გევითარით სათუთ გრძნობეფ

1. სოვრეშე იძირე, ნამდა ადამიანეფ სათუთ გრძნობეფს ვეგმირჩქინანა?

ბიბლიაქ იწინასწარმეტყველ, ნამდა ბოლო დღალეფს „ჸინგურიშ“ ადამიანეფ იჸუაფდეს (2 ტიმ. 3:1, 3). ჩქი ამდღა ვორწყეთ თე წინასწარმეტყველებაშ შესრულებას. მაგალთო, მილიონობით ოჯახ აკოცუმილ რე, მშობლეფ გურმულირ რენა ართიანშე დო სქუალეფ ფიქრენა, ნამდა თინეფს ვა უჸორა. თი ოჯახიშ წევრეფ ხოლო, მით ართო ცხოვრენა, შილებე ართიანშე უცხოთ გინაფლენდან დუდის. ოჯახიშ ართ მრჩეველ იჩიებ: „დიდას, მუმას დო ბაღანეფს ართიანწკუმა შურო ვა უღნა კავშირ დო, თეშ მანგიორო, კომპიუტერ, პლანშეტ, ტელეფონ ვარდა ვიდეო ლაჸაფეფწკუმა ატარენა დროს. მართალ რე თინეფ ართ ჸუდეს ცხოვრენა, მარა ხვალე ართიანიშ ნაჩინებუეფ რენა“.

2, 3. ა) მუჭოთ რომაელეფიშ 12:10-შე იძირე, მიშ მიმართ ოკო გიმიფრჩქინათ სათუთ გრძნობეფ? ბ) მუს გუვარჩიენთ თე სტატიას?

² ჩქი ვა მოკონა, ვაგურათ თე ქვეყნიერებას, სოდეთ ჸოროფას ვეგმირჩქინანა (რომ. 12:2). თეშ მანგიორო, ოკო გუვავითარათ სათუთ გრძნობეფ ხვალე ოჯახიშ წევრეფიშ მიმართ ვარინ, თანამორწმუნეეფიშ მიმართ ხოლო (წეკითხით რომაელეფიშ 12:10). მუ რე სათუთ გრძნობეფ? თე ტერმინ გიმირინუაფ ოჯახიშ წევრეფ შქას მეგობრულ, ხოლოშიან ურთიერთობაშ ეიოჭარალო. თეცალ ჸოროფა ოკო გუვავითარათ ჩქინ სულიერ ოჯახიშ, და დო ჯიმალეფიშ, მიმართ. სათუთ გრძნობეფიშ გიმორჩქინათ ხეს ვუნწყუნთ, ვამდინან ართობაქ, მუთ ჭეშმარიტ თაყვანიშცემაშ მნიშვნელოვან ნაწილ რე (მიქ. 2:12).

³ სათუთ გრძნობეფ გუვავითარათ დო გეგმიფრჩქინათინ, მორთ გუვარჩუათ მუსხირენ ბიბლიურ მაგალით.

იეჰოვა გიმირჩქინანს სათუთ გრძნობეფს

4. მუჭო მოხვარნა იაკობიშ 5:11, დუვაფასათ იეჰოვაშ ჸოროფა?

⁴ ბიბლია მოჩინებაფუანა იეჰოვაშ დიდებულ თვისებეფს. მაგალთო, თინა იჩიებ, ნამდა „ღორონთ ჸოროფა რე“ (1 იოან. 4:8). თეშ რჩქინა აღბძრენა, დევეახლოვათ თის. ბიბლია თის ხოლო იჩიებ, ნამდა იეჰოვა სათუთ გრძნობეფს გიმირჩქინანს (წეკითხით იაკობიშ 5:11). მუ ჯგირო ეჭარუნს თენა, მუსხით ვუჸორთ იეჰოვას!

5. მუჭო გიმირჩქინანს იეჰოვა ჭყოლოფას დო ჩქი მუჭო შემლებნა მივაჸუნათ თიშ მაგალითის?

⁵ ქიდეკვირით, ნამდა იაკობიშ 5:11 იეჰოვაშ სათუთ გრძნობეფს შხვა თვისებაწკუმა, ჭყოლოფაწკუმა, აკავშირენს (გამ. 34:6). ართ-ართ მხარე, მუდგათ იეჰოვა ჩქინ მიმართ ჭყოლოფას გიმირჩქინანს, თენა შეცდომეფიშ პატიება რე (ფსალმ. 51:1). ბიბლიას სიტყვა ჭყოლოფა უმოს მეტის ნიშნენს, ვინემ მიდგარენშა დაშებულიშ პატიება. თინა რე ძალიერ გრძნობა, ნამდგას პიროვნება თიმწკუმა გინაფლენს, მუჟამსით ორწყე, მიდგარენ გასაჭირს რე დო მთელ გურით ოკო, ქიმეხვარას თის. იეჰოვა მირაგადნა, ნამდა მანგარო ოკო, მიმეხვარან დო თიშ თე სურვილ ბრელით უმოს რე, ვინემ გრძნობა, ნამუთ დიდას უღჷ ბაღანაშ მიმართ (ეს. 49:15). შეწუხებულეფ ვორეთინ თიმწკუმა, იეჰოვას ჭყოლოფა გინაჭყვიდირაფუანს, ქიმმეხვარან (ფსალმ. 37:39; 1 კორ. 10:13). ჩქი შემლებნა და დო ჯიმალეფიშ მიმართ ჭყოლოფა გეგმიფრჩქინათ, მუჟამსით ვაპატიენთ თინეფს დო გურშა ჟღამს ვალებდვანთ (ეფეს. 4:32). მარა და დო ჯიმალეფიშ მიმართ ჭყოლოფაშ გიმორჩქინაშ მთავარ საშვალება რე, ქელუდირთათ თინეფს სირთულეეფიშ დროს. მუჟამსით ჸოროფა აღბძრენა, ნამდა მოჭყოლოფე ვორდათ, მეპჸუნთ იეჰოვაშ მაგალითის, ნამუთ არძაშ უჯგუშო გიმირჩქინანს სათუთ გრძნობეფს (ეფეს. 5:1).

იონათანი დო დავითი — „ხოლოშიან მეგობრეფ“

6. მუჭო გიმირჩქინეს ართიანიშ მიმართ სათუთ გრძნობეფ იონათანი დო დავითიქ?

⁶ ბიბლიას თი არასრულყოფილ ადამიანეფიშ შემთხვევეფ ხოლო რე მოჩამილ, მით სათუთ გრძნობეფს გიმირჩქინანდეს. გუვარჩუათ იონათანი დო დავითიშ მაგალით. ბიბლია იჩიებ: „იონათანს მუშ დუდცალო ქეჸოროფ დავითიქ. თინეფქ ხოლოშიან მეგობრეფო გინირთეს“ (1 სამ. 18:1). დავითი ცხებულ რდუ თიშო, ნამდა საულიშ უკულ მეფეთ გინირთუკო. თეშ გურშენ საულს მანგარო ონჯარუდ დავითიშ დო თიშ ჸვილუას ოცადუდ. მარა საულიშ ქომოლსქუაქ, იონათანქ, ხუჯ ვა დუკინ მუამუშის. იონათანი დო დავითიქ პირობა დოდვეს, ნამდა ირიათო მეგობრეფ იჸუაფდეს დო ართიანს ქელუდირთუდეს (1 სამ. 20:42).

7. მუს შეულებუდ ეცილკო იონათანი დო დავითიშ მეგობრობას?

⁷ ჩქი ხოლო უმოსო დუვაფასენთ თი სათუთ გრძნობეფს, ნამუთ იონათანი დო დავითი შქას რდუ, მუჟამსით გუვარჩიენთ ნამთინე მხარეს, მუდგას შეულებუდ თინეფიშ მეგობრობას ეცილკო. მაგალთო, იონათანი სოდგარენ 30 წანათ უნჩაშ რდუ დავითშე. თის შეულებუდ უფიქრებუდკო, ნამდა მუთუნნერ საერთო ვა უღუდ თე ბრელით უმოს ახალგაზრდა დო ნაკლებო გამოცდილ პიროვნებაწკუმა. მარა იონათანი თაშ ვა ფიქრენდჷ. თინა პატის ცენდჷ დავითის.

8. მუშენ ფიქრენთ, ნამდა იონათანი დავითიშ ჯგირ მეგობარ რდუ?

⁸ იონათანს უღუდ მიზეზ, ენჯარკო დავითიშ. მუჭოთ საულიშ ქომოლსქუას, თის შეულებუდ თქუკო, ნამდა სამეფო ტახტ კანონიერო მუს ოკუთვნუდ (1 სამ. 20:31). მარა თინა რდუ თანდაბალ დო იეჰოვაშ ართგურ. თაშ ნამდა, თიქ ირნერო დუკინ ხუჯ იეჰოვაშ გადაწყვეტილებას, ნამდა დავითი ჸოფედკო მომავალ მეფე. იონათანქ დავითიშ ართგურქ თიმწკუმა ხოლო ქუდოსქიდ, მუჟამსით მეფე საულქ თეშ გურშენ გერისხჷ (1 სამ. 20:32—34).

9. იონათანი დავითის თეშ უჯინედუო, მუჭოთ მოცილეს? გენწყით.

⁹ იონათანს სათუთ გრძნობეფ უღუდ დავითიშ მიმართ დო ათეშენ ვა უჯინედ თის, მუჭოთ მოცილეს. იონათანი რდუ გამოცდილ მშვილდოსან დო გაბედულ მებრძოლ. თის დო მუამუშის ხალხიშ თოლს არწივშე უმოს ჩქარეფიშ დო ლომშე უმოს ძალიერეფიშ სახელ უღდეს (2 სამ. 1:22, 23). ათეშენ შეულებუდ უცქვაფუდკო მუშ გმირობეფით. მარა იონათანი ვაცადუდ, დავითიშ კონკურენტ ჸოფედკო დო ვართ თიშ ონჯარუდ. თეშ გინაწონს, თის მოწონდჷ, ნამდა დავითი გაბედულ რდუ დო იეჰოვას ონდუდ. იონათანს დავითიშ მიმართ ძალიერ ჸოროფაქ თიშ უკულ გევითარ, მუთ თიქ გოლიათ ჸვილ. ჩქი მუჭო შემლებნა ვოძირუათ თეცალ სათუთ გრძნობეფ და დო ჯიმალეფს?

მუჭო შემლებნა ამდღა სათუთ გრძნობეფიშ გიმოხანტუა?

10. მუს ნიშნენს სიტყვეფ: „მთელ გურით გიჸორდან ართიან“?

¹⁰ ბიბლია მირაგადნა: „მთელ გურით გიჸორდან ართიან“ (1 პეტ. 1:22). თეშ მაგალითის იეჰოვა მარზენა. თიშ ჸოროფა თიცალ ძალიერ რე, ნამდა ართგურეფ ქუვორეთ-და, მუთუნს ვეშიალებე დუმაშორან თიწკუმა (რომ. 8:38, 39). ბერძნულ სიტყვა, ნამუთ გინოთარგმნილ რე მუჭოთ „მთელ“, მეუთითენს თიცალ მოქმედებაშა, მუჟამსით მიდგარენ მთელ ძალათ ოცად, ჸოროფა ქაძირუას შხვეფს. მინშა ადვილ ვა რე და დო ჯიმალეფიშ მიმართ თე გრძნობაშ გიმორჩქინა. მუჟამსით მოწყინებაფუანა, ჸოროფათ ოკო მუთვინათ ართიანს დო ირფელ გუვაკეთათ, ნამდა მშვიდობა დო ართობა მიღდან (ეფეს. 4:1—3). ირფელს ქუვორთუთ, ნამდა „ართობა“ ვა ვოდინუათ-და, ყურადღებას და დო ჯიმალეფიშ შეცდომეფშა ვეგნიბღანთ დო ირნერო ქივეცადებუთ, თეშ ვუჯინათ თინეფს, მუჭოთ იეჰოვა უჯინე (1 სამ. 16:7; ფსალმ. 130:3).

11. მუშენ შილებე მინშა რთულ რდას სათუთ გრძნობეფიშ გავითარება?

¹¹ ირო ვა რე ადვილ და დო ჯიმალეფიშ მიმართ სათუთ გრძნობეფიშ გიმოხანტუა, განსაკუთრებულო თიმწკუმა, მუჟამსით მიჩქნა, მუ აფნა დაშებულ. მუჭოთ იძირე, თენა დაბრკოლება რდუ პირველ საუკუნეშ ნამთინე ქრისტიანშო. მაგალთო, ევოდია დო სინტიქეს ალბათ ვაღვენუდეს პრობლემა, პავლეწკუმა ართო იხანდესკო სახიოლო ამბეშო. მარა გარკვეულ მიზეზიშ გურშენ ართიანწკუმა უღდეს უთანხმოება. ათეშენ პავლექ თინეფიშ გურშენ თქუ: „ართ აზრ უღდან უფალს“ (ფილ. 4:2, 3).

12. მუჭო შემლებნა ჩქინ და დო ჯიმალეფიშ მიმართ სათუთ გრძნობეფიშ გავითარება?

¹² მუჭო შემლებნა ამდღა ჩქინ და დო ჯიმალეფიშ მიმართ სათუთ გრძნობეფიშ გავითარება? მუჟამსით უჯგუშო იფჩინებაფუანთ თინეფს, შილებე ქობძირათ, ნამდა ადვილ ჸოფე და დო ჯიმალეფიშ გაგება დო თინეფიშ მიმართ სათუთ გრძნობეფიშ გავითარება. თანაქრისტიანეფწკუმა მეგობრობას ასაკ დო განსხვავებულ კულტურაქ ოკო ვემეცილან. ფშუდან, იონათანი დავითშე სოდგარენ 30 წანათ უმოს ხანიერ რდუ, მარა თინეფ ხოლოშიან მეგობრეფ რდეს. შეილებნო უმოს ინტერეს გეგმირჩქინე სქანდე უმოს ხანიერ ვარდა ახალგაზრდა თანაქრისტიანიშ მიმართ? თეშ კეთებათ ოძირანქ, ნამდა გიჸორს „მთელ საჯიმალო“ (1 პეტ. 2:17).

13. მუშენ შილებე კრებას არძაწკუმა ართნერ ხოლოშიან ურთიერთობა ვა მიღდან?

¹³ თანაქრისტიანეფიშ მიმართ სათუთ გრძნობეფ მიღნან, თენა თის ნიშნენსო, ნამდა კრებას არძაწკუმა ართნერ ხოლოშიან ურთიერთობა მაღვენუნა? ვარ, თენა ვა რე შეიოლებერ. მიდგარენწკუმა საერთო ინტერესეფიშ გურშენ უმოს ხოლოშიან ურთიერთობა მიღდან, ვინემ შხვეფწკუმა, თენა არასწორ ვა რე. თიშ უმკუჯინუო, ნამდა იესო არძა მოციქულს მეგობარო მიშინუანდჷ, თის იოანეშ მიმართ განსაკუთრებულ გრძნობეფ უღუდ (იოან. 13:23; 15:15; 20:2). მარა გიშაკერძაფას ვეგმირჩქინანდჷ. მაგალთო, მუჟამსით იოანე დო მუშ ჯიმა იაკობიქ თხუეს, განსაკუთრებულ ადგილ ქიმუჩამუდკო ღორონთიშ სამეფოს, იესოქ უწუ თინეფს: „ჩქიმ მარძგვანშე ვარდა კვარჩხანშე დოხუნა ჩქიმდა ვა რე დამოკიდებულ“ (მარ. 10:35—40). იესოცალო, ჩქი ხოლო შხვეფშე ოკო ვეგშაბკერძუათ ხოლოშიან მეგობრეფ (იაკ. 2:3, 4). გიშაკერძაფა გეგმიფრჩქინით-და, კრებაშ გორთუალას შევუნწყუნთ ხეს, მუდგას ადგილ ოკო ვა უღდას ქრისტიანეფ შქას (იუდ. 17—19).

14. მუჭოთ ფილიპელეფიშ 2:3-ს ჭარჷ, მუ მიმეხვარებნა დუდ ევუჩილითუათ მეტოქეობას?

¹⁴ მუჟამსით ართიანწკუმა სათუთ გრძნობეფს გიმიფრჩქინანთ, კრებას იფცვენთ მეტოქეობაშ გავითარებაშე. ქიგიშინით, ნამდა იონათანს დავით მუშ მეტოქეთ ვემიორჩქუდ დო თეშ ვა უჯინედ, მუჭოთ მუშ მეფობაშ მოცილეს. ჩქი, არძას, შემლებნა მივაჸუნათ იონათანიშ მაგალითის. ვა უჯინათ თანამსახურეფს მუჭოთ მეტოქეეფს მუნეფიშ შესაძლებლობეფიშ გურშენ. თეშ მანგიორო, „რდათ თანდაბლეფ დო შხვეფ თქვან დუდშე უჯგუშეფო მირჩქინით“ (წეკითხით ფილიპელეფიშ 2:3). რშუდან, ნამდა თითოულ პიროვნებას შეულებ კრებაშ მახვარებელო მუდგარენიშ კეთება. თანდაბლობას ვა ვოდინუანთ-და, ქობძირუნთ და დო ჯიმალეფიშ ჯგირ თვისებეფს დო შემალებენა იბგურუათ თინეფიშ მაგალითშე (1 კორ. 12:21—25).

15. მუს გურაფლენთ ტანია დო მუშ ოჯახიშ მაგალითშე?

¹⁵ მუჟამსით ვეველუთინ თეშ, სირთულეეფს შეფხვადუთ, იეჰოვა გურშა ემქექუანა თი სათუთ გრძნობეფით დო პრაქტიკულ მოხვარათ, ნამდგას ჩქინ და დო ჯიმალეფშე ბღებულენთ. გუვარჩუათ, მუ სირთულეს შეხვად ართ ოჯახიქ შეერთებულ შტატეფს 2019 წანაშ საერთაშორისო კონგრესიშ „ჸოროფა დღას ვეთებ!“ საბატონიშ პროგრამაშ დასწრებაშ უკულ. სუმ სქუაშ დიდა, ტანია, იჩიებ: „ჩქი სასტუმროშა იფრთუდით, მუჟამსით შხვა მანქანაშ შოფერს რულქ აკუცუ, ჩქინ შარაშა გეგნორთჷ დო ქუმარაგვეს. მითინ ვარდჷ დაზიანებულ, მარა შოკის ვორდით, მანქანაშე გითიბლით დო შარას ქიგლაბდირთით. მიდგარენ შარაშ მაჟია მხარეშე ხეს მოძირანდეს, ნამდა მუშ მანქანაშა გენთოფრთითკო. თინა ხოლო ჩქინ ჯიმა რდუ, ნამუთ კონგრესშე მიშჷ. მარა ხვალე თიქ ვარინ, შვედეთშე მოულირ ხუთ დელეგატიქ ხოლო გაჩენდჷ. დალეფქ მა დო ჩქიმ ძღაბის ქუმახუტოლეს, მუთ მართალო მოსაჭირდეს! დუვარწმუნ თინეფ, ნამდა ჯგირო იპჸიდით, მარა იშენ ვა დომტუეს. თინეფ ექიმეფიშ მოულაშ უკულ ხოლო ჩქინწკუმა ართო რდეს დო დერწმუნეს, ნამდა მუთ მოსაჭირდესინ, ირფელ მიღდეს. განსაცდელიშ არძა მომენტის ბგინაფლენდით იეჰოვაშ ჸოროფას. თე შემთხვევაქ უმოსო ქომიჸოროფეს ჩქინ და დო ჯიმალეფ დო გამიმანგარეს ჸოროფა დო მარდულობა იეჰოვაშ მიმართ“. შეილებნანო ქიგიშინათ დრო, მუჟამსით ელარნა გოსაჭირდეს დო თანაქრისტიანქ სათუთ გრძნობეფ გიმირჩქინ თქვან მიმართ?

16. მუშენ ოკო გიმიფრჩქინათ ართიანიშ მიმართ სათუთ გრძნობეფ?

¹⁶ დეფიქრით, მუ ჯგირ შედეგეფ მოჸუნს, მუჟამსით ართიანიშ მიმართ სათუთ გრძნობეფს გიმიფრჩქინანთ. ჩქი გურშა ეუქექუანთ და დო ჯიმალეფს, მუჟამსით თენა ოსაჭირნა. ხეს ვუნწყუნთ ღორონთიშ ხალხ შქას ართობას. ვოძირანთ, ნამდა იესოშ მოწაფეეფ ვორეთ დო თენა გულწრფელ ადამიანეფს აღძრენს, ემსახურან იეჰოვას. პირველ რიგის, ჩქი განვადიდენთ იეჰოვას „შხვეფიშ მდგომარეობაშ გურშა მიმაღალარ მუმას დო ირნერო გურიშემაქექაფალ ღორონთის“ (2 კორ. 1:3). მორთ გინოჭყვიდილ მაფდან, გუვაგრძელათ სათუთ გრძნობეფიშ გავითარება დო გიმორჩქინა!