„სქუალეფ მემკვიდრეობა რე იეჰოვაშე“
ᲛᲣ ᲒᲣᲒᲐᲨᲘᲜᲔᲜᲐ, მუჟამსით გარჩქილენა სიტყვა „მემკვიდრეობა“? შილებე გუგაშინედან ფარა, ქონება ვარდა ძვირფას მუდგარენ, მუთ თქვან საჸოროფო ოჯახიშ წევრიქ დოიტუეს. თაშ ნამდა, მემკვიდრეობა რე ძვირფას მუდგარენ, ნამდგას არძა ვაფასენთ დო ულუანთ.
ბიბლია სქუალეფიშ გურშენ იჩიებ, ნამდა თინეფ „რე მემკვიდრეობა იეჰოვაშე“ (ფსალმ. 127:3). მუშო ოკო რაგად, ქრისტიან მშობლეფ ხოლო მუნეფიშ სქუალეფს თეშ უჯინენა, მუჭოთ ღორონთშე მეღებულ საჩუქარს დო ოკონა, ირფელ გაკეთან, ნამდა თინეფ თხილერ რდანჷ დო ფიზიკურო, ემოციურო დო სულიერო მუთუნქ ვა მაკორდან.
მარა, სანარღოთ, ნამთინე მშობელს შურო ვემიორჩქ სქუალეფ საჩუქარო (ეს. 49:15; 2 ტიმ. 3:1–3). შხვეფს ხოლო, მართალ რე, მთელ გურით ოკონა, ირფელ გაკეთან მუნეფიშ სქუალეფშო, მარა უჭირა თეშ კეთება, მუშენდა ვემკალუენან თისხი სქუა ჸუნა. თე სტატიაშე ქიგებგენთ, მუშენ ეიორჩქინანს ნამთინე ვემკალუენ თისხი სქუას, მუს ითხინს იეჰოვა მშობლეფშე დო მუჭო შეულებუნა ქრისტიან მშობლეფს ჯგირო მორდან მუნეფიშ სქუალეფ.
ᲛᲣᲨᲔᲜ ᲸᲣᲜᲡᲷ ᲜᲐᲛᲗᲘᲜᲔᲡ ᲕᲔᲛᲙᲐᲚᲣᲔᲜ ᲗᲘᲡᲮᲘ ᲡᲥᲣᲐ?
ოჯახიშ წევრეფიშ დო შხვეფიშ აზრ. ნამთინე ქიანას თიცალ მშობლეფს უმოსო აფასენა, მიდგას ბრელ სქუა ჸუნსჷ. ათეშენ, რახანს შხვეფ თაშ ფიქრენა, შილებე ჩილ დო ქომონჯიქ მიკალუენან თიშე უმოს სქუა გეიორჩქინან.
მომავალშე ნერვიანობა. თიცალ ქიანეფს, სოდეთ შქირენაშ, ლახალეფიშ დო დასაბაღ საავადმყოფოეფ ვა რენ თიშ გურშენ ბრელ ადამიან ღურუ, მშობლეფ ბრელ სქუალეფს ეიორჩქინანა თიშ იმენდით, ნამდა ნამდგაინ ვარდა გეგნოსქიდუ დო მირდუ. ნამთინე ხოლო თიშენ ეიორჩქინანს ბრელ სქუას, ნამდა ორჩინელს მიკმალუაფარ ქოჸუნდას. თაშ განსაკუთრებულო თიცალ ქიანეფს ხვადუ, სოდეთ მთავრობა ვემკაჯინე ხანშამიშულირეფს.
დაორსულებაშე დუდიშ თხილუა. ნამთინე ქიანას ჭირს თიცალ საშვალებეფიშ ჸიდირ, ნამუთ ორსულობაშე დუდიშ ოთხილარო რე საჭირო. ნამთინეს თიშა ოშქურ, ნამდა უხარისხო კონტრაცეპტივეფქ ჯანმრთელობა ვეგლულუას. ნამთინე ხოლო ვა განჭუ თინეფიშ ჸიდირს, მუშენდა მუნეფიშ ქიანას მანგარ ძვირ ღირჷ.a
ᲛᲣᲡ ᲘᲗᲮᲘᲜᲡ ᲘᲔᲰᲝᲕᲐ ᲛᲨᲝᲑᲚᲔᲤᲨᲔ?
თითოულ სქუაშო გეგშართით დრო
ქიმკაჯინით სქუალეფიშ ფიზიკურ საჭიროებეფს. იეჰოვაქ მშობლეფს დავალ, ნამდა ქიზრუნან მუნეფიშ სქუალეფიშ მატერიალურ საჭიროებეფშო. მაგალთო, თინა ელჷ, ნამდა სქუალეფს ოჭკუმალ, მიკაქუნალ დო დუდიშგითაფორაფალ უღუდანინ თეშო მშობლეფ ირფელს გაკეთენა. იეჰოვა მშობლეფშე თის ხოლო ითხინს, ნამდა ქიზრუნან მუნეფიშ სქუალეფიშ განათლებაშე. ათეშენ, ქრისტიან მშობლეფ, ბაღანეფიშ რდუალა გემკისურანინ თიშო, სქუალეფს სკოლა ინტერნატშა ვა უტენა დო უსხუნუნა, თინეფ მუნეფწკუმა ჸუნდან, გურაფას ქიმეხვარან დო ყურადღება ვემიარკან, მუთ ბაღანეფს ქაძირანს ჸოროფას დო დუდის თხილერო ქაგინაფუანს. მარა, თეწკუმა ართო, იეჰოვა ვეთხინს მშობლეფშე, ნამდა იშენდოიშენ ფარამეფ ოკო რდანჷ, სქუალეფს ქიმკაჯინანინ. ვაგგოჭყორდან, იეჰოვაქ მუშ სქუაშო თიცალ მშობლეფ გიშაგორ, მით ღარიბეფ რდესჷ, მარა დუდის ვა ზოგენდეს იესოშა მიკალუაფარო (მათ. 13:55, 56; ლუკ. 2:24).
ბიბლიურ პრინციპ: „მუშო ოკო რაგად, მით მუშიანეფს, განსაკუთრებულო ოჯახიშ წევრეფს, ვემკაჯინე, რწმენაშე აფჷ რაგადებულ ვარია დო ურწმუნოშე უფრაშ რე“ (1 ტიმ. 5:8).
იეჰოვას არჩქილე, ნამდა ასაკშა მიშულაწკუმა ართო მშობლეფს შილებე მოხვარაქ დესაჭირან. ართ-ართ მხარე, მუდგათ სქუალეფს შეულებუნა მშობლეფს პატი ცანჷ, თინა რე, ნამდა თეცალ დროს ქიზრუნან თინეფშო (გიშ. 20:12; 1 ტიმ. 5:4). მარა იეჰოვას ოკო, ნამდა მშობლეფიშ მთავარ ოფიქრებელ თინა ვა რდასჷ, აშო მუჭო მიკულუანა სქუალეფ; თინა ოკო რდასჷ, იშო მუჭო იზრუნენა თინეფ მუნეფიშ სქუალეფშე (2 კორ. 12:14).
ქიმკაჯინით სქუალეფიშ სულიერ საჭიროებეფს. ქრისტიან მშობლეფს თიშ პასუხიშმგებლობა ხოლო უღუნა, ნამდა ქუჸოროფუან მუნეფიშ სქუალეფს იეჰოვა დო ქუდაგურუან თიშ მსახურება. იეჰოვაშო თენა რე არძაშ უმოს მნიშვნელოვან საკითხ, მუთ მშობლეფქ სქუალეფს ოკო დაგურუან (კან. 6:6, 7).
ბიბლიურ პრინციპ: „მუმალეფ, ჸინჩას ვემუდირთათ სქუალეფს. თეშ მანგიორო, იეჰოვაშ მოსაწონო მორდით დო ქიგიოწურეთ თინეფ“ (ეფეს. 6:4).
ᲘᲔᲰᲝᲕᲐ ᲥᲘᲛᲒᲔᲮᲕᲐᲠᲔᲑᲣᲜᲐ ᲡᲥᲣᲐᲚᲔᲤᲘᲨ ᲠᲓᲣᲐᲚᲐᲡ
მეუღლეწკუმა ართო წინასწარ ქიმირაგადეთ, მუსხი სქუაშ ერჩქინა გილამუნა
დეფიქრით, მუსხი სქუას ეიორჩქინანთ. მუსხირენ სქუაშ ერჩქინა ქოილამუნან-და, ჯგირო დეფიქრით თქვან სიტუაციაშე. მაგალთო, ქუგაღვენუნანო თიშ საშვალება, ნამდა თქვან სქუალეფს ოჭკუმალ დო მიკაქუნალ ვემიარკათ დო ქაგურუათ? თაშ ვა რენ-და, თქვან მეუღლეწკუმა ართო გეგნოჭყვიდით, მუსხი სქუა გოკონა რჸუნდან, ნამდა არძაშა თეშ ქეშქალებუან მიკოჯინაქ, მუჭოთ თეს იეჰოვა ელჷ თქვანდე. მუშო ოკო რაგად, იეჰოვას თინა ხოლო არჩქილე, ნამდა მინშა შილებე ირფელქ ფიფქრენდითინ თეშ ვედას (ეკლ. 9:11). მარა თინა ქიმგეხვარებუნა, ნამდა ჯგირ მშობლეფ რდათჷ.
ბიბლიურ პრინციპეფ: „მოხანდეშ გეგმეფ აუცილებერო შისრულებ, მარა ჩქარენსინ ფერ კოჩ გეღარიბებ“ (იგავ. 21:5).
„თქვანდე ნამდგაინქ კოშკიშ გედგუმა მინდომასინ, დიო ვა დოზოჯუნს დო ვეგმოკოროცხუნსო ხარჯეფს, ნამდა ქოძირას, ქოუბაღ დო ვარ ირფელ თიშ ოთებელო?“ (ლუკ. 14:28).
იეჰოვა თქვან ოჯახის პირველ ადგილშა გეირდან. ირფელ გაკეთით, ნამდა იეჰოვაშ თაყვანიშცემას თქვან ოჯახის არძაშ უმოს მნიშვნელოვან ადგილ უღუდას. სქუალეფ უკვე ქორჸუნან-და, დრო გეგმურთით თიშო, ნამდა ბაღანეფს იეჰოვაშ ჸოროფა ქენუდვათ გურშა. ქიმეხვარით თინეფს კრებაშ შეხვალამეფიშ დროს ყურადღებათ ურჩქილან პროგრამას. ირ მარას ჩატარით ოჯახურ თაყვანიშცემა. ქუდაგურეთ თქვან სქუალეფს მსახურება ხოლო. სქუალეფიშ რდუალა თქვან პასუხიშმგებლობა რე, ათეშენ თე პასუხიშმგებლობა ვეგნოჩათ უნჩაშ სქუალეფს ვარდა ნათესეეფს. მართალ რე, სქუალეფს იეჰოვაშ ჸოროფა ქუდაგურუენ თეს დრო დო ბრელ ხანდა ოსაჭირ, მარა თეს ბრელ კურთხევეფ ხოლო მაჸუნუ.
ბიბლიურ პრინციპ: „ჩქიმდა მუთუნს ვა მოუღ თიშე უმოს დიდ ხიოლ, ვინემ თიშ რჩქინას, ნამდა ჩქიმ სქუალეფ სწორ შარას გეჸუნა“ (3 იოან. 4).b
მიენდით იეჰოვას. ვა უღჷ მნიშვნელობა, უკვე რჸუნა სქუალეფ დოვარ ანწ გილამუნა ერჩქინა, რჯერდან, ნამდა იეჰოვა მუდგას ელჷ თქვანდე თინა ბრელით უმოს მნიშვნელოვან რე, ვინემ თინა, მუდგას შილებე ხალხ თქვან ტერიტორიას ფიქრენდას.
სქუალეფიშ სულიერ საჭიროებეფშა მიკოჯინას დრო დო ხანდა ოსაჭირ
ბრელ სქუა ვა რჸუნდანინ თენა გინოჭყვიდილ ქუგაფუნან-და, რჯერდან, ნამდა იეჰოვა იზრუნენს თქვანდე ორჩინელობაშ დროს. შხვეფ მუდგას ვაირაგადუდანინ, ვეფიქრათ, ნამდა იშენდოიშენ ბრელ სქუა ოკო რჸუნდან, მუშენდა თინეფქ ფარა ქიშუან დო ორჩინელობას ქიმკოილუან. ონერვიანებელ მუთუნ ვაიღუნა, მუშენდა ხვალე მუთუნით ვა დოსქიდუთ; იეჰოვა სიტყვას გარზენა, ნამდა ქიზრუნენს თქვანდე დო თინა მუშ სიტყვას ირო ასრულენს (იეს. 23:14).
ბიბლიურ პრინციპეფ: „მთელ გურით მიენდ იეჰოვას დო სქან ჭკუაშ იმენდ ვედეკინა. რშუდას თინა არძა სქან შარას დო თინა გაისწორენს ოულარს“ (იგავ. 3:5, 6).
„ახალგაზრდათ ქუვორდჷ დო ქოთ დიბრჩინ, მარა დღას ვამძირ მართალ კოჩ უმინჯურო წუმოტებულ, ვართ თიშ სქუალეფ – ქობალს თხულენდესკონ თეშ“ (ფსალმ. 37:25).
„ათეშენ, პირველ ადგილს გიორინეთ სამეფო დო თინა, მუთ ღორონთიშ თოლს რე მართალ, დო შხვა ირფელ ქუმგაჩამუნა“ (მათ. 6:33).
სქუალეფ მშობლეფშო მართალო ძვირფას საჩუქარ რენა იეჰოვაშე. წერმიდგინით, მუნერ ბედნერ იჸუაფ იეჰოვა, მუჟამსით ქრისტიან მშობლეფ თეშ მიკულუანა თე საჩუქარს, მუჭოთ იეჰოვას ოკო. თინეფ ჸოროფათ ზრუნენა სქუალეფიშ ემოციურ, ფიზიკურ დო სულიერ საჭიროებეფშო. წინასწარ გინმოჭყვიდუნა, მუსხი სქუა ეიორჩქინან დო, თეწკუმა ართო, თინეფშო ხალხ მუს იფიქრენსინ თიშე უმოს მნიშვნელოვან ღორონთიშ აზრ რე. მუჟამსით თე ირფელს ორთუნა, ქრისტიან მშობლეფ ოძირანა, ნამდა მანგარო უჸორა მუნეფიშ სქუალეფ დო აფასენა თი საჩუქარს, ნამუთ „მემკვიდრეობა რე იეჰოვაშე“.
a არძა ჩილ დო ქომონჯ მუშით გინმოჭყვიდუნს, მუსხი სქუა ეიორჩქინას, მუჟამ ეიორჩქინას დო გეგმირინუას დო ვარ ორსულობაშე დუდიშ დაცვებელ საშვალებეფ. თინეფქ მუდგა გადაწყვეტილება ვემიღანინ, მითინქ ოკო ვა გუდღანას (რომ. 14:4, 10–13). მუშო ოკო რაგად, ჩილ დო ქომონჯ ორსულობაშე დუდიშ ოთხილარო ვეგმირინუანს თიცალ საშვალებეფს, ნამუთ განაყოფიერებულ კვერცხუჯრედის ჸვილუნს. თეს გეძინელ, ჩილ დო ქომონჯის ოკო შუდას რჩევა, ნამუთ ენოჭარ 1 კორინთელეფიშ 7:3–5-ის.
b თე მუხლის იოანე სქუალეფო მიშინუანს თი ნამთინე მოწაფეს, ნამდგას ოხვარუდ ჭეშმარიტებაშ გაგებას. მარა, მუშო ოკო რაგად, იოანეცალ ხიოლ უღუნა თი მშობლეფს ხოლო, მიდგაშ სქუალეფ იეჰოვას ომსახურუნა.