მუჭო ოკო ვებრძოლათ უსამართლობას?

1, 2. მუჭო ობრძოლ ამდღა ბრელ უსამართლობას დო ჩქი მუშე შილებე მაფიქრუაფუდან?

ᲩᲥᲘ უსამართლო მსოფლიოს მიხვადუნა ცხოვრება. ადამიანეფს უსამართლოთ ოქცუნა შხვადოშხვა მიზეზიშ გურშენ. მაგალთო, ეკონომიკურ მდგომარეობაშ, სქესიშ, ეროვნებაშ ვარდა რასაშ გურშენ. ნამთინე ხოლო იჩაგრებ ჰარამ ბიზნესმენეფიშ დო კორუმპირებულ სახელმწიფო მოხელეეფიშ გურშენ, მით ხვალე მუნეფიშ ჯიბეშ გოფშაფაშე ფიქრენა. მინშა თეცალ ვარდა შხვანერ უსამართლობას პირადო ჩქი შეფხვადუთ ვარდა ხოლო ჩქინ ხოლოშიანეფ.

² ვა რე გასაკვირ, ნამდა ხალხის კისერშა აფჷ ეკულირ თეზმა უსამართლობა. მუშო ოკო რაგად, არძას მოკონა, იფცხოვრათ მშვიდობიან დო სამართლიან მსოფლიოს. ათეშენ, ბრელ ოცად, დოთირუას თე გლახა მდგომარეობა. თე მიზანს ქიმიოჭირინუანინ თიშენ თინეფ გიშულა აქციეფშა ვარდა თიცალ პოლიტიკოსის ალურენა, მით იმენდის არზენს, ნამდა უსამართლობაშ წინააღმდეგ იბრძოლენს. თინეფიშ გინაწონს, ჩქი ბიბლიაშე მიჩქუნა, ნამდა ოკო ვა ვორდათ „თე ქიანაშ ნაწილ“ დო ღორონთიშ სამეფოს ქუჯინათ, ნამუთ ირნერ უსამართლობას მოსპუნს (იოან. 17:16). მარა მინშა იშენით შილებე გურს პჭუნდან ვარდა გვალო მაღიზიანენდან უსამართლობა, ნამდგას ვორწყეთ. შილებე ფიფქრენდათ: მუჭო ვებრძოლა უსამართლობას? მართალ რე, მიჩქჷ, მომავალს მისპუნ, მარა ამდღა მუშ კეთება შემლებ თიშ წინააღმდეგ? თე კითხვეფს ქუპასუხათინ, მორთ დიო თიშე ქიფჩუათ, მუს ფიქრენა იეჰოვა დო იესო უსამართლობაშენ.

ᲘᲔᲰᲝᲕᲐᲡ ᲓᲝ ᲘᲔᲡᲝᲡ ᲕᲐᲫᲘᲠᲣᲐᲤᲣᲜᲐ ᲣᲡᲐᲛᲐᲠᲗᲚᲝᲑᲐ

3. მუშენ ვა რე გასაკვირ, ნამდა უსამართლობა მაღიზიანენა? (ეს. 5:7).

³ ბიბლია ენწყუნს, მუშენ მაწუხენა თეშმანწარას უსამართლობა. მუჭოთ ღორონთიშ სიტყვაშე ბგებულენთ, იეჰოვაქ მუშ ამნახანტო გუმოჭყეს დო თინა „სიმართლეშ დო სამართლიანობაშ მოჸოროფე რე“ (ფსალმ. 33:5; დაბ. 1:26). ღორონთ დღას ვექციებ უსამართლოთ დო თინა ხოლო მანგარო ვაკო, ნამდა შხვეფ იქციებუდან თეშნერო (კან. 32:3, 4; მიქ. 6:8; ზაქ. 7:9). მაგალთო, წინასწარმეტყველ ესაიაშ დროს იეჰოვაქ ისრაელს ქიმირჩქილუ „გაჭირებულეფიშ თვალუა“, მიდგას შხვა ისრაელეფ აჩაგრენდეს (წეკითხით ესაიაშ 5:7). იეჰოვაქ ქიგნადირთჷ დაჩაგრებულ ხალხის დო დასაჯ თინეფ, მით გინურთანდჷ კანონს დო უსამართლოთ ოქცუდ შხვეფს (ეს. 5:5, 13).

4. მუ რეაქცია უღუდ ართშა იესოს უსამართლობაშ ძირაფაშენ? (ქოძირით სურათ).

⁴ იეჰოვაცალო, იესოს ხოლო უჸორს სამართლიანობა დო ჯოგჷ უსამართლობა. ართშა, მუჟამსით იესოქ ხეგოხუმაფილ კოჩ ქოძირ, მანგარო ეცოდ დო დასქილიდუ, მარა უგურე რელიგიურ ლიდერეფს ვემეწონეს თექ. თინეფს გვალო ჭიჭეს აწუხენდეს, ნამდა თე კოჩიქ დოსქიდ დო შურქ მადგჷ. თინეფს უმოსო თინა უჭირდეს, ნამდა იესოქ საბატონიშ კანონიშ მუნეფიშობრა ენწყუმას ვემიაჸუნ. მუჭო იმოქმედ იესოშა თინეფიშ საქციელქ? მუჭოთ ბიბლიაშე ბგებულენთ, თინეფიშ უგურობაშ ძირაფაქ იესო მანგარო შეაწუხ (მარ. 3:1–6).

5. მუშენ ოკო ვა დოფსქიდათ გურმულირქ, მუჟამსით უსამართლობას ვორწყეთ?

⁵ მუჭოთ ბძირით, ქოთ იეჰოვას დო ქოთ იესოს გურ მალენა, მუჟამსით უსამართლობას ორწყენა, დო მუთუნ გასაკვირ ვა რე, ჩქი ხოლო თაშ ბგინაფლენდათ დუდის (ეფეს. 4:26). მარა, ოკო ფშუდან, ნამდა გურიშმოულას, გოკონ-და სამართლიანო, ვეგშანწყუე სიტუაცია. სინამდვილეს, გურიშმოულაშ დროს დუდიქ ვა მაჭოფეს ვარდა თიქ ბრელ ხანს ვაჩმათხინუეს-და, შილებე ემოციურო ვარდა ფიზიკურო ქიდებლახათ (ფსალმ. 37:1, 8; იაკ. 1:20). იმწკუმა, მუშ კეთება შემლებუნა უსამართლობაშ წინააღმდეგ? მორთით იესოშ მაგალით გუვარჩუათ.

ᲛᲣᲡ ᲝᲠᲗᲣᲓ ᲘᲔᲡᲝ, ᲛᲣᲟᲐᲛᲡᲘᲗ ᲣᲡᲐᲛᲐᲠᲗᲚᲝᲑᲐᲡ ᲝᲠᲬᲧᲔᲓ?

6. მუ დო მუ უსამართლობას ორწყედ იესო? (ქოძირით სურათ).

⁶ იესოს დედამიწას ცხოვრებაშ დროს ქიანაშ უსამართლობაშ ძირაფა უხვადუდ. თინა ორწყედ, ნამდა იუდეველ რელიგიურ ლიდერეფს უბრალო ხალხშა შურ აფუდეს გიშაღალირ მუნეფიშ წესეფით (მათ. 23:2–4). თეწკუმა ართო, იესოს უჩქუდ, ნამდა რომაელ მმართველეფ ხოლო აჩაგრენდეს ხალხის, ათეშენ ბრელ იუდეველს შურ ოლუდ რომიშ ხეშე დუდიშ დარსხებაშა. რომაელეფიშ წინააღმდეგ ოჩხუპებელო სპეციალურ დაჯგუფებეფ ხოლო რდჷ ჩამოყალიბებურ. ართ-ართ თეცალ რდჷ ზელოტეფიშ დაჯგუფება. მარა იესო ვართ დუდენდჷ დო ვართ ელურდჷ მთავრობაშ წინააღმდეგ ბრძოლას. ართშა, მუჟამსით თიქ ქიგეგ, ნამდა ხალხის თიშ გამეფება ოკოდ, იესოქ ქიდიტუ თექიანობა (იოან. 6:15).

7, 8. მუშენ ვაცადუდ იესო უსამართლობაშ მოსპუალას დედამიწას რდუნ თიმწკუმა? (იოან. 18:36).

⁷ დედამიწას ცხოვრებაშ დროს იესო ვემშეშ პოლიტიკაშა, ნამდა უსამართლობა მოსპუკო. მუშენ ვართუდ თეს? მუშენდა ჯგირო უჩქუდ, ნამდა ადამიანეფს ვართ უფლება უღუნა დო ვართ შეულებუნა მუნეფიშ დუდიშ ხელმძღვანელობა (ფსალმ. 146:3; იერ. 10:23). ადამიანეფს მუნეფიშით ვართ უსამართლობაშ მიზეზეფ, არასრულყოფილება დო სატანა, მასპენა. თე ქიანას უდუნდებელ სულიერ ქმნილება, სატანა, მართუნს, ნამუთ ირნერო ხეს უნწყუნს უსამართლობას (იოან. 8:44; ეფეს. 2:2). თეს არასრულყოფილება ხოლო გიაძინუ, მუთ მინშა ჯგირ ადამიანეფს ხოლო ვარზენს საშვალებას, სამართლიანო მიქცუან (ეკლ. 7:20).

⁸ იესოს უჩქუდ, ნამდა ხვალე ღორონთიშ სამეფოს შეულებ ბოლოშა მოსპას უსამართლობა დო თიშ მიზეზეფ. ათეშენ, თინა მუშ დროს დო ენერგიას ვა ზოგენდჷ – გილეშ, ქადაგენდჷ დო ხალხის „სახიოლო ამბეს გინოჩანდ ღორონთიშ სამეფოშ გურშენ“ (ლუკ. 8:1). თინა იმენდის არზენდჷ „სიმართლეს მოშქირენაფილეფს დო მოჸუმენაფილეფს“, ნამდა უსამართლობა დო უბადობა სადღამუშოთ მისპუდ (მათ. 5:6; ლუკ. 18:7, 8). ოღონც თეს ადამიანურ მთავრობეფ ვარინ, ღორონთიშ ზეციურ მთავრობა გაკეთენს, ნამუთ „თე ქიანაშ ნაწილ ვა რე“ (წეკითხით იოანეშ 18:36).

ᲘᲔᲡᲝᲪᲐᲚᲝ ᲛᲘᲥᲪᲘᲗ, ᲛᲣᲟᲐᲛᲡᲘᲗ ᲣᲡᲐᲛᲐᲠᲗᲚᲝᲑᲐᲡ ᲝᲠᲬᲧᲔᲗ

9. მუ გარწმუნენა, ნამდა ღორონთიშ სამეფო მოსპუნს ირნერ უსამართლობას?

⁹ რახანს „ბოლო დღალეფს“ ფცხოვრენთ, ამდღა ჩქი ბრელით უმოს დიდ უსამართლობაშ ძირაფა მიხვადუნა, ვინემ დედამიწაშ ცხოვრებაშ დროს იესო ორწყედ. მარა თე უსამართლობაშ მიზეზ ამდღა ხოლო სატანა ეშმაკ დო თიშ ხეს რენან ფერ არასრულყოფილ ადამიანეფ რენა (2 ტიმ. 3:1–5, 13; გამოცხ. 12:12). იესოცალო, ჩქი ხოლო ბჯერა, ნამდა ხვალე ღორონთიშ სამეფო მოსპუნს უსამართლობაშ არძა მიზეზის. რახანს ჩქი ღორონთიშ სამეფოს უკინენთ ხუჯის, ვართ ვობრძოლუთ დო ვართ ელურეთ ნამთინ მთავრობას უსამართლობაშ მასპალო. გუვარჩუათ ართ დაშ, სტეისიშ,a შემთხვევა. ჭეშმარიტებაშ გაგებაშახ, თინა ირიათო გილეშ აქციეფშა, ნამუთ უსამართლობაწკუმა ობრძოლებერო ინწყუაფუდ. მარა დროშ ულაწკუმა ართო ეჭვიქ გურჩქინდჷ, დასურო ქახვარუდ დო ვარ ხალხის მუთუნს თი ირფელ, მუდგას მუ ორთუდ. თინა იჩიებ: „მინშა, მუჟამსით აქციას წუმვორდჷ, ფიფქრენდჷ, დასურო თექ ქიგვორექო-მაქ, სოდეთ ოკო გივორდე. ასე, მუჟამსით ღორონთიშ სამეფოს ალურექ, ზუსტას მიჩქჷ, ნამდა სწორ მხარეს გივორექ. ბჯერსჷ, იეჰოვა ჩქიმდე ბრელით უჯგუშო ქებრძოლებ უბადობას“ (ფსალმ. 72:1, 4).

10. მუშენ შემლებუნა ფთქუათ, ნამდა თი ირფელ, მუდგას სოციალურ მოძრაობეფ ორთუნა, ვემურე მათეშ 5:43–48-ს მოჩამილ იესოშ ნარაგადის? (ქოძირით სურათ).

¹⁰ ბრელ თიცალ სოციალურ მოძრაობეფს აკათუ, ნამდგაშ წევრეფ უმენტაშო თიცალ გაჟღამებულეფ რენა, ნამდა ვამორჩილუნა კანონს დო შხვეფს ხოლო ოცილუნა. თეცალ საქციელ ვემურე თის, მუდგას იესო ოგურუანდჷ (ეფეს. 4:31). ართ ჯიმა, ჯეფრი, იჩიებ: „ართ მეჯინათ მშვიდობიან საპროტესტო აქციაშა მოულირ ხალხიქ შილებე წუთიშმამალას ართიანიშ ჸვილუა, ირფელიშ აკოტახუა დო ხირუა ქიდიჭყას“. ვარინ ქრისტექ თინა დუმოგურუეს, ნამდა მიჸორდან არძა, თინეფ შქას თიცალეფ ხოლო, მით ვა მოთანხმუნა ვარდა გვალო ფთხოზუნა (წეკითხით მათეშ 5:43–48). ჩქი, ქრისტიანეფ, ვოცადუთ, მუთუნ თიცალ ვა ვაკეთათ, მუთ იესოშ დოტებულ მაგალითის ვემურდას იჸი.

11. მუჟამ შილებე გამჭირდან იესოცალო მოქციებაქ?

¹¹ მართალ რე, მარჩქილენა, ნამდა ღორონთიშ სამეფო სადღამუშოთ მოსპუნს ირნერ უსამართლობას, მარა მინშა იშენით შილებე გამჭირდან, იესოცალო მიფქცუათ, მუჟამსით უსამართლოთ მოქცუნა. გუვარჩუათ, მუს გინაფლენდჷ ართ და, ჯენი, მიდგას მუშ კანიშ ფერიშ გურშენ შხვეფ გლახათ ოქცუდეს. თინა იჩიებ: „განწარებულ ვორდჷ, მანგარო მაჭუდ გურს დო მოკოდ, თე ხალხის მანგიორ გეგნუგიკო. უკულ თიშე ხოლო ქიდიპჭყჷ ფიქრ, ხომ ვა ვაკათიკო ნამდგაინ თიცალ მოძრაობას, ნამუთ რასიზმიშ დო დისკრიმინაციაშ წინააღმდეგ მიშჷ. ფიფქრენდჷ, ნამდა თეშნერო გურს გემკიპჭკუმუნდჷ“. მარა ჭიჭე ხანშა ჯენიქ ქიმეხვად, ნამდა არასწორო ფიქრენდჷ. თინა გეუძინანს: „თეშ ვარზენდჷ შხვეფს ჩქიმ აზროვნებაშა მოქმედებაშ უფლებას, ნამდა იეჰოვაშ ვარინ, ადამიანეფიშ იმენდ ქიდეპკინ“. ფრთხილას ოკო ვორდათ, ნამდა გურ მუდგა სამართლიანო ვამმალედანინ, თეს ვემეფჩათ საშვალება, პოლიტიკურ დო სოციალურ საკითხეფიშ მიმართ ნეიტრალიტეტ მიმოდინაფუან (იოან. 15:19).

12. მუშენ რე ჭკვერულ, ქიდვეკვირათ, მუ ინფორმაციას ბღებულენთ?

¹² მუ მიმეხვარებუნა, გუვაკონტროლათ ემოციეფ, მუჟამსით შხვეფს ვარდა ჩქი უსამართლოთ მოქცუნა? ართ-ართ საშვალება რე, ჯგირო ქიდვეკვირათ, მუს პკითხულენთ, უჯინეთ ვარდა ურჩქილეთ. მინშა ინტერნეტ გინოჭკადილ რე თიცალ პოსტეფით, ნამუთ მოძინელო გინოჩანს მუდგაინ უსამართლო შემთხვევას დო ხალხის მთავრობაშ წინააღმდეგ ახნარენს. მინშა საინფორმაციო საშვალებეფ ახალ ამბეეფს მუშობრათ გინოჩანა. ახალ ამბეეფს გინოჩამილ ინფორმაცია მართალ რდასინ ხოლო, ირიათო თიშ კითხირით დო რჩქილათ მუთუნს ვა ვოხვარუთ. თეცალ ამბეეფიშ კითხირ დო რჩქილას ბრელ დროს გეგშურთუნთ-და, შილებე თექ ჩქინდა ხოლო გლახათ იმოქმედას, გურქ მომირთან, ვარდა ონერვიანებელ მიბძინათ (იგავ. 24:10). ენა ვარინ, შილებე გვალო გეგშმოჭყორდან, ნამდა ირნერ უსამართლობაშ მოსპუალა ხვალე ღორონთიშ სამეფოს შეულებ.

13. მუჭო მიმეხვარებუნა ბიბლიაშ ირდღაშიან კითხირ, სწორ დამოკიდებულება მიღუდან უსამართლობაშენ?

¹³ ბიბლიას ირდღას წეპკითხენთ დო თიშე დეფიფქრებუთ-და, თენა მიმეხვარებუნა, მიჩქუდან, მუჭო მოქციება უჯგჷ უსამართლობაშ დროს. ართ დას, ალიას, მანგარო აწუხენდჷ თიშ ძირაფა, ნამდა ნამთინე ადამიან შხვეფს გლახათ ოქცუდ. თის თიშე ხოლო მალედ გურ, ნამდა თე ადამიანეფს პასუხის მითინ ვა თხინდჷ. ალია იჩიებ: «ართშა ჩქიმ დუდის პკითხჷ: „მართალო ქობჯერსო, ნამდა არძა პრობლემას იეჰოვა მაგვარენს?“. თიმ პერიოდის იობიშ 34:22–29-ქ მაჸუ კითხირებულქ. თე მუხლეფქ ქუგმოშინ, ნამდა იეჰოვა ირფელს ორწყე, თინა სრულყოფილო სამართლიან რე დო ხვალე თის შეულებ ირნერ პრობლემაშ მოსპუალა». მუშ კეთება შემლებუნა ამდღა, ონდო ღორონთიშ სამეფო ნამდვილ სამართლიანობას მიღანს?

ᲛᲣᲨ ᲙᲔᲗᲔᲑᲐ ᲨᲔᲛᲚᲔᲑᲣᲜᲐ ᲐᲛᲓᲦᲐ?

14. მუ რე ართ-ართ მუდგარენ, მუდგაშ კეთება შემლებუნა? (კოლ. 3:10, 11).

¹⁴ ჩქი ვაგმაკონტროლებენა, მუჭო მექციებუნა ადამიანეფ შხვეფს, მარა შემლებუნა გუვაკონტროლათ ჩქინ საქციელ. მუჭოთ ჟიშე იფჩით, იესოშ მაგალითის მეპჸუნთ, მუჟამსით ირკოჩიშ მიმართ ჸოროფას გიმიბრჩქინანთ. თე ჸოროფა გინმოჭყვიდირაფუანა, შხვეფს, თინეფს შქას ჩქინ მოწინააღმდეგეეფს ხოლო, პატიცემათ მივექცუათ (მათ. 7:12; რომ. 12:17). იეჰოვას მანგარო ოხიოლ, მუჟამსით ირკოჩის გემუანო დო სამართლიანო ვოქცუთ (წეკითხით კოლოსელეფიშ 3:10, 11).

15. მუქ შილებე მოხვადას, ჭეშმარიტებას უმოს ადამიანს ქუგვოგებაფუანთ-და?

¹⁵ უსამართლობაწკუმა ობრძოლებერო არძაშ უჯგუშ საშვალება ადამიანეფშა ბიბლიურ ჭეშმარიტებაშ გინოჩამა რე. მუშენ იფჩიებუთ თეს? მუშენდა იეჰოვაშ გაჩინებაფას შეულებ აგრესიულ დო მოძალადე ადამიან მშვიდ დო მოჸოროფე კოჩო გინაშქვას (ეს. 11:6, 7, 9). ჩქინ ართ ჯიმა, ჯემალ, ჭეშმარიტებაშ გაგებაშახ ოკათუდ თიცალ ადამიანეფიშ ჯგუფის, მიდგას ვა მოწონდჷ მთავრობა დო თიშ წინააღმდეგ გიშეშ. ჯემალ იჩიებ: „ძალით მითინ ვა გათირე. ვართ მა ფთირექ ძალით. ბიბლიურ ჭეშმარიტებაშ გაგებაქ დოფთირუ“. ჭეშმარიტებაშ გაგებაშ უკულ ჯემალქ მთავრობაწკუმა ბრძოლა მიოტუ. თაშ ნამდა, მუთ უმოს ადამიანს დოთირანს ჭეშმარიტებაშ გაგება, თით უმოს ნაკლებო დოსქიდუნა თიცალ ადამიანეფ, მით უსამართლოთ იქციებუნა.

16. მუშენ გოკონა, შხვეფს ხოლო ქეჩუათ თიშ გურშენ, მუს გაკეთენს ღორონთიშ სამეფო?

¹⁶ იესოცალო, ჩქი ხოლო მთელ გურით მოკონა, ქუგვოგებაფუათ შხვეფს, ნამდა ღორონთიშ სამეფო ირნერ უსამართლობას სადღამუშოთ მოსპუნს. თე იმენდ გურშა ელუკინანს თინეფს, მიდგას გლახათ ოქცუნა (იერ. 29:11). ჟიშე მოშინაფილ სტეისი იჩიებ: „ჭეშმარიტებაშ რჩქინა მოხვარ, ვა ვოდინუე სიმშვიდე, მუჟამსით მა ვარდა შხვეფს უსამართლოთ ოქცუნა. იეჰოვა ბიბლიურ ცნობაშ საშვალებათ გურშა ელამკინანს“. ჯგირო მომზადებულ ოკო ვორდათ, ნამდა შხვეფშა ხოლო გეგნმაჩინან ღორონთიშ დუნაპირებუქ, ნამდა მალას თინა მოსპუნს უსამართლობას. მუთ უმოსის ქიგეგენთ დო მუთ უმოს დარწმუნებულ იჸით თი ბიბლიურ აზრეფშა, ნამუთ თე სტატიას გუვარჩით, თით უმოს უჯგუშო შეგალებენა სკოლას ვარდა სამუშას შხვეფს ხოლო ქეჩუათ, მუშენ ფხვადუთ უსამართლობას დო მუჭო მოსპუნს იეჰოვა თის.b

17. მუჭო მოხვარუნა იეჰოვა, გაურზათ უსამართლობას?

¹⁷ მიჩქუნა, ნამდა, ონდო სატანა რე „თე ქიანაშ მმართველ“, უსამართლობას ირიათო ქეშეფხვადუთ. მარა სოიშახ იეჰოვა სატანას ჩამთხინუანა, თეიშახ თინა ქოთ ამდღა მოხვარუნა დო ქოთ მომავალშო მარზენა იმენდის (იოან. 12:31). ბიბლიაშ საშვალებათ იეჰოვა ხვალე თის ვა მოგებაფუანა, მუშენ ხვადუ თესხი უსამართლობა, თის ხოლო მირაგადუნა, მუჭო წუხენს თინეფშე, მიდგას გლახათ ოქცუნა (ფსალმ. 34:17–19). თეწკუმა ართო, მუშ სქუაშ მაგალითიშ საშვალებათ, იეჰოვა მოგურუანა, მუჭო მიფქცუათ უსამართლობაშ დროს დო მოგებაფუანა, ნამდა მალას თიშ სამეფო სადღამუშოთ მოსპუნს ირნერ უსამართლობას (2 პეტ. 3:13). მორთ შურ დო გურით გუვაგრძელათ შხვეფშა სახიოლო ამბეშ ქადაგება დო მთელ გურით ქუჯინათ თი დროს, მუჟამსით მთელ დედამიწა „სამართლიანობათ დო სიმართლეთ“ გეიფშაფუ (ეს. 9:7).