იეჰოვაშ ხე ვა რე კუნტა

1. მუჭო ოძირუ მოსექ ისრაელეფიშ ეგვიპტეშე გიშაჸუნაფაშ დროს, ნამდა ონდუდ იეჰოვას?

ᲔᲑᲠᲐᲔᲚᲔᲤᲨᲐ მეჭარილ წერილს მოშინაფილ რენა ღორონთიშ ართგურ მსახურეფ, მიდგას განსაკუთრებულ რწმენა უღუდეს. თინეფშე ართ-ართ რე მოსე (ებრ. 3:2–5; 11:23–25). თიშ რწმენაქ ისრაელეფიშ ეგვიპტეშე გიშაჸუნაფაშ დროს ქიძირ. მოსეს ვა შქურნებ ფარაონშა დო თიშ ჯარშა, ქიმიენდჷ იეჰოვას, გეგშეჸუნ ღორონთიშ ხალხ ჭითა ზღვას დო ქიმიჸუნ უდაბნოშა (ებრ. 11:27–29). თიმწკუმა ხოლო, მუჟამსით ისრაელეფიშ უმენტაშიქ ეჭვ გემშეღ იეჰოვაშ მოხვარაშა, მოსეს ვა უდინუაფ თიშ რწმენა, ნამდა იეჰოვა ქიზრუნენდ მუშ ხალხშა. მოსეშ ნდობა ვართ გამტყუნებე. ღორონთიქ სასწაულით ქიმეჩ ოჭკუმალ დო წყარ მუშ ხალხის უდაბნოსa (გამ. 15:22–25; ფსალმ. 78:23–25).

2. მუშენ უწუ იეჰოვაქ მოსეს: „კუნტა რენ გიჩქუნო იეჰოვაშ ხე?!“ (რიცხ. 11:21–23).

² მართალ რე, მოსეს თეცალ ძალიერ რწმენა უღუდ, მარა ისრაელეფიშ ეგვიპტეშე გიშულაშე სოდგარენ ართ წანაშა, მუჟამსით ხალხიქ ხორც მითხუ, მოსექ ეჭვ გემშეღ იეჰოვაშ ძალაშა; თის ვადაჯერებუ, მუნერო შეიალებედ იეჰოვას, თეზმა ხალხის დასაბაღ ხორც ქიმეჩუკო უდაბნოს, სოდეთ მუთუნ ვეპალუდ. თე დროს იეჰოვაქ მოსეს უწუ: „კუნტა რენ გიჩქუნო იეჰოვაშ ხე?!“ (წეკითხით რიცხვეფიშ 11:21–23). თე მუხლის რაგადებულ იეჰოვაშ ხე ნიშნენს ღორონთიშ წმინდა შურს, თიშ მოქმედ ძალას. შხვა სიტყვეფით ქოფთქუათინ, იეჰოვაქ მოსეს უწუ: „სი თის ფიქრენქო, ნამდა ფთქუანქინ თინა ვა მაკეთებე?!“.

3. მუშენ რე ჩქინო ხოლო საინტერესო მოსეშ დო ისრაელეფიშ შემთხვევა?

³ შილებე თქვა ხოლო გორრჩქინუნა ეჭვ, ქიზრუნენდ დო ვარ იეჰოვა თქვან დო თქვან ოჯახიშ მატერიალურ საჭიროებეფშო. მორთით, დეტალურო გუვარჩუათ მოსეშ დო ისრაელეფიშ შემთხვევა დო ქიგებგათ, მუშენ მიშეღეს ეჭვ თიშა, ნამდა იეჰოვა ქიზრუნენდ თინეფშა. თეწკუმა ართო, გუვარჩუათ ბიბლიურ პრინციპეფ ხოლო, ნამუთ ქიმმეხვარებუნა, გემამნგარათ ნდობა იეჰოვაშ მიმართ დო ბჯერდან, ნამდა „თიშ ხე დღას ვედეკუნტარებ“.

ᲛᲣᲡ ᲑᲒᲣᲠᲐᲤᲚᲔᲜᲗ ᲛᲝᲡᲔᲨ ᲓᲝ ᲘᲡᲠᲐᲔᲚᲔᲤᲘᲨ ᲛᲐᲒᲐᲚᲘᲗᲨᲔ?

4. მუშენ გურჩქინდჷ ბრელ ისრაელს ეჭვიქ, დასურო ქიზრუნენდ დო ვარ იეჰოვა თინეფშა?

⁴ ისრაელეფს ეგვიპტეშე გიშულაშ დროს „შხვადოშხვა ერიშ ხალხიქ“ ხოლო ქეკაჸუნ დო თინეფ მუდგარენ პერიოდის ართო მიშეს უდაბნოს დუნაპირებ დიხაჸურე (გამ. 12:38; კან. 8:15). ისრაელეფს ეკაჸუნუნ თი ხალხის მებეზრჷ ირდღას მანანაშ ჭკუმუაქ დო ჭირება ქიდიჭყეს. თინეფს ბრელ ისრაელქ ხოლო გეიაჸუნ (რიცხ. 11:4–6). თე ხალხ თი ოჭკუმალეფს მიანატრუდ, ნამუთ ეგვიპტეს უღუდეს. თინეფქ მოსეს მიკართეს დო თის თხინდეს პასუხის. თე რთულ სიტუაციაქ მოსეს მთელ ყურადღება მუშ დუდშა გეგნაღალაფუ დო იფიქრჷ, ნამდა მუქ ოკო მიკაჯინუკო თე ხალხის (რიცხ. 11:13, 14).

5, 6. მუჭო იმოქმედ შხვა ერეფიშ ხალხიქ ბრელ ისრაელშა დო მუშ გურაფა შემლებუნა თავრეშე?

⁵ მუჭოთ ვორწყეთ, ისრაელეფს შხვა ერეფიშ ხალხშე გეგნადვეს უმარდულობაქ. თინეფცალო ჩქი ხოლო შილებე გეგნმადვან უმარდულ ხალხიშ განწყობაქ დო უკმაყოფილო ვორდათ თი ირფელით, მუდგას იეჰოვა ორთჷ ჩქინო. თექ შილებე თიმწკუმა მოხვადას, მუჟამსით ეკვოჭუდათ იჸი თის, მუთ ულირს მიღუდეს, ვარდა მენჯარებუნა თი ირფელიშ, მუთ შხვეფს უღუნა. მარა, თეშ გინაწონს, ირნერ სიტუაციას კმაყოფილ ქიპჸით-და, ბედნერეფ იპჸუაფუთ.

⁶ ისრაელეფს ოკო შუდესკო, მუშ პირობა მეჩჷ თინეფს იეჰოვაქ. თიქ უწუ, ნამდა მატერიალურო მუთუნ ვა მაკორდუდეს. მარა ღორონთიშ თე სიტყვეფ დუნაპირებ დიხას შისრულებუდ დო ვართ ხოლო უდაბნოს. თეშნერო, ჩქი ხოლო, თიშ მანგიორო, ნამდა მთელ ყურადღება თიშა გეგნიბღათ, მუთ ამდღა თე ქვეყნიერებას ვა მიღუნა, ჯგირ იჸუაფ, ირიათო თიშე იფიფქრათ, მუდგას ღორონთ ახალ ქვეყნიერებას მოპირუნა. შემლებუნა დეფიფქრათ თი ბიბლიურ მუხლეფშე ხოლო, ნამუთ მიმეხვარებუნა, უმოსო მივენდათ იეჰოვას.

7. მუშენ შემლებუნა ბჯერდან, ნამდა იეჰოვაშ ხე ვა რე კუნტა?

⁷ მუჭოთ ფშუნა, იეჰოვაქ მოსეს კითხჷ: „კუნტა რენ გიჩქუნო იეჰოვაშ ხე?!“. საინტერესო რე, მუშენ გამახვილ იეჰოვაქ ყურადღება ხეშ სიგინძაშა. შილებე თეთ მოსეშა თიშ ძირაფა ოკოდუკო, ნამდა ხვალე ძალიერ ვა რენ, მუშ ძალა ირდიხაშა ანჭუ. თის შეულებ სოდეთ ოკონ, თექ გიმირინუას მუშ დიდ ძალა. ღორონთის შეულებუდ ისრაელეფს, სოდგარენ ოდინაფუს, უდაბნოს ხოლო ქიმეჩუკო ქიანაშ ხორც. „ძალიერ ხეთ დო გოთინილ კილეთ“ იეჰოვაქ ქაძირუ მუშ ხალხის, ნამდა თინეფიშ მახვარებელო შეულებუდ ირდიხაშა ანჭუკო (ფსალმ. 136:11, 12). თეშნერო, მიჭირან თიმწკუმა, ჩქი ხოლო შემლებუნა ბჯერდან, ნამდა იეჰოვაშ ხე ჩქინდა ხოლო ქუმანჭუ დო ქიმმეხვარებუნა (ფსალმ. 138:6, 7).

8. მუ მიმეხვარებუნა, თიქ ვა მაღოლან, მუდგაქ ხალხის აღოლ უდაბნოს? (ქოძირით სურათ).

⁸ იეჰოვაქ მალას შეასრულ სიტყვა დო ხალხის ხორც ქიმეჩ. თიქ ჭყორ ქუმორაჸ. თინეფს გინაცუმალო უღუდეს ჭყორიშ ხორც, მარა ისრაელეფს მადლობა ხოლო ვა უთქუალუნა იეჰოვაშა თე სასწაულშო. თე ჰარამ ხალხის დღა დო გვერდის მეუღუდ დო მეუღუდ ჭყორიშ ხორც ოშაყარალო. იეჰოვა გარისხჷ თე ხალხიშ ჰარამობაქ დო გოჭყვიდ თინეფ (რიცხ. 11:31–34). ჩქი მუშ გურაფა შემლებუნა თე შემთხვევაშე? ფრთხილას ოკო ვორდათ, ნამდა ირიათო უმოსიშ შიბაშ აზრ ვა მიღუდან. ვა უღჷ მნიშვნელობა, ქონებიერ ვორეთ დოვარ ღარიბ, მთელ ყურადღება „ქონებაშ ზეცას შაყარუაშა“ ოკო მაფუდან გინოღალირ. თეშ კეთებას იეჰოვა დო იესოწკუმა ხოლოშიან ურთიერთობაშ გავითარება მიმეხვარებუნა (მათ. 6:19, 20; ლუკ. 16:9). თაშ ქიმიფქციებუთ-და, შემლებუნა ბოლოშა ბჯერდან, ნამდა იეჰოვა ვამმარკენა აუცილებერს.

9. მუშა შემლებუნა ვორდათ ბოლოშა დარწმუნებულ?

⁹ იეჰოვა ამდღა ხოლო ზრუნენს მუშ ხალხშა. მუშო ოკო რაგად, თენა ვა ნიშნენს, ნამდა დღას ვა გამჭირდუნა მატერიალურო ვარდა დღას ვეპჸით შქირენულ.b მარა შემლებუნა დარწმუნებულ ვორდათ, ნამდა იეჰოვა მუთუნით ვემმოტენა. მუდგა რთულ სიტუაციას ვა ვორდათინ, თინა ქომუჩანა ძალეფს გარზებელო. მუჭო შემლებუნა ვოძირუათ, ნამდა ვონდუთ იეჰოვას დო ბჯერა, ვემმოტენან? გუვარჩუათ ჟირ სიტუაცია: 1) მუჟამსით ფინანსურო მიჭირა დო 2) მუჟამსით თიშე მნერვიანენთ, მუთ ეიბჯუმუათ დუდ ასაკშა მიშულაშ დროს.

ᲛᲣᲟᲐᲛᲡᲘᲗ ᲤᲘᲜᲐᲜᲡᲣᲠ ᲞᲠᲝᲑᲚᲔᲛᲔᲤ ᲛᲘᲦᲣᲜᲐ

10. მუ ფინანსურ პრობლემეფქ შილებე მაშუან?

¹⁰ მუთ უმოს ხოლოს იპჸით თე ქვეყნიერებაშ აღსასრულწკუმა, თით უმოსო ველუთ, ნამდა ეკონომიკურო უმოსო გაჭირდუ. მაგალთო, პოლიტიკურ არეულობეფიშ, ომეფიშ, სტიქიურ უბედრობეფიშ ვარდა პანდემიეფიშ გურშენ შილებე ქუმაშუან ვეველუთინ ფერ ხარჯეფქ, მივოდინუათ ქონება ვარდა დატებელქ მაჸუან ჸუდექ. შილებე ახალ სამუშაშ გორუაქ მაჸუან დაჭყაფალქ ვარდა გვალო შხვადო მაჸუან გინაულარქ ოჯახამო, ნამდა დუდ გეიბჯუმუათ. თეცალ სიტუაციეფს, მუ მიმეხვარებუნა თიცალ გადაწყვეტილებეფიშ მეღებას, სოვრეშეთ იძირედას იჸი, ნამდა ვონდუთ იეჰოვაშ ხეს?

11. მუ მიმეხვარებუნა ეკონომიკურ პრობლემეფიშ დროს? (ლუკ. 12:29–31).

¹¹ პირველ დო არძაშ უმოს მთავარ, მუთ მანგარო ქიმმეხვარებუნა, თენა რე, ქიბლოცათ დო იეჰოვას ქივეჩუათ, მუ მაწუხენა (იგავ. 16:3). ქოთხით თის სიბრძნე ჭკვერულ გადაწყვეტილებეფიშ მიოღებელო დო სიმშვიდე, ნამდა მეტო ვეწუხათ თქვან სიტუაციაშენ (წეკითხით ლუკაშ 12:29–31). თინა ხოლო ქოთხით ღორონთის, ნამდა ქიმგეხვარან, ქიგეჯერდათ აუცილებერს (1 ტიმ. 6:7, 8). თეწკუმა ართო, გეგმირკვით ჩქინ პუბლიკაციეფ, ნამდა ქიგეგათ, მუ ოკო აკეთათ ეკონომიკურ პრობლემეფიშ დროს. ბრელს მანგარო მეხვარ ჩქინ ვებსაიტის jw.org თე საკითხწკუმა დაკავშირებით გედვალირ სტატიეფქ დო ვიდეოეფქ.

12. ნამ კითხვეფშე ოკო დეფიქრას ქრისტიანქ, ნამდა არძაშ უჯგუშ გადაწყვეტილება მიღას მუშ ოჯახშო?

¹² ნამთინექ გინოჭყვიდ, ოჯახ ქიდიტუკო დო შხვა ქიანაშა მიდართუკო ომუშებშა. მარა ბრელ შემთხვევაშე ქიძირ, ნამდა თეშ კეთება ვა რე ჭკვერულ. ონდო ახალ სამუშას დიჭყანდათ, ხვალე თიშე ვეფიქრათ, მუსხი ფარას იშინთ; პირველ რიგის თიშე დეფიქრით, მუჭო იმოქმედენს თე სამუშა თქვან დო თქვან ოჯახიშ სულიერობაშა (ლუკ. 14:28). ქოკითხით თქვან დუდის: მუჭო იმოქმედენს ჩქიმ ულა ჩქინ ქორწინებაშა? ქეშმალებენო კრებაშ შეხვალამეფშა დო მსახურებაშა გილულა დო და დო ჯიმალეფწკუმა ურთიერთობა? სქუალეფ ქორჸუნან-და, თეცალ მუდგარენშე ხოლო დეფიქრით: იეჰოვაქ დუმავალ, ნამდა თიშ მოსაწონო მობრდე დო ქიგვოწურუე ჩქიმ სქუალეფ. მუჭო შემალებე თენა, თინეფწკუმა ვეპჸიქ-და? (ეფეს. 6:4). გადაწყვეტილება თიშ მიხედვით მიღით, მუდგას იეჰოვა ფიქრენს, დო ვა ურჩქილათ თი მეგობრეფს დო ნათესეეფს, მით პატის ვა ცენა ბიბლიურ პრინციპეფს.c ჩქინ ჯიმას, ტონის, ნამუთ დასავლეთ აზიას ცხოვრენს, ბრელშა მუკურჩქინდჷ ჯგირ სამუშაქ შხვა ქიანას. მარა თე საკითხშე ლოცვაშ დო მეუღლეწკუმა ჩიებაშ უკულ, თიქ გეგნოჭყვიდ, ვარია ქოთქუკო თეცალ სამუშაშენ. თინეფქ ქიმირაგადუეს, უმოს ეკონომიურო იცხოვრესკო. ულირს იშინანსინ, ტონი იჩიებ: „დოფსქიდინ თეს ბრელ კურთხევაქ მაჸუნ. მაგალთო, შემალებუ მუსხირენ კოჩის ქიმვეხვარიკო იეჰოვაშ გაჩინებაფას. ჩქიმ სქუალეფს ხოლო მანგარო უჸორა იეჰოვა დო ირფელს ორთუნა თიშ მსახურებას. მთელ ოჯახიქ ქიდიბგურეთ, ნამდა მათეშ 6:33-Ს ინოჭარილ პრინციპით ქიფცხოვრენთ-და, იეჰოვა მუთუნით ვემმოტენა“.

ᲛᲣᲟᲐᲛᲡᲘᲗ ᲛᲜᲔᲠᲕᲘᲐᲜᲔᲜᲗ, ᲛᲣᲭᲝ ᲔᲘᲑᲯᲣᲛᲣᲐᲗ ᲓᲣᲓ ᲝᲠᲩᲘᲜᲔᲚᲝᲑᲐᲡ

13. მუშ კეთება იჸუაფ ჭკვერულ ასეშე, ნამდა ქიბზრუნათ ჩქინ მომავალშო?

¹³ იეჰოვაშ ხეს ვონდუთ დო ვარ თექ შილებე თიმწკუმა ხოლო გიმიცადას, მუჟამსით თიშე მნერვიანენთ, მუთ ეიბჯუმუანთ დუდის ასაკშა გემშურთინ. ბიბლია ელამჩანა, ნამდა ქიფიფქრათ დო ქიფხანდათ მომავალშო (იგავ. 6:6–11). საშვალება ქომღუნან-და, ჭკვერულ იჸუაფ, მუდგაინ გეგნობდვათ მომავალშო, მუშენდა მიჩქუნა, ნამდა ფარა მუდგარენ დონეშა თხილანს კოჩის (ეკლ. 7:12). მარა ფრთხილას ოკო ვორდათ, ნამდა ჩქინ ცხოვრებაშ მთავარ მიზანო ფარაშ შაყარუაქ ვეგნირთას.

14. მუჭო მოხვარუნა ებრაელეფიშ 13:5, ნაბეტან ვეპწუხათ მომავალშენ?

¹⁴ იესოქ ართ იგავით მოძირუეს, ნამდა თიცალ კოჩ, მით ფარას შაყარანს, მარა „ღორონთიშ თოლს ვა რე ქონებიერ“, უჭკუე რე (ლუკ. 12:16–21). მითინს ვა მიჩქუნა, მუ მოხვადუ ჭუმან (იგავ. 23:4, 5; იაკ. 4:13–15). თეწკუმა ართო, ქრისტექ თქუ, ნამდა, მიდგას თიშ მიმაჸუნალობა ოკოდ, სირთულეეფ აღვენუდ დო მზათ ოკო რდუკო მთელ მუშ ქონებაშ დათმებელო ხოლო (ლუკ. 14:33). ზუსტას თექ მოხვად პირველ საუკუნეს იუდეას მახორუ ქრისტიანეფიშ შემთხვევას, მარა თინეფქ თენა ხიოლით აკეთეს (ებრ. 10:34). ამდღა ხოლო ბრელ ჩქინ და დო ჯიმა ფინანსურო იზარალებ თიშ გურშენ, ნამდა ნამთინ პოლიტიკურ პარტიას ვა უკინენს ხუჯის (გამოცხ. 13:16, 17). მუ ოხვარ თინეფს თეცალ მზადყოფნაშ გიმორჩქინას? თე და დო ჯიმალეფს ჯერა იეჰოვაშ დუნაპირებუშ: „დღას ვა დოიტენქ დო დღას ვემგოტენქ“ (წეკითხით ებრაელეფიშ 13:5). თაშ ნამდა, ჭკვერულო იფქციებუთ, მუჟამსით ფიფქრენთ მომავალშო, მარა, ვეველუთინ ფერ მუდგარენქ ქუმოხვად-და, დარწმუნებულ ვორეთ, ნამდა იეჰოვა ვემმოტენა.

15. მუჭო შეულებუნა მშობლეფს, გაწონასწორებულ შეხედულება უღუდან მუნეფიშ სქუალეფშენ? (ქოძირით სურათ).

¹⁵ ნამთინე ქიანას სქუალეფს უმენტაშო თიშ გურშენ ეიორჩქინანა, ნამდა მუნეფ დირჩინუნან, სქუალეფქ იმუშუან დო ემინჯან თინეფს. თინეფ სქუალეფს, თაშ ქოფთქუათინ, „საპენსიო ფონდცალო“ უჯინენა. ვარინ, ბიბლია თის იჩიებ, ნამდა მშობლეფქ ოკო იზრუნან სქუალეფშა (2 კორ. 12:14). მუშო ოკო რაგად, მუჟამსით ირჩინუნა, მშობლეფს შილებე დესაჭირან მიკოჯინაქ დო სქუალეფ ხიოლით ომინჯუნა თინეფს (1 ტიმ. 5:4). მარა მშობლეფს ოკო არჩქილედან, ნამდა ნამდვილ ხიოლ თიმწკუმა აღვენუნა, მუჟამსით სქუალეფს იეჰოვაშ მსახურეფო მორდუნა დო თიშ მსახურებას შეუნწყუნა ხეს. თაშ ნამდა, დიდა დო მუმაქ სქუალეფ თი მიზანით ოკო ვა რდასჷ, ნამდა უკულ თინეფქ ქიშუან ფარა დო აშო მუკულუან (3 იოან. 4).

16. მუჭო შეულებუნა მშობლეფს, ქუდაგურუან მუნეფიშ სქუალეფს დუდიშ ეჯუმალა? (ეფეს. 4:28).

¹⁶ მუჟამსით სქუას დუდიშ ეჯუმალას ოგურუანთ, თქვან მაგალითით ქაძირეთ, მუჭო მიენდას იეჰოვას. ჭიჭენობაშე ქუდაგურეთ ხანდაშ ფას (იგავ. 29:21; წეკითხით ეფესოელეფიშ 4:28). მუჟამსით თქვან სქუა ჭიჭე გემწირდუ დო სკოლაშა მიდურს, ქიმეხვარით, ჯგირო იგურუას. ჯგირ იჸუაფ, ქრისტიან მშობლეფქ გეგმირკვიან დო გეგმირინუან ბიბლიურ პრინციპეფ, ნამდა ქიმეხვარან სქუალეფს, ჭკვერულ გადაწყვეტილებეფ მიღან განათლებაშ მეღებაწკუმა დაკავშირებით, მუშენდა თინეფს შეიალებუან მუნეფიშ დუდიშ ეჯუმალაქ დო, თეწკუმა ართო, სრულ მონაწილებაშ მეღებაქ ღორონთიშ მსახურებას, მაგალთო პიონერო მსახურებაქ.

17. მუშა შემლებუნა ვორდათ დარწმუნებულ?

¹⁷ იეჰოვაშ მსახურეფს შეულებუნა ჯერდან, ნამდა თის ქოთ ოკო დო ქოთ შეულებ იზრუნას თინეფშა. მუთ უმოს ხოლოშა მეურთ თე ქვეყნიერებაშ აღსასრულშა, თით უმოსო ველუთ, ნამდა გეგმიცადებ ჩქინ ნდობა იეჰოვაშ მიმართ. მარა, მუდგაქ ვა მოხვადასინ, ბოლოშა ბჯერდან, იეჰოვა გეგმირინუანს მუშ ძალას ჩქინდა მახვარებელო. შემლებუნა დარწმუნებულ ვორდათ, ნამდა თიშ „ძალიერ ხე დო გოთინილ კილე“ ირო ქუმანჭუ ჩქინდა.