მიზანო ქიდეკინით ნათუა

1. ა) მუ ჯგირ შედეგეფ მოიღეს ნათუაქ? ბ) მუს გუვარჩიენთ თე სტატიას?

ᲣᲙᲕᲔ მეუძღვინითო დუდ იეჰოვას დო დინათითო? თაშ ქორენ-და, თეთ იეჰოვას თხითჷ, სუფთა სინდის ქიმერჩესკო. თიქ ხოლო ქუგაპატუეს თქვან ცოდეფ დო მუშ მსახურებაშ უფლება ქიმერჩეს (1 პეტ. 3:21). თეშნერო მანგარ ჯგირ მაგალით მეჩით თინეფს, მიდგას დიო ვეგნუდგუმუნა თე ნაბიჯ. თაშ ნამდა, თქვან ცხოვრებაშ იეჰოვაშ მსახურებაშა მეძღვინუათ ჭკვერულ გადაწყვეტილება გაფუნა მეღებულ. მარა მუშ რაგად შილებე თინეფშე, მით დიო ხოლო ვა რენა ნათილ? ბჯერა, ნამდა იეჰოვა თქვა ხოლო მანგარო გიჸორა დო გოკონა, თიშ ნება შეასრულათ. თინა ხოლო გარჩქვენუნა, ნამდა ნათუა აუცილებერ რე, ცოდეფქ ქიგეპატუან დო ღორონთიშ მოწონა მიღათინ (საქ. 2:38–40). მარა შილებე დიო ხოლო დუდის იჭოფუნდათ. მუ მიგეხვარებუნა, გეგნოდგათ ნაბიჯ დო დინათათ? თე სტატიას გუვარჩიენთ: 1) მუშენ იჭოფუნს ნამთინე დუდის ნათუაშე? 2) მუშენ იჸუაფ ჯგირ, ირიათო ფშუდან, ნამდა თე ქიანაშ ბოლო ხოლოს რე? დო 3) მუ ჯგირ შედეგეფს მოიღანა, ნათუას ვეგნოდვანთ-და?

ᲛᲣᲨᲔᲜ ᲘᲭᲝᲤᲣᲜᲡ ᲜᲐᲛᲗᲘᲜᲔ ᲓᲣᲓᲘᲡ?

2. მუშენ იჭოფუნს ნამთინე დუდის ნათუაშე?

² ნამთინე ნათუაშე დუდის თიშენ იჭოფუნს, ნამდა მუდგარენშა ოშქურ. მაგალთო, რენა თიცალეფ, მიდგას შურ დო გურით ოკონა, იეჰოვას ემსახურან, მარა ოშქურუნა, ნამდა დღას ვეშიალებენა, იეჰოვას თიშ მოსაწონო ქემსახურან. თქვა ხოლო თაშ ქორეთ-და, ქიგნაჯინით თიცალ ბიბლიურ მუხლეფს, ნამუთ ქუგოძირანა, ნამდა იეჰოვა თქვანდე სრულყოფილებას ველჷ დო ნამ შეილებუნან თის გაკეთენთ-და, თინა მიწონუანს თქვან მსახურებას (ფსალმ. 103:13, 14; კოლ. 3:23). წინააღმდეგობაშა ქუგოშქურუნან-და, ქოთხით იეჰოვას, ფსალმუნმაბირეცალო გინგოშქვან, ნამდგაქ ჭარჷ: „იეჰოვა ალამრე, ვა მაშქურინე. მუ აღოლნე კოჩის ჩქიმდა?!“ (ფსალმ. 118:6).

3. ხოლო მუშენ იჭოფუნს ნამთინე დუდის ნათუაშე? (ქოძირით სურათ ).

³ ნამთინე თი აზრით გინმოდვანს ნათუას, ნამდა ფიქრენს დიო დასაბაღ რჩქინა ვამღუნია, ვარინ იეჰოვა მანგარო უჸორს. მარა დეფიფქრათინ, მუსხიშ რჩქინა რე საჭირო ნათუაშო? მორთით ბიბლიურ შემთხვევა ქიმიპჸუნათ. ართშა, მუჟამსით პავლე დო სილა ციხეს ხედეს, თიცალ მანგარ დიხანწალუაქ მოხვად, ნამდა „ციხექ ქიდიზარზალუ დო პატიმარეფს ბორკილეფქ გამაცუეს“. თეშ უკულ პავლე დო სილას ქიმიაჩეს საშვალებაქ, ციხეშ ყარულს დო თიშ ჸუდეშარეფს ქუქადაგესკო. მუჭოთ იძირე, ციხეშ ყარულქ დო თიშიანეფქ ქიმეხვადეს, ნამდა თე დიხანწალუაქ იეჰოვაშ ხეთ მოხვად. თიმ სერს თინეფქ იეჰოვა დო იესოშ გურშენ მნიშვნელოვან მუდგარენეფ ხოლო დიგურუეს. თი ირფელქ, მუთ გეგეს, თინეფშო დასაბაღიქ ქიჸუ, ნამდა „ხეთეშე დინათესკო“ (საქ. 16:25–33). თქვა ხოლო იეჰოვას ქიჩინენთ, თინა მთელ გურით ქოიჸორა, მთავარ ბიბლიურ გურაფეფ ქუგარჩქილენა, ულირს დაშებულ ცოდეფ ნარღებულ ქუგაფუნა დო იეჰოვაშ ნორმეფით ცხოვრება გინოჭყვიდილ ქუგაფუნან-და, მზათ რეთჷ ნათუაშო (მარ. 12:30).

4. ხოლო მუ ოცილ ნამთინეს ნათუას? (ქოძირით სურათ).

⁴ ნამთინეს მართალო ოკო, ღორონთიშ მოსაწონო იცხოვრას, მარა თიშე ფიქრენს, თეშ გურშენ მუ მსხვერპლშა აჸი ოულარ. მუშო ოკო რაგად, ჭკვერულ რე, მუდგა გადაწყვეტილებას ვა ბღებულენდათინ, წინასწარ დეფიფქრათ, მუჭო იმოქმედენს თინა ჩქინ ცხოვრებაშა (ლუკ. 14:27–30). მარა ნამთინე ნაბეტანს ნერვიანენს თიშ გურშენ, მუშე აჸი ვარია ორაგადე თიშო, ნამდა ღორონთიშ მსახურება ქიდიჭყას. ზუსტას თეს ფიქრენდჷ ართ და ქენდის. თიქ ჭეშმარიტებას მირდჷ დო ბაღანობაშე გურაფლენდჷ, მუ მოწონდჷ იეჰოვას დო მუ – ვარ. მუჟამსით გემწირდჷ, კინ ქიდიჭყჷ ბიბლიაშ გურაფა. დეკვირით, მუს იჩიებ ქენდის: „მიჩქუდ, მუს ითხინდჷ იეჰოვა ჩქიმდე, მარა ავრე მუჭო ფცხოვრენდინ თინა ხოლო მოპწონდჷ. მარჩქილედ, ნამდა თე ირფელშა ვარიაშ რაგად ადვილ ვა მაჸიდ“. ნამთინე ხოლო ფიქრენს, ნამდა ღორონთიშ ნორმეფით ცხოვრება ვეგშალე. თინეფ თიშე ნერვიანენა, ნამდა ნათუაშ უკულ მუდგაინს სერიოზულო ქუდაშენა დო კრებას ქუდატებაფუანა. მუ მიგეხვარებუნა, თეცალ საკითხეფშე ნერვიანობა ნათუას თქვა ხოლო ქუგოცილუნან-და?

5. მუშე ოკო დეფიქრათ უმოსო, ნათუაშ ნაბიჯიშ გინოდგუმა ქოიჭირან-და? (მათ. 13:44–46).

⁵ მაგალთო, მუდგარენიშ ჸიდირ მოკონან თიმწკუმა, ჩქი ხვალე ფასის ვა უჯინეთინ, თის ხოლო ვოკვირუთ, მუსხით ძვირფას რე თინა. მუჟამსით ვორწყეთ, ნამდა მუდგაშ ჸიდირ მოკონან თინა ფას გეძუნ თიშე ბრელით უმოს ძვირფას რე, დრო ვემემღუნან თეშ, ხეთეშე პჸიდულენთ. თეშნერო, მუჟამსით ნათუაშე ფიფქრენთ, ხვალე თის ოკო ვა უჯინათ, მუ ფას დომდოხოდუნა თე ნაბიჯიშ გინოდგუმა, თის ხოლო ოკო ქიდვეკვირათ, მუსხით ძვირფას რე იეჰოვაწკუმა ჯგირ ურთიერთობა. ზუსტას თე აზრ იძირე ჯგირო იესოშ მოჸუნაფილ ჟირ იგავშე (წეკითხით მათეშ 13:44–46). ჟირხოლო იგავს მოშინაფილ კოჩეფ ხიოლით გიმოჩანა მთელ მუნეფიშ ქონებას, ნამდა ქაჸიდირან მანგარ ძვირფას მუდგარენქ, მუდგას მიოგორუეს. თქვა ხოლო, ფას ვეგიდვინენ ფერ მუდგარენშა გაფუნა მეგორაფილ – სახიოლო ამბეშა სამეფოშ გურშენ. ნათუაშო ნაბიჯეფიშ გინოდგუმა დო ცხოვრებაშ თირუა მუსხით ქოღირუნ თენა ქუგოეჭვუნან-და, ჯგირო დეფიქრით იესოშ მოჸუნაფილ იგავეფშე დო ქოკითხით თქვან დუდის: მართალო ბოლოშა ქუმარჩქილენო, მუსხით ძვირფას რე სახიოლო ამბე, ნამუთ გაგებულ მაფჷ? ქუვაფასენქო იეჰოვაწკუმა ურთიერთობას, მომავალიშ იმენდის, ნამუთ თიქ მუჩჷ, დო ჸოროფათ ეფშა საჯიმალოს? თე კითხვეფიშ პასუხეფ ქუგოძირანა, მუ გოცილუნა ნათუას დო მუშე გაფუნა ომუშებელ.

6. მუ მიგეხვარებუნა, იეჰოვაშ ხელმძღვანელობაშ მიოჸუნალო საჭირო მონდომაქ გოირჩქინდან?

⁶ იესოქ მიჸუნ იგავ მათასალიშ გურშენ, სოვრეშეთ იძირე, ნამდა ნამთინე ქიმირჩქილუანდ სახიოლო ამბეს, მარა გაუჭირდუდ ნაბიჯეფიშ გინოდგუმა დო სულიერო წიმი ულა, მუდგაშ მიზეზ თინეფიშ გურიშ მდგომარეობა იჸუაფუდ. მარა იესოქ თინა ხოლო თქუ, ნამდა ნამთინე ჯგირ გურით მირჩქილუანდ სახიოლო ამბეს დო ქიდიჭყანდ ნაგურეფუშ თანახმას ცხოვრებას (ლუკ. 8:5–15). შილებე თქვა ხოლო ატყუაფუდათ, ნამდა თაშ ქოფთქუათინ, გურ გორთილ გაფუნა – ქოთ იეჰოვას გოკონა ემსახურათ დო ვართ თქვან ჯვეშ ცხოვრებას ოსქიდუთ ბოლოშა. თაშ ქორენ-და, გურ ვეგიტახათ. იეჰოვას შეულებ ქიმგეხვარან დო ქიმერჩან „ახალ გურ“, ნამუთ გოირჩქინანა ღორონთიშ ხელმძღვანელობაშ მიოჸუნალო საჭირო მონდომას. თაშ ნამდა, ქილოცით დო ქოთხით იეჰოვას, თეშ „დამუშუას“ თქვან გურ, ნამდა თექ სამეფოშ თასის „ეულაშ“ დო „გოფალუაშ“ საშვალებაქ ქიმიაჩას (ეზეკ. 18:31; 36:26).

7, 8. მუ ოცილ ნამთინე ახალგაზრდას ნათუას? (ქოძირით სურათ).

⁷ ნამთინე ახალგაზრდას, მიდგას უჸორს იეჰოვა, ნათუას შხვეფიშ აზრ ოცილ. მაგალთო, სკოლას მასწავლებერეფ ოცადუნა, ახალგაზრდეფს „თავისფალ აზროვნება“ გუვითარან ზნეობრივ საკითხეფწკუმა დაკავშირებით დო ხშირას თიცალ მუდგარენეფშე ურაგადუნა მუთუნ პრობლემა ვა რენია, მუთ ღორონთიშ თოლს ვა რე სწორ. ვარინ თეცალ აზროვნებაშ გავითარებაქ შილებე მიოდინუას კოჩ (ფსალმ. 1:1, 2; იგავ. 7:1–5). თექ ვა გაღოლანინ, შეილებუნა ფსალმუნმაბირეშ მაგალითშე დეფიქრათ, ნამუთ იეჰოვას ურაგადუდ: „ჩქიმ მასწავლებერეფშე უმოს გოხვალამირო გინიბრთჷ, მუშენდა ფიფქრენქ სქან მითითებეფშე“ (ფსალმ. 119:99).

⁸ ბოლო დროს იძირე, ნამდა ნამთინე იეჰოვაშ მოწმე მშობელ ოცილ მუშ სქუალეფს ნათუას. თინეფს მთელ ყურადღება თიშა აფუნა გინოღალირ, ნამდა მუნეფიშ სქუალეფქ გურაფას ქათხოზან დო კარიერა მინწყუან. ნამთინე ხოლო უბრალოთ ვახვარ მუშ სქუალეფს, სულიერ მიზნეფ ქოუღუდან. სი ხოლო მშობლეფშე სულიერო წიმი ულას ხეშ შენწყუალა გორკუნ თეს ქარწყექ-და, ქუდურაგადე თინეფს თე საკითხიშ გურშენ. ჭიჭე ასაკ გიღუნ თენა შუროთ ვა ნიშნენს, ნამდა იეჰოვაწკუმა ხოლოშიან ურთიერთობაშ გავითარება სქანით ვეშეილებ (იგავ. 20:11).

9. მუშენ შილებე ნამთინე გინოდვანდას ნათუას?

⁹ ნამთინე ხოლო შილებე მზათ რდასჷ ონათალო, მარა თიშენ მეუღ დრო, ნამდა მუშ მეგობარწკუმა ვარდა ოჯახიშ წევრწკუმა ართო ოკო ინათასინ დო თის უჯინე. მუშო ოკო რაგად, მუთუნ გლახა ვა რე, სქანო საჸოროფო ადამიანწკუმა ართო გოკოდას ინათენ. მარა მუსხით ჭკვერულ ქორე, თე მიზეზიშ გურშენ სქან ნათუა გეგნოდვენ? ვაგგოჭყორდას, ნამდა მეძღვინუაშ აღთქმას შხვა მიდგარენწკუმა ართო ვარინ, პირადო დვანქჷ იეჰოვაწკუმა. თაშ ნამდა, შხვა მუს ქიმინუნსინ თექ ოკო ვეგნოჭყვიდას, სი ინათუქ დო ვარ (რომ. 14:12).

ᲠᲨᲣᲓᲐᲜ, ᲜᲐᲛᲓᲐ ᲗᲔ ᲥᲘᲐᲜᲐᲨ ᲑᲝᲚᲝ ᲮᲝᲚᲝᲡ ᲠᲔ

10. ხოლო მუშენ შილებე გინოდვანდას ნამთინე ნათუას?

¹⁰ ნამთინე ფიქრენს, ნამდა თე ქიანაშ ბოლოშახ დიო ძალამ დრო მეძჷ დო თეშ გურშენ გინმოდვანს ნათუას. მუსხით ჭკვერულ ქორე თეცალ აზროვნება? იესოქ მუშ მიმაჸუნალეფ გაფრთხილ: „ირიათო მზათ რდათჷ, მუშენდა შურო ველუთინ თი დროს ქუმურს კოჩიშ სქუა“ (ლუკ. 12:40).

11. მუთ უმოს ხოლოს იფჩინებაფუანთ იეჰოვას, მუჭო უჯინეთ თიშ მითითებეფს? (ფსალმ. 119:60).

¹¹ ჩქი იეჰოვას მიჸორან თიშენ ოკო მეუძღვინათ დუდ. მუთ უმოსო იფჩინებაფუანთ იეჰოვას, თით უმოსო ფხვადუთ მუსხით უჸორთ თის დო მუზმათ საჯგირობუო რე თი ირფელ, მუდგას ჩქინდე თხულენს. თენა მირჩქინანა სურვილს, დრო ვებღათინ თეშ, ხეთეშე ქიმვაჸუნათ თიშე ნაგურეფუს (წეკითხით ფსალმუნეფიშ 119:60). მოციქულ იაკობ ხოლო ართ მნიშვნელოვან მიზეზის მოგებაფუანა, მუდგაშ გურშენ დრო ოკო ვებღათ დო ხეთეშე ქიმვაჸუნათ იეჰოვაშ მითითებეფს: ნამთინს ვა მიჩქუნა, მუს მომღანა ჭუმანერ დღა. შილებე ამდღარ უკულ ვართ მუმაჩან თიშ კეთებაშ საშვალებაქ, მუთ მიჩქუნა, ნამდა „სწორ რე“. ათეშენ, ამდღა ოკო გუვაკეთათ ოკეთებელ (იაკ. 4:13–17).

12. მუს ბგურაფლენთ იესოშ მოჸუნაფილ ბინეხიშ მაგალითშე?

¹² მორთ ქიგიფშინათ ბინეხშე მოჸუნაფილ იესოშ მაგალით. თიქ ხომ ქოთქუ, ნამდა ართ საათის მუშენდესინ თი მუშეფს ხოლო თისხი გინუგეს, მუსხით მთელ დღას მუშენდესინ თი მუშეფს მეჩეს. მარა დეფიქრით, ართ საათის მუშენდესინ თინეფქ, უმოს ადრე მუშენ ვედიჭყეს მუშობა? მუშენდა, მუჭოთ მუნეფქ თქუეს, მითინს ვა დუქირებ თინეფ. თი ამბე ვა რდჷ, ნამდა ოზარუდეს მუშობა დო დუდის კინიჩუანდეს, უბრალოთ მითინს ვა დუძახებ თინეფშა ომუშებშა. მარა მუჭო ქუდუძახეს, ხეთეშე ქიდიჭყეს ბინეხის მუშობა (მათ. 20:1–16). ამდღა ხოლო იესო „მიძახუნა“ დო მირაგადუნა, ნამდა გეგნიბრთათ თიშ მოწაფეეფო დო ქეშუდირთათ სახიოლო ამბეშ ქადაგებას. ათეშენ, მუჭო ქიგებგენთ, მუს ითხინს იესო ჩქინდე, ხეთეშე ოკო გევაჸუნათ თე საქმეს.

13. მუს ბგურაფლენთ ლოტიშ ოსურიშ მაგალითშე?

¹³ ნამთინე შილებე ბოლო წუთშახ გინმოდვანდას ნათუას, მარა მუთ უმოს დროს იღანთ, შილებე თით უმოსო გაიჭირდან თე ნაბიჯიშ გინოდგუმაქ. ზუსტას ათეშენ, იესო მუშ მოწაფეეფს აფრთხილენდჷ: „რშუდან ლოტიშ ოსურ“ (ლუკ. 17:31–35). ლოტიშ ოსურს უჩქუდ, ნამდა ღორონთ მალას განადგურენდ სოდომ დო გომორას დო თეშა მითინს ვეწარნედ. მარა, მუჭოთ იძირე, თიქ მუთუნით ვა მასქიდ თი ირფელს, მუდგაქ დატებელქ აჸუ (დაბ. 19:23–26). თიშ მაგალით თის ხოლო გუმოშინანა, ნამდა „რსხებაშ კარ“ ირიათო ვეჸუაფ „გონჯამილ“. ღორონთიშ დოდგინელ დროს თე კარ სადღამუშოთ „ქენიკილუ“ (ლუკ. 13:24, 25).

14. მუშენ ოკო დეკვირათ, მუჭო ისრულებ აღსასრულიშ გურშენ რაგადებულ წინასწარმეტყველებეფ?

¹⁴ თი ირფელ, მუთ ამდღა მსოფლიოს ხვადუ, ოძირანს, ნამდა თე ქიანაშ აღსასრულიშ გურშენ რაგადებულ ბიბლიურ წინასწარმეტყველებეფ ისრულებ. თიშ ძირაფაქ, მუ ხვადუ ართიანიშ მეჸუნელო მსოფლიოშ შხვადოშხვა ადგილს, ოკო ქიმგოხვამილუან, ნამდა ცხოვრებაშ თირუა დო ნათუა გინადვალარ ვა გაფუნა. ქიგიფშინათ, მუ უწუ პეტრე მოციქულქ პირველ საუკუნეშ ქრისტიანეფს. თიქ ელუჩ თინეფს, ნამდა „სწორას იაზროვნესკო“, მუშენდა „მონჭაფილ რდჷ ირფელიშ ბოლო“ (1 პეტ. 4:7). თე მუხლის მოშინაფილ „ბოლოს“, მუჭოთ იძირენ, იერუსალიმიშ დო თიშ ტაძარიშ მოსპუალა იგულისხმებ. თი ქრისტიანეფ, მიდგას პეტრექ თე სიტყვეფ მეჭარ, იერუსალიმშე შორს ოხორანდეს დო ქალაქიშ განადგურებაშ დროს თექ შურო ვეჸუაფუდეს (1 პეტ. 1:1). მარა თიშ გაგება, მუჭო შისრულ თე წინასწარმეტყველებაქ, უმოსო დარწმუნენდ თინეფს, ნამდა იეჰოვაშ შხვა დუნაპირებუეფ ხოლო შისრულებუდ. თეშნერო, მუჟამსით თქვა ხოლო ქიდეკვირებუთ, მუჭო ისრულებ აღსასრულიშ გურშენ რაგადებულ წინასწარმეტყველებეფ, უმოსო გეგნოჭყვიდუნთ, გეგნოდგათ ნაბიჯ დო დინათათ.

15. მუჭო შემლებუნა მივემზადათ იეჰოვაშ დღაშო? (2 პეტ. 3:10–13).

¹⁵ მუშ მაჟია წერილს პეტრე მოციქულქ ენწყჷ, მუჭო ოკო მივემზადათ იეჰოვაშ დღაშო, შხვანერო ქოფთქუათინ, თე ქიანაშ აღსასრულიშ დღაშო. თიმ დროს, მუჟამსით პეტრექ თე წერილ ჭარჷ, იეჰოვაშ დღაშ მოულაშახ ხოლო ძალამ ხან მეძუდ. მარა თიქ იშენით უწუ ქრისტიანეფს, ნამდა შურ დო გურით ქუჯინესკო დო „თოლშა ქეწირინესკო“ თე დღა (წეკითხით 2 პეტრეშ 3:10–13). იეჰოვაშ დღა მუნერ ხოლოს რენ თენა ქუმარჩქილენან-და, თინა ირიათო თოლშა ეწომირდან იჸი. თე დღაშო მზათ ვორეთინ თენა თევრეშე გემკორჩქინდუ, სიწმინდეს ქიფცვენთ დო ჩქინ საქმეეფშე ღორონთიშ ართგურობა ქიძირენ-და. წერმიდგინით, მუნერ ბედნერ იჸუაფ იეჰოვა, მუჟამსით ქოძირუნს, მუჭო ოცადუთ, თქვან საქმეეფით გურ გაუხარათ თის. ღორონთის თინა ხოლო მანგარო ახიოლე, ნამდა დუდ მეუძღვინათ თის დო დინათათ.

ᲛᲣᲨᲔᲜ ᲠᲔ ᲯᲒᲘᲠ, ᲕᲔᲒᲜᲝᲓᲕᲐᲗ ᲜᲐᲗᲣᲐ?

16. მუჟამ რე არძაშ უჯგუშ დრო ნათუაშო? (2 კორ. 6:1, 2; ქოძირით სურათეფ).

¹⁶ არძაშ უჯგუშ დრო ნათუაშო ასე რე (წეკითხით 2 კორინთელეფიშ 6:1, 2). ეთიოპ კოჩის, ნამდგას მუშ ქიანას დიდ თანამდებობა უკინებუდ დო ნამდგაქ ფილიპეს შეხვად, არჩქილედ, ნამდა დრო ოკო ვეღუკო. მუჭო ქიგეგ სახიოლო ამბე დო ნათუაშ საშვალებაქ ქიმიაჩ, ვა დუჭყაფ დროშ ზინდუა დო ვა უფიქრებ: „ხოლო ბრელ მაფჷ დაგურაფალ, იშო-იშო წყარეფიშ მეტ მუ იჸი დო უკულ დიმნათუქ“. თეშ მანგიორო, თიქ ფილიპეს უწუ: „მუ მოცილ, ნამდა დიმნათე?“ (საქ. 8:26, 27, 35–39). მუშმაჯგირა მაგალით რე! თიშ უკულ, მუთ თე ეთიოპ კოჩიქ დინათ, თიქ „გახარებულქ ქიგიოდირთჷ მუშ შარას“.

17. მუშ შეილებუნა რჯერდან?

¹⁷ ნათუას მუდგაინ ქუგოცილუნან-და, რჯერდან, ნამდა იეჰოვას მანგარო ოკო, ქიმგეხვარან თე ნაბიჯიშ გინოდგუმას (რომ. 2:4). თინა ქიმგეხვარებუნა, გიორჯგინათ შიშის, ნერვიანობას დო შხვეფიშ გლახა გავლენას. ნათუაშ უკულ გაღვენუნა სუფთა სინდის დო ქიმეხვადუთ, ნამდა თი ირფელ, მუდგაშეთ ვარია თქვითჷ, მუთუნ ვა რე თი კურთხევეფიშ კარს, ნამდგას იეჰოვა მერჩანა (ფილ. 3:8, 13). თეშ უკულ შურ დო გურით ელუდათ იჸი თი ირფელს, მუთ წიმი გელუნა – თი დუნაპირებუეფიშ შესრულებას, ნამდგას იეჰოვა თინეფს არზენს, მით დუდის უძღვინენს დო ინათუ (საქ. 3:19).