იეჰოვაშა ვორდჷ დაიმენდებულ დო დუდის თხილერო ბგინაფლენდჷ

ᲘᲔᲰᲝᲕᲐᲨ ᲒᲐᲩᲘᲜᲔᲑᲐᲤᲐ ᲓᲝ ᲗᲘᲨᲐ ᲛᲔᲜᲓᲔᲑᲐ

დებაბდჷ 1948 წანას, ნიგერიაშ ჭიჭე სოფელს. თიმ პერიოდის, ჩქიმ ბიძია მუსტაფაქ დო უნჩაშ ჯიმა ვაჰაბიქ იეჰოვაშ მოწმეეფო გინირთეს. ჩხორო წანერ ვორდინ თეშ მუმაქ დომღურ, მუდგაქ მანგარ გინაღალარქ მაჸუ. ვაჰაბიქ მიწუ, ნამდა მუაჩქინ გეთელებუდ დო კინ ქეშეფხვადუდით თის. თე სიტყვეფიშ მორჩქილაფაქ გურშა თეშ ემქექუ, ნამდა ბიბლიაშ გურაფა ქიდიბჭყჷ დო 1963 წანას დიმნათ. ჭიჭე ხანშა ჩქიმ სუმ ჯიმაქ ხოლო იეჰოვაშ მოწმეთ გინირთჷ.

1965 წანას ოცხოვრებშა გეგნოფრთჷ ჩქიმ უნჩაშ ჯიმაშა, უილსონშა, მით ლაგოსის ოხორანდჷ. თექ გეფჩინებაფე დო დევეახლოვ იგბობი კრებაშ პიონერეფს. თინეფიშ ხიოლიშ დო მონდომაშ მიმაჯინუქ, 1968 წანას მა ხოლო ქიდიბჭყჷ პიონერო მსახურება.

ართ ბეთელელ ჯიმაქ, ალბერტ ოლუგბებიქ, სპეციალურ შეხვალამა მანწყუ ახალგაზრდეფწკუმა დო იჩუ, სპეციალურ პიონერეფიშ მუშმადიდა საჭიროება რდჷ ჩრდილოეთ ნიგერიას. ამდღარშახ ფშჷ თიშ სიტყვეფ: „ახალგაზრდეფ, თქვა გიღნა საშვალება, თქვან დრო დო ენერგია იეჰოვაშ საქმეშ ოკეთებელო გეგმირინუათ. თქვა ბრელ მუდგარენიშ კეთება შეილებნა მსახურებას“. მთელ გურით მოკოდ, მივაჸუნკო წინასწარმეტყველ ესაიაშ მაგალითის დო გეგმიფრჩქინკო თიცალ მზადყოფნა, მუნერით თის უღუდ. თექ გინმოჭყვიდირაფუ, შევავსკო სპეციალურ სრულ დროთ მსახურებაშ განცხადება (ეს. 6:8).

1968 წანაშ მესის სპეციალურ პიონერო დუმანიშნეს ნიგერიაშ ჩრდილოეთით რდუნ თი ქალაქ კანოს, სოდეთ თიმ პერიოდის სამოქალაქო ომ რდჷ (1967—1970). უმოს გვიანო, თე ომქ ნიგერიაშ აღმოსავლეთ ნაწილშა გეგნორთჷ. ართ ჯიმა მთელ შურ დო გურით ოცადუდ, დუმარწმუნკო, ნამდა ვებდიკო თევრე, მარა მა უწი: „მადლობა, ნამდა თაშ წუხენქ ჩქიმდე, მარა იეჰოვას ქაკო თექ იმსახურე-და, დარწმუნებულ ვორექ, ჩქიმწკუმა იჸუაფ დო ქელამდირთუ“.

ᲘᲔᲰᲝᲕᲐᲨᲐ ᲛᲔᲜᲓᲔᲑᲐ ᲝᲛ ᲒᲘᲜᲜᲐᲦᲔᲚ ᲥᲐᲚᲐᲥᲘᲡ

მანგარ გლახა ოძირაფალ რდჷ თი ირფელ, მუთ კანოს ხვადუდ. ომს განადგურებულ აფუდ თექიანობა. მსახურებაშ დროს მინშა ვორწყედით, მუჭო წუმოძუდ ექი-აქო ღურელ კათა, მით სამოქალაქო ომს ჸვილეს. ართ დროს კანოს მუსხირენ კრება რდჷ, მარა ასე თექ 15 მაუწყებელ ხოლო ვა რდჷ დოსქილადირ, მუშენდა და დო ჯიმალეფიშ უმენტაშის ომიშ გურშენ დოტებულ აფუდ თექიანობა. დოსქილადირ მაუწყებელეფ ხოლო გურგოტახილეფ დო შქურნაფილეფ რდეს. თინეფს მანგარო ახიოლეს, ნამდა თექ ამშვ სპეციალურ პიონერქ გენოფრთით. ირნერო ვოცადუდით, თინეფს გურშა ელვუკინითკო, მუდგაქ ჯგირ შედეგეფ მიღჷ. ჩქი მივეხვარით თე და დო ჯიმალეფს, კინ ჩატარესკო კრებაშ შეხვალამეფ დო მონაწილება მიღესკო მსახურებას. თეს გეძინელ, გაგრძელესკო ფილიალშა სამქადაგებლო ანგარიშეფიშ დო ლიტერატურაშ შეკვეთეფიშ ჯღონუა.

თექ ინულირ სპეციალურ პიონერეფქ ჰაუსა ნინაშ გურაფა ქიდიბჭყით. მუჟამსით თექიან მახორუეფს სახიოლო ამბეს მუნეფიშ ნინაშა გინოფჩანდით, სიამოვნებათ მირჩქილედეს. მარა, ადგილობრივ რელიგიაშ მიმაჸუნალეფს იშენდოიშენ ვეგვოხანტუდით გურს, ათეშენ სიფრთხილეშ გიმორჩქინა მიხვადუდეს. ართშა, მსახურებაშ დროს, მა დო ჩქიმ პარტნიორს მიდგარენ კოჩიქ ხამუთ გამმათხოზეს. საბედნეროთ, თიშე უმოს ჩქარ მარულეეფქ იპჸით დო შემალებუეს დუდიშ დარსხებაქ. ოშქურანჯ სიტუაციეფიშ უმკუჯინუო, იეჰოვა ირიათო ფთხილანდეს დო თი ტერიტორიას ხოლო მაუწყებელეფს აძინუდ (ფსალმ. 4:8). ამდღა, კანოს 500-შე უმოს მაუწყებელ დო 11 კრება რე.

ᲬᲘᲜᲐᲐᲦᲛᲓᲔᲒᲝᲑᲐ ᲜᲘᲒᲔᲠᲡ

კანოშა ინულაშე მუსხირენ თუთაშ უკულ, 1968 წანაშ არგუსოს, მა დო ხოლო ჟირ სპეციალურ პიონერ გომტეს ნიგერიშ რესპუბლიკაშ დედაქალაქ ნიამეიშა. თექ ინულაშე ხეთეშე ქიმეფხვადით, ნამდა თე ქიანა, ნამუთ აფრიკაშ დასავლეთ ნაწილს რე, არძაშ უმოს ჩხე ადგილ რე მთელ დედამიწას. მიორჩქვანალ მაფუდეს თექიან მაღალ ტემპერატურაშა დო თეწკუმა ართო, ოკო დიბგურეთკო თი ქიანაშ ოფიციალურ ნინა, ფრანგულ. თე სირთულეეფიშ უმკუჯინუო, მთელ გურით ქიმვენდით იეჰოვას დო ქიდიბჭყით თექ მახორუ მუსხირენ მაუწყებელწკუმა ართო მსახურება. გვალო ჭიჭე ხანშა, ნიამეის თითქმის არძაქ, მიდგას კითხირ უჩქუდ, მიღჷ წიგნ „მარადიულ სიცოცხლეშა მიმაჸუნაფალ შემეცნება“. ნამთინე აშო ხოლო ბგორუნდეს თე წიგნიშ მიოღებელო.

მალას ქიმეფხვადით, ნამდა თექიან ხელისუფლებას თოლშა ვამუხედ იეჰოვაშ მოწმეეფ, მუთ ჯგირო ქუმოძირეს ართ შემთხვევაქ. 1969 წანაშ კვირკვეს სოდგარენ 20 მაუწყებელქ ეკიფშაყარით, ნამდა ჩუვატარითკო პირველ რაიონულ კონგრეს. თე კონგრესის ჟირ პიროვნებაქ ოკო ინათუკო, მარა პირველ დღას პოლიციელეფქ ქუმორთეს დო პროგრამა მიმოტებაფეს. თინეფქ რაიონულ ზედამხედველწკუმა ართო, სპეციალურ პიონერეფ ხოლო პოლიციაშ განყოფილებაშა მიდამიჸონეს დო დაკითხვაშ უკულ მიზოჯეს, მაჟია დღას ხოლო ქიმეფრთითკო თექ. ბგინაფლენდით, ნამდა ჯგირ მუთუნ ვა მობძუდეს, ათეშენ ნათუაშ მოხსენება კერძო ჸუდეს წებკითხით დო ნათუაშ კანდიდატეფ მალწყარს ტყობაშე დობნათით.

მუსხირენ მარაშ უკულ, შინაგან საქმეთა სამინისტროქ ამშვხოლო სპეციალურ პიონერს მიზოჯეს, ქიდიბტეთკო ქიანა, მუდგაშოთ 48 საათ მუჩეს. თეს გეძინელ, თენა ჩქინ ხარჯეფით ოკო ვაკეთითკო. მუშო ოკო რაგად, დევემორჩილით თინეფიშ ნაზოჯინას დო ხეთეშე მიდაფრთით ნიგერიაშ ფილიალშა, სოდეთ ახალ დანიშნულებეფ მიბღით.

მა ნიგერიაშ სოფელ ორისუნბარეს დუმანიშნეს. თექ მაუწყებელეფიშ ჭიჭე ჯგუფ რდჷ, მიდგაწკუმა ართო ვმსახურენდჷ დო ბიბლიაშ გურაფეფს ვატარენდჷ. ამშვ თუთაშა ფილიალქ მიწუ, ნამდა ნიგერშა ხვალე დიფრთიკო. თე დავალებაშ მეღებას ვეველუდ დო დუდშე ჭიჭეთ ქუმაშქურინ, მარა შურ მოლუდ, კინ მუჟამ შეფხვადუდ ჩქიმ ნიგერელ და დო ჯიმალეფს.

მა ნიამეიშა დიფრთჷ. ინულაშე მაჟია დღას ნიგერიელ ბიზნესმენქ ქეშეფხვად, მიდგაქ ქიმეხვად, ნამდა იეჰოვაშ მოწმე ვორდჷ დო ბიბლიაშ გურშენ ოშნერეფ ბკითხჷ. თიქ ბიბლიაშ გურაფა ქიდიჭყჷ, მუდგაშ უკულ, სიგარეტ დო გინოჸუნელ შუმა მიოტუ დო დინათ. მოხიოლუდ, ნამდა თი ქიანას სახიოლო ამბეშ ქადაგებაშ საქმე ჭიე-ჭიეთ, მარა სტაბილურო წიმი მიშჷ. მუჟამსით თექ პირველო ინოფრთჷ, 31 მაუწყებელ რდჷ, მარა, მუჟამსით თექიანობა დიბტე, უკვე 69-შახ რდეს.

„ᲑᲠᲔᲚ ᲛᲣᲗᲣᲜ ᲕᲐ ᲛᲘᲩᲥᲜᲐ ᲒᲕᲘᲜᲔᲐᲡ ᲛᲐᲮᲝᲠᲣ ᲓᲐ ᲓᲝ ᲯᲘᲛᲐᲚᲔᲤᲘᲨ ᲒᲣᲠᲨᲔᲜ“

1977 წანაშ ბოლოს ნიგერიაშა დიფრთჷ, სოდეთ სუმმარიან ტრენინგ მიკოფრთჷ. ტრენინგიშ ბოლოს, ფილიალიშ კომიტეტიშ კოორდინატორქ, მალკოლმ ვიგოქ, სიერა-ლეონეშ ფილიალშე მუნაჯღონა წერილ წუმოკითხირაფუ. წერილს ჭარუდ, ნამდა ჯიმალეფს ოკოდეს, გვინეას რაიონულ ზედამხედველ დანიშნესკო დო თეშო გორუნდეს ჯანმრთელ, დაუქორწინებელ ჯიმას, მიდგას ქოთ ინგლისურ არჩქვენუდ დო ქოთ ფრანგულ. ჯიმა მალკოლმქ მიწუ, ნამდა ზუსტას თე საქმეშო მამზადენდეს დო თინა ხოლო გეუძინ, ნამდა თე დავალებაშ შესრულება ვა რდჷ ადვილ. თიქ ელამიჩ: „ჯგირო დეფიქრ, ონდო მუდგაინს გინოჭყვიდუნქ“. მარა მა ხეთეშე უპასუხ: „რახანს იეჰოვას ოკო თევრე იბდენ, ურქჷ“.

სიერა-ლეონეშა მიდაფუბრინ დო თექიან ფილიალიშ ჯიმალეფს ქეშეფხვად. კომიტეტიშ ართ-ართ წევრიქ მიწუ: „ბრელ მუთუნ ვა მიჩქნა გვინეას მახორუ და დო ჯიმალეფიშ გურშენ“. მართალ რე, სიერა-ლეონეშ ფილიალ გვინეას სამქადაგებლო საქმეს ზედამხედველენდჷ, მარა თი ქიანას დაძაბულ პოლიტიკურ მდგომარეობაშ გურშენ ვეშიალებუეს და დო ჯიმალეფშა დაკავშირებაქ. ფილიალქ მუსხირენშა ეცად, თექიან და დო ჯიმალეფშა მიდგაინ მიდაშქვუკო, მარა თექ ვემიხერხებუ. ათეშენ, მა ფთხის, მიდაფრთკო გვინეაშ დედაქალაქ კონაკრიშა დო ქოფცადიკო, მთავრობაშე თექ ცხოვრებაშ ნებართვა მიბღიკო.

კონაკრიშა გენოფრთინ, ნიგერიაშ საელჩოშა ქიმეფრთჷ დო ელჩის ქეშეფხვად. თის უწი, ნამდა გვინეას ქადაგება მოკოდ, მუდგაშეთ მიწუ, ნამდა უჯგუშ იჸუაფუდ, თექ ვა დოფსქიდიკო, მუშენდა შილებედ ობჭოფესკო ვარდა უფრაშ მიბკინდეკო დუდშა. თიქ თეცალ სიტყვეფ მიწუ: „დირთჷ ნიგერიაშა დო თექ იქადაგ“. მარა, მა უპასუხ: „ვარ, მა თაქ გაჩერება მაფჷ გინოჭყვიდილ“. თეშ უკულ, თიქ წერილ ქიმეჭარ გვინეაშ შინაგან საქმეთა მინისტრის, ნამდა ქიმმეხვარკო. ქოთ თაშ ქუმოხვად დო მინისტრიქ მიმეხვარ.

ჭიჭე ხანშა, სიერა-ლეონეშ ფილიალშა დიფრთჷ, ნამდა მინისტრიშ გადაწყვეტილება ქუგვოგებაფეკო. თინეფიშ ხიოლ ცას ანჭუდ, მუჟამსით ქიგეგეს, მუჭო მიმეხვარ იეჰოვაქ. ასე უკვე გვინეაშ მთავრობაშე მიღუდ უფლება, თექ იფცხოვრიკო.

1978—1989 წანეფს რაიონულ ზედამხედველო ვმსახურენდჷ გვინეას, სიერა-ლეონეს, დო მინშა, რაიონულ ზედამხედველიშ დამხმარეთ, ლიბერიას. დუდშე, მანგარ ხშირას გინმიფრთუდ გლახათ. მინშა თენა იშენდოიშენ თიმწკუმა ხვადუდ, მუჟამსით მიკოლაფირ ადგილს ვორდჷ, მარა ჯიმალეფ ირფელს ორთუდეს, ნამდა საავადმყოფოშახ ქიმემიჸუნესკო.

ართშა მალარიაქ ქუმაღოლ დო მანგარო დებლახ. თეწკუმა ართო, ნაწლავს ჭიეფ ხოლო პჸუნდჷ. მუჟამსით გეგშებჯგირ, ქიგებგჷ, ნამდა ჯიმალეფ ჩქიმ ოსაფლებერო ადგილს ნოგორუენა, მუშენდა თიცალ გლახათ პჸოფექ, ფიქრენდეს თე ირფელ ვეგნმაღინედ. თი სირთულეეფიშ უმკუჯინუო, მუთ ჩქიმ სიცოცხლეს საფრთხეშ თუდო გიორინუანდჷ, ართ წუთით ხოლო ვამფიქრებ, ნამდა მივოტეკო იეჰოვაშე მეღებულ დავალებაშ შესრულება. ამდღარშახ დარწმუნებულ ვორექ, ნამდა ბოლოშა თხილერ ხვალე იეჰოვაშ ხეს ვორეთ, მიდგას შეულებ, დობღურათინ ხოლო, გუმათელან.

ᲘᲔᲰᲝᲕᲐᲨᲐ ᲛᲔᲜᲓᲔᲑᲐ ᲓᲐᲥᲝᲠᲬᲘᲜᲔᲑᲐᲨ ᲣᲙᲣᲚ

1988 წანას გეფჩინებაფე მანგარ თანდაბალ დო სულიერო მოწიფულ და, დორკას. ჩქი დეფქორწინით დო ართო გუვაგრძელით რაიონულ მსახურება. დორკას ირიათო ალამირდჷ დო დუდგინოდვალირობას გიმირჩქინანდჷ, მუდგათ ბრელშა ოძირუ, ნამდა მოჸოროფე მეუღლე რე. ართ კრებაშე მაჟიაშა ქიმეფრთითკონ თიშენ, 25 კილომეტრის კუჩხით მიკმიფშით დო ჩემოდნეფ ხოლო მემღუდეს. თექიან შარეფ ლეტამ დო იამეფით ეფშა რდჷ, ათეშენ, უმოს შორ კრებეფშა ქიმიფშით-და, ნებისმიერ ტრანსპორტის ვაჸუნუდით, მუთ შარას შეფხვადუდეს.

დორკას მანგარ უშქურანჯ დო გაბედულ ხოლო რდჷ. დანიშნულებაშ ადგილშა მიოულარო მინშა ნიანგეფით ეფშა მალწყარ ხოლო მაფუდეს გინაულარ. მაგალთო, ართ-ართ მგზავრობაშ დროს, მუ დროსით 5 დღას ოკო ვორდითკო შარას, ქობძირით, ნამდა მალწყარს ხიდეფ ინოტახილ რდჷ. ათეშენ, წყარპიჯშა მიოულარო კანოეეფ გეგმიბრინეთ. წყარპიჯის ქავოდირთითინ, დორკასიქ კანოეშე გიმაულარო გამწოდირთჷ დო ტომბა წყარს ქინანთხჷ. ნამთინს ვა მიჩქუდეს ნჩურუა, დო ავრე ხოლო მალწყარ ნიანგეფით ეფშა რდჷ. საბედნეროთ, ჩქინ გოხოლუას მუსხირენ ახალგაზრდა კოჩ ჸოფე. თინეფქ ქუმორთეს დო დორკას წყარშე გეგშეჸუნეს. თე ამბეშ უკულ, სერით მუსხირენ ხანს ჟირხოლოს კოშმარეფ მოსიზმარუდეს, მარა რაიონულ მსახურებაშ მეტება წუთით ხოლო ვამფიქრებუნა.

1992 წანაშ დაჭყაფუს ქიგებგით, ნამდა დორკას ორსულო რდჷ. ჩქი ოკო გინობჭყვიდითკო, შემალებედეს დო ვარ სპეციალურ პიონერო მსახურებაშ გაგრძელება. მა დო დორკასიქ ქიმეფხვადით, ნამდა ჩქინ ჭიჭე ძღაბ იეჰოვაშე საჩუქარ რდჷ. ათეშენ, გეგნობჭყვიდით, თეს მეურდუნ ფერ სახელ ქიგვოდვითკო დო გეგშებგორით სახელ ჯაჰგიფტ (თენა ინგლისურო ნიშნენს: „იეჰოვაშ საჩუქარ“). ოთხ წანაშ უკულ ბოშიქ ხოლო ქეშმეძინეს, ნამდგას ერიკ ქიგვოდვით. დასურო მარაგადენა, ნამდა ჟირხოლო სქუა იეჰოვაშე მოჩამილ ძვირფას ძღვინ რენა. ჯაჰგიფტ მუდგარენ პერიოდის კონაკრიშ მთარგმნელობით ოფისის მსახურენდჷ დო ერიკ კრებას მომსახურე რე.

მართალ რე, დორკასის მიოტებელქ აჸუ სპეციალურ პიონერობაქ, მარა სრულ დროს პიონერობას აგრძელენდჷ დო თეწკუმა ართო, ბაღანეფს რდუნდჷ. მა, იეჰოვაშ მოხვარათ, შემალებუ სპეციალურ პიონერო მსახურებაშ გაგრძელებაქ. მუჟამსით ჩქინ სქუალეფქ გამწირდეს, მა დო დორკასიქ კინ ართო გუვაგრძელით სპეციალურ პიონერობა. ასე ჟირხოლო მისიონერო ვმსახურენთ კონაკრის.

ᲘᲔᲰᲝᲕᲐᲥ ᲓᲝᲤᲗᲮᲘᲚᲣᲔᲡ

ირო მზათ ვორდჷ, იბდიკო თევრე, სოდეთ იეჰოვა გომტენდჷ. მა დო დორკას ბრელშა ფთხილუეს დო მაკურთხეს იეჰოვაქ. თიშა მენდებაქ დოფთხილუეს თი ოწუხებელშე, მუთ მატერიალურშა დაიმენდებას მოუღ. მა დო დორკასიქ ჩქინ დუდშა გეგმოფცადით, ნამდა ბოლოშა თხილერ ხვალე იეჰოვაშ ხეს ვორეთ, მით ჩქინ მარსხებელ რე (1 მატ. 16:35). დარწმუნებულ ვორექ, ღორონთ „სიცოცხლეშ ქისას“ დოჩუანს თინეფიშ სიცოცხლეს, მით თიშა რე მენდებულ (1 სამ. 25:29).