მთელ კრებაქ ქიმეხვარით ბიბლიაშ მაგურაფალს, დინათას

1, 2. მის შეულებ მეხვარას ბიბლიაშ მაგურაფალს, გეგნოდგას ნაბიჯ დო დინათას?

ემი, ნამუთ ფიჯის ცხოვრენს, იჩიებ: „მიჸორდჷ, მუდგას ბიბლიაშე ბგურაფლენდჷ დო მიჩქუდ, ნამდა თენა ჭეშმარიტება რდუ. მარა სოიშახ და დო ჯიმალეფწკუმა ურთიერთობა ვა დიბჭყჷ, თეიშახ ვამკეთებ საჭირო ცვლილებეფ დო ვა ვორდჷ მზათ ნათუაშო“. ემიშ შემთხვევაშე მნიშვნელოვან მუდგარენ იძირე: ბიბლიაშ მაგურაფალ უმოსო თიმწკუმა მეურს წიმი, მუჟამსით მოხვარას კრებაშე ღებულენს.

² არძა მაუწყებელს შეულებ ხე შეუნწყუას კრებაშ რდუალას (ეფეს. 4:16). ართ პიონერ და ლეილანი, ნამუთ ვანუატუს ცხოვრენს, იჩიებ: „ნარაგად რე, ბაღანაშ რდუალას მთელ სოფელ ოსაჭირუნია. ფიფქრენქ, თაშ რე მოწაფეეფიშ მომზადებაშ დროს ხოლო; მუჭოთ წესინ, მთელ კრება ოსაჭირ, ნამდა პიროვნებაქ ჭეშმარიტებაშა ქუმორთას“. არძას, ოჯახიშ წევრეფს, მეგობრეფს დო მასწავლებერეფს, მნიშვნელოვან როლ უღჷ ბაღანაშ რდუალას. თინეფ ელუჩანა დო ოგურუანა ბაღანას. თეშნერო მაუწყებელეფს ხოლო შეულებნა რჩევა მეჩან, გურშა ელუკინან დო სამაგალითო რდან ბიბლიაშ მაგურაფალეფშო დო მეხვარან, ნამდა დინათან (იგავ. 15:22).

3. მუს გურაფლენთ ანაშ, ლეილანიშ დო დორინიშ სიტყვეფშე?

³ მუშენ ოკო მეჩას ბიბლიაშ მასწავლებერქ საშვალება შხვა მაუწყებელეფს, მეხვარან ბიბლიაშ მაგურაფალს? ქიდეკვირით, მუს იჩიებ სპეციალურ პიონერ ანა, ნამუთ მოლდოვას მსახურენს: „ხვალე ართ ადამიანშო მანგარ ძნელ რე, ქიზრუნას ბიბლიაშ მაგურაფალიშ არძანერ საჭიროებაშო“. ხოლო ართ სპეციალურ პიონერ მოლდოვაშე, დორინი, იჩიებ: „ბრელშა შხვა მაუწყებელეფ თიცალ მუდგარენს ურაგადნა ბიბლიაშ მაგურაფალს, მუთ ოხუ თიშ გურს დო ნამუთ მა დღას ვამმალედ აზრო“. ლეილანი ხოლო შხვა მიზეზის მიშინუანს: „ჸოროფა დო ზრუნვა, ნამდგას ბიბლიაშ მაგურაფალ გინაფლენს, ოხვარ თის, ქიმეხვადას, ნამდა მართალო იეჰოვაშ ხალხ ვორეთ“ (იოან. 13:35).

4. მუს გუვარჩიენთ თე სტატიას?

⁴ მარა შილებე ფიქრენდათ: „მუჭო შემლებ მივეხვარე ბიბლიაშ მაგურაფალს წიმი ულას, მუჟამსით მა ვა ვოგურუანქ?“ მორთ გუვარჩუათ, მუშ კეთება შემლებნა, მუჟამსით ფთხინა, ქიდვესწრათ ბიბლიაშ გურაფას დო მუჟამსით ბიბლიაშ მაგურაფალ კრებაშ შეხვალამეფშა გილულას იჭყანს. თეს გეძინელ, ქობძირუნთ, მუჭო შეულებნა უხუცესეფს მეხვარან თინეფს, გეგნოდგან ნაბიჯ დო დინათან.

მუჟამსით ბიბლიაშ გურაფას ოსწრუთ

5. მუ რე თქვან ვალდებულება, მუჟამსით ბიბლიაშ გურაფას ოსწრუთ?

⁵ ბიბლიაშ გურაფაშ დროს პირველ რიგის მასწავლებერ რე ვალდებულ, მეხვარას მაგურაფალს, ქენანჭას ღორონთიშ სიტყვას. მასწავლებერ ბიბლიაშ გურაფაშა დასწრებას ქორთხინან-და, ვაგგოჭყორდან, ნამდა თიშ პარტნიორ რეთ. თქვან ვალდებულება რე, მეხვარათ თის (ეკლ. 4:9, 10). კონკრეტულო მუშ კეთება შეილებნა, ნამდა ეფექტურო ჩატარათ ბიბლიაშ გურაფა?

6. მუჭო შეილებნა გიმირინუათ იგავეფიშ 20:18-ს მოჩამილ პრინციპ, მუჟამსით მეურთ, ნამდა ქიდესწრათ ბიბლიაშ გურაფას?

⁶ მემზადით ბიბლიაშ გურაფაშო. პირველ რიგის, ქოთხით მასწავლებერს, ჭიჭე მუდგაინ ქოიწუან ბიბლიაშ მაგურაფალიშ გურშენ (წეკითხით იგავეფიშ 20:18). შეილებნა კითხათ: „მუშ რაგად შეილებ ბიბლიაშ მაგურაფალიშ რწმენა, ოჯახ დო წარსულშენ? მუ საკითხის გარჩიენთ? მუ რე სქან მიზან თე გურაფაშ დროს? ხომ ვა რე თიცალ მუდგარენ, მუთ ოკო ფთქუე ვარდა ვა ფთქუე ბიბლიაშ გურაფაშ დროს? მუქ შილებე აღძრას თინა, ნამდა წიმი მიდართას?“ მუშო ოკო რაგად, მასწავლებერ პირადულ ინფორმაციას ვა გიწინა, მარა მუდგას გიწინან თიქ, შილებე გემგოდირთან. ჯოი, ნამუთ მისიონერო მსახურენს, თეცალ საკითხეფშენ ეჩიებ თინეფს, მით ბიბლიაშ გურაფაშა მეჸუნს. თინა იჩიებ: „თეცალ რაგად ოხვარ ჩქიმ პარტნიორს, გეგმირჩქინას პირად ინტერეს ბიბლიაშ მაგურაფალიშ მიმართ დო გეგნოჭყვიდას, მუ თქუას გურაფაშ დროს“.

7. მუშენ ოკო მემზადათ, მუჟამსით შხვას მეჸუნთ ბიბლიაშ გურაფაშა?

⁷ ბიბლიაშ გურაფაშა დასწრება ქორთხის-და, ჯგირ იჸუაფ წინასწარ მამზადათ გარჩიებელ მასალა (ეზრ. 7:10). ჯიმა დორინი, ნამუთ ჟიშე მიფშინეთ, იჩიებ: „ვაფასენქ, მუჟამსით ჩქიმ პარტნიორ ემზადებ ბიბლიაშ გურაფაშო. თეშნერო თის შეულებ მონაწილება მიღას გარჩიებას დო მეხვარას მაგურაფალს“. თეს გეძინელ, ბიბლიაშ მაგურაფალ ალბათ ქოძირუნს, ნამდა ჟირხოლო მომზადებულ რეთ დო თენა ჯგირ მაგალით იჸუაფ თიშო. თიმწკუმა ხოლო, მუჟამსით ვეშეილებნა ტომბაშე მამზადათ მასალა, ჭიჭე დრო ვარა გეგმურთით ძირითად აზრეფიშ გაგებას.

8. მუჭო შეილებნა დერწმუნათ, ნამდა ბიბლიაშ გურაფაშ დროს თქვან ლოცვეფ შინაარსიან რე?

⁸ ლოცვა ბიბლიაშ გურაფაშ მნიშვნელოვან ნაწილ რე. ათეშენ დეფიქრით, მუს თქუანთ, ლოცვა ქორთხის-და. შედეგო თქვან ლოცვეფ უმოს შინაარსიან იჸუაფ (ფსალმ. 141:2). ჰანას, ნამუთ იაპონიას ცხოვრენს, ასე ხოლო შჷ თი დაშ ლოცვეფ, მით მუშ ბიბლიაშ მასწავლებერს მოჸუნდჷ. თინა იჩიებ: „ბგინაფლენდჷ, ნამდა თის იეჰოვაწკუმა ხოლოშიან მეგობრობა უღუდ დო მოკოდ, თიცალ პჸოფედკო. მუჟამსით ლოცვეფს ჩქიმ სახელს მიშინუანდჷ, თის ხოლო ბგინაფლენდჷ, ნამდა თე დას ვუჸორდჷ“.

9. მუჭოთ იაკობიშ 1:19-შე იძირე, მუშ კეთება შეილებნა, ნამდა რდათ ჯგირ პარტნიორ ბიბლიაშ გურაფაშ დროს?

⁹ ქიმეხვარით მასწავლებერს ბიბლიაშ გურაფაშ დროს. ომამუოვი, სპეციალურ პიონერ ნიგერიაშე, იჩიებ: „ჯგირ პარტნიორ ყურადღებით რე ბიბლიაშ გურაფაშ დროს. თინა საინტერესო აზრეფს მიშარაგადანს, მარა ბრელს ვეჩიებ, მუშენდა უჩქჷ, გურაფა მასწავლებერიშ საქმე რე“. მარა მუჭო ოკო მეხვადათ, მუ ოკო თქუათ დო მუჟამ? (იგავ. 25:11). ყურადღებით ურჩქილით, მუჟამსით მასწავლებერ დო მაგურაფალ იჩიებნა (წეკითხით იაკობიშ 1:19). ხვალე თე შემთხვევას შეგალებენა, მასწავლებერს საჭირო დროს ქიმეხვარათ. მუშო ოკო რაგად, ჯგირო ოკო გუჩათ გურ, მუს იჩიებუთ. მაგალთო, ვა გოკოდან იჸი ნამდა, ბრელ ჩიებაქ გიშაირთან, მასწავლებერს რაგადის ეწაჭკირათ ვარდა გინურთათ შხვა თემაშა. მოკლე კომენტარეფით, მაგალითეფით ვარდა კითხვეფით შეილებნა მეხვარათ მაგურაფალს, უჯგუშო ქენანჭას საკითხის. მინშა შილებე ფიქრენდათ, ნამდა მუთუნიშ გეძინა ვეშეილებნა კონკრეტულ საკითხიშ გურშენ. მარა ბიბლიაშ მაგურაფალს ქაცქვანთ დო პირად ინტერესის ქაძირანთ-და, უმოსო მეხვარებუთ წიმი ულას.

10. მუჭო შილებე მეხვარას თქვან გამოცდილებაქ ბიბლიაშ მაგურაფალს?

¹⁰ გეგნოჩით თქვან გამოცდილება. თენა ბიბლიაშ მაგურაფალს ქიმეხვარებუნ-და, მოკლეთ ქეჩით, მუჭო გეგით ჭეშმარიტება, მუჭო გიორჯგინით სირთულეეფს დო მუჭო ძირით იეჰოვაშ ხე თქვან ცხოვრებას (ფსალმ. 78:4, 7). თქვან გამოცდილებაშ მორჩქილაფა შილებე ზუსტას თინა რდას, მუთ თის ოსაჭირ. თეს შეულებ გამანგარას თიშ რწმენა დო აღძრას, ნამდა გაგრძელას წიმი ულა. თეწკუმა ართო, შილებე ქაძირუას ბიბლიაშ მაგურაფალს, მუჭო გიორჯგინას განსაცდელეფს, ნამდგას ხვადუ (1 პეტ. 5:9). გაბრიელი, ნამუთ ასე ბრაზილიას პიონერო მსახურენს, იშინანს, მუქ მეხვარ თის, მუჟამსით ბიბლიაშ გურაფლენდჷ: „ჯიმალეფიშ შემთხვევეფ მიფრჩქილენ, ქიმეფხვად, ნამდა იეჰოვა ორწყე ჩქინ განსაცდელეფს. თინეფქ გიორჯგინეს-და, მა ხოლო შემალებე თეშ კეთება“.

მუჟამსით ბიბლიაშ მაგურაფალ შეხვალამეფს ოსწრჷ

11, 12. მუშენ ოკო შეფხვადათ მთელ გურით ბიბლიაშ მაგურაფალს, ნამუთ შეხვალამეფს ოსწრჷ?

¹¹ ბიბლიაშ მაგურაფალქ ნაბიჯ გეგნოდგას დო დინათასინ, რეგულარულო ოკო დესწრას კრებაშ შეხვალამეფს დო სარგებელ მიღას თიშე (ებრ. 10:24, 25). ალბათ მასწავლებერ დაპატიჟენს თის შეხვალამაშა. მუჟამსით ქიდესწრებ, არძას შემლებნა აღბძრათ თინა, ნამდა ვემიოტუას დარბაზშა გილულა. კონკრეტულო მუჭო შემლებნა თეშ კეთება?

¹² მთელ გურით ქეშეხვადით ბიბლიაშ მაგურაფალს (რომ. 15:7). ბიბლიაშ მაგურაფალს ჯგირო ქეშეფხვადით-და, უმოსო აჸი გურ, გაგრძელას დარბაზშა გილულა. დუდ უხერხულო ვაგინაფუათინ თეშ, მთელ გურით ქეშეხვადით თის დო შხვეფს ხოლო გაჩინებაფეთ. ვეფიქრათ, ნამდა თიშე მიდგაინ ქიზრუნენს. მასწავლებერს შილებე დროულო ვა მართინას ვარდა პასუხიშმგებლობეფ უღდას დარბაზის. ყურადღებით ქურჩქილით, მუდგას ბიბლიაშ მაგურაფალ გეჩიებნა დო გეგმირჩქინით პირად ინტერეს. მუჭო შილებე იმოქმედას თაშ მოქციებაქ? ყურადღება ქიმიაქცით დიმიტრიშ მაგალითის, ნამდგაქ მუსხირენ წანაშ წოხოლე ინათ დო ასე მომსახურეთ მსახურენს. თი დროშ გურშენ, მუჟამსით პირველო დესწრჷ შეხვალამას, თინა იჩიებ: „ართ ჯიმაქ ქობძირ, ნამდა დარბაზიშ გალე ელვორდჷ დო ბნერვიანენდჷ. თიქ დინახლე გემნომიჸონ, სოდეთ ბრელქ მორთჷ ჩქიმდა გამარჯობაშ ორაგადშა. მანგარ გაკვირვებულ ვორდჷ. თეშ მიმეწონ თექიანობაქ, ნამდა იბნატრჷ, შეხვალამეფ ირდღას ქოჸოფედკო. თიცალ მუდგარენ იბგინ, მუთ შხვადო სოთინ ვამგინაფ“.

13. მუჭო შილებე იმოქმედას თქვან ჯგირ მაგალითიქ ბიბლიაშ მაგურაფალშა?

¹³ ქიმეჩით ჯგირ მაგალით. თქვან ჯგირ მაგალითის შეულებ დარწმუნას ბიბლიაშ მაგურაფალ, ნამდა ჭეშმარიტება ქოძირ (მათ. 5:16). ვიტალი, ნამუთ ასე მოლდოვას პიონერო მსახურენს, იჩიებ: „ქობძირ კრებას რდესინ თინეფ მუჭო ცხოვრენდეს, ფიქრენდეს დო იქციებდეს. თექ დუმარწმუნ, ნამდა იეჰოვაშ მოწმეეფ დასურო ღორონთწკუმა ართო გილულა“.

14. მუჭო შეულებ თქვან მაგალითის მეხვარას შხვას, ვემიოტუას წიმი ულა?

¹⁴ ბიბლიაშ მაგურაფალქ დინათასინ, ოკო გეგმირინუას თინა, მუდგას გურაფლენს. თენა ირო ადვილ ვა რე. მარა, მუჟამსით მაგურაფალ ორწყე, მუ ჯგირობუა მოუღ თქვანდა ბიბლიურ პრინციპეფიშ გიმორნაფას, შილებე აღძრულქ ქიჸუას, მიაჸუნას თქვან მაგალითის (1 კორ. 11:1). დეფიქრით ჟიშე მოშინაფილ ჰანაშ შემთხვევაშე. თინა იჩიებ: „და დო ჯიმალეფ ცოცხალ მაგალითეფ რდეს თიშ, მუდგას ბგურაფლენდჷ. ქობძირ, მუჭო შემლებ გურშა ელვუკინე, ვაპატუე შხვეფს დო გიმიფრჩქინე ჸოროფა. თინეფ შხვეფიშ გურშენ ირო დადებითო იჩიებდეს დო მოკოდ, მა ხოლო თეცალ პჸოფედკო“.

15. მუჭოთ იგავეფიშ 27:17-ის ჭარჷ, მუშენ ოკო დევემეგობრათ თი ბიბლიაშ მაგურაფალეფს, მით აგრძელენა კრებაშა გილულას?

¹⁵ რდათ ბიბლიაშ მაგურაფალეფიშ მეგობრეფ. მუჟამსით ბიბლიაშ მაგურაფალ აგრძელენს კრებაშ შეხვალამეფშა გილულას, ვემიოტუათ პირად ინტერესიშ გიმორჩქინა (ფილ. 2:4). შეილებნანო უჯგუშო გეჩინებაფუათ თინა? პირადულ კითხვეფ ვა დუსვათინ თეშ, შეილებნა ქაცქუათ თიშენ, მუთ თირუ ცხოვრებას დო ქოკითხათ ბიბლიაშ გურაფა, მუშ ოჯახ დო სამუშაშენ. თეცალ ჩიებეფქ შილებე უმოსო დუგაახლოვან ართიანწკუმა. მუჟამსით ბიბლიაშ მაგურაფალიშ მეგობარო გინირთუთ, ოხვარუთ თის, ნაბიჯ გეგნოდგას დო დინათას (წეკითხით იგავეფიშ 27:17). ასე ჰანა სრულ დროთ პიონერო მსახურენს. თი დროშ გურშენ, მუჟამსით დიჭყჷ კრებაშ შეხვალამეფშა გილულა, თინა იჩიებ: „თიშ უკულ, მუთ კრებას მეგობრეფ გიფრჩქინ, შურ მოლუდ თექიან მეულაშა დო თიმწკუმა ხოლო მიფშჷ, მუჟამსით მანგარ შულადირ ვორდჷ. ახალ მეგობრეფწკუმა ურთიერთობას ჩქიმდა ხიოლ მოუღუდ დო თექ მიმეხვარ, მივოტეკო თინეფწკუმა მეგობრობა, მით ვამსახურუდ იეჰოვას. მოკოდ, უმოსო დევეახლოვკო იეჰოვა დო და დო ჯიმალეფს. ათეშენ გეგნობჭყვიდ, დიბნათკო“.

16. ხოლო მუშ კეთება შეილებნა ბიბლიაშ მაგურაფალიშ მახვარებელო, ნამდა კრებას დუდ უცხოთ ვეგინას?

¹⁶ მუჟამსით ბიბლიაშ მაგურაფალ აგრძელენს წიმი ულას დო ცხოვრებაშ თირუას, ქიმეხვარით თის, დუდ კრებაშ ნაწილო იგინას. თეშ კეთება სტუმარიშ ჸოროფაშ გიმორჩქინათ შეილებნა (ებრ. 13:2). დენისი, ნამუთ მოლდოვას ცხოვრენს, იშინანს თი დროს, მუჟამსით ბიბლიას გურაფლენდჷ: „მა დო ჩქიმ ოსურ მუსხირენშა დუმაპატიჟეს და დო ჯიმალეფქ, ნამდა სასიამოვნოთ გუვატარითკო დრო მუნეფწკუმა ართო. თინეფქ მეჩუეს, მუჭო მეხვარ იეჰოვაქ დო თექ გურშა ელამკინეს. თე სიტუაციეფქ მიმეხვარეს, დებრწმუნითკო, ნამდა მართალო მოკოდეს იეჰოვაშ მსახურება დო მელდეს დიდებულ მომავალ“. მუჟამსით ბიბლიაშ მაგურაფალ მაუწყებელო გინირთუ, შეილებ სქანწკუმა ართო მიდეჸუნე მსახურებაშა. დიეგო, ნამუთ ბრაზილიას მსახურენს, იჩიებ: „ბრელ ჯიმას გილაპჸუნდჷ მსახურებაშა. თენა არძაშ უჯგუშ საშვალება რდუ თინეფიშ ჯგირო გაჩინებაფალო. თეშნერო ბრელ დიბგურე დო უმოსო დევეახლოვ იეჰოვა დო იესოს“.

უხუცესეფს მუჭო შეულებნა მოხვარა?

17. მუჭო შეულებნა უხუცესეფს მეხვარან ბიბლიაშ მაგურაფალეფს?

¹⁷ დრო გეგმურთით ბიბლიაშ მაგურაფალეფს. უხუცესეფ, თქვან ჸოროფათ გიმორჩქინელ ინტერეს მეხვარებ ბიბლიაშ მაგურაფალს, ნაბიჯ გეგნოდგას დო დინათას. შეილებნანო ირ შეხვალამაშ დროს ქუდურაგადუათ თინეფს? თინეფიშ სახელეფს ქიდემახსოვრენთ-და, განსაკუთრებულო თიმწკუმა, მუჟამსით კომენტარიშ რაგადის იჭყანა, თქვანდე პირად ინტერესის ქიგინანა. შეილებნანო განრიგ თეშ ქიგიონწყუათ, ნამდა მინშა მიდაჸუნათ მაუწყებელს ბიბლიაშ გურაფაშა? თქვა შილებე თიშე უმოსო იმოქმედათ ბიბლიაშ მაგურაფალშა, ვინემ ფიქრენთ. ჯეკი, პიონერ ნიგერიაშე, იჩიებ: «ბიბლიაშ მაგურაფალეფ გაკვირვებულ რენა, მუჟამსით გებულენა, ნამდა ბიბლიაშ გურაფაშა მოპჸუნსინ თი ჯიმა, უხუცეს რე. ართ მაგურაფალქ თქუ: „ჩქიმ მოძღვარ დღას ვაკეთენდჷ თეს. თინა ხვალე ფარამეფშა გილურს დო ხვალე თიმწკუმა, მუჟამსით გინუგანა!“» თე ბიბლიაშ მაგურაფალ ასე შეხვალამეფს ოსწრჷ.

18. მუჭო შეულებნა უხუცესეფს შეასრულან მუნეფშა მენდებულ თი პასუხიშმგებლობა, ნამუთ საქმეეფიშ 20:28-ს რე მოჩამილ?

¹⁸ ქუდაგურეთ დო ქაცქვეთ ბიბლიაშ მასწავლებერეფს. უხუცესეფ, თქვა მნიშვნელოვან პასუხიშმგებლობა გიღნა, ქუდაგურუათ მაუწყებელეფს, რდან უმოს ეფექტურ მაქადაგებელეფ დო მასწავლებერეფ (წეკითხით საქმეეფიშ 20:28). მითინს თქვანწკუმა ართო ბიბლიაშ გურაფაშ ჩატარებაშა ონჯღორე ქუჩქუნ-და, ქუწით, ნამდა თქვა ჩატარენთ. ჯეკი, ნამუთ ჟიშე მიფშინეთ, იჩიებ: „უხუცესეფ ირიათო მოკითხნა ჩქიმ ბიბლიაშ მაგურაფალეფიშ გურშენ. ბიბლიაშ გურაფაშ ჩატარებაშ დროს სირთულეეფს შეფხვადუქინ, თინეფ ჯგირ რჩევეფს მარზენა“. უხუცესეფს ბრელ მუდგარენიშ კეთება შეულებნა, ნამდა გურშა ელუკინან ბიბლიაშ მასწავლებერეფს დო აღძრან თინეფ, მთელ გურით გაგრძელან გურაფაშ საქმე (1 თეს. 5:11). ჯეკი გეუძინანს: „მობწონს, მუჟამსით უხუცესეფ გურშა ელამკინანა დო მირაგადნა, ნამდა აფასენა ჩქიმ ხანდას. თეცალ სიტყვეფ თეშ მოქმედენს ჩქიმწკუმა, მუჭოთ ჩხანა დღას ართ ჭირქა ჸინ წყარ. თინეფიშ ცქვაფაშ შედეგო უმოსო ბჯერს ჩქიმ დუდიშ დო მაძინუ ხიოლ, ნამუთ თე საქმეშ კეთებას მოუღ“ (იგავ. 25:25).

19. მუს შეულებ, ხიოლ მომღან?

¹⁹ თიმწკუმა ხოლო, მუჟამსით ჩქი ვამღუნა ბიბლიაშ გურაფა, შემლებნა შხვეფს მივეხვარათ სულიერო წიმი ულას. ზედმეტ ჩიებაშ უმშო, ჯგირო მომზადებულ აზრეფით, შემლებნა მივეხვარათ ბიბლიაშ მასწავლებერს გურაფაშ დროს. ჩქი შემლებნა დევემეგობრათ ბიბლიაშ მაგურაფალეფს, მუჟამსით მოულა კრებაშ შეხვალამაშა დო ქუვოძირათ ჯგირ მაგალით. უხუცესეფს შეულებნა გურშა ელუკინან ბიბლიაშ მაგურაფალეფს თით, ნამდა დრო გეგმურთან თინეფს დო მასწავლებერეფს თით, ნამდა ქუდაგურუან დო ქაცქუან. მართალო, მუქ ოკო მომღან თიშ უმოს ხიოლ, ვინემ თიშ რჩქინაქ, ნამდა მიდგაინს ჭიჭეთ ვარა ქიმვეხვარით, ქიჸოროფუკო ჩქინ მუმა, იეჰოვა, დო ემსახურკო თის?!