მუ ოკო ვაკეთათ, ნამდა ჩქინ კამპანიაქ განადიდას იეჰოვა?

1, 2. მუჭო უჯინე იეჰოვა კამპანიას?

ᲓᲐᲜᲘᲨᲜᲣᲚ ხომ ვა რეთჷ? თაშ ქორენ-და, მთელ გურით მიგახვამანთ. ალბათ ასე ინწყუაფუდათ იჸი კამპანიაშო. იეჰოვას ოკო, ნამდა ქოთ კამპანიაშa დღას დო ქოთ მთელ ცხოვრება ბედნერ რდათჷ ართო (იგავ. 5:18; ოცქვ. 3:11).

² მანგარ მნიშვნელოვან რე, თქვან კამპანიას ირფელქ თეშ იჸუას, ნამდა თიქ განადიდას იეჰოვა. თე სტატიას გუვარჩიენთ, მუშენ რე თენა მნიშვნელოვან დო მუჭო შეილებუნა თეშ კეთება. მართალ რე, თე სტატია უმენტაშო თი წყვილეფს ოხუ, მით მუნეფიშ კამპანიაშო ინწყუაფუნა, მარა პრინციპეფ, ნამდგას გუვარჩიენთ, არძას ქიმმეხვარებუნა, განვადიდათ იეჰოვა, მუჟამსით დაპატიჟებულ ვორეთ კამპანიაშა ვარდა ხოლო მუდგარენს ელმაკითხანა კამპანიაშ დაგეგმებაშ დროს.

ᲛᲣᲨᲔᲜ ᲝᲙᲝ ᲒᲐᲜᲐᲓᲘᲓᲐᲡ ᲩᲥᲘᲜ ᲙᲐᲛᲞᲐᲜᲘᲐᲥ ᲘᲔᲰᲝᲕᲐ?

3. მუშე ოკო დეფიქრას ქრისტიან წყვილქ, მუჟამსით კამპანიაშო ინწყუაფ დო მუშენ?

³ ქრისტიან წყვილეფქ, მით კამპანიას აგეგმენა, ირფელ ბიბლიურ პრინციპეფს მეურენ თეშ ოკო გინოჭყვიდან. მუშენ რე თენა მნიშვნელოვან? მუშენდა ოჯახ იეჰოვაშ გოჭყაფილ რე. ზუსტას თიქ აკეთ პირველ კამპანია, მუდროსით ადამ დო ევაქ დექორწინეს (დაბ. 1:28; 2:24). ათეშენ, წყვილიშ მთავარ ოფიქრებელ თინა ოკო რდასჷ, მუქ მუჭო ოკო იკეთინას, ნამდა მუნეფიშ კამპანიაქ იეჰოვა განადიდას.

4. ხოლო ნამ მიზეზეფიშ გურშენ ოკო განადიდას ქრისტიანეფიშ კამპანიაქ იეჰოვა?

⁴ ხოლო ართ მნიშვნელოვან მიზეზ, მუდგაშ გურშენ კამპანიაშ დაგეგმებაშ დროს ოკო გეთვალისწინათ, იეჰოვა მუს ფიქრენს, თინა რე, ნამდა თინა თქვან ზეციერ მუმა დო არძაშ უჯგუშ მეგობარ რე (ებრ. 12:9). მუშო ოკო რაგად, თქვა გოკონა, ნამდა თექ ირიათო თაშ გეგრძელას დო ვა ქიმინათ მუთუნ თიცალ, კამპანიაშ დღას დოვარ შხვა ნებისმიერ დღას, მუთ თქვან მეგობარს გურს ქელაჭუანდ (ფსალმ. 25:14). მუჟამსით ქიფიქრენთ თი ირფელშე, მუთ იეჰოვას თქვანო აფჷ კეთებულ ვარდა ანწ აკეთენს, თენა გურს მარდულობათ გეიფშანა დო უმოსო გაჸინა გინოჭყვიდილ, ნამდა თქვან კამპანიაქ იეჰოვა განადიდას (ფსალმ. 116:12).

ᲛᲣᲭᲝ ᲨᲔᲘᲚᲔᲑᲣᲜᲐ ᲒᲐᲜᲐᲓᲘᲓᲐᲗ ᲘᲔᲰᲝᲕᲐ ᲙᲐᲛᲞᲐᲜᲘᲐᲨ ᲓᲦᲐᲡ?

5. მუჭო მეხვარებ ბიბლია წყვილს კამპანიაშ დაგეგმებაშ დროს?

⁵ ბიბლიას ვა რე გიმოჭარილ წესეფ, მუჭო ოკო იკეთინას ქრისტიანულ კამპანიაქ, იჸუაფუნო თენა შხვადოშხვა ცერემონია დოვარ სუფრა. ქრისტიან წყვილქ თე ირფელ ოკო გინოჭყვიდას მუნეფიშ მდგომარეობაშ, გემოვნებაშ დო თი წესეფიშ მიხედვით, ნამუთ მუნეფიშ კულტურას არსებენს. თეწკუმა ართო, ჩქი მთავრობაშ კანონეფს ხოლო ოკო დევემორჩილათ თე საკითხის (მათ. 22:21). მართალ რე, მუჭოთ ფთქვით, კონკრეტულ წესეფ ვა მიღუნა, მარა წყვილს შეულებ ბიბლიურ პრინციპეფით ქიმეხვადას, მუჭო აკეთას თიცალ კამპანია, ნამუთ განადიდენს იეჰოვას დო გურს გუხარენს თის. მორთ ქიფჩუათ თი პრინციპეფშე, ნამუთ თეცალ დროს წყვილს გეგმადირთუ.

6. მუჭოთ რომაელეფიშ 13:1, 2-შე იძირე, მუშენ რე მნიშვნელოვან, წყვილქ მიაჸუნას ქორწინებაწკუმა დაკავშირებულ მთავრობაშ მოთხოვნეფს?

⁶ მიაჸუნით მთავრობაშ კანონეფს (რომ. 13:1, 2). ქიანეფიშ უმენტაშის სახელმწიფოს მუშ კანონეფ უღჷ ქორწინებაწკუმა დაკავშირებით. წყვილქ ოკო ქიგეგას, მუნეფ ცხოვრენან თექ მუ კანონეფ არსებენს. თე საკითხწკუმა დაკავშირებით კითხვეფ გოირჩქინდუნან-და, შეილებუნა უხუცესეფს ქოთხუათ მოხვარა.b

7. მუნერ გარემო ოკო რდასჷ კამპანიაშ დღას დო მუ შეუნწყუნს თეს ხეს?

⁷ ღორონთშო მოსაწონ დო სასიამოვნო გარემო გიღუდან (1 კორ. 10:31, 32). ქეცადით, თქვან კამპანიას ღორონთიშ წმინდა შურიშ ნაყოფიშ თვისებეფ იძირედას დო ვართ ხოლო ქვეყნიერებაშ (გალ. 5:19–26). რახანს, მეთაურობაშ პრინციპიშ მიხედვით, დაქორწინებაშ უკულ სინჯა ოჯახიშ დუდ იჸუაფ, თინა რე პასუხიშმგებელ, ნამდა კამპანიაქ ღორონთშო მოსაწონო დო სტუმარეფშო სასიამოვნოქ იჸუას. ართ-ართ, მუთ თეს ხეს შეუნწყუნს, რე ბიბლიაშა გერსხილ საქორწინო მოხსენება. გიშმაულარ ჯიმა თე მოხსენებას პატიცემათ დო გემუანო გაკეთენს, მუდგათ მარჩქილეეფს ქიმეხვარებ, უჯგუშო ქოძირან, ნამდა ქორწინება ღორონთშე ძღვინ რე. თეწკუმა ართო, მარჩქილეეფ უმოსო ქოძირუნა, მუნერ მნიშვნელოვან ღონისძიება რე კამპანია. ათეშენ წყვილეფიშ უმენტაშ ისხუნუანს, თე მოხსენებაქ იეჰოვაშ მოწმეეფიშ დარბაზის გეკეთინას. თქვა ხოლო თაშ ქოისხუნუნან-და, წინასწარ ოკო ქიმეჭარათ წერილ თე დარბაზის იტარებუნ ფერ კრებეფშე ნამდგაინიშ უხუცესეფიშ საბჭოს.

8. მუშ კეთება შეილებუნა, ნამდა თქვან კამპანიაშ სუფრაქ ხოლო განადიდას იეჰოვა? (რომ. 13:13).

⁸ წეკითხით რომაელეფიშ 13:13. კამპანიაშ დღას სუფრაშ კეთება ქოილამუნან-და, მუშ კეთება შეილებუნა, ნამდა თიცალქ ვეგშაირთან, მუნერით ქვეყნიერებას უჩქუნა დო ქრისტიანს ვასქვანს? ბერძნულ სიტყვას, ნამუთ თე მუხლის თარგმნილ რე, მუჭოთ „დუდეშქუმალირ დროშტარება“ იგულისხმებუდ თიცალ აკოშაყარუა, სოდეთ ხალხ უნორმეთ შუნდჷ დო მუსიკა გოთანაშა ვა ჩენდუდ. ოშუმალიშ მიკოღალას გეგნოჭყვიდუნთ-და, წინასწარ მიღით ზომეფ თიშო, ნამდა მიდგაინქ გვალო ნაბეტან ვა შვასჷ.c ქეცადით, მუსიკა ხოლო თისხით ხონარმაღალო ვა რდასჷ, ნამდა სტუმარეფს ართიანწკუმა ღვარაფიშ უმშო ვაჩიებინედან. გურგოჩამილო ქიგნაჯინით, მუ სტილიშ მუსიკეფს ჩართენთ დო ქოძირით ობირეშეფიშ ტექსტეფ ხოლო, მუშენდა თიცალ მუთუნქ ვეჸუას ჩართულქ, მუთ მიდგაინს დაბრკოლენს.

9. მუ ოკო გეთვალისწინას წყვილქ საკამპანიო სუფრას გართობაშ დო ჩიებაშ კონტროლწკუმა დაკავშირებით?

⁹ ნამთინე ქიანას სუფრაშ დროს, მოჭყუდ დო სინჯაშ ოჯახიშ წევრეფ დო მეგობრეფ წუმოდირთუნა დო სიტყვას თქუანა თინეფიშ გურშენ. ნამთინე ხოლო სუფრაშ გასქვამებელო, სინჯა დო მოჭყუდუწკუმა დაკავშირებულ ვიდეოს ვარდა სურათეფიშ კოლაჟის უტენს ვარდა ხოლო შხვა მუდგარენეფს ორთუნა გართობაშო. მუშო ოკო რაგად, თეცალ მუდგარენეფ უმოსო ასქვამენს კამპანიაშ დღას, მარა ჯგირო ქუგუჩით გურ, ნამდა თე ირფელ ქრისტიანს ოსქვანსინ ფერ რდასჷ დო მიდგაინშა გლახათ იმოქმედენსინ ფერქ ვეჸუას (ფილ. 4:8). თეს მიგეხვარებუნა თეცალ კითხვეფშე დაფიქრება: თეთ მიდგაინიშ მიმართ უპატიცემულობა ხომ ვეგშმალენა? ზოგადო ქორწინებაშ მიმართ უპატიცემულო დამოკიდებულება ხომ ვეძირე? დო მუთ არძაშ უმოს მთავარ რე, განადიდენდას იჸინო თენა იეჰოვას? ციგანობა დო ძიცა-ლაჸაფის შილებე მუთუნ გლახა ვა რდასჷ, მარა მუთუნ თიცალქ ოკო ვერაგადინუას, მუთ ზედმეტ დო უზრდელურ იჸუაფუდ, მაგალთო, ციგანობა სექსუალურ საკითხეფშე (ეფეს. 5:3). თქვან ოჯახიშ წევრეფს ვარდა მეგობრეფს სიტყვათ გიშულა ქოულამუნან-და, ჯგირ იჸუაფ, ენწყუმილ გაფუდან თინეფშა, მუ გესიამოვნებუნა დო მუ ვარ.

10. მუშენ ოსაჭირ წყვილს მოკრძალება კამპანიაშ დაგეგმებაშ დროს? (1 იოან. 2:15–17).

¹⁰ რდათჷ მოკრძალებურ (წეკითხით 1 იოანეშ 2:15–17). იეჰოვაშ მსახურეფქ ზედმეტ ყურადღება მუნეფიშ დუდშა მიქცუანინ თიშ მანგიორო, ირნერო ოკო ეცადან, იეჰოვა განადიდან. თაშ ნამდა, მოკრძალებურ ქრისტიან ურიდანს უნორმეთ დიდ ფარაშ ხარჯებას დო „ქონებათ ცქვაფას“. მუშენ იჸუაფ ჯგირ უბრალო კამპანიაშ კეთება? ნორვეგიას მახორუ ართ ჯიმა, მაიკ, მეჩიებუნა, მუშენ იჸუ ჯგირქ, ნამდა კამპანია თეშნერო აკეთეს: „ვალეფქ ვეგმადვეს დო თექ პიონერობაშ გაგრძელებაშ საშვალება ქომუჩეს. მართალ რე, უბრალო კამპანია მიღუდეს, მარა იშენით სქვამ დო განსაკუთრებულ დღა რდჷ“. ჩქინ და, ტაბითა, ნამუთ ინდოეთის ცხოვრენს, იჩიებ: „უბრალო კამპანიაშ კეთებათ ქიანაშ ონერვიანებელ ეიფჩილითეთ. ისხი ოფიქრებელ დო დაგეგმებელ ვა მიღუდეს დო თიცალ საკითხეფ ხოლო ნაკლებო რდჷ, ნამდგას შილებედ ვედვეთანხმითკო ართიანს ჩქი ვარდა ჩქინ ოჯახეფქ“.

11. მუჭო შეულებუნა სინჯა დო მოჭყუდუს მუნეფიშ მიკაქუნალით მოკრძალებაშ ძირაფა? (ქოძირით სურათეფ).

¹¹ ქუგაფუნანო გინოჭყვიდილ, მუს მიკიქუნანთ? მუშო ოკო რაგად, გოკოდან იჸი, მუთ შილებენ სქვამას რდათჷ. ბიბლიურ დროს ხოლო სინჯა დო მოჭყუდ დიდ ყურადღებას აქციენდჷ, მუს მიკიქუნანდ (ეს. 61:10). მუშო ოკო რაგად, კამპანიაშ დღას შხვა დროს მიკიქუნანთინ ფერ მუდგარენ შილებე ვემკიქუნათ, მარა, მუდგას მიკიქუნანთინ თინა, იშენით მოკრძალებურ ოკო რდასჷ (1 ტიმ. 2:9). ირნერო ქეცადით, თქვან კამპანიას თქვან მიკაქუნალქ ვარდა გარეგნობაქ ვეგნირთას ირფელშე უმოს მნიშვნელოვანო (1 პეტ. 3:3, 4).

12. მუშენ ოკო დერწმუნას წყვილქ, ნამდა მუნეფიშ კამპანიას თიცალ მუთუნ ვეჸუაფ, მუთ ვემურე ბიბლიას?

¹² დუდ ეუჩილითეთ თიცალ ტრადიციეფს, ნამუთ ვემურე ბიბლიას (გიმოცხ. 18:4). ქვეყნიერებას კამპანიეფშო ბრელ თიცალ ტრადიცია არსებენს, ნამუთ დაკავშირებულ რე ტყურა რელიგიაწკუმა, სპირიტიზმწკუმა ვარდა ცრურწმენაწკუმა. იეჰოვა პირდაპირ მირაგადუნა, ნამდა თე ირფელშე შორს მიკინებუდან დუდ (2 კორ. 6:14–17). გოთაკილუნან ფერ წეს ვარდა ტრადიცია თქვან ტერიტორიას ხოლო ქორენ-და, ქიგეგით, სოვრეშე მოურს თინა დო გეგმირკვით ბიბლიურ პრინციპეფ ხოლო.

13. მუჭო შეულებ სინჯა დო მოჭყუდუს იეჰოვაცალო უჯინან სტუმარეფიშ საჩუქარეფს?

¹³ ბრელ დიხას სტუმარეფ სინჯა დო მოჭყუდუს საჩუქარეფს აჩუქენა. თქვანწკუმა ხოლო თაშ ქორენ-და, თქვან სტუმარეფ მუსხიშ საშვალება უღუნან თიშ მიხედვით გაჩუქენდან იჸი ფარას ვარდა შხვა მუდგარენეფს. მუშო ოკო რაგად, ბიბლია მირაგადუნა, ნამდა ქრისტიანეფქ ჯგირ ოკო უკეთათ შხვეფს, მუდგაშა საჩუქარიშ ჩუქება ხოლო მიშურს, დო თეს ხიოლ მოუღ კოჩშა (იგავ. 11:25; საქ. 20:35). მარა ვა მოკონა, სტუმარეფს დუდ ვალდებულო ვოგინაფუათ, მუდგარენ ქუმაჩუქან დო ვართ თინა მოკონა, ვოფიქრებაფუათ, ნამდა ბრელიშ საშვალება ვა უღუნან-და, უბრალო საჩუქარ ისხით ვა მახიოლენა. მოკონა, ჩქი ხოლო იეჰოვაცალო უჯინედათ შხვეფიშ საჩუქარეფს დო მარდულ ვაფუდათ, მუჟამსით ნამ შეულებუნან თის შურ დო გურით მაჩუქენა (2 კორ. 9:7).

ᲡᲘᲠᲗᲣᲚᲔᲔᲤᲨᲐ ᲓᲣᲓᲘᲨ ᲔᲩᲘᲚᲘᲗᲐᲤᲐ ᲓᲝ ᲗᲘᲜᲔᲤᲨᲐ ᲒᲔᲠᲯᲒᲘᲜᲐ

14. მუ სირთულეეფს ხვადუ ნამთინე წყვილ?

¹⁴ იეჰოვას მეწონებუნ ფერ კამპანიაშ კეთება გოკონან თიშ გურშენ, შილებე შხვადოშხვა სირთულეეფს ქეშეხვადათ. მაგალთო, თიშენ, ნამდა უბრალო კამპანიაშ კეთება გოკონა. სოლომონიშ კუნძულეფს მახორუ ართ ჯიმა, ჩარლი, იჩიებ: „მანგარო გამჭირდეს თიშ გინოჭყვიდუაქ, მი დუვაპატიჟითკო კამპანიაშა, მუშენდა ბრელ მეგობარ პჸუნა დო ჩქინწკუმა თეშ ხვადუ, ნამდა ირკოჩ ელჷ დაპატიჟებას“. ტაბითა, ნამუთ ჟიშე მიფშინეთ, იჩიებ: „ჩქინწკუმა დიდ კამპანიეფიშ კეთება უჩქუნა, ათეშენ ჩქინ მშობლეფს გაუჭირდეს თი აზრიშ მეღებაქ, ნამდა ხვალე 100 კოჩის ვაპატიჟენდით“. ართ ინდოელ და, სარა, იჩიებ: „ჩქინ ქიანას ხალხშო მანგარ მნიშვნელოვან რე ფარა დო სახელ. ჩქიმ ბიძისქუალეფს დო მამდასქუალეფს ვებერთელა კამპანიეფ უღუდეს, ათეშენ შხვეფ მირაგადუდეს, ნამდა მა თინეფშე უჯგუშ კამპანია ოკო მიღუდუკო“. მუ მიგეხვარებუნა თე დო შხვა სირთულეეფშა გერჯგინას?

15. მუშენ რე მნიშვნელოვან ლოცვა კამპანიაშ დაგეგმებაშ დროს?

¹⁵ ხშირას ქილოცით კამპანიაშ დაგეგმებაშ დროს. ქეჩით იეჰოვას თი საკითხეფშე, ნამუთ გინაჭყვიდირალ გაფუნა ვარდა ნამდგაშეთ ნერვიანენთ (ფილ. 4:6, 7). ქოთხით იეჰოვას, ქიმგეხვარან სწორ გადაწყვეტილებეფიშ მეღებას, ქიმერჩან სიმშვიდე რთულ სიტუაციეფიშ დროს დო გაბედულება, მუჟამსით თენა დეგესაჭირებუნა (1 პეტ. 5:7). მუშო ოკო რაგად, იეჰოვაშ ნდობა უმოსო გეგემანგარებუნა, მუჟამსით ქოძირუნთ, მუჭო გიპასუხენა თინა ლოცვეფშა. ჟიშე მოშინაფილ ტაბითა იჩიებ: „მა დო ჩქიმ საქომონჯო თიშე მნერვიანენდით, ნამდა ართიან შქას ვარდა ოჯახეფწკუმა მუდგაინშე ონირზებელქ ვა მაჸუესკო. ათეშენ კამპანიაშ გეგმეფშე ჩიებაშ დოჭყაფაშახ დიო ბლოცულენდით. მართალო ქიბგინით იეჰოვაშ მოხვარა დო ირფელქ ჯგირო გეთუ“.

16, 17. მუჭო შეილებუნა გასაგებო დო პატიცემათ იჩუათ საკამპანიო გეგმეფიშ გურშენ?

¹⁶ გასაგებო დო პატიცემათ ქიჩით (იგავ. 15:22). თქვან მომავალ მეუღლეწკუმა ართო, ბრელ მუდგარენ გაჸინა გინაჭყვიდირალ საკამპანიოთ, მაგალთო, თარიღ, ხარჯეფ, მის დაპატიჟენთინ თენა დო შხვა ანთას მუდგარენ. ონდო მუდგაინს გინოჭყვიდუნდათ, ართო ქიჩით, მუ აზრ გიღუნა ჟირხოლოს დო თიშე ხოლო, მუჭო მეურე თე სიტუაციას ბიბლიურ პრინციპეფ. შეილებუნა აზრ სულიერო მოწიფულ ქრისტიანეფს ხოლო ქელაკითხუათ. ართიან შქას დოვარ ოჯახიშ წევრეფწკუმა ჩიებაშ დროს, თქვან აზრ გემუანო ქოთქვით დო მზათ რდათჷ შხვეფიშ აზრიშ მარჩქილაფარო დო დაჸუნალო. მუჟამსით ოჯახიშ წევრეფ, მაგალთო მშობლეფ, თიცალ მუდგარენიშ კეთებას რთხინა თქვან კამპანიაშო, მუთ იკეთინე დო მუდგაშ გურშენ ქიანა ვენწყუ, ქუდაჸუნით თინეფს. ვაგგოჭყორდან, ნამდა თე დღა თინეფშო ხოლო განსაკუთრებულ რე. თინეფიშ ოთხუალ ვეშგასრულებენან-და, თინა ხოლო გემუანო გეუნწყით, მუშენ ვა გაკეთებენა თენა (კოლ. 4:6). გასაგებო გეუნწყით თქვან ოჯახიშ წევრეფს, ნამდა თქვან მთავარ მიზან რე, თე დღას ირფელქ იეჰოვაშ მოსაწონო ქიჸუას დო არძაქ ისიამოვნას.

¹⁷ შილებე თქვან გადაწყვეტილებეფიშ მშობლეფშა ენწყუმა თი დროს რდასჷ უმოს ძნელ, მუჟამსით თინეფ იეჰოვაშ მოწმეეფ ვა რენა. ართ ჯიმა ინდოეთშე, სანტოშ, იჩიებ: „ჩქინ მშობლეფს ოკოდეს, ჩქინ კამპანიას თაქიან რელიგიურ რიტუალეფ ჸოფედუკო. მა დო ჩქიმ საოსუროს ჭახანქ ქიდმესაჭირეს თიშო, ნამდა თინეფს ჩქინ გადაწყვეტილება გეუნწყითკო. მარა თიცალ მუდგარენეფს ქუდვაჸუნით, მუდგათ ბიბლიურ პრინციპეფ ვერღვიებუდ. მაგალთო, სუფრაშ მენიუ მუნეფს ოკოდესინ თეშ დოფთირეთ დო გეგნოპჭყვიდით, კამპანიას ბირა დო სხაპუა ვა ჸოფედუკო, მუშენდა თინეფ ვა რდესჷ თეცალ მუდგარენეფს მერჩქვანელ“.

18. მუ მიგეხვარებუნა, კამპანიაშ დღას ირფელქ ორგანიზებულო ქიჸუას? (1 კორ. 14:40; ქოძირით სურათ).

¹⁸ ირფელ ჯგირო დაგეგმით. თენა მიგეხვარებუნა, ნაკლებ ონერვიანებელქ გაშუან კამპანიაშ დღას (წეკითხით 1 კორინთელეფიშ 14:40). უეინ, ნამუთ ტაივანშე რე, იჩიებ: „კამპანიაშახ მუსხირენ დღათ ადრე გაკოფშაყარეთ არძა, მით თიმ დღას მიმეხვარებუდეს. ქიფჩით, მუ დო მუ მილამუდეს დო მუდგარენეფიშ რეპეტიცია ხოლო გემკობრთით, ნამდა თიმ დღას ირფელქ მოწესრიგებულო მიდართუკო“. თეწკუმა ართო, სტუმარეფიშ დაფასება იჸუაფ, ირფელ დაგეგმილ დროს ქიჸუაფუნ-და.

19. მუშ კეთება შეილებუნა, ნამდა ირფელქ თეშ მიდართას, მუჭოთ დაგეგმილ გაფუნა?

¹⁹ მუდგარენეფშე წინასწარ ქიფიქრენთ-და, ბრელ პრობლემა შილებე ეიჩილითუათ (იგავ. 22:3). მაგალთო, თიცალ ტერიტორიას ქოცხოვრენთ-და, სოდეთ კამპანიაშა დაუპატიჟებელ სტუმარეფს უჩქუნა მოულა, დეფიქრით, მუშ კეთება შეილებუნა, ნამდა თექ თქვან კამპანიას ხოლო ვა მოხვადას. დერწმუნით, ნამდა იეჰოვაშ მოწმე ვა რენან ფერ ნათესეეფს არჩქვენუნა, მუ სიტუაცია გაღვენუნა კამპანიას დო მუს ფიქრენთ კონკრეტულ ტრადიციეფშე დო წესეფშე. შეილებუნა თინეფს ვებსაიტშე jw.org ქუჯღონათ ვარდა ქაძირუათ სტატია: „მუნერ კამპანიას ორთუნა იეჰოვაშ მოწმეეფ?“ [ქორთ.]. თიშო, ნამდა სუფრას ირფელქ ჯგირო მიდართას, შილებე ართ მოწიფულ ჯიმა ქიგიორინუათ „სუფრაშ დუდკოჩო“ (იოან. 2:8). თის თქვან საკამპანიო გეგმეფიშ გურშენ კონკრეტულო ქეჩიებუთ-და, უმოსო შეიალებე თქვან მოხვარა, ნამდა ირფელქ იეჰოვაშ მოსაწონო დო თეშ მიდართას, მუჭოთ თქვა გოკონა.

20. მუ ოკო შუდან წყვილეფს მუნეფიშ კამპანიაშ გურშენ?

²⁰ შილებე ჭიჭეს ნერვიანენდათ, მუჟამსით ფიქრენთ თი ირფელშე, მუთ საკამპანიოთ გაფუნა მაფიქრებელ დო გინაჭყვიდირალ. მარა კამპანია ხვალე ართ დღაშ ამბე რე, არძაშ უმოს მნიშვნელოვან თინა რე, მუთ თე დღაშ უკულ იჭყაფ – წოხოლე გელუნა ჸოროფათ ეფშა ცხოვრება დო ართო გაგრძელენთ იეჰოვაშ მსახურებას. ათეშენ ირფელ გაკეთით, ნამდა თქვან კამპანია მოკრძალებურ დო იეჰოვაშ მოსაწონ რდასჷ. მიენდით იეჰოვას დო თიშ მოხვარათ აუცილებერო შეგალებენა თიცალ კამპანიაშ კეთება, ნამუთ მანგარ სასიამოვნო გაშინალ გაჸინა დო ონარღებელ მუთუნ ვადგოსქიდუნა (ფსალმ. 37:3, 4).