მდიდარ ქრისტიანულ მემკვიდრეობა, ნამუთიქ ბედნერობა მომიღ

ჩქიმ მუმაქ, ჯონ მილსიქ 1913 წანას, ქალაქ ნიუ-იორკის ინათ. თი დროს თინა 25 წანერ რდუ. ნათუაშ მოხსენება ჯიმა რასელქ აკეთ. ჭიჭე ხანშა მუაჩქიმქ ოცხოვრებშა ტრინიდადშა გეგნორთჷ, სოდეთ ოსურო ქიმიჸონ, ბიბლიაშ გურგედვალირ მარკვიებელ კონსტანც ფარმერი. მუაჩქიმ მუშ მეგობარს ვილიამ ბრაუნს ოხვარუდ, ხალხის „შემოქმედებაშ ფოტოდრამა“ ქაჯინუესკო. 1923 წანას ბრაუნეფ დასავლეთ აფრიკას დანიშნეს. ჩქიმ მშობლეფქ ტრინიდადის გაგრძელეს მსახურება. თინეფს ზეციერ ცხოვრებაშ იმენდ უღდეს.

მოჸოროფე მშობლეფ

ჩქიმ მშობლეფს 9 სქუა ჸუნდეს. პირველ სქუას ქიგიოდვეს რუტერფორდი, ნამუთ თიმ დროს საზოგადოება გინაჯინალ კოშკიშ პრეზიდენტის ჯოხოდ. მა 1922 წანაშ 30 დეკემბერს დებაბდჷ დო ქიგმოდვეს „ოქროშ ხანაშ“ (ასეიან „გეგშაკურცხით!“) რედაქტორიშ, ვუდვორთ კლეიტონიშ სახელ. ჩქინ მშობლეფქ არძას მიმოღებაფეს ძირითად განათლება, მარა განსაკუთრებულო სულიერ მიზნეფიშ დასახვას მოხვარდეს. დიაჩქიმს უღუდ განსაკუთრებულ უნარ, დამაჯერებლურო ქიჩუკო ბიბლიაშე. ჩქიმ მუმას ბიბლიურ ისტორიეფიშ ჩიება უჸორდჷ დო ჟესტეფიშ გიმორნაფათ თი ისტორიეფს ცოცხალო ემხანტუნდეს.

თინეფიშ მონდომას ჯგირ შედეგიქ მაჸუნ. ხუთ ჯიმაშე სუმქ გალაადიშ სკოლა მიკოფრთით. ჩქიმ დალეფშე სუმ პიონერო ბრელ ხანს მსახურენდჷ ტრინიდად დო ტობაგოს. ჩქინ მშობლეფიშ გურაფაშ დო ჯგირ მაგალითიშ შედეგო იეჰოვაშ შარას ქიგვოდირთით. თინეფ ირიათო გურშა ელამკინანდეს დო თექ მიმეხვარეს ვეგნვურთითკო თე შარას (ფსალმ. 92:13).

ჩქინ ჸუდეს ირიათო სულიერ გარემო რდუ, მუდგაქ მიმეხვარეს აქტიურ მონაწილება მემღებდესკო ქადაგებას. ჩქინწკუმა ხშირას იშაყარუდეს პიონერეფ დო იჩიებდეს კანადელ მისიონერ, ჯორჯ იანგშე, ნამუთ ტრინიდადშა რდუ მოულირ. მშობლეფ აღფრთოვანებულო გიშინანდეს მუნეფიშ ჯვეშ მეგობრეფს, ბრაუნსეფს, მით აღმოსავლეთ აფრიკას მსახურენდეს. თე ირფელქ მიმეხვარ, მსახურება 10 წანერ ვორდინ თეშ ქიდიბჭყიკო.

ადრეულ საქმიანობა

თი დროს გიშაშკუმალირ ჩქინ ჟურნალეფ აარგამენდჷ ტყურა რელიგიას, ჰარამ კომერციულ სისტემას დო ბინძურ პოლიტიკას. შედეგო, 1936 წანას სამღვდელოებაქ ახნარ ტრინიდადიშ ადგილობრივ მთავრობა, აკრძალკო საზოგადოება გინაჯინალ კოშკიშ არძა პუბლიკაცია. ჩქი დოფჩვით ლიტერატურა დო ტყობაშე ვაგრძელენდით თიშ გიმორნაფას, სოიშახ ვეგმეთუეს. თეს გეძინელ, მუვონწყით საინფორმაციო მსვლელობეფ ბარათეფით დო პლაკატეფით. ქალაქ ტუნაპუნაშე მოულირ ჯგუფწკუმა ართო ტრინიდადიშ ართ-ართ დაშორებულ ტერიტორიას ხოლო ქიფქადაგით ხონარიშ გუმაძლიერებელით, ნამუთ მანქანას გიმაკეთუდ. თენა დასურო სარკო რდუ. თეცალ სულიერ გარემოქ მიმეხვარ, 16 წანერ ვორდინ თეშ დიმნათიკო.

ჩქინ ოჯახიშ სულიერ მემკვიდრეობაქ დო ჟიშე მოშინაფილ შემთხვევეფქ მისიონერულ მსახურებაშ სურვილ გომრჩქინ. თე მიზანს 1944 წანას მივოჭირინე, მუჟამსით არუბაშა გინიბლჷ დო ჯიმა ედმუნდ კამინგზწკუმა ართო ქიდიბჭყჷ მსახურება. 1945 წანას გოშინაშ ონჯუაშ აღნიშნებელო 10 კოჩიქ აკიფშაყარით. უკულიან წანას კუნძულს პირველ კრებაქ ჩემეყალიბ.

უმოს გვიანო არაფორმალურო ვუქადაგ ჩქიმ თანამშრომელს, ორის უილიამსის. თის მუშ რწმენაშ დაცვებელო ძლიერ არგუმენტეფ მოჸუნდჷ, მარა ბიბლიაშ გურაფაშ შედეგო, ქიმეხვად, სინამდვილეს მუს ოგურუანდჷ ღორონთიშ სიტყვა. თიქ 1947 წანაშ 5 იანარს დინათ. დრო ხანიშ უკულ ართიანქ ქიმეჸოროფეს დო დეფქორწინით. ორისიქ 1950 წანაშ ნოემბერს პიონერო ქიდიჭყჷ მსახურება. ჩქი ართო გუვაგრძელით მსახურება დო სულიერო წიმი ულა.

გურიშ ემაკინალ მსახურება ნიგერიას

1955 წანას სკოლა „გალაადშა“ ქიმემწვიეს. ათეშგურშენ მივოტეთ სამუშა, გეგმოფჩით ჸუდე, შხვა ძვირფასეულობეფ დო დევემშვიდობით არუბას. 1956 წანაშ 29 კვირკვეს გუვათეთ გალაადიშ 27-ა კლასი დო ნიგერიას დაბნიშნეს.

ულირს იშინანსინ, ორის აღნიშნენს: «იეჰოვაშ წმინდა შურ ოხვარ პიროვნებას იმსახურას მისიონერო, მუჭოთ ჯგირ დროს თეშ, გლახა დროს ხოლო. ჩქიმ ქომონჯიშ გინაწონს, მა დღას ვა მოკოდ მისიონერობა; მისხუნუდ მიღუდკო ჸუდე დო ბრდიკო სქუალეფ. მარა აზროვნებაქ დუმათირ, მუჟამსით ქიმეფხვად, მუსხით აუცილებერ რე სახიოლო ამბეშ ქადაგება. სკოლა გალაადიშ მიკულაშ უკულ, დებრწმუნ, ნამდა მოკოდ ვიმსახურკო მისიონერო. მუჟამსით გემშა გეშაფრთით, ვორთ სორტონქ, ნამუთ ჯიმა ნორწკუმა მუშენდჷ, დემემშვიდობეს დო მიწუეს, ნამდა ბეთელს გუვაგრძელენდით მსახურებას. უცბას ფთქვი: „ოღონდ თენა ვარ“. მარა ხეთეშე დევეთანხმჷ დო ქიმეჸოროფ თექიან მსახურებაქ, სოდეთ შხვადოშხვა დავალებეფს ვასრულენდჷ. არძაშ უმოსო მობწონდჷ მიმღების მუშება. მიჸორდჷ ხალხწკუმა ურთიერთობა დო თე სამუშაქ საშვალება ქომუჩ მიღუდკო კონტაქტი ნიგერიელ და დო ჯიმალეფწკუმა. ნამთინე ტვერამ, შულადირ, ჸუმენულ დო შკირენულ მიშჷ. ჩქიმო დიდ პატი რდუ გემკუღიკო თინეფს მილაჭკუმაფ, რგილ წყარ დო გურშა ელვუკინკო. თე ირფელ იეჰოვაშ წმინდა მსახურებაშ ნაწილ რდუ, მუდგას ჩქიმდა კმაყოფილება დო ბედნერობა მოუღუდ». ნამდვილო, ირნერ დავალება ჩქინ წარმატებას უნწყუნდჷ ხეს.

1961 წანას ტრინიდადის ჩქინ დო ჯიმა ბრაუნიშ ოჯახეფქ ართო აკიფშაყარით. ჯიმა ბრაუნქ აფრიკას მოხვალამირ მუსხირენ გურიშ ემაკინალ შემთხვევა ქიგიშინ. თეშ უკულ მა ხოლო ქიფჩი თი სულიერ წიმი ულაშენ, ნამუთ ნიგერიას მიღდეს. ჯიმა ბრაუნქ ხე ქიგნობდვჷ დო ჩქიმ მუმას უწუ: „ჯონი, სი ვაგაკეთებუ თექ აფრიკას, მარა მანგიორ ვუდვორთიქ გაკეთ თენა!“. მუაჩქიმქ მიკმართჷ დო მიწუ: „თაშ გაგრძელ ვუდვორთი!“. თეცალ სულიერ ჯიმალეფშე გურიშ ელაკინაქ უმოსო გამმანგარ თიშ სურვილ, გუვაგრძელკო შურ დო გურით მსახურება.

1962 წანას მიღუდ პატი, გემკოფრთიკო ვით თუთიან გურაფა სკოლა „გალაადიშ“ 37-ა კლასის. უილფრედ გუჩი, ნამუთ თიმ დროს ნიგერიაშ ფილიალიშ ზედამხედველ რდუ, სკოლა „გალაადიშ“ 38-ო კლასიშ თებაშ უკულ ინგლისის დანიშნეს. ათეშენ ნიგერიაშ ფილიალიშ ზედამხედველობა მა ქუდმავალეს. ჯიმა ბრაუნცალო, მა ხოლო ბრელს მობგზაურენდჷ დო იფჩინებაფუანდჷ ჩქინ ძვირფას ნიგერიელ და დო ჯიმალეფს. მართალ რე, თინეფს ბრელ მუთუნ ვა უღდეს, მუთ განვითარებულ ქიანეფშო ჩვეულებრივ მუდგარენ რე, მარა უღდეს ხიოლ დო კმაყოფილება, სოვრეშეთ არგამათ იძირე, ნამდა აზრიან ცხოვრება ფარა დო მატერიალურ ნივთეფშა ვა რე დამოკიდებულ. თექიან პირობეფს გეფთვალისწინეთ-და, მართალო ჯგირ ოძირაფალ რდუ, მუჟამსით და დო ჯიმალეფ შეხვალამეფშა სუფთაშე მონწყილ დო მოწესრიგებულ მიშეს. კონგრესეფშა დიდ მანქანეფით დო ხეშ ნაკეთებ ღია ავტობუსეფითa მიშეს. თე ავტობუსეფს საინტერესო სლოგანეფ მიკოჭარუდ. მაგალთო ართ ავტობუსის მიკოჭარუდ: „ზღვა ჭვეთეფით ეიფშაფუ“.

ნამდვილო, თე სიტყვეფს ჭეშმარიტება რე! თითოულ პიროვნებაშ მონდომას დიდ მნიშვნელობა უღჷ დო ჩქი ხოლო ჩქინ წვლილ მიშებღით თე დიდ საქმეს. 1974 წანაშო შეერთებულ შტატეფიშ უკულ ნიგერია რდუ პირველ ქიანა, სოდეთ მაქადაგებელეფიშ რიცხვიქ 100 000-ის მიოჭირინუ. საქმე დასურო ჯგირო მიშჷ!

მარა 1967-შე 1970 წანაშახ ნიგერიას სამოქალაქო ჩხუპ მიშჷ. მუსხირენ თუთას ბაიფრანელ ჯიმალეფს, ნამუთ მალწყარ ნიგერიშ მაჟია მხარეს რდეს, კავშირ ვა უღდეს ფილიალწკუმა. ჩქი თინეფშა სულიერ საზრდო მაფდეს გინაჩამალ. მუჭოთ დაჭყაფუს მიფშინეთ, იეჰოვას მივენდით ლოცვას დო მუსხირენშა გეგნოფრთით მალწყარ.

ამდღარ დღაცალო ფშუ თი ოშკურანჯ სიტუაციეფ, ნამუთ მალწყარიშ გინულაშ დროს მიღდეს. მაგალთო, საფრთხე მელდეს შეიარაღებულ ჯარიშკოჩეფშე, თეს გეძინელ შილებე ლახალაქ გეგნმადვესკო დო შხვა თეგვარ სირთულეეფ. ადვილ ვა რდუ გემკორთიკო თი ადგილეფ, სოდეთ ფედერალურ ჯარეფ გერდეს, ნამუთ ეჭვიშ თოლით უჯინედ არძას. ხოლო უმოს ოშკურანჯ რდუ ბაიფრანიშ მხარეს, ნამუთ ბლოკადას რდუ. ართშა სერით აჩქარებულ მალწყარ ნიგერი გინოფრთჷ ართ კოჩიშ კანოეთ, ნამუთ ასაბაშე ონითშა მიშჷ. უკულ მიდაფრთჷ ქალაქ ენუგუშა, სოდეთ გურშა ელვუკინ თექ მახორუ პასუხიშმგებელ ჯიმალეფს. მაჟიაშა ჯიმალეფს გურშა ელუკინითკონ თიშენ, ქალაქ აბაშა იბდჷ, სოდეთ ჸუდეეფს დო შენობეფს ვეშილებედ სინთეშ ერზამა, მუშენდა ნტერქ ვაძირკო თინეფ. პორტ-ჰარკორტის ჩქინ შეხვალამაქ მოკლე ლოცვათ გეთუ, მუშენდა თე დროს ბაიფრანშა ფედერალურ ჯარქ მიშელ.

თე შეხვალამეფ აუცილებერ რდუ, ნამდა ხოლო ართშა დუვარწმუნითკო ჩქინ ძვირფას და დო ჯიმალეფ იეჰოვაშ ჸოროფას; თეს გეძინელ, ქიმეფჩითკო საჭირო რჩევა, ნამუთ ნეიტრალიტეტის დო ართობას ოხუდ. ნიგერიელ ჯიმალეფქ წარმატებულო დეცვეს ნეიტრალიტეტ თი საშინელ კონფლიქტიშ დროს. თინეფქ გეგმირჩქინეს ჸოროფა, ნამუთიქ გიორჯგინ ტომეფ შკას ნტერალას დო ხე შეუნწყუ ქრისტიანულ ართობას. ნამდვილო, ჩქიმო დიდ პატი რდუ, პჸოფედკო თინეფიშ გვერდით თეცალ განსაცდელიშ დროს.

1969 წანას იანკიშ სტადიონს ჩეტარ საერთაშორისო კონგრესიქ დევიზით „მშვიდობა დედამიწას“, ნამუშ თავმჯდომარე ჯიმა მილტონ ჰენშელი რდუ. მა თიშ დამხმარე ვორდჷ, მუ დროსით ბრელ მუდგარენ დიბგურე. თენა დროულ რდუ, მუშენდა უმოს გვიანო, 1970 წანას ლაგოსის (ნიგერია) ჩუვატარით საერთაშორისო კონგრესი „ღორონთიშ მოსაწონ კათა“. სამოქალაქო ჩხუპ ახალ ნათებ რდუ, ათეშენ თე კონგრესიქ დასურო იეჰოვაშ კურთხევათ ჩეტარ. თე კონგრესის 17 ნინაშა მორაგადე 121 128 კოჩიქ დესწრჷ. ჯიმალეფ ნორი დო ჰენშელი დო თინეფწკუმა ართო შხვა და დო ჯიმალეფ, მიდგაქ შტატეფშე დო ინგლისშე ჩარტერულ რეისეფით მოფურინეს, მუნეფიშ თოლო ქოძირეს ჟარნეჩდომავითა დღაშ დღახუშ უკულ ართ-ართ მაშტაბურ ქრისტიანულ ნათუა — თე კონგრესის 3 775 კოჩიქ ინათ. შემლებ ფთქუე, ნამდა არძაშ უმოს მეტ ხანდა ჩქიმ ცხოვრებას თე ღონისძიებაშ ორგანიზებაშა მიშამიძ. მაქადაგებელეფიშ რიცხვი ჭიჭე-ჭიჭეთ ვარინ, რეკორდულო იძინანდჷ.

მა 30 წანაშე მეტ ხანს ვიმსახურ ნიგერიას, თავრეშე კანკალეშა გილმალ ზედამხედველო ვმსახურენდჷ დო მინშა სამხარეო ზედამხედველო დასავლეთ აფრიკას. მისიონერეფ მარდულობას გიმოხანტუნდეს თი ყურადღება დო გურიშ ელაკინაშე, ნამდგას თეცალ მონახულებეფიშ დროს ღებულენდეს. ჩქიმო დიდ სიამოვნება რდუ დუვარწმუნკო თინეფ, ნამდა მეტებულ ვა რდეს. თე საქმექ ქუდმოგურუ, მუშმადიდა მნიშვნელობა უღჷ, პირად ინტერესიშ გიმორჩქინას, ნამდა გაგრძელან წიმი ულა, გემანგარან დო ხე ქეშუნწყუან იეჰოვაშ ორგანიზაციაშ ართობას.

დარწმუნებულ ვორექ, ნამდა ჩქი ხვალე იეჰოვაშ მოხვარათ შემალებუეს გავურზითკო თი პრობლემეფს, ნამდგას სამოქალაქო ჩხუპიშ დო ლახალაშ დროს შეფხვადით. იეჰოვაშ კურთხევას ირიათო არგამათ ვორწყედით. ორის იჩიებ:

„მუსხირენშა ჟირხოლოს მალარია მოჭირდეს. ართშა ვუდვორთ ლაგოსიშ საავადმყოფოს უგონო მდგომარეობას ჯანუდ. ვეგნასკიდუნია მიწუეს, მარა მადლობა ღორონც თიქ გეგნასკიდ. მუჟამსით გონებაქ დართჷ, თიქ ექთანს ღორონთიშ სამეფოშ გურშენ ქუდუჭყჷ ქადაგება. დრო ხანიშ უკულ მა დო ვუდვორთიქ ქიმვაკითხეთ თე ექთანს, ნამდა უმოსო დუვაინტერესითკო ბიბლიათ. თიქ ქიგეგ ჭეშმარიტება დო უმოს გვიანო უხუცესო მსახურენდჷ ქალაქ აბაშ კრებას. მა ხოლო მიღუდ ბრელ ჯგირ შემთხვევა, მაგალთო მივეხვარ მუსლიმანეფს დუდ მეუძღვინესკო იეჰოვას. მარა არძაშ უმოს დიდ ხიოლ ჩქინო ნიგერიელ ხალხიშ, თინეფიშ კულტურაშ დო წესეფიშ გაჩინებაფაქ დო ნინაშ დოგურაფაქ მომღეს“.

ჩქი ხოლო ართ მნიშვნელოვან გაკვეთილ დიბგურეთ: სულიერ წიმიულაშო, აუცილებერ რდუ მიჸორდესკო და დო ჯიმალეფ განსხვავებულ კულტურაშ უმკუჯინუო.

ახალ დანიშნულებეფ

ნიგერიაშ ბეთელს მსახურებაშ უკულ, 1987 წანას მისიონერო ქუდმანიშნეს კუნძულ სენტ-ლუსიას (კარიბიშ ზღვა). თაქ მსახურება სასიამოვნო რდუ, მარა სირთულეეფ ხოლო მიღდეს. აფრიკაშ გინაწონს, სოდეთ ბრელ ოსურიშ მოჸუნაფა რდუ გავრცელებურ, სენტ-ლუსიას პრობლემა თინა რდუ, ნამდა თაქ წყვილეფ ხეშ მოჭარუაშ უმშო ცხოვრენდეს ართო. მარა ღორონთიშ ძალიერ სიტყვაქ მეხვარ ბრელ დაინტერესებულს დუთირუდკო მუშ ცხოვრებაშ წესი.

ასაკშა მიშულაწკუმა ართო ჩქინ ჯამრთელობა იუფრაშებუდ, ათეშენ ხემძღვანელ საბჭოქ ქიზრუნ დო 2005 წანას მთავარ სამმართველოშა ბრუკლინშა (ნიუ-იორკი) გეგნომჸუნეს. ირ დღას მადლობას ვურაგადუქ იეჰოვას ორისიშ გურშენ. სანარღოთ 2015 წანას თიქ დოღურ, მუთ ნინათ ვემაჭარენ ფერ დანაკლის რე ჩქიმო. თინა არაჩვეულებრივ თანამგზავრ დო მოჸოროფე მეუღლე რდუ. მა მანგარო მიჸორდჷ თინა მთელ 68 წანას, მუთ ართო გუვატარით. ჩქი ქიმეფხვადით, ნამდა ნამდვილ ბედნერობაშო მუჭოთ ქორწინებას, თეშ კრებას ხოლო, აუცილებერ რე მეთაურობაშ პრინციპიშ პატიცემა, ართიანიშ პატიება, თანდაბლობაშ გიმორჩქინა დო წმინდა შურიშ ნაყოფიშ გავითარება.

გურიშგოტახუაშ ვარდა იმენდიშ დინაფაშ დროს, ირიათო იეჰოვას ფთხულენდით მოხვარას, ნამდა ბოლოშა ართგურეფქ ქუდოფსკიდითკო. მუჟამსით ხემძღვანელობას მეპჸუნდით, ვორწყედით, ნამდა მდგომარეობა იუჯგუშებუდ დო მუთ არძაშ უმოს მნიშვნელოვან რე, მომავალს ხოლო უჯგუშ მელნა (ეს. 60:17; 2 კორ. 13:11).

ტრინიდად დო ტობაგოს იეჰოვაქ აკურთხჷ ჩქინ მშობლეფიშ დო შხვა და დო ჯიმალეფიშ საქმიანობა. ბოლო მონაცემეფით თაქ მაქადაქებელეფიშ უმაღლეს რიცხვი 9 892 რე. არუბას და დო ჯიმალეფქ ბრელ იხანდეს თიშო, ნამდა გამანგარესკო პირველო ჩამოყალიბებურ კრება, სოდეთ მა გილეფშჷ. ასე თე კუნძულს 14 კრება რე. ნიგერიას მაქადაგებელეფიშ რიცხვიქ მანგარო მიძინ დო 381 398-ს ქიმიოჭირინუ. კუნძულ სენტ-ლუსიას 783 მაქადაგებელ ართგურო უკინენს ხუჯის იეჰოვაშ სამეფოს.

მა 90 წანას ვორექ გინოჩილათირ. თინეფიშ გურშენ, მით იეჰოვაშ ჸუდეს მსახურენა, ფსალმუნიშ 92:24 იჩიებ: „ჭაღარა ქაკათუნან თიმწკუმა ხოლო გოპეულერ დო ძალეფით ეფშა იჸუაფნა“. მარდულ ვორექ ჩქიმ ცხოვრებაშენ, ნამუთ იეჰოვაშ მსახურებას გუვატარ. მდიდარ სულიერ მემკვიდრეობაქ მიმეხვარ სრულაშო ვემსახურკო ღორონც. იეჰოვაქ ჸოროფა გეგმირჩქინ დო საშვალება ქომუჩ სულიერ წარმატებეფს ქიმვოჭირინეკო თიშ ორგანიზაციას (ფსალმ. 92:13).