ჩქი ქიდიბგურეთ, დღას ვა ვუწითკო იეჰოვას ვარია

იეჰოვაშ ჸოროფაშ გავითარება

ჰარვი ოთხ ჯიმაშე არძაშ უნჩაშ რდუ. თიშ ოჯახიქ ჭეშმარიტება დასავლეთ ავსტრალიაშ ჭიჭე ქალაქის 1930-იან წანეფიშ გლახა ეკონომიკურ მდგომარეობაშ დროს გეგჷ. ჰარვის ბაღანობაშე ქუჸოროფუეს იეჰოვა დო 14 წანერ რდუნ თეშ დინათ. თიქ ხეთეშე ქიდიგურუ, ნამდა თეოკრატიულ დავალებეფშე ვარია ვა უთქუალუდკო. ბაღანა ბოშ რდუნ თეშ, კრებას „გინაჯინალ კოშკიშ“ კითხირ ქუდავალეს, მარა ფიქრენდჷ, ნამდა გამოცდილება ვა უღუდ დო ვარია უწუ. თეშ გურშენ ართ ჯიმაქ ქუდურაგადუ თის დო უწუ: „მუჟამსით იეჰოვაშ ორგანიზაციას მუდგარენიშ კეთებას რთხინა, ფიქრენა, ნამდა შეილებ თეშ კეთება!“ (2 კორ. 3:5).

ჩქიმ დიდა დო უნჩაშ დაცალო, მა ხოლო ჭეშმარიტება ინგლისის დიბგურე. მუმაქ ბრელ ხანიშ უკულ მიღჷ ჭეშმარიტება, დუდშე თინა მოწინააღმდეგუდეს. მართალ რე თის ვაკოდ, მარა მა იშენ დიბნათ, ვით წანერ ხოლო ვა ვორდინ თეშ. მიზანო მიღუდ პიონერობა დო უკულ მისიონერობა. მარა ჩქიმ მუმა ვა მუჩანდჷ პიონერო მსახურებაშ უფლებას ონდო 21 წანერ ვეპჸიდ. თეზმა ხანს იშენ ვა მაჸუ ოჯინექ, მუშენდა 16 წანერ ვორდინ თეშ, უფლება ქომუჩ ავსტრალიაშა, უნჩაშ დაშა, გინიბლიკო ოცხოვრებშა, ნამუთ თექ ცხოვრენდჷ. საბოლათ, 18 წანერო გინიფრთინ, ქიდიბჭყჷ პიონერო მსახურება.

ავსტრალიას ჰარვის ქეშეფხვად. ჩქი ჟირხოლოს მოკოდეს იეჰოვას მისიონერო ვემსახურითკო. 1951 წანას დებქორწინით. ართო ჟირ წანიან პიონერობაშ უკულ სარაიონო მსახურება ქოფთხის. ჩქინ რაიონ შითმოდირთუდ დასავლეთ ავსტრალიაშ დიდ ნაწილშე, თაშ ნამდა, მიწიენდეს შორ, ძნელო მიოჸულარ დო უწყარე ადგილეფშა გილულა.

ჩქინ ოცნებაქ შისრულ

ჩქი 1954 წანას გალაადიშ 25-ა კლასშა ქიმემწვიეს. ჩქინ ოცნებას, ნამდა მისიონერეფო ივმსახურითკო, მალას ქიმვოჭირინუანდით! ნიუ-იორკშა გემით გენოფრთით დო ქიდიბჭყით ბიბლიაშ ტომბაშე გურაფა. პროგრამაშ ართ-ართ ნაწილ რდუ ესპანურიშ გურაფა, ნამდგაქ ჰარვიშო ძნელქ იჸუ, მუშენდა თის ვეშულებუდ ასო „რ“ თეშ ქოთქუკო, მუჭოთ ესპანურს რდუ სწორ.

გურაფაშ პერიოდის მასწავლებერეფქ გიმაცხადეს, ნამდა მით დაინტერესებულ რდუ, იაპონიას იმსახურკო, შეულებუდ ქინიჭარკო დუდ იაპონურ ნინაშ გაკვეთილეფშა. ჩქი გეგნობჭყვიდით, ნამდა იეჰოვაშ ორგანიზაციაქ გეგშამგორესკო დანიშნულება. ხეთეშე ართ-ართ მასწავლებერქ, ალბერტ შრედერქ, ქიგეგ, ნამდა ჩქი ვენვოჭარუდით სიას. თიქ მიწუეს: „უმოსო ქიფიქრით თეშე“. გინოჭყვიდილ დიო ხოლო ვა მაფდესინ, ჯიმა შრედერქ მიწუეს: „მა დო შხვა მასწავლებერეფქ უკვე ქინგოჭარით. ქიდეკვირით, ქეშგალებენა დო ვარ იაპონურიშ გურაფა“. ჰარვის ადვილ დაგურაფალქ აჸუ თე ნინაქ.

მუჟამსით 1955 წანას იაპონიაშა ენოფრთით, მთელ ქიანას ხვალე 500 მაუწყებელ რდუ. თიმ დროს ჰარვი 26 წანერ რდუ დო მა — 24. ჩქი დაბნიშნეს საპორტო ქალაქ კობეს, სოდეთ ოთხ წანას ივმსახურით. თეშ უკულ კინ გილმალ მსახურეფო დაბნიშნეს, მუდგაქ მანგარო მახიოლეს. ჩქი ვმსახურენდით ქალაქ ნაგოიაშ ხოლოს. ირფელ მიჸორდეს თე დანიშნულებას — და დო ჯიმალეფ, თექიან ოჭკუმალ დო გარემო. ბრელ ხანიშ უკულ ჩქი ხოლო ქუმმაჩეს საშვალებაქ, ვარია ვა მითქუალდესკო იეჰოვაშა.

ახალ დანიშნულებას ახალ სირთულეეფ მოჸუნს

გილმალ მსახურებაშ დოჭყაფაშე სუმ წანაშ უკულ იაპონიაშ ფილიალქ ბკითხეს, ხომ ვა მოკოდეს ტაივანშა გინულა, ნამდა ამის ნინაშა მორაგადე ტომეფშა მიქადაგებდესკო. თექ ნამთინექ განდგომილო გინირთჷ დო საჭირო რდუ ჯიმა, ნამდგას იაპონურ არჩქვენუდ დო სიტუაციას გეგშასწორენდჷ.a ჩქი მიჸორდეს თინა, მუდგას იაპონიას ვორთუდით, ათეშენ თეშ გინოჭყვიდუა ადვილ ვა მაფდეს. მარა ჰარვიქ დიგურუ, დღას ვა თქუკო ვარია ნამთინ დანიშნულებაშე, თაშ ნამდა, მიბრაგადეთ დო გეგნობჭყვიდით, მიდაფრთითკო.

ტაივანშა 1962 წანაშ ნოემბერს ენოფრთით. თექ 2 271 მაუწყებელ რდუ, თინეფიშ უმენტაშ ამის ნინაშა რაგადანდჷ. მარა ჩქი დიო ჩინურ ოკო დომგურუაფდესკო. თეშო ხვალე ართ წიგნ მიღდეს დო პჸუნდეს მასწავლებერ, ნამდგას ინგლისურ ვა უჩქუდ. თეშ უმკუჯინუო, ჩქი იშენით ქიდიბგურეთ ჩინურ.

ტაივანშა გინულაშ უკულ, ხეთეშე, ჰარვი ფილიალიშ მსახურო დანიშნეს. თექიან ფილიალ ჭიჭე რდუ, ათეშენ ჰარვის შეულებუდ ქოთ მუშ საქმე აკეთკო ფილიალს დო ქოთ თუთაშე სუმ მარას ამის ნინაშა მორაგადე ჯიმალეფწკუმა ართო იმსახურკო. მინშა თინა გილმალ ზედამხედველო ხოლო მსახურენდჷ. თეშა კონგრესეფს მოხსენებეფით გიშულა ხოლო მიშეშ. ჰარვის შეულებუდ იაპონურო აკეთკო მოხსენება დო ამის ნინაშა მორაგადე აუდიტორია თის ქიგეგენდჷ. მარა მთავრობა რელიგიურ შეხვალამეფიშ ხვალე ჩინურ ნინაშა ჩატარებაშ უფლებას ირზენდჷ. ჰარვის დიო ხოლო უჭირდჷ თე ნინაშა რაგად, მარა იშენ ორთუდ მოხსენებეფს დო ართ ჯიმა თის ამის ნინაშა თარგმნუნდჷ.

ტაივანს სამხედრო მდგომარეობა რდუ, ათეშენ ჯიმალეფს უფლება აფდეს ეიოჭოფალ, ნამდა კონგრესეფ ჩატარესკო. თე უფლებაშ მეღება ვარდჷ ადვილ დო პოლიცია ხოლო აგვიანენდჷ პასუხის. თინეფ ართ მარაშ დინახალე მუთუნს ვა უწინდეს-და, ჰარვი ვეგმიშ პოლიციაშ შენობაშე, სოიშახ პასუხის ვემეჩანდეს. პოლიციას ვა უსხუნუდ უცხოელ რდუკო თექ დო ათეშენ თე გეგმაქ გამართლჷ.

ჩქიმ პირველ ეკულა გვალაშა

ჯიმალეფწკუმა ართო ვორდითინ თი მარეფს, ოქადაგებელ ტერიტორიაშა საათობით მიფშით, გვალეფშა ეკიფშით დო მალწყარეფს გინობკვათუნდით. ჯგირო ფშუ გვალაშა ჩქიმ პირველ ეკულა. ოჭმარეს ჭიჭე ქიმლებჭკუმეთ დო 5:30-ის შორ სოფელშა მაულარ ავტობუსშა მითიბლით, გეგნობკვათით მალწყარ დო ეკიბლით მოთინილ გვალაშა. თიშნერ მოთინილ გვალაშა ეკიფშით, ნამდა წოხოლე მიშუნ თი ჯიმაშ კუჩხეფ ჩქიმ თოლეფიშ მანგას რდუ.

თი ოჭმარეს ჰარვი ადგილობრივ ჯიმალეფწკუმა ართო მსახურენდჷ. მა ხვალე ფქადაგენდჷ ჭიჭე სოფელს, სოდეთ იაპონურ ნინაშა მორაგადე ხალხ ცხოვრენდჷ. სოდგარენ პირველ საათშო დუდ სუსტაშო ქიბგინ, მუშენდა მუსხირენ საათის მუთუნ ვა მაფუდ ნაჭკუმა. საბოლათ ჰარვის ქეშეფხვადინ, თინა ხვალე რდუ. ჰარვის ჟურნალეფ სუმ ცალ კვერცხშა გეგნუთირუდ. თიქ ქუმოძირუ მუჭო შილებედ თიშ ჭკუმუა, ჰარვიქ გეკლარხვჷ კვერცხ დო გეშვჷ. მართალ რე, თინა გემუანო ვა რჩქუდ, მარა იშენით გუვასინჯჷ. მის ოკო შეხვადკო მასმა კვერცხიქ? თიქ მა ქეშებხვად, მუშენდა შქირენიშ გურშენ გლახათ გინიფრთიკონ, ჰარვის გვალაშე ვეგმვაუნინედ.

განსხვავებულ აბანო

ართ-ართ რაიონულ კონგრესიშ დროს განსხვავებულ პრობლემას ქეშეფხვად. ჩქი გუვაჩერდით ჯიმაშ ჸუდეს, ნამუთ იეჰოვაშ მოწმეეფიშ დარბაზიშ ხასლას რდუ. ამის ნინაშა მორაგადეეფშო ბონუას დიდ მნიშვნელობა უღუდ. რაიონულ ზედამხედველიშ ოსურქ ობონალ მომინწყის. ჰარვის ვა ჩოდუდ, ათეშენ პირველო მა გომტუ ობონშა. ობონალო სუმ მუდგარენ მიღუდ: ართ ჸინ წყარით ეფშა ვედრა, ართ ჩხე წყარით ეფშა ვედრა დო ცარიელ ტაშტ. მანგარო გამკვირდჷ, მუჟამსით ზედამხედველიშ ოსურქ თინეფ გალე გეგმიღ დო თიცალ ადგილს ქიგედვჷ, ნამუთ დარბაზის მიოჯინედ. თექ ჯიმალეფ კონგრესშო მუდგარენეფს ამზადენდეს. თე დას ქოფთხი მუდგარენ ფარდაჯგურა ქუმუჩამუდკო. თიქ ირფელ კილეძირედუნ ფერ პლასტმასიშ ნოჭკერ ქუმომიღ! იფიფქრჷ, ჸუდეშ უკახლე ოროს ქუვაფორკო, მარა თექ ღობერშე ღორღონჯეფს აფდეს დუდ გითოღალირ დო ქუმაჩამდეს. ჩქიმ დუდის ვუწი: „ჯიმალეფ დაკავებულ რენა დო ვა ბძირნა. ვებომნ-და, თე ოჯახის ეწყინებ. მორთ გიბომნუნქ!“. დო ქოთ თაშ გუვაკეთ.

ლიტერატურა ამის ნინაშა

ჰარვი ორწყედ, ნამდა ამის ნინაშა მორაგადე ჯიმალეფ სულიერო წიმი ვემიშეს, მუშენდა კითხირ ვა უჩქუდეს დო მუნეფიშ ნინაშა ლიტერატურა ხოლო ვა უღდეს. თიშ უკულ, მუთ ამის ნინაშა ჭარუაქ ქიდიჭყჷ, მუდგაშოთ რომაულ ასოეფს ირინუანდეს, ჯიმალეფშა კითხირიშ დოგურაფა პრაქტიკულო იძირედ. თენა მანგარ დიდ საქმე რდუ, მარა შედეგო ჯიმალეფს შეიალებედეს იეჰოვაშ გურშენ მუნეფიშ ნინაშა უგურუაფდესკო. ლიტერატურაქ ამის ნინაშა ხეშამალაფარქ იჸუ 1960-იან წანეფიშ ბოლოს დო 1968 წანას „გინაჯინალ კოშკიშ“ გიშაშქუმალაქ ქიდიჭყჷ.

მარა მთავრობას ვაკოდ, ხალხშა თი პუბლიკაციეფ მემჩამდესკო, ნამუთ ჩინურ ნინაშა ვარდჷ ჭარილ. ათეშენ თე პრობლემას დუდ ევუჩილითეთკონ, „გინაჯინალ კოშკი“ შხვადოშხვა ფორმათ გიშეშ. მაგალთო, ჭიჭე ხანს თინა ჟირ ნინაშა, ჩინურ დო ამის ნინაშა, ართო იჭარუდ. მითინს კითხვა გურჩქინდუდ-და, არგამა რდუ, ნამდა ადგილობრივ ჩინელეფს ვოგურუანდით. თეშ უკულ იეჰოვაშ ორგანიზაციაქ უმოს მეტ ლიტერატურა გიშაშქვჷ ამის ნინაშა, ნამდა თე ძვირფას ხალხის ქიმეხვარკო ბიბლიურ ჭეშმარიტებაშ გურაფას (საქ. 10:34, 35).

გასუფთებაშ პერიოდ

ამის ნინაშა მორაგადე ბრელ ჯიმა 1960-იან დო 1970-იან წანეფს ვა ცხოვრენდჷ იეჰოვაშ ნორმეფით. თინეფ ბოლოშა ვენანჭუდეს ბიბლიურ პრინციპეფს დო ათეშენ ნამთინე უზნეოთ ცხოვრენდჷ, შუმას რდუ გინოჸუნელ ვარდა სიგარეტის შუნდჷ დო ბეტელიშ კაკალს კანკუნდჷ. ჰარვიქ ბრელ კრება იძირუ დო ოცადუდ, ჯიმალეფშა იეჰოვაშ შეხედულება ქუძირაფუდკო თე საკითხეფშე. ართ-ართ თეჯგურა მეკითხირიშ დროს მიღდეს თი შემთხვევა, ნამუთ ჟიშე მიფშინე.

თანდაბალ ჯიმალეფ მზათ რდეს, დითირესკო, მარა სანარღოთ, ბრელქ ვა მინდომ თენა დო მაუწყებელეფიშ რაოდენობაქ ტაივანს 20 წანაშ დინახალე 2 450-შე სოდგარენ 900-შა გეგმართჷ. თენა მანგარ გურიშგუმატახალ რდუ, მარა მიჩქუდეს, იეჰოვა დღას ვაკურთხენდჷ უწმინდურ ორგანიზაციას (2 კორ. 7:1). საბოლათ, კრებეფ სწორას ომსახურდეს ღორონთის დო ამდღა, იეჰოვაშ კურთხევათ, ტაივანს 11 000-შე მეტ მაუწყებელ რე.

ჩქი ქობძირით, ნამდა 1980-იან წანეფს ამის ნინაშა მორაგადე კრებეფიშ სულიერ მდგომარეობაქ გეუჯგუშ დო ჰარვის ასე უმოს მეტ დრო უღუდ, ჩინურო იჩიებდესინ თინეფშო. თის ახარენდჷ, ნამდა ბრელ ჩქინ დაშ მეუღლეს მეხვარ იეჰოვაშ მოწმეთ გინორთას. ფშუ, ართშა ჰარვიქ მიწუ, მუ ბედნერ რდუ, მუჟამსით თინეფშე ართ-ართიქ პირველო ილოც. მა ხოლო მოხიოლ, ნამდა შემალებუ ბრელ გულწრფელ ადამიანიშ მოხვარაქ, დეახლოვკო იეჰოვას. თინა ხოლო მახარენდჷ, ნამდა ტაივანიშ ფილიალს ჩქიმ ართ-ართ ბიბლიაშ მაგურაფალიშ ჟირ სქუაწკუმა ართო ვმსახურენდჷ.

მეუღლეშ დინაფა

ასე ხვალე, ჩქიმ მეუღლეშ უმშო, ვორექ. სოდგარენ 59 წანიან ქორწინებაშ უკულ ჩქიმ ძვირფას ქომონჯიქ 2010 წანაშ 1 იანარს დოღურ. თინა კიბოს ობრძოლუდ. ჰარვიქ სოდგარენ 60 წანა იმსახურ სრულ დროთ! ასე ხოლო მანგარო მონატრჷ. მარა დიდ ხიოლ მომიღ, თიწკუმა ართო ჟირ სქვამ ქიანას მსახურებაქ. ჩქი ქიდიბგურეთ ჟირ ძნელ აზიურ ნინაშა რაგად დო ჰარვიქ ჭარუა ხოლო დიგურუ.

მუსხირენ წანაშ უკულ ხემძღვანელ საბჭოქ გინოჭყვიდ, ნამდა ჩქიმ ასაკიშ გურშენ, ჩქიმო უჯგუშ იჸიდ ავსტრალიაშა დორთა. დუდშე იფიფქრჷ: „ვა მოკო ტაივანშე ულა“. მარა ჰარვიქ დუმოგურუ, დღას ვა მითქუალუდკო ვარია იეჰოვაშ ორგანიზაციაშა. თაშ ნამდა, მა ქუდვაჸუნ თინეფს. უკულ ქიმეფხვად, თე გადაწყვეტილება ჭკვერულ რდუ.

ასე სამუშა დღალეფს ავსტრალიაშ ფილიალს ვმსახურენქ დო საბატონ დო ჟეშხას ადგილობრივ კრებაწკუმა ართო ფქადაგენქ. მოხიოლ, ნამდა ბეთელს იაპონურ დო ჩინურ ნინეფს იბრინუანქ ექსკურსიეფიშ ოტარებელო. მთელ გურით ველუქ გათელებაშ გურშენ დუნაპირებუშ შესრულებას. მიჩქ, ნამდა ჰარვი, ნამდგაქ დიგურუ, დღას ვა უწუკო ვარია იეჰოვას, ასე თიშ მეხსიერებას რე (იოან. 5:28, 29).