მუშენ მოსაჭირუნა გიშაჸიდირალ?

1, 2. სოვრეშე მაფუნა დუდ დარსხებელ დო მუშენ? (რომ. 7:22–24; ქოძირით სურათ).

ᲬᲔᲠᲛᲘᲓᲒᲘᲜᲘᲗ თეცალ სურათ: შენობაქ გაკოცუ დო ართ კოჩიქ ქათაჸუნ. მართალ რე, თინა ვა ღურე, მარა თეშ რე გოჭკადილ, ნამდა თევრეშე მუშით მუთუნით ვეგთართე. ათეშენ ღვარანს, ეგება მიდგაინქ გეგონას თიშ ხონარ დო გეგშეჸუნას.

² ჩქი ხოლო, არძა, ზუსტას თეცალ მდგომარეობას ვორეთ. მუჟამსით ადამქ მუშ გუმაჭყაფალს ვედემორჩილ, ცოდამო გინირთჷ დო თე ცოდა გეგნოჩ მუშ გამნარყეფს ხოლო. შედეგო, არძა ადამიანქ, თაშ ქოფთქუათინ, „ქათვაჸუნით“ ცოდას დო მუთუნით ვეშემლებუნა ჩქინით დებრსხათ დუდ თიშე. რომაელეფშა მეჭარილ წერილს პავლე მოციქულქ ჯგირო ეჭარ, მუნერ რე ცოდამ მდგომარეობა (წეკითხით რომაელეფიშ 7:22–24). თინა იხვეწებ „ღურუნ ფერ სხეულშე“ დარსხებას. პავლე ხოლო „ათოჸუნელ რდჷ“ ცოდას, ნამდგას ღურაშა მეჸუნს ირკოჩ (რომ. 6:23). ჩქი ხოლო თაშ ვორეთ. ათეშენ არძას მოსაჭირუნა რსხება.

3. მუ მოუღ ჩქინდა გიშაჸიდირალს?

³ საბედნეროთ, გლახა მდგომარეობაშ ეჭარუაშ უკულ, პავლე იმენდიანო აგრძელენს მუშ წერილს. თიშ უკულ, მუთ თინა კითხულენს, მი მირსხენსია ღურუნ ფერ სხეულშე, მუშ კითხვას კინ მუ პასუხენს დო იჩიებ: „მადლობა ღორონთის, ნამუთ მირსხენს ჩქინ უფალ იესო ქრისტეშ, საშვალებათ“ (რომ. 7:25). თაქ პავლეს იესოშ გიშაჸიდირალიშa ამბე აფჷ, ნამდგაშ ჭყოლოფათ 1) მეპატიებუნა ცოდეფ, 2) გეფთავისფალებუთ არასრულყოფილებაშე დო 3) ვერიგებუთ ჩქინ გუმაჭყაფალს. თე სტატიას სუმხოლო მხარეს გუვარჩიენთ, მუთ უმოსო ქომიჸოროფუანა იეჰოვას, ჩქინ „იმენდიშ მუმაჩამალ ღორონთის“ (რომ. 15:13). თეწკუმა ართო, ხოლო უმოსო დუვაფასენთ იესო ქრისტეს, ნამდგაშ მსხვერპლით ვორეთ გათავისფალებურ (კოლ. 1:14).

ᲒᲘᲨᲐᲸᲘᲓᲘᲠᲐᲚᲘᲨ ᲭᲧᲝᲚᲝᲤᲐᲗ ᲪᲝᲓᲔᲤ ᲛᲔᲞᲐᲢᲘᲔᲑᲣᲜᲐ

4, 5. მუშენ მოსაჭირუნა არძას გიშაჸიდირალ? (ეკლ. 7:20).

⁴ გიშაჸიდირალ მოსაჭირუნა, ნამდა ქიმეპატუან ცოდეფქ. არძა არასრულყოფილ ადამიან აშენს, გოკონ სიტყვათ, გოკონ საქმეთ (წეკითხით ეკლესიასტეშ 7:20). ნამთინე ცოდა შხვეფშე უმოს სერიოზულ რე. მაგალთო, ისრაელეფიშ დროს მოსეშ კანონით თიცალ ცოდეფ, მუნერით რე მრუშობა დო კოჩიშ ჸვილუა, ღურათ ისაჯებუდ (ლევ. 20:10; რიცხ. 35:30, 31). მუშო ოკო რაგად, არძა ცოდა გვალო თესხით სერიოზულ ვა რე, მარა იშენით ირაგადე, ნამდა ცოდა რე. მაგალთო, ფსალმუნმაბირე დავითიქ თქუ: „გურს გოუჩანქ ჩქიმ ნაბიჯეფს, ნამდა ნინათ ვადვაშუე“ (ფსალმ. 39:1). თაშ ნამდა, მინშა ჩქინ ჩიებაქ ხოლო შილებე ცოდათ მაკოროცხან (იაკ. 3:2).

⁵ დღას ქოითქუალნანო თიცალ მუთუნ, მუდგაშეთ ფიქრენთ, ნოტე ვამთქუალუდკონია? ვარდა ხოლო ქოიქიმინნანო დღას მუთუნ თიცალ, მუდგას მანგარო ნარღენთ? ალბათ, არძას ბღოლამუნა ჟირხოლო. ბიბლია იჩიებ: „ცოდამეფ ვა ვორეთია ქიფჩიებუთ-და, დუდის იბღორენთ დო სიმართლე ვა რე ჩქინ გურეფს“ (1 იოან. 1:8).

6, 7. მუ არზენს იეჰოვას ჩქინდა პატიებაშ საშვალებას? (ქოძირით სურათ).

⁶ იეჰოვაშ სრულყოფილ სამართლიანობა თხულენს, ნამდა პატიებაშო მუდგარენ მიზეზ არსებენდას. ზუსტას თექ მოხვად გიშაჸიდირალიშ გაფათ. თიქ საშვალება ქიმეჩ იეჰოვას, ქუმაპატუესკო ჩქინ ცოდეფ (ეფეს. 1:7). მარა თენა ვა ნიშნენს, ნამდა იეჰოვა თოლს წკურუნს ჩქინ ცოდეფშე დო არძა ართ აფჷ. იეჰოვას ჯოგჷ ცოდა (ეს. 59:2).

⁷ მოსეშ კანონ ითხინდჷ, ნამდა ისრაელეფქ მუნეფიშ ცოდეფიშ გიშაჸიდირალო ცხოველეფ შეწირესკო (ლევ. 4:27–31; 17:11). თინეფიშ შესაწირეფ თიშ მაძირაფალ რდჷ, ნამდა უკულ იესო ბრელით უმოს დიდ მსხვერპლის შეწირენდ, მუთ ადამიანეფს კურთხევეფს ქუმუღანდ. თიშ მსხვერპლ ჩქინდა კანონიერო პატიებაშ საშვალებას ქიმეჩანდ იეჰოვას. კორინთელეფშა მეჭარილ პავლეშ წერილშე იძირე, ნამდა თის ჯგირო არჩქილედ, მუშმაშხვა ფას უღჷ იესო ქრისტეშ მსხვერპლის. თიშ უკულ, მუთ თე ქრისტიანეფიშ ულირ გლახა საქმეეფ გიმოკოროცხჷ, პავლექ უწუ თინეფს: „ასე გასუფთებულეფ რეთჷ დო მართალეფო რეთჷ მერჩქინელ ჩქინ უფალ იესო ქრისტეშ სახელით დო ღორონთიშ წმინდა შურით“ (1 კორ. 6:9–11).

8. მუშე შეილებუნა დეფიქრათ გოშინაშ ონჯუაშო მომზადებაშ დროს?

⁸ გოშინაშ ონჯუაშო მომზადებაშ დროს, ქიფიქრით, მუ მოუღ პირადო თქვანდა იეჰოვაშ პატიებას. მაგალთო, გიშაჸიდირალიშ ჭყოლოფათ, შეილებუნა ვა რდათჷ გინოჸუნელ ულირს დაშებულშე ნერვიანობას, ნამუთ უკვე ინარღით დო ნამდგაშ გიშასწორებელო ირფელ გაკეთით. მარა მინშა შილებე გითქუალუნა: მიჩქჷ, ნამდა იეჰოვას შეულებ მაპატუასინ, მარა მა ვა მაპატიებე ჩქიმ დუდშა. დუდის თაშ ქოგინაფლენთ-და, ქორშუდან, მიდგაინ პატიებაშ ღირს ქორენ დო ვარინ თეს იეჰოვა გინმოჭყვიდუნს დო თეშ უფლება ხვალე იესოშა აფჷ მეჩამილ. თის მეტ მითინშა ვემუჩამ თეშ გინოჭყვიდუაშ უფლება, თინეფ შქას ვართ თქვანდა. ბიბლიას ჭარჷ: „სინთეს ქიგლურთ-და, მუჭოთ თინა [იეჰოვა] რე სინთეს, . . თიშ სქუაშ, იესოშ, ზისხირ არძა ცოდაშე მასუფთენა“ (1 იოან. 1:6, 7). შემლებუნა თე ბიბლიურ აზრიშ ზუსტას თეშ ბჯერდან, მუჭოთ ბიბლიას ინოჭარილ შხვა გურაფეფიშ პწანა. მუჭოთ გებგით, გიშაჸიდირალქ იეჰოვას ჩქინდა პატიებაშ კანონიერ უფლება ქიმეჩ. მარა, ხვალე თენა ვარინ, თის სურვილ ხოლო უღჷ თეშ ოკეთებელო. ბიბლიას თიშ გურშენ ჭარჷ: „ირო მზათ რექჷ პატიებაშო“ (ფსალმ. 86:5).

ᲒᲘᲨᲐᲸᲘᲓᲘᲠᲐᲚ ᲒᲣᲛᲐᲗᲐᲕᲘᲡᲤᲐᲚᲔᲜᲐ ᲐᲠᲐᲡᲠᲣᲚᲧᲝᲤᲘᲚᲔᲑᲐᲨᲔ

9. გლახა საქციელწკუმა ართო, ხოლო მუ აზრით გიმირინუაფ ბიბლიას სიტყვა „ცოდა“? (ფსალმ. 86:5).

⁹ ბიბლიას სიტყვა „ცოდა“ ხვალე გლახა საქციელიშ აზრით ვა რე გიმორნაფილ; თინა თი მდგომარეობას ხოლო ნიშნენს, ნამუთ დაბადებაშე ათოპჸუნა (წეკითხით ფსალმუნეფიშ 86:5). თე ცოდამ მდგომარეობა მირჩქინანა გლახაშ კეთებას სურვილს. თეწკუმა ართო, თიშ გურშენ იბლახებუთ, იბრჩინუთ დო ბღურუთ. ათეშენ რე, ნამდა თოთო ბაღანეფ ხოლო, მიდგას მუთუნ ვა აფუნა დაშებულ, ილახებუნა დო მინშა გვალო ღურუნა. ცოდამ მდგომარეობა რე თიშ მიზეზ ხოლო, ნამდა ქოთ უბადო ადამიანეფს დო ქოთ ჯგირეფს აღოლენა გლახა დო ღურუნა. ადამშე არძას ცოდაქ გეგნმაჩეს.

10. მუჭო იმოქმედ ადამ დო ევაშა ცოდამ მდგომარეობაქ?

¹⁰ მორთ დეფიფქრათ, მუჭო იმოქმედ ცოდამ მდგომარეობაქ პირველ ჩილ დო ქომონჯშა. ცოდაქ თინეფიშ გრძნობეფ დუდგიმე გამნართინუ. დაუმორჩილებლობაშ უკულ ადამ დო ევაქ ხეთეშე ქიგინეს თი გლახა შედეგეფ, ნამუთ ღორონთიშ კანონიშ გინორთას მოჸუნს, კანონიშ, ნამუთ „გურეფშა ენუჭარუდეს“ (რომ. 2:15). თინეფქ ხეთეშე ქიგინეს, ნამდა მუდგარენქ დითირ დო დითირ უფრაშობაშა. ადამ დო ევას თიცალ გრძნობაქ გოურჩქინდეს, ნამდა ოკო დოფორესკო მუნეფიშ სხეულ დო დამნაშავეეფცალო დატყობესკო მუნეფიშ გუმაჭყაფალს (დაბ. 3:7, 8). თინეფქ პირველო გიმოცადეს თიცალ გრძნობეფ, მუნერით დღას ვა ნოღვენა. თენეფ რე: წუხება, დანაშაულიშ დო დაუცველობაშ გრძნობა, ჭუა დო ონჯღორე. თე გრძნობეფ ღურა დღაშახ უსოფუანდუკონ იჸიდ თინეფს დო დუდ ვა დარსხებედეს თინეფშე (დაბ. 3:16–19).

11. მუჭო მოქმედენს ჩქინდა ცოდამ მდგომარეობა?

¹¹ ცოდა დო არასრულყოფილება ჩქინდა ხოლო ზუსტას თეშ მოქმედენს, მუჭოთ პირველ ჩილ დო ქომონჯშა იმოქმედ. ზუსტას თე ცოდამ მდგომარეობაშე მოურს ქოთ ჩქინ ფიზიკურ დო ქოთ ემოციურ ჭუა. მუდგანერო ვევეცადათინ, თე მდგომარეობაშე ჩქინით ვეგშმართენა, მუშენდა, მუჭოთ ბიბლია ენწყუნს, ადამ დო ევაშ შეცოდებაშ უკულ, ადამიანეფს ირიათო აღვენუდეს სირთულეეფ (რომ. 8:20). თენა ქოთ თაშ ხვადუ მუჭოთ ცალკე ეჭოფილ ადამიანეფიშ, თეშ მთელ კაცობრიობაშ შემთხვევას. მაგალთო, დეფიქრით, მუჭო ოცადუნა ადამიანეფ ეკოლოგიურ პრობლემეფიშ მიკოჯინას, ძალადობაშ დო სიღარიბეშ მოსპუალას დო ქიანეფ შქას მშვიდობაშ მენჭირნაფას, მარა იშენით ვეგშალენა თეშ კეთება. მუჭო შეულებ გიშაჸიდირალს დამირსხან არასრულყოფილებაშე?

12. მუშ იმენდის მარზენა გიშაჸიდირალ?

¹² გიშაჸიდირალიშ ჭყოლოფათ მიღუნა იმენდ, ნამდა „გუნაჭყეფ გეთავისფალებ ცოდაშ დო ღურაშ მონობაშე“ (რომ. 8:21). თენა ნიშნენს, ნამდა ახალ ქვეყნიერებას, მუჟამსით სრულყოფილეფ იპჸით, მეტო ვეშმაწუხენა ვართ ემოციურ დო ვართ ფიზიკურ ლახალა. ვა მაღვენუნა თიცალ გრძნობეფ ხოლო მუნერით რე, წუხება, დანაშაულიშ დო დაუცველობაშ გრძნობა, ჭუა დო ონჯღორე. თეწკუმა ართო, თი დროს „მშვიდობაშ მთავარ“, იესო იჸუაფ მმართველ დო თინა ქიმეხვარებ ადამიანეფს თი არძა პრობლემაშ გინოჭკირუას, ნამუთ ამდღა ვეშულებუნა (ეს. 9:6, 7).

13. ხოლო მუშე შეილებუნა დეფიქრათ გოშინაშ ონჯუაშო მომზადებაშ დროს?

¹³ დეფიქრით, მუჭო დოთირანს თქვან ცხოვრებას არასრულყოფილებაშე გათავისფალება. წერმიდგინით, მუშმაჯგირა გრძნობა იჸი, ნამდა ირდღას დუდის ჯგირო გინაფლენთინ თეშ გოკურცხუთ დო ვა გაშქურინენა, ნამდა თქვა ვარდა თქვან საჸოროფო ადამიან შქირენულო იჸი, დელახებ ვარდა დოღურუ. თე დიდებულ იმენდ ამდღა ხოლო მარზენა სიმშვიდეს დო „უმარგუთ, მუჭოთ გემ უმარგ ღუზას“. თე იმენდ „სანდო დო მტკიცე“ რე (ებრ. 6:18, 19). მუჭოთ ღუზა ოხვარ გემს დუდიშ დამარგებას, თეშ ჩქინ იმენდ მიმანგარენა რწმენას დო მოხვარუნა, ქუგურზათ ირნერ სირთულეს, ნამდგას შეფხვადუთ. შემლებუნა ბჯერდან, ნამდა იეჰოვა „ჯგირობუათ გინუგანს თინეფს, მით შურ დო გურით გორუნს თის“ (ებრ. 11:6). თაშ ნამდა, გიშაჸიდირალიშ ჭყოლოფათ, ამდღარშე მიღუნა სიმშვიდე დო მომავალშო – დიდებულ იმენდ.

ᲒᲘᲨᲐᲸᲘᲓᲘᲠᲐᲚᲥ ᲦᲝᲠᲝᲜᲗᲬᲙᲣᲛᲐ ᲒᲣᲛᲐᲠᲘᲒᲔᲡ

14. მუჭო იმოქმედ ცოდაქ გუმაჭყაფალწკუმა ჩქინ ურთიერთობაშა დო მუშენ?

¹⁴ ადამ დო ევაშ შეცოდებაშ უკულ, ადამიანეფქ ჩეთხუეს ღორონთის. ბიბლიას ჭარჷ, ნამდა თინეფქ ღორონთიშ ნტერეფო გინირთეს (რომ. 8:7, 8; კოლ. 1:21). მუშენ რე თაშ? მუშენდა იეჰოვაშ სრულყოფილ ნორმეფს ვემურე, ნამდა თიქ ცოდაშე თოლ დოწკურას. ბიბლია ღორონთიშ გურშენ იჩიებ: „თიცალ სუფთა რე სქან თოლეფ, ვემგაჯინნე უბადობაშა, თოლს ვა წკურუნქ გლახაშე“ (აბაკ. 1:13). ცოდაქ ადამიანეფ დო ღორონთ შქას „ქირქე“ გარჩქინ. თე ქირქეს „ხიდექ ვეგიდვინკონ“ თეშ, მუთუნით ვემმართედეს იეჰოვაშა. ზუსტას თეცალ ხიდეს მოგენს გიშაჸიდირალ, ნამდგაშ ჭყოლოფათ იეჰოვაწკუმა მეგობრობაშ საშვალება კინ მერზიებუნა.

15. მუჭო მეჩჷ ქრისტეშ ღურაქ ადამიანეფს ღორონთწკუმა ჯგირ ურთიერთობაშ დორთინაფაშ საშვალება?

¹⁵ ბიბლიას იესოშ გურშენ ჭარჷ, ნამდა „თინა შერიგაშ მსხვერპლ რე ჩქინ ცოდეფშო“ (1 იოან. 2:2). მუჭო არზენს იესოშ მსხვერპლ ადამიანეფს ღორონთწკუმა მეგობრობაშ საშვალებას? იესოშ ღურა ჩქინ სრულყოფილ ღორონთის არზენს სამართლიან მიზეზის, ნამდა კინ ჯგირ ურთიერთობა დირთინუას ადამიანეფწკუმა (რომ. 3:23–26). იეჰოვა ქრისტეშ ღურაშახ ხოლო მირჩქინანდჷ მართალეფო მუშ ართგურ მსახურეფს (დაბ. 15:1, 6). მუშენ ორთუდ თეს? მუშენდა თის ბოლოშა ჯერდჷ, ნამდა მუშ სქუა გეგნიგანდ გიშაჸიდირალს (ეს. 46:10). თაშ ნამდა, გიშაჸიდირალქ შარა გომინწყეს ღორონთწკუმა შეიორიგებელო.

16. ხოლო მუშე შეილებუნა დეფიქრათ გოშინაშ ონჯუაშო მომზადებაშ დროს? (ქოძირით სურათ).

¹⁶ დეფიქრით, მუს ნიშნენს თქვანო ღორონთწკუმა შერიგა. მაგალთო, გიღუნა საშვალება, ნამდა იეჰოვას „მუმა“ დოუძახათ, მუჭოთ თენა იესოქ დუმოგურუეს (მათ. 6:9). შილებე მინშა თის „მეგობარო“ ხოლო მიშინუანდათ. მარა მუჟამსით იეჰოვას „ჩქინ მუმას“ ვარდა „მეგობარს“ უძახუთ, თიქ ხოლო ოკო ვაგმოჭყორდან, ნამდა თენა პატიცემათ დო თანდაბლობათ ოკო ვაკეთათ. მუშენ რე თენა მნიშვნელოვან? მუშენდა ჩქი ცოდამეფ ვორეთ დო ღორონთწკუმა ჯგირ ურთიერთობა მიღუნან თენა შურო ვა რე ჩქინ დამსახურება. ხვალე გიშაჸიდირალიშ ჭყოლოფა რე, ნამდა იეჰოვაწკუმა ურთიერთობაშ პატი მიღუნა. იეჰოვაქ მუშ სქუაშ სიცოცხლე შეწირ, ნამდა „წამებაშ ძელს დობუნილ თიშ [იესოშ] ზისხირით ეკირიგუკო დო მუწკუმა მშვიდობა დართინაფუკო არძას“ (კოლ. 1:19, 20). ზუსტას თეშ საშვალებათ შემლებუნა ამდღა ხოლო, არასრულყოფილებაშ უმკუჯინუო, ღორონთწკუმა ჯგირ ურთიერთობა მიღუდან.

ᲒᲘᲨᲐᲸᲘᲓᲘᲠᲐᲚᲨᲔ ᲘᲔᲰᲝᲕᲐᲨ ᲭᲧᲝᲚᲝᲤᲐ ᲘᲫᲘᲠᲔ

17. მუჭო იძირე გიშაჸიდირალშე, ნამდა იეჰოვა მოჭყოლოფე რე? (ეფეს. 2:4, 5).

¹⁷ გიშაჸიდირალ ოძირანს, ნამდა იეჰოვა „სარკოთ მოჭყოლოფე“ რე. თიქ „გუმათელეს, . . მუჟამსით ჩქინ დუნაშებუშ გურშენ ღურელეფ ვორდით“ (წეკითხით ეფესოელეფიშ 2:4, 5). დაჭყაფუს მოშინაფილ კოჩცალო, ნამუთ აკოცუმილ შენობას რე ათოჸუნელ, თანდაბალ ადამიანეფს, მიდგაშ „გურ მზათ რე ულიებ სიცოცხლეშ მიოღებელო“, არჩქილენა, ნამდა თინეფ „ცოდას აფჷ ათოჸუნაფილ“ დო თიშე დუდიშ დარსხებელო მოხვარა ოსაჭირუნა (საქ. 13:48). ღორონთ ხოლო ოხვარ თინეფს სახიოლო ამბეშ გაგებას, ნამდა გეჩინებაფუან თინა დო მუშ სქუა, იესო (იოან. 17:3). სატანა ადამ დო ევაშ მეჩილითაფათ, ღორონთიშ გეგმეფს აკარღვანდუნ თეს ქოფიქრენდ-და, მანგარო რე ჩილათირ.

18. მუქ ოკო ვაგმოჭყორდან, მუჟამსით გიშაჸიდირალშე ფიფქრენთ?

¹⁸ მუჟამსით დეფიფქრებუთ თი ჯგირ შედეგეფშე, მუთ გიშაჸიდირალქ მომღეს, თი მთავარ მიზეზიქ ხოლო ოკო ვაგმოჭყორდან, მუდგაშეთ იეჰოვაქ თენა აკეთ. ოკო ვაგმოჭყორდან, ნამდა ღორონთის გიშაჸიდირალ ხვალე ჩქინ ორსხებელო ვეგნუგაფუნ, უმოს მნიშვნელოვან მუდგარენშო აკეთ – თიშო, ნამდა ედემიშ ბაღის მუშა ეკოწამებულ სატანაშ ტყურას პასუხიქ ქიმიაჩას (დაბ. 3:1–5, 15). გიშაჸიდირალიშ ჭყოლოფათ იეჰოვა ამტკიცენს, ნამდა თი ირფელ, მუთ სატანას თიშა აფჷ ეკოწამებულ, ტყურა რე. ღორონთ გიშაჸიდირალს ცოდა დო ღურაშე ჩქინ დარსხებელო ხოლო ირინუანს, მუთ ხოლო ართშა ამტკიცენს, ნამდა თინა ჸოროფათ ეფშა ღორონთ რე. ჩქინ მოჭყოლოფე მუმა, არასრულყოფილეფ ვორეთინ თიშ უმკუჯინუო, მარზენა საშვალებას, ჩქი ხოლო მიბღათ მონაწილება თიშ დამტკიცებას, ნამდა სატანა მეტყურე რე (იგავ. 27:11). მუჭო შეილებუნა ოძირუათ, ნამდა მარდულ რეთჷ გიშაჸიდირალშო? თე კითხვას უკულიან სტატიას ქიმეფჩანთ პასუხის.