მუჭო გიმგოდირთუნა ბიბლიაშ წიგნ „იობ“, მუჟამსით მიდგაინშა რჩევა გაფუნა მიოჩამალ?

1, 2. მუშენ ვა რდჷ ადვილ იობიშ სუმ მეგობარშო დო ელიჰუშო თიშა გურშა ელაკინა?

ᲮᲝᲜᲐᲠᲥ გოლჷ დო ქიანაქ ქიგეგ იობიშ გაჭირებაშ ამბე, ნამდა ჭიჭე დო დიდ იჩინენდუნ ფერ კოჩიქ ირფელ მიოდინუ. მუჟამსით იობიშ ამბეს თიშ სუმ მეგობარ, ელიფაზ, ბილდად დო ცოფარ, გებულენს, გინოჭყვიდუნა, უცშა მიდართან დო გურშა ეუქექუან თის. მეულირს თინეფს თიშე უფრაშ მდგომარეობა ხვადუნა, ვინემ ელუდეს.

² წერმიდგინით თეცალ სურათ: იობის, მუთუნ ქაპალუდ-და, ირფელ დინაფილ აფჷ. თის შხურეფქ, საქონელქ, აქლემეფქ დო ვირეფქ, მუთ ქოჸუნდჷ, ვარა გოუჭყორდჷ დო ვარა ხირილ რე. თიშ მსახურეფქ ხოლო გოჭყორდეს დო ვითხოლო სქუაქ ჸუდეშ აკოცუმაშ დროს ქიმლუღურ. იობის, თენა ვა უბაღუდუკონ თეშ, მუშ ლახალაქ ხოლო ქიგიაძინ; მთელ სხეულ წყლულეფით აფჷ გოფშა დო ნინათ ვეიჭარენ ფერ ჭუეფ უღჷ. თე სუმ კოჩ მოურსუნ, შორშე ორწყე განადგურებულ იობის, ნამუთ ტუტას აშახე. მუნერ რე თინეფიშ რეაქცია? შქვით დღას თე კოჩეფს ხონარქ ვეკაღინეს, მუშენდა ორწყედეს, მუ გლახათ რდჷ იობ (იობ. 2:12, 13). მუდგარენ მომენტის, თე ქომოლკათაშე უმოს ახალგაზრდა, ელიჰუ, ხოლო მოურს იობიშ ოძირაფშა დო თინეფიშ გოხოლუას დოზოჯუნს. ბოლოს იობ იჭყანს ჩიებას, მუშ ერჩქინაშ დღას ჭყანსჷ დო ღურას ნატრენს (იობ. 3:1–3, 11). თე გაჭირებულ კოჩის მოხვარა ოსაჭირ. თე ქომოლკათას შეულებ გურშა ელუკინას იობის დო ქაძირუას, ნამდა თიშ ნამდვილ მეგობრეფ რენა დო უჸორა. მორთ ქობძირათ, მუს ქიმინუნა თინეფ.

3. მუს გუვარჩიენთ თე სტატიას?

³ იეჰოვაქ მოსეს დაჭარაფუ, მუ თქუ დო მუჭო მიქცუ იობიშ სუმ ითამ მეგობარქ დო ელიჰუქ. საინტერესო რე, ნამდა მუდგარენეფ, მუთ ელიფაზიქ თქუ, მუჭოთ იძირენ, დემონშე რდჷ შთაგონებულ. თეშ გინაწონს, ელიჰუქ იეჰოვაშ შთაგონებულ სიტყვეფ თქუ (იობ. 4:12–16; 33:24, 25). თაშ ნამდა, თე წიგნის შემლებუნა ბძირათ მუჭოთ მანგარ ჯგირ, თეშ მანგარ გლახა რჩევაშ მეჩამაშ მაგალითეფ. ართ-ართ მნიშვნელოვან მუდგარენ, მუდგაშ გურაფა წიგნ „იობშე“ შემლებუნა, თინა რე, მუჭო მეფჩათ შხვეფს ჯგირ რჩევეფ. ათეშენ, მორთით დაჭყაფუს გუვარჩუათ, მუ გლახა მაგალით მუჩეს იობიშ სუმ მეგობარქ. უკულ გუვარჩუათ ელიჰუშ ჯგირ მაგალით ხოლო. თითოეულ შემთხვევას ჩიება მაღვენუნა, მუჭო გუმადირთუდ თე ირფელ ისრაელეფს ჯვეშო დო მუჭო შილებე გუმმოდირთან ჩქი ამდღა.

ᲘᲝᲑᲘᲨ ᲡᲣᲛ ᲒᲚᲐᲮᲐ ᲛᲔᲒᲝᲑᲐᲠᲘᲨ ᲠᲩᲔᲕᲔᲤ

4. მუშენ ვეგშურთჷ იობშა გურიშ ელაკინაქ თიშ სუმ მეგობარს? (ქოძირით სურათ).

⁴ ბიბლია იჩიებ, ნამდა მუჟამსით იობიშ სუმ მეგობარქ ქიგეგ თიშ გაჭირებაშ ამბე, თიშა გურიშ ელაკინშა მიდართეს (იობ. 2:11). მარა თინეფიშ მეულაქ შურო ვეჸუ იობშო გურიშ ემაკინალქ. მუშენ? არძაშ უკლაშ სუმ მიზეზიშ გურშენ. პირველ, თინეფს იობშა წესიერო ვა მურჩქილუაფუნან თეშ, პირდაპირ არასწორ დასკვნეფ გეგშეღეს. მაგალთო, თინეფ ფიქრენდეს, ნამდა იობის ღორონთ ასაჯენდჷ მუშ ცოდეფიშ გურშენa (იობ. 4:7; 11:14). მაჟია, მართალ რე, ბრელ მუდგარენ, მუთ თინეფქ იჩუეს, ჭკვერულო იძირედ, მარა სინამდვილეს, მუთუნს ვეგმადირთუდ იობის (იობ. 13:12). თეწკუმა ართო, თინეფ უხეშო ურაგადუდეს იობის, მუდგათ მანგარო ქელაჭვეს გურ თის. მაგალთო, ბილდადიქ ჟირშა გიოძახ თე გაჭირებულ კოჩის დო უწუ, ნაბეტანს იჩიებუქია (იობ. 8:2; 18:2). ცოფარქ მოხუჯურო გოლანძღჷ იობ დო ფაქტიურო უწუ, „უჭკუე კოჩ“ რექია (იობ. 11:12). დო მასმა, მართალ რე, თინეფს ვა უღვარუნა იობშა, მარა თინეფიშ ჩიებაშე იძირედ, ნამდა ჟიშე უჯინედეს თის დო ირონიულო დო უპატიცემულოთ ურაგადუდეს (იობ. 15:7–11). თე კოჩეფქ იობიშ გურიშ ექექაფაშ დო თიშა რწმენაშ გამანგარებაშ მანგიორო, თიშ მტკიცებაშა გინილეს, ნამდა იობ მტყუან რდჷ.

5. მუქ მაჸუნ შედეგო იობიშ სუმ მეგობარიშ რჩევეფს?

⁵ მუ გასაკვირ რე, ნამდა თე სუმ მეგობარიშ რჩევეფქ მუთუნს ვემეხვარ იობის. თინეფქ მუნეფიშ ჩიებათ ხოლო უმოსო განადგურეს თინა (იობ. 19:2). ათეშენ, გასაგებ რე, მუშენ გინორთჷ იობიქ მუშ დუდიშ დაცვებაშა დო მუშენ არაგადინუ თიცალ მუდგარენეფქ, მუთ ოკო ვა უთქუალუდუკო (იობ. 6:3, 26). იობიშ მეგობრეფიშ ჩიება ვემურდჷ იეჰოვაშ აზროვნებას. თინეფქ ვართ თიშ მდგომარეობაშა მიშულას ეცადეს. შედეგო, გურუგუჩამუო სატანას გეგმარინაფუეს დუდ იობშა გურიშ გასოფალო (იობ. 2:4, 6). მუჭო გუმადირთუდ თე ამბე ჯვეშო ისრაელეფს დო მუჭო გიმმოდირთუნა ჩქი ამდღა?

6. მუჭო გუმადირთუდ იობიშ სუმ მეგობარიშ გლახა მაგალით ისრაელიშ უხუცესეფს?

⁶ მუჭო გუმადირთუდ იობიშ ამბე ისრაელეფს. მუჟამსით ღორონთიქ ისრაელეფს კანონეფ მეჩჷ, ბრძენ დო გამოცდილ ქომოლკათა, უხუცესეფ ხოლო ქიგიორინუ, ნამდა ღორონთიშ სამართლიან ნორმეფით განსაჯესკო ხალხ (კან. 1:15–18; 27:1). თე ქომოლკათას ოვალუდ, შურ დო გურით ქუმურჩქილუესკო ხალხის, ონდო მუდგაინს ელუჩანდეს ვარდა განაჩენს გიშეღანდეს (2 მატ. 19:6). თეწკუმა ართო, თინეფქ კითხვეფ ოკო დასვესკო დო ჯგირო გეგთიძიესკო საქმე დო ხეთეშე ვეფიქრესკო, ნამდა უკვე დასაბაღ ინფორმაცია უღუდეს მუდგაინიშ გინაჭყვიდირალო (კან. 19:18). თე ქომოლკათაქ ჸინჩას ოკო ვეჩუკო თინეფს, მით მოხვარაშ ოთხუშა მიშჷ, მუშენდა თაშ ქიმიქციებუდეს-და, ხალხის გურ ვაჸიდ, თავისფალო დო ალალას ქეჩუესკო თინეფს მუნეფიშ გაჭირება (გიშ. 22:22–24). თაშ ნამდა, ისრაელიშ უხუცესეფს ბრელ მუდგარენს ქუდაგურუანდ იობიშ ამბე.

7. უხუცესეფიშ გარდა, ხოლო მის უხვადუდკონ იჸიდ რჩევეფიშ მეჩამა ისრაელს დო მუჭო მეხვარებუდ თინეფს იობიშ ამბე? (იგავ. 27:9).

⁷ მუშო ოკო რაგად, რჩევაშ ჯგირო მეჩამაშ საკითხ ხვალე უხუცესეფშო ვეჸუაფუდ საინტერესო. სინამდვილეს, არძა ისრაელს – ახალგაზრდას დოვარ ხანშამიშულირს, ქომოლკოჩის დოვარ ოსურს – უხვადუდკონ იჸიდ ართმაჟიაშა რჩევეფიშ მეჩამა, მაგალთო თიშო, ნამდა ქიმეხვარესკო ართიანს, უჯგუშო ცესკო იეჰოვას თაყვან ვარდა თიმწკუმა, მუჟამსით ქოძირუნდეს, ნამდა მიდგაინს გიშასწორებელ აფუდ მუდგარენ (ფსალმ. 141:5). ნამდვილ მეგობარქ ზუსტას თენა ოკო აკეთას (წეკითხით იგავეფიშ 27:9). თაშ ნამდა, იობიშ მეგობრეფიშ გლახა მაგალით ქაძირანდ ისრაელეფს, მუ ოკო ვა თქუესკო დო მუჭო ოკო ვემიქცუესკო რჩევაშ მეჩამაშ დროს.

8. მუქ ოკო ვა მაღოლან რჩევაშ მეჩამაშ დროს? (ქოძირით სურათეფ).

⁸ ჩქი მუჭო გიმმოდირთუნა. ქრისტიანეფქ ოკო ელუდირთათ ართმაჟიას გაჭირებაშ დროს. მარა იობიშ სუმ მეგობარცალო ქიმიფქციებუთ-და, თენა ვეგშმალენა. თაშ ნამდა, პირველ, ხეთეშე დასკვნეფიშ გიშაღალაშ მანგიორო, ოკო ქიგებგათ არძა საჭირო დეტალ. მაჟია, რჩევა ელიფაზცალო ჩქინ აზრეფშა დო გამოცდილებაშა ვარინ, ღორონთიშ სიტყვაშა ოკო გივორსხუათ (იობ. 4:8; 5:3, 27). მასმა, ოკო ვეფჩუათ ჸინჩას დო კრიტიკულო. ვაგგოჭყორდან, ნამდა მუთ ელიფაზ დო მუშ მეგობრეფქ იჩუეს, ირფელ ტყურა ვა რდჷ. ართ აზრ, ნამუთ თინეფქ თქვისჷ, გვალო ბიბლიაშ ართ მაჭარალქ გიმირინუ მუშ წერილს (ქეშუდარით ართიანს იობიშ 5:13 დო 1 კორინთელეფიშ 3:19). მარა ღორონთიშ გურშენ მუთ თქვისჷ, უმენტაშ ტყურა რდჷ დო იობიშ გურიშ გასოფალ რდჷ. ათეშენ იეჰოვაქ თინეფს უწუ, ნამდა მუდგას იჩიებუდეს, სიმართლე ვა რდჷ (იობ. 42:7, 8). თაშ ნამდა, ჯგირ რჩევა დღას ვამკარჩქინანს იეჰოვას მუთუნ ვა მოწონს დო სოლეთინ ვემიხუჯენ ფერ პიროვნებათ დო ვართ თიშ მსახურს ოფიქრებაფუანს, ნამდა ღორონთიშ ჸოროფაშ ღირს ვა რე. მორთით ასე თიშე ქიფჩუათ, მუშ გურაფა შემლებუნა ელიჰუშ მაგალითშე.

ᲔᲚᲘᲰᲣᲨ ᲠᲩᲔᲕᲔᲤ

9. გენწყით, მუშენ ოსაჭირუდ იობის კინ გურიშ ექექაფა მუშ მეგობრეფიშ ჩიებაშ უკულ დო მუჭო მეხვარ იეჰოვაქ თის.

⁹ ჭიჭე ხანშა იობ დო თიშ მეგობრეფ შქას ნირზიქ მეჭყორდჷ. ალბათ თექ მანგარ დაძაბულ სიტუაცია იჸუაფუდ. თე ქომოლკათაქ თისხი რაგადუ, ნამდა თინეფ შქას ჩიება ბიბლიაშ 28 დუდის ჭარჷ დო მუთ იჩუესინ, უმენტაშო გურმულირო დო განწარებულო თქვისჷ. იობიშ ჭუა კინ ჭუათ სქიდუ. თის კინ ოსაჭირ გურიშ ექექაფა დო თეწკუმა ართო, აზროვნებაშ შესწორება ხოლო. მუჭო მეხვარ თის იეჰოვაქ? ღორონთიქ ელიჰუ გეგმირინუ თიშა რჩევაშ მიოჩამალო. საინტერესო რე, უმოს ადრე მუშენ ვედიჭყჷ ჩიება ელიჰუქ? თიქ თეშ მიზეზ თეშნერო ენწყჷ: „მა თქვანდე უკლაშ ვორექ დო თქვა - ჩქიმდე უნჩაშეფ; ათეშენ იპჭოფუნდჷ დუდის“ (იობ. 32:6, 7). ელიჰუს არჩქილედ, ნამდა ხშირას ხანშამიშულირეფს უმოს აფუნა ნაცხოვრებ დო ნაძირეფუნ თიშ გურშენ, მეტ რჩქინა დო გამოცდილება უღუნა, ვინემ ახალეფს. მარა იობიშ დო თიშ მეგობრეფიშ ჩიებას გინარჩქილუნ, ვეშულებუდ ხონარ ვეკიღუკონ. თიქ თქუ: „ხვალე ხანს ვა მოჸუნს რჩქინა დო ხვალე მოხუცებულეფს ვარჩქილენა, მუ რე სწორ“ (იობ. 32:9). ქიდვეკვირათ, მუ დო მუჭო თქუ უკულ ელიჰუქ.

10. მუ აკეთ ელიჰუქ, ონდო იობის რჩევას მეჩანდუკო? (იობ. 33:6, 7).

¹⁰ ონდო რჩევაშ მეჩამაშა გინიშუკო, ელიჰუქ იობ მამზად მარჩქილაფარო. მუჭო აკეთ თენა? პირველ, დიო მუქ დემშვიდ. თენა თით მიჩქუნა, ნამდა მუჭოთ ბიბლიას ჭარჷ, დუდშე ელიჰუ მანგარ გურმულირ რდჷ (იობ. 32:2–5). მარა სოთინ ვეძირე, ნამდა თიქ იობის გურმულირო დურაგადუ. თეშ მანგიორო, თანდაბლურო დო ჸოროფათ ეჩუ თის. მაგალთო, თიქ უწუ: „ღორონთშო ართ ვორეთ მათ დო სით“ (წეკითხით იობიშ 33:6, 7). უკულ ელიჰუქ ქაძირუ იობის, ნამდა შურ დო გურით აფუდ მორჩქილაფირ ირფელ, მუთ თიქ თქუ. თექ თევრეშე ქიძირ, ნამდა იობის მუშ ნარაგად მუსხირენ აზრ გუმეორ (იობ. 32:11; 33:8–11). მაჟიაშა ხოლო, რჩევაშ მეჩამაშახ, კინ იგივე გაკეთ ელიჰუქ (იობ. 34:5, 6, 9; 35:1–4).

11. მუჭო მეჩჷ ელიჰუქ რჩევა იობის? (იობ. 33:1).

¹¹ მუჟამსით ელიჰუ იობის რჩევას არზენდჷ, თენა თეშ ვა უქიმინ, ნამდა იობიქ დუდ უღირსო ქიგინუკო, პირიქით, პატიცემათ დურაგადუ. მაგალთო, თი სუმ ქომოლკოჩიშ გინაწონს, ელიჰუქ იობის სახელით დუძახ (წეკითხით იობიშ 33:1). იობიშ დო თიშ სუმ მეგობარიშ ნირზიშ მორჩქილაფაშ დროს ელიჰუს ხოლო მანგარო ოკოდუკონ იჸიდ მუდგაინ ქიმშარაგადუკო. ათეშენ, თის ალბათ ჯგირო არჩქილედ, მუნერ რე, მუჟამსით მუდგარენიშ რაგად გოკო დო ვა გარაგადე. შილებე თის თენა შუდუნ თეშ გურშენ მიშართჷ იობიშ მდგომარეობაშა დო უწუ, მუთუნიშ რაგად ქაკოდ-და, ქოთქუკო (იობ. 32:4; 33:32). თეს გეძინელ, ელიჰუქ იობ გაფრთხილ, მუ გლახა შედეგიქ შილებედ მაჸუნუკო ნამთინე საკითხშე თიშ დამოკიდებულებას დო ჸოროფათ ქუგაშინ, მუნერ ბრძენ, სამართლიან დო ძალიერ რე იეჰოვა დო მუნერ ართგურ რე ჸოროფას (იობ. 36:18, 21–26; 37:23, 24). მუშო ოკო რაგად, ელიჰუშ რჩევეფ მამზადენდ იობის, მუშ გუმაჭყაფალშე ხოლო ქიმირჩქილუკო რჩევეფ (იობ. 38:1–3). მუჭო გუმადირთუდ ელიჰუშ მაგალით ჯვეშო ღორონთიშ მსახურეფს დო მუჭო გიმმოდირთუნა ამდღა?

12. მუჭო ირინუანდჷ იეჰოვა წინასწარმეტყველეფს მუშ ხალხიშ მახვარებელო დო მუჭო გუმადირთუდეს თინეფს ელიჰუშ მაგალით?

¹² მუჭო გუმადირთუდ ელიჰუშ მაგალით ისრაელეფს. ისრაელეფშა დაგურაფალო დო აზროვნებაშ გიშასწორებელო იეჰოვა ხშირას ირინუანდჷ წინასწარმეტყველეფს. მაგალთო, მსაჯულეფიშ პერიოდის, იეჰოვა წინასწარმეტყველ დებორაშ საშვალებათ ხელმძღვანელენდჷ მუშ ხალხის. თინა ახალგაზრდა სამუელს ხოლო ირინუანდჷ მუშ ხალხშა მითითებეფიშ მიოჩამალო (მსაჯ. 4:4–7; 5:7; 1 სამ. 3:19, 20). მეფეეფიშ დროს ხოლო იეჰოვა ირიათო ირინუანდჷ წინასწარმეტყველეფს, ნამდა სულიერო გამანგარუკო მუშ ხალხ დო რჩევეფ ქიმეჩუკო თინეფს, მიდგას წმინდა თაყვანიშმცემლობაშე აფუდ გინორთაფილ (2 სამ. 12:1–4; საქ. 3:24). თაშ ნამდა, წიგნ „იობის“ მოჩამილ ელიჰუშ მაგალით ქუდაგურუანდ ართგურ ქომოლკათას დო ოსურკათას, მუ დო მუჭო ოკო თქვისკო რჩევაშ მეჩამაშ დროს.

13. მუჭო შილებე გიმმოდირთან ელიჰუშ მაგალითიქ ამდღა?

¹³ ჩქი მუჭო გიმმოდირთუნა. ჩქი ხოლო, ბიბლიაშ საშვალებათ, ღორონთიშ ნებას უცხადენთ ადამიანეფს. თეს გეძინელ, ჩქინ სიტყვეფით გურშა ელუკინანთ თანაქრისტიანეფს. თე ირფელიშ კეთებას ელიჰუშ მაგალით ქიმმეხვარებუნა (1 კორ. 14:3). განსაკუთრებულო უხუცესეფშო რე მნიშვნელოვან, ნამდა გემუანო ეჩუან და დო ჯიმალეფს თიმწკუმა ხოლო, მუჟამსით შილებე აშო გაღიზიანებულო ვარდა უდუფიქრებუო ეჩიებუდან (1 თეს. 5:14; იობ. 6:3).

14, 15. ქიმიჸუნით მაგალით, მუჭო შეულებუნა ჯიმალეფს, მიაჸუნან ელიჰუშ მაგალითის.

¹⁴ წერმიდგინით თეცალ სიტუაცია: ართ უხუცეს გებულენს, ნამდა მუშ კრებას ნამდგარენ და ემოციურო მანგარ გლახათ რე. თინა გინოჭყვიდუნს, ხოლო ართ ჯიმაწკუმა ართო ქიმიაკითხუას თის, ნამდა გურშა ელუკინან. თე და იჩიებ, ნამდა მანგარ გლახათ რე. ქოთ კრებეფშა გილურს, ქოთ მსახურებაშა, მარა მუთუნს ვა მოუღ ხიოლ. მუს ქიმინუნა თე ჯიმალეფ?

¹⁵ პირველ რიგის, ალბათ თინეფ ქეცადებუნა, ქიგეგან, მუქ შილებე მიჸუნუკო თინა თეცალ მდგომარეობაშა. თეშო თინეფ კითხვეფს ქუდუსვენა დო ბოლოშა ქუმურჩქილუანა თის. მაგალთო, ხომ ვა ფიქრენს, ნამდა იეჰოვაშ ჸოროფაშ ღირს ვა რე, ვარდა ხოლო პრობლემეფქ ხომ ვეგნოშულიდ დო თენა ხომ ვა რე თიშ წუხებაშ მიზეზ? (ლუკ. 21:34). მაჟია, თე ჯიმალეფ ქეცადებუნა, მუდგაინ თიცალ დოგორან, მუდგაშეთ შურ დო გურით ქაცქვანა თე დას. მაგალთო, თიშენ ნამდა, აგრძელენს კრებეფშა გილულას დო ქადაგებას, თიშ უმკუჯინუო, ნამდა თეშ კეთება ვა რე თიშო ადვილ. დო მასმა, მუჟამსით თინეფ ქინანჭუნა სიტუაციას ბოლოშა დო ქიგეგენა მიზეზეფს, მუდგაქ თე დას თეცალ გრძნობეფ გურჩქინ, ბიბლიას ქიმიხვარუანა თიშა გურიშ ელაკინალო დო დარწმუნენა, მუჭო უჸორს იეჰოვას (გალ. 2:20).

ᲒᲐᲒᲠᲫᲔᲚᲘᲗ ᲒᲣᲠᲐᲤᲐ ᲬᲘᲒᲜ „ᲘᲝᲑᲨᲔ“

16. მუჭო ოკო გუვაგრძელათ გურაფა წიგნ „იობშე“?

¹⁶ დასურო მუზმა ჯგირ მუდგარენიშ გურაფა შემლებუნა ბიბლიაშ წიგნ „იობშე“. წოხოლენ სტატიას ქობძირით, ნამდა ღორონთშე შთაგონებულ თე წიგნ მოგებაფუანა, მუშენ უშვენს ღორონთ ტანჯებას დო მუჭო შემლებუნა ართგურო გაურზათ განსაცდელეფს. თე სტატიას ჩიება მიღუდეს, მუჭო შემლებუნა ჯგირ რჩევეფიშ მეჩამა შხვეფშა, მუდგაშოთ საჭირო რე, ვემიფქცუათ იობიშ სუმ გლახა მეგობარცალო დო ქიმვაჸუნათ ელიჰუშ ჯგირ მაგალითის. ანწიანშო, მიდგაინშა რჩევა გაჸინა მიოჩამალინ თიმწკუმა, ჯგირ იჸუაფ, ქიგნაჯინათ თი აზრეფს, მუთ თე წიგნშე დიგურეთ. წიგნ „იობ“ ჭეხან ქორე ვაიკითხირუნან-და, ჯგირ მიზან იჸუაფ, ხოლო ართშა წეკითხათ თე განსაკუთრებულ ისტორია. მუჭოთ ჯვეშო გუმადირთუდ თე წიგნ ბრელსინ თეშ, ბჯერა, ამდღა ხოლო ბრელ მუდგარენ დუგაგურენა თიშე.