მუჭო ვორჯგინათ გლახა ემოციეფს?

1, 2. მუჭო გინაფლენდჷ პავლე მინშა დუდის დო მუშენ შეულებ თიშ მაგალითის ჩქინ მოხვარა? (რომ. 7:21–24).

ᲛᲣ ᲒᲣᲒᲐᲨᲘᲜᲔᲜᲐ, მუჟამსით მოციქულ პავლეშ სახელ გარჩქილენა? თინა ხომ ვარ, ნამდა გაბედულ მაქადაგებელ დო ჯგირ მასწავლებერ რდჷ ვარდა ხოლო თინა, ნამდა ბიბლიაშ ბრელ წიგნ აფჷ ნაჭარა? თენეფ არძა მართალ რე. მარა შილებე პავლე მოციქულიშ გურშენ ჩიებაშ დროს, ირო ვაგმაშინედან, ნამდა თინა მინშა მანგარ გლახათ გინაფლენდჷ დუდის დო თიცალ ემოციეფწკუმა უხვადუდ ბრძოლა, მუნერით ხშირას ამდღა ჩქი ხოლო მირჩქინდუნა.

² წეკითხით რომაელეფიშ 7:21–24. რომაელეფშა მეჭარილ წერილს პავლექ ეჭარ, მუჭო გინაფლენდჷ მინშა დუდის. თიშ გრძნობეფ ბრელ ამდღარ ქრისტიანშო ხოლო ვა რე უცხო. მართალ რე, პავლე ღორონთიშ ართგურ ქრისტიან რდჷ დო შურ დო გურით ოკოდ, გურ გაუხარუკო თის, მარა იშენით ირიათო ორკინებელ აფუდ არასრულყოფილებაშა დო უჭირდჷ, ირო თინა აკეთუკო, მუთ სწორ რდჷ. თეწკუმა ართო, პავლეს გლახა გრძნობეფს მუშ ულირ საქმეეფ გაშინედუნ თენა ხოლო ურჩქინანდჷ დო ხოლო ართ პრობლემა უღუდ, მუდგაქ მუთუნით ვა ჩათხინუ.

3. მუს გუვარჩიენთ თე სტატიას? (ქოძირით „განმარტება“).

³ თიშ უმკუჯინუო, ნამდა პავლე მინშა გურგოტახილ რდჷ, თინა გვალო ვარზენდჷ დუდის თე გლახა ემოციეფს.a თე სტატია პასუხის ქიმეჩანს თეცალ კითხვეფს: მუშენ ფიქრენდჷ პავლე მინშა, ნამდა „საცოდალ კოჩ“ რდჷ? მუჭო ობრძოლუდ თინა მუშ გლახა ემოციეფს? დო ჩქი მუჭო შემლებუნა ვორჯგინათ თეცალ გრძნობეფს?

ᲛᲣ ᲣᲠᲩᲥᲘᲜᲐᲜᲓᲷ ᲞᲐᲕᲚᲔᲡ ᲒᲚᲐᲮᲐ ᲔᲛᲝᲪᲘᲔᲤᲡ

4. მუ ურჩქინანდჷ პავლეს გლახა ემოციეფს?

⁴ ულირს კეთებულ გლახა საქმეეფ. ქრისტიანო გინორთაშახ, პავლე, ნამდგას თიმწკუმა სავლე ჯოხოდ, თიცალ მუდგარენეფს ორთუდ, მუდგაქ უკულ ონარღებელქ აჸუ. მაგალთო, მუჟამსით ღორონთიშ ართგურ კოჩ, სტეფანე, ჸვილეს, პავლე ხოლო გინაჯინედ თეს დო იწონუანდჷ თიშ ჸვილუას (საქ. 7:58; 8:1). თეწკუმა ართო, პავლე დუდენდჷ ქრისტიანეფიშ თხოზინს დო უდუნდებელო ოქცუდ თინეფს (საქ. 8:3; 26:9–11).

5. მუჭო მოქმედენდჷ პავლეშა თი ირფელ, მუთ ულირს აფუდ ნაკეთებ?

⁵ ქრისტიანო გინორთაშ უკულ პავლე მოციქულს ულირ ცხოვრება ხშირას გაშინანდჷ დუდის დო მუთ უმოს დრო მიშჷ, თით უმოსო აწუხენდუკონ იჸიდ, ნამდა თეცალ გლახათ ოქცუდ ქრისტიანეფს. მაგალთო, ახ. წ. 55 წანას კორინთელეფშა მეჭარილ პირველ წერილს თიქ თქუ: „მოციქულ ბჯოხოდასინ თიშ ღირს ხოლო ვა ვორექ, მუშენდა ღორონთიშ კრებას ფთხოზუდ“ (1 კორ. 15:9). სოდგარენ, ხუთ წანაშ უკულ, ეფესოელეფშა მეჭარილ წერილს თიქ მუშ დუდიშ გურშენ თქუ, ნამდა „წმინდეფ შქას არძაშ უნაკლებაშ“ რდჷ (ეფეს. 3:8). პავლექ ტიმოთეს ხოლო უწუ, ნამდა ულირს ღორონთის ლანძღუნდჷ, თიშ ხალხის თხოზუდ დო ნირგა კოჩ რდჷ (1 ტიმ. 1:13). წერმიდგინით, მუს გინაფლენდუკონ იჸიდ პავლე, მუჟამსით კრებეფშა მეკითხირიშ დროს, თეიშახ თხოზუდუნ თი ქრისტიანეფს ვარდა თინეფიშ ოჯახიშ წევრეფს შეხვადუდ.

6. ხოლო მუშ გურშენ წუხენდჷ პავლე? (ქოძირით სქოლიო).

⁶ ოწუხებელ, ნამუთ ძიგირცალ აფუდ. პავლექ თქუ, ნამდა უღუდ მუდგარენ პრობლემა, ნამუთ მანგარო აწუხენდჷ დო ძიგირცალო უძგვიტუანდჷ (2 კორ. 12:7). მართალ რე, პავლე კონკრეტულო ვეჩიებ, ფიზიკურ რდუო თე პრობლემა დოვარ ემოციურ, მარა მუდგა ვა რდუკონ, მუჭოთ იძირენ, თინა პავლეს დიდ ჭუას მიორინუანდჷ.b

7. მუჭო მოქმედენდჷ პავლეშა არასრულყოფილება? (რომ. 7:18, 19).

⁷ არასრულყოფილება. შხვა პრობლემეფწკუმა ართო, პავლე მუშ არასრულყოფილებას ხოლო ობრძოლუდ დო თეშ გურშენ მინშა გურ უტირხუდ (წეკითხით რომაელეფიშ 7:18, 19). მართალ რე, ოკოდ, თინა აკეთუკო, მუთ სწორ რდჷ, მარა ცოდამ სხეულ ოცილუდ თეს. თინა იჩიებუდ, ნამდა ირიათო ორკინებელ აფუდ გლახაშ კეთებაშ სურვილშა, ნამდა ვეიაჸუნუკო თის. პავლე ირნერო ოცადუდ გაუჯგუშებას დო მუშენდჷ მუშ დუდშე (1 კორ. 9:27). წერმიდგინით, მუჭო უტირხუდუკონ იჸიდ თის გურ, მუჟამსით თეზმას ქაცადუდ, მარა მინშა იშენით ქაქიმინუაფუდ გლახა.

ᲛᲣᲡ ᲝᲠᲗᲣᲓ ᲞᲐᲕᲚᲔ, ᲜᲐᲛᲓᲐ ᲒᲚᲐᲮᲐ ᲔᲛᲝᲪᲘᲔᲤᲡ ᲝᲠᲯᲒᲘᲜᲣᲙᲝ

8. მუჭო ოძირანს პავლეშ წერილეფ, მუთ ობრძოლუდ თინა მუშ არასრულყოფილებას?

⁸ პავლე ბრელს ფიქრენდჷ თიშე, მუჭო შეულებუდ ღორონთიშ წმინდა შურს, ქოთ მუს დო ქოთ შხვა ქრისტიანეფს ქიმეხვარუკო გლახა სურვილეფიშ ჩათხინაფას დო უჯგუშ პიროვნებათ გინორთას. სოვრეშე იძირე თენა? თიშ ნაჭარა წერილეფშე (რომ. 8:13; გალ. 5:16, 17). მუშ წერილეფს პავლე თანაქრისტიანეფს ხშირას ურაგადუდ, მუ დო მუ სურვილეფს დო საქმეეფს ოკო ეუჩილითუესკო დუდ, ნამდა იეჰოვას გაუხარესკო გურ (გალ. 5:19–21, 26). გიშურს, ნამდა პავლე ბრელს ნოფიქრებუე მუშ სისუსტეეფშე, გორუნდჷ საჭირო რჩევეფს ღორონთიშ სიტყვას დო უჩქუდ, მუ კონკრეტულ ნაბიჯეფ ოკო გინოდგუკო, ნამდა ებრძოლუკო მუშ არასრულყოფილებას. თაშ ნამდა, მუჟამსით პავლეშ წერილეფს თანაქრისტიანეფშა მეჩამილ რჩევეფს პკითხულენთ, შემლებუნა ბჯერდან, ნამდა თე რჩევეფს მუ ხოლო ირინუანდჷ.

9, 10. მუ ოხვარუდ პავლეს გლახა ემოციეფწკუმა ბრძოლას? (ეფეს. 1:7; ქოძირით სურათ).

⁹ მართალ რე, პავლე მინშა გურგოტახილ რდჷ, მარა იშენით ვადინუანდჷ ხიოლს. მაგალთო, თის მანგარო ოხიოლუდ, მუჟამსით თანამსახურეფ შხვადოშხვა კრებაშე ჯგირ ამბეეფს მოუღანდეს (2 კორ. 7:6, 7). თიშა მეგობრეფწკუმა ურთიერთობას ხოლო მანგარ ხიოლ მოუღუდ (2 ტიმ. 1:4). პავლე თით ხოლო რდჷ ბედნერ, ნამდა ხოლოშიან ურთიერთობა უღუდ იეჰოვაწკუმა დო სუფთა სინდისით ომსახურუდ თის (2 ტიმ. 1:3). თქვა წერმიდგინით, ციხეს ხედუნ თიმწკუმა ხოლო პავლე თანაქრისტიანეფს ურაგადუდ, ხიოლ გიღუდანია „უფალიშ მსახურებას“ (ფილ. 4:4). თიშ სიტყვეფ მუთუნით ვა გჷ თიცალ კოჩიშ ნარაგადის, ნამუთ გლახა ემოციეფს დორაგვაფილ აფჷ. მუჭოთ იძირენ, მუჟამსით გურშა ქათაკათუდ დო გლახა ემოციეფ გეჭოფუნდჷ, პავლე ხეთეშე თი ჯგირ მუდგარენეფშე იჭყანდჷ ფიქრის, მუთ ხიოლს დურთინუანდ.

¹⁰ პავლეს გლახა ემოციეფწკუმა ბრძოლას თინა ხოლო ოხვარუდ, ნამდა ჯერდჷ, ღორონთის გიშაჸიდირალ პირადო მუშო ხოლო აფუდ გინოგაფილინ (გალ. 2:20; წეკითხით ეფესოელეფიშ 1:7). შედეგო, თის უჩქუდ, ნამდა ღორონთის პატიებულ აფუდ ულირს დაშებულ დო ანწ ხოლო ქაპატიენდ (რომ. 7:24, 25). თეშ ჭყოლოფათ, ულირ შეცდომეფიშ დოვარ მუშ არასრულყოფილებაშ უმკუჯინუო, თინა ხიოლით უსრულენდჷ ღორონთის „წმინდა მსახურებას“ (ებრ. 9:12–14).

11. მუშენ რე პავლეშ მაგალით ჩქინო გურიშ ემაკინალ?

¹¹ შილებე, პავლეცალო, ჩქი ხოლო ირიათო ორკინებელ მაფუდან, ნამდა მუთუნ თიცალ ვეფიფქრათ, ვა ვაკეთათ დო ვა ფთქუათ, მუთ ღორონთის ვახიოლედ. შილებე ჩქი ხოლო თიცალო ბგინაფლენდათ დუდის დო იფჩიებუდათ, საცოდალ ვორექია. დეკვირით, მუჭო გინაფლენს დუდის ართ 20 წანას გინოჩილათირ და, ელიზა.c თინა იჩიებ: „მანგარ ძალას მარზენს მოციქულ პავლეშე ფიქრ. გურშა ემიშქვანს თიშ რჩქინა, ნამდა თინა ხოლო ჩქიმცალო გინაფლენდჷ დუდის დო ჩქიმცალო ბრძოლა უხვადუდ. თენა ხოლო ართშა გუმოშინანს, ნამდა იეჰოვას მანგარ ჯგირო არჩქილე მუშ მსახურეფიშ“. მუშ კეთება შემლებუნა, ნამდა, პავლეცალო, ჩქი ხოლო სუფთა სინდისით დო ხიოლით ვემსახურათ იეჰოვას, თიშ უმკუჯინუო, ნამდა მინშა გლახა ემოციეფ ხოლო მიღუნა?

ᲛᲣᲭᲝ ᲕᲔᲑᲠᲫᲝᲚᲐᲗ ᲒᲚᲐᲮᲐ ᲔᲛᲝᲪᲘᲔᲤᲡ

12. მუჭო მიმეხვარებუნა ჯგირ სულიერ განრიგ გლახა ემოციეფწკუმა ბრძოლას?

¹² გიღუდან ჯგირ სულიერ განრიგ. ჯგირო გენწყილ სულიერ განრიგ ქუმაღვენუნან-და, თენა ქიმმეხვარებუნა, ყურადღება უმოსო ჯგირ მუდგარენეფშა მაფუდან გინოღალირ. სულიერ განრიგ შემლებუნა ჯანსაღ ცხოვრებაშ წესის შევადარათ, ნამუთ ჩქინ ჯანმრთელობას უნწყუნს ხეს. მაგალთო, სწორას ქოპჭკუმუნთ, ირიათო ქობვარჯიშენთ დო დასაბაღ ლურ ქომღუნან-და, ბგინაფლენთ, ნამდა უჯგუშო ვორეთ. თეშნერო, ბიბლიას ირიათო ქოპკითხულენთ, შეხვალამეფშო ქუვემზადებუთ, ქუვოსწრუთ დო მონაწილებას ქობღებულენთ დო მსახურებაშა ქიგლურთ-და, სულიერო ჯგირო ბგინაფლენთ დუდის დო უჯგუშო შემლებუნა მივერუათ გლახა ემოციეფს (რომ. 12:11, 12).

13, 14. მუჭო ოხვარ ნამთინე ღორონთიშ ართგურ ქრისტიანს ჯგირ სულიერ განრიგ?

¹³ მორთ ქიფჩუათ ჯონიშ შემთხვევაშე, ნამდგას, 39 წანერ რდუნ თეშ, იშვიათ ფორმაშ კიბოშ დიაგნოზ ქიგუშქვეს. დუდშე თინა ემოციეფქ გეჭოფ დო, მუჭოთ მუ იჩიებ, ფიქრენდჷ, თეცალ ახალგაზრდა ასაკის თეშმანწარა ლახალას ჩქიმდა მუ ოკოდუა. თე დროს თის სუმ წანერ ბოშ ჸუნდჷ. მუქ მეხვარ ჯონს, ქებრძოლუკო მუშ გლახა ემოციეფს? თინა მირაგადუნა: „მუთუნიშ დუდ ვამღუდ, მარა იშენით ვოცადუდ, ჩქიმ ოჯახის სულიერ განრიგიქ ვაკუცუკო. ჩქი ირიათო ვოსწრუდით შეხვალამეფს, მარას ვემკიფშქვანდით, ვებმსახურითკონ თეშ დო მიღუდეს ოჯახურ თაყვანიშცემა თიმწკუმა ხოლო, მუჟამსით მანგარ ძნელ რდჷ თეშ მოხერხება“. ჯონ გეუძინანს: „თეცალ ამბეს გებულენქინ, უცფას შოკის ინოლუქ, მარა უკულ ჭიე-ჭიეთ გინაფლენქ, მუჭო გარზენს იეჰოვა ძალას დო მუშმანწარას უჸორქ თის. ბჯერსჷ, თინა თქვა ხოლო აუცილებერო ქიმერჩანა ძალას, თეშ, მუჭოთ მა მუჩჷ“.

¹⁴ ჟიშე მოშინაფილ ელიზა იჩიებ: „ირ კრებაშ შეხვალამა დო პირად გურაფა გუმოშინანს, ნამდა იეჰოვა მირჩქილე დო მანგარო უჸორქ. თენა სასწაულ ხიოლს მარზენს“. ნოლან, ნამუთ რაიონულ ზედამხედველო მსახურენს აფრიკას, მუშ დო მუშ მეუღლეშ, დიანიშ, სახელით იჩიებ: „მანგარ გურგოტახილ ვორდათინ ხოლო, ვოცადუთ, სულიერ განრიგიქ ვაკომცუან. მუჟამსით თეს ვორთუთ, ბგინაფლენთ, ნამდა იეჰოვა ირიათო მოხვარუნა დო ხიოლს მარზენა. დუდის გლახათ ბგინაფლენთინ თიმწკუმა, ირიათო გუვოშინანთ ჩქინ დუდის, ნამდა იეჰოვა მუთუნით ვემმოტენა დო ქიმმეხვარებუნა. ირო ზუსტას ვა მიჩქუნა, მუჭო აკეთენს თეს, მარა მიჩქუნა, მუჭო აუცილებერო გაკეთენს“.

15. მუშ კეთებაქ შილებე იჸუას საჭიროქ, ნამდა ორჯგინათ გლახა ემოციეფს? ქიმიჸუნით მაგალით.

¹⁵ გლახა ემოციეფს ვორჯგინათინ, მინშა შილებე უმოსიშ კეთებაქ იჸუას საჭიროქ. მაგალთო, წერმიდგინით, ნამდა ოჭიშიშ ჭუეფქ ქუდგაჭყეს. შილებე გაიგებუნა, ნამდა ოჭიშიშ ჭუას გილულა მალე. მარა შილებე ხვალე თექ ვემგეხვარან დო საჭიროქ იჸუას ექიმშა მეულაქ დო გამოკვლევეფიშ ჩატარებაქ, ნამდა ქიგეგათ, სოვრეშე მოურს თე ჭუა. თეშნერო, გლახა ემოციეფს მუჭო ებრძოლათინ თეშ გაგებელო, შილებე საჭიროქ გაჸუან ბიბლიაშ დო პუბლიკაციეფიშ გიმორკვიებაქ ვარდა სულიერო მოწიფულ თანაქრისტიანწკუმა ჩიებაქ. მორთ თუდო ხოლო შხვა მხარეეფშე ქიფჩუათ, ნამუთ მიგეხვარებუნა.

16. მუჭო შეილებუნა ინანჭათ, მუ გირჩქინანა გლახა ემოციეფს? (ფსალმ. 139:1–4, 23, 24).

¹⁶ ლოცვას ქოთხით იეჰოვას, ქუგოძირან, მუ გირჩქინანა გლახა ემოციეფს. მეფე დავითის უჩქუდ, ნამდა იეჰოვა მანგარ ჯგირო იჩინენდჷ. ათეშენ თის თხულენდჷ, ქიმეხვარუკო თიშ ძირაფას, მუ უწუხენდჷ გურს (წეკითხით ფსალმუნეფიშ 139:1–4, 23, 24). თქვა ხოლო შეილებუნა ქოთხუათ იეჰოვას თენა. თეწკუმა ართო, ხვალე გლახა ემოციეფიშ მიზეზიშ ძირაფა ვარინ, თინა ხოლო ქოთხით, ქუგოძირან, მუჭო ოკო ორჯგინათ თე გლახა გრძნობეფს. უკულ თქვანით ხოლო ქიფიქრით: სოვრეშე შილებე მიშას თე ჩქიმ გლახა ემოციეფ? ხშირას უმოსო მუ მირჩქინანს თეცალ გლახა აზრეფს? მუჟამსით გლახა ფიქრეფ ქუმმალე, თინეფიშ ჩათხინაფას ვოცადუქ დოვარ პირიქით, ირიათო თის ურთანქ გონებას?

17. ნამ საკითხეფიშ გიმორკვიებაქ შილებე მიგეხვარან, ყურადღება ჯგირ აზრეფშა გეგნიღათ? (ქოძირით სურათ).

¹⁷ გოსაჭირუნან თი საკითხეფ პირად გურაფას ქინახუნეთ. მინშა ჯგირ იჸუაფ, პირად გურაფას ქიმშახუნუათ იეჰოვაშ ნამდგაინ თვისებაშ გიმორკვიება. მაგალთო, მოციქულ პავლეს მანგარო ოხვარუდ გიშაჸიდირალშე ფიქრ, ნამუთ ოძირანდჷ თის, მუშმაშხვა პატიება შეულებ იეჰოვას. თქვა ხოლო შეილებუნა თაშ გაკეთათ. გეგმირინეთ „იეჰოვაშ მოწმეეფიშ ორკვიებელ სახელმძღვანელო“, წიგნ „ბიბლია მოგურუანა ქრისტიანულ ცხოვრებას“ ვარდა ხოლო ბიბლიაშ გიმარკვიებელ შხვა საშვალებეფ, ნამუთ თქვან ნინაშა გიღუნა, დო გეგმირკვით თიცალ საკითხეფ, მუნერით რე, ღორონთიშ ჭყოლოფა, პატიება დო ართგურ ჸოროფა. მუჟამსით თიცალ სტატიეფს ქეშეხვადუთ, ნამდგაქ შილებე გუმგოდირთან, გეგმოჭარით თინეფ დო თიცალ ადგილს ქუმკაბუნეთ, სოდეთ თოლშა მოიოლუნა. გლახა ემოციეფ ქუმგანჯირუნან, ქიგნაჯინით თე სიას დო ქიდიჭყით გუმოჭარილ სტატიეფიშ კითხირ. ქეცადით, გეგმირინუათ რჩევეფ, ნამუთ თექ რე მოჩამილ (ფილ. 4:8).

18. მუშ გიმორკვიება ოხვარ ნამთინე ქრისტიანს?

¹⁸ ჟიშე მოშინაფილ ელიზაქ გეგნოჭყვიდ, პირად გურაფას ქინახუნუკო ბიბლიურ პერსონაჟიშ, იობიშ, ამბეშ გიმორკვიება. თინა იჩიებ: „ქიანაშ საერთო ქობძირ ჩქიმ დო იობ შქას. თის ართიანიშ მეჸუნელო ქიანაშ უბედრობაქ ქიგიოტირხჷ. მარა არძაშ უმოსო უჭირდუნ თიმწკუმა ხოლო, ვემუტებ იეჰოვაშ გორუა, თიშ უმკუჯინუო, ნამდა შურო ვა უჩქუდ, მუ რდჷ მუშ პრობლემეფიშ მიზეზ“ (იობ. 42:1–6). ჟიშე მოშინაფილ დიან იჩიებ: «მა დო ჩქიმ ქომონჯ იბრკვიენთ წიგნის „დეახლოვ იეჰოვას“. ჩქინო დიდ პატი რე, ნამდა იეჰოვა ზუსტას თეშ მამუშენა, მუჭოთ მეთუნე – თიხას. მუჟამსით ჩქინ შეცდომეფიშ გურშენ გურ მიტირხუნა, ყურადღება თიშა გინომღუნა, ნამდა იეჰოვა მოგურუანა დო მოხვარუნა, უჯგუშ ადამიანეფო გინიბრთათ. თენა ხოლო უმოსო მაახლოვენა თიწკუმა» (ეს. 64:8).

ᲘᲛᲔᲜᲓᲘᲐᲜᲝ ᲣᲯᲘᲜᲘᲗ ᲛᲝᲛᲐᲕᲐᲚᲡ

19. მუჭო შილებე მინშა იბგინათ დუდ, მარა მუ შემლებუნა ბჯერდან?

¹⁹ ოკო ირაგადუას, ნამდა მუდგა ჯგირ სულიერ განრიგ ვამღუდანინ, გლახა ემოციეფქ შურო დღას ვა გომრჩქინდანინ თენა ვეგშმალენა დო მინშა იშენით შილებე, პავლეცალო, საცოდალო ბგინაფლენდათ დუდის. მარა, მუჟამსით თეცალ ემოციეფ გომრჩქინდუნა, იეჰოვაშ მოხვარათ, შემალებენა ნაკლებო იფიფქრათ გლახაშე დო უმოს მშვიდას იბგინათ დუდ. შემლებუნა ბჯერდან, ნამდა უმენტაშო ხიოლ მაღვენუნა, მუშენდა მიღუნა სუფთა სინდის ღორონთიშ წოხოლე დო ვომსახურუთ თის.

20. მუ გაფუნა გინოჭყვიდილ?

²⁰ ირნერო ვეცადათ, ვართ ულირ დო ვართ ამდღარ შეცდომეფქ ვემდამღან ხიოლ. იეჰოვა ქიმმეხვარებუნა, ვა ვოდინუათ სიმშვიდე (ფსალმ. 143:10). შურ დო გურით ქუჯინათ დროს, მუჟამსით მუთუნშე ვა მაჸინა ოწუხებელ დო ონერვიანებელ; დროს, მუჟამსით ირ ოჭმარეს ბედნერეფ გოპკურცხუთ დო ხიოლით ვემსახურებუთ ჩქინ მოჸოროფე ღორონთის, იეჰოვას!