ქოთხით მოხვარა უხუცესეფს

1. მუ ოძირანს, ნამდა იეჰოვაშო მანგარ ძვირფას რე მუშ შხურ?

ᲘᲔᲰᲝᲕᲐᲡ მანგარო უჸორს მუშ არძა მსახურ დო დუდგინოდვალირ ჭყიშცალო გალუაფ მუშ თითოულ შხურს. თიქ მუშ სქუაშ ზისხირით გიშეჸიდ თინეფ დო კრებას უხუცესეფ ქიგურინუ, ნამდა მიკულუან თიშ ოჭყიშალს (საქ. 20:28). იეჰოვას იესო აფჷ გერინაფილ კრებაშ დუდო. თინეფს ჟირხოლოს ოკონა, ნამდა უხუცესეფქ ჸოროფათ იზრუნან შხურეფშა. უხუცესეფ ხოლო მეჸუნა იესოშ ხელმძღვანელობას დო ოხვარუნა ღორონთიშ მსახურეფს დო სულიერო თხილანა ღორონთიშ ხალხის (ეს. 32:1, 2).

2. განსაკუთრებულო მის აქციენს ყურადღებას იეჰოვა? (ეზეკ. 34:15, 16).

² იეჰოვა მუშ არძა შხურს აქციენს ყურადღებას, მარა განსაკუთრებულო თინეფს, მით სულიერო სუსტას რენა. თინა უხუცესეფიშ ხეთ ოხვარ თეცალეფს (წეკითხით ეზეკიელიშ 34:15, 16). მარა ღორონთის ოკო, არძაქ იფთხუათ მოხვარა, მუჟამსით თენა მოსაჭირუნა. თეცალ დროს იეჰოვაშა ლოცვათ მოხვარაშ თხუალაწკუმა ართო, საჭირო რე, ელარნა ქოფთხუათ კრებას გერინაფილ „ჭყიშეფს დო მასწავლებერეფს“ ხოლო (ეფეს. 4:11, 12).

3. მუშენ იჸუაფ ჯგირ ჩქინო თიშ გარჩიება, მუჭო ოხვარუნა უხუცესეფ იეჰოვაშ შხურეფს?

³ თე სტატიაშე ქიგებგენთ, მუჭო ირინუანს ღორონთ უხუცესეფს თინეფიშ მახვარებელო, მით სულიერო სუსტას რენა. ქუპასუხენთ თეცალ კითხვეფს: მუჟამ ოკო ფთხუათ უხუცესეფს მოხვარა? მუშენ ოკო მიფქცუათ თაშ დო მუჭო მიმეხვარებუნა თინეფ? თე მომენტის სულიერო მუთუნ ვა მიჭირდანინ ხოლო, თე საკითხეფიშ გარჩიება ქიმმეხვარებუნა, ხოლო უმოსო დუვაფასათ თინა, ნამდა იეჰოვა უხუცესეფიშ საშვალებათ მოხვარუნა. მის უჩქჷ, ეგება ართ დღასით ჩქი ხოლო ქიგვახვილათ თინეფიშ ელარნას დო თე ირფელიშ რჩქინაქ გვალო ირსხას ჩქინ სიცოცხლე.

ᲛᲣᲟᲐᲛ ᲝᲙᲝ ᲤᲗᲮᲣᲐᲗ ᲣᲮᲣᲪᲔᲡᲔᲤᲡ ᲛᲝᲮᲕᲐᲠᲐ?

4. მუშენ შემლებუნა ფთქუათ, ნამდა იაკობიშ 5:14–16, 19, 20-ის სულიერო დალახებაშენ მეურს ჩიება? (ქოძირით სურათეფ).

⁴ იაკობ ენწყუნს, მუჭო ირინუანს იეჰოვა უხუცესეფს, მუჟამსით სულიერ მოხვარა მოსაჭირუნა. თინა იჩიებ: „დალახებურ რენო თქვანდე მითინ? ქიჭანუას კრებაშ უხუცესეფ“ (წეკითხით იაკობიშ 5:14–16, 19, 20). თე მუხლიშ კონტექსტშე იძირე, ნამდა თაქ სულიერ დალახებაშე მეურს ჩიება. მუშენ იფჩიებუთ თეს? მაგალთო, ართ თიშენ, ნამდა იაკობ დალახებურს ელუჩანს, ექიმ ვარინ, უხუცესეფ ქიმიხვარუას. თეწკუმა ართო, თინა ენწყუნს, ნამდა კოჩ თიმწკუმა დოსქიდუ თე ლახალაშე, მუჟამსით ცოდეფ ეპატიებ. მუდგარენ გაგებათ სულიერო დალახებაშ დროს ხოლო იგივე მუდგარენეფ მაფუნა ოკეთებელ, მუდგას ფიზიკურო დალახებაშ დროს ვორთუთ. მაგალთო, მუჟამსით გლახათ ვორეთ, ექიმშა მეურთ, ეუნწყუნთ ჩქინ სიმპტომეფს დო უკულ მეპჸუნთ თიშ დანიშნულებას. თეშნერო, სულიერო დალახებაშ დროს ხოლო, ოკო ქიმებრთათ უხუცესეფშა, გეუნწყათ ჩქინ სიტუაცია დო უკულ ქიმვაჸუნათ თი ბიბლიურ რჩევეფს, ნამდგას თინეფ მუჩანა.

5. მუჭო იფჩინათ, ნამდა სულიერო დალახებას იპჭყანთ?

⁵ იაკობიშ მა-5 დუდ ელამჩანა, ქიმიფხვარუათ უხუცესეფ, მუჟამსით ვორწყეთ, ნამდა იეჰოვაწკუმა ჩქინ ურთიერთობა ჭიე-ჭიეთ გილალუაფას იჭყანს. იმწკუმა დეფიქრით, მუნერ მნიშვნელოვან ქოჸოფე თიმწკუმა მიბღათ ჯიმალეფშე მოხვარა, მუჟამსით სერიოზულ საფრთხეს ვორწყეთ, ონდო გვალო მივოდინუანდათ იეჰოვაწკუმა მეგობრობას. თეშო საჭირო რე, გოუტირხათ ჩქინ დუდის, მუშენდა, მუჭოთ ბიბლია მაფრთხილენა, მინშა შილებე დუდ დებღორათ დო იფიფქრათ, ნამდა სულიერო მუთუნ ვამჭირა (იაკ. 1:22). ზუსტას თექ აღოლ ნამთინეს პირველ საუკუნეს სარდისიშ კრებას. ათეშენ იესოქ გაფრთხილ თინეფ დო უწუ, ნამდა ღორონთიშ გურ დინაფილ აფუდეს (გამოცხ. 3:1, 2). მუჭო ოკო გებგათ, სულიერო ჯგირო ქუვორეთ დო ვარ? ართ-ართ საშვალება რე, ართიანს ქეშუდარათ, მუნერ მონდომა მიღუდეს ღორონთიშ მსახურებას თეიშახ დო მუნერ მიღუნა ასე (გამოცხ. 2:4, 5). მაგალთო, შემლებუნა დეფიფქრათ: ჯვეშობურო ქუმოსიამოვნუნო ბიბლიაშ კითხირ დო ნაკითხირშე ფიქრ? ქივემზადებუქო კრებაშ შეხვალამეფშო დო ირიათო ქუვოსწრუქო? ჯვეშობურ მონდომა ქომღუნო ქადაგებაშ საქმეს? უმოსო დროშ ტარებაშე დო ფარაშ შიბაშე ხომ ვა ფიფქრენქ დო უმოს მეტ დროს თე საქმეეფს ხომ ვა უთმენქ? თე კითხვეფშე ნამდგაინიშ პასუხ ქოია ქორენ-და, თენა შილებე თიშ მაძირაფალ რდასჷ, ნამდა მუდგარენშა დროულო რე მიკაჯინალ, ვარა შილებე გლახაშა გიშელას. თე ამბეს ჩქინით ვა ვორუთინ ქუვორწყეთ ვარდა ხოლო ღორონთიშ ნორმეფშე უკვე გინორთელ პჸოფნან ქობძირით-და, უხუცესეფს ოკო ქოფთხუათ მოხვარა.

6. მუ ოკო აკეთას პიროვნებაქ, მიდგაქ სერიოზულო დაშუ?

⁶ მუშო ოკო რაგად, მუჟამსით პიროვნება თიცალ მუდგარენს აშენს, მუდგაშ გურშენ შილებე კრებაქ აჸუას დატებელქ, თიქ უხუცესეფს ოკო ქუდურაგადუას (1 კორ. 5:11–13). თეცალ პიროვნებას აუცილებერო ოსაჭირ მოხვარა იეჰოვაწკუმა ურთიერთობაშ დართინაფალო. გიშაჸიდირალიშ ჭყოლოფათ იეჰოვაქ თის ქაპატუასინ, საჭირო რე, საქმეთ დამტკიცას, ნამდა ნარღენს დაშებულს (საქ. 26:20). თე საქმეეფშა უხუცესეფშა მეულა დო მუშ ცოდაშ აღიარება ხოლო მიშურს.

7. ხოლო მის ოსაჭირ უხუცესეფიშ მოხვარა?

⁷ უხუცესეფ ხვალე სერიოზულო დაშუნ თინეფს ვარინ, სულიერო მოსუსტებულეფს ხოლო ოხვარუნა (საქ. 20:35). მაგალთო, შილებე გინაფლენდათ, ნამდა გიჭირა არასწორ სურვილეფწკუმა ბრძოლა. შილებე თე ბრძოლა თქვანო ხოლო უმოს ძნელ რდასჷ, ჭეშმარიტებაშ გაგებაშახ ნარკოტიკეფს ქოღებულენდით, პორნოგრაფიას ქუჯინედით ვარდა უზნეოთ ქოცხოვრენდით-და. მარა ვეფიქრათ, ნამდა ხვალე რეთჷ; შეილებუნა უხუცესეფ ქიმიხვარუათ. თინეფ ქუმოირჩქილუანა, პრაქტიკულ რჩევეფს ქიმერჩანა დო ქუგოძირანა, მუჭო გაუხარენთ გურს იეჰოვას არასწორ სურვილეფიშ გარზებათ (ეკლ. 4:12). მინშა შილებე დუდ გლახათ იგინათ თიშ გურშენ, ნამდა გლახა სურვილეფ ვა გოთხუნა. თე დროს უხუცესეფ ქუგგოშინანა, ნამდა თენა შილებე ჯგირ მუდგარენიშ ნიშან ხოლო რდასჷ – თიშ, ნამდა სერიოზულო უჯინეთ იეჰოვაწკუმა თქვან ურთიერთობას დო თქვან დუდშა ნაბეტან იმენდ ვაიღუნა (1 კორ. 10:12).

8. ნამ შემთხვევეფს ვა რე აუცილებერ უხუცესეფშა მეულა?

⁸ ოკო მარჩქილედან თინა ხოლო, ნამდა აუცილებერ ვა რე, ირფელშე უხუცესეფშა მებრთათ. მაგალთო, შილებე ნამდგაინ დას ვარდა ჯიმას გურ ქელაჭვეთ თქვან სიტყვეფით ვარდა მანგარო მოირთეს გურქ თიშე. თეცალ დროს უხუცესეფშა მეულაშ მანგიორო, ქიმიაჸუნით იესოშ რჩევას დო ქუდურაგადეთ თანაქრისტიანს, ნამდა მშვიდობა დირთინუათ თიწკუმა (მათ. 5:23, 24). ჯგირ იჸუაფ, გეგმირკვიათ ჩქინ პუბლიკაციეფს ლიბ ხასიათიშ, მოთვინებაშ დო დუდშეკებაშ გურშენ მოჩამილ ინფორმაცია, ნამდა უკულიანშო უჯგუშო შეგალებუან თე თვისებეფიშ გიმორჩქინაქ. მუშო ოკო რაგად, თანაქრისტიანწკუმა პრობლემაქ იშენით ვამგაგვარებუეს-და, შეილებუნა უხუცესეფს ქოთხუათ მოხვარა. ფილიპელეფშა მეჭარილ წერილს პავლექ ართ ჯიმას, ნამდგაშ სახელ ვა მიჩქუნა, თხუ, ევოდია დო სინტიქეს ქიმეხვარუკო მუნეფიშ უთანხმოებაშ მოგვარებას. თეშნერო, თქვან კრებაშ უხუცესის ხოლო შეულებ ქიმგეხვარან თანაქრისტიანწკუმა პრობლემაშ მოგვარებას (ფილ. 4:2, 3).

ᲛᲣᲨᲔᲜ ᲝᲙᲝ ᲤᲗᲮᲣᲐᲗ ᲛᲝᲮᲕᲐᲠᲐ ᲣᲮᲣᲪᲔᲡᲔᲤᲡ?

9. მუშენ ოკო ვემეცილან ონჯღორექ, მოხვარა ქოფთხუათ უხუცესეფს? (იგავ. 28:13).

⁹ რწმენა დო გაბედულება მოსაჭირუნა, ნამდა უხუცესეფშა ქიმებრთათ დო მოხვარა ქოფთხუათ, მუჟამსით სერიოზულო მაფუნა დაშებულ ვარდა ხოლო ვორწყეთ, ნამდა მიჭირა არასწორ სურვილეფწკუმა ბრძოლა. შილებე უხუცესეფწკუმა ჩქინ პრობლემაშენ ჩიებაშა ონჯღორე მიჩქუდან, მარა თექ ოკო ვემეცილან თეშ კეთებას. მუშენ რე თენა მანგარ მნიშვნელოვან? იეჰოვას უხუცესეფ თიშო აფჷ გერინაფილ, ნამდა ქიმმეხვარან თიწკუმა ხოლოშიან ურთიერთობა ვა ვოდინუათ. ათეშენ, მუჟამსით თინეფს მოხვარას ფთხინთჷ, ვოძირანთ, ნამდა ვონდუთ დო ვომორჩილუთ ზეციერ მუმას (ფსალმ. 94:18). სერიოზულო მაფუდან დაშებულინ ხოლო, ჩქინ მოჭყოლოფე ღორონთ მაპატიენა, მუჟამსით უხუცესეფწკუმა ვაღიარენთ ჩქინ ცოდას დო გეგშეფსწორებუთ (წეკითხით იგავეფიშ 28:13).

10. მუქ შილებე მოხვადას, ცოდეფს ქოფუბლუნთ-და?

¹⁰ მუჭოთ ბძირით, უხუცესეფწკუმა ჩქინ ცოდას ქუვაღიარენთ-და, იეჰოვა მაპატიენა დო ჯგირ ურთიერთობას დიბრთინუანთ თიწკუმა. მარა თინეფს ჩქინ საქციელს დოუფულუნთ-და, თეთ ხოლო უმოს უფრაშ მდგომარეობაშა ქენიპჸოთანთ დუდის. მაგალთო, მეფე დავით მუდგარენ პერიოდის ფულუნდჷ მუშ ცოდეფს, მუდგაშ გურშენ სულიერო, ემოციურო დო ფიზიკურო გლახა მდგომარეობას რდჷ (ფსალმ. 32:3–5). ფიზიკურ ლახალაცალო ვარდა ტრავმაცალო სულიერ პრობლემეფს ხოლო დროულო ვემკვოჯინით-და, შილებე უმოს გლახა შედეგეფშა ქიმემიჸუნან. იეჰოვას ჯგირო არჩქილე თენა, ათეშენ მირაგადუნა, „მუვაგვარათ საქმეეფ“ თიწკუმა დო ქიმიფხვარუათ თინეფ, მით თეშო აფჷ გერინაფილ (ეს. 1:5, 6, 18).

11. მუჭო შილებე იმოქმედას შხვეფშა, სერიოზულ ცოდეფს ქოფუბლუნთ-და?

¹¹ სერიოზულ ცოდეფიშ ფულუათ ხვალე ჩქინ დუდის ვარინ, შხვეფს ხოლო ვოცილუთ. თეთ შილებე კრებაშ მშვიდობას დო თიშა წმინდა შურიშ მოქმედებას ვეცილათ (ეფეს. 4:30). მუჟამსით ბგებულენთ, ნამდა შხვაქ დაშუ სერიოზულო, ოკო ვა ფუბლათ თიშ საქციელ, მუშენდა თეთ თიშ ცოდაშ მონაწილეთ გინიბრთუთ (ლევ. 5:1). თაშ ნამდა, ოკო ელუჩათ თის, უხუცესეფს ქუდურაგადუას თე საკითხიშ გურშენ. დასაბაღ დროშ მეჩამაშ უკულ თინა თაშ ვექციებუნ-და, იეჰოვაშ ჸოროფაქ დო ართგურობაქ ოკო გინმოჭყვიდირაფუან, ქიმებრთათ ჯიმალეფშა დო ქივეჩუათ თიშ საქციელიშ გურშენ.

ᲛᲣᲡ ᲝᲠᲗᲣᲜᲐ ᲣᲮᲣᲪᲔᲡᲔᲤ ᲩᲥᲘᲜ ᲛᲐᲮᲕᲐᲠᲔᲑᲔᲚᲝ?

12. მუჭო ოხვარუნა უხუცესეფ თინეფს, მით სულიერო სუსტას რენა?

¹² ბიბლია უხუცესეფს ელუჩანს, ქიმეხვარან თინეფს, მით სულიერო სუსტეფ რენა (1 თეს. 5:14). თაშ ნამდა, შეცოდით-და, თქვანწკუმა დორაგადაფაშ დროს უხუცესეფ ქუდაისვენა კითხვეფს, ნამდა ქინანჭან, მუს ფიქრენთ დო მუს გინაფლენთ (იგავ. 20:5). თინეფს ხეს ქეშუნწყუნთ, მუჟამსით ალალას ქეჩიებუთ, გოკონ-და თენა მანგარ ძნელ გაფუდან თქვან კულტურაშ, ხასიათიშ ვარდა თიშ გურშენ, ნამდა ონჯღორე გიჩქუნა თქვან პრობლემაშ გურშენ ჩიებაშა. ვა გაშქურინან თიშა, ნამდა მუდგაინქ არასწორქ ვაიოლან (იობ. 6:3). უხუცესეფ ხეთეშე ვეგშეღანა დასკვნეფს. რჩევეფიშ მოჩამაშახ, თინეფ შურ დო გურით ქუმოირჩქილუანა დო მთლიან სურათის ქოძირუნა (იგავ. 18:13). უხუცესეფს თინა ხოლო არჩქილენა, ნამდა სულიერო დალახებურ ქრისტიანიშ სქილიდაფას დრო ოსაჭირ. ათეშენ, თინეფ ველუნა, ნამდა ართ ჩიება დასაბაღ იჸი თქვან მახვარებელო.

13. მუჭო მოხვარუნა უხუცესეფ ლოცვეფიშ დო ბიბლიაშა გერსხილ რჩევეფიშ საშვალებათ? (ქოძირით სურათეფ).

¹³ მუჟამსით უხუცესეფს მოხვარას ქოთხინთ, თინეფ მუთუნით ვეცადებუნა, ხოლო უმოს გლახათ ქუგოგინაფუან დუდ თქვან საქციელიშ გურშენ. თეშ მანგიორო, თინეფ ქილოცენა თქვანო. კინ თქვა გაიკვირდუნა, მუჭო მიგეხვარებუნა თინეფიშ ლოცვეფ, ნამდგას „დიდ ძალა უღჷ“. იეჰოვა ქუპასუხენს თინეფიშ ლოცვეფს, ძალეფით ეგოფშანა დო გურშა ეიქექუანა. შხვა ირფელწკუმა ართო, უხუცესეფ „ზეთის ხოლო გიობუნა დალახებურეფს იეჰოვაშ სახელით“ (იაკ. 5:14–16). თე „ზეთ“ რე ღორონთიშ სიტყვას ინოჭარილ ჭეშმარიტება. უხუცესეფ თქვანწკუმა გარჩიენა თიცალ ბიბლიურ მუხლეფს, ნამუთ გურშა ეიქექუანა დო თქვან გურს მალამოცალო ქიმნადვალუ. თენა ქიმგეხვარებუნა იეჰოვაწკუმა ურთიერთობა დირთინუათ (ეს. 57:18). ბიბლიაშა გერსხილ თინეფიშ რჩევეფ ქიმერჩანა ძალას, გაკეთათ თინა, მუდგას იეჰოვა თხულენს თქვანდე. უხუცესეფიშ მოხვარაშ საშვალებათ, თაშ ქოფთქუათინ, იეჰოვაშ ხონარ ელგარჩქილენა, ნამუთ გირაგადუნა: „თენა რე შარა, გიაჸუნ თის!“ (ეს. 30:21).

14. მუჭო ოხვარუნა უხუცესეფ თინეფს, მით „სწორ ვა რენ ფერ ნაბიჯის“ გინმოდგუნა? (გალ. 6:1; ქოძირით სურათეფ).

¹⁴ წეკითხით გალატელეფიშ 6:1. მუჟამსით ქრისტიან „სწორ ვა რენ ფერ ნაბიჯის“ გინმოდგუნს, თიცალ მუდგარენს ორთჷ, მუდგას ღორონთ ვეწონუანს. შილებე თიქ მუდგარენ საკითხის არასწორ გადაწყვეტილება მიღჷ ვარდა სერიოზულო შეცოდ. რახანს უხუცესეფს მანგარო უჸორა, გემუანო ქიმუდირთუნა თის, ნამდა სწორ შარას ქიგიორინუან. ბერძნულ სიტყვა, ნამუთ თარგმნილ რე, მუჭოთ „სწორ შარას გერინაფა“, შილებე ეჭარუნდას ტახილ ძვალიშ მეხუნაფას ხოლო, ნამდა თიქ არასწორო ვემიარდას. მუჭოთ ჯგირ ექიმ ირნერო ოცად, მანგარო ვაწყუნასინ თეშ ქიმუხუნუას ნატახა ძვალ პაციენტის, თეშ უხუცესეფ ხოლო ირნერო ოცადუნა, ჭუაშა ჭუა ვეგემძინანინ თეშ გეგშამიჸუნან სულიერ ლახალაშე. თინეფს თეცალ მითითება ხოლო უღუნა, ნამდა მუნეფიშ დუდის ხოლო ქიდეკვირან. მუჟამსით უხუცესეფ ოცადუნა, სწორ შარაშა დუმორთინუან, თის ხოლო ვეჭყოლიდუანა, ნამდა ჩქინცალო მუნეფ ხოლო არასრულყოფილეფ რენა დო მინშა ჩირთუნა. ათეშენ, თინეფ ვა ფიქრენა, ნამდა თი პიროვნებაშე უჯგუშეფ დო მართალეფ რენა, მიდგას ოხვარუნა. თეშ მანგიორო, ირნერო ოცადუნა, თანდაბალეფ რდანჷ დო გემშართან თიშ მდგომარეობაშა (1 პეტ. 3:8).

15. მუშ კეთება შემლებუნა, პრობლემა ქომღუნან-და?

¹⁵ ჩქი შემლებუნა, ბოლოშა ვონდუდათ უხუცესეფს. თინეფს ოგურუანა, ნამდა ჩქინ პირად საკითხეფ კონფიდენციალურო დოჩუან, რჩევეფ ბიბლიაშა გიორსხუან დო ვართ ხოლო მუნეფიშ აზრეფშა დო ირიათო მიმეხვარან ჩქინ ოღალიშ ღალას (იგავ. 11:13; გალ. 6:2). მართალ რე, არძას შხვადოშხვანერ ხასიათ დო გამოცდილება უღჷ, მარა შემლებუნა ნებისმიერ უხუცესწკუმა თავისფალო იბგინათ დუდ დო ქივეჩუათ ჩქინ პრობლემაშ გურშენ. მარა, მუშო ოკო რაგად, ოკო მარჩქილედან, ნამდა ვეჸუაფუდ სწორ, თეიშახ მუკვაჸუნათ უხუცესეფს დო რჩევა პკითხათ, ონდო ნამდგაინ ჩქი მონწყუნან ფერს ვამწინა. თეს გუვაკეთენთ-და, თი ადამიანეფცალო მოქციება გიშმალენა, მიდგას ბიბლიას ინოჭარილ „სიმართლეშ სიტყვეფიშ“ მორჩქილაფაშა თინა უსხუნუნა, „მუდგაშ მორჩქილაფა მუნეფს ოკონა“ (2 ტიმ. 4:3). მუჟამსით ნამდგაინ უხუცესის ჩქინ პრობლემაშ გურშენ დოურაგადუანთ, შილებე თიქ ქოპკითხან, უკვე ხომ ვამჩიებინუნა შხვა უხუცესეფწკუმა თე საკითხიშ გურშენ, დო დეინტერესას, მუ ელამჩეს თინეფქ. შილებე თინა ხოლო, ნამდა მოკრძალებაქ გინაჭყვიდირაფუას თე ჯიმას, შხვა უხუცესის ქელაკითხუას რჩევა (იგავ. 13:10).

ᲗᲘᲗᲝᲣᲚᲡ ᲛᲘᲦᲣᲜᲐ ᲩᲥᲘᲜ ᲞᲐᲡᲣᲮᲘᲨᲛᲒᲔᲑᲚᲝᲑᲐ

16. მუ პასუხიშმგებლობა მიღუნა არძას?

¹⁶ მართალ რე, უხუცესეფ გერინაფილ რენა, ნამდა ქიმკაჯინან ღორონთიშ შხურს, მარა თინეფ ვამკარნახენა, მუ ფქიმინათ დო მუ – ვარ. ოკო ვაგმოჭყორდან, ნამდა თითოულს მიღუნა პასუხიშმგებლობა, დაუმტკიცათ იეჰოვას, თიშ ართგურეფ ვორეთინ. არძას ჩქინ სიტყვეფიშ დო საქმეეფიშ გურშენ მიმეთხიებუნა პასუხ. იეჰოვა აუცილებერო ქიმმეხვარებუნა, ცხოვრებას თიცალ გადაწყვეტილებეფ მიბღათ, ნამდა თიშ ართგურეფქ ქუდოფსქიდათ (რომ. 14:12). თაშ ნამდა, მუ ფქიმინათინ თიშ რაგადიშ მანგიორო, უხუცესეფ ღორონთიშ სიტყვაშე ქუმოძირანა, მუჭო უჯინე იეჰოვა შხვადოშხვა საკითხის. ბიბლიაშა გერსხილ რჩევეფიშ მეჸუნა ქიმმეხვარებუნა, გებვითარათ ინონჭაფაშ უნარ, ნამდა შემლებუდან ჭკვერულ გადაწყვეტილებეფიშ მეღება (ებრ. 5:14).

17. მუშ კეთებას ოკო ვემეცილან მუთუნქ?

¹⁷ მართალო მუშმადიდა პატი რე, ნამდა იეჰოვაშ ოჭყიშალს ვოკათუთ. თიქ ქუმაშქვჷ იესო, „ჯგირ ჭყიშ“, ნამდა გიშაჸიდირალ გეგნიგუკო დო ულიებ სიცოცხლეშ მეღებაქ ქეშმალებუესკო (იოან. 10:11). იეჰოვას კრებას უხუცესეფ ხოლო აფჷ გერინაფილ, მუდგათ ასრულენს მუშ სიტყვას: „ქიგეირინუანთ ჩქიმ მოსაწონ ჭყიშეფს დო თინეფ გურშა ქინოიდვანა რჩქინას დო ინონჭაფაშ უნარს“ (იერ. 3:15). თაშ ნამდა, მუჟამსით სულიერო სუსტას ბგინაფლენთ დუდის, მუთუნ ოკო ვეფცილუათ, ნამდა ქიმიფხვარუათ უხუცესეფ. თაშ ქიმიფქციებუთ-და, ჩქინ დუდშა გეგმოფცადუნთ, მუჭო ირინუანს იეჰოვა თინეფს ჩქინ მახვარებელო.