მუშენ რე მნიშვნელოვან, ქინვანჭათ ბიბლიურ პრინციპეფს

1, 2. ა) მუჟამ იჭარ ბიბლიაქ? ბ) მუშენ რე ბიბლია ამდღა ხოლო პრაქტიკულ?

ᲑᲘᲑᲚᲘᲐ მანგარ ჯვეშ წიგნ რე. თიშ ჭარუაქ სოდგარენ 3 500 წანაშ წოხოლე დიჭყჷ დო დახე 2 000 წანაშ წოხოლე ითუ. მარა, თეშ უმკუჯინუო, ღორონთიშ სიტყვას ამდღა ხოლო დიდ ძალა უღჷ დო პრაქტიკულ რე (ებრ. 4:12; 2 ტიმ. 3:16, 17). მილიონობით ადამიან ამდღა ხოლო ირინუანს ბიბლიურ რჩევეფს, მუთ ოხვარ თინეფს, მიღან ჭკვერულ გადაწყვეტილებეფ დო რდანჷ ბედნერეფ.

² მარა მუშენ რე თეცალ ჯვეშ წიგნ ამდღა ხოლო პრაქტიკულ? ჟირ მთავარ მიზეზიშ გურშენ. პირველ, ბიბლია „ცოცხალ ღორონთშე“, ჩქინ გუმაჭყაფალშე, რე, მით არძაშ უმოს ბრძენ რე (1 ტიმ. 4:10; რომ. 16:26, 27). მაჟია, ბიბლიას მოჩამილ პრინციპეფს დრო ფასის ვა უდინუანს. ათეშენ თე პრინციპეფ ნებისმიერ ეპოქას დო ნებისმიერ სიტუაციას გიმადირთუ კოჩის.

3. მუ კითხვეფს გუვარჩიენთ თე სტატიას?

³ მუ რე ბიბლიურ პრინციპეფ? მუშენ რე თინეფ ამდღა საჭირო? მუჭო მივოგორუათ პრინციპეფს ბიბლიაშ კითხირიშ დროს? თე კითხვეფშე პასუხეფს თე სტატია ქომუჩანა. თეწკუმა ართო, თის ხოლო ქობძირუნთ, მუჭო ოხვარუდ იესო მუშ მარჩქილეეფს, უჯგუშო ქინანჭესკო იეჰოვაშ აზროვნებას.

ᲛᲣ ᲠᲔ ᲑᲘᲑᲚᲘᲣᲠ ᲞᲠᲘᲜᲪᲘᲞ?

4. მუ რე ბიბლიურ პრინციპ?

⁴ ბიბლიურ პრინციპეფ რე თი ძირითად ჭეშმარიტება, ნამდგაშათ ღორონთიშ კანონეფ რე გერსხილ. მინშა კანონშე შილებე არგამათ იძირედას, მუ პრინციპ ენოძ თის (მათ. 22:37). მარა პრინციპეფ კანონეფშე უმოს მაღალას გერე, მუშენდა ხშირას კანონეფ ხვალე კონკრეტულ დროს დო კონკრეტულ სიტუაციას გიმოდირთუ. მარა პრინციპეფ ბრელ შხვადოშხვა სიტუაციას მეურე დო დროშ მიკულაშ უმკუჯინუო, იშენით პრაქტიკულ რე (ფსალმ. 119:111). შემლებუნა ფთქუათ, ნამდა პრინციპეფ რე მიზეზეფ, მუდგაშ გურშენ კანონეფქ იჸუ გიშაშქუმალირქ. თინეფ მოხვარუნა, უჯგუშო ქინვანჭათ იეჰოვაშ აზროვნებას. იეჰოვაშ არძა კანონს მუდგარენ პრინციპ, მიზეზ, მიკურე უკახალე. მუდგარენ პერიოდიშ უკულ კანონქ შილებე დეჯვეშას დო ოთირალქ იჸუას, მარა პრინციპეფ დღას ვეჯვეშებ დო ვეთირუ (ეს. 40:8).

5. მაგალითიშ საშვალებათ გენწყით, მუ განსხვავება რე კანონეფ დო პრინციპეფ შქას (ქოძირით სურათეფ).

⁵ თიშ უჯგუშო გაგებელო, მუ განსხვავება რე კანონ დო პრინციპ შქას, დეფიფქრათ თეცალ მაგალითშე: დიდა ოჭკუმალს გიაკეთენს გაზის დო ბაღანას ურაგად, გაზიშ ხოლოშა ვა მორთავა. თენა ბაღანაშო კანონ რე. მარა, მუ რე თი მიზეზ, პრინციპ, მუთ თე კანონს მიკურე? თიქ ხე ოკო ვემეთხას მუთუნს, მუთ ჩხე რე, ნამდა ვემკიჭვას. თე პრინციპ ხვალე გაზის ვარინ, ირფელს ოხუ, მუდგაქ შილებე დოჭვას, მაგალთო, უნთოს, გამათბობელს დო შხვა ჩხე მუდგარენეფს. თე პრინციპიშ გიმორნაფა ხვალე ჸუდეს ვარინ, ირდიხას რე საჭირო. მუშო ოკო რაგად, ბაღანა გემწირდუნ, თე კანონ უკვე ვეჸუაფ საჭირო, მუშენდა მუს ხოლო აჸი გაზ გუმარნაფალ. მარა იშენით ფრთხილას ოკო რდასჷ, ნამდა ვემკიჭვას. თეშნერო, კანონქ შილებე დითირას, მარა პრინციპ, მიზეზ, მუთ თე კანონს მიკურე, ვეთირუ.

ᲛᲣᲨᲔᲜ ᲠᲔ ᲡᲐᲭᲘᲠᲝ ᲑᲘᲑᲚᲘᲣᲠ ᲞᲠᲘᲜᲪᲘᲞᲔᲤ

6. ა) მუჭო მოხვარუნა იეჰოვა მუშ სიტყვაშ საშვალებათ? ბ) მუჭო ოძირანს იეჰოვა, ნამდა მონდუნა?

⁶ იეჰოვას უჸორთ დო ათეშენ კონკრეტულ მითითებეფს, კანონეფს, მარზენა ნამდა გლახა ვემიპკინდუათ (იაკ. 2:11). თეს გეძინელ, თინა მოხვარუნა, ქინვანჭათ მუშ აზროვნებას, შხვანერო ქოფთქუათინ, პრინციპეფს, მუთ თე კანონეფს მიკურე. შილებე მუდგარენ საკითხწკუმა დაკავშირებით ვა რდასჷ კონკრეტულ კანონ, მარა ცხოვრებაშ არძა სფეროს თინა მუშ სიტყვაშ საშვალებათ ფხელმძღვანელენა. ბიბლიურ პრინციპეფ მოხვარუნა, მიბღათ ჯგირ გადაწყვეტილებეფ დო ვაკეთათ თინა, მუთ სწორ რე. ბიბლიურ პრინციპეფიშ მოჩამათ იეჰოვაქ მოძირუეს, ნამდა მონდუნა დო მარზენა თავისუფლებას, ჩქინით მიბღათ თიცალ გადაწყვეტილებეფ, ნამდგათ ვოძირანთ, ნამდა მიჸორა თინა დო ვაფასენთ თიშ ნორმეფს (გალ. 5:13).

7. მაგალითიშ საშვალებათ გენწყით, მუშენ რე მნიშვნელოვან, ინვანჭუდათ ბიბლიურ პრინციპეფს (ქოძირით სურათ).

⁷ თიშ უჯგუშო ინანჭაფალო, მუჭო მოხვარუნა ბიბლიურ პრინციპეფ, დეფიფქრათ თეცალ მაგალითშე: შოფერეფ შარას ხშირას შეხვადუნა თიცალ საგზაო ნიშანეფს, მუდგას ოკო დემორჩილან. მაგალთო, ნამ ტერიტორიას მუ სიჩქარეს ოკო ვეგნაჩილითუან ვარდა სო ოკო გაჩერდან. თე ნიშანეფს ვედემორჩილებუნან-და, დეჯარიმებუნა. რე გუმაფრთხილებერ ნიშანეფ ხოლო. მაგალთო, თიცალ ნიშანეფ, ნამუთ შოფერს ოძირანს, ნამდა შარას შილებე მანქანაქ გოზგირტას ვარდა თე ადგილს ხშირას გინურს საქონელ. მუჟამსით შოფერ თე გუმაფრთხილებერ ნიშანს ორწყე, ყურადღებათ რე დო ოკვირ, მუჭო გიშართას უსაფრთხოთ თე ადგილ. შოფერ სიფრთხილეს თიმწკუმა ხოლო გიმირჩქინანს, მუჟამსით ჭვენსჷ ვარდა თუნსჷ. თეშნერო, ბიბლიას რე თიცალ კანონეფ, სოვრეშეთ ბგებულენთ, მუშ კეთებას ოკო ეუჩილითუათ დუდ, მარა, თეწკუმა ართო, რე პრინციპეფ ხოლო, თაშ ქოფთქუათინ, გუმაფრთხილებერ ნიშანეფ. მართალ რე, პრინციპეფ კანონეფცალ კონკრეტულ ვა რე, მარა თინეფიშ მეჸუნა მოხვარუნა, თიცალ ფიქრეფს ვარდა საქციელს ეუჩილითუათ დუდ, მუთ ღორონთიშ კანონეფშე გეგნმორთაფუანდეს. ზუსტას ათეშენ რე მნიშვნელოვან, ენვანჭუდათ ბიბლიურ პრინციპეფს.

8. რომაელეფიშ 12:1, 2-იშ თანახმას, მუშენ რე მნიშვნელოვან ბიბლიურ პრინციპეფიშ გორუა?

⁸ ხოლო მუ ჯგირობუა მოუღ ბიბლიურ პრინციპეფიშ გორუას დო თინეფიშ მეჸუნას? მაგალთო, თინა მოხვარუნა, ქინვანჭათ, მუს ფიქრენს იეჰოვა შხვადოშხვა საკითხიშ გურშენ. ბიბლიას პკითხულენთინ, ოკო ქიდვეკვირათ, მუშ გურაფა შემლებუნა თე მონაკვეთშე. უკულ ქოპკითხათ ჩქინ დუდის: მუშენ ოკო იეჰოვას თენა დიბგურუენ დო მუჭო შემლებ ნაგურეფ გიმიბრინუე ცხოვრებას? თეშნერო ბგურაფლენთ, მუჭო ვემსახურათ იეჰოვას „გააზრებულო“ დო ვოძირანთ, ნამდა ინვანჭუთ „ღორონთიშ ნებას, ნამუთ ჯგირ, მოსაწონ დო სრულყოფილ რე“ (წეკითხით რომაელეფიშ 12:1, 2).a

9. ხოლო მუჭო მოხვარუნა ბიბლიურ პრინციპეფით ცხოვრება? (ებრ. 5:13, 14).

⁹ ბიბლიურ პრინციპეფით ცხოვრება იეჰოვაცალო აზროვნებას მოგურუანა. თინა უმოსო მაახლოვენა იეჰოვაწკუმა (წეკითხით ებრაელეფიშ 5:13, 14). ბაღანეფს ბრელ კანონ დო წეს ოსაჭირუნა თიშო, ნამდა უჩქუდან, სო მუჭო მიქცუან. თინეფ თე წესეფს შილებე თიშენ ომორჩილუდან, ნამდა დასაჯებაშა ოშქურუდან, მარა იეჰოვა, ჩქინ მუმა, ჭიჭე ბაღანეფცალო ვა მოქცუნა დო ბრელ წეს დო კანონს ვა მარზენა. თინა მონდუნა დო ელჷ, ნამდა თიცალ გადაწყვეტილებეფს მიბღენთ, ნამუთ მუშ ნებას მეურე დო, მუჟამსით თაშ იფქციებუთ, მანგარო უხარენთ გურს (ფსალმ. 147:11; იგავ. 23:15, 26; 27:11).

ᲛᲣᲭᲝ ᲨᲔᲛᲚᲔᲑᲣᲜᲐ ᲛᲘᲕᲝᲒᲝᲠᲣᲐᲗ ᲑᲘᲑᲚᲘᲣᲠ ᲞᲠᲘᲜᲪᲘᲞᲔᲤᲡ

10. მუჭო შემლებუნა მივოგორუათ ბიბლიურ პრინციპეფს?

¹⁰ ჯგირ იჸუაფ ბიბლიაშ კითხირიშ დროს ქიდვეკვირათ, მუ პრინციპეფს ვორწყეთ, ნამუთ მოხვარუნა, ქინვანჭათ იეჰოვაშ აზროვნებას დო ქობძირათ, მუ დამოკიდებულება უღჷ იეჰოვას შხვადოშხვა საკითხშე. პრინციპეფს თიმწკუმა ხოლო მივოგორუანთ, მუჟამსით ვოკვირუთ, მუ მიზეზიშ გურშენ მიშეღ იეჰოვაქ კონკრეტულ კანონ. მუთ უმოსო ინვანჭუთ მიზეზის, თით უმოსო ინვანჭუთ იეჰოვაშ აზროვნებას, მარა იეჰოვაშ აზროვნებაშ ინანჭაფალო ხვალე თენა ვა რე დასაბაღ, საჭირო რე, თის მოხვარა ქოფთხუათ ლოცვას დო, თეწკუმა ართო, ქიდიბგურუათ ნაკითხირშე უმოს ტომბაშო ფიქრ (იგავ. 2:10–12). მაგალთო, შემლებუნა თეცალ კითხვეფშე დეფიფქრათ: მუშენ მიშეღ ღორონთიქ თეცალ კანონ? იეჰოვას თე კონკრეტულ საქციელ ვა მოწონს-და, თის მოგენსინ ფერ გუვაკეთენ, მეწონებუნო? მუს ბგურაფლენქ თე კონკრეტულ ბიბლიურ მონაკვეთშე დო მუჭო შემლებ თიშ ცხოვრებას გიმორნაფა? მუჟამსით ქინვანჭუთ, მუ მიზეზ მიკურე კანონს, მუს ბგურაფლენთ თე კანონშე ვარდა კონკრეტულ ბიბლიურ მონაკვეთშე, შემალებედან იჸი ჯგირ გადაწყვეტილებეფიშ მეღება – გადაწყვეტილებეფიშ, ნამუთ მეურე იეჰოვაშ ნებას.

11. მუჭო დუმოგურუეს იესოქ გვალას ქადაგებაშ დროს იეჰოვაშ აზროვნებაშ ინონჭაფა? (ქოძირით სურათ).

¹¹ გვალას ქადაგებაშ დროს იესოქ მოძირუეს, მუჭო შემლებუნა მივოგორუათ ბიბლიურ პრინციპეფს, შხვანერო ქოფთქუათინ, ქინვანჭათ იეჰოვაშ აზროვნებას. მორთ გუვარჩუათ თეშ სუმ მაგალით. თითოეულ შემთხვევას იესოქ დიო კანონ მიშინუ დო უკულ ენწყჷ თი პრინციპ, შხვანერო ქოფთქუათინ, იეჰოვაშ დამოკიდებულება, მუთ თე კანონს მიკურდჷ. თე სუმ შემთხვევაშე დაფიქრებათ ქობძირუნთ, მუჭო შემლებუნა თე პრინციპეფიშ ამდღარ დროს გიმორნაფა დო ჭკვერულ გადაწყვეტილებეფიშ მეღება.

12. მუ რე თი ართ-ართ პრინციპ, ნამუთ მუკუძ მათეშ 5:21, 22-ს მოჩამილ კანონს? (ქოძირით სურათ).

¹² წეკითხით მათეშ 5:21, 22. „ვაჸვილა“. მუ პრინციპ მიკურე თე კანონს? იეჰოვას ვაკო, მითინ ბჯოგუდან დო თენა ხვალე სიტყვათ დო საქმეთ ვეგმოფხანტათინ, ფიქრო ხოლო ვამღუდან. იესოქ ენწყჷ, ნამდა კოჩიქ შილებე მითინ ვა ჸვილას, მარა მიდგაინ ქოჯოგუნ-და, გიშურს, იშენ გინურთანს თი პრინციპის, მიზეზის, მუდგაშათ თე კანონ რე გერსხილ. იესოშ ნარაგადით, თის „მით მუშ ჯიმაშე გარისხებულ სქიდუ“, ვარდა სიტყვათ ლანძღუნს, „პასუხ მეთხიებ“. მუშენდა ზუსტას თე დამოკიდებულებას დო საქციელს მეჸუნს კოჩ ჸვილუაშა (1 იოან. 3:15).

13. მუჭო შემლებუნა მათეშ 5:21, 22-ს მოჩამილ პრინციპიშ გიმორნაფა? (ქოძირით სურათ).

¹³ მუჭო შემლებუნა ამდღა მათეშ 5:21, 22-ს მოჩამილ პრინციპიშ ცხოვრებას გიმორნაფა? ირნერო ოკო ეუჩილითუათ დუდ გურშა წყენაშ დო ჟღამიშ ენოდვალას (ლევ. 19:18; იობ. 36:13). მუშენ? მუშენდა თეცალ გრძნობეფქ შილებე გომჯოგუან ადამიან, მუთ თიცალ მუდგარენს ქუმორაგადაფუანა ვარდა გუმოკეთებაფუანა, მუთ ზიანს ქუმუღანს თე პიროვნებას (იგავ. 10:12). თეშა მიშურს ჭორაობა დო ტყურაშ ეკოწამება, მუთ სახელს უტახუნს შხვას (იგავ. 20:19; 25:23). თე პრინციპ თანამედროვე საკომუნიკაციო საშვალებეფიშ გიმორნაფაშ დროს ხოლო მოსაჭირუნა. მართალ რე, საუკუნეეფით ადრე, მუჟამსით იესოქ გოჯოგაფაშ გურშენ თე პრინციპ თქუ, ვართ ინტერნეტ არსებენდჷ, ვართ სოციალურ ქსელეფ დო ვართ შხვა საკონტაქტო აპლიკაციეფ, მარა იესოშ მოჸუნაფილ პრინციპ მიმეხვარებუნა, ვა ფთქუათ დო ვა პჭარათ თიცალ მუდგარენ, მუთ შხვას სახელს გილულუანს. თაშ ნამდა, მუჭოთ მუთუნით ვა პჸვილუნდით კოჩის, თეშ მუთუნით ოკო ვა ფთქუათ დო ვა ფქიმინათ თიცალ მუდგარენ, მუდგათ სახელს გუტახუნდით თის.

14. მუ პრინციპ მუკუძ მათეშ 5:27, 28-ს მოჩამილ კანონს? (ქოძირით სურათ).

¹⁴ წეკითხით მათეშ 5:27, 28. „ვემრუშა“. მუ პრინციპ მიკურე თე კანონს? იეჰოვას ხვალე უზნეობა ვარინ, თიცალ ფიქრეფ ხოლო ჯოგჷ, ნამუთ კოჩის უზნეობაშა მიჸუნანს. ოსურამ კოჩ შხვა ოსურს შხვა თოლით ქოუჯინენ-და, უკვე ცოდენს. თაშ ნამდა, მანგარო გამჭირდანინ ხოლო ირფელ ოკო გუვაკეთათ უზნეო ფიქრეფიშ ჩათხინაფალო (მათ. 5:29, 30). თე პრინციპ ხვალე დაქორწინებულ ვარინ, დაუქორწინებელ ქრისტიანეფქ ხოლო ოკო გეთვალისწინან.

15. მუჭო შემლებუნა მათეშ 5:27, 28-ს მოჩამილ პრინციპიშ გიმორნაფა? (ქოძირით სურათ).

¹⁵ მუჭო შემლებუნა ამდღა მათეშ 5:27, 28-ს მოჩამილ პრინციპიშ ცხოვრებას გიმორნაფა? ჩქინ გონებას ოკო ვა გუვოფალაფუათ უზნეო ფიქრეფს (2 სამ. 11:2–4; იობ 31:1–3). თენა თის ნიშნენს, ნამდა მოწიფულ ქრისტიან პორნოგრაფიაშ არძანერ ფორმას ეუჩილითუანს დუდის. ქრისტიანს, ნამუთ იეჰოვაცალო ფიქრენს, ვემიორჩქ, ნამდა უზნეობაშ ჯინა პრობლემა ვა რე, მთავარ რე, ვაკეთას უზნეობა. ჩქი ვა ბგუთჷ თი ხალხის, მით ფიქრენს, ნამდა რე პორნოგრაფიაშ თიცალ სახეობეფ ხოლო, ნამუთ იშენდოიშენ გლახა ვა რე დო უბრალოთ გართობაშ ართ-ართ საშვალება რე. მართალ რე, იესოშ დროს ვართ ელექტრონულ მოწყობილობეფ არსებენდჷ, ვართ კინოეფ დო ვართ სურათეფ, მარა თიშ მოჩამილ პრინციპშე ვორწყეთ, მუნერ დამოკიდებულება უღჷ იეჰოვას უზნეო სურათეფიშ დო ვიდეოეფიშ მიმართ. თე პრინციპ თის ხოლო მოძირანა, მუშმანწარას ვემეწონებ იეჰოვას, მიდგაინწკუმა ელექტრონულ მოწყობილობათ უზნეო შინაარსიშ ჩიებეფ ქომღუნა, ვარდა თეცალ წერილეფს, სურათეფს ვარდა უზნეო ვიდეოეფს ქუჯღონანთ-და. თე პრინციპიშ მეჸუნა მეხვარებ დაქორწინებულ ქრისტიანს, მეუღლეშ ართგურქ ქუდოსქიდას (მალ. 2:15). მარა იესოშ მოჸუნაფილ პრინციპ ხვალე დაქორწინებულ ვარინ, დაუქორწინებელ ქრისტიანს ხოლო ოხუ. არძაქ დუდ ოკო ეუჩილითუათ ირფელს, მუთ უზნეობაშა ქიმემიჸუნანდეს (იგავ. 5:3–14).

16. მუ პრინციპ მუკუძ მათეშ 5:43, 44-ის მოჩამილ კანონს? (ქოძირით სურათ).

¹⁶ წეკითხით მათეშ 5:43, 44. „მოჯგირე გიჸორდას“. მუ პრინციპ მუკუძ თე კანონს? იეჰოვას ოკო, ნამდა არძა ადამიან ჩქინ მოჯგირეთ მიბრჩქინათ დო მიჸორდან. სანარღოთ, იესოშ დროს იუდეველეფ ფიქრენდეს, ნამდა თე კანონიშ თანახმას ხვალე იუდეველეფ ოკო უჸორდესკო დო ნტერეფ ჯოგუდესკო. მარა იესოს არჩქილედ, ნამდა თე კანონიშ მიზან თენა ვა რდჷ. თის ჯგირო უჩქუდ ართ მუდგარენ: ჩქინ მოჸოროფე ზეციერ მუმა ელჷ, ნამდა არძას, რასაშ დოვარ ეროვნებაშ უმკუჯინუო, მოჯგირეთ მიბრჩქინანთ დო მიჸორდან იჸი (მათ. 5:45–48).

17. მუჭო შემლებუნა მათეშ 5:43, 44-ის მოჩამილ პრინციპიშ გიმორნაფა? (ქოძირით სურათ).

¹⁷ მუჭო შემლებუნა ამდღა მათეშ 5:43, 44-ის მოჩამილ პრინციპიშ ცხოვრებას გიმორნაფა? მოჯგირეშ ჸოროფა მოხვარუნა, მონაწილება ვემიბღათ ჩხუპეფს დოვარ კონფლიქტეფს (ეს. 2:4; მიქ. 4:3). თეს გეძინელ, მოხვარუნა ჯგირო მივექცუათ არძას, რასაშ, ეროვნებაშ დოვარ რელიგიაშ უმკუჯინუო (საქ. 10:34, 35). თეწკუმა ართო, ვაპატუათ თინეფს, მით ჩქი ელმოჭუანა გურს ვარდა ჩქინო ძვირფას ადამიანეფს ელაჭუანა გურს (მათ. 18:21, 22; მარ. 11:25; ლუკ. 17:3, 4).

ᲒᲘᲜᲝᲭᲧᲕᲘᲓᲘᲚ ᲒᲐᲤᲣᲓᲐᲜ ᲑᲘᲑᲚᲘᲣᲠ ᲞᲠᲘᲜᲪᲘᲞᲔᲤᲘᲗ ᲪᲮᲝᲕᲠᲔᲑᲐ

18. ა) მუშ კეთება ოკო მაფუდან გინოჭყვიდილ? ბ) მუს ოხუ ანწიან სტატია?

¹⁸ მართალო მანგარ მარდულ ვორეთ, ნამდა იეჰოვა ჭიჭე ბაღანეფცალო ვა მოქცუნა დო ბრელ წეს დო კანონს ვა მარზენა. თის ოკო, ნამდა ბიბლიურ პრინციპეფ ქიმიფხვარუათ გადაწყვეტილებეფიშ მეღებაშ დროს (1 კორ. 14:20). თაშ ნამდა, გადაწყვეტილებაშ მეღებაშ დროს გინოჭყვიდილ მაფუდან, ქიგებგათ, მუს ფიქრენს იეჰოვა თე საკითხშენ (ეფეს. 5:17). ჩქინ გადაწყვეტილებეფს იეჰოვაშ ნებას თიშენ მეურინუანთ, ნამდა მიჸორა თინა დო ვართ ხოლო თიშენ, ნამდა დასაჯებაშა მოშქურუნა. სწორ გადაწყვეტილებეფიშ მიოღებელო იეჰოვაქ მუჩეს ხოლო ართ საჩუქარ – სინდის. ზუსტას თე საჩუქარს ოხუ ანწიან სტატია.