მუჭო ვოძირუათ, ნამდა გიშაჸიდირალშო მარდულეფ ვორეთ?

1, 2. მუ ოკო მოკეთებაფუან გიშაჸიდირალქ დო მუშენ? (2 კორ. 5:14, 15; ქოძირით სურათ).

ᲛᲣᲡ ᲘᲒᲘᲜᲐᲜᲓᲘᲗ, აკოცუმილ შენობას ქათოჸუნაფუდითკო დო მიდგაინს თევრეშე გეგშუჸუნაფუდითკონ? თქვანწკუმა ართო, თის შხვეფ ხოლო გინუსქილიდუაფუდუკონ ხოლო, ალბათ იშენით გოკოდესკონ იჸიდ, პირადო ქუწითკო, ნამდა მანგარ მარდულ აფუთ დო დღას ვეგიჭყოლიდუანთ თის, მუთ თქვანო აკეთ.

² მუჭოთ წოხოლენ სტატიას გუვარჩით, ცოდას „ათოჸუნაფილ“ ვაფუთ დო თიშ გლახა შედეგეფშე დუდ ჩქინით ვადმარსხებენა. მარა იესოშ მსხვერპლიშ ჭყოლოფათ, 1) მეპატიებუნა ცოდეფ, 2) გეფთავისფალებუთ არასრულყოფილებაშე დო 3) ვერიგებუთ ღორონთის. შედეგო, მიღუნა ახალ ქიანას მარადიულო ცხოვრებაშ საშვალება. გიშაჸიდირალ მართალო ოძირანს, მუშმანწარას უჸორს იესოს ადამიანეფ. თიქ დედამიწაშა მოულაშახ ბრელ ხანით ადრე მიჸოროფუეს (იგავ. 8:30, 31). პავლე მოციქულქ ჭარჷ, ნამდა „ქრისტეს უღუნ თი ჸოროფა მოკეთებაფუანა საქმეს“ (წეკითხით 2 კორინთელეფიშ 5:14, 15). მუს ნიშნენს თენა? ქრისტეს ადამიანეფ მუჭო უჸორსინ თეშ რჩქინაქ ოკო გინმოჭყვიდირაფუან, ქუვოძირათ, ნამდა მანგარ მარდულ ვაფუთ გიშაჸიდირალშო დო დღას ვეგიპჭყოლიდუანთ თის, მუთ ჩქინო აკეთ.

3. მუშენ შილებე არძა შხვადოშხვანერო ვოძირანდათ, ნამდა ვაფასენთ გიშაჸიდირალს?

³ მუჭო ოძირანთ, ნამდა მარდულ რეთჷ გიშაჸიდირალშო? შილებე თე კითხვას არძაქ შხვადოშხვანერ პასუხ მეფჩათ. თიშ გაგებელო, მუშენ იფჩიებუთ თეს, ქიმიპჸუნათ მაგალით. წერმიდგინით, ნამდა სუმ კოჩიქ ართ დო იგივე ადგილშა ოკო მერთას. მარა თინეფ, სუმხოლო, შხვადოშხვა ქალაქის რენა დო შხვადოშხვა შარა აფუნა მიკაულარ დანიშნულებაშ ადგილშა ინაულარო. მუ რე თქვან „დანიშნულებაშ ადგილ“? თინა, ნამდა, გეგმირჩქინათ მარდულობა გიშაჸიდირალშო. მარა თეშო შილებე არძას „შხვადოშხვა შარაქ მაჸუან მიკაულარქ“, შხვანერო ქოფთქუათინ, შხვადოშხვანერო გეგმიბრჩქინათ მარდულობა. თენა თიშა რე დამოკიდებულ, ასე მუ ადგილს რეთჷ – მუნერ ურთიერთობა გიღუნა იეჰოვაწკუმა. ათეშენ, თე სტატიას ქიფჩიებუთ სუმ შხვადოშხვა ჯგუფიშ ადამიანეფშე. თენეფ რენა: 1) ბიბლიაშ მაგურაფალეფ, 2) ნათილ ქრისტიანეფ დო 3) ოჭყიშალს მოჩილათირ შხურეფ.

ᲑᲘᲑᲚᲘᲐᲨ ᲛᲐᲒᲣᲠᲐᲤᲐᲚᲔᲤ

4. მუ დამოკიდებულება უღჷ იეჰოვას ბიბლიაშ მაგურაფალეფიშ მიმართ?

⁴ ბიბლიაშ მაგურაფალ ქორეთ-და, თეცალ მუდგარენშე დეფიქრით: ღორონთიშ გაჩინებაფას დო ბიბლიურ გურაფეფიშ გაგებას ოცადუთინ თენა თეშ ვა ხვადუ; სინამდვილეს, ღორონთის მეჸუნთ მუშ ხოლოშა დო ოკო, დეახლოვათ თის (იოან. 6:44; საქ. 13:48). „იეჰოვა გურეფს ამოწმენს“. თინა ორწყე, მუჭო ოცადუთ თიშ უჯგუშო გაჩინებაფას დო მანგარო ოხიოლ თიშ ძირაფა, მუჭო თირანთ თქვან ცხოვრებას (იგავ. 17:3; 27:11). ღორონთწკუმა მეგობრობაშ საშვალება გიღუნან თენა ხვალე გიშაჸიდირალიშ ჭყოლოფა რე (რომ. 5:10, 11). ქეცადით, თენა დღას ვეგიჭყოლიდუათ.

5. მუჭო შეულებუნა ბიბლიაშ მაგურაფალეფს, მიაჸუნან ფილიპელეფიშ 3:16-ის მოჩამილ რჩევას?

⁵ ბიბლიაშ მაგურაფალეფ, მუჭო შეილებუნა ოძირუათ, ნამდა მარდულ რეთჷ გიშაჸიდირალშო? ართ-ართ საშვალება რე, მიაჸუნათ ფილიპელეფშა რაგადებულ პავლეშ რჩევას. თიქ ჭარჷ: „მუდგაშა ვა მაფუდან მენჭირნაფილ, ვემვოტუათ წიმი ულა“ (ფილ. 3:16). ბიბლიაშ ხოლო ართ თარგმანს თუ მუხლ თეშნერო ჭარჷ: „ოკო გუვაგრძელათ თი შარას გილულა, ნამდგას გეპჸუნთ“. თაშ ნამდა, მიაჸუნით თე რჩევას დო მუთუნს ვემეჩათ საშვალება, გეცილან სიცოცხლეშ შარას გეჸუნას (მათ. 7:14; ლუკ. 9:62).

6. მუშ კეთება შეულებუნა ბიბლიაშ მაგურაფალეფს, მუთუნიშ თირუა ქუჭირან-და? (კან. 30:11–14; ქოძირით სურათ).

⁶ მუშ კეთება შეილებუნა ნამდგაინ ბიბლიურ გურაფაშ მეღება ქოიჭირან-და? უმოსო გეგმირკვით თი საკითხ დო ლოცვას ქოთხით იეჰოვას, ქიმგეხვარან თიშ უჯგუშო ინონჭაფას (ფსალმ. 86:11). თიშ დაჯერაქ თეშ უკულ ხოლო გაიჭირდეს-და, ჭახანით გეგნოდვით თე საკითხ, გაგრძელით ბიბლიაშ გურაფა დო უკულ შილებე უმოს ადვილო ქინანჭათ. ვარდა შილებე გიჭირდან, მიოტუათ თიცალ მუდგარენიშ კეთება, მუდგას ღორონთ ვეწონუანს. მუშ კეთება შეილებუნა თე დროს? ვაგგოჭყორდან, ნამდა იეჰოვა არასრულყოფილ ადამიანეფს ვა თხინსჷ თიცალ მუდგარენს, მუთ ვეშულებუნა. ათეშენ რჯერდან, ნამდა თქვა შეილებუნა თეშ იცხოვრათ, მუჭოთ ღორონთ ითხინს (წეკითხით კანონიშ 30:11–14). დო იეჰოვა სიტყვას ხოლო გარზენა, ნამდა ქიმგეხვარებუნა თეშ კეთებას (ეს. 41:10, 13; 1 კორ. 10:13). ათეშენ გურქ ვეიოლან. ქეცადით, ნაბეტან ვეფიქრათ თიშე, მუდგაშ კეთება გიჭირა; მთელ ყურადღება თი ჯგირ მუდგარენეფშა გეგნიღით, მუთ იეჰოვას თქვანო აფჷ ნაკეთებ, თინეფ შქას გიშაჸიდირალშა. მუთ უმოსო მირდუ თქვან გურს ღორონთიშ ჸოროფა, თით უმოსო ქოძირუნთ, ნამდა „თიშ მცნებეფ მონკა ოღალ ვა რე“ (1 იოან. 5:3).a

7. მუშე შეულებუნა დეფიქრან თი მოზარდეფს, მიდგაქ იეჰოვაშ მოწმეეფიშ ოჯახის მირდეს?

⁷ მუშ რაგად შილებე მოზარდეფშე, მიდგაქ იეჰოვაშ მოწმეეფიშ ოჯახის მირდეს? თქვა ხოლო ბიბლიაშ მაგურაფალეფ რეთჷ. თაშ ქოფთქუათინ, თქვა თქვან მშობლეფიშ არძაშ უმოს მნიშვნელოვან ბიბლიაშ მაგურაფალეფ რეთჷ. ბიბლია იჩიებ: „დეახლოვით ღორონთის დო თინა ხოლო დეგეახლოებუნა“ (იაკ. 4:8; 1 მატ. 28:9). მუჟამსით თქვა გეგნოდგუნთ ნაბიჯეფს ღორონთწკუმა დაახლოვებერო, თინა ხოლო ირფელს გაკეთენს თქვანწკუმა მეგობრობაშო. ღორონთ თეს თიშენ ვართ, ნამდა იეჰოვაშ მოწმეეფიშ ოჯახის ირდით; თის პირადო თქვანწკუმა ოკო მეგობრობა. დეფიქრით თიშე ხოლო, მუ აკეთ იეჰოვაქ, ნამდა თიწკუმა მეგობრობაშ საშვალება ქოიღუდესკო – თიქ მუშ სქუაშ სიცოცხლეთ გიშამჸიდეს. დღას ვაგგოჭყორდან, მუშმაშხვა მუდგარენ აფჷ ღორონთის თქვანო კეთებულ (რომ. 5:1, 2). თაშ ნამდა, ჯგირ იჸუაფ, გოშინაშ ონჯუაშახ დეფიქრათ, მუ ჯგირობუა მოიღეს ქრისტეშ ღურაქ. უკულ თიშე ხოლო დეფიქრით, მუ შარას გიშეგორუნთ ცხოვრებას დო მუ მიზნეფ შეილებუნა გიღუდან, ნამდა ქაძირუათ იეჰოვას, მუნერ მარდულ აფუთ გიშაჸიდირალშო.b

ᲜᲐᲗᲘᲚ ᲥᲠᲘᲡᲢᲘᲐᲜᲔᲤ

8. მუჭო ოძირანა ნათილ ქრისტიანეფ, ნამდა მარდულ რენა გიშაჸიდირალშო?

⁸ ნათილ ქრისტიან ქორეთ-და, თენა ნიშნენს, ნამდა უკვე ბრელნერო ოძირეთ, მუჭო აფასენთ გიშაჸიდირალს. მაგალთო, მუდგარენეფ დოთირეთ ცხოვრებას, ნამდა იეჰოვაშ მოსაწონო ქიცხოვრითკო დო თიშ მეგობარო გინირთითკო. მიაჸუნით იესოშ დავალებას დო ქიდიჭყით თქვან რწმენაშ გურშენ შხვეფწკუმა ჩიება. თეწკუმა ართო, დუდ მეუძღვინით იეჰოვას დო დინათით. შილებე ღორონთიშ მსახურებაშ გურშენ წინააღმდეგობას ხოლო ქეშეხვადითკო (2 ტიმ. 3:12). მარა, ირფელიშ უმკუჯინუო, იეჰოვას ართგურო ომსახურუთინ თენა ოძირანს, ნამდა მანგარო გიჸორა თინა დო მარდულ რეთჷ გიშაჸიდირალშო (ებრ. 12:2, 3).

9. მუ საფრთხეშ წოხოლე გერენა ნათილ ქრისტიანეფ?

⁹ ნათილ ქრისტიანეფს ოკო მარჩქილედან, ნამდა ართ საფრთხეშ წოხოლე გივორეთ – შილებე, დროშ ულაწკუმა ართო, ჭიე-ჭიეთ გიშაჸიდირალს ჩქინ თოლს ფასიქ მეუდინას. მუჭო შილებე თექ მოხვადას? გუვარჩუათ პირველ საუკუნეს ეფესოს მახორუ ქრისტიანეფიშ მაგალით. გათელებაშ უკულ იესოქ ქაცქუ თინეფს თიშ გურშენ, ნამდა ბრელ მუდგარენს ითვინენდეს, მარა, თეწკუმა ართო, უწუ: „თის გიდღანუქ, ნამდა მიოდინე დუდშე გიღუდუნ თი ჸოროფა“ (გიმოცხ. 2:3, 4). მუჭოთ იესოშ სიტყვეფშე იძირე, ქრისტიანქ შილებე ჭიე-ჭიეთ უგურეთ ქიდიჭყას ღორონთშა თაყვანიშცემა. თეცალ ადამიან შილებე ქოთ ლოცულენდას, ქოთ კრებეფშა გილეშას დო ქოთ მსახურებაშა, მარა შილებე თე ირფელს, უბრალოთ მერჩქვანელ რენ თიშენ ორთუდას დო თეს ჸოროფა ვაკეთებაფუანდას. მუშ კეთება შეილებუნა, იეჰოვაშ მიმართ თქვან ჸოროფა, ჯვეშო რდუნ თიშმამანგარა ვა რენ ქატყუაფუთ-და?

10. მუჭო შეილებუნა მიაჸუნათ ტიმოთეშა მეჩამილ პავლეშ რჩევას? (1 ტიმ. 4:13, 15).

¹⁰ პავლე მოციქულქ ტიმოთეს უწუ, ირიათო ქიფიქრუკო დო ქიდეკვირუკო, მუჭო ომსახურუდ იეჰოვას, დო მთელ გურ ქინოდვუკო თიშ მსახურებას (წეკითხით 1 ტიმოთეშ 4:13, 15). პავლეშ თე რჩევა თქვა ხოლო გიმგოდირთუნა. დეფიქრით, მუშ კეთება შეილებუნა, ნამდა ვადინუათ მონდომა ღორონთიშ მსახურებას (რომ. 12:11). მაგალთო, შეილებუნა უმოს დრო გეგმურთათ კრებაშო მომზადებას. თენა მიგეხვარებუნა შეხვალამეფიშ დროს უმოს ყურადღებათ რდათჷ. ვარდა შილებე პირად გურაფაშო თიცალ ადგილშა მიდართათ, სოდეთ ხვალე იჸუაფუთ დო მუთუნ ვეგეცილებუნა ნაგურეფშე ფიქრის. მუჭოთ დაჩხირს დიშქაშ მითოტურაფა ოსაჭირ, ნამდა ვა შქირტას, თეშ თეცალ მუდგარენეფიშ კეთება მიმეხვარებუნა, ჩქინ გურს „ვა შქირტას“ მარდულობაქ თი ირფელშო, მუთ იეჰოვაქ ჩქინო აკეთ, თინეფ შქას გიშაჸიდირალშო. გოშინაშ ონჯუაშ წოხოლენ მარეფს შეილებუნა თიშე ხოლო დეფიქრათ, მუ სასწაულ მუდგარენეფს ორთჷ იეჰოვა მუშ ხალხშო. თენა მიგეხვარებუნა, უმოს მარდულ რდათჷ გიშაჸიდირალშო, მუდგაშ ჭყოლოფათ მიღუნა ღორონთწკუმა ხოლოშიან ურთიერთობა.

11, 12. მინშა ჯვეშობურ მონდომა ვაიღუნან-და, თენა თის ნიშნენსო, ნამდა ღორონთ მუშ წმინდა შურს ვა გარზენა? გენწყით (ქოძირით სურათ).

¹¹ მინშა მსახურებას გოკონან თიცალ მონდომა ვაიღუნან-და, გურქ ვა გოიტირხან დო ვეფიქრათ, ნამდა ღორონთ ვა გარზენა წმინდა შურს. ქიგიშინით, მუ მეჭარ პავლექ კორინთელეფს მუშ მსახურებაშ გურშენ: „თეშ კეთება ვა მოკოდასინ ხოლო, იშენ ოკო ვაკეთე, მუშენდა თე საქმე ჩქიმდა რე მენდებულ“ (1 კორ. 9:17). მუს გულისხმენდჷ მოციქულ?

¹² მინშა პავლეს უღუდ თიცალ მომენტეფ, მუჟამსით გურ ვა აფუდ მსახურებაშა. მარა თის იშენით გინოჭყვიდილ აფუდ, დუდის მუჭოდგა ვა გინაფლენდუკონ, ვემიოტუკო თე საქმეშ კეთება. თქვა ხოლო შეილებუნა თაშ აკეთათ. გინოჭყვიდილ გაფუდან, ქიანაშის ვა გოკოდანინ ხოლო, ირიათო თინა აკეთათ, მუთ სწორ რე. ქილოცით, ნამდა იეჰოვაქ ქოთ გურ ქოიჸოფირან დო ქოთ ძალა ქიმერჩან თეშო (ფილ. 2:13). რჯერდან, თეშ ჭყოლოფათ, დროშ ულაწკუმა ართო, კინ „გეგთოფურუ“ ღორონთიშ მიმართ თქვან ჸოროფა დო ჯვეშობურ მონდომა დუგართუნა.

13. მუჭო შემლებუნა ირო შევამოწმათ ქომღუნან დო ვარ ძალიერ რწმენა?

¹³ კანკალეშა ჯგირ იჸუაფ, გეგმიბრკვიათ ჩქინ დუდ, მუჭოთ თეს 2 კორინთელეფიშ 13:5-ის პავლე ელამჩანა: „ირიათო შეამოწმით თქვან დუდ, ნამდა ქიგეგათ, ქოიღუნან დო ვარ ძალიერ რწმენა; ირიათო გეგმირკვით თქვან დუდ“. მაგალთო, დროშ ულაწკუმა ართო, მინშა შილებე დეფიქრათ თეცალ კითხვეფშე: ქიგერენო ღორონთიშ მსახურება ჩქიმ ცხოვრებას პირველ ადგილს? (მათ. 6:33). ქაძირანსო ჩქიმ გიშაგორილ გართობა, ნამდა გლახა ბჯოგჷ? (ფსალმ. 97:10). ირნერო ქუნწყუნქო ხეს თანაქრისტიანეფ შქას მშვიდობას დო ართობას? (ეფეს. 4:2, 3). გოშინაშ ონჯუაშ პერიოდის განსაკუთრებულო ფიფქრენთ თი ირფელშე, მუთ იესოქ დო იეჰოვაქ ჩქინო აკეთეს. ათეშენ, თე პერიოდ ჯგირ დრო რე ჩქინ დუდიშ გიმარკვიებელო დო თიშ გინაჯინალო, მიშო ფცხოვრენთ – ჩქინ დუდშო დოვარ ქრისტეშო.c

ᲝᲭᲧᲘᲨᲐᲚᲡ ᲛᲝᲩᲘᲚᲐᲗᲘᲠ ᲨᲮᲣᲠᲔᲤ

14. მუშენ მაჩირთჷ ნამთინე ქრისტიანქ ღორონთიშ ოჭყიშალს?

¹⁴ მინშა ღორონთის ბრელ წანას ართგურო ომსახურუდესინ ფერ ქრისტიანეფ ხოლო მაჩირთუნა თიშ ხალხის. მუშენ ხვადუ თენა? ნამთინეს „ირდღაშიან ოწუხებელიშ“ გურშენ ძალეფ აფჷ გიშალიებურ (ლუკ. 21:34). ნამთინეს თანაქრისტიანიშ სიტყვეფქ ვარდა საქმეეფქ ქელაჭუ გურ (იაკ. 3:2). შხვეფქ შილებე სერიოზულო დაშესკო დო ონჯღორე უჩქუნა მოხვარაშ თხუალაშა. თქვან შემთხვევას მიზეზ მუდგა ვა რდასინ, მუ მიგეხვარებუნა, დართათ ღორონთიშ ოჭყიშალს? მუშ კეთებას გინგოჭყვიდირაფუანა გიშაჸიდირალშე დო თი ჸოროფაშე ფიქრ, ნამუთ იეჰოვა დო იესოს თქვან მიმართ უღუნა?

15. სოვრეშე იძირე, ნამდა იეჰოვა ოჭიშის ვა ურთინუანს ოჭყიშალს მოჩილათირ შხურეფს? (ეზეკ. 34:11, 12, 16).

¹⁵ დეფიქრით, მუჭო უჯინე იეჰოვა მუშ თიცალ მსახურეფს, ნამდგაქ გამაჩირთეს მუშ ხალხის. თინა ოჭიშის ვა ურთინუანს დო ხაზის ვეგნუსვანს თინეფს. თეშ მანგიორო, ღორონთ გორუნს მუშ დინაფილ შხურს დო მუჟამსით დოგორუნს, ოხვარ მუშა დორთას დო ზრუნენს თიშე (წეკითხით ეზეკიელიშ 34:11, 12, 16). მუჭო ფიქრენთ, თაშ ვემიქციებუნო იეჰოვა თქვან შემთხვევას ხოლო? მუშო ოკო რაგად, ქო. ასე თე სტატიას კითხულენთინ თენა თის ნიშნენს, ნამდა გურ კინ გაძახუნა თიშ კეთებაშა, მუთ ღორონთიშ თოლს სწორ რე. ჭეშმარიტებაშ გაგებაშ დროს ღორონთიქ ხომ ქოძირ თქვან გურ დო ხომ ქიმეიჸუნეს მუშ ხოლოშა? მუჭო ფიქრენთ, ასე ვაკოდას იჸინო, კინ დართათ თის?

16. მუ მეხვარებ დინაფილ შხურს იეჰოვაშა დორთას? (ქოძირით სურათ).

¹⁶ დეკვირით, მუ გურიშემაკინალ სიტყვეფ ჭარჷ ბროშურას „დართ იეჰოვას“: „რჯერდას, ნამდა იეჰოვა ხიოლით მეიღენს. თინა მიგეხვარებ, გურ ვა დაიმონკას ოფიქრებელქ, გიორჯგინე გურჭუას, დირთინუე სუფთა სინდის დო ქიგინე შინაგან სიმშვიდე. შედეგო, კინ გოირჩქინდუ სურვილ, თანაქრისტიანეფწკუმა ართო ემსახურე თის“. რშუდან, ნამდა უხუცესეფ ხოლო ირო მზათ რენა თქვან მახვარებელო. თინეფ თქვანო იჸუაფუნა, მუჭოთ „ოტყობინალ ბორიას დო დუდიშ გითაფორაფალ ქარბორიას“ (ეს. 32:2). ბჯერა, მანგარო აფასენთ გიშაჸიდირალს დო გოკონა, იეჰოვას ოძირუათ მარდულობა. ათეშენ დეფიქრით: მუ ნაბიჯეფ ოკო გინობდგე, ნამდა „მუვაგვარე საქმეეფ“ იეჰოვაწკუმა? (ეს. 1:18; 1 პეტ. 2:25). მაგალთო, ხომ ვეშეილებუნა ქუმორთათ კრებაშ შეხვალამაშა? ვარდა მუს თქუანთ, ნამდგაინ უხუცესის ქოთხუათ მოხვარა, მუდგაშათ შილებე თინა ხოლო მიშეშას, ნამდა მუდგარენ პერიოდით ბიბლიაშ გურაფა მიკილათ? რჯერდან, იეჰოვა გაკურთხენა თიშ გურშენ, ნამდა ირნერო ოცადუთ, დართათ თის დო ქაძირუათ გიშაჸიდირალშო მარდულობა.

ᲛᲣᲭᲝ ᲛᲘᲥᲪᲘᲔᲑᲣᲗ?

17, 18. მუჭო შემლებუნა ჭკვერულო გეგმიბრინუათ გოშინაშ ონჯუაშ წოხოლენ პერიოდ?

¹⁷ მუჭოთ იესოქ თქუ, გიშაჸიდირალქ თიშენ იჸუ გაფილქ, ნამდა „მიდგას თიშ წანსჷ, ვა ღურას დო ულიებ სიცოცხლე უღუდას“ (იოან. 3:16). გიშაჸიდირალით იეჰოვა მირსხენა ცოდა დო ღურაშ გლახა შედეგეფშე. მუშო ოკო რაგად, ნამთინს ვა მოკონა, ნამდა ჩქინ თოლს თის დღას ფასიქ მეუდინას (რომ. 3:23, 24; 2 კორ. 6:1). გოშინაშ ონჯუაშ წოხოლენ პერიოდის მიღუნა საშვალება, დეფიფქრათ თი ჸოროფაშე, ნამუთ იეჰოვა დო იესოქ მოძირუეს. თე ჸოროფა უმოსო გინმოჭყვიდირაფუანა, ქუვოძირუათ თინეფს სიმარდულ თეშმაშხვა საჩუქარშენ.

¹⁸ თქვა მუჭო ოძირანთ, ნამდა მარდულეფ რეთჷ გიშაჸიდირალშო? თე კითხვას შილებე არძაქ შხვადოშხვანერ პასუხ მეფჩათ. მარა რჯერდან, ნამდა იეჰოვა თქვან მონდომას ხოლო აკურთხენს შხვა მილიონობით მსახურწკუმა ართო, მით მუნეფიშ დუდშო ვარინ, ქრისტეშო ცხოვრენა (2 კორ. 5:15).