ქიმეხვარით თინეფს, „მიდგაშ გურ მზათ რე ულიებ სიცოცხლეშ მიოღებელო“

1. მუ დო მუნერ რეაქცია უღჷ ხალხის სახიოლო ამბეშ მორჩქილაფაშენ? (საქ. 13:47, 48; 16:14, 15).

ᲞᲘᲠᲕᲔᲚ საუკუნეს ბრელქ სახიოლო ამბეშ მორჩქილაფა დო ხეთეშე მიღჷ თინა (წეკითხით საქმეეფიშ 13:47, 48; 16:14, 15). ამდღა ხოლო რენა თიცალეფ, მით ართ მორჩქილაფათ ხიოლით ღებულენა სახიოლო ამბეს. ნამთინეს ხოლო, მართალ რე, დუდშე ქიანაშის ვაინტერეს სამეფოშ ცნობა, მარა უკულ ურჩქინდუ სურვილ, უმოს ქიგეგას ღორონთიშ გურშენ დო დიჭყას თიშ მსახურება. მუ ოკო ვაკეთათ, მუჟამსით მსახურებას თიცალ ადამიანეფს შეფხვადუთ, „მიდგაშ გურ მზათ რე ულიებ სიცოცხლეშ მიოღებელო“?

2. მუჭო მოგენს მოწაფეეფიშ მომზადება ორტვინს მუშობას?

² ქიმიპჸუნათ თეცალ მაგალით: მოწაფეეფიშ მომზადებაშ საქმე მოგენს ორტვინს მუშობას. შილებე ორტვინს ნამდგაინ ნერგიქ შხვეფშე ადრე გემკიღას დო დემონდას. ალბათ, ვა უჯინეთ შხვა ნერგეფ მუჟამ მიკიღანს დო მუჟამ იჸი მზათ მიკაწილარო. თის გოპწილუნთ, ნამუთ უკვე მოულირ რე. მარა, ეშობას, შხვა ნერგეფიშ მიკოლუაფას დო წყარუას ხოლო გუვაგრძელენთ. თეშნერო, ჩქი ხოლო, მუჭოთ ქეშეფხვადუთ მიდგაინს, მით მზათ რე სახიოლო ამბეშ მარჩქილაფარო, ხეთეშე იპჭყანთ თიშ მოხვარას, ნამდა გინირთას ქრისტეშ მოწაფეთ. მარა, თეწკუმა ართო, ვოცადუთ ინტერეს გოურჩქინათ თინეფს, მიდგას მეტ დრო ოსაჭირუნა თიშ ინანჭაფალო, მუშმაშხვა ფას უღჷ სახიოლო ამბეს (იოან. 4:35, 36). გურგოჩამილობა ქიმმეხვარებუნა, ქიმეფხვადათ, მის მუჭო მეუდირთათ. მორთით დუდშე თიშე ქიფჩუათ, მუჭო მივეხვარათ გვალო პირველ ჩიებას თიცალ პიროვნებას, მით მზათ რე სახიოლო ამბეშ მარჩქილაფარო. უკულ თიშე ხოლო ქობრაგადუათ, მუჭო შემლებუნა ქიმვეხვარათ თეცალეფს, გაგრძელან სულიერო წიმი ულა.

ᲛᲣᲭᲝ ᲛᲘᲕᲔᲮᲕᲐᲠᲐᲗ ᲗᲘᲜᲔᲤᲡ, ᲛᲘᲗ ᲛᲖᲐᲗ ᲠᲔᲜᲐ ᲡᲐᲮᲘᲝᲚᲝ ᲐᲛᲑᲔᲨ ᲛᲐᲠᲩᲥᲘᲚᲐᲤᲐᲠᲝ?

3. მუ ოკო ვაკეთათ, მუჟამსით შეფხვადუთ თიცალ ადამიანს, მით ინტერესის გიმირჩქინანს? (1 კორ. 9:26).

³ მუჟამსით მსახურებას ქეშეფხვადუთ თიცალ ადამიანეფს, მით ინტერესის გიმირჩქინანა, მოკონა ხეთეშე ქიმვეხვარათ თინეფს, ქიგედირთან სიცოცხლეშ შარას. თეცალ შემთხვევას დრო ოკო ვებღათ დო პირველ ჩიებას ქეშეფთავაზათ თინეფს ბიბლიაშ გურაფა დო ქუდვაპატიჟათ კრებაშ შეხვალამაშა (წეკითხით 1 კორინთელეფიშ 9:26).

4. ქიმიჸუნით შემთხვევა, მუჟამსით პიროვნებაქ ხეთეშე ქიდიჭყჷ ბიბლიაშ გურაფა.

⁴ ქეშეთავაზით ბიბლიაშ გურაფა. ნამთინე, მიდგას მსახურებას შეფხვადუთ, მზათ რე ბიბლიაშ გურაფაშ დაჭყაფალო. მაგალთო, ართ ახალგაზრდა ოსურქ კანადას ცააშხა დღას სტენდშა ქიმერთჷ დო გეჭოფ ბროშურა „მარადიულო გეხარით ცხოვრებათ!“. თი დაქ, ნამუთ სტენდწკუმა გერდჷ, გეუნწყჷ თე პიროვნებას, ნამდა ბროშურაშ საშვალებათ შეულებუდ ბიბლიაშ უფასო გურაფაშ დოჭყაფა. თე ოსურქ დეინტერეს დო თინეფქ ართიანს ტელეფონიშ ნომერეფ გეგწუღეს. კინ თიმ დღას, ჭიჭე უმოს გვიანო, თე ახალგაზრდა ოსურქ ქიმეჭარ ჩქინ დას დო კითხჷ, მუჟამ ოკო დიჭყესკო ბიბლიაშ გურაფა. მუჟამსით თე დაქ უწუ საბატონს დიპჭყათია, თიქ უპასუხ: „ჭუმანშე მუს თქუანქ? ჭუმან ხოლო ფჩოდჷ“. თაშ ნამდა, თინეფქ ობიშხას ჩატარეს პირველ გურაფა. თე ოსურქ ჟეშხას კრებაშ შეხვალამაშა ხოლო ქუმორთჷ დო მალა-მალას გეგნოდგჷ ნაბიჯეფ.

5. მუ შემლებუნა ვაკეთათ, მუჟამსით ვორწყეთ, ნამდა პიროვნება დიო მზათ ვა რე ბიბლიაშ გურაფაშ დაჭყაფალო? (ქოძირით სურათეფ).

⁵ მუშო ოკო რაგად, ჩქი ვეველუთ, ნამდა არძა, მით მომრჩქილუანა, წოხოლენ აბზაცის მოშინაფილ ახალგაზრდა ოსურცალო, ხეთეშე ქიდიჭყანს ბიბლიაშ გურაფას. ნამთინეს შილებე უმოს დროქ დესაჭირას. შილებე დიო საჭიროქ იჸუას, მუშო საინტერესო საკითხშე ქივეჩუათ. მარა იმენდის ვა ვოდინუანთ დო ყურადღებაშ მექციებას ვემვოტენთ-და, შილებე თიწკუმა ბიბლიაშ გურაფაშ დოჭყაფაშ საშვალებაქ ქუმმაჩან. მუჭო შემლებუნა ხალხის შეფთავაზათ ბიბლიაშ გურაფა? მორთ ქობძირათ, მუს იჩიებუნა თე საკითხწკუმა დაკავშირებით თი და დო ჯიმალეფ, მიდგას ჯგირო გიშალენა ბიბლიაშ გურაფეფიშ დოჭყაფა.

6. მუჭო შემლებუნა ბიბლიაშ გურაფა შეფთავაზათ დაინტერესებულეფს?

⁶ თი მაუწყებელეფ დო პიონერეფ, მიდგას ბიბლიაშ გურაფეფიშ დოჭყაფა ჯგირო გიშალენა, იჩიებუნა, ნამდა ნამთინე ტერიტორიას გურაფაშ შეთავაზებაშ დროს უჯგუშ რე, შურო ვა შინუე „გურაფა“, „ბიბლიაშ ოგურაფალ პროგრამა“ ვარდა ხოლო „დუგოგურუანქ“. თინეფ იჩიებუნა, ნამდა უჯგუშ რე ქუწუე „ქიფჩუათ“, „გუვარჩუათ“ ვარდა „უმოს ქიგებგათ ბიბლიაშე“. შეილებუნა თეშნერ მუდგარენ ქუწუათ: „შილებე გუგაკვირან თიშ გაგებაქ, მუჭო ენწყუნს ბიბლია არძაშ უმოს მნიშვნელოვან კითხვეფიშ პასუხეფს“ ვარდა „ბიბლია ხვალე რელიგიურ წიგნ ვა რე, თინა ცხოვრებას მოგურუანა“. თექ შილებე პიროვნებას გურჩქინას ინტერეს, ნამდა შხვა დროს ხოლო ქიჩუათ. შეილებუნა ქიგუძინათ: „თეს მუთუნ ქიანაშ დრო ვასაჭირ. 10–15 წუთშა შილებე მანგარ მნიშვნელოვან მუდგარენ ქიგეგე ბიბლიაშე“. თე დროს ვა რე აუცილებერ უწუათ: „ირიათო მუგაკითხანქ“ ვარდა „ირ მარას ქუმურქ“, მუშენდა თექ შილებე დაშქურინუას ვარდა ოფიქრებაფუას, ნამდა მუდგარენ ვალდებულებას ეჭოფუნს მუშ დუდშა.

7. მუჟამ ხვადუ ბრელ, ნამდა ჭეშმარიტებას ქიმიოგორუ? (1 კორ. 14:23–25).

⁷ ქუდაპატიჟით კრებაშ შეხვალამაშა. მუჭოთ იძირე, პავლეშ დროს ნამთინე პირველო ქრისტიანულ შეხვალამაშა დასწრებაშ დროს ხვადუდ, ნამდა ჭეშმარიტებაშა აფუდ მეგორაფილ (წეკითხით 1 კორინთელეფიშ 14:23–25). ამდღა ხოლო ხშირას თაშ ხვადუ. ბრელ დაინტერესებულ თიშ უკულ მეურს სულიერო წიმი, მუთ კრებაშ შეხვალამეფშა გილულას იჭყანს. მუჟამ უჯგჷ დაინტერესებულიშ დაპატიჟება კრებაშა? მუჭოთ თაშინ, ჩქინ წიგნიშ „მარადიულო გეხარით ცხოვრებათ!“ მა-10 დუდ ელუჩანს მაგურაფალს, ქიდესწრას კრებაშ შეხვალამას, მარა ვა რე აუცილებერ, იშენდოიშენ თე დუდშა მეულას უჯინათ. თეშ კეთება გვალო პირველ ჩიებაშ დროს ხოლო შემლებუნა. შეილებუნა დაინტერესებულ საბატონ დო ჟეშხაშ შეხვალამაშა ქუდაპატიჟათ დო ქოუწუათ, მუ იჸუაფ საჯარო მოხსენებაშ თემა ვარდა ხოლო, მუ აზრეფ იჸუაფ გარჩიებულ თი მარაშ „გინაჯინალ კოშკიშ“ სტატიას.

8. მუ შემლებუნა უწუათ დაინტერესებულს კრებაშ შეხვალამაშა დაპატიჟებაშ დროს? (ეს. 54:13).

⁸ მუჟამსით დაინტერესებულს კრებაშა აპატიჟენთ, გეუნწყით, მუ განსხვავება რე ჩქინ შეხვალამეფ დო თი რელიგიურ მსახურებეფ შქას, ნამუთ შხვადო უძირ. მუჟამსით ართ ბიბლიაშ მაგურაფალქ პირველო დესწრჷ „გინაჯინალ კოშკიშ“ სტატიაშ გარჩიებას, მუშ მასწავლებერს კითხჷ: „ჩამტარებელს თაქ მით ქოხენ არძაშ სახელ უჩქუნო?“. ჩქინ დაქ ეუნწყჷ, ნამდა ჩქინ ოჯახიშ არძა წევრიშ სახელ მიჩქუნან თეშ, მიჩქუნა კრებას არძაშ სახელ ხოლო. თექ გაკვირ ბიბლიაშ მაგურაფალ დო თქუ, ნამდა მუშ ეკლესიას მრევლიშ უმენტაშის შურო ვა უჩქჷ ართმაჟიაშ სახელ. შეილებუნა გეუნწყათ თინა ხოლო, ნამდა ჩქინ შეხვალამეფიშ მიზან ხოლო განსხვავებულ რე (წეკითხით ესაიაშ 54:13). ჩქი ართო იეჰოვაშ თაყვანიშოცემებელო, თიშ გურშენ უმოსიშ გაგებელო დო ართმაჟიაშ გურიშ ელაკინალო იფშაყარუთ (ებრ. 2:12; 10:24, 25). ათეშენ, ჩქინ შეხვალამეფ ორგანიზებულო იტარებ, ნამდა გურაფაქ შემალებუან, დო ვა მიღუნა მუდგარენ რიტუალეფ (1 კორ. 14:40). თეწკუმა ართო, ჩქინ დარბაზეფ მანგარ უბრალოთ დო თეშ რე მონწყილ, ნამდა გემუანო იბგურუათ. რახანს ჩქი პოლიტიკურო ნეიტრალურეფ ვორეთ, ჩქინ შეხვალამეფს ვემურს ნამთინ პოლიტიკურ პარტიაშ ხუჯიშ დაკინება. ჩქინწკუმა ვართ დებატეფ დო ნირზ ინწყუაფ შხვადოშხვა საკითხეფიშ გურშენ. ჯგირ იჸუაფ, წინასწარ ქაძირუათ ბიბლიაშ მაგურაფალს ვიდეო „მუს ომსახურ იეჰოვაშ მოწმეეფიშ დარბაზ?“, ნამდა უჩქუდას, თექ მუ დოხვადუ.

9, 10. მუჟამსით მიდგაინს კრებაშა ვაპატიჟენთ, მუჭო შემლებუნა ეუნწყათ, ნამდა ჩქი მითინს ვა ვანძალთ შეხვალამეფს მონაწილებაშ მეღებას? (ქოძირით სურათ).

⁹ ნამთინე თიშენ ურიდანს ჩქინ შეხვალამეფშა მოულას, ნამდა ფიქრენს, მოფთხინთ, ჩქინ რელიგიას ქაკათას. ათეშენ, გეუნწყით პიროვნებას, ნამდა ჩქი ხიოლით ბღებულენთ სტუმარეფს დო მითინს ვა ვანძალთ ჩქინ შეხვალამეფს მონაწილებაშ მეღებას. სტუმარეფს შეულებუნა ოჯახამო მორთან, თინეფ შქას ჭიჭე ბაღანეფწკუმა ართო. ჩქინ შეხვალამეფს ბაღანეფშა ცალკე გურაფა ვემურს. თინეფ მშობლეფწკუმა ართო ხენა დო ურჩქილენა, მუთ საშვალებას არზენს მშობლეფს, უჩქუდან, სო რენა მუნეფიშ ბაღანეფ დო მუს ოგურუანა (კან. 31:12). თეწკუმა ართო, ჩქი მითინშე ვა ფთხულენთ შესაწირიშ კეთებას დო ვართ ფარაშ ეშაყარუა მეურს, მუშენდა მეპჸუნთ იესოშ მითითებას: „უფასოთ მუგაჩეს დო თქვა ხოლო უფასოთ გეგნოჩით“ (მათ. 10:8). შეილებუნა თინა ხოლო გეუნწყათ, ნამდა ჩქინდა მოულაშ დროს მუდგარენ განსაკუთრებულ მიკაქუნალ ვა რე აუცილებერ, მუშენდა ღორონთ კოჩიშ გურს ოკვირ დო ვართ ხოლო მეჯინას (1 სამ. 16:7).

¹⁰ პიროვნება შეხვალამაშა ქუმურს-და, გემუანო ქეშეხვადით დო თავისფალო ქაგინაფეთ დუდ. გაჩინებაფეთ თინა უხუცესეფს დო კრებას შხვეფს. სტუმარ ყურადღებას დო ჸოროფას ქიგინანს-და, ალბათ უმოსო მაკორინე, შხვა დროს ხოლო ქუმორთას. ბიბლია ვა უღუნ-და, შეხვალამაშ დროს შეილებუნა თქვან ბიბლიაშე ქაძირუათ თი მუხლეფ, ნამდგას გიშმაულარ ეშეკითხენს, ვარდა ხოლო თი პუბლიკაცია, ნამდგაშ გარჩიება მეურს.

ᲛᲣᲭᲝ ᲛᲘᲕᲔᲮᲕᲐᲠᲐᲗ ᲞᲘᲠᲝᲕᲜᲔᲑᲐᲡ, ᲛᲣᲟᲐᲛᲡᲘᲗ ᲑᲘᲑᲚᲘᲐᲨ ᲒᲣᲠᲐᲤᲐᲡ ᲘᲞᲭᲧᲐᲜᲗ?

11. მუჭო შემლებუნა ვოძირუათ, ნამდა ვაფასენთ მაგურაფალიშ დროს?

¹¹ მუ ოკო ფშუდან, მუჟამსით მიდგაინს ბიბლიას ვოგურუანთ? ოკო დუვაფასათ თიშ დრო დო ქუვოგინაფუათ, ნამდა მარჩქილენა, შხვა საქმეეფ ხოლო უღუნ. მაგალთო, დრო მორაგადაფილ ქუგაფუდეს-და, ვართ ადრე მერთათ დო ვართ გვიანს, გოკონ-და, თქვან ტერიტორიას ხალხ შუროთ ვა რდასჷ პუნქტუალურ. თეს გეძინელ, შილებე ჯგირქ იჸუას, პირველ შეხვალამა გვალო ბრელ ხანს ვეგეგრძელებუნ-და. გამოცდილ მაუწყებელეფ ელამჩანა, ნამდა დაინტერესებულს უმოსიშ გაგება ოკოდასინ ხოლო, უჯგუშ იჸუაფ, ბიბლიაშ გურაფაქ დროულო გეთუას დო ნაბეტანო ვეგიზინდას. ქეცადით, ბრელ ვეჩუათ დო უმოსო მაგურაფალს ქიმეჩით საშვალება, მუშ აზრეფ გეგმოხანტას (იგავ. 10:19).

12. მუ ოკო მიღუდან მიზანო ბიბლიაშ გურაფაშ დოჭყაფაშე მოჸუნაფილ?

¹² ბიბლიაშ გურაფაშ დოჭყაფაშე მოჸუნაფილ მიზანო გიღუდან, მაგურაფალს გაჩინებაფუათ იეჰოვა დო იესო დო ქუჸოროფუათ თინეფ. თენა თიმწკუმა შეგალებენა, მუჟამსით თის ყურადღებას ღორონთიშ სიტყვაშა ქიმიოქციებაფუანთ დო ვართ ხოლო თქვან დუდშა ვარდა თქვან ბიბლიურ რჩქინაშა (საქ. 10:25, 26). მოციქულ პავლე ხოლო გურაფაშ დროს ირიათო იესოშა ამახვილენდჷ ყურადღებას, მიდგაშ საშვალებათ იეჰოვაქ მუშ დუდ გუმოჩინებაფუეს დო ქომიჸოროფუეს (1 კორ. 2:1, 2). პავლექ თინა ხოლო ქუმოძირუეს, მუსხით მნიშვნელოვან რე, ქიმვეხვარათ ახალეფს თიცალ თვისებეფიშ გავითარებას, ნამუთ შემლებუნა შევადარათ ოქროს, ვარჩხილს დო ძვირფას ქუალეფს (1 კორ. 3:11–15). თეცალ თვისებეფ შქას რე რწმენა, სიბრძნე, გურგოჩამილობა დო იეჰოვაშ შიშ (ფსალმ. 19:9, 10; იგავ. 3:13–15; 1 პეტ. 1:7). რდათჷ პავლეცალ მასწავლებერ დო ქიმეხვარით მაგურაფალს, გევითარას ძალიერ რწმენა დო უმოსო დეახლოვას მოჸოროფე ზეციერ მუმას (2 კორ. 1:24).

13. მუჭო შემლებუნა მოუთვინათ დო ქუგუგათ ბიბლიაშ მაგურაფალეფს? (2 კორ. 10:4, 5; ქოძირით სურათ).

¹³ გურაფაშ დროს იესოცალო მუთვინით დო ქუგუგით ბიბლიაშ მაგურაფალს. ვაკითხათ თიცალ მუდგარენეფ, მუთ დუდის უხუჯურო ოგინაფუანს ვარდა ონჯღორეს დუგურინუანს. მუჟამსით ორწყეთ, ნამდა მუდგაინ საკითხიშ ენონჭაფა უჭირს, უჯგუშ იჸი, ბრელ ხანს ვეგეჩენდათ; გაგრძელით გურაფა დო უკულ შხვა დროს დართით. ნამდგაინ ბიბლიურ გურაფაშ მეღება ქოუჭირს-და, ვა დუნძალათ, ნამდა დეთანხმას თის. ქიმეჩით დრო, ქიფიქრას, ნამდა ჭიე-ჭიეთ დითირუას მუშ აზრ (იოან. 16:12; კოლ. 2:6, 7). ბიბლია ტყურა გურაფეფს ადარენს კოშკის, ნამუთ ოკო „აკვორღვათ“ (წეკითხით 2 კორინთელეფიშ 10:4, 5). ადვილ ვა რე ბიბლიაშ მაგურაფალშო, აზრ დითირუას დო მეტო ვა წანდას თინა, მუდგაშ მთელ ცხოვრებას ჯერდჷ. ათეშენ, თაშ ქოფთქუათინ, დიო „ახალ კოშკიშ შენებას“ ოკო ქიმვეხვარათ, მუთ ნიშნენს, ნამდა ქიმვეხვარათ, იეჰოვაშ ნდობაქ გოურჩქინდას. თეშ უკულ ოკო „აკვორღვათ ჯვეშ კოშკ“ (ფსალმ. 91:9).

ᲛᲣᲭᲝ ᲛᲘᲕᲔᲮᲕᲐᲠᲐᲗ ᲐᲮᲐᲚᲔᲤᲡ, ᲛᲘᲗ ᲨᲔᲮᲕᲐᲚᲐᲛᲔᲤᲡ ᲝᲡᲬᲠᲣᲜᲐ?

14. მუჭო ოკო მივექცუათ კრებაშა ახალმოულირეფს?

¹⁴ იეჰოვა ჩქინდე ითხინს, ვეგშაბგორათ კრებაშა ახალმოულირეფ კულტურაშ, ქონებაშ ვარდა ეროვნებაშ მიხედვით (იაკ. 2:1–4, 9). მუჭო შემლებუნა თეშ გათვალისწინება, მუჟამსით კრებაშა სტუმარეფ მოულა?

15, 16. მუჭო ვოგინაფუათ კრებაშა ახალმოულირეფს დუდ თავისფალო?

¹⁵ მიდგაინს შილებე დეინტერესას, მუ ხვადუ ჩქინ შეხვალამეფს დო ქუმორთას კრებაშა ვარდა ხოლო შილებე დაინტერესებულქ ვარდა იეჰოვაშ მოწმე ნათესექ, მით შხვადო ცხოვრენს, ქუწუას, ქიდესწრას კრებაშ შეხვალამას. ჯგირ იჸი, ყურადღება ქიმვაქცუათ თის, მარა ნაბეტან ხოლო ვეშვაწუხათ. ქოუწით, ნამდა, ქოუსხუნ-და, თქვანწკუმა ქუდოზოჯას. ქენაჯინეთ თქვან ბიბლიაშა დო ოგურაფალ პუბლიკაციეფშა ვარდა ხოლო პირად ეგზემპლარ ქიმეჩით. ხოლო მუჭო შეილებუნა სტუმარს დუდ თავისფალო ქაგინაფუათ? მაგალთო, ართ სტუმარქ, ნამუთ დარბაზშა რდჷ მოულირ, აწოხვადუნ თი ჯიმას უწუ, ნამდა დუდის უხერხულო გინაფლენდჷ, მუშენდა ირდღაშიან ბარგით რდჷ მოულირ. ჯიმაქ უწუ, თეშე ვენერვიანა, ჩქი ხოლო უბრალო ხალხ ვორეთია. თე კოჩიქ სულიერო წიმი მიდართჷ, დინათ დო ამდღარ დღაშახ ვა გოჭყოლად თე ჯიმაშ პასუხ. მუჭოთ ვორწყეთ, მანგარ ჯგირ რე ყურადღებაშ მექციება, მარა ართ მუდგარენქ ხოლო ოკო ვა გუმოჭყორდან: მუჟამსით სტუმარეფს დოურაგადუანთ კრებაშ დოჭყაფაშახ ვარდა თებაშ უკულ, მუთუნით ოკო ვემშეპჭკირათ თინეფიშ პირად საკითხეფშა (1 პეტ. 4:15).

¹⁶ კრებაშა მოულირ სტუმარეფიშ ჯგირო დოხვალამაშა თინა ხოლო მიშურს, ნამდა პატიცემათ ბრაგადუათ თინეფშე დო თინეფიშ რწმენაშ გურშენ პირად ჩიებეფს, კომენტარეფს ვარდა კრებაშ დავალებეფით გიშულაშ დროს. ქივეცადათ, მუთუნ თიცალ ვა ფთქუათ, მუდგაქ შილებე ეწყინას მოულირ სტუმარს ვარდა ხოლო მაჟიაშა მოულაშა გურქ ვაჸუას (ტიტ. 2:8; 3:2). მაგალთო, უპატიცემულოთ ვეფჩუათ თინეფიშ რწმენაშენ (2 კორ. 6:3). თე კუნთხუთ განსაკუთრებულო ყურადღებათ ოკო რდანჷ თი ჯიმალეფ, მით საჯარო მოხსენებეფით გიშულა. თეწკუმა ართო, თინეფს ოკო შუდან, ნამდა მარჩქილეეფ შქას იეჰოვაშ მოწმე ვა რენან ფერეფ ხოლო შილებე რდანჷ. ათეშენ, ჯგირ იჸუაფ, თინეფშო უჩინებ სიტყვეფ დო აზრეფ გასაგებო გენწყან.

17. მუ რე ჩქინ მიზან, მუჟამსით მსახურებაშ დროს შეფხვადუთ თინეფს, „მიდგაშ გურ მზათ რე ულიებ სიცოცხლეშ მიოღებელო“?

¹⁷ მუჭო დღა მიკურსინ თეშ, მოწაფეეფიშ მომზადებაშ საქმე უმოს დო უმოს ოჭიშაფალ რე. ათეშენ, ირფელ ოკო გუვაკეთათ თინეფიშ ოგორალო, „მიდგაშ გურ მზათ რე ულიებ სიცოცხლეშ მიოღებელო“ (საქ. 13:48). მუჟამსით თეცალეფს ქეშეფხვადუთ, ვეგნობდვათ თინეფშა ბიბლიაშ გურაფაშ შეთავაზება დო კრებაშა დაპატიჟება. თეშნერო შემლებუნა ქიმვეხვარათ თინეფს, ქიგიოდირთან შარას, „ნამუთ სიცოცხლეშა მეურს“ (მათ. 7:14).