ჯგირ მაგალითეფიშ მეჸუნაქ ბრელ კურთხევეფ მომიღ

მა დებაბდჷ ქალაქ კვებეკის, თენა კანადაშ პროვინცია რე, სოდეთ ფრანგულო იჩიებნა. ჩქიმ მშობლეფქ ლუის დო ზელიაქ დიდ ჸოროფათ მობრდეს. მუაჩქიმ მორდებუან კოჩ რდუ, ნამდგას კითხირ უჸორდჷ. მა ჭარუა მიჸორდჷ დო იმენდ მიღუდ, ართ დღას ჟურნალისტ იპჸიდ.

სოდგარენ 12 წანერ ვორდჷ, მუჟამსით მუაჩქიმიშ თანამშრომელქ, რუდოლფ სუზიქ დო თიშ მეგობარქ ჩქინ ჸუდეშა მორთეს. თინეფ იეჰოვაშ მოწმეეფ რდეს. მა ბრელ მუთუნ ვა მიჩქუდ იეჰოვაშ მოწმეეფიშ გურშენ დო ვართ თინეფიშ რელიგია მოინტერესუდ. მარა მანგარო მიმეწონ თიშ ძირაფაქ, მუნერ ლოგიკურო პასუხენდეს თინეფ ჩქინ კითხვეფს ბიბლიაშ გიმორნაფათ. ჩქიმ მშობლეფს ხოლო მეწონეს თინეფიშ მსჯელობაქ დო ათეშენ ქიდიბჭყით ბიბლიაშ გურაფა.

თე დროს მა კათოლიკურ სკოლაშა გილეფშჷ. კლასელეფწკუმა თიშე მიღუდ ჩიება, მუდგას ბიბლიაშე ბგურაფლენდჷ. საბოლათ, თენა ქიგეგეს ჩქიმ მასწავლებერეფქ, მით მღვდელეფ რდეს. თიშ მანგიორო, ნამდა ჩქიმ ნარაგად ბიბლიათ გამტყუნესკო, თინეფქ მთელ კლასიშ წოხოლე ბრალ ქიგებდვეს, ითამ ბუნტიშ ემატახალ ვორდჷ. მართალ რე, თენა ჩქიმო რთულ სიტუაცია რდუ, მარა თის ჯგირ შედეგეფქ მაჸუნ, მუშენდა თექ ქუმოძირუ, ნამდა თი რელიგიურ გურაფეფ, ნამდგას სკოლას მოგურუანდეს, ვათანხმუდ ბიბლიას. ქიმეფხვად, ნამდა თე სკოლას ჩქიმ ადგილ ვარდჷ. ჩქიმ მშობლეფიშ ნებართვათ შხვა სკოლაშა გეგნოფრთჷ.

მსახურებაქ ქიმეჸოროფ

ბიბლიაშ გურაფას ვაგრძელენდჷ, მარა სულიერო წყნარას იბრდუდ, მუშენდა მოშქურუდ კარდოკარ მსახურებაშა. კათოლიკურ ეკლესიას დიდ გავლენა უღუდ დო სასტიკო ოწინააღმდეგუდ ქადაგებაშ საქმეს. კვებეკიშ პრემიერ-მინისტრ მორის დუპლეს ეკლესიაშ პოლიტიკურ მოკავშირე რდუ. თიშ ოჭიშით ხალხ ოწინააღმდეგუდ დო დუდის გიანთხუდ იეჰოვაშ მოწმეეფს. თიმ დროს ქადაგება მართალო დიდ გაბედულებას ითხინდჷ.

ართ ჯიმაქ, სახელო ჯონ რაექ, ნამდგას გალაადიშ სკოლაშ მაჩხორა კლას აფუდ თებულ, მიმეხვარ გივორჯგინკო შიშის. თინა გამოცდილ, თანდაბალ დო მოკრძალებურ პიროვნება რდუ. ჯონ იშვიათო მარზენდჷ რჩევეფს, მარა თიშ ჯგირ საქციელშე ბრელ მუდგარენს ბგურაფლენდჷ. თის უჭირდჷ ფრანგულო რაგად, ათეშენ ხშირას ართო გილეფშით მსახურებაშა დო ვოხვარუდ ფრანგულო ქადაგებას. ჯონწკუმა ხოლოშიან ურთიერთობაქ მიმეხვარ, ნათუა გეგნობჭყვიდკო. იეჰოვაშ მოწმეეფწკუმა შეხვალამაშე ვით წანაშ უკულ, 1951 წანაშ 26 მესის დიბნათ.

ქალაქ კვებეკის, ჩქინ ჭიჭე კრებას უმენტაშო პიონერეფ რდეს. პიონერობაშ დოჭყაფა თინეფიშ ჯგირ მაგალითიქ გინმოჭყვიდრაფუ. თიმწკუმა ბიბლიურ მუხლეფ უმოს ეფექტურო ოკო გიმიბრინეთკო, მუშენდა კარდოკარ პუბლიკაციეფიშ უმშო, ხვალე ბიბლიათ ფქადაგენდით. ათეშენ, ირნერო ვოცადუდ თი ბიბლიურ მუხლეფიშ დოგურაფას, ნამუთ ჭეშმარიტებაშ დაცვებას მიმეხვარებუდ. მარა ბრელ ვარიას იჩიებუდ ბიბლიაშ თი თარგმანეფიშ კითხირშე, ნამდგას კათოლიკურ ეკლესია ვეწონუანდჷ.

1952 წანას ოსურო ქიმიპჸუნ ართ ართგურ და, სიმონე პატრე, ნამუთ ჩქიმწკუმა ართო მსახურენდჷ კვებეკიშ კრებას. ჩქი ოცხოვრებშა მონრეალშა გეგნოფრთით დო დაქორწინებაშე ართ წანაშა ქუმაშუეს ძღაბიქ, ნამდგას ლიზი გივოდვით. მართალ რე, დაქორწინებაშ უკულ ხეთეშე პიონერო მსახურება მივოტე, მარა სიმონე დო მა ირნერო ვოცადუდით უბრალოთ იფცხოვრითკო დო მთელ ოჯახიქ სრულაშე მიბღითკო მონაწილება კრებაშ საქმეეფს.

ვით წანაშ უკულ კინ სერიოზულო ქიდიბჭყჷ ფიქრ პიონერულ მსახურებაშე. 1962 წანას, მუჟამსით კანადაშ ბეთელს უხუცესეფიშ ართ თუთიან „სამეფო მსახურებაშ სკოლას“ მიკიფშჷ, ოთახის ართ ჯიმა, კამელ უოლეტწკუმა გუმანაწილეს. თიშ ენთუზიაზმიქ მსახურებაშ მიმართ ჩქიმწკუმა მანგარო იმოქმედ. განსაკუთრებულო თიშენ, ნამდა თინა დაქორწინებულ რდუ დო ბაღანეფ ხოლო ჸუნდჷ. თიმ დროს, კვებეკის იშვიათობა რდუ მშობელ ქოთ პიონერ ჸოფედკო დო ქოთ ბაღანეფ მორდუკო; თეშ უმკუჯინუო, პიონერო მსახურება კამელიშ მიზან რდუ. გურაფაშ პერიოდის, თინა ირიათო ელამჩანდჷ, ჯგირო დეფიფქრიკო ჩქიმ მდგომარეობაშე. მუსხირენ თუთაშ უკულ ქიმეფხვად, ნამდა შემლებუდ კინ ვიმსახურკო პიონერო. ნამთინე ეჭვიშ თოლით უჯინედ ჩქიმ გადაწყვეტილებას, მარა მა დარწმუნებულ ვორდჷ, ნამდა იეჰოვა აკურთხენდჷ ჩქიმ მონდომას, მეტ მონაწილება მიბღიკო ქადაგებაშ საქმეს.

კვებეკშა დორთა სპეციალურ პიონერეფო

მა დო სიმონექ 1964 წანას სპეციალურ პიონერეფო დებნიშნით კვებეკის, ჩქინ მშობლიურ ქალაქის, სოდეთ მუსხირენ წანას ვმსახურენდით. თე დროშ დინახლე ქადაგებაშ საქმექ წიმი მიდართჷ, მარა წინააღმდეგობეფ იშენით რდუ.

ართ საბატონ დღას ობჭოფეს, ჭიჭე ქალაქ სანტ-მარის, ნამუთ ქალაქ კვებეკიშ გოხოლუას რდუ. ოფიცერქ პოლიციაშ განყოფილებაშა მიდამიჸონ, მუშენდა კარდოკარ ნებართვაშ უმშო ფქადაგენდჷ. უმოს გვიანო, ართ მოსამართლეშა, სახელო ბაილარჯონშა გემნომჸუნეს, ნამდგას ჩქიმ შქურნაფა ოკოდ. თიქ ბკითხჷ მი იჸუაფუდ ჩქიმ ადვოკატ სასამართლოს. მუჟამსით გლენ ჰაუშ სახელ ქოფშინე, ნამუთ იეჰოვაშ მოწმეეფს იცვენდჷ დო ნამდგას არძა იჩინენდჷ, მოსამართლექ წიმიძახ: „ვარ! ოღონდ თინა ვარ!“. თიმ დროს გლენ ჰაუს იეჰოვაშ მოწმეეფიშ ჯგირ დამცველიშ სახელ უღუდ. მალას სასამართლოშე მიბღჷ ცნობა, ნამდა ბრალ მომინწყეს დო გუმათავისუფლეს.

კვებეკის წინააღმდეგობეფ მიღდეს დო ათეშენ რთულ რდუ ჯგირ ადგილიშ დაქირება კრებაშ შეხვალამეფიშ ოტარებელო. ჩქინ კრებას ხვალე ჯვეშ გარაჟიშ ქირებაქ შეიალებუ, სოდეთ გათბობა ვარდჷ დო ზოთონჯის მანგარ ჩხურ რდუ. ჸინ ზოთონჯის ოთახ გატიბესკონ, ჯიმალეფქ ფეჩქ ქუდოდგეს. ხშირას კრებაშ შეხვალამაშ დოჭყაფაშახ მუსხირენ საათით ადრე თე ფეჩქწკუმა იფშაყარუდით, ნამდა მსახურებას მიღდესინ თი შემთხვევეფით ართიანს გურშა ელვუკინითკო.

მართალო სასიამოვნო რე თიშ ძირაფა, მუ ჯგირ შედეგეფ მაჸუნუ ქადაგებაშ საქმეს წანეფიშ მიკულაწკუმა ართო. თიმ დროს 1960-იან წანეფს ქალაქ კვებეკიშ გოხოლუას, მუსხირენ ჭიჭე კრება რდუ; თენეფ რდუ კოტ-ნორიშ რეგიონ დო გასპეშ ნახევარკუნძულ. ამდღა თე ტერიტორიას ბრელ და დო ჯიმა მსახურენს დო თინეფ სქვამ სამეფო დარბაზის იშაყარნა.

გილმალ მსახურებას იბჭყანთ

მა დო სიმონე 1970 წანას გილმალ მსახურეფო დაბნიშნეს. უკულ, 1973 წანას საოლქო მსახურება გუვაგრძელით. თე წანეფს ბრელ მუდგარენ დიბგურე თიცალ უნარიან ჯიმალეფშე, მუნერით რენა ლორიე სამუერ დო დეივიდ სპლეინ,a ნამუთ გილმალ ზედამხედველეფო მსახურენდეს. ირ კონგრესიშ ბოლოს, მა დო დეივიდ ართიანს ელვუჩანდით, მუჭო შემლებდეს გუვაუჯგუშითკო ჩქინ გურაფა. ჯგირო ფშუ, ნამდა ართშა დეივიდიქ მიწუ: „ლეონს, მანგარო მიმეწონ სქან ბოლო მოხსენებაქ. თინა ჯგირ რდუ, მარა სქან თემაშე მა სუმ მოხსენებას გუვაკეთენდჷ!“. ჩქიმ მოხსენებეფს ბრელ ინფორმაციას ინობდვანდჷ. ათეშენ ოკო დიბგურეკო, მუჭო შევამცირკო თინეფ.

საოლქო ზედამხედველეფს ოვალდეს რაიონულ ზედამხედველეფშა გურიშ ელაკინა. კვებეკის ბრელ მაუწყებელ ჯგირო მიჩინენდჷ. თინეფს ჩქიმწკუმა ოკოდეს მსახურება, მუჟამსით რაიონულ ზედამხედველეფშა მევურდჷ. მართალ რე, თე და დო ჯიმალეფწკუმა მსახურება ჯგირ რდუ, მარა რაიონულ ზედამხედველეფს საჭირო დროს ვა ვუთმენდჷ. ართშა, ართ მოჸოროფე რაიონულ ზედამხედველქ ქუგმოშინ: „ჯგირ რე, და დო ჯიმალეფს დროს უთმენქინ, მარა ვაგგოჭყორდას, ნამდა თე მარას თაქ ჩქიმ გურშენ რექ. მა ხოლო მოსაჭირ გურიშ ელაკინა!“. თე რჩევაქ მიმეხვარ, გაწონასწორებულ ვორდკო.

სანარღოთ, 1976 წანას ვეველუდითინ თეშ უბედრობაქ ქუმოხვად. ჩქიმ ძვირფას მეუღლე, სიმონეს სერიოზულ ლახალაქ ქაღოლ დო ღურაშ ლურით ქიდირულუ. თინა დიდებულ მეუღლე რდუ, მუშენდა დუდგინოდვალირო მსახურენდჷ დო იეჰოვა მანგარო უჸორდჷ. მსახურებას აქტიურ მონაწილებაქ მიმეხვარ, გავურზიკო თიშ დინაფას; იეჰოვაშ მარდულ ვორექ, მუშენდა ჸოროფათ ელამირდჷ თე რთულ პერიოდის. უმოს გვიანო, ოსურო ქიმიპჸონ კაროლინ ელიოტ, ნამუთ ინგლისურ ნინაშა მორაგადე დუდგინოდვალირ პიონერ რდუ. თიქ კვებეკშა თიშენ მორთჷ, ნამდა მაქადაგებელეფიშ დიდ საჭიროება რდუ. კაროლინ უშუალო პიროვნება რე დო მთელ გურით ოინტერეს შხვეფიშ მდგომარეობა, განსაკუთრებულო თინეფიშ, მით მორდებუან რე ვარდა ხვალახეთ გინაფლენს დუდის. თიქ მანგარო მიმეხვარ, მუჟამსით ჩქიმწკუმა ართო დიჭყჷ გილმალ მსახურება.

მნიშვნელოვან წანა

მა დუმავალეს, ნამდა 1978 წანაშ იანარს პირველ პიონერულ სკოლა ჩამტარებუდკო კვებეკის. მანგარო ბნერვიანენდჷ, მუშენდა დღას ვემკომრთუმ თე სკოლა, ვართ წიგნ მაფუდ ნაძირეფ. ათეშენ ირფელ მოსწავლეეფშა რდუ დამოკიდებულ. საბედნეროთ, პირველ კლასის, ნამდგას მა ვოგურუანდჷ, ბრელ გამოცდილ პიონერ რდუ. მართალ რე, მასწავლებერ მა ვორდჷ, მარა ბრელ მუდგარენ დიბგურე მოსწავლეეფშე!

უმოს გვიანო, 1978 წანას მონრეალიშ ოლიმპიურ სტადიონს ჩეტარ საერთაშორისო კონგრესიქ, ნამუშ თემა რდუ: „რწმენა, ნამდგას გამარჯვება მოუღ“. თენა რდუ კვებეკის არძაშ უმოს დიდ კონგრეს, ნამდგას 80 000-შე მეტ პიროვნებაქ დესწრჷ. თე კონგრესის მა დუმავალეს ვიმსახურკო ჟურნალისტეფშა ინფორმაციაშ გინმაჩამალ განყოფილებას. ბრელ ჟურნალისტწკუმა მიღუდ რაგად დო ბედნერ ვორდჷ, მუშენდა თინეფ ჯგირ მუდგარენეფს ენიჭარანდეს ჩქინ გურშენ. 20 საათშე მეტ ხანს ტელევიზიათ დო რადიოთ გინოჩანდეს ინტერვიუეფს დო ოშობით სტატიაქ იჭარ ბეჭდურ მედიას. თენა მართალო დიდ დამოწმება რდუ!

შხვა ტერიტორიაშა გინულა

ჩქიმო დიდ ცვლილებაქ 1996 წანას მოხვად. ნათუაშ უკულ ვმსახურენდჷ კვებეკის, სოდეთ ფრანგულ ნინაშა იჩიებდეს. მარა ასე დუმავალეს ტორონტოშ გოხოლუას ვიმსახურკო, სოდეთ ინგლისურ ნინაშა იჩიებდეს. ფიფქრენდჷ, ნამდა თე დავალებაშო ვა ვორდჷ შესაფერის დო თინა ხოლო მანერვიანენდჷ, მუჭო ვაკეთენდჷ მოხსენებეფს ჩქიმ აკოტახილ ინგლისურით. ათეშენ, უმოს ხშირას ოკო იბლოცკო დო უმოსო მივენდიკო იეჰოვას.

ამდღა შემლებ ფთქუე, ნამდა მართალო დიდ ხიოლ მომიღ, ჟირ წანას ტორონტოშ გოხოლუას მსახურებაქ. კაროლინ მოთვინებათ მოხვარუდ ინგლისურიშ გურაფას დო ჯიმალეფ ხოლო ელამრედეს დო გურშა ელამკინანდეს. ჩქი ხეთეშე ქუმაშის ახალ მეგობრეფქ.

სარაიონო კონგრესშო მომზადებაწკუმა ართო, ხშირას ობიშხა ონჯუას, სოდგარენ ართ საათის კარდოკარ ვმსახურენდჷ. ნამთინექ შილებე იფიქრუკო: „მუშენ ოკო იდე მსახურებაშა კონგრესიშ წოხლენ დღას?“ მარა მსახურებას ჯგირ შემთხვევეფ, მა ძალეფით ემოფშანდჷ. ამდღა ხოლო მსახურებას მონაწილება უმოს ხიოლს მარზენს.

მა დო კაროლინ 1998 წანას სპეციალურ პიონერეფო დაბნიშნეს მონრეალს. ბრელ წანას ჩქიმ დავალება რდუ, სპეციალურ სამქადაგებლო კამპანიაშ ორგანიზება გამკეთებუდკო დო იფთანამშრომლიკო ჟურნალისტეფწკუმა, ნამდა ხალხის არასწორ წარმოდგენა მეუდინეთკო იეჰოვაშ მოწმეეფიშ გურშენ. მა დო კაროლინს მოხიოლნა, ნამდა ამდღა უცხოელეფწკუმა ფქადაგენთ, მიდგაქ კანადაშა ამარდე გინორთჷ ოცხოვრებშა. ხშირას თინეფ განწყობილეფ რენა, მეტ ქიგეგან ბიბლიაშ გურშენ.

მუჭოთ მიფშინე, ნათუაშე 68 წანიან მსახურებაქ ქიანაშ კურთხევეფ მომიღ. არძაშ უმოს დიდ კურთხევა თინა რე, ნამდა ქიპჸოროფე მსახურება დო ბრელს მივეხვარ ჭეშმარიტებაშ გაგებას. თიშ უკულ, მუთ ჩქიმ ოსურსქუაქ, ლიზიქ დო თიშ მეუღლექ სქუალეფ მორდეს, ქიდიჭყეს სრულ დროთ პიონერო მსახურება. გურს მიხარენს თიშ ძირაფა, ნამდა თინა დუდგინოდვალირო მსახურენს. განსაკუთრებულო მარდულ ვორექ თი თანაქრისტიანეფიშ, მიდგაქ ჯგირ მაგალით მუჩეს დო ბრძნულ რჩევეფით მიმეხვარეს, სულიერო მიბრდიკო დო მიბღიკო თეოკრატიულ პასუხიშმგებლობეფ. ქიმეფხვად, ნამდა ხვალე იეჰოვაშ წმინდა შურიშ მოხვარათ რე შეიოლებერ, ართგურო შევასრულათ ჩქინ დანიშნულებეფ (ფსალმ. 51:11). იეჰოვაშ დიდო მარდულ ვორექ, მუშენდა თიქ მუჩჷ დიდებულ პატი, განვადიდე თიშ სახელ! (ფსალმ. 54:6).