მუჭო გინიბრთჷ მორდებუან ძღაბიქ მისიონერო

დებაბდჷ 1951 წანას, ვენას (ავსტრია), კათოლიკეეფიშ ოჯახის. მართალ რე, ადამიანეფწკუმა ურთიერთობაშ დროს მანგარ მორდებუან ვორდჷ, მარა ღორონთიშ პწანდჷ დო თის თავისფალო ვეჩიებუდ ლოცვას. ჩხორო წანერ ვორდინ თეშ, მუაჩქიმქ იეჰოვაშ მოწმეეფწკუმა ქიდიჭყჷ ბიბლიაშ გურაფა. ჭიჭე ხანშა თის დიაჩქიმქ ხოლო ქიგიაჸუნ.

ვენას დობლინგიშ კრებას ვორდით. მთელ ოჯახ ბრელ მუდგარენს ვორთუდით ართო. პკითხულენდით დო იბრკვიენდით ბიბლიას, ვოსწრუდით კრებაშ შეხვალამეფს დო მოხალისეეფო ბმსახურენდით კონგრესეფს. ჭიჭენობაშე ფშჷ, ნამდა მუაჩქიმ ირნერო ოცადუდ, იეჰოვა ქომიჸოროფუკო. თინა ირო ლოცულენდჷ, ნამდა მა დო ჩქიმ დას პიონერეფო ქომმსახურებუდესკო, მარა მა თენა ქიანაშის ვა მოკოდ.

ᲡᲠᲣᲚ ᲓᲠᲝᲗ ᲛᲡᲐᲮᲣᲠᲔᲑᲐᲨ ᲓᲝᲭᲧᲐᲤᲐ

დიმნათ 1965 წანას, 14 წანერ ვორდინ თეშ. მანგარო მიჭირდჷ მსახურებას უჩინებ ხალხწკუმა დორაგადაფა. ირკოჩ ჩქიმ უჯგუშო მიმორჩქუდ დო მოკოდ, შხვა ახალგაზრდეფს მუდგათიჸინ დუდ მუწონეკო. ათეშენ, ნათუაშე ბრელ ხან ვა რდჷ მიკულირინ თეშ, თიცალ ადამიანეფწკუმა ქიდიპჭყჷ ურთიერთობა, მით ვამსახურუდეს იეჰოვას. მართალ რე, მოპწონდჷ თინეფწკუმა რინა, მარა, თეწკუმა ართო, სინდის მაწუხენდჷ, მუშენდა ირიათო თიცალეფწკუმა ვორდჷ, მით იეჰოვაშ მოწმეეფ ვა რდესჷ. მარა ძალა ვამბაღუდ, ნამდა თინეფს დუდ მიდუღიკო.

თიმ პერიოდის ჩქინ კრებაშა ართ 16 წანერ დაქ, დოროთიქ, გეგნორთჷ. ჩქიმდა მანგარო იმოქმედ თიშ ძირაფაქ, მუნერ შურ დო გურით ქადაგენდჷ თინა კარდოკარ. მა თიშე ჭიჭეთ უნჩაშ ვორდჷ, მარა თინა ჩქიმ უმოს აქტიურ რდჷ მსახურებას. უკულ იფიფქრჷ: დოროთის მითინ ვა ჸუნსჷ რწმენას რენ ფერ, ავრე დალახებულ დიამუშის ულუანს, მარა იშენით ირო მსახურებას რე. ჩქიმ მშობლეფ ხომ იეჰოვაშ მოწმეეფ ქორენა დო მა მუ მოჭირ-მაქ?! თიშ მაგალითიქ გინმოჭყვიდირაფუ, უმოს გუვაკეთკო იეჰოვაშო. მალას მა დო დოროთიქ ართო ქიდიპჭყით პიონერულ მსახურება, დიო დამხმარე პიონერეფო დო უკულ პიონერეფო. დოროთიშ მონდომაქ მა ხოლო გეგნმადვჷ. პირველ ბიბლიაშ გურაფაშ დოჭყაფას ხოლო თიქ მიმეხვარ. ჭიე-ჭიეთ ვატყუაფუდ, ნამდა ისხით ვამჭირდჷ ადამიანეფწკუმა დორაგადაფა კარდოკარ, ქუჩას დოვარ შხვა სიტუაციეფს.

პიონერო მსახურებაშ პირველ წანას ჩქინ კრებაშა ართ ჯიმაქ, ჰაინციქ, გეგნორთჷ. თის ჭეშმარიტება კანადას აფუდ გაგებულ, მუჟამსით სტუმარო ინორთჷ მუშ ჯიმაშა, ნამუთ იეჰოვაშ მოწმე რდჷ. ჰაინც ჩქინწკუმა, ვენას, სპეციალურ პიონერო დანიშნეს. ძირაფა დო ხელათ გურშა ქალამიოლ, მარა მიჩქუდ, ნამდა თის მისიონერო ოკოდ მსახურება. მა ენა ვა მოკოდ, ათეშენ დუდშე ვამგინაფუაფ თიშა, მოპწონდუნ. მარა, ჭიჭე ხანშა შეხვალამა ქიდიპჭყით, დეფქორწინით დო ართო ქეშუდირთით პიონერო მსახურებას ავსტრიას.

ᲛᲣᲭᲝ ᲒᲘᲜᲘᲠᲗᲷ ᲩᲥᲘᲛ ᲛᲘᲖᲐᲜᲝ ᲛᲘᲡᲘᲝᲜᲔᲠᲝ ᲛᲡᲐᲮᲣᲠᲔᲑᲐᲥ

ჰაინც ხშირას მეჩიებუდ, ნამდა მისიონერო მსახურება ოკოდ. მართალ რე, თეს დღას ვა მანძალენდჷ, მარა თიცალ მუდგარენეფს მოკითხუდ, მუდგათ მოხვარუდ, მა ხოლო დეფიფქრიკო თე მიზანშე. მაგალთო, თინა მირაგადუდ: „მუჭო ფიქრენქ, რახანს ბაღანეფ ვა პჸუნან, ხომ ვეშემლებუნა უმოს გუვაკეთათ იეჰოვაშო?“. რახანს მორდებუან ვორდჷ, მოშქურუდ მისიონერო მსახურებაშა. მართალ რე, პიონერო ქობმსახურენდჷ, მარა ფიფქრენდჷ, ნამდა მისიონერო მსახურება ვეგშმალედ. ჰაინც იშენით ირიათო გუმოშინანდჷ თე მიზანს. თეწკუმა ართო, ელამჩანდჷ, მთელ ყურადღება ადამიანეფიშ მოხვარაშა გეგნიბღიკო დო ვართ ხოლო ჩქიმ დუდშე ნერვიანობაშა. თიშ რჩევეფქ მართალო მანგარო მიმეხვარ.

ჭიე-ჭიეთ მა ხოლო მუმაკორინ მისიონერო მსახურებაქ, ათეშენ შევავსით „სკოლა გალაადიშ“ ბლანკ. მარა ფილიალიშ მსახურქ ელამჩეს, დიო ინგლისურ ქიდიბგურეკო უჯგუშო. შურო ვეველუდითინ თეშ, სუმ წანას ინგლისურიშ გურაფაშ უკულ, ზალცბურგის (ავსტრია) იუგოსლავიურ კრებას დუმანიშნეს. შქვით წანას ბმსახურენდით თექ. თავრეშე ართ წანას რაიონულ მსახურებას ვორდით. თინეფიშ ნინაშ დოგურაფა ვა რდჷ ადვილ, მარა ქეშმალებუეს ბრელ ბიბლიაშ გურაფაშ დოჭყაფაქ.

1979 წანას ჯიმალეფქ ფილიალშე მიწუეს, ნამდა „შვებულებათ“ ბულგარეთშა მიდაბრთითკო. თე ქიანას ქადაგებაშ საქმე აკრძალულ რდჷ, ათეშენ თექ ოქადაგებშა ვამლინუნა. ჩქინ დავალება რდჷ, ტყობაშე გეგნიბღითკო სპეციალურო დამზადებულ ჭიჭე ზომაშ პუბლიკაციეფ თი ხუთ დაშო, მით დედაქალაქ სოფიას ცხოვრენდეს. შიშიშ ღურელ ვორდჷ, მარა იეჰოვაქ ქიმმეხვარეს თე დავალებაშ შესრულებას. თი დალეფიშ გაბედულებაშ დო ხიოლიშ ძირაფაქ, მით ჭოფუაშ რისკიშ უმკუჯინუო, იშენით მსახურენდეს, ქომუჩ ძალეფ, გუვაკეთკო ირფელ, მუდგას იეჰოვაშ ორგანიზაცია დუმავალენდ.

ეშობას კინ შევავსით გალაადიშ ბლანკ დო ქუდომძახეს. ფიფქრენდით, ნამდა სკოლა ამერიკას ინგლისურო მაჸიდეს მიკაულარ. მარა 1981 წანაშ ნოემბერშე ორგანიზაციაქ გერმანიას, ვისბადენიშ ფილიალს, ხოლო ქიდიჭყჷ გალაადიშ ჩატარება. თაშ ნამდა, გერმანულო ჩეტარებუდ სკოლა, მუთ ჩქიმო ჯგირ რდჷ, მუშენდა უჯგუშო მარჩქილედ თე ნინა. მარა საინტერესო რდჷ, სო დუმანიშნენდეს.

ᲛᲡᲐᲮᲣᲠᲔᲑᲐ ᲗᲘᲪᲐᲚ ᲥᲘᲐᲜᲐᲡ, ᲡᲝᲓᲔᲗ ᲩᲮᲣᲞ ᲛᲘᲨᲷ

დუმანიშნეს კენიას, მარა კენიაშ ფილიალშე ფთხუეს, ქეშემლებუდეს დო ვარ მეზობელ ქიანაშა, უგანდაშა, გეგნობრთითკო. სოდგარენ ვით წანაშე უმოსიშ წოხოლე, გენერალ იდი ამინქ, მთავრობა გეგნარაგუ დო ძალაუფლება ხეშა ქეშეჸოთ. თიშ მმართველობაშ დროს ანთასობით ადამიანქ ღურჷ დო მილიონობით ადამიანს ცხოვრებაქ გენწარ. 1979 წანას თექ ხოლო ართ გადატრიალებაქ მოხვად. ათეშენ, თეცალ ქიანაშა ულა მოშქურუდ-მაქ ქოიწუათინ, ალბათ ვა გაიკვირდუნა. მარა გალაადიქ მუმამზადეს დო ქუდმოგურუეს, არძა სიტუაციას მივენდითკო იეჰოვას. ათეშენ დევეთანხმით თევრე გინულას.

უგანდას მანგარ არეულობა რდჷ. 2010 წანაშ „წელიწდეულს“ ჰაინც თექიან მდგომარეობაშ გურშენ იჩიებ: „თექ ვართ წყარ რდჷ დო ვართ საკომუნიკაციო საშვალებეფ. მანგარ ხშირ რდჷ ჸოთამეფ დო ხალხიშ გერნაფეფ მიშჷ, განსაკუთრებულო სერით. ეკისერუდუნ უკულ, გალე მითინს ვა ძირუნდით. ირკოჩ ჸუდეს რდჷ დო თიშე ლოცულენდეს, ნამდა მითინქ ვადირთესკო“. თეცალ სირთულეეფიშ უმკუჯინუო, თექიან ქრისტიანეფ სულიერო იშენ მანგარას გერდეს.

1982 წანას მა დო ჰაინციქ გენობრთით უგანდაშ დედაქალაქშა, კამპალაშა. პირველ ხუთ თუთას სემ დო ქრისტინა ვაისვეფწკუმა ფსქიდუდით, მით მუნეფიშ ხუთ სქუა დო ოთხ ნათესეწკუმა ართო ცხოვრენდეს. თინეფს უმენტაშო დღაშე ხვალე ართშა ჭკუმუაშ საშვალება უღუდეს. ათეშენ მანგარო ვაფასენდით, ნამდა მუთ უღუდესინ თის ჩქი ხოლო მირთუნდეს. ვაისვეფიშ ოჯახის მა დო ჰაინციქ ბრელ მუდგარენ დიბგურეთ, მუთ მისიონერულ მსახურებას მოხვარუდეს. მაგალთო, ქიდიბგურეთ, მუჭო იბაბღინეთკო ობონალო მუსხირენ ლიტრა წყარ დო უკულ თე ნაბონა წყარ ტუალეტიშ გინარჩხალო გეგმიბრინეთკო. 1983 წანას მა დო ჰაინციქ ცალკე გეგნობრთით ოცხოვრებშა კამპალაშ უმოს უსაფრთხო ადგილშა.

მანგარო მოპწონდეს კამპალას მსახურება. ფშჷ, ნამდა ართშა ართ თუთაშ დინახალე 4 000-შე უმოს ჟურნალ გუვავრცელით. არძაშ უმოსო თიშ ძირაფა მოხიოლუდეს, მუჭო მოქმედენდჷ ხალხშა ჭეშმარიტებაშ გაგება. თინეფ პატის ცენდეს ღორონთის დო ოკოდეს ბიბლიაშ გურშენ ჩიება. მა დო ჰაინცის, თითოს, 10–15 ბიბლიაშ გურაფა ირო მიღუდეს დო ბრელს ბგურაფლენდით ჩქინ ბიბლიაშ მაგურაფალეფშე ხოლო. მაგალთო, თიშ უმკუჯინუო, ნამდა თინეფს შეხვალამეფშა კუჩხით უხვადუდეს გილულა, დღას ვეჭირებუდეს თეშ გურშენ დო ირო გოძიცებულ სახე უღუდეს.

1985–1986 წანეფს უგანდას ხოლო ჟირ ჩხუპიქ მოხვად. ბაღანეფ ხოლო იარაღამო გილერულედეს დო სამხედრო პოსტეფს გერდეს. დაინტერესებულეფიშ გორუაშ დროს, იეჰოვას ირწუთის ფთხინდით გონიერებას დო სიმშვიდეს დო თინა ხოლო პასუხენდჷ ჩქინ ლოცვეფს. შურო მითინ დეინტერესებუდ-და, შიშ დო ირფელ მოჭყორდუდეს.

მოპწონდეს უცხოელეფშა ქადაგება ხოლო. მაგალთო, უგანდას შეფხვადით დო უკულ ბიბლიას ვოგურუანდით, მურატ დო დილბა იბატულინეფს, მით თათრეთშე რდესჷ (რუსეთ). მურად ექიმ რდჷ. თე ჩილ დო ქომონჯიქ დინათ დო ამდღარშახ ომსახურუნა იეჰოვას. უკულ ქეშეფხვად ართ უკრაინელ ოსურს, ტატიანა ვილეისკას, მით დუდიშ ჸვილუაშე ფიქრენდჷ. მუჟამსით თიქ დინათ, უკრაინაშა დირთჷ დო უკულ ჩქინ პუბლიკაციეფს თარგმნუნდჷ.a

ᲐᲮᲐᲚ ᲡᲘᲠᲗᲣᲚᲔᲔᲤ

1991 წანას, მუჟამსით მა დო ჰაინც შვებულებათ ავსტრიას ვორდით, ადგილობრივ ფილიალშე ქუმოპჭარეს, ნამდა ახალ დანიშნულება მიბღით – ოკო მილინდესკო ბულგარეთშა. თიშ უკულ, მუთ აღმოსავლეთ ევროპას კომუნისტურ მმართველობაქ გეთუ, ბულგარეთის იეჰოვაშ მოწმეეფს ქიმიაჩეს ქადაგებაშ უფლებაქ. მუჭოთ ჟიშე მიფშინე, მა დო ჰაინციქ თეიშახ ტყობაშე მინიბღით თე ქიანაშა პუბლიკაციეფ. მარა ასე თექ ოქადაგებშა ოკო მილინდესკო.

ჯიმალეფქ მიწუეს, ნამდა უგანდაშა ვედიბრთითკონ თეშ, პირდაპირ მიდაბრთითკო ბულგარეთშა. ათეშენ, ვართ ჩქინ ნივთეფიშ ინონწყუალაქ შემალებუეს დო ვართ მეგობრეფშა დამშვიდობებაქ. ქიმებრთით გერმანიაშ ფილიალშა, სოდეთ მანქანა ქომუჩეს დო ქიგვოდირთით ბულგარეთიშ შარას. სოფიას დუმანიშნეს ჭიჭე ჯგუფის, სოდეთ 20 მაუწყებელ რდჷ.

ბულგარეთის მუსხირენ სირთულეს ქეშეფხვადით. პირველ სირთულე თინა რდჷ, ნამდა თექიან ნინა ვამჩქუდეს. თეწკუმა ართო, ბულგარულ ნინაშა ხვალე ჟირ წიგნ რდჷ: „მარადიულ სიცოცხლეშა მიმაჸუნაფალ ჭეშმარიტება“ დო „ბიბლიურ მოთხრობეფ“. ბიბლიაშ გურაფეფიშ დოჭყაფა ხოლო ვა რდჷ ადვილ. მარა თე სირთულეეფიშ უმკუჯინუო, ჩქინ ჭიჭე ჯგუფ შურ დო გურით აგრძელენდჷ მსახურებას. მართმადიდებლურ ეკლესიას ვა მოწონდჷ თე ამბე დო თევრეშე მოჸუნაფილ ჩქინ თხოზინ ქიდიჭყეს.

1994 წანას მთავრობაქ ჩქინ რელიგიაშ რეგისტრაცია გაუქმჷ დო გეგმაცხად, მუჭოთ საშიშ სექტა. ნამთინე ჯიმა ოჭოფეს. მედია ჩქინ გურშენ სასწაულ ტყურეფს იჩიებუდ; მაბრალენდეს, ნამდა ბაღანეფს ზისხირს ვეგნუბუნდითინ თიშენ ძალით პჸვილუნდით დო თანამორწმუნეეფს დუდიშ ჸვილუაშა ვახნარენდით. ათეშენ, მა დო ჰაინცის მსახურება მანგარო მიჭირდეს. მინშა მანგარ აგრესიულ ხალხ შეფხვადუდეს, მით მიღვარანდეს, პოლიციას გიმიძახუდეს დო მუდგარენეფს მოჸოთანდეს. ლიტერატურაშ მიშაღალა დო შეხვალამეფშო დარბაზეფიშ დაქირება ხოლო ჭირდჷ. ართშა პოლიციაქ ჩქინ კონგრეს ხოლო გაკარღვჷ. მა დო ჰაინც ვა ვორდით ხალხიშ თეცალ დამოკიდებულებას მერჩქვანელ. უგანდას შხვანერ ხალხ რდჷ დო თინეფ ჯგირო ირჩქილუაფუდეს. ასე ქიგეჩიებუთ, მუქ მიმეხვარეს თე სირთულეშა გერჯგინას.

თექიან და დო ჯიმალეფწკუმა ურთიერთობა მანგარო მოხვარუდეს. თინეფ მანგარო აფასენდეს ჭეშმარიტებას დო ჩქინ ელარნას. არძა ართიანს ვოხვარუდით დო ვამანგარენდით. თე შემთხვევეფქ ქუდმოგურუეს, ნამდა მთელ ყურადღებას შხვეფიშ მოხვარაშა გეგნიღანქ-და, არძანერ დავალებას შეილებ ბედნერ რდე.

მარა მუსხირენ წანაშა ირფელქ უჯგუშობაშა დითირ. 1998 წანას ჩქინ რელიგია კინ დარეგისტრირეს დო ბრელ პუბლიკაციაქ ხოლო დითარგმნჷ ბულგარულ ნინაშა. 2004 წანას ახალ ფილიალიშ მეძღვინუაქ ხოლო ქიჸუ. ამდღა ბულგარეთის 57 კრება დო 2 953 მაუწყებელ რე. ულირ წანას გოშინაშ ონჯუას 6 475 ადამიანქ დესწრჷ. ასე სოფიას ჩხორო კრება რე, ვარინ ართ დროს თექ ხვალე ხუთ და რდჷ. ჩქინ თოლით ქობძირით, მუჭო გინირთჷ „აკაბცხაქ ანთასო“ (ეს. 60:22).

ᲯᲐᲜᲛᲠᲗᲔᲚᲝᲑᲐᲨ ᲞᲠᲝᲑᲚᲔᲛᲔᲤ

ჯანმრთელობაშ პრობლემეფ დღას ვა მორკუდ. ექიმეფქ მუსხირენშა მიწუეს, ნამდა კიბოშ წამონაზარდეფ მიღუდ, ართშა გვალო დუდის ხოლო. ქიმიოთერაპიაშ კურს გემკობრთჷ დო ინდოეთის 12 საათიან ოპერაცია ხოლო გეპკეთ, მუდგაშ შედეგო თიშ უმენტაშ ნაწილ გეგშამჭკირეს. ონდო გიშებჯგირებუდ, ჭიჭე ხანს ინდოეთიშ ფილიალს დოფსქიდით დო უკულ დუვართით ბულგარეთის ჩქინ დანიშნულებას.

ეშობას ჰაინცის ხოლო იშვიათ ლახალაშ დიაგნოზ ქიგუშქვეს, მუდგაშ შედეგო უჭირდჷ გილულა, ჩიება დო მუშ მოძრაობაშ კონტროლ. მუთ უმოსო მეთხუნდ თის ლახალა ხეს, თით უმოსო ოსაჭირუდ ჩქიმ მოხვარა. მინშა მანგარო ფშურდუდ დო მნერვიანენდჷ თიშე, იშო-იშო მუ მუჭო იჸუაფუდ დო მუჭო მიკმალუედ თიშა. მარა, ართ ახალგაზრდა ჯიმას, ბობის, ირიათო გილაჸუნდჷ ჰაინც მსახურებაშა დო ონჯღორე ვა უჩქუდ თიშა, ნამდა ჰაინცის ნორმალურო ვაჩიებინედ დო ხე დო კუჩხიშ კონტროლ ვეშულებუდ. მუჟამსით მიჭირდჷ ჰაინციშ მიკოლუაფა, ირიათო მიღუდ ბობიშ იმენდ. მართალ რე, მა დო ჰაინცის, იეჰოვაშო უმოს გუვაკეთითკონ თიშ გურშენ, სქუალეფ ვა პჸუნდეს, მარა იეჰოვაქ ბობიშ დუდ ქომუჩეს, მით სქუაცალ მაფუდეს (მარ. 10:29, 30).

ჰაინცის კიბოშ დიაგნოზ ხოლო ქიგუშქვეს. ჩქიმ ძვირფას ქომონჯიქ 2015 წანას დომღურ. მანგარ გინაღალარქ მაჸუ თიშ ღურაქ, მუშენდა ჰაინც ირო აშო მამშვიდენდჷ დო მოხვარუდ. მიჭირდჷ თიშ დაჯერა, ნამდა ვა პჸუნდჷ. მარა თისხის ფიფქრენქ თიშე, ნამდა ჩქიმ გონებას ირო ცოცხალ რე (ლუკ. 20:38). ირიათო გუმაშინე თიშ გემუან სიტყვეფ დო თიშ მოჩამილ რჩევეფ. მანგარ მარდულ ვორექ თი წანეფშო, ნამუთ ართო იეჰოვაშ მსახურებას მეუძღვინით.

ᲛᲐᲠᲓᲣᲚ ᲕᲝᲠᲔᲥ ᲘᲔᲰᲝᲕᲐᲨ ᲐᲚᲐᲠᲜᲐᲨᲔ

იეჰოვა არძა სირთულეშ დროს ალამირდჷ. თიქ მიმეხვარ, გივორჯგინიკო მორდებუანობას დო გინიბრთიკო თიცალ მისიონერო, მიდგას მანგარო უჸორს ადამიანეფწკუმა ურთიერთობა (2 ტიმ. 1:7). იეჰოვაშ ჭყოლოფათ მა დო ჩქიმ უკლაშ და ასე სრულ დროთ მსახურებას ვორეთ. თინა მუშ ქომონჯწკუმა ართო რაიონულ მსახურებას რე დო ევროპაშ სერბულ ნინაშა მორაგადე კრებეფს იძირუანა. წანეფიშ წოხოლე რაგადებულ მუაჩქიმიშ ლოცვეფს პასუხიქ ქიმიაჩ.

ბიბლიაშ გიმორკვიება შინაგან სიმშვიდეს მარზენს. ქიდიბგურე თინა ხოლო, ნამდა, მუჟამსით მიჭირს, იესოცალო უმოს შურ დო გურით ქიბლოცე (ლუკ. 22:44). ართ-ართ მხარე, მუდგათ ჩქიმ ლოცვაშე პასუხეფს ვორწყექ, ჩქიმ კრებაშ და დო ჯიმალეფიშ გიმორჩქინელ ჸოროფა რე. თინეფ ხშირას მაპატიჟენა დო მოგინაფუანა ჸოროფას, მუდგას ჩქიმო მანგარ დიდ ხიოლ მოუღ.

ხშირას ფიფქრენქ გათელებაშ იმენდშე. წერმიბდგინენქ, მუჭო გერენა ჩქიმ მშობლეფ ჩქინ ჸუდეშ წოხოლე, თიცალ ახალგაზრდეფ დო სქვამეფ, მუნერით დაქორწინებაშ დროს რდესჷ. თე დროს ჩქიმ და ოჭკუმალს ამზადენს დო ჰაინც გალე მუშ ცხენწკუმა გერე. თეცალ მუდგარენეფშე ფიქრ მოხვარ, გლახა ფიქრეფ ჩეფთხინუე დო მარდულ ვორდე იეჰოვაშ.

ჩქიმ ულირ ცხოვრებას გინვოჯინექ დო მომავალშე ხოლო ფიფქრენქინ, მთელ გურით ვოთანხმუქ ფსალმუნმაბირე დავითიშ სიტყვეფს, ნამუთ ინოჭარილ რე ფსალმუნეფიშ 27:13 დო 14-ის: „მუ მოხვარუდ, თიშ რწმენა ვა მიღუდუკონ, ნამდა ქობძირუნდ თე ცაშ თუდო, მუშმაჯგირა რე იეჰოვა?! იეჰოვაშ იმენდ გიღუდას, რდა გაბედულ დო გურ გემანგარ! იეჰოვაშ იმენდ გიღუდას!“.