაშ დროს მუს ორთუდ თიშო, ნამდა ნაბეტანო ვედეახლოვიკო კლასელეფს? თენა იშენ-იშენ ჯგირო ვეგშგალედუნ თეს ქოფიქრენქ-და, ასე მუშ კეთება შეილებ, ნამდა კინ თიქ ვა გაღოლას? გინოჭყვიდილ გაფუდას, „გილართე ჭკვერეფწკუმა ართო“ დო დუდ ეუჩილითუე თინეფწკუმა ხოლოშიან ურთიერთობას, მიდგას ვა უჸორა იეჰოვა.d

18. მუჭო შეილებ შეამოწმე სქან დუდ? (ქოძირით სურათ).

¹⁸ რეგულარულო შეამოწმ სქან დუდ თეცალ კითხვეფით: „ნაბეტანო ხომ ვედვეახლოვ თინეფს, მიდგაწკუმა ართო ბგურაფლენქ? მა ხოლო ხომ ვეგნმადვჷ თინეფიშ ჩვევეფქ, ჩიებაშ სტილქ დო საკითხეფწკუმა დაკავშირებით თინეფიშ დამოკიდებულებეფქ? იეჰოვა მუს ფიქრენს თინეფწკუმა ჩქიმ ურთიერთობაშენ?“ (ფსალმ. 1:1). მუთუნ ოთირალ გაფუნ თეს ქარწყექ-და, დრო ვეღა! ირნერო ქეცად, სქან მეგობრეფ ხვალე თინეფ რდანჷ, მიდგას სქანცალო მთელ გურით უჸორა იეჰოვა. დუდ ვაურიდა თინეფწკუმა ქადაგებას, მიდგაწკუმა ართო გურაფლენქ, მუშენდა სი გიღჷ არძაშ უჯგუშ საშვალება, გაჩინებაფუე თინეფს იეჰოვა.

ᲬᲘᲜᲐᲡᲬᲐᲠ ᲛᲔᲛᲖᲐᲓ

19. მუჭო შეილებ წინასწარ მემზადე თი სულიერ საფრთხეეფშო, ნამდგას შილებე დამატებით განათლებაშ მეღებაშ დროს შეხვადე? ქიმიჸუნით მაგალით.

¹⁹ ჯგირ მეჩხომე ოჩხომშა ულაშახ წინასწარ ემზადებ. მართალ რე, შილებე წინასწარ ირფელშა ვა გაჩინას გურქ, მარა თინა ჩხომუაშო ირნერო რე მომზადებულ. ბარგ ხოლო მოხუჯურ მიკაქუნს დო ზუსტას უჩქჷ, სო იდას ოჩხომშა. წინასწარ მომზადება სი ხოლო მიგეხვარებ დამატებით განათლებაშ მეღებაშ დროს. გაგრძელ რწმენაშ გამანგარება, „გეგმინწყი თი ირფელით, მუდგას ღორონთ [სულიერ ბრძოლაშო] გარზენს“ დო რშუდას, მუშენ გოკო დამატებით განათლებაშ მეღება – სქან მიზან თინა ვა რე, ნამდა მიოჭირინუე თის, მუთ თე ქიანაშ თოლს რე წარმატება, სქან მიზან თინა რე, ნამდა ირფელით, მუდგას ორთუქ, იეჰოვა განადიდე (ეფეს. 6:11–13; 1 კორ. 9:26, 27; 10:31).

20. მუჭო შეილებ შეამოწმე, ქოიღუნ დო ვარ ძალიერ რწმენა?

²⁰ ბიბლია ელამჩანა: „ირიათო შეამოწმით თქვან დუდ, ნამდა ქიგეგათ, ქოიღუნან დო ვარ ძალიერ რწმენა; ირიათო გეგმირკვით თქვან დუდ“ (2 კორ. 13:5). გურაფაშ დროს მუჭო შეილებ თეშ კეთება? ხშირას გეგნამოწმ, მუნერ დამოკიდებულება გიღჷ თე სტატიას გარჩიებულ საკითხეფშენ. ჯვეშობურო ქიმეჸუნქო სულიერ განრიგის? ქოთხილანქო სქან აზროვნებას თე ქიანაშ ითამ სიბრძნეშე? ჭკვერულო ქირინუანქო დროს? ქამანგარენქო თანამორწმუნეეფწკუმა ურთიერთობას დო დუდის ქურიდანქო გლახა საზოგადოებას? თე კითხვეფშე ირიათო ოკო დეფიქრე, ვა უღჷ მნიშვნელობა, გურაფლენქო, მუშენქო დოვარ შხვა მუთუნს ორთუქო. სქან მდგომარეობაქ მუჭოდგა ვეთირასინ, გინოჭყვიდილ გაფუდას, გემანგარე რწმენა. თაშ ქიმიქციებუქ-და, დარწმუნებულ რდა, იეჰოვა აუცილებერო ქიმგეხვარებ ნამდვილ ბედნერობაშ დო წარმატებაშ მეჭირნაფას (იგავ. 3:5, 6).