ქიდიგურეთ იეჰოვაშე თანდაბლობა

1. მუშენ რე იეჰოვაშ თანდაბლობა განსაკუთრებულ?

ᲐᲛᲓᲦᲐ ძალაუფლება უღუნ ფერ კათაშე ნაკლებო ირაგადე, ნამდა თინეფ თანდაბალეფ რენა. მარა იეჰოვა, მით ირფელიშშემალებე ღორონთ რე, თანდაბალ რე (ფსალმ. 113:5–8). მაჟია მითინ ვა რე იეჰოვაცალ თანდაბალ დო თიშ პიროვნებაწკუმა სარხოს ხოლო ვა რე სიამაყე. თე სტატიას გუვარჩიენთ იეჰოვაშ პიროვნებაშ ოთხ მხარეს დო ქობძირუნთ თითოულ მხარეს მუჭო იძირე თიშ თანდაბლობა. ქიგებგენთ თის ხოლო, იესო მუჭო იქციებუდ მუამუშცალო თანდაბალო. თე ირფელიშ გარჩიება ქიმმეხვარებუნა, უმოსო დევეახლოვათ ღორონთის დო უმოს თანდაბალეფ ვორდათ.

ᲘᲔᲰᲝᲕᲐ ᲘᲠᲝ ᲛᲖᲐᲗ ᲠᲔ ᲛᲐᲠᲩᲥᲘᲚᲐᲤᲐᲠᲝ

2. მუს მოგებაფუანა ფსალმუნეფიშ 62:8 იეჰოვაშ გურშენ? (ქოძირით სურათ).

² უმენტაშო, დუდძირგალ ხალხწკუმა ჩიება ადვილ ვა რე. თინეფს დუდ შხვეფშე უჯგუშო მიორჩქუნან თიშენ, თეშ იქციებუნა, ნამდა შხვეფს უჭირა თინეფშა მეულა დო დორაგადაფა ვარდა გვალო ურიდანა დუდის. მარა იეჰოვა თინეფშა შურო ველეჸუნინე. ჩქინ თანდაბალ ზეციერ მუმა მირაგადუნა, ნამდა ქუდურაგადუათ დო ქივეჩუათ, მუ მიწუხენა გურს (წეკითხით ფსალმუნეფიშ 62:8). მუჭოთ მოჸოროფე მუმა რე ირიათო მზათ მუშ სქუალეფშა მარჩქილაფარო, თეშ იეჰოვას ხოლო ოკო, მუშ მსახურეფქ ქუდურაგადუან დო ირიათო ირჩქილე თინეფიშ ლოცვეფს. ბიბლიას თეცალ ბრელ ლოცვა ენოჭარ, მუთ ოძირანს, ნამდა თის ოკო ჩქინ ლოცვეფიშ მორჩქილაფა (იეს. 10:12–14; 1 სამ. 1:10–18). მარა, მუშ კეთება შემლებუნა, მუდგარენ მიზეზიშ გურშენ, იეჰოვაშა დარაგადაფალო დუდ უღირსო ქიმმორჩქუნან-და?

3. მუ გარწმუნენა, ნამდა იეჰოვას ოკო, თიმწკუმა ხოლო ილოცათ, მუჟამსით დუდ თეშ ღირსო ვემგორჩქუნა?

³ შემლებუნა იეჰოვას თიმწკუმა ხოლო დურაგადუათ ლოცვათ, მუჟამსით ფიფქრენთ, ნამდა ვა ვორეთ თიშ ჸოროფაშ ღირს. მუშენ შემლებუნა თეშ რაგად? შარასეჩილათირ სქუაშ იგავს იესოქ იეჰოვა მოჸოროფე მუმას შეადარ. სქუა მანგარო ნარღენდჷ მუშ საქციელს დო ვემიორჩქუდ მუშ დუდ თიშ ღირსო, ნამდა ჸუდეშა დართინუესკო. მარა იესოქ თქუ, ნამდა, მუჟამსით მუმაქ ჸუდეშა დორთელ სქუას თოლ ქუმუკინდუ, „ირულ, გურშა ქიხუტოლუ დო გოჯუნ“ (ლუკ. 15:17–20). იეჰოვა ხოლო თეშნერო მომრენა; მუჟამსით მუშ გურდამონკებულ მსახურ, ნამდგას დანაშაულიშ გრძნობა ვარდა შხვა მუდგარენ აწუხენს დო თეშენ ლოცულენს, იეჰოვას თანდაბლობა გინაჭყვიდირაფუანს, შურ დო გურით ქუმურჩქილუას თის (ონგ. 3:19, 20). თინა ირნერო მიშურს ჩქინ მდგომარეობაშა დო, თაშ ქოფთქუათინ, „მირულე“ ჩქინჸურე, ნამდა გურშა ქელამკინან დო დუმარწმუნან მუშ ჸოროფაშა (ეს. 57:15). მუ გაგებათ „მირულე“ იეჰოვა ჩქინდა? თინა ხშირას უხუცესეფს, იეჰოვაშ მოწმე ოჯახიშ წევრეფს ვარდა თანაქრისტიანეფს ირინუანს ჩქინდა გურიშ ელაკინალო (იაკ. 5:14, 15). იეჰოვა თაშ თიშენ იქციებ, ნამდა ოკო, თიშ მეგობრეფო ქუდოფსქიდათ.

4. მუშენ ვა რდჷ ხალხ იესოწკუმა მორდებუანო?

⁴ იესო ხოლო მუამუშცალ რე. იეჰოვაცალო იესო ხოლო თანდაბალ რე. ათეშენ, მუჟამსით თინა დედამიწას რდჷ, ხალხის ვა უღუდ მორდება თიშა მეულაშა ვარდა მუდგაინიშ კითხირშა (მარ. 4:10, 11). დო მუჟამსით იესო იშო ოკითხუდ მუდგარენს, ვაშქურუდეს მუნეფიშ აზრიშ რაგადშა (მათ. 16:13–16). მუდგაინს მეჩირთუდესინ, შიშიშ ღურელეფ ვა რდესჷ, მუშენდა უჩქუდეს, ნამდა იესო გემუან კოჩ რდჷ, ადვილო ვეგშეშ მდგომარეობაშე დო ირფელს გაუგენდ (მათ. 17:24–27). იესოს თისხით ჯგირო აფუდ გინოღალირ მუამუშიშ თვისებეფ, ნამდა, იესოშ მიმაჯინუ, თიშ მიმაჸუნალეფქ იეჰოვა უჯგუშო გეჩინებაფუეს (იოან. 14:9). თეშნერო, თინეფქ ქიგეგეს, ნამდა იეჰოვა ვა რე ამაყ, ჸინჩ დო კოჩის ართიანშე ვეგშაგორუნს, მუჭოთ თეს თიმწკუმა რელიგიურ ლიდერეფ ორთუდეს. იესოშ მაგალითიქ თინეფს იეჰოვა გაჩინებაფუ, მუჭოთ თანდაბალ პიროვნება, ნამდგას ოკოდ, ხალხ თიწკუმა ხოლოს რდუკო.

5. თანდაბალეფ ქიპჸით-და, მუშენ ვა გუჭირდუნა შხვეფს ჩქინდა მოულა?

⁵ მუჭო ვოძირუათ, ნამდა ბგურაფლენთ იეჰოვაშე. უჯგუშო ოკო ქიდიბგურუათ თანდაბლობა, მუთ შხვეფს ჩქინწკუმა უმოს თავისფალო ქაგინაფუანს დუდის. თანდაბლობა მიმეხვარებუნა, ვა ვორდათ მენჯარიშეფ, ჩქინ დუდ შხვეფშე უჯგუშეფო ვემმორჩქუდან დო ვა გამჭირდან პატიებაქ. თე გლახა თვისებეფიშ გურშენ შხვეფ შილებე დუდის მირიდანდან. მარა თანდაბალეფ ქიპჸით-და, გემუანო მივექციებუთ შხვეფს, მუთვინენთ დო მზათ იპჸით პატიებაშო. თეცალ ადამიანწკუმა ირკოჩის ოკოდას იჸი ურთიერთობა (კოლ. 3:12–14). განსაკუთრებულო უხუცესეფქ ოკო ეცადან, და დო ჯიმალეფ თინეფწკუმა დუდის თავისფალო გინაფლენდან. თეშო საჭირო რე, თანაქრისტიანეფ ხშირას ორწყედან თინეფს. თენა ნიშნენს, ნამდა უხუცესეფქ ირნერო ეცადან, ფიზიკურო დესწრან კრებას დარბაზის, თიშ მანგიორო, ნამდა აუცილებერ ვა რენ თიმწკუმა, ისხუნუან, ვიდეოკონფერენციათ დესწრან შეხვალამას. თეწკუმა ართო, მუჭოთ შეულებუნან თეშ, თანაქრისტიანეფწკუმა ართო კარდოკარ ოკო ქიმსახურან. და დო ჯიმალეფს მუთ უმოს საშვალება აღვენუნა, უჯგუშო გეჩინებაფუან უხუცესეფ, თით უმოს ადვილ აჸინა თინეფშა მეულა, მუჟამსით მოხვარა დესაჭირებუნა.

ᲘᲔᲰᲝᲕᲐ ᲒᲐᲒᲔᲑᲘᲔᲠ ᲠᲔ ᲓᲝ ᲕᲐ ᲣᲭᲘᲠᲡ ᲓᲝᲸᲣᲜᲐ

6, 7. ქიმიჸუნით შემთხვევეფ, მუჟამსით იეჰოვაქ ქუდაჸუნ მუშ მსახურეფიშ ოთხუალს.

⁶ ხშირას ამაყ ადამიანეფ აჯამეფ რენა, მუნეფიშ ნარაგად არძაშ უჯგუშო მიორჩქუნა დო მუთუნით ვაკონა მუნეფიშ აზრიშ თირუა. მარა იეჰოვა თანდაბალ რენ თიშ გურშენ ვა რე თეცალ დო ვა უჭირს შხვაშ დოჸუნა, თიშ უმკუჯინუო, ნამდა ირფელით შხვაშ უჯგუშ რე. მაგალთო, ქიგიფშინათ, მუჭო მიქცუ თიქ მოსეშ დაშ, მირიამიშ შემთხვევას. თიქ დო აარონქ მოსეშ წინააღმდეგ ქიდიჭყეს ჩიება, მით იეჰოვაშ წარმომადგენელ რდჷ. თეშნერო მირიამ, ფაქტობრივო, იეჰოვაშ წინააღმდეგ მიშჷ. იეჰოვაქ მანგარო გერისხჷ მირიამშე, დასაჯ დო კეთრით დალახუ თინა. აარონქ მოსეს ქეხვეწ, მუდგაინ გაკეთუკო მირიამიშ მახვარებელო. მოსექ იეჰოვას ქეხვეწ, დასქილიდუკო მირიამ კეთრშე. მუჭო მიქცუ იეჰოვაქ? ამაყ დო აჯამ პიროვნება მუშ აზრის ქიგედირთუდ დო მუთუნით ვეშქიდანდ მუშ ნარაგადიშ გინორთას. მარა იეჰოვა თანდაბალ რე; თიქ ქუდაჸუნ მოსეს დო დასქილიდუ მირიამ (რიცხ. 12:1–15).

⁷ იეჰოვაშ თანდაბლობაქ მეფე ხიზკიაწკუმა ხოლო ქიძირ. წინასწარმეტყველიშ პიჯით, იეჰოვაქ თის უწუ, ნამდა დოღურუდ. მარა, მუჟამსით ხიზკიაქ ჩხე ჩილამურით ქოთხუ იეჰოვას, დასქილიდუკო თინა, იეჰოვაქ დოთირუ მუშ ნარაგად დო 15 წანაშ სიცოცხლე ქუმუძინ (2 მეფ. 20:1, 5, 6). თაშ ნამდა, თანდაბლობა გინაჭყვიდირაფუანს იეჰოვას, გემშართას შხვეფიშ მდგომარეობაშა დო ქუდაჸუნას თინეფიშ აზრის.

8. ნამ შემთხვევეფ ოძირანს, ნამდა იესო გაგებიერ რე დო შეულებ დოუხუჯუას სიტუაციას? (მარ. 3:1–6).

⁸ იესო ხოლო მუამუშცალ რე. იესო დედამიწას ცხოვრებაშ დროს თისხით ვა რდჷ გინოჸუნელ კანონიშ ირ სიტყვაშ კილ-კილშა ინოთხოზინს, ნამდა, მუჟამსით მიდგაინიშ მოხვარა შეულებუდ, თეშე ვარია ქოთქუკო, მუთ ოძირანდჷ, ნამდა თის მუამუშცალო შეულებუდ დოუხუჯუკო სიტუაციას. მაგალთო, თინა საბატონს ოსქილიდუანდჷ ხალხის, მუდგაშ გურშენ რელიგიურ ლიდერეფ ფიქრენდეს, ნამდა მუთუნით ვეშილებედ. მარა იესო დოგმატურო ვა უჯინედ საკითხეფს. თის ადამიანეფიშ გაჭირება გურშა მეუღუდ დო თეშ იქციებუდ, მუჭოთ თიმ კონკრეტულ სიტუაციას უხუჯანდჷ (წეკითხით მარკოზიშ 3:1–6). იესო, ქრისტიანულ კრებაშ დუდო გინირთუნ თიშ უკულ ხოლო, ვა თირე. მაგალთო, მუჟამსით კრებას მიდგაინ სერიოზულო აშენს, იესო მოთვინებათ მეურე თეცალეფს დო დროს არზენს გიშასწორებელო (გიმოცხ. 2:2–5).

9. მუშ კეთება შემლებუნა, ნამდა ჩქინ სიტყვეფშე დო საქმეეფშე იეჰოვაშ აზროვნება იძირედას? (ქოძირით სურათეფ).

⁹ მუჭო ვოძირუათ, ნამდა ბგურაფლენთ იეჰოვაშე. ირნერო ოკო ვეცადათ, ჩქინ სიტყვეფშე დო საქმეეფშე ქიძირას, ნამდა იეჰოვაცალო გაგებიერეფ ვორეთ დო ვა მიჭირა დოჸუნა (იაკ. 3:17). მაგალთო, თი მშობლეფ, მით ოცადუნა, იეჰოვაცალ გაგებიერ რდანჷ, შეულებუნან თიშე უმოსის ვა მოთხინა სქუალეფს. თეშ ჯგირ მაგალითის იაკობ ირზენს (დაბ. 33:12–14). თეს გეძინელ, თანდაბალ დო გონიერ მშობელ ართ სქუას მაჟიას ვეშუდარენს. იეჰოვაშ მაგალითის უხუცესეფქ ხოლო ოკო მიაჸუნან. ნამდგაინ ბიბლიურ პრინციპ ვერღვიებუნ-და, უხუცესიქ მუშ ოკო ვეჩემას, მუჟამსით უხუცესეფიშ უმენტაშ შხვა აზრის გერე (1 ტიმ. 3:2, 3). მუშო ოკო რაგად, არძაქ ოკო ვეცადათ, ქუგუგათ შხვეფს, მუჟამსით ჩქი მუდგარენ საკითხშე განსხვავებულ აზრ მიღუნა (რომ. 14:1). თაშ ნამდა, თითოულ ქრისტიანქ საქმეეფით ოკო ქაძირუას, ნამდა ვა რე აჯამ, მეურს დათმობაშა დო რე გაგებიერ (ფილ. 4:5).

ᲘᲔᲰᲝᲕᲐ ᲛᲝᲛᲗᲕᲔᲜ ᲠᲔ

10. ნამ შემთხვევეფს იძირ იეჰოვაშ მოთვინებაქ?

¹⁰ შილებე დაკვირებულ რდათჷ, ნამდა ამაყ ხალხის ვა უჸორს, მუჟამსით ოჯინუანა. ზუსტას სიამაყეშ გურშენ უჭირა თინეფს მოთვინება. წერმიდგინით, მუნერ რე იეჰოვა. თინა ითვინენსინ თისხის მითინ ვეთვინენს. მაგალთო, ნოეშ დროს იეჰოვაქ თქუ, ნამდა 120 წანას ქიჯინედ, ონდო უბადობას მოსპუნდ (დაბ. 6:3). თე დროშ დინახალე ნოე მორდუნდ მუშ სქუალეფს დო აშენენდ კიდობანს ოჯახწკუმა ართო. წანეფიშ უკულ, იეჰოვაქ ანგელოზიშ პიჯით ეჩუ აბრაამს დო მოთვინებათ მურჩქილუ, მუჟამსით თის ქიანაშ კითხვა უღუდ სოდომ დო გომორაშ განადგურებაშ გურშენ. ამაყ პიროვნება ალბათ თის უწინდ: „მის უბედუქ, გერექ დო დაკითხვას მინწყუნქინ!“. მარა, რახანს იეჰოვა თანდაბალ რე, თიქ მოთვინებათ მურჩქილუ აბრაამს (დაბ. 18:20–33).

11. მუჭოთ 2 პეტრეშ 3:9-შე იძირე, მუშენ ითვინენს იეჰოვა?

¹¹ იეჰოვა ჩქინ დროს ხოლო ითვინენს. თინა უჯინე უბადობაშ მასპალო მუშ მერჩქინელ დროშ მოულას. მუშენ ითვინენს იეჰოვა? „მუშენდა მითინიშ მოსპუალა ვაკო. თეშ გინაწონს, ოკო, ნამდა არძაქ ინარღას დაშებულ“ (წეკითხით 2 პეტრეშ 3:9). ტყურათ იჯინენო იეჰოვა? ვარ. თიშ მოთვინებაშ ჭყოლოფათ მილიონობით ადამიანქ გეჩინებაფუ თინა დო იმენდ მიღუნა, ნამდა ხოლო მილიონეფ გეჩინებაფუანა. მარა იეჰოვა ირიათო ვემითვინენს. მართალ რე, თის უჸორს ადამიანეფ, მარა ირიათო ვემეჩანს უფლებას, მუთ ოკონან თინა აკეთან. მუშ დროს თინა მოსპუნს უბადობას (აბაკ. 2:3).

12. მუჭო ითვინენს იესო იეჰოვაცალო?

¹² იესო ხოლო მუამუშცალ რე. ანთასობით წანა რე, მუთ იესო მუამუშცალო გიმირჩქინანს მოთვინებას. ჯვეშ დროშე მოჸუნაფილ, ამდღარშახ, თინა ორწყე, მუ დო მუ ტყურეფს ოსიმუანს სატანა იეჰოვაშ დო თიშ ართგურ მსახურეფიშ გურშენ (დაბ. 3:4, 5; იობ. 1:11; გიმოცხ. 12:10). თეწკუმა ართო, თის მუშ თოლით აფჷ ძირაფილ, მუნერ ნინათ ვეიჭარენ ფერ ჭუა გინუღუნა ადამიანეფს. წერმიდგინით, მუჭო ოლჷ თის შურ, მოსპას ეშმაკიშ საქმეეფ (1 იოან. 3:8). მუ ოხვარ იესოს, მოთვინებათ ქუჯინას თი დროს, მუჟამსით იეჰოვა უწინს, გეგშანწყუას სატანაშ გილალუაფირ საქმე? ართ-ართ რე თანდაბლობა, მუთ თის ოხვარ, ვაწასხაპას იეჰოვას, მუშენდა თის უღჷ უფლება, გინოჭყვიდას, მუჟამ მუქ ოკო იკეთინას (საქ. 1:7).

13. მუჭო დო მუშენ უთვინენდჷ იესო მოციქულეფს?

¹³ დედამიწას ცხოვრებაშ დროს იესო მოწაფეეფს ხოლო ქიანაშის უთვინენდჷ. მაგალთო, თინეფ ირიათო თის ნირზენდეს, მი რდჷ თინეფ შქას არძაშ უმოს დიდ. მარა იესოს ვა უფიქრებ, ნამდა თინეფშე მუთუნ ვეგშეშ დო მოთვინებათ უგრძელენდჷ გურაფას (ლუკ. 9:46; 22:24–27). თის ჯერდჷ, ნამდა, დროშ ულაწკუმა ართო, თე ქომოლკათა დითირუდ. თქვანო ხოლო ნაჩინებ სიტუაცია ხომ ვა რე? ხშირას ხომ ვა უშვენთ ართ დო იგივე შეცდომას? თაშ ქორენ-და, ალბათ, მუჭო ელაიკინანა გურშა თიშ რჩქინა, ნამდა თეცალ თანდაბალ დო მოთვინება შეულებუნ ფერ მეფე პჸუნა.

14. მუ მიმეხვარებუნა მოთვინებაშ გავითარებას?

¹⁴ მუჭო ვოძირუათ, ნამდა ბგურაფლენთ იეჰოვაშე. „ქრისტეშ აზროვნებაშ“ გავითარებათ შემლებუნა ჩქინ აზროვნება იეჰოვაშის ქუგურუათ (1 კორ. 2:16). მუჭო შემლებუნა იესოცალ აზროვნებაშ გავითარება? თენა ართუცფას ვა ხვადუ. საჭირო რე, წეპკითხათ სახარებეფ დო დეფიფქრათ, მუჭო იძირე თევრეშე, მუნერ დამოკიდებულება უღუდ იესოს შხვადოშხვა საკითხშე. დო ხოლო ართ, მუთ აუცილებერ რე – ოკო ქიბლოცათ დო იეჰოვას ქოფთხუათ, ქიმმეხვარან იესოცალ აზროვნებაშ გავითარებას. მუთ უმოსო გეგნიბღანთ ქრისტეშ აზროვნებას, თით უმოსო ქაგურუ ჩქინ გონება ღორონთიშის დო უმოსო შემალებენა გეგმიბრჩქინათ მოთვინება ქოთ თანაქრისტიანეფწკუმა დო ქოთ ჩქინ დუდის ქუმუთვინათ თი გაგებათ, ნამდა მარჩქილედან, იეჰოვაშ აზროვნებაშ გავითარებას დრო ოსაჭირუნ (მათ. 18:26–30, 35).

ᲘᲔᲰᲝᲕᲐᲨᲝ ᲣᲑᲠᲐᲚᲝ ᲐᲓᲐᲛᲘᲐᲜᲔᲤ ᲫᲕᲘᲠᲤᲐᲡᲔᲤ ᲠᲔᲜᲐ

15. ქიმიჸუნით მაგალითეფ, სოვრეშეთ იძირე, ნამდა იეჰოვა აფასენს უბრალო ხალხის (ფსალმ. 138:6).

¹⁵ წეკითხით ფსალმუნეფიშ 138:6. მუშმადიდა პატი რე, ნამდა იეჰოვა, სამყაროშ უზენაეს ღორონთ, ოკვირ დო აფასენს თანდაბალ ხალხის. მორთ ქიფჩუათ მუსხირენ ადამიანშე, მით შხვეფიშ თოლს უბრალო ადამიანეფო იძირედეს, მარა იეჰოვაშო მანგარ ძვირფასეფ რდესჷ. ნამთინე შილებე უცფას ვაგმაშინედან, მარა თინეფ ბიბლიას რენა მოშინაფილ. მაგალთო, იეჰოვაქ მოსეს ქენაჭარაფუ დებორაშ სახელ, მით პატრიარქეფიშ დროს ცხოვრენდჷ. თინა 125 წანას ართგურო ომოინალუდ ისაკიშ დო იაკობიშ ოჯახეფს. მართალ რე, თე ართგურ ოსურკოჩიშ გურშენ ბრელ მუთუნ ვა მიჩქუნა, მარა რახანს იეჰოვაქ თიშ სახელ ბიბლიას ქინაჭარაფუ, გიშურს, ნამდა თინა ქოთ იეჰოვაშო დო ქოთ იაკობიშ ოჯახშო მანგარ ძვირფას რდჷ (დაბ. 24:59; 35:8). საუკუნეეფიშ უკულ იეჰოვაქ ახალგაზრდა ჭყიშ, დავით გეგშეგორ ისრაელიშ მეფეთ (2 სამ. 22:1, 36). იესოშ დაბადებაშ დროს ღორონთიქ უბრალო ჭყიშეფშა ანგელოზ მიდაშქვჷ დო პირველო თინეფს ქუგაგებაფუ, ნამდა ბეთლემს მესია რდჷ დაბადებულ (ლუკ. 2:8–11). მუჟამსით იოსებ დო მარიამქ იესო ტაძარშა მიჸონეს, იეჰოვაქ ხანშამიშულირ სიმონ დო ანას პატი ქიმეჩ, ნამდა მესია ქოძირესკო (ლუკ. 2:25–30, 36–38). მართალო შემლებუნა ფთქუათ, ნამდა იეჰოვა „ორწყე თანდაბალეფს“.

16. სოვრეშე იძირე, ნამდა იესო ხოლო მუამუშცალო ოქცუდ ადამიანეფს?

¹⁶ იესო ხოლო მუამუშცალ რე. იეჰოვაცალო იესო ხოლო მანგარო აფასენდჷ თანდაბალ ხალხის. თინა „უგურაფ დო უბრალო კათას“ ღორონთიშ სამეფოშ გურშენ ოგურუანდჷ (საქ. 4:13; მათ. 11:25). თეწკუმა ართო, თინა ოსქილიდუანდჷ ლეხეფს დო ხვალე ჯანმრთელობას ვარინ, ღირსებაშ გრძნობას ხოლო ურთინუანდჷ (ლუკ. 5:13). ღურაშ წოხოლენ სერს იესოქ მსახურს ოვალუდუნ ფერ საქმე აკეთ დო მოციქულეფს კუჩხეფ გუბონ (იოან. 13:5). დო ზეცაშა ულაშახ მუშ თანდაბალ მიმაჸუნალეფს – ქოთ თიმწკუმაიანეფს დო ქოთ თინეფს, მით უკულ გინირთუდეს ქრისტიანეფო – ქუდავალ საქმე, ნამდგაშ კეთება მანგარ პატი რე – ქიმეხვარესკო ადამიანეფს ულიებ სიცოცხლეშ მეღებას (მათ. 28:19, 20).

17. მუჭო შემლებუნა ვოძირუათ, ნამდა პატის ფცენთჷ დო მიჸორა შხვეფ? (ქოძირით სურათ).

¹⁷ მუჭო ვოძირუათ, ნამდა ბგურაფლენთ იეჰოვაშე. მუჟამსით უქადაგუთ არძანერ ადამიანს, თინეფიშ წარმომავლობაშ, კანიშ ფერიშ ვარდა განათლებაშ უმკუჯინუო, ვოძირანთ, ნამდა მიჸორა დო პატის ფცენთჷ თინეფს. თეწკუმა ართო, მუდგა პასუხიშმგებლობა ვარდა უნარ ვა მიღუდანინ, და დო ჯიმალეფ ჩქინდე უჯგუშეფო ქიმმორჩქუნან-და, თეშნერო ვოძირანთ, ნამდა მიჸორა დო ვაფასენთ თინეფს (ფილ. 2:3). იეჰოვას მანგარო ოხიოლ, მუჟამსით თანდაბლურო ვოცადუთ თე დო შხვა მხარეეფს ართიანს ქუჭიშუათ პატიცემა (რომ. 12:10; სოფ. 3:12).

18. მუშენ გოკონა, იეჰოვაცალ თანდაბალეფ რდათჷ?

¹⁸ მუჟამსით ირნერო ვეცადებუთ, ქიმვაჸუნათ ჩქინ ზეციერ მუმაშ თანდაბლობაშ მაგალითის, შხვეფს უმოს ადვილ აჸინა ჩქინწკუმა დორაგადაფა, იპჸით გაგებიერ დო ვამჭირდან იჸი დოჸუნა დო გეგმიბრჩქინანთ მოთვინებას. თეწკუმა ართო, უმოსო შემალებენა იეჰოვაცალო შხვეფს ჸოროფათ დო პატიცემათ მივექცუათ. ვაგგოჭყორდან, ნამდა მუთ უმოსო ქუვაგურუთ ჩქინ თანდაბალ ღორონთის, თით უმოს ძვირფასეფ იპჸით თიშო (ეს. 43:4).