იცხოვრით რწმენათ დო ვართ ხოლო თით, მუდგას ორწყეთ

1. მუშენ რდჷ მოციქულ პავლე კმაყოფილ მუშ ცხოვრებათ?

ᲞᲐᲕᲚᲔ მოციქულს უჩქუდ, ნამდა მალას დოჸვილუნდეს, მარა ღურაშახ თამამას არაგადედ, ნამდა კმაყოფილ რდჷ მუშ მიკნაულა ცხოვრებათ. მუჟამსით ულირს იშინანდჷ, თიქ თქუ: „ორულარ შარა ბოლოშა გემკიბრულ დო რწმენა ვამდინუაფ“ (2 ტიმ. 4:6–8). პავლექ ჭკვერულ გადაწყვეტილებეფ მიღჷ დო ცხოვრება იეჰოვაშ მსახურებას მეუძღვინ. ათეშენ თინა დარწმუნებულ რდჷ, ნამდა იეჰოვაშ თოლს მოწონა უღუდ. ჩქი ხოლო ჯგირ გადაწყვეტილებეფიშ მეღებათ შემლებუნა იეჰოვას გურ გაუხარათ. მუ მიმეხვარებუნა თეშ კეთებას?

2. მუს ნიშნენს რწმენათ ცხოვრება?

² პავლექ მუშ დუდიშ გურშენ დო შხვა ართგურ ქრისტიანეფშენ თქუ: „ჩქი რწმენათ ფცხოვრენთ დო ვართ ხოლო თით, მუდგას ვორწყეთ“ (2 კორ. 5:7). მუშ რაგად ოკოდ პავლეს თეთ? ადამიან, ნამუთ, მუდგას ორწყენ თით ცხოვრენს, თიშ მიხედვით ღებულენს გადაწყვეტილებეფს, მუთ შეულებ თოლით ძირას, ჸუჯით მირჩქილუას დო ფიზიკურო იგინას. მარა პიროვნება, ნამუთ რწმენათ ცხოვრენს, ფიქრენს, მუ მოწონს იეჰოვას დო თეშ მიხედვით ღებულენს გადაწყვეტილებას. თიშ მოქმედებეფშე იძირე, ნამდა ჯერსჷ, იეჰოვა აკურთხენსინ, დო დარწმუნებულ რე, თიშ რჩევეფიშ მეჸუნა ჯგირ შედეგეფს ქუმუღანს (ფსალმ. 119:66; ებრ. 11:6).

3. მუ ჯგირ შედეგეფს მომღანა რწმენათ ცხოვრება? (2 კორ. 4:18).

³ მუშო ოკო რაგად, რე გადაწყვეტილებეფ, ნამუთ თიშ მიხედვით მაფუნა მიოღებელ, მუდგას ვორწყეთ, იბრჩქილუაფუთ ვარდა ფიზიკურო ბგინაფლენთ. მარა მნიშვნელოვან გადაწყვეტილებეფს ირო ხვალე ფიზიკურ შეგრძნებეფიშ მიხედვით ქობღებულენთ-და, თენა გლახას ქუმომღანა. მუშენ იფჩიებუთ თეს? თიშენ, ნამდა მინშა ჩქინ ფიზიკურ შეგრძნებეფ მოჩილითუანა; ირო ვა მოჩილითუანინ ხოლო, მუდგას ვორწყეთინ თით ცხოვრებას ქიმვარჩქვანით-და, საბოლათ შილებე გუვაკეთათ მუდგაინ თიცალ, მუთ იეჰოვას ვემეწონებ (ეკლ. 11:9; მათ. 24:37–39). მარა რწმენათ ქიფცხოვრენთ-და, უმოსო შემალებენა თიცალ გადაწყვეტილებეფ მიბღათ, ნამუთ „მოსაწონ რე უფალშო“ (ეფეს. 5:10). იეჰოვაშ რჩევეფიშ მეჸუნა სიმშვიდეს დო ნამდვილ ბედნერობას ქუმომღანა (ფსალმ. 16:8, 9; ეს. 48:17, 18). თეს გეძინელ, რწმენათ ქიფცხოვრენთ-და, ულიებ სიცოცხლეს მიბღენთ (წეკითხით 2 კორინთელეფიშ 4:18).

4. მუჭო ოკო გებგათ, რწმენათ ფცხოვრენთ დოვარ მუდგას ვორწყეთინ თით?

⁴ მუჭო ოკო გებგათ, რწმენათ ფცხოვრენთ დოვარ მუდგას ვორწყეთინ თით? შემლებუნა დეფიფქრათ: მუშ მიხედვით ბღებულენქ გადაწყვეტილებეფს, მუდგას თოლით ვორწყექინ თით დოვარ იეჰოვაშ რჩევეფს მეპჸუნქ? მორთ გუვარჩუათ, მუჭო შემლებუნა სუმ მნიშვნელოვან მხარეს ვოძირუათ, ნამდა რწმენათ ფცხოვრენთ: 1) სამუშაშ გიშაგორუა, 2) მეუღლეშ გიშაგორუა დო 3) თეოკრატიულ მითითებეფიშ მეჸუნა. თითოულწკუმა ქიფჩიებუთ, მუ ოკო გეფთვალისწინათ, ნამდა ჯგირ გადაწყვეტილებაშ მეღებაქ ქეშმალებუან.

ᲡᲐᲛᲣᲨᲐᲨ ᲒᲘᲨᲐᲒᲝᲠᲣᲐ

5. მუშე ოკო დეფიფქრათ, მუჟამსით სამუშაშ დოჭყაფას გინოპჭყვიდუნთ?

⁵ მუშო ოკო რაგად, არძას მოკონა, ემაჯუმედან ჩქინ დუდ დო ოჯახ ხოლო (ეკლ. 7:12; 1 ტიმ. 5:8). რე სამუშეფ, სოდეთ თიცალ ჯგირ ხელფასის ირზენა, ნამდა ხვალე ირდღაშიან ხარჯეფიშ ოფორალო ვარინ, ჭიჭე ფარა კინაჩუალარო ხოლო სქიდუ. მარა ნამთინე სამუშას თისხით ჭიჭეს გაფულენა, ნამდა დუდ აღინე კოჩის დო მეტ ვარ. ათეშენ, მუშო ოკო რაგად, სამუშაშ დოჭყაფაშ დროს ნორმალურ რე, ფიფქრენდათ, მუზმას გინომგანა. მარა სამუშაშ დოჭყაფაშ საკითხის ხვალე ხელფას მუზმა იჸინ თეთ გეგნოპჭყვიდუნთ-და, გიშურს, ნამდა თით ფცხოვრენთ, მუდგას ვორწყეთ.

6. მუჭო შემლებუნა სამუშაშ გიშაგორუაშ დროს ვოძირუათ, ნამდა რწმენათ ფცხოვრენთ? (ებრ. 13:5).

⁶ რწმენათ ქოფცხოვრენთ-და, ხვალე ხელფასის ვარ, თის ხოლო ქუგუჩანთ გურს, მუჭო შილებე იმოქმედას თე სამუშაქ იეჰოვაწკუმა ჩქინ ურთიერთობაშა. მაგალთო, ოკო დეფიფქრათ: მუთუნ თიცალ ხომ ვა მაჸი ოკეთებელ, მუთ იეჰოვას ჯოგჷ? (იგავ. 6:16–19). ვარდა ხომ ვემეცილებ თე სამუშა სულიერ საქმეეფს დო ბრელ ხანით ხომ ვა მაჸი ოჯახ დატებელ? (ფილ. 1:10). თე კითხვეფშე ნამდგაინიშ პასუხ „ქო“ ქორენ-და, ალბათ, უჯგუშ იჸი, ვედიპჭყათ თე სამუშა, სამუშაშ შიბა მანგარო ჭირდასინ ხოლო. რწმენათ ქოფცხოვრენთ-და, თე საკითხის მეღებულ ჩქინ გადაწყვეტილებაშე ოკო ირწყებედას, ნამდა დარწმუნებულ ვორეთ, იეჰოვა მუდგაინს გამკომრჩქინანა ოჯახიშ ეიოჯუმალარო (მათ. 6:33; წეკითხით ებრაელეფიშ 13:5).

7, 8. მუჭო ოძირუ ართ ჯიმაქ, ნამდა რწმენათ ცხოვრენს? (ქოძირით სურათ).

⁷ გუვარჩუათ ართ ჩქინ ჯიმაშ, ხავიერიშ,a შემთხვევა, ნამუთ სამხრეთ ამერიკას ცხოვრენს, დო ქიდვეკვირათ, მუჭო დესაჭირ თის რწმენათ მოქმედებაქ. ხავიერ იჩიებ: „თიცალ ჯგირ სამუშაქ გამკომრჩქინდჷ, სოდეთ ჟირშა უმოს იჸუაფუდ ხელფას თი სამუშაშ კარს, ნამუთ მიღუდ დო საქმე ხოლო მანგარო მოპწონდუნ ფერ რდჷ“. მარა ხავიერს პიონერობა ხოლო მანგარო ოკოდ. თინა იჩიებ: „გასაუბრებაშახ ქიბლოც დო იეჰოვას მოხვარა ქოფთხი, მუშენდა დარწმუნებულ ვორდჷ, თის უმოს ჯგირო უჩქუდ, მუ უჯგუდ ჩქიმო. მართალ რე, მოკოდ, უჯგუშ ადგილ დო ხელფას მიღუდუკო, მარა მუთუნით ვა მოკოდ, სამუშაქ სულიერ მიზნეფიშ მეჭირინაფას მეცილუკო“.

⁸ ხავიერ იშინანს: „გასაუბრებაშ დროს უნჩაშიქ მიწუ, ნამდა სამუშაშ უკულ ხოლო მანგარ ხშირას მაჸიდ გაჩერებელ. მა ტაქტიანო გეუნწყჷ, ნამდა ვეგშმალედ თენა, მუშენდა ღორონთის ვომსახურუდ დო თე საქმეს მეცილებუდ“. ხავიერქ ვარია ქოთქუ თე სამუშაშე. ჟირ მარაშა თიქ პიონერობა ქიდიჭყჷ დო მუსხირენ თუთაშა ქიშუ სამუშა, სოდეთ ნაკლებ აჸიდ ომუშებელ. ხავიერ იჩიებ: „იეჰოვაქ ქიმირჩქილუ ჩქიმ ლოცვეფ დო ქიმმეხვარ თიცალ სამუშაშ შიბას, ნამუთ ხეს შემინწყუნდ პიონერობას. მოხიოლ, ნამდა თიცალ სამუშა მიღჷ, ნამუთ საშვალებას მარზენს, უმოს დრო დაუთმე იეჰოვაშ მსახურებას დო თანაქრისტიანეფს“.

9. მუ დიგურეთ ტრეზორიშ შემთხვევაშე?

⁹ მუ ოკო ფქიმინათ, რწმენათ ცხოვრებას უკვე მიღუნან თი სამუშა ქუმოცილუნან-და? დეფიფქრათ ტრეზორიშ შემთხვევაშე, ნამუთ კონგოს ცხოვრენს. თინა იჩიებ: „მანგარ ჯგირ სამუშა მიღუდ. ულირ სამუშაშ კარს სუმშა უმოსის მიგანდეს დო ჯგირ ადგილ ხოლო მიღუდ“. მარა ტრეზორს ირიათო უჩირთუდ კრებაშ შეხვალამეფ, მუშენდა სამუშაშ უკულ ხოლო აფუდ გაჩერებელ დო ომუშებელ. ხვალე თენა ვარინ, მინშა თანამშრომელეფ ურაგადუდეს, ტყურა ქოთქუკო. ტრეზორს ოკოდ მუშობაშ მეტება, მარა შხვა სამუშაქ ვაშუკონ თეშა ხოლო ოშქურუდ. მუქ მეხვარ თის თე საკითხიშ გინოჭყვიდუას? თინა იჩიებ: „აბაკუმიშ 3:17–19-ქ მიმეხვარ თიშ ინონჭაფას, ნამდა ჸუდეშა ფარაქ ვამმაღინუკონ ხოლო, იეჰოვა მუდგაინნერო ქიზრუნენდ ჩქიმდა. თაშ ნამდა, მივოტე თი ადგილს მუშობა. ბრელ სამუშას უნჩაშ ფიქრენს, ნამდა ჯგირ ხელფას ქიმერჩ-და, სი ირფელს დათმენქ, თინეფ შქას ოჯახის დო სულიერ საქმეეფს. მანგარო მოხიოლ, ნამდა თაშ ვემიფქცი დო დოფთხილე იეჰოვაწკუმა ურთიერთობა. ართ წანაშა, თიშ მოხვარათ, ქიფში ჯგირ სამუშა, ნამუთ ქოთ მოკრძალებურო ცხოვრებას მოხვარ დო ქოთ უმოს დრო მიღჷ სულიერ საქმეეფშო. მუჟამსით იეჰოვას გივორინუანთ პირველ ადგილს ცხოვრებას, შილებე ფინანსურო გამჭირდან, მარა თინა მუთუნით ვემმოტენა“. თაშ რე, იეჰოვაშ რჩევეფს ქიმეპჸუნთ დო მუდგას მოპირუნან თიშ ქობჯერან-და, შემალებენა იფცხოვრათ რწმენათ დო მიბღათ ღორონთიშ კურთხევეფ.

ᲛᲔᲣᲦᲚᲔᲨ ᲒᲘᲨᲐᲒᲝᲠᲣᲐ

10. მუ საფრთხეშ წოხოლე შილებე გებდირთათ მეუღლეშ გიშაგორუაშ დროს?

¹⁰ ქორწინება იეჰოვაშ საჩუქარ რე დო მუთუნ გასაკვირ ვა რე, მიდგაინს ოკოდას დაოჯახება. შილებე თე საკითხიშ გინოჭყვიდუაშ დროს დაქ დეკვირას ჯიმაშ ხასიათის, მეჯინას, რეპუტაციას, ფინანსურ მდგომარეობას, ოჯახურ პასუხიშმგებლობეფს დო თის ხოლო, მუჭო გინაფლენს თიწკუმა დუდის.b მუშო ოკო რაგად, თე მხარეეფ გურიშ გაჩამალ რე. მარა დაქ დაოჯახებაშ საკითხ ხვალე თე ირფელიშ მიხედვით გეგნოჭყვიდ-და, გიშურს, ნამდა თით ცხოვრენს, მუდგას თოლით ორწყე.

11. მუჭო შემლებუნა მეუღლეშ გიშაგორუაშ დროს ვოძირუათ, ნამდა რწმენათ ფცხოვრენთ? (1 კორ. 7:39).

¹¹ იეჰოვას მანგარო ოხიოლ, მუჟამსით ჩქინ და დო ჯიმალეფ მეჸუნა თიშ რჩევეფს მეუღლეშ გიშაგორუაშ დროს. მაგალთო, ღორონთიშ მსახურეფ ალერჩქილუანა თიშ რჩევას დო „ნაბეტან ახალგაზრდეფ“ რენან თეშ ვეჭყანა რომანტიკულ ურთიერთობას (1 კორ. 7:36). თეს გეძინელ, მეუღლეშ გორუაშ დროს თინეფ თიცალ თვისებეფს ოკვირუნა, ნამდგაშეთ იეჰოვა იჩიებ, ნამდა ოკო უღუდას ჯგირ ქომონჯის ვარდა ოსურს (იგავ. 31:10–13, 26–28; ეფეს. 5:33; 1 ტიმ. 5:8). თეწკუმა ართო, თინეფ მეჸუნა 1 კორინთელეფიშ 7:39-ს (წეკითხით) ინოჭარილ რჩევას დო ურთიერთობას ვეჭყანა თიცალ ადამიანწკუმა, მით ვა რე იეჰოვაშ მოწმე. თინეფ რწმენათ ცხოვრენა დო ჯერა, ნამდა ირკოჩიშ უჯგუშო იეჰოვას შეულებ იზრუნას თინეფიშ ემოციურ საჭიროებეფშა (ფსალმ. 55:22).

12. მუს ბგურაფლენთ როზაშ მაგალითშე?

¹² გუვარჩუათ კოლუმბიას მახორუ ართ დაშ, როზაშ, მაგალით. სამუშაშ გურშენ თის ხშირას უხვადუდ ურთიერთობა ართ კოჩწკუმა, ნამუთ ვა რე იეჰოვაშ მოწმე. თე კოჩის მეწონ როზაქ დო თის ხოლო გურჩქინდჷ ინტერესიქ თიშ მიმართ. როზა იჩიებ: „თინა მანგარ ჯგირ პიროვნებათ იძირედ, ირკოჩის ოხვარუდ, ვართ სიგარეტის შუნდჷ, ვართ წამალს ირთუდ დო ნაბეტანს ხოლო ვა შუნდჷ; მა ხოლო მანგარ ჯგირო მოქცუდ. თის ზუსტას თი თვისებეფ უღუდ, მუნერით მოკოდ, ჩქიმ ქომონჯის უღუდუკო. აკა თინა ორკუდ, ნამდა იეჰოვაშ მოწმე ვა რდჷ. თიშა ვარიაშ რაგადიქ გამჭირდჷ, მუშენდა, სინამდვილეს, გურით ვა მოკოდ თეშ კეთება. თეს თინა ხოლო გიაძინუდ, ნამდა თიმ პერიოდის დუდის ხვალე ბგინაფლენდჷ, დაქორწინება მოკოდ, მარა ჩქინ ორგანიზაციას მითინს ვეშეფხვად“. როზაქ ხვალე თით ვემოქმედ, მუდგას ორწყედ. თიქ დეფიქრჷ, მუჭო იმოქმედენდ მუშ გადაწყვეტილება იეჰოვაწკუმა ურთიერთობაშა, ათეშენ ირფელ თეშ გაკეთ, ნამდა მუთუნნერ კონტაქტ ვა უღუდუკო თი კოჩწკუმა. თე ირფელიშ უკულ ჭიჭე ხანშა როზა მახარობელეფიშ სკოლაშა მიწვიეს დო ამდღა სპეციალურ პიონერო მსახურენს. თინა იჩიებ: „იეჰოვაქ კურთხევეფით ემოფშჷ დო ასე მანგარ ბედნერ ვორექ“. მართალ რე, ირო ვა რე ადვილ, რწმენათ იცხოვრე, განსაკუთრებულო თიმწკუმა, მუჟამსით საქმე ემოციეფს ოხუ, მარა თეშ კეთება მართალო ღირჷ.

ᲛᲣᲟᲐᲛᲡᲘᲗ ᲝᲠᲒᲐᲜᲘᲖᲐᲪᲘᲐᲨᲔ ᲛᲘᲗᲘᲗᲔᲑᲔᲤᲡ ᲑᲦᲔᲑᲣᲚᲔᲜᲗ

13. ორგანიზაციაშე მითითებეფიშ მეღებაშ დროს, მუჭო შილებე იძირას, ნამდა თით ფცხოვრენთ, მუდგას თოლით ვორწყეთ?

¹³ ჩქი ხშირას ბღებულენთ მითითებეფს კრებაშ უხუცესეფშე, რაიონულ ზედამხედველშე, ფილიალშე ვარდა ხელმძღვანელ საბჭოშე. მარა მინშა შილებე ვენვანჭუდათ, მუშენ მიბღით თეცალ მითითება. თეწკუმა ართო, შილებე თე მითითებაშ გლახა მხარეეფშე ფიფქრენდათ ვარდა ხოლო ჯიმალეფიშ არასრულყოფილებაშა გეგნიბღათ მთელ ყურადღება. თეცალ დამოკიდებულება თიშ მაძირაფალ იჸი, ნამდა თით ფცხოვრენთ, მუდგას ვორწყეთ.

14. ორგანიზაციაშე მითითებეფიშ მეღებაშ დროს მუ მიმეხვარებუნა, ვოძირუათ, ნამდა რწმენათ ფცხოვრენთ? (ებრ. 13:17).

¹⁴ რწმენათ ქოფცხოვრენთ-და, ეჭვის ვემშებღანთ თიშა, ნამდა იეჰოვა ხელმძღვანელენს ჩქინ ორგანიზაციას დო თის არძაშ უჯგუშო უჩქჷ, მუ რე ჩქინო ჯგირ. შედეგო, ვა გამჭირდუნა მორჩილება დო დადებით განწყობას ვა ვოდინუანთ (წეკითხით ებრაელეფიშ 13:17). მარჩქილენა, ნამდა მუჟამსით ვომორჩილუთ ორგანიზაციაშე მეღებულ მითითებეფს, ხეს უნწყუნთ კრებაშ ართობას (ეფეს. 4:2, 3). თეწკუმა ართო, რწმენათ ქოფცხოვრენთ-და, ვონდუთ ხელმძღვანელ ჯიმალეფს, თიშ უმკუჯინუო, ნამდა არასრულყოფილეფ რენა, დო ბჯერა, ნამდა იეჰოვა მაკურთხენა მორჩილებაშენ (1 სამ. 15:22). ხვალე თენა ვარინ, დარწმუნებულ ვორეთ, ნამდა ნამდგაინ მითითება ოთირალ ქორენ-და, იეჰოვა მუშ დროს აუცილებერო გაკეთენს თეს (მიქ. 7:7).

15, 16. მუქ მეხვარ ართ ჯიმას, რწმენათ იმოქმედუკო, მუჟამსით ოეჭვუდ, გამართლენდ დო ვარ მეღებულ მითითება? (ქოძირით სურათ).

¹⁵ გუვარჩუათ პერუს მოხვალამირ ართ შემთხვევა, სოვრეშეთ იძირე, მუ ჯგირ შედეგეფ მოუღ მითითებეფიშ მეჸუნას. თექ ოფიციალურ ნინა ესპანურ რე, მარა ბრელ მახორუ შხვადოშხვა ადგილობრივ ნინაშა ხოლო იჩიებ. ართ-ართ თეცალ ნინა რე კეჩუა. წანეფიშ დინახალე კეჩუა ნინაშა მორაგადე და დო ჯიმალეფ მუნეფიშ უბანეფს გილეშეს დო გორუნდეს თე ნინაშა მორაგადე ხალხის. მარა მთავრობაქ ახალ რეგულაცია გემშეღ, ათეშენ თე მეთოდის მუდგარენეფქ ოთირალქ იჸუ (რომ. 13:1). ნამთინე ჩქინ და დო ჯიმა ფიქრენდჷ, ნამდა თენა ეცილებუდ ქადაგებაშ საქმეს. მარა თინეფქ ქიმიაჸუნეს ორგანიზაციაშე მეღებულ მითითებას, მუდგაშ გურშენ იეჰოვაქ აკურთხჷ თინეფიშ ხანდა, ნამდა ქიმიოგორუესკო კეჩუა ნინაშა მორაგადე ადამიანეფს.

¹⁶ ართ ჯიმა, სახელო კევინ, ნამუთ კეჩუა ნინაშა მორაგადე კრებას უხუცესო მსახურენდჷ, თი და დო ჯიმალეფ შქას რდჷ, მიდგას ოეჭვუდ, გამართლენდ დო ვარ თე მითითებაშ მეჸუნა. თინა იჩიებ: „დუდშე ფიფქრენდჷ, ანწ მუჭო ოკო ბგორათ თე ხალხ-მაქ“. მუ აკეთ კევინქ? თინა აგრძელენს: „ქიგიფშინ იგავეფიშ 3:5-ის ინოჭარილ სიტყვეფ დო მოსეშ მაგალითშე დეფიფქრჷ. იეჰოვაშ მითითებათ, ეგვიპტეშე გიშაჸუნაფაშ დროს, თის ისრაელეფ თიცალ ადგილშა მეჸუნდჷ, სოდეთ ართ მეჯინათ, გვალო ადვილო ქაშუოლუდეს ნტერეფს ხეშა. მარა თიქ იშენით დემორჩილ ღორონთის დო იეჰოვაქ ხოლო აკურთხჷ მორჩილებაშენ“ (გამ. 14:1, 2, 9–11, 21, 22). კევინქ ხოლო ქიმიაჸუნ ქადაგებაშ თირელ მეთოდის. მუქ მაჸუნ თეს შედეგო? თინა იჩიებ: „იეჰოვაქ შურო ვეფიფქრენდითინ თეშ მაკურთხეს. აიშახ ქიანაშის გილეფშით დო შილებედ მსახურებაშ დროს ართ დო ჟირ კოჩიშ მეტ ვა ბძირითკო კეჩუა ნინაშა მორაგადე, მარა ასე თე ხალხის თიცალ ადგილეფს ბგორუნთ, სოდეთ მიჩქუნა, ნამდა ბრელ რენა. შედეგო, უმოს ხალხის შეფხვადუთ, უმოს კინ მეკითხირეფ დო ბიბლიაშ გურაფეფ მიღუნა დო კრებაშ შეხვალამეფს ხოლო უმოს ოსწრჷ“. თაშ რე, მუჟამსით რწმენათ ფცხოვრენთ, იეჰოვა ხვამას ვა მარკენა.

17. მუ დიგურეთ თე სტატიაშე?

¹⁷ თე სტატიას გუვარჩით სუმ მხარე, სოდეთ შემლებუნა ვოძირუათ, ნამდა რწმენათ ფცხოვრენთ. მარა ხვალე თე სუმ მხარეს ვარინ, ჩქინ ცხოვრებას ირფელს ოკო ვოძირუათ თენა, მაგალთო, მუჟამსით საქმე ოხუ გართობას დო მოსვანჯას, განათლებაშ მეღებას დო სქუალეფიშ რდუალას. მუდგა საკითხ ვა მაფუდან გინაჭყვიდირალინ, ხვალე თით ოკო ვემიბღათ გადაწყვეტილება, მუდგას თოლით ვორწყეთ. ოკო გეფთვალისწინათ იეჰოვაწკუმა ჩქინ ურთიერთობა, თიშ რჩევეფ დო დუნაპირებ, ნამდა აუცილებერო ქიზრუნენს ჩქინდე. თაშ ქიმიფქციებუთ-და, „ჩქინ ღორონთიშ, იეჰოვაშ, სახელით გილეფშათ იჸი ირიათო, სადღამუშოთ“ (მიქ. 4:5).