გინირთით უჯგუშ მასწავლებერეფო

1. მუს ოკო გებუჯგუშათ დო მუშენ? (2 ტიმ. 4:2; ქოძირით სურათ).

ᲘᲔᲡᲝᲥ მუშ მიმაჸუნალეფს უწუ: „ქიმეხვარით [ხალხის] ჩქიმ მოწაფეეფო გინირთან . . . ქუდაგურეთ თი ირფელიშ მეჸუნა, მუთ ჩქიმდე დიგურეთ“ (მათ. 28:19, 20). იესოშ თე სიტყვეფ ოძირანს, ნამდა არძა ქრისტიანქ მასწავლებერქ ოკო იჸუას. მართალ რე, იეჰოვას მოჸუნს მუშ ხოლოშა თიცალ ადამიანეფ, „მიდგაშ გურ მზათ რე სახიოლო ამბეშ მიოღებელო“ დო ანგელოზეფ ხოლო მოხვარუნა თეცალ ადამიანეფიშ გორუას, მარა ჩქი ხოლო ჯგირო ოკო მიჩქუდან, მუჭო გუვოჩინებაფუათ თეცალ ადამიანეფს იეჰოვა (საქ. 13:48; იოან. 6:44; გიმოცხ. 14:6). ქიგიფშინათ მოციქულეფიშ, პავლეშ დო ბარნაბაშ, მაგალით. მუჭოთ ბიბლია იჩიებ, იკონიონს სინაგოგას თინეფქ „თიშმაჯგირას იქადაგეს, ნამდა ბრელ იუდეველქ დო ბერძენქ ირწმუნ“ (საქ. 14:1). მუჭოთ იძირენ, თინეფ ჯგირ მასწავლებერეფ რდესჷ. თე საქმეს გაუჯგუშება ჩქი ხოლო მოსაჭირუნა (წეკითხით 2 ტიმოთეშ 4:2).

2. მუშენ შილებე ფიქრენდას ნამთინე, ნამდა დღას ვეჸუაფ ჯგირ მასწავლებერ?

² ნამთინე ფიქრენს, ნამდა დღას ვეჸუაფ ჯგირ მასწავლებერ, მუშენდა ვა რე გურაფილ ვარდა თეშო საჭირო უნარ ვა უღჷ. ბიბლიას მოშინაფილ ნამთინე ღორონთიშ მსახურ ხოლო ფიქრენდჷ, ნამდა ვაკეთებედ თე საქმე (გიშ. 4:10; იერ. 1:6). ნამთინე ხოლო მსახურებას შხვეფზმა ჯგირ შედეგეფ ვა უღუნ თიშენ ფიქრენს, ნამდა ვა რე ჯგირ მასწავლებერ. ოკო ვეველუდათ, ნამდა მიდგას დურაგადუანთინ, არძა ჯგირო მიღენს სახიოლო ამბეს. ვართ ჩქინ მონდომაშა რე დამოკიდებულ, ჯგირ შედეგეფ მაღვენუნან დო ვარ მსახურებას, მუშენდა, მუჭოთ უკვე ფთქვითჷ, იეჰოვა დო ანგელოზეფ მიკმაჯინენა თე საქმეს, ნამდა ქიმვოგორუათ თეცალ ადამიანეფს. მარა ჩქი იშენით მოკონა, მუზმათ შილებენ, ჯგირო გუვაკეთათ თი საქმე, მუთ ჩქინ მხარეშე რე ოკეთებელ. ზუსტას თეს ქიმმეხვარებუნა თე სტატია. გუვარჩიენთ სუმ მხარეს, ნამუთ უჯგუშ მასწავლებერეფო გინმოშქვანა.

ᲒᲔᲛᲨᲐᲠᲗᲘᲗ ᲮᲐᲚᲮᲘᲨ ᲛᲓᲒᲝᲛᲐᲠᲔᲝᲑᲐᲨᲐ

3. მუშენ მოწონდჷ ხალხის იესოშ რჩქილა?

³ მუჭოთ ბიბლიას ჭარჷ, იესოს ჯგირო „უჩქუდ კოჩიშ ხასიათ“ (იოან. 2:25). თენა ნიშნენს, ნამდა თის უჩქუდ, მუს დო მუშენ ფიქრენდეს ადამიანეფ. იესოს უჩქუდ, მუ ოსაჭირუდეს მუშ მარჩქილეეფს, ათეშენ შეულებუდ ზუსტას თი საკითხეფშენ ეჩუკო, ნამუთ თინეფს ოინტერესუდეს. იესო ორწყედ, ნამდა ხალხ სულიერო შქირენულ რდჷ დო რელიგიურ წინამძღოლეფს მუნეფიშ მიშაღალირ წესეფით დო ტრადიციეფით უჩა დღაშა გეურდეს თინეფს (მათ. 9:36; 23:4). ათეშენ, ოცადუდ, ზუსტას თე საკითხეფშენ ქეჩუკო თინეფს. მაგალთო თაშ აკეთ გვალას ქადაგებაშ დროს. ხალხ შურ დო გურით ურჩქილედ თის, მუშენდა ზუსტას თიშე ეჩიებუდ, მუთ თინეფს ოწუხუდეს.

4. მუჭო შემლებუნა ვოძირუათ, ნამდა მოკონა, გაუგათ ადამიანეფს? (ქოძირით სურათეფ).

⁴ ჩქი ხოლო ვოცადუთ, გემშაბრთათ ხალხიშ მდგომარეობაშა დო ქიფიფქრათ, მუ შილებე აწუხენდან თინეფს. სატანაშ ქიანას არძას უღჷ მუდგარენ პრობლემა. თენა ვაგმოჭყორდუნან-და, უმოსო შემალებენა ქუგუგათ თი ადამიანეფს, მიდგას უქადაგუთ. მაგალთო, დეფიქრით, ბოლო დროს თქვან ტერიტორიას მუთუნ თიცალ ხომ ვა მოხვალამე, მუთ შილებე ადამიანეფს აწუხენდან? მშობლეფ ხომ ვა ნერვიანენა თიშე, მუსხით ქორენა თხილერ მუნეფიშ სქუალეფ სკოლას? ვარდა სამუშეფიშ შიბა ხომ ვა ჭირსჷ? ქეცადით, წერმიდგინათ, მუ დღა უღჷ ხალხის თე ძნელო გინაღალარ დროს თი იმენდიშ უმშო, ნამდგას ბიბლია ირზენს (2 ტიმ. 3:1; ეს. 65:13, 14).

5. მუნერ მასწავლებერ რდჷ იესო დო მუნერეფ რდესჷ ფარისეველეფ? (მათ. 11:28–30).

⁵ იესოს უჸორდჷ ადამიანეფ დო თიშმაჯგირას ოქცუდ თინეფს, ნამდა თე ჸოროფას თინეფ ხოლო გინაფლენდეს. ფარისეველეფ ჟიშე უჯინედეს უბრალო ხალხის დო მუთუნო ვემიორჩქუდეს თინეფ (მათ. 23:13; იოან. 7:49). მარა იესო გემუანო დო პატიცემათ ოქცუდ ადამიანეფს. თინა ლიბ ხასიათიშ დო თანდაბალ რდჷ დო თენა ხოლო ოხვარუდ, ჯგირ მასწავლებერ ჸოფედუკო (წეკითხით მათეშ 11:28–30). ჩქი ხოლო ადამიანეფს ქადაგებაშ დროს პატიცემათ დო ჸოროფათ ოკო მივექცუათ.

6. მუ მიმეხვარებუნა, გემუანო დო პატიცემათ მივექცუათ თინეფს, მიდგას ვაკონა ჩქინ მორჩქილაფა ვარდა მოწინააღმდეგუნა?

⁶ ნამთინეს ვაკო ჩქინ მორჩქილაფა ვარდა გვალო მოწინააღმდეგუნა. მუჭო ოკო მიფქცუათ თეცალ დროს? იესოქ დუმოგურუეს, ნამდა უბრალოთ იგივე ვა უპასუხათინ თენა ვა რე დასაბაღ. თიქ თქუ: „ჯგირ უკეთით თინეფს, მიდგას ჯოგუთ, დოხვამეთ თქვან მაჭყალეფ დო ილოცით თინეფშო, მით შეურაცხყოფას მიგორინუანა“ (ლუკ. 6:27, 28). თეშ კეთება უმოს ადვილ მაჸინა, მუჟამსით დეფიფქრებუთ მუშენ შილებე მოქცუდან თინეფ თაშ. ნამთინეს მართალო ვაკო ჩქინ მორჩქილაფა. მარა ნამთინეს შილებე ოჯახის უღუდას პრობლემა, ვარდა მუდგარენ შხვაშე ნერვიანენდას. შილებე უბრალოთ გლახა დროს იპჸით თინეფშა მეულირქ. მუჭოდგა ვა რდასინ, ოკო მივაჸუნათ ბიბლიას ინოჭარილ რჩევას: „თქვან ჩიება ჯიმკათაფილ ოჭკუმალცალ გემუან რდასჷ, თეშნერო გარჩქვენუნა, მის მუნერ პასუხ მეჩათ“ (კოლ. 4:6). თაშ ნამდა, ადამიანეფ ქომიჸორა დო ქუგუგათინ თეს ქივეცადებუთ-და, ნაკლებო მეწყინებუნა თინეფიშ საქციელ დო თენა ხეს შემინწყუნა, უჯგუშ მასწავლებერეფქ ქიპჸუათ.

ᲒᲔᲒᲛᲘᲠᲘᲜᲔᲗ ᲦᲝᲠᲝᲜᲗᲘᲨ ᲡᲘᲢᲧᲕᲐ

7. მუს ირინუანდჷ იესო გურაფაშ დროს? (იოან. 7:14–16).

⁷ იესო ხალხის მუშ აზრეფს ვაგურუანდჷ, თინა ჩიებაშ დროს ღორონთიშ სიტყვას ირინუანდჷ დო თიცალ ადვილო დო გასაგებო ეუწყუნდჷ, ნამდა ქიგეგესკო დო ქიდემახსოვრესკო. ბიბლია იესოშ გურშენ იჩიებ, ნამდა თინა „ღორონთიშ ძალაუფლებათ ოგურუანდჷ დო ვართ ხოლო თეშ, მუჭოთ მწიგნობარეფ“. ათეშენ თიშ მარჩქილე ხალხ მანგარ გაკვირებულ რდჷ (მარ. 1:22). იესოშ დროს მწიგნობარეფ ცნობილ რელიგიურ წინამძღოლეფიშ ნარაგადის გინოჩანდეს ხალხის, მარა იესოს ირო წმინდა წერილეფშე მოჸუნდჷ აზრეფ. თინა ღორონთიშ სქუა რდჷ დო ზეცას ცხოვრენდჷ მუამუშწკუმა ართო. ათეშენ მუშ რჩქინათ ხოლო ბრელ თიცალ მუდგარენ არაგადედ, მუთ გაკვირენდ ხალხის, მარა თინა ღორონთიშ სიტყვას გიორსხუანდჷ მუშ გურაფეფს დო თიშ საშვალებათ ეუნწყუნდჷ ხალხის, მუს ითხინდჷ ღორონთ (წეკითხით იოანეშ 7:14–16). თეშნერო თიქ ჯგირ მაგალით დოუტუ მუშ მიმაჸუნალეფს.

8. მუჭო ირინუანდჷ პეტრე ხოლო იესოცალო ღორონთიშ სიტყვას?

⁸ მოწაფეეფ ხოლო იესოცალო იქციებუდეს დო ღორონთიშ სიტყვაშე ოგურუანდეს ხალხის. მაგალთო, ქიდეკვირით, ახ. წ. 33 წანაშ ჟარნეჩდომავითა დღაშ დღახუს, სიტყვათ გიშულაშ დროს, მუჭო გიმირინუ პეტრექ წმინდა წერილეფ. მართალ რე, თინა მანგარ გურაფილ კოჩ ვა რდჷ, მარა წმინდა წერილეფშე თიშმაჯგირას გენწყჷ თი წინასწარმეტყველებეფ, ნამდგაქ იესოშე შისრულ, ნამდა ორაგადე ხალხიშ გურშა ქიმიღ (საქ. 2:14–37). მუქ იჸუ შედეგიქ? „არძაქ, მიდგაქ ხიოლით მიღჷ თიშ სიტყვა, დინათ დო თიმ დღას სოდგარენ 3 000 კოჩიქ მიაძინ მოწაფეეფს“ (საქ. 2:41).

9. მუშენ ოკო გიმიბრინუათ შხვეფშა გურაფაშ დროს ღორონთიშ სიტყვა?

⁹ ბიბლიაშ უჯგუშო ადამიანიშ გურშა მუთუნს ვამოქმედებე (ებრ. 4:12). ათეშენ შხვეფშა გურაფაშ დროს მთელ ყურადღება ბიბლიაშა ოკო მაფუდან გინოღალირ. მოკონა, ღორონთიშ სიტყვა ვოგურუათ ადამიანეფს დო ვართ ხოლო ჩქინ აზრეფ (2 ტიმ. 4:2). იგავეფიშ 2:6-ის ჭარჷ: „მუშენდა სიბრძნეს იეჰოვა ირზენს; თიშე მოურს რჩქინა დო ინონჭაფაშ უნარ“. თაშ ნამდა, მუჟამსით წმინდა წერილეფს იბრინუანთ, თაშ ქოფთქუათინ, იეჰოვას ვარზენთ რაგადიშ საშვალებას (მალ. 2:7). ჩქი მოკონა, ადამიანეფს ქუვოძირუათ, ნამდა ბიბლიას თიცალ განსაკუთრებულ მუდგარენეფ ჭარჷ, მუთ მუშ რჩქინათ კოჩის მუთუნით ვარაგადედ თინეფშა. თექ ენოჭარილ აზრეფ ღორონთშე მოურს დო მოხვარუნა, გურ გაუხარათ თის დო ბედნერეფ ვორდათ (2 ტიმ. 3:16, 17).

10. მუჭო შემლებუნა მაგურაფალს მთელ ყურადღება ღორონთიშ სიტყვაშა გეგნვოღალაფუათ?

¹⁰ ბიბლიაშ გურაფაშო მომზადებაშ დროს ქიფიქრით, მუჭო შეილებუნა, თქვან მაგურაფალს მთელ ყურადღება ღორონთიშ სიტყვაშა გეგნაღალაფუათ. თქვან ბიბლიაშ მაგურაფალ ოკო ორწყედას, ნამდა, მართალ რე, აზრეფიშ უჯგუშო გაგებელო დო დამახსოვრებელო სურათეფს დო ვიდეოეფს იბრინუანთ, მარა ჩქინ მთავარ სახელმძღვანელო ბიბლია რე. თაშ ნამდა, გურაფაშ დროს წეკითხით მთავარ ბიბლიურ მუხლეფ დო ქიმეხვარით მაგურაფალს, დეფიქრას, მუშ გურაფა შეულებ თინეფშე. სურათეფიშ დო ვიდეოეფიშ გარჩიებაშ დროს ქიმეხვარით მაგურაფალს თიშ ძირაფას, მუჭო რე თინეფ დაკავშირებულ ბიბლიურ პრინციპეფწკუმა. თეშო იშენდოიშენ აუცილებერ ვა რე, ქიანაშ იჩუათ ვარდა ბრელ ბიბლიურ მუხლ ეშეკითხათ. თეშ მანგიორო, ქიმეჩით მაგურაფალს დრო, დეფიქრას თითოეულ ეშაკითხირებულ მუხლშე დო, საჭიროქ ქიჸუ-და, დუდშე ხოლო წეკითხით. თეშნერო წიგნიშ, სურათიშ ვარდა ვიდეოშ მასწავლებერეფ ვარინ, ბიბლიაშ მასწავლებერეფ იპჸით (1 კორ. 2:13).

11, 12. ა) ნამ სიტუაციეფს შილებე დემესაჭირან მოთვინებაქ ბიბლიაშ მაგურაფალწკუმა? (საქ. 17:1–4; ქოძირით სურათ). ბ) მუ ვა უჩქჷ ნამთინეს დო მუჭო შემლებუნა თინეფს ქიმვეხვარათ?

¹¹ ბიბლიაშ მაგურაფალს მუდგაინ საკითხიშ გაგებაქ ვარდა ენონჭაფაქ გუჭირდ-და, მოთვინება გეგმირჩქინით. არძა ართნერო ვემურს სულიერო წიმი. ნამთინეს შილებე ქიანაშ დროქ დესაჭირას თიცალ საკითხიშ ინანჭაფალო, ნამუთ თქვანო მანგარ ადვილ იძირე. ქიგიშინით, ნამდა თესალონიკეს მახორუ იუდეველეფშა, პავლეს მუსხირენშა აჸუ ეიონწყუმალქ წმინდა წერილეფქ, ონდო თინეფშე ნამთინე ინანჭუდ საკითხის (წეკითხით საქმეეფიშ 17:1–4).

¹² მოთვინებას თით ხოლო გეგმიბრჩქინანთ, ნამდა კითხვეფს ქუდუსვენთ მაგურაფალს დო კინ ჩქი უპასუხათინ თიშ მანგიორო, თის ქიმეფჩანთ პასუხიშ მეჩამაშ საშვალებას. შურ დო გურით ქურჩქილით დო ქეცადით, ქენანჭათ, მუს ფიქრენს დო მუშენ ფიქრენს თაშ. უკულ წეკითხით დო გარჩით თიცალ ბიბლიურ მუხლეფ, ნამუთ ქიმეხვარებ თის, იეჰოვაშ აზრ ქიგეგას თე საკითხიშ გურშენ. ართ მუდგარენქ ხოლო ვაგგოჭყორდან: ბრელ ადამიანს შურო გინნაფაჩა ვა აფჷ ბიბლია დო ვა უჩქჷ, ნამდა თინა ეფშა რე თიცალ აზრეფით, ნამდგას შეულებ თინეფიშ ცხოვრებაშ თირუა. შეილებუნა ქაძირუათ მაგურაფალს წიგნის „მარადიულო გეხარით ცხოვრებათ“ მოჩამილ ჩარჩო „ქიდიჭყ ბიბლიაშ კითხირ“ დო თიშ საშვალებათ გეუნწყით, მუსხი მნიშვნელოვან მუდგარენიშ გურაფა შეულებ ბიბლიაშე. უკულ შეილებუნა ქვესათაურიშ „პრაქტიკულ სიბრძნე ირდღაშიან ცხოვრებას გიმარნაფალო“ თუდო მოჩამილ ართ ვარდა ჟირ მუხლ გეგმირინუათ თიშ ოძირაფალო, მუჭო მოხვარუნა ბიბლია, ბედნერ ცხოვრება მიღუდან. თაშ ნამდა, ბიბლიას მუნერ ძალა უღუნ თეს თქვან მაგურაფალს ქაძირანთ-და, უმოსო მაკორინე თევრეშე უმოსიშ გაგება დო ნაგურეფუშ გიმორნაფა.

ᲘᲔᲰᲝᲕᲐ ᲒᲐᲩᲘᲜᲔᲑᲐᲤᲔᲗ

13. მიშა ოკო მაფუდან მთელ ყურადღება გინოღალირ, მუჟამსით შხვეფს ვოგურუანთ? ქიმიჸუნით მაგალით.

¹³ ჩქინ მიზან რე, ნამდა მარჩქილეეფს იეჰოვაშ გაჩინებაფას დო თიწკუმა დაახლოებას ქიმვეხვარათ (იაკ. 4:8). მუდგარენით ჩქი თი ადამიანს მობგენთ, მიდგაშათ თეატრის სცენაშ განათება რე ჩაბარებულ. სპექტაკლიშ დროს თიქ სინთე მუშ დუდის ვარინ, სცენას დო თი მსახიობეფს ოკო მეურინუას, მით თექ გიშულა, ნამდა ირკოჩ თინეფს ორწყედას. თეშნერო ჩქი ხოლო მუჟამსით შხვეფს ვოგურუანთ, მთელ ყურადღება იეჰოვაშა მაფუნა გინოღალირ დო ვართ ხოლო ჩქინ დუდშა.

14. მუჭო შემლებუნა ქიმვეხვარათ ბიბლიაშ მაგურაფალს იეჰოვაშ გაჩინებაფას?

¹⁴ ბიბლიაშ გურაფაშ დროს ქიმეხვარით მაგურაფალს, თეშ ქიჸოროფუას იეჰოვა, ნამდა თიშა გურიშ გახარებაქ მაკორინას (იგავ. 27:11). ვა მოკონა, თეშ გიშამირთან, ითამ მაგურაფალს სოდგაინ გაწევრიანებელ მოთხოვნეფს გინოფჩანდათ. ჩქი მოკონა, ბიბლიაშ მაგურაფალქ თიშ გურშენ თირუას ცხოვრება, ნამდა ოკო, იეჰოვას გუხარას გურ. მაგალთო, თის მუდგაინ გლახა ჩვევაშ ჩათხინაფა ქოუჭირს-და, ქოკითხით: „მუშენ ჯოგჷ იეჰოვას თეცალ საქციელ? მუშენ ითხინს თინა, თიცალ მუდგარენ მივოტუათ, მუთ მოსიამოვნუნა? მუჭო იძირ თევრეშე, მუდგას იეჰოვა ფთხულენა, მუსხით მანგარო უჸორთ თის?“. მუთ უმოსო მეხვარებუთ ბიბლიაშ მაგურაფალს, ქიფიქრას იეჰოვაშენ დო თიშ თვისებეფშენ, თით უჯგუშო ქოძირუნს, მუნერ მოჸოროფე მუმა პჸუნა. შედეგო თის ხოლო ქეჸოროფებ იეჰოვა დო ოკოდას იჸი, თიშ მოსაწონო იცხოვრას.

ᲕᲔᲛᲘᲝᲢᲣᲐᲗ ᲒᲐᲣᲯᲒᲣᲨᲔᲑᲐ

15. მუ მიგეხვარებუნა, ვემიოტუათ გაუჯგუშება?

¹⁵ ჯგირ იჸუაფ, ქილოცათ დო იეჰოვას ქოთხუათ, ქუგოძირან, მუჭოთ მასწავლებერეფს, მუს გოსაჭირუნა გაუჯგუშება (1 იოან. 5:14). უკულ საჭირო რე, ლოცვაშ თანახმას ქიმოქმედათ, მაგალთო, გეგმირინუათ თი ირფელ, მუდგას იეჰოვა კრებაშ შეხვალამეფს გოგურუანა. თეწკუმა ართო, შეილებუნა თიცალ თანაქრისტიან მიდეჸუნათ ბიბლიაშ გურაფაშა, ნამუთ ჯგირ მასწავლებერ რე დო გურაფაშ უკულ ქოკითხათ, მუ კუნთხუთ გოსაჭირუნა გაუჯგუშება. ოკო ვაგგოჭყორდან თიქ ხოლო, ნამდა შილებე ნამთინე საკითხ თქვანო მანგარ ნაჩინებ რდასჷ, მარა ბიბლიაშ მაგურაფალშო შურო ვა რდასჷ თაშ. ათეშენ ქეცადით, თიშ თოლით ქოუჯინათ ოგურაფალ მასალას. ბიბლიაშ გურაფაშ დროს ქეცადით, ქაძირუათ პიროვნებას, მუსხით ჯგირ რე თინა, მუდგას გურაფლენს დო მუ ჯგირობუაშ მოღალა შეულებ თეს მუშა. თეშნერო ქიმეხვარებუთ თის, დეახლოვას იეჰოვა ღორონთის დო ბედნერ ცხოვრება ქოუღუდას (ფსალმ. 1:1–3).

16. მუშენ იჸუაფ ჯგირ, უჯგუშ მასწავლებერეფო გინორთას ვემვოტენთ-და?

¹⁶ შხვეფშა იეჰოვაშ გურშენ გურაფა რე ართ-ართ, მუდგას არძაშ უმოს დიდ ხიოლ მოუღ ჩქინდა. ახალ ქიანას ხოლო უმოს მეტ ადამიანშა მაჸინა დაგურაფალ იეჰოვაშ გურშენ. თაშ ნამდა, მორთ ქივეცადათ, გემშაბრთათ ხალხიშ მდგომარეობაშა. გეგმიბრინუათ ღორონთიშ სიტყვა გურაფაშ დროს დო ქიმვეხვარათ ადამიანეფს იეჰოვაშ უჯგუშო გაჩინებაფას. თეშ კეთება უჯგუშ მასწავლებერეფო გინმოშქვანა.