ქობძირ იეჰოვაშ ხალხიშ რწმენა

მა გუმაძიცინ, მუშენდა ვა ფიფქრენდჷ ჩქიმ მეგობარ თეცალ რელიგიურ პიროვნება ქორდუნ, ათეშენ ბკითხჷ: „სი მუ გიჩქ ბიბლიაშ გურშენ?“. თიქ ხეთეშე ვა მუჩჷ პასუხ, მარა ბოლოს მიწუ, ნამდა დიამუშ იეჰოვაშ მოწმე რდჷ. ათეშენ, თიშე ბრელ მუდგარენ აფუდ მორჩქილაფირ. მახოლო ინტერესიქ გომრჩქინდჷ დო ქოფთხი, ხოლო უმოს ქიმეჩუკო თე ირფელიშ გურშენ.

ჩქინ ჩიებაქ შქა სერშახ გეგრძელ. ჩქიმ მეგობარშე გებგჷ, ნამდა მუჭოთ ბიბლია იჩიებ, სატანა მთელ ქიანას მართველენს (იოან. 14:30). შილებე თენა თქვა ირიათო გიჩქუდეს, მარა პირადო ჩქიმო თე აზრ ახალ დო მანგარ საინტერესო რდჷ. ირო თის იფრჩქილუაფუდ, ნამდა ღორონთ, ნამუთ ჯგირ დო სამართლიან რე, მართუნს მთელ მსოფლიოს, მარა თე აზრ ლოგიკურო ვემურდჷ თი ირფელს, მუდგას ცხოვრებას ვორწყედ. მართალ რე, გვალო 26 წანერ ვორდჷ, მარა ბრელ გაჭირება მაფუდ გინნაღელ.

მუაჩქიმ ამერიკაშ სამხედრო საჰაერო ძალეფიშ პილოტ რდჷ. მუჟამსით ბაღანა ვორდჷ, არგამათ ვორწყედ, ნამდა ბირთვულ ომიშ დოჭყაფა რეალურ რდჷ. თექ შილებე ნებისმიერ დროს დიჭყკო დო თეშო ჯარეფ ხოლო მზათ რდეს. მა კალიფორნიას კოლეჯის ბგურაფლენდჷ, მუჟამსით ვიეტნამს ომი რდჷ. ათეშენ, შხვა სტუდენტეფწკუმა ართო საპროტესტო აქციეფს ქუვაკათ. პოლიცია დუბინკეფით მოფთხოზდეს. თინეფქ ცრემლსადენ გაზ გეგმირინეს, ათეშენ შურიშ ღალა მიჭირდეს, გვერდო თოლს ხოლო ვა ვორწყედით დო მიბრულედით. მანგარ არეულობა დო ქაოს რდჷ დო პოლიტიკურ მკვლელობეფ ხოლო ხვადუდ, ხალხ საპროტესტო აქციეფს ონწყუნდჷ დო სიტუაცია უკონტროლო რდჷ. არძას განსხვავებულ შეხედულება უღუდ, ათეშენ მითინს ვა უჩქუდ, მუ ოკო აკეთკო.

1970 წანას ჩრდილოეთ ალასკას მუშობა ქიდიბჭყჷ დო ჭიჭე ფარა ქელეფშაყარე. უკულ კინე ლონდონშა დიფრთჷ, მოტოციკლეტ ქიპჸიდ დო სამხრეთჸურე მიდაფრთჷ, მარა ვამჩქუდ ზუსტას სო მიფშჷ. თუთეფიშ უკულ აფრიკაშა გენოფრთჷ. შარას შეფხვად თიცალ კათას, მიდგას ჩქიმცალო ოკოდ, ენტესკო თი პრობლემეფს ნამუთ უღდეს.

ათეშენ, მუჟამსით ქიმიფრჩქილე ბიბლიურ გურაფა, ნამდა სატანა მართუნს მთელ მსოფლიოს, თექ ლოგიკურო მიმაძირ, მარა მოინტერესუდ, იმწკუმა ღორონთ მუს ორთუდ?

თუთეფიშ დინახლე პასუხის ბღებულენდჷ ჩქიმ კითხვაშე. დროშ ულაწკუმა ართო, გეფჩინებაფე ბრელ თიცალ პიროვნება, მით ნებისმიერ სირთულეშ უმკუჯინუო, ართგურობას გიმირჩქინანდჷ ართ ჭეშმარიტ ღორონთიშ მიმართ.

ᲩᲠᲓᲘᲚᲝᲔᲗ ᲘᲠᲚᲐᲜᲓᲘᲐ — „ᲑᲝᲛᲑᲔᲤᲘᲨ ᲓᲝ ᲢᲧᲕᲘᲔᲤᲘᲨ ᲥᲘᲐᲜᲐ“

მუჟამსით ლონდონშა დიფრთჷ, ქეშეფხვად ჩქიმ მეგობარიშ დიდას, ნამდგაქ ბიბლია ქომუჩ. უმოს გვიანო, მიდაფრთჷ ამსტერდამშა. მუჟამსით ქუჩას ლამპიონიშ თუდო გითვოხედ დო ბიბლიას ბკითხულენდჷ, ართ იეჰოვაშ მოწმექ ქობძირ დო მიმეხვარ უმოს მეტიშ გაგებას. უკულ მიდაფრთჷ ირლანდიაშ დედაქალაქ, დუბლინშა. თექ იეჰოვაშ მოწმეეფიშ ფილიალს ქიმვოგორე დო მინაულარ კარს ქუდუხაკე. თე დროს გეფჩინებაფე, ართ გონიერ დო გამოცდილ ჯიმა, ართურ მათიუზ. თის ფთხი, ნამდა ჩქიმდა ბიბლიაშ გურაფა ქუდუჭყაფუდკო დო თიქ ხოლო ქიდმეთანხმჷ.

მთელ მონდომათ ქეშუდირთჷ ბიბლიაშ გურაფას, ვა მოკოდ მიკიფშქვიკო ნამთინ პუბლიკაცია, ნამდგას მოწმეეფ გიშაშქვანდეს დო არძას ბკითხულენდჷ. მუშო ოკო რაგად, ბიბლიას ხოლო ბკითხულენდჷ. თე ირფელს ჩქიმდა მანგარ ხიოლ მოუღუდ! კრებაშ შეხვალამეფს ვორწყედ, ნამდა ბაღანეფს ხოლო უღდეს თიცალ კითხვეფშე პასუხეფ, ნამდგაშე რჩქინელ კათა საუკუნეეფ რე პასუხის გორნა. მაგალთო, მუშენ ხვადუ უბადობა? მი რე ღორონთ? მუ ხვადუ ღურაშ უკულ? თე ქიანას მოწმეეფიშ მეტის მითინს ვეფჩინენდჷ, ათეშენ ჩქიმ არძა მეგობარ იეჰოვაშ მოწმე რდჷ. თინეფქ მიმეხვარეს, უმოსო ქიპჸოროფეკო იეჰოვა დო მიღუდკო სურვილ, შევასრულკო თიშ ნება.

დიბნათ 1972 წანას, ართ წანაშა პიონერო მსახურება ქიდიბჭყჷ დო გეგნოფრთჷ ჭიჭე კრებაშა, ნამუთ ჩრდილოეთ ირლანდიას, ნივრის რდჷ. თექ გვალამ ადგილს, ქუაშ ჸუდე დეფქირე. თიშ გოხოლუას დიდ დოლოეფ რდჷ, სოდეთ ჩხოულეფ იდიარდეს დო მოხსენებეფს თინეფწკუმა მეფცადინენდჷ. მუჟამსით მოხსენებას იფჩიებუდ, თინეფ ყურადღებათ მირჩქილედეს დო ავრე ინკორდეს. მართალ რე, ვეშულებდეს რჩევეფ ქომჩესკო, მარა თინეფიშ ჭყოლოფათ ქიდიბგურე, მუჭო მიღუდკო აუდიტორიაწკუმა კონტაქტ. 1974 წანას დებნიშნჷ სპეციალურ პიონერო დო მსახურება ქიდიბჭყჷ ნაიჯელ პიკწკუმა ართო, ნამდგაქ ჩქიმ მანგარ ხოლოშიან მეგობარო გინირთჷ. ჩქი ამდღარშახ მანგარ ჯგირ მეგობრეფ ვორეთ.

თე პერიოდის, ჩრდილოეთ ირლანდიას, ძალადობა მანგარო რდჷ მოდვალირ. ათეშენ, ნამთინე თის „ბომბეფიშ დო ტყვიეფიშ“ ქიანათ მიშინუანდჷ. თექ ჩვეულებრივ მუდგარენ რდჷ ჩხუპეფ ქუჩას, სნაიპერიშ თავდასხმეფ, ჸოთამა დო მანქანეფიშ აფეთქება. პოლიტიკა დო რელიგია ხოლო ართიანს რდჷ მეზელ, მარა პროტესტანტეფს დო კათოლიკეეფს ჯგირო არჩქილედეს, ნამდა იეჰოვაშ მოწმეეფ პოლიტიკას ნამთინიშ მხარეს ვა გედირთუდეს. ათეშენ, ჩქი შემალებედეს თავისფალო დო უმოს მშვიდას იფქადაგითკო. ადგილობრივეფს ხოლო უჩქუდეს, მუ დროს შილებედ სიტუაციაქ გეუფრაშკო. ათეშენ, თინეფ წინასწარ მაფრთხილენდეს დო თეშნერო შემალებედეს დუდ ევუჩილითეთკონ საფრთხეს.

მინშა ოშქურანჯ სიტუაციეფს ხოლო ფხვადუდით. ართშა, მა დო ართ პიონერ ჯიმა დენის კარიგან, ვმსახურენდით თიცალ ტერიტორიას, სოდეთ იეჰოვაშ მოწმეეფ ვა რდეს დო ხვალე ართშა ვორდით ნარინა. თექ ართ ოსურკოჩიქ ბრალ ქიგებდვეს, ითამ ბრიტანელ ჯარიშკოჩეფ ვორდით დო ფუბლუნდით. შილებედ თაშ თიშენ ფიქრენდჷ, ნამდა ირლანდიურ აქცენტ ნამთინს ვამღუდეს. ჭიჭე დოფშქურდით, მუშენდა თინეფს ტყვიაშ ოჸოთამალო დო კოჩიშ ოჸვილარო ხვალე თიშ რჩქინა ხოლო უბაღდეს, ნამდა მიდგარენს ბრიტანელ ჯარიშკოჩეფწკუმა ჯგირ ურთიერთობა უღუდ. ვარინ ჩხურუს გივორდით დო ავტობუსიშ მოულას ვუჯინედით. თე დროს ქობძირით, ნამდა თი კაფეშ წოხოლე სოდეთ თე ოსურ რდჷ, მანქანაქ გაჩენდჷ. თე ოსურქ მანქანას მითოხედუნ თი ჟირ ქომოლკოჩშა ქიმერთ დო განერვიანებულო ჩქინიშ გურშენ მუდგარენიშ რაგად ქუდუჭყჷ. უკულ თინეფქ მანქანა ეიაყარეს, ჭიე-ჭიეთ ჩქინდა ქუმორთეს დო ავტობუსიშ გრაფიკიშ გურშენ გითოკითხირ ქუდომჭყეს. მუჟამსით ავტობუსიქ ქუმორთჷ, თინეფქ შოფერს ქუდუჭყეს ჩიება, მარა ვეფრჩქილედით მუს იჩიებდეს. თექ მითინ ვემთოხედ დო ფიფქრენდით, თინეფს ჩქინ ქალაქშე გიშაჸუნაფა დო მუდგარენიშ დაშება ოკოდეს დო ჯგირ მუთუნ ვა მობძუდეს, მარა, საბედნეროთ, თექ ვა მოხვად. ავტობუსშე გითულაშ დროს შოფერს ბკითხჷ: „თაქ რდესინ თი კოჩეფ ჩქინიშ გურშენ ხომ ვა გოკითხუდეს მუთუნს?“ თიქ მიწუ: „მიჩქჷ თქვა მი რეთ დო თინეფს ხოლო ვუწი. ვა გაშქურნან ასე უსაფრთხოთ რეთ“.

1976 წანას, დუბლინს საოლქო კონგრესისa ქეშეფხვად პოლინ ლომაკსის, ნამუთ სპეციალურ პიონერო მსახურენდჷ დო ინგლისშე რდჷ. თინა მანგარ ჯგირ, თანდაბალ დო ართგურ და რდჷ. თის დო მუშ ჯიმას, რეის, ჭეშმარიტება ბაღანობაშე უჩქუდეს. ართ წანაშ უკულ ჩქი დებქორწინით დო გუვაგრძელით სპეციალურ პიონერეფო მსახურება ბალიმენას, ჩრდილოეთ ირლანდიას.

მუსხირენ წანას, რაიონულ მსახურებას ვორდით ბელფასტის, ლონდონდერის დო შხვა ოშქურანჯ ტერიტორიეფს. ჩქინდა მანგარო იმოქმედ თექიან და დო ჯიმალეფიშ რწმენაშ ძირაფაქ. თინეფქ იეჰოვას ართგურო ემსახურესკო თიშენ, ჩეთხინეს არასწორ რელიგიურ შეხედულებეფ, წინასწარ შექმნილ აზრ დო გოჯოგაფა, ნამდგას თინეფიშ გურს ტომბაშე აფუდ ჩხვიჩხვ გოდგუმილ. არგამა რე, იეჰოვაქ აკურთხჷ დო დოთხილუ თინეფ!

ირლანდიას 10 წანას ფცხოვრენდჷ. 1981 წანას მა დო ჩქიმ მეუღლე მემწვის გალაადიშ 72-ა კლასშა. სკოლაშ თებაშ უკულ დაბნიშნეს დასავლეთ აფრიკას, სიერა ლეონეს.

ᲡᲘᲔᲠᲐ ᲚᲔᲝᲜᲔ — ᲓᲐ ᲓᲝ ᲯᲘᲛᲐᲚᲔᲤᲘᲨ ᲒᲘᲛᲝᲠᲩᲥᲘᲜᲔᲚ ᲠᲬᲛᲔᲜᲐ ᲣᲦᲝᲜᲝᲑᲐᲨ ᲣᲛᲙᲣᲯᲘᲜᲣᲝ

მისიონერეფშო გიშართილ ჸუდეს 11 კოჩ ფცხოვრენდით. ჩქი მიღდეს ართ კუხნა, სუმ ტვალეტ, ჟირ აბანო, ართ ტელეფონ, ართ ონახვალ დო ართ ოსქირაფალ მანქანა. სინთე ხოლო ხშირას შქირტუდ დო წინასწარ ვამჩქუდეს, მუჟამს მოხვადუდ თენა. ორთვალს ვირთხეფ გილერულედეს დო პადვალს კობრეფ გილესიონტუდეს.

მართალ რე, იდეალურ პირობეფ ვამღუდეს, მარა მსახურებას მანგარ ხიოლ მოუღუდ ჩქინდა. ხალხ აფასენდჷ ბიბლიას დო ყურადღებათ მირჩქილედეს. ბრელქ ქიდიჭყჷ ბიბლიაშ გურაფა დო საბოლათ დინათ. ადგილობრივეფ მა „მისტერ რობერტის“ დო პოლინს „მისის რობერტის“ უძახდეს. მარა თიშ უკულ, მუთ ფილიალიშ საქმეეფიშ კეთება ქიდიბჭყჷ, ნამდგას ბრელ დრო ოსაჭირუდ, მსახურებას ჯვეშობურო ხშირას ვა მორწყედეს. ათეშენ ხალხიქ ჩქიმ ოსურშა „მისის პოლინიშ“ დო ჩქიმდა „მისტერ პოლინიშ“ დოძახება ქიდიჭყჷ. პოლინს თენა მანგარო მოწონდჷ.

ბრელ ჩქინ და დო ჯიმას მანგარო უჭირდჷ, მარა იეჰოვა ირიათო ზრუნენდჷ თინეფიშ აუცილებერ საჭიროებეფშო დო მინშა თეშო, სარკო საშვალებეფს ირინუანდჷ (მათ. 6:33). გუმაშინე ართ დაშ შემთხვევა, ნამდგას ხვალე თიმ დღაშ ოჭკუმალიშ ფარა უღუდ, მუშო დო მუშ სქუალეფშო. თიქ გედირთჷ დო თე ფარა ართ დალახებურ ჯიმას ქიმეჩჷ, ნამდა მალარიაშ წამალ ქიჸიდკო. თიმ დღას ველუდუნ თეშ, თე დაშა ართ ოსურქ ქიმერთჷ დო თუმაშ გერნაფა თხუ დო ბოლოს, ფარა ხოლო გეგნუგ. თე დაცალ სიტუაცია თე ტერიტორიას ბრელს უღუდ.

ᲜᲘᲒᲔᲠᲘᲐ — ᲐᲮᲐᲚ ᲙᲣᲚᲢᲣᲠᲐᲨᲐ ᲛᲔᲠᲩᲥᲕᲐᲜᲐ

სიერა ლეონეს 9 წანას ვორდით. უკულ ნიგერიას უმოს დიდ ბეთელს დუმანიშნეს. დო კინ თი საქმეს ვორთუდ მუდგას სიერა ლეონეს. მარა პოლინშო თე ცვლილებაშ მერჩქვანაქ ვეჸუ ადვილქ, მუშენდა ონდო ნიგერიაშა გინომიჸონანდესკო, თინა ირ თუთას 130 საათის ქადაგენდჷ დო ბრელ ჯგირ ბიბლიაშ გურაფა უღუდ. მარა ასე ბეთელს დახუნალ აჸიდუნ ფერ საქმე მეჩეს — ბარგეფ აჸიდ ელაჭალ. დუდშე ჭიჭე გუჭირდჷ, მარა უკულ ქიმეხვად, ნამდა შხვეფ მანგარო აფასენდეს თიშ ხანდას დო მუ ხოლო ირნერ შესაძლებლობას ირინუანდჷ ნამდა თანაბეთელელეფს გურშა ელუკინკო.

ნიგერიაშ კულტურა ახალ რდჷ ჩქინო, ათეშენ ბრელ მუდგარენ მაფდეს დაგურაფალ. გუმაშინე ართ შემთხვევა. ჯიმაქ ჩქიმ ოფისშა ართ და გემნიჸონ, ნამუთ ბეთელს ახალ მოწვიებულ რდჷ. ხეშ გიწოღალა მიმდომინ თიმწკუმა, თიქ ჩქიმ კუჩხეფწკუმა ბირგულეფს ქეშანთხჷ, თექ მანგარო გამკვირდჷ. უცფას ჟირ ბიბლიურ მუხლიქ ქუგმაშინ, საქმეეფიშ 10:25, 26 დო გამოცხადებაშ 19:10. ჩქიმო გივორდჷ დო ფიფქრენდჷ: „ვუწუაო ასე თე დას მუთუნ დო ვარ უჯგჷ გაფჩენდე?“, მარა თის ხოლო ფიფქრენდჷ, რახანს ბეთელშა მიწვისინ წესით ჯგირო ოკო უჩქუდკო, მუს იჩიებ ბიბლია თე საკითხწკუმა დაკავშირებით.

თიცალ გაკვირებულ ვორდჷ, თინა ხოლო ვა ფშჷ მუჭო ვათე თე დაწკუმა ჩიება. უკულ გეგმიბრკვი დო ქობძირ, ნამდა მუთ თე დაქ აკეთ, თინეფიშ ტრადიციაშ თანახმას თე ქიანას მეღებულ დო ჩვეულებრივ მუდგარენ ჸოფე. მუშენდა თეშნერო, პატიცემას გიმოხანტუნდეს. თინა ხოლო ქიგებგ, ნამდა ქომოლკათა ხოლო თაშ ნოკეთებუე დო თეს მუთუნნერ კავშირ ვა უღუდ თაყვანიშცემაწკუმა. ხვალე თენა ვარინ, ბიბლიას ხოლო რე მოჩამილ თიცალ შემთხვევეფ, მუჟამსით ართიანწკუმა შეხვალამაშ დროს თაშ მიქცის (1 სამ. 24:8). მოხიოლ, ნამდა თე საკითხის ჩქიმ ურჩქინჯობათ თიცალ მუდგარენ ვა ვუწი თე დას, მუდგათ უხერხულ ინვოჸოთანდჷ.

ნიგერიას ბრელ თიცალ და დო ჯიმა გეფჩინებაფეთ, მით იეჰოვაშ მიმართ წანეფიშ დინახალე, განსაკუთრებულ ართგურობას გიმირჩქინანდჷ. ართ-ართ თეცალ რდჷ ჯიმა, აიზეია ადაგბონა.b თიქ ჭეშმარიტება ახალგაზრდობას გეგჷ დო ჭიჭე ხანშა კეთრიშ დიაგნოზ ქიგუშქვეს. ათეშენ, კეთროვანეფიშ კოლონიაშა გუტეს, სოდეთ ხვალე მუ რდჷ იეჰოვაშ მოწმე. წინააღმდეგობაშ უმკუჯინუო, თექ 30-შე მეტ დალახებურს მეხვარ ჭეშმარიტებაშ გაგებას დო თეშნერო, კოლონიას კრებაშ ჩამოყალიბებას შეუნწყუ ხე.

ᲙᲔᲜᲘᲐ — ᲓᲐ ᲓᲝ ᲯᲘᲛᲐᲚᲔᲤ ᲛᲝᲗᲕᲘᲜᲔᲑᲐᲡ ᲒᲘᲛᲘᲠᲩᲥᲘᲜᲐᲜᲓᲔᲡ ᲩᲥᲘᲜ ᲛᲘᲛᲐᲠᲗ

1996 წანას, კენიაშ ბეთელს დაბნიშნეს დო თექ ფცხოვრენდით. გვალო დუდშე გეჩითინ თი ისტორიაშ უკულ, თე ქიანაშა პირველო ენოფრთჷ. თექიან ბეთელს სტუმარო ხშირას მიშეს ვერვეტიშ ჯიშიშ მაიმუნეფ დო დალეფს ხილს გითახირანდეს. ართშა ართ დაქ ოთახშე გეგმორთჷ დო აკოშკაქ გონჯამილო ქუდასქიდ. დორთელს ქოძირ, ნამდა ოთახ მაიმუნეფით რდჷ ეფშა. თინეფს არძა ოჭკუმალშა ქიმუგორუაფნა, ნამუთ ოთახის ქუღუდ. თე დას აშქურინ დო კიჟინით გალე გეგმოლ, მაიმუნეფქ ხოლო კიჟინ ქიგიაშქვეს დო აკოშკაშე ქოსხაპეს.

მა დო პოლინქ სუაჰილურ კრებაშა გეგნოფრთით. ჭიჭე ხანშა წიგნიშ შესწავლაშ ჩამტარებელო დუმანიშნეს (ასე თის კრებაშ ბიბლიაშ გურაფას უძახნა), ვარინ სუაჰილურ ნინაშა ჟირ სიტყვა ართიანშა ვემმაბუნინედ, ათეშენ გარჩიებელ მასალას წინასწარ ვამზადენდჷ, ნამდა კითხვეფიშ გიშაკითხირქ ვარა შემალებუკო. და დო ჯიმალეფ კომენტარეფს ტექსტის ჭარუდუნ თიშე ჭიჭეთ განსხვავებულო, მუნეფიშ სიტყვეფით ქოთქუანდეს-და ვა ბგებულენდჷ. დუდის მანგარ უხერხულო ბგინაფლენდჷ დო და დო ჯიმალეფშა ონჯღორე მიჩქუდ. მარა ჩქიმდა მანგარო მოქმედენდჷ თიშ ძირაფა, ნამდა და დო ჯიმალეფ თე ირფელს მიკიშქვანდეს დო თანდაბლობათ დო მოთვინებაშ გიმორჩქინათ საშვალებას მარზენდეს, ჩუვატარკო შეხვალამა.

ᲐᲛᲔᲠᲘᲙᲐ — ᲯᲒᲘᲠ ᲔᲙᲝᲜᲝᲛᲘᲙᲣᲠ ᲛᲓᲒᲝᲛᲐᲠᲔᲝᲑᲐ ᲓᲝ ᲠᲬᲛᲔᲜᲐᲨ ᲒᲘᲛᲝᲠᲩᲥᲘᲜᲐ

კენიას ართ წანას ხოლო ვა ვორდით. უკულ 1997 წანას ნიუ-იორკშა, ბრუკლინიშ ბეთელშა გეგნომიჸონეს. კენიაშ გინაწონს, ასე თიცალ ქიანას ფცხოვრენდით, სოდეთ ხალხის ჯგირ ეკონომიკურ მდგომარეობა უღუდ, მარა თეს ხოლო უღუდ მუშ სირთულეეფ (იგავ. 30:8, 9). თე და დო ჯიმალეფ თიცალ ქიანას ცხოვრენა, სოდეთ ეკონომიკურო ვა ჭირს, მარა თინეფ მუნეფიშ დრო დო ენერგიას უმოს ფარაშ ოშებელო ვარინ, თიშო ირინუანა, ნამდა ხუჯ ქუდუკინან იეჰოვაშ ორგანიზაციას.

წანეფიშ დინახალე შეფხვადით თიცალ და დო ჯიმალეფს, მით რწმენას გიმირჩქინანდეს შხვადოშხვა სიტუაციეფიშ უმკუჯინუო. მაგალთო, ირლანდიას სოდეთ სამოქალაქო არეულობა რდჷ, აფრიკას, სოდეთ უღონობა რდჷ დო და დო ჯიმალეფშე შორს რდეს დო ამერიკას, სოდეთ ჯგირ ეკონომიკურ მდგომარეობა უღნა. მუჭო ოხიოლ იეჰოვას, მუჟამსით გინმოჯინენა დო ორწყე, ნამდა მუშ ხალხ ჸოროფას გიმირჩქინანს თიშ მიმართ, ნებისმიერ სიტუაციაშ უმკუჯინუო.

წანეფ „თიშე უმოს ჩქარას მეურს ვინემ ძაფიშ გიორთუალ ირთანს“ (იობ. 7:6). ასე მა დო პოლინ, უორიკის მთავარ სამართველოს ვორეთ დო ხიოლით ვმსახურენთ თი და დო ჯიმალეფწკუმა ართო, მიდგას მთელ გურით უჸორა ართიან. ჩქი ბედნერეფ დო კმაყოფილეფ ვორეთ, მუშენდა შემლებნა ხუჯ დუკინათ ჩქინ მეფეს იესო ქრისტეს, მით მალას დაჯილდოვენს მუშ ართგურეფს (მათ. 25:34).