მუჭო ვორჯგინათ გლახა სურვილეფს?

1. მუს ვობრძოლუთ არძა არასრულყოფილ ადამიან?

ᲓᲦᲐᲡ მანგარო ქუნორკობუენანო თიცალ მუდგარენიშ კეთება, მუთ იეჰოვას ვა მოწონს? თაშ ქორენ-და, ვეფიქრათ, ნამდა მითინს ვაღოლამუნ ფერ მუდგარენქ გაღოლეს. ბიბლია იჩიებ: „თიცალ გამოცდეფ, ნამდგას თქვა ხვადუთ, შხვეფს ხოლო უღუდეს“ (1 კორ. 10:13). თენა ნიშნენს, ნამდა შხვეფ ხოლო ობრძოლუნა თქვა გიღუნან თიცალ გლახა სურვილეფს. მარა ხვალე ვა რეთჷ დო იეჰოვაშ მოხვარათ შეილებუნა ორჯგინათ ირნერ ცდუნებას.

2. მუ დო მუნერ ცდუნებეფს ობრძოლ ნამთინე ქრისტიან დო ბიბლიაშ მაგურაფალ? (ქოძირით სურათეფ).

² ბიბლიას ჭარჷ: „თითოულს გიმოცადუნს . . . მუშ სურვილ, ნამუთ ეიჸუნუანს დო ოჩილითუანს თის“ (იაკ. 1:14). მუჭოთ თე მუხლშე ვორწყეთ, არძაშო შხვადოშხვა მუდგარენ რე მაჩილითაფარ. მაგალთო, ართ ქრისტიანშო შილებე ცდუნება რდასჷ საპირისპირო სქესიშ წარმომადგენელწკუმა სქესობრივ ურთიერთობა დო მაჟია ქრისტიანშო – კინ მუშ სქესიშ წარმომადგენელწკუმა. ნამთინეს ხოლო, მიდგაქ პორნოგრაფიაშ ჯინა მიოტუ, შილებე უღუდას ცდუნება, კინ ქოუჯინას. ბრელს ხოლო, მიდგაქ ოშუმალ დო წამალ მიოტუ, შილებე დუდის გაშინანდას თე ჩვევა. თენეფ რე თი ცდუნებეფშე ნამთინე, ნამდგას ჩქინ თანაქრისტიანეფ დო ბიბლიაშ მაგურაფალეფ ობრძოლუნა. ალბათ, არძას მიგინაფუნა დუდ პავლე მოციქულცალო, ნამდგაქ ჭარჷ: „მოკო, ვაკეთე, მუთ სწორ რე, მარა გლახა ვა მოთხუ“ (რომ. 7:21).

3. მუ შილებე იფიფქრათ, არასწორ სურვილეფს ხშირას ქუვობრძოლუთ-და?

³ ირიათო არასწორ სურვილეფშა ქუგაფ ობრძოლებერ-და, შილებე ფიქრენდე, ნამდა ვეგგარჯგინნე თინეფშა. ვარდა ხოლო შილებე ფიქრენდე, ნამდა რახანს არასწორ სურვილეფ გირჩქინდუ, იეჰოვა მარადიულ სიცოცხლეშ საშვალებას ვემერჩანს. თენეფშე ნამთინ ვა რე მართალ. თე სტატიას ჟირ კითხვას ქუპასუხენთ, მუთ ქუმოძირანა, მუშენ იფჩიებუთ თეს. გუვარჩიენთ: 1) მუშენ მირჩქინდუნა ჩქინ დუდშე თეცალ ფიქრეფ? დო 2) მუჭო შემლებუნა გივორჯგინათ არასწორ სურვილეფს?

ᲛᲣ ᲝᲙᲝ ᲡᲐᲢᲐᲜᲐᲡ ᲛᲝᲤᲘᲥᲠᲔᲑᲐᲤᲣᲐᲜ?

4. ა) მუშენ ოკო სატანას, მოფიქრებაფუან, ნამდა ცდუნებაშა ვაგმარზინენა? ბ) მუშენ ვორეთ დარწმუნებულ, ნამდა შემლებუნა ცდუნებაშა გერჯგინა?

⁴ სატანას ოკო მოფიქრებაფუან, ნამდა ვეგმარჯგინნენა არასწორიშ კეთებაშ ცდუნებაშა. იესოს ჯგირო არჩქილედ თენა, ათეშენ, მუჟამსით ლოცვას ოგურუანდჷ მუშ მიმაჸუნალეფს, თეცალ მუდგარენ ხოლო მიშინუ: „ქიმმეხვარით, ვევაჸუნათ ცდუნებას დო მირსხით უბადოშე“ (მათ. 6:13). სატანა ამტკიცენს, ნამდა ცდუნებაშ დროს ადამიანეფ ვედემორჩილებუნა იეჰოვას (იობ. 2:4, 5). მუშენ ფიქრენს თინა თაშ? სატანა რდჷ პირველ, მიდგაქ გეიაჸუნ მუშ არასწორ სურვილს დო ვა დოსქიდ იეჰოვაშ ართგურქ. ასე თინა ფიქრენს, ნამდა ჩქი ხოლო თიშნერო მიფქციებუთ დო ცდუნებაშ დროს იეჰოვას ოჭიშის ქურთინუანთ. ინა ვარინ, სატანა თის ხოლო ფიქრენდჷ, ნამდა ღორონთიშ სრულყოფილ სქუას მიოჩილითუანდ (მათ. 4:8, 9). მარა დეფიქრით: მართალო ვა მიღუნანო არასწორ სურვილეფშა ბრძოლაშ ძალა? თენა თაშ ვა რე! ჩქი ხოლო პავლე მოციქულცალო ფიფქრენთ, მიდგაქ ჭარჷ: „ირფელს გაურზუქ ჩქიმ გუმამანგარებელიშ, ღორონთიშ, ძალათ“ (ფილ. 4:13).

5. სოვრეშე მიჩქუნა, ნამდა იეჰოვას ჯერსჷ, არასწორ სურვილეფშა გერჯგინა შემლებუნან?

⁵ სატანაშ გინაწონს, იეჰოვას ჯერსჷ, ნამდა შემლებუნა გაურზათ არასწორიშ კეთებაშ ცდუნებას. სოვრეშე მიჩქუნა თენა? იეჰოვაქ იწინასწარმეტყველ, ნამდა ანაყუ ხალხ, მით თიშ ართგურ დოსქიდუდ, დიდ გაჭირებას გეგნიღანდ. მუს ნიშნენს თენა? დღას ტყურას ვეჩიებუნ ფერ ღორონთის რაგადებულ აფჷ, ნამდა სამოთხეშა ართ დო ჟირ კოჩ ვარინ, ანაყუ ხალხ გინილენს, მით წმინდეფ იჸუაფუნა თიშ თოლს დო „მიდგაქ გინძე ბარგ გინახვეს დო კირიბიშ ზისხირით დარჩიალეს“ (გამოცხ. 7:9, 13, 14). არგამა რე, იეჰოვას ჯერსჷ, ნამდა შემლებუნა არასწორ სურვილეფშა გერჯგინა.

6, 7. მუშენ ოკო სატანას, მოფიქრებაფუან, ნამდა ვეგმარჯგინნენა ცდუნებაშა?

⁶ სატანას ხვალე თინა ვაკო, ნამდა იფიფქრათ, ცდუნებეფშა ვაგმარზინენან. თეწკუმა ართო, თის ოკო, იფიფქრათ, ნამდა არასწორ სურვილეფიშ გურშენ იეჰოვა დუმასაჯენა. ოძიცე ვა რენო?! იეჰოვას ჩქინ ვარინ, სატანაშ დასაჯება აფჷ გინოჭყვიდილ დო თიშა სადღამუშო განადგურებაშ განაჩენ აფჷ გიშაღალირ (დაბ. 3:15; გამოცხ. 20:10). თინა გურს გახორცქუ, მუშენდა ჩქი თი ირფელიშ მეღებაშ საშვალება მიღუნა, მუთ გინოჭყვიდილ რე, ნამდა მუს ვემიაღებე. ათეშენ, ოკო, ჩქი ხოლო მუცალ დღას ვორდათ. მუჭოთ ბიბლიაშე ბგებულენთ, იეჰოვას ჩქინ დასაჯება ვარინ, მოხვარა ოკო. თის „მითინიშ მოსპუალა ვაკო. თეშ გინაწონს, ოკო, ნამდა არძაქ ინარღას დაშებულ“ (2 პეტ. 3:9).

⁷ თაშ ნამდა, ცდუნებეფშა ვეგმარჯგინნენა ვარდა არასწორ სურვილეფიშ გურშენ იეჰოვა დუმასაჯენან თეს ქოფიფქრენთ-და, სატანაშ წისქვილს გივობუნთ წყარს, მუშენდა თის გვალო თენა ოკო მოფიქრებაფუან. თენა ქუმარჩქილენან-და, შემალებენა ვადვაჸუნათ თის (1 პეტ. 5:8, 9).

ᲛᲣ ᲨᲘᲚᲔᲑᲔ ᲘᲤᲘᲤᲥᲠᲐᲗ, ᲐᲠᲐᲡᲠᲣᲚᲧᲝᲤᲘᲚᲔᲤ ᲕᲝᲠᲔᲗᲘᲜ ᲗᲘᲨᲔᲜ?

8. მუ დო მუ მიშურს ცოდაშა? (ფსალმ. 51:5; ქოძირით „განმარტება“).

⁸ სატანაშ გარდა, ხოლო ართ მუდგარენქ შილებე მოფიქრებაფუან, ნამდა ვეგმარჯგინნენა ცდუნებაშა დო არასწორ სურვილეფიშ გურშენ იეჰოვა ვა მუჩანა მარადიულო ცხოვრებაშ საშვალებას. თენა რე არასრულყოფილება, მუდგაქ ადამ დო ევაშე გინმაჩესa (იობ. 14:4; წეკითხით ფსალმუნეფიშ 51:5).

9, 10. ა) მუჭო იმოქმედ ცოდაქ ადამ დო ევაშა? (ქოძირით სურათ). ბ) მუჭო მოქმედენს ცოდა ჩქინდა?

⁹ ქიგიფშინათ, მუჭო რდესჷ ადამ დო ევა თიშ უკულ, მუთ დაშუეს დო ცოდამეფო გინირთეს. თიშ უკულ, მუთ იეჰოვას ვედემორჩილეს, თინეფქ დიტყობეს დო ეცადეს, სხეულიშ ოფორალო მუდგაინ ქიმკიქუნესკო. „წმინდა წერილეფიშ საკვლევ ცნობარს“ ჭარჷ, მუშენ მიქცუეს თინეფქ თაშ. ცოდაშ გურშენ, თინეფქ პირველო ქიგინეს თიცალ გრძნობეფ, მუნერით რე დანაშაულიშ გრძნობა, წუხება, დაუცველობა დო ონჯღორე. შემლებუნა ცოდა ჸუდეს შევადარათ დო თი გრძნობეფ, ნამუთ თინეფს უღუდეს – ოთახეფს. ადამ დო ევა ჸუდეს რდესჷ მილახვილირ, ნამდგას ხვალე თე ოთხ ოთახ უღუდ. თინეფს ართ ოთახშე მაჟიაშა გინულა შეულებუდეს დო ირიათო თე ოთახეფს გილეშესკონ იჸიდ. მარა ჸუდეშე, ცოდამ მდგომარეობაშე, ვეგმართედეს დო სოთინ ვანტებედეს თიშა.

¹⁰ მუშო ოკო რაგად, ჩქი გვალო ადამ დო ევაშნერ მდგომარეობას ვა ვორეთ, მუშენდა ჩქი, თინეფიშ გინაწონს, გიშაჸიდირალიშ ჭყოლოფათ მეპატიებუნა ცოდეფ დო მიღუნა სუფთა სინდის (1 კორ. 6:11). მარა, რახანს თინეფშე ცოდა დო არასრულყოფილებაქ გინმაჩეს, ჩქი ხოლო მიღუნა დანაშაულიშ, წუხებაშ, დაუცველობაშ დო ონჯღორეშ გრძნობა. ბიბლია იჩიებ, ნამდა ცოდა მანგარო მოქმედენს ადამიანეფშა, თინეფშა ხოლო, „მიდგას ვეშუცოდებ ადამცალო“ (რომ. 5:14). მარა ცოდამეფ იბაბდებუთინ თიშ გურშენ ოკო ვეფიფქრათ, ნამდა დღას ვა მაკეთებენა თინა, მუთ სწორ რე დო ვემმაღებენა ულიებ სიცოცხლე. თეცალ ფიქრეფ ოკო ჩეფთხინუათ. მუ მიმეხვარებუნა თეს?

11. ცდუნებეფშა ვეგმარჯგინნენან თეს ფიფქრენდათინ ხოლო, რომაელეფიშ 6:12-იშ თანახმას, მუშ კეთება შემლებუნა?

¹¹ მუჟამსით ფიფქრენთ, ნამდა ცდუნებეფშა გერჯგინაშ ძალა ვა მიღუნა, თეს, თაშ ქოფთქუათინ, ჩქინ ცოდამ მდგომარეობა „მირაგადუნა“. ათეშენ, ოკო ვა მურჩქილუათ დო ვა დუჯერათ თის, მუშენდა ბიბლია მირაგადუნა, ნამდა ვემეფჩათ ცოდას ჩქინ „მართუაშ უფლება“ (წეკითხით რომაელეფიშ 6:12). თენა ნიშნენს, ნამდა ჩქინდა რე, ევაჸუნუთ დო ვარ არასწორ სურვილეფს (გალ. 5:16). იეჰოვას ჯერსჷ, ნამდა შემლებუნა ცდუნებეფშა გარზება, მუშენდა შხვანერო თინა ჩქინდე ვემითხინდ თეშ კეთებას (კან. 30:11–14; რომ. 6:6; 1 თეს. 4:3). თაშ ნამდა, ცდუნებეფწკუმა ბრძოლაშ მოგება შემლებუნა.

12. მუ ოკო ვაკეთათ, მუჟამსით ფიფქრენთ, ნამდა არასწორ სურვილეფიშ გურშენ იეჰოვა დუმასაჯენა დო მუშენ?

¹² ჩქინ ცოდამ მდგომარეობაშ „ხონარს“ თიმწკუმა ხოლო ოკო ვა ურჩქილათ, მუჟამსით „მირაგადუნა“, ნამდა ხვალე არასწორ სურვილეფ მირჩქინდუნან თიშ გურშენ იეჰოვა მარადიულ ცხოვრებაშ საშვალებას ვა მუჩანა. მუშენ? მუშენდა ბიბლიას ჭარჷ, ნამდა იეჰოვას არჩქილე, ცოდამეფ ვორეთინ (ფსალმ. 103:13, 14). „თის ირფელ უჩქჷ“ ჩქინ გურშენ. თინეფ შქას თინა ხოლო, მუ დო მუნერო მოქმედენს ჩქინდა, თითოეულშა, ადამ დო ევაშე მეღებულ ცოდა დო მუ მიდრეკილებეფს მირჩქინანა (1 იოან. 3:19, 20). არასწორ სურვილეფს ქუვობრძოლუთ დო თინეფს ვეპჸუნთ-და, შემლებუნა ბჯერდან, ნამდა იეჰოვაშ თოლს წმინდეფ ვორეთ. მუშენ შემლებუნა თეშ რაგად?

13, 14. არასწორ სურვილეფ ქომღუნან-და, თენა თის ნიშნენსო, ნამდა იეჰოვაშ თოლს მოწონა ვა მაღვენუნა? გენწყით.

¹³ ბიბლიაშე იძირე, ნამდა არასწორიშ კეთება (მუთ ჩქინ ხეს რე) დო არასწორიშ კეთება გოკონ თიშ შქას (მუთ ჩქინ ხეს ვა რე) დიდ განსხვავება რე. მაგალთო, პირველ საუკუნეს კორინთის ნამთინე ქრისტიან ულირს ჰომოსექსუალ რდჷ. პავლექ თინეფშე თქუ: „თეცალ რდჷ თქვანდე ნამთინე“. თენა თის ნიშნენდუო, ნამდა თე ქრისტიანეფს ანწ დღას ვა გაშინანდ დუდის ულირ ცხოვრება დო დღას ვეგედირთუდეს თეცალ უზნეობაშ ცდუნებაშ წოხოლე? თენა ძნელ დაჯერებელ რე, მუშენდა თეცალ სურვილეფ ძელ დო ძვალს გოუდოხოდუ კოჩის. მარა თი ქრისტიანეფს, მით დუდის იჭოფუნდეს დო ვეჸუნდეს მუნეფიშ სურვილეფს, იეჰოვაშ თოლს მოწონა უღუდეს. თიშო თინეფ „გასუფთებულეფ“ რდესჷ (1 კორ. 6:9–11). სი ხოლო შეილებ თეცალ რდე ღორონთიშ თოლს.

¹⁴ მუდგანერ ცდუნებას ვაბრძოლუდენ, რჯერდას, შეილებ ორჯგინე თის. გვალო ბოლოშა ვაჩგათხინუასინ ხოლო, შეგალებე დუდიშ ჭოფუა ქიდიგურუე დო ვეიაჸუნე „ცოდამ სხეულს დო აზროვნებას“ (ეფეს. 2:3). მორთ გუვარჩუათ ნამთინე პრაქტიკულ რჩევა, მუთ მიგეხვარებ, ებრძოლე არასწორ სურვილეფს.

ᲛᲣ ᲛᲘᲒᲔᲮᲕᲐᲠᲔᲑᲣᲜᲐ ᲪᲓᲣᲜᲔᲑᲐᲨᲐ ᲒᲔᲠᲯᲒᲘᲜᲐᲡ?

15. მუშენ ოკო გოუტირხათ დუდის, ცდუნებაშა გერჯგინა ქუმოკონან-და?

¹⁵ არასწორ სურვილეფს გიორჯგინენ თეშო საჭირო რე, თოლ გაუსწორე სქან სისუსტეეფს. ფრთხილას რდა, ნამდა „არასწორ აზროვნებათ ვედეღორე დუდ“ (იაკ. 1:22). მაგალთო, ნამთინე გურს იკეთენს თეცალ ფიქრეფით: „შხვეფ ჩქიმდე უმოსის ხოლო შუნა“; ვარდა ხოლო „ჩქიმ ოსურშე ჸოროფა ვა მორკუდასინ, პორნოგრაფიას ვა უჯინედ“. სამანჯელიშ გორუა დო შხვაშა გინობრალება უმოსო გეცილებ-და ვარა, ვემგეხვარებ ცდუნებაშა გერჯგინას. ათეშენ, ფიქრო ხოლო ვა გამართლა სქან საქციელ დო პასუხიშმგებლობა სქან დუდშა გეჭოფ (გალ. 6:7).

16. მუ მიგეხვარებ, მტკიცას გაფუდას გინოჭყვიდილ სწორას მოქციება?

¹⁶ პრობლემაშა თოლიშ გასწორებაწკუმა ართო, ხოლო მნიშვნელოვან რე, მტკიცას გაფუდას გინოჭყვიდილ, ვეიაჸუნე ცდუნებას (1 კორ. 9:26, 27; 1 თეს. 4:4; 1 პეტ. 1:15, 16). დეფიქრ, არძაშ უმოსო მუშ ცდუნებაშა დო მუჟამ გიჭირს გარზება. შილებე კონკრეტულ საკითხის ვარდა კონკრეტულ დროს გიჭირდას ცდუნებაშა გარზება. მაგალთო, სერით გვიანო ვარდა შულადირ რექინ თიმწკუმა ხომ ვაიჭირს სქან სისუსტეშა ბრძოლა? ქიფიქრ სქან ცდუნებაშე დო გონებას გეგმა ქუდანწყი, მუს ქიმინუნქ, მუჟამსით თიშ წოხოლე ქიგედირთუქ. თენა თეიშახ ოკო აკეთე, ონდო ცდუნებაშ წოხოლე გედირთუდე (იგავ. 22:3).

17. მუს ბგურაფლენთ იოსებიშ შემთხვევაშე? (დაბ. 39:7–9; ქოძირით სურათეფ).

¹⁷ ქიგიფშინათ, მუჭო მიქცუ იოსებიქ, მუჟამსით ფოტიფარიშ ოსურქ თიშ ჩილითაფას ეცად. თიქ ხეთეშე დო გინოჭკირილო უწუ ვარია თე ოსურს (წეკითხით დაბადებაშ 39:7–9). მუს მოგურუანა თენა? იოსების ფოტიფარიშ ოსურ თიშ ჩილითაფას ეცადებუდკონ თეიშახ აფუდ გინოჭყვიდილ, შხვა კოჩიშ ოსურწკუმა საქმე ვედეკინუკო. თეშნერო, თქვა ხოლო შეილებუნა ცდუნებაშ წოხოლე გედირთუდათინ თეიშახ გეგნოჭყვიდათ, მუჭო მიქციებუთ, საქმე საქმეშა ქიმურსუნ. რახანს წინასწარ გაჸინა გინოჭყვიდილ, სწორას მიქცუათ, უმოს ადვილ გაჸინა ცდუნებაშა გარზება.

„ᲘᲠᲘᲐᲗᲝ ᲨᲔᲐᲛᲝᲬᲛᲘᲗ ᲗᲥᲕᲐᲜ ᲓᲣᲓ“

18. ხოლო მუჭო შეილებუნა ებრძოლათ არასწორ სურვილეფს? (2 კორ. 13:5).

¹⁸ არასწორ სურვილეფს გიორჯგინენ თეშო თინა ხოლო რე საჭირო, ნამდა „ირიათო შეამოწმე“ სქან დუდ. შხვანერო ქოფთქუათინ, ირიათო ქიდეკვირე, მუჭო გიშგალე ცდუნებეფწკუმა ბრძოლა (წეკითხით 2 კორინთელეფიშ 13:5). მინშა-მინშა ქიდეკვირ სქან ფიქრეფს დო მოქმედებეფს დო საჭირო ქორენ-და, დოთირე მუდგარენეფ. მაგალთო, ცდუნებას ვეიაჸუნუქინ თიმწკუმა ხოლო, იშენით დეფიქრ: „მუზმა ხანქ დემესაჭირ ვარიაშ ორაგადეთ?“. ვარიაქ ხეთეშე ვა გარაგადუნ ქოძირუნქ-და, გურ ვეგიტახა. გეგნოდგ ნაბიჯეფ, ნამდა ანწიანშო უჯგუშო გეგშაირთას. თეცალ კითხვეფშე დეფიქრ: მუ ოკო ვაკეთე, ნამდა უმოს ნაკლებ დროქ დემესაჭირას გლახა ფიქრეფიშ ჩათხინაფალო? თიცალ მუდგარენეფს ხომ ვა პკითხულენქ, ვა უჯინექ დო ვა ურჩქილექ, მუთ მოცილ ცდუნებაშ გერჯგინას? ხეთეშე ქუთხინუანქო თოლს უზნეო სცენეფს? ქუმარჩქილენო, ნამდა იეჰოვაშ ნორმეფ ირო ჩქიმ საჯგირობუოთ რე, გოკონდა თინეფიშ დაცვება ჩქიმდე მანგარ დუდიშ ჭოფუას ითხინდას? (ფსალმ. 101:3).

19. მუჭო შილებე ართ მეჯინათ ჭიჭე არასწორ გადაწყვეტილებეფქ მეცილან გლახა სურვილეფწკუმა ბრძოლას?

¹⁹ თეწკუმა ართო, მანგარ მნიშვნელოვან რე, ვედიჭყე სქან არასწორ საქციელშა გამართლებეფიშ გორუა. ბიბლიას ჭარჷ: „გურ არძაშ უმოს უდუნდებელ დო დაუმორჩილებერ რე“ (იერ. 17:9). მუჭოთ იესოქ თქუ, „გურშე მოურს გლახა აზრეფ“ (მათ. 15:19). მაგალთო, პიროვნებაქ, ნამდგაქ პორნოგრაფიაშ ჯინა მიოტუ, შილებე დროშ მიკულაშ უკულ იფიქრას, ნამდა დიდ პრობლემა ვა რე გამომწვევ სურათეფიშ გოჯინა, მუშენდა თექ გვალო ბოლოშა მიკონწყუმილ ხალხ ვეძირე ვარდა შილებე იფიქრას, ნამდა მუთუნ ვა უჭირს სექსუალურ სცენეფიშ წარმოდგენას დო თაშ გამართლას: უბრალოთ ფიფქრენქ ვარა ხომ ვა ვორთუქ?! თეშნერო, თე პიროვნებაშ უდუნდებელ გურ, თაშ ქოფთქუათინ, „გეგმაშ დონწყუალას“ იჭყანს, მუჭო დეკმაყოფილას თინა, მუთ მუშ ცოდამ სხეულს ოკო (რომ. 13:14, სქოლიო). მუჭო შეილებ დუდ დითხილე თეცალ მუდგარენშე? გურ ქუგუჩ დო დუდ ეუჩილითე თიცალ ჭიჭე არასწორ ნაბიჯეფს ხოლო, ნამდგაქ შილებე დიდ არასწორ ნაბიჯშა ქიმეიჸონას, მაგალთო, სერიოზულ ცოდაშა.b თიცალ ფიქრეფ ხოლო ჩეთხინე, შხვა სიტყვეფით ქოფთქუათინ, „გლახა აზრეფ“, ნამუთ სქან არასწორ საქციელს გომართლებაფუანს.

20. მუჭო ვემსახურებუთ იეჰოვას ახალ ქიანას დო მუშ იმენდ შილებე მიღუდან თეიშახ?

²⁰ მუჭოთ თე სტატიაშე გებგით, იეჰოვაშ მოხვარათ ჩქი შემლებუნა ვორჯგინათ ცდუნებეფს. თეს გეძინელ, იეჰოვაშ გიმორჩქინელ ჭყოლოფაშ გურშენ ახალ ქიანას მარადიულო ცხოვრებაშ იმენდ მიღუნა. მუჭო ელამკინანა გურშა თიშ რჩქინა, ნამდა თიმწკუმა სუფთა გონებათ დო გურით შემალებენა ვემსახურათ თის. მარა თე დროშ მოულაშახ ხოლო ვამღუნა გლახათ საქმე, მუშენდა იეჰოვაშ მოხვარათ ქოთ ცდუნებეფწკუმა ობრძოლებერ ძალა მიღუნა დო ქოთ თიშ შიშწკუმა, ნამდა არასწორ სურვილეფ მირჩქინდუნან თეშ გურშენ, ღორონთიშ მოწონას მივოდინუანთ. ნამ შემლებუნან თის გუვაკეთენთ-და, იეჰოვა აკურთხენს ჩქინ მონდომას დო მოუგენთ სატანას თე ბრძოლას!