კითხვა დო პასუხ

მუჟამ გიმაცხადენა ერეფ „მშვიდობა დო უსაფრთხოებას“?

მუჭოთ „გინაჯინალ კოშკიშ“a ულირ გიშაშქუმალას მოჩამილ სტატიას „კითხვა დო პასუხ“ რდჷ გარჩიებულ, მალას იეჰოვა „ვით ქას“ (არძა მთავრობა) გურშა ქინუდვანს, გეგნოჩან მუნეფიშ ძალა „ალიშფერ მხეცის“ – გაერთიანებულ ერეფიშ ორგანიზაციას. თე მხეც ბიბლიას „მხეციშ ქანდაკებათ“ ხოლო რე მოშინაფილ (გიმოცხ. 13:14, 15; 17:3, 16, 17). უკულ „ვით ქა“ დო „მხეც“, ნამდგას ახალ მეღებულ აჸი ძალაუფლება, მთელ მსოფლიოს მოსპუნა ტყურა რელიგიეფს. მუჟამ გიმაცხადენა ერეფ „მშვიდობა დო უსაფრთხოებას“,b ტყურა რელიგიაშ განადგურებაშახ დოვარ უკულ? (1 თეს. 5:3).

პირდაპირ ქოფთქუათინ, ჩქი ზუსტას ვა მიჩქუნა, მუჟამ გიმაცხადენა ერეფ „მშვიდობა დო უსაფრთხოებას“. ირფელ წინასწარ ქომიჩქუდანინ, ვართ დემესაჭირებუნა, კურცხას ვორდათ დო დევეკვირათ მოვლენეფს; ვარინ იესოქ მუსხირენშა უწუ მუშ მიმაჸუნალეფს, „კურცხას რდათია“ (მათ. 24:42; 25:13; 26:41). მორთ ასე კილ-კილშა გუვარჩუათ წინასწარმეტყველება, ნამუთ პავლექ ღორონთიშ შთაგონებათ თესალონიკელეფშა მეჭარილ წერილს ინაჭარ.

პავლექ ჭარჷ: „მუჟამსით რაგადანდან იჸი, მშვიდობა დო უსაფრთხოებავა, ზუსტას თიმ დროს, ველუნან თეშ, უცფას ქიგიოტირხუნა მოსპუალა“ (1 თეს. 5:2, 3). ჩქინ პუბლიკაციეფს პავლეშ სიტყვეფიშ ენწყუმა აიშახ თეშნერო ხვადუდ: „მშვიდობა დო უსაფრთხოებაშ“ გიმოცხადებაქ ოკო მოხვადუკო ზუსტას დიდ გაჭირებაშ დოჭყაფაშახ, ნამუთ, მუჭოთ მიჩქუნა, დიდ ბაბილონიშ – ტყურა რელიგიაშ მსოფლიო იმპერიაშ განადგურებათ დიჭყაფუ. ფიფქრენდით, ნამდა „მშვიდობა დო უსაფრთხოებაშ“ გიმოცხადება იჸუაფუდ თიშ ნიშან, ნამდა „დიდ გაჭირება“ იჭყაფუდ.

მარა, თე საკითხიშ ხოლო უმოსო გიმორკვიებაშ უკულ, შემლებუნა ფთქუათ, ნამდა ვა რე გამორიცხულ, მოვლენეფქ შხვანერო ხოლო მიდართას. შილებე „მშვიდობა დო უსაფრთხოებაშ“ გიმოცხადებაქ ტყურა რელიგიეფიშ განადგურებაშ უკულ ქუმოხვადას. მუშენ იფჩიებუთ თეს? მორთ ქუპასუხათ თუდო მოჩამილ კითხვეფს:

მუ როლ უღჷ ამდღარშახ ტყურა რელიგიეფს დედამიწას მოხვალამირ ჩხუპეფს? ბიბლია იჩიებ: «თის [„მეძავს“, „დიდ ბაბილონს“] ბრალქ ქიგიადვჷ დედამიწას . . . არძა ჸვილირიშ ზისხირიშ დობუნას» (გიმოცხ. 17:1, 5; 18:24). ტყურა რელიგიეფ ირო ხეს უნწყუნდეს ჩხუპეფს ქიანეფ შქას დო ტერორისტულ აქტეფიშ მიზეზ ხოლო ხშირას ზუსტას რელიგიეფ რე. თაშ ნამდა, თინა მშვიდობა დო უსაფრთხოებაშ ვარინ, ჩხუპიშ დო ძალადობაშ დუდ რე. თენა თეცალ კითხვას ორჩქინანს: ერეფ „მშვიდობა დო უსაფრთხოებას“ თიშ უკულ ხომ ვეგმაცხადენა, მუთ ჩეთხინუანა დიდ ბაბილონს? ვა რე გამორიცხულ, თაშ ქიჸუას, მარა გინოჭკირილო მუთუნ ვა მარაგადენა.

მუქ ოკო მაჸუნას „მშვიდობა დო უსაფრთხოებაშ“ გიმოცხადებას? პავლე იჩიებ: „ველუნან თეშ, უცფას ქიგიოტირხუნა მოსპუალა“ (1 თეს. 5:3). ერეფქ „მშვიდობა დო უსაფრთხოება“ ტყურა რელიგიეფიშ განადგურებაშახ გეგმაცხადეს-და, მუდგარენ დრო იშენ სქიდუდას იჸი, ონდო, თე მუხლიშ თანახმას, მუნეფ ხოლო გენადგურებუნა. ვარინ პავლე იჩიებ, ნამდა თინეფიშ განადგურება „ველუნან თეშ“ დო „უცფას“ მოხვადუ. ათეშენ, შილებე ერეფქ „მშვიდობა დო უსაფრთხოება“ ტყურა რელიგიეფიშ განადგურებაშ უკულ გეგმაცხადან.

მუ რეაქცია აღვენუ ღორონთიშ ხალხის, მუჟამსით თე მოვლენეფ ქუმოხვადუ? პავლე იჩიებ: „თქვა, ჯიმალეფ, უკმელას ვა რეთჷ, ნამდა თი დღაქ თეშ მუნგოდირთან დუდის, მუჭოთ მახირალეფს მაჭიშუანს დღაშ სინთე“ (1 თეს. 5:4). „მშვიდობა დო უსაფრთხოებაქ“ რელიგიეფიშ განადგურებაშ უკულ გეგმიცხად-და, ღორონთიშ ხალხშო თენა თიშ ნიშან იჸუაფ, ნამდა ერეფიშ განადგურება უკვე მოულირ რე. მარა, ერეფშო თე განადგურება მახირალცალო მოურს – ხეთეშე დო შურო აზრის ვეჸინან თეშ.

თაშ ნამდა, გაკობძინათინ, მუს ოკო ველუდათ? მალას „ვით ქა“ დო მხეც, ნამდგას მთელ ძალაუფლება ხეშა აჸი აშალაფირ, მოსპუნა ტყურა რელიგიას. თეთ ქიდიჭყაფუ „დიდ გაჭირება“. მიჩქუნა თინა ხოლო, ნამდა მუდგარენ მომენტის ერეფ გეგმაცხადენა „მშვიდობა დო უსაფრთხოებას“. მუჟამ მოხვადუ თენა? რე ჟირ ვარიანტ. ართ ვარიანტ თეცალ რე: თე განცხადება გეკეთებ ტყურა რელიგიეფიშ განადგურებაშახ. ვარდა მაჟია ვარიანტ: პოლიტიკურ ძალეფ „მშვიდობა დო უსაფრთხოებაშ“ გურშენ განცხადებას გაკეთენა ტყურა რელიგიაშ მოსპუალაშ უკულ. ოკო ქიბჯინათ დო ქობძირუნთ, ნამ ვარიანტ გემართლებ. ხშირას ბიბლიურ წინასწარმეტყველებეფიშ მნიშვნელობას თიმწკუმა ინვანჭუთ, მუჟამსით თიშ შესრულებას ვორწყეთ ვარდა უკვე მიკულირ რე თიშ შესრულება (ქეშუდარით იოანეშ 12:16).

ჩქინო ირფელიშ უმოს მნიშვნელოვან „მშვიდობა დო უსაფრთხოება“ მუ დროს გიმიცხადებუნ თინა ვარინ, ღორონთიშ ართგურ მუსხით ქუვორეთინ თინა რე. თაშ ნამდა, „კურცხას ვორდათ დო თოლ ვემკობდვათ“, ნამდა, მოვლენეფქ მუჭოდგა ვედასინ, ჩქი მზათ ქიპჸუათ (1 თეს. 5:6).