მემზადით სირთულეეფშო, ნამდგას შილებე ნათუაშ უკულ შეხვადათ

1, 2. მუჭო შემლებუნა მივემზადათ სირთულეეფშო, ნამდგას შილებე ჭეშმარიტებაშ შარას ქეშეფხვადათ? ქიმიჸუნით მაგალით.

ᲩᲥᲘ ჯგირო მიჩქუნა, ნამდა სატანაშ ქიანას სირთულეეფ აუცილებერო მაღვენუნა. იესოქ მუშ მიმაჸუნალეფს უწუ, ნამდა შილებედ ქეშეხვადესკო თიცალ სირთულეეფს, მუდგას შეულებუდ რწმენაშე გემკაჸათუკო თინეფ (მათ. 18:7). მაგალთო, ართ-ართ თეცალ სირთულექ შილებე იჸუას პრობლემეფქ თანაქრისტიანწკუმა ურთიერთობას. მარა, ჯგირო მივემზადებუთ-და, მუთუნნერ სირთულეს ვეშიალებე გემკმოჸოთან იეჰოვას.

² თეცალ მაგალით ქიმიპჸუნათ: ჩქინ ორგანიზაცია ხშირას მაფრთხილენა, ნამდა მივემზადათ სტიქიურ უბედრობეფშო. მუჭო ვორთუთ თეს? დიო თიშე ფიფქრენთ, მუნერ სტიქიაქ შილებე მოხვადას თექ, სოდეთ ჩქი ფცხოვრენთ. თენა განსაკუთრებულო თიცალ სიტუაციას რე მნიშვნელოვან, თე ტერიტორიას ახალ მახორუ ქუვორეთ-და. მუქ შილებე მოხვადასინ თეს ქიგებგენთინ თიშ უკულ, კონკრეტულო ვაგეგმენთ, მუ ოკო ვაკეთათ, სტიქიურ უბედრობაქ ქუმოხვად-და, მზათ ქუდოფხვადათინ (იგავ. 21:5). თეშნერო, ჩქი ხოლო შემლებუნა ქიფიფქრათ, მუ სირთულეეფს შილებე ქეშეფხვადათ ჭეშმარიტებაშ შარას დო ქეშეფხვადით-და, მზათ ქუდოფხვადათ. თეს გუვაკეთენთ-და, თინეფს ნაკლებო შეიალებე ქიმეცილან დო გემკმოჸოთან იეჰოვაშე (ფსალმ. 17:5). ათეშენ, მორთ გუვარჩუათ სუმ სირთულე, ნამდგას შილებე ქეშეფხვადათ დო ქობრაგადუათ, მუჭო შემლებუნა მივემზადათ თითოეულშო.a

ᲨᲘᲚᲔᲑᲔ ᲗᲐᲜᲐᲥᲠᲘᲡᲢᲘᲐᲜᲥ ᲒᲝᲬᲧᲘᲜᲔᲑᲐᲤᲣᲐᲜ

3. მუ პრობლემას შილებე შეფხვადათ კრებას?

³ ქორშუნანო, მუ იგინით, მუჟამსით პირველო მერთით იეჰოვაშ მოწმეეფიშ შეხვალამაშა დო ქოძირით, მუნერ ჸოროფა რე ღორონთიშ ხალხ შქას? ალბათ, თე ჸოროფაშ ძირაფაქ ქიმგოხვამილუეს, ნამდა თენა ჭეშმარიტ რელიგია რდჷ (იოან. 13:35; კოლ. 3:12). ზუსტას თენა იგინ ართ დაქ, ბლანკაქb ხოლო. მარა თიშ ნათუაშე ჭიჭე ხანიშ უკულ დღას ვეფიქრენდუნ თიცალ მუდგარენქ მოხვად. ბლანკა იჩიებ: „ართ დაქ მანგარ ჸინჩას მიმექცუ. თის ხოლო ვატყუაფუდ, ნამდა თინა შხვა თანაქრისტიანეფიშ გურშენ ირო გლახას იჩიებუდ. თეცალ მუდგარენს მუთუნით ვეველუდ, მუშენდა ბიბლიაშ გურაფაშ დო შეხვალამეფიშ დროს ირო თინა მარჩქილედ, ნამდა იეჰოვაშ მოწმეეფ ირნერო უნწყუნა ხეს მშვიდობას დო მოჸოროფეეფ რენა“. მართალ რე, და დო ჯიმალეფ ირნერო ოცადუნა, თიცალ თვისებეფ უღუდან, მუნერით იეჰოვას უღჷ, მარა თინეფ სრულყოფილეფ ვა რენა (ეფეს. 4:23, 24; 1 იოან. 1:8). ათეშენ, მინშა შილებე თიცალ მუდგარენ თქუან ვარდა აკეთან, მუთ გურს ქელგოჭუანა (იაკ. 3:8). სანარღოთ, ნამთინექ თანაქრისტიანშე ნაწყენობაშ გურშენ გვალო მიოტუ იეჰოვაშ მსახურება.

4. მუჭო შეილებუნა მემზადათ თიცალ სიტუაციაშო, მუჟამსით შილებე თანაქრისტიანქ ქუგოწყინუან? (ეფეს. 4:32).

⁴ მუშ კეთება შეილებუნა ამდღარშე, ნამდა მზათ ქეშეხვადათ თეცალ სიტუაციას? გეგმირინეთ თი რჩევეფ, ნამუთ მოჩამილ რე ეფესოელეფიშ 4:32-ს (წეკითხით). შხვეფშა ჯგირიშ კეთებას ირნერო ქეცადებუთ დო თინეფიშ გაჭირებას გურშა ქიმიღანთ-და, თენა ბრელ პრობლემას ეგოჩილითუანა. მიზანო გიღუდან თინა ხოლო, ნამდა, მიდგაინქ გურ ქელგოჭუეს-და, ხეთეშე ქაპატუათ. მუ მიგეხვარებუნა თეშ კეთებას? ქიგიშინით, მუზმაშა თხინთჷ იეჰოვას პატიებას დო მუნერ მარდულ აფუთ, ნამდა ირო მზათ რე, გიჭყოლიდუას თქვან დაშებულ (მათ. 6:12). მუჟამსით დეფიქრებუთ, მუსხი მუდგარენ აფჷ იეჰოვას თქვანდა პატიებულ, უმოს ადვილ გაჸინა შხვეფშა პატიება ხოლო.

5. ნამ ბიბლიურ პრინციპ მიმეხვარებუნა, მუჟამსით გურს ქელმოჭუანა? (იგავ. 19:11; ქოძირით სურათეფ).

⁵ წეკითხით იგავეფიშ 19:11. ბიბლია იჩიებ, ნამდა, მუჟამსით მოწყინებაფუანა, გურგოჩამილობაc მიმეხვარებუნა, გურქ ვა მომირთან. თე პრინციპიქ მანგარო მეხვარ ართ დას, რიმას, მით გვალო მუსხირენ წანაშ ნათილ რე. თინა იჩიებ: „მუჟამსით და დო ჯიმალეფ თიცალ მუდგარენს იჩიებუნა ვარდა ორთუნა, მუთ მაღიზიანენს ვარდა გურს ალმოჭუანს, ხეთე იგავეფიშ 19:11-ის იფშინანქ. ვოცადუქ, დეფიფქრე, მუ სიტუაცია უღუნა თინეფს, მუ აფუნა მიკნაულა დო მუშენ შილებე თაშ იქციებუდან. თეწკუმა ართო, ვოცადუქ თინეფწკუმა მსახურებაშა მიდაბრთე, მუთ მოხვარ, უჯგუშო გეფჩინებაფუე თინეფ“. თენა მართალო ჯგირ რჩევა რე. ამდღარშე ქეცადით, უჯგუშო გეჩინებაფუათ და დო ჯიმალეფ, მუშენდა მუთ უმოსო გეჩინებაფუანთ, თით უმოსო გარჩქილედან იჸი თინეფიშ დო უმოს ადვილ გაჸინა ქაპატუათ, მუჟამსით გურს ქელგოჭუანა.

6. მუ მიმეხვარებუნა, ჯგირ ურთიერთობა მიღუდან და დო ჯიმალეფწკუმა?

⁶ ხოლო მუშ კეთება შეილებუნა, ნამდა და დო ჯიმალეფწკუმა ჯგირ ურთიერთობა გიღუდან? მუჟამსით თინეფს იჩინებაფუანთ, თინეფიშ ჯგირ თვისებეფს ქიდეკვირით (ქეშუდარით იგავეფიშ 10:12; რომ. 12:10; ფილ. 2:2, 3). მორთ ქობძირათ, მუჭო მეხვარ თეშ კეთებაქ ართ ახალგაზრდა ჯიმას, მარკის. ნათუაშ უკულ თინა უმოს დროს ატარენდჷ და დო ჯიმალეფწკუმა ართო დო თინეფიშ გლახა თვისებეფ ხოლო ქოძირ. მუქ მეხვარ მარკის, თეშ უმკუჯინუო, იშენით ვა მაჩირთუკო ვართ იეჰოვას დო ვართ თანაქრისტიანეფს? თინა იჩიებ: „ქიმეფხვად, ნამდა თი შეცდომეფ, ნამუთ და დო ჯიმალეფს მალედეს, შურო ველეჸუნინე დო მუთუნ ვა რე თიშ კარს, მუდგას ქვეყნიერებას ორთუნა. ათეშენ, გეგნოპჭყვიდ, მთელ ყურადღება თინეფიშ ჭიჭე-ჭიჭე შეცდომეფშა ვარინ, ჯგირ მხარეეფშა გეგნიბღიკო“. თქვა ხოლო თეშნერო ქიმიქციებუთ-და, თენა მიგეხვარებუნა, ჯგირ ურთიერთობა გიღუდან თანაქრისტიანეფწკუმა.

ᲨᲘᲚᲔᲑᲔ ᲔᲙᲐᲜᲐᲠᲦᲣᲓᲐᲗ ᲗᲘᲡ, ᲛᲣᲓᲒᲐᲨᲔᲗ ᲕᲐᲠᲘᲐ ᲗᲥᲕᲘᲗᲷ

7. მუ დროს შილებე ეკვანარღათ თი ირფელს, მუდგაშეთ ვარია ფთქვითჷ?

⁷ მუჟამსით იეჰოვაშ მოწმეთ გინირთით, ალბათ მანგარო გოხიოლუდეს, ნამდა უკახალე ქეკიტეთ თი ირფელ, მუთ სატანაშ ქვეყნიერებაწკუმა გაკავშირენდეს. შილებე ფიქრენდითკო: მუჭო ოკო მენატრას კოჩის თე ირფელქ? მარა, მუჟამსით მუდგარენ სირთულეეფს ქეშეხვადუთ, შილებე ქუგგაშინან ვარდა გვალო ეკანარღუდათ თი ირფელს, მუდგაშეთ იეჰოვაშ მსახურებაშ გურშენ ვარია თქვითჷ (ქეშუდარით რიცხვეფიშ 11:4–6). მაგალთო, ნამთინექ ვარია თქუ ჯგირ სამუშაშენ, მუშენდა თინა ბრელ დროს მიდმუღანდჷ. ნამთინე შილებე ჭეშმარიტებაშ გაგებაშ უკულ მუშ ხოლოშიან მეგობრეფქ მიოტესკო. შხვეფს შილებე თიცალ ჩვევაშა აჸუეს გიორჯგინალქ, ნამდგას სიამოვნება მოუღუდ თინეფშა, მარა იეჰოვას ჯოგჷ. წერმიდგინით, მუჭო ქელაჭვე იეჰოვას გურ, მუჟამსით თი ირფელს, მუდგაშეთ ართ დროს ვარია ფთქვითჷ, თიწკუმა ურთიერთობაშ გილალუაფაშ საშვალებას ქიმეფჩანთ. მუშ კეთება შეილებუნა ასეშე, ნამდა, მუდგა სირთულეს ვეშეხვადათინ, დღას ვა დართათ თი ირფელს, მუთ უკახალე დიტეთ?

8. მუს ბგურაფლენთ აბრაამ დო სარაშ მაგალითშე?

⁸ ბიბლიას ბრელ თიცალ ართგურ მსახურიშ მაგალით რე მოჩამილ, მიდგაქ შილებე ეკანარღესკო თი მუდგარენეფს, მუდგაშეთ ვარია თქვისჷ. მაგალთო, აბრაამ დო სარაქ დემორჩილეს იეჰოვაშ მითითებას, ქიდიტუეს გალავან გოჸუნდუნ ფერ, გამანგარებულ დო სქვამ ქალაქ ურ დო კარავეფს ცხოვრენდეს (ებრ. 11:8, 9). შილებე თინეფს მინშა გაშინედესკო თი გემუან ცხოვრება, ნამუთ ურს უღუდეს. მარა თე ირფელშე „ირიათო ქიფიქრენდეს“ ვარდა ქეკანარღუდეს-და, შილებე უკახალე დორთაქ ქუმაკორინესკო. მარა აბრაამ დო სარას მთელ ყურადღება თიშა აფუდეს გინოღალირ, მუდგას იეჰოვა თინეფს მომავალშო ოპირუდ (ებრ. 11:15, 16).

9. მუჭო უჯინედ პავლე თი ირფელს, მუდგაშეთ იეჰოვაშ გურშენ ვარია თქუ? (ფილ. 3:7, 8, 13).

⁹ პავლე მოციქულქ ხოლო თირუ ბრელ მუდგარენ, ნამდა იეჰოვაშ მსახურება ქიდიჭყუკო. თინა იუდაურ კანონეფს გურაფლენდჷ გამალიელწკუმა, ნამდგას იუდეველეფ დიდ პატის ცენდეს (საქ. 22:3). პავლეს შეულებუდ ბრელს მიოჭირინუკო დო ცნობილ რელიგიურ ლიდერ ჸოფედუკო (გალ. 1:13, 14). მარა, მუჟამსით თიქ სახიოლო ამბე ქიგეგ, ირფელ უკახალე ქეკიტუ. ადვილ ცხოვრება უღუდუო პავლეს თეშ უკულ? ვარ. თის ლახუნდეს, მუსხირენშა ციხეს ქუდახუნეს დო მუშ ხალხის ხოლო გოჯოგაფილ აფუდ (2 კორ. 11:23–26). პავლე ხვალე სირთულეეფშე ქიფიქრენდ დო მუშ ცხოვრებას ულირს ქეშუდარენდ-და, შილებე იფიქრუკო, ნამდა მანგარო მეჩირთჷ, ქრისტეშ მოწაფეთ გინირთუნ. მარა, თეშ მანგიორო, პავლე თიშე ფიქრენდჷ, მუშმადიდა პატი რდჷ თიშო ქრისტეშ მოწაფეობა დო შურ დო გურით უჯინედ თი ჯილდოს, ნამუთ მომავალს ელუდ. თის ჯერდჷ, ნამდა თეშმაფასა მუთუნ ვა რდჷ (წეკითხით ფილიპელეფიშ 3:7, 8, 13).

10. მუშე ოკო დეფიფქრათ ხშირას? (მარ. 10:29, 30; ქოძირით სურათეფ).

¹⁰ მუს ბგურაფლენთ? მუჟამსით დუდის ქუგგოშინანა თი ირფელ, მუდგაშეთ ქრისტიანო გინორთაშ გურშენ ვარია თქვითჷ, თინა ხოლო ქიგიშინით, მუშენ აკეთით თენა (ეკლ. 7:10). ართიანს ქეშუდარით თინა, მუთ ულირს დიტეთ დო თი კურთხევეფ, მუთ ბიბლიაშე სიმართლეშ გაგებაქ მოიღეს. მაგალთო, თქვა გიღუნა ხოლოშიან ურთიერთობა სამყაროშ უზენაეს ღორონთწკუმა (იგავ. 3:32). მთელ მსოფლიოს რჸუნა მოჸოროფე და დო ჯიმალეფ (წეკითხით მარკოზიშ 10:29, 30). თეწკუმა ართო, წიმი გელუნა დიდებულ მომავალ (ეს. 65:21–23). ქეცადით, ხშირას ქიფიქრათ თი კურთხევეფშე, მუთ იეჰოვაშ მსახურებას მოუღ. თეშნერო ვეკანარღუდათ იჸი თი ირფელს, მუდგაშეთ ვარია თქვითჷ.

11. მუს გურაფლენთ როზმარიშ მაგალითშე?

¹¹ ართ და როზმარი, სოდგარენ 50 წანერ რდჷ, მუჟამსით ინათ. დეკვირით, მუ ოხვარუდ თის, ვეკანარღუკო თი ირფელს, მუთ ულირს დიტუ. როზმარი იჩიებ: „იეჰოვაშ მოწმეთ გინორთაშ უკულ ახალ წანაშ პერიოდის ირო მოწყინაფილ ვორდჷ, მუშენდა ჯვეშო თე დროს ირო ჩქიმ ოჯახწკუმა ართო ვორდჷ. მანგარო მიჸორდჷ თე დღას ჩქიმ საჸოროფო ადამიანეფშა საჩუქარიშ მეჩამა. გურ ხიოლით ემაფშაფუდ, მუჟამსით ვორწყედ, მუჭო გერდეს ბაღანეფ იოლკაწკუმა დო მუჭო ურწკინუნდეს თოლეფ, მუჟამსით საჩუქარეფს ნწყუნდეს“. მუქ მეხვარ როზმარის? თინა გეუძინანს: „გეგნოპჭყვიდ, თე ირფელიშ ოკეთებელო შხვა დრო გეგშებგორიკო. ირ წანას შხვადოშხვა დღას აკოფშაყარანქ ჩქიმ ოჯახიშ წევრეფს, ვარზენქ საჩუქარეფს დო ურაგადუქ, მუშმანწარას მიჸორს თინეფ“. მარა როზმარის ხოლო ართ პრობლემა უღუდ. თინა იჩიებ: „მუჟამსით ჭეშმარიტება გებგჷ, ჩქიმ მეგობრეფქ მიმოტუეს. მინშა მანგარო მონატრუდ თინეფ დო დუდის ხვალე ბგინაფლენდჷ“.d მუქ მეხვარ თის? თიქ გეგნოჭყვიდ, შხვადოშხვა დაწკუმა მიდართუკო მსახურებაშა. როზმარი მეჩიებუნა: „თეშ ჭყოლოფათ თიცალ ახალ მეგობრეფქ ქუმაშუ, ნამდგას მანგარო ვაფასენქ დო მიჸორს“. მუშ გურაფა შეილებუნა როზმარიშ მაგალითშე? შილებე გონატრუდან თიცალ მუდგარენეფ, მუდგას ულირს თქვანდა ხიოლ მოუღუდ. მარა ვაგგოჭყორდან, ამდღა შეილებუნა ბრელით უჯგუშ მუდგარენეფით დოთირუათ თი ირფელ დო თენა ნამდვილ ხიოლს მოიღანა (ფილ. 4:8, 9). რშუდან თინა ხოლო, ნამდა იეჰოვა ვარია თქვითინ თიშე ბრელით უმოსის ქიმერჩანა.

ᲨᲘᲚᲔᲑᲔ ᲛᲘᲓᲒᲐᲘᲜᲥ ᲛᲘᲝᲢᲣᲐᲡ ᲘᲔᲰᲝᲕᲐᲨ ᲛᲡᲐᲮᲣᲠᲔᲑᲐ

12. მუ პრობლემაქ შილებე გაჸუან განსაკუთრებულო რთულ გინაღალარქ კრებას?

¹² მუჟამსით იეჰოვაშ მოწმეთ გინირთით, ალბათ მანგარ ბედნერ რდითჷ, ნამდა სატანაშ უბადო ქიანაშე გეგშართით დო ღორონთიშ ხალხიშ ნაწილო გინირთით, მით სიმართლეს ოგურუანს დო ირო სწორიშ კეთებას ოცად (ეს. 65:14). მარა მინშა იშენით შილებე თეშ მოხვადას, ნამდა კრებას მიდგაინქ სერიოზულო დაშუას დო, დაშებულ ვენარღ-და, კრება ხოლო დატებაფუან (1 კორ. 5:13). ქობძირათ, მუჭო იმოქმედ თეცალ სიტუაციაქ ართ დაშა, სამარშა. თინა მეჩიებუნა: „ჩქიმ ნათუაშე ბრელ ხან ვა რდჷ მიკულირ, მუჟამსით ართ უხუცესიქ სერიოზულო დაშუ დო კრება ქუდატებაფუეს. თექ თიშმანწარას იმოქმედ ჩქიმდა, ნამდა დახე გამკმოჸოთ იეჰოვას, მუშენდა დღას ვეფიფქრენდ, ნამდა უხუცესიქ შილებედ თეშნერო დაშუკო იეჰოვაშ წოხოლე დო თაშ ქუწყუნუკო გურ და დო ჯიმალეფს“. მუშო ოკო რაგად, დღას ოკო ვემშებღათ ეჭვ თიშა, ნამდა ჩქინ და დო ჯიმალეფს მანგარო უჸორა იეჰოვა დო ოკონა, თიშ ართგურეფქ დოსქიდან (1 კორ. 13:4, 7). მარა სანარღოთ იშენ ხვადუ თეშ, ნამდა ირ წანას რენა თიცალეფ, მიდგას კრებას ოტებაფუანა. თექ განსაკუთრებულო ძნელქ შილებე თიმწკუმა მაჸუან, მუჟამსით თინეფ შქას რე ჩქინ ოჯახიშ წევრ, მეგობარ ვარდა თიცალ ადამიან, მიდგას მანგარ პატის ფცენდით.

13. მუ მიმეხვარებუნა, თიმწკუმა ხოლო ქუდოფსქიდათ ღორონთიშ ართგურეფქ, მუჟამსით ჩქინ ხოლოშიან ადამიან იეჰოვას იტენს?

¹³ მუშ კეთება შეილებუნა ამდღარშე, ნამდა თქვან ხოლოშიან ადამიანქ იეჰოვაშ მსახურება მიოტუ-და, თექ თქვა ხოლო ვამგკოჸოთან იეჰოვას? ქეცადით, უმოსო დო უმოსო გამანგარათ იეჰოვაწკუმა ურთიერთობა (იაკ. 4:8). მაგალთო, მართალ რე, ხშირას ჩქი და დო ჯიმალეფწკუმა დო ოჯახიშ წევრეფწკუმა ართო ბგურაფლენთ ბიბლიას დო ბლოცულენთ, მარა მნიშვნელოვან რე, თენა ცალკე ხოლო ვაკეთათ დო პირად ურთიერთობა მიღუდან ღორონთწკუმა (ფსალმ. 1:2; 62:8). ირიათო რშუდან, ნამდა შხვაქ მუჭოდგა ვემიქცუასინ, თეს ვემეჩათ უფლება, იეჰოვაწკუმა ურთიერთობა მიგოდინაფუან.

14. მუს ბგურაფლენთ პეტრე მოციქულიშ მაგალითშე? (იოან. 6:66–68).

¹⁴ ბრელ მუდგარენიშ გურაფა შემლებუნა თევრეშე ხოლო, მუჭო მიქცუ პეტრე მოციქულქ, მუჟამსით ბრელ მოწაფექ მიოტუ იესო. თი დროს პეტრეს ხოლო შილებე ვარჩქილედუკო მუდგარენეფ, მარა დეკვირით, მუ თქუ იოანეშ 6:66–68-ს (წეკითხით). თიშ მანგიორო, ნამდა მთელ ყურადღება შხვეფქ მუდგა აკეთესინ თიშა გინიღუკო, პეტრე უმოსო თი ჭეშმარიტებაშე ფიქრენდჷ, მუთ იესოშე აფუდ გაგებულ. შედეგო, თის შხვეფცალო ვა მუქციებ დო ვემუტებ იესოშ მეჸუნა. თაშ რე ამდღა ხოლო – შხვეფქ მუჭოდგა ვემიქცუანინ, თენა ვა თირანს თი ჭეშმარიტებას, ნამუთ ღორონთიშ ორგანიზაციაშ მოხვარათ გეგით. ათეშენ, მუთუნით ვეჩეთხუათ თის. ჟიშე მოშინაფილ სამარ იჩიებ: „ირიათო გუვოშინანქ ჩქიმ დუდის, ნამდა ართ კოჩ გლახათ იქციებუნ თენა ვა ნიშნენს, ნამდა კრებას ვარდა მთელ ორგანიზაციას არძა თიცალ რე; ვართ თის ნიშნენს, ნამდა თენა იეჰოვაშ ბრალ რე, მუშენდა თინა ირო თის მოგურუანა, მუთ სწორ რე“.

15. მუს ბგურაფლენთ ემილიშ მაგალითშე?

¹⁵ გუვარჩუათ ართ დაშ, ემილიშ, შემთხვევა. თიშ ნათუაშე გვალო ართ მარაშა დიამუშის კრება ქუდატებაფუეს დო თიქ ოჯახშე ხოლო მიდართჷ. ემილი იჩიებ: „დღას ვეფიფქრენდჷ, თეცალ მუდგარენ ქუმოხვადუდუნ. ვა ფშჷ, თეცალ გინაღალარქ აიშახ მუთუნქ ქუმაჸუკონ. დიაჩქიმ ხოლო მანგარო მონატრ“. მუქ მეხვარ ემილის? თინა აგრძელენს: „მიჩქჷ, ნამდა ხვალე ვა ვორექ. მუაჩქიმს მანგარო უჸორქ დო ირნერო ალამრე. პჸუნსჷ და დო ჯიმალეფ ხოლო, მით ოჯახიშ წევრეფცალ მაფჷ. ირკოჩის უღჷ მუდგარენ პრობლემა, ათეშენ მნიშვნელოვან რე, ხოლოს ვორდათ ართიანწკუმა დო გურშა ელუკინათ ართმაჟიას“ (1 პეტ. 5:9). და დო ჯიმალეფიშ უჯგუშო გაჩინებაფალო იშენდოიშენ სირთულეეფს ვა უჯინათ; თენა ამდღარშე გაკეთით დო, თეშ ჭყოლოფათ, თქვან ცხოვრებას მუდგაქ ვა მოხვადასინ, დუდის ხვალე დღას ვეგინანთ.

16. მუქ ოკო ვაგმოჭყორდან? (ქოძირით სურათ).

¹⁶ ვაგგოჭყორდან თიქ ხოლო, ნამდა იეჰოვა თინეფს ასაჯენს, მით უჸორს (ებრ. 12:6). თის ოკო, ნამდა არძაქ, მიდგას კრება დოტებულ აფჷ, დართას თის (2 პეტ. 3:9). ათეშენ, თქვან ხოლოშიან ადამიანს იეჰოვაშ მსახურება მეტებულ ქაფუნ-და, რჯერდან, უხუცესეფ ირფელს გაკეთენა, ნამდა ქიმეხვარან იეჰოვაშა დორთას (2 ტიმ. 2:24, 25).

17. მუშ შემლებუნა ბჯერდან?

¹⁷ თე სტატიას გუვარჩით მუსხირენ სირთულე, ნამდგას შილებე ნათუაშ უკულ ქეშეხვადათ. შილებე თე სირთულეეფ ძნელ გინაღალარ გაძირედან, მარა შიშიშ მიზეზ ვაიღუნა; შეილებუნა წინასწარ მემზადათ თე სირთულეეფშო. მუთ არძაშ უმოს მთავარ რე, რშუდან, იეჰოვა ღორონთ თქვანწკუმა რე. თინა ამდღარშახ გოხვარუნა დო მზათ რე, ანწ ხოლო ირიათო ქიმგეხვარან (1 პეტ. 5:10). მუდგაქ ვა მოხვადასინ, თინა ირიათო ქიმერჩანა ძალას დო ქიმგეხვარებუნა ირნერ სირთულეშ გინოღალას. იეჰოვას თქვან მოხვარაშ საშვალებას ქიმეჩანთ-და, მუთუნს ვემკაჸოთინეთ თიშე! (ფსალმ. 119:165; რომ. 8:38, 39).