თანდაბლობათ დო მოკრძალებათ გილართ სქან ღორონთწკუმა ართო

1. მუ თქუ დავითიქ იეჰოვაშ თანდაბლობაშე?

შემლებნანო თამამას ფთქუათ, ნამდა იეჰოვა თანდაბალ რე? მუშო ოკო რაგად, ქო. ართშა დავითიქ თქუ: „სი ქომჩანქ სქან რსხებაშ ფარს, სქან თანდაბლობა განმადიდენს“ (2 სამ. 22:36; ფსალმ. 18:35). თე დროს შილებე დავით ფიქრენდჷ თი დღაშე, მუჟამსით სამუელქ მერთჷ დავითიშ მუმაშ ჸუდეშა, ნამდა ისრაელიშ მომავალ მეფე დანიშნუკო. დავით ბრუო ქომოლსქუაშე არძაშ უკლაშ რდუ; მარა იეჰოვაქ ზუსტას თინა გიშეგორ, ნამდა მეფე საულიშ უკულ მეფე ჸოფედკო (1 სამ. 16:1, 10—13).

2. მუს გუვარჩიენთ თე სტატიას?

² დავით ალბათ დეთანხმებუდ ფსალმუნმაბირეშ სიტყვეფს, ნამდგაქ იეჰოვაშ გურშენ თქუ: „თუდო გიმიკინანს დო გიოჯინე ცას დო დიხას, უღონოს . . . ამაღალენს, ნამდა წარჩინებულეფწკუმა ქუდახუნუას თინა“ (ფსალმ. 113:6—8). დუდშე თე სტატიას გუვარჩიენთ ნამთინე მაგალითის, მუჟამსით იეჰოვაქ თანდაბლობა გიმირჩქინ. უკულ ქიგებგენთ, მუშ გურაფა შემლებნა მოკრძალებაშ გურშენ მეფე საულიშ, წინასწარმეტყველ დანიელიშ დო იესოშ მაგალითეფშე.

მუს ბგურაფლენთ იეჰოვაშ თანდაბლობაშ მაგალითშე?

3. მუჭო მოქცუნა იეჰოვა დო მუს ამტკიცენს თენა?

³ იეჰოვაშ თანდაბლობა თევრეშე იძირე, მუჭო ოქცუ მუშ არასრულყოფილ მსახურეფს. თინა ჩქინ თაყვანიშცემას იწონუანს დო ხვალე თენა ვარინ, მეგობრეფო ხოლო მივორჩქუთ (ფსალმ. 25:14). იეჰოვაქ ინიციატივა გეგმირჩქინ დო მუშ სქუა ჩქინ ცოდვეფშო შემობწირეს, მუდგათ საშვალება ქომჩეს, თიშ მეგობრეფ ვორდითკო. მუშმადიდა ჭყოლოფა გიმირჩქინ იეჰოვაქ!

4. მუ მუჩეს იეჰოვაქ დო მუშენ?

⁴ დეფიფქრათ, ხოლო მუჭო გიმირჩქინანს იეჰოვა თანდაბლობას. იეჰოვა გუმაჭყაფალ რე დო ათეშენ შეულებუდ, თეშ გუმოჭყესკო, ნამდა ცხოვრებას არჩევანიშ კეთებაშ უნარ ვა ნობღვედესკო. მარა იეჰოვაქ თაშ ვემიქცუ. თიქ მუშ ამნახანტო გუმოჭყეს დო ნებაშ თავისუფლება მუჩეს. თის ოკო, ნამდა ჩქი, უბრალო ადამიანეფქ, მთელ გურით დო ჸოროფათ ვემსახურათ თის. ჩქი ჯგირო მარჩქილენა, ნამდა მორჩილებას ჯგირობუა მოუღ ჩქინდა (კან. 10:12; ეს. 48:17, 18). დიდო მარდულეფ ოკო ვორდათ თიშენ, ნამდა იეჰოვა თეცალ თანდაბალ რე!

5. მუჭო მოგურუანა იეჰოვა თანდაბლობას? (ქოძირით სურათ გალენ გვერდის).

⁵ იეჰოვა თანდაბლობას მოგურუანა თევრეშე, მუნერ დამოკიდებულება უღჷ ჩქინ მიმართ. თინა სამყაროს არძაშ უმოს ბრძენ პიროვნება რე, მარა მზათ რე, შხვეფიშ აზრ გეთვალისწინას. მაგალთო, იეჰოვაქ მუშ სქუას მეჩჷ საშვალება, მონაწილება მიღუკო ირფელიშ გოჭყაფას (იგავ. 8:27—30; კოლ. 1:15, 16). მართალ რე, იეჰოვა ირფელიშშემალებე ღორონთ რე, მარა გარკვეულ ძალაუფლებას შხვეფს ხოლო უნაწილენს. მაგალთო, თიქ იესო მუშ სამეფოშ მეფეთ დანიშნჷ დო გარკვეულ ძალაუფლებას მეჩანს 144 000 ადამიანს, მით იესოწკუმა იმართველენა (ლუკ. 12:32). მუშო ოკო რაგად, იეჰოვაქ მამზად იესო, ნამდა მეფე დო მღვდელმთავარ ჸოფედკო (ებრ. 5:8, 9). ღორონთ თინეფს ხოლო ამზადენს, მით იესოწკუმა იმართველენა, მარა იეჰოვა კილკილშა ვა გაკონტროლენს, მუჭო შეასრულენა თინეფ დავალებას. თეშ მანგიორო, იეჰოვა ონდჷ თინეფს დო დარწმუნებულ რე, ნამდა მუშ ნებას შეასრულენა (გამოცხ. 5:10).

6, 7. მუშ გურაფა შემლებნა ჩქინ ზეციერ მუმაშე, შხვეფშა საქმეეფიშ განაწილებაშ გურშენ?

⁶ ჩქინ ზეციერ მუმა, მიდგას მითინიშ მოხვარა ვასაჭირ, ძალაუფლებას შხვეფს ხოლო ქუნაწილენს-და, მით უმეტეს ჩქი ოკო ვაკეთათ თენა! მაგალთო, ოჯახიშ დუდ ვარდა კრებაშ უხუცეს ქორეთ-და, მუჭო შეილებნა, მიაჸუნათ იეჰოვაშ მაგალითის? შეილებნა შხვეფს ხოლო გუნაწილათ საქმეეფ დო ვა გაკონტროლათ, მუჭო შეასრულენა თის. თეს გაკეთენთ-და, საქმე ხოლო გეკეთებ, შხვეფს მამზადენთ დო მეხვარებუთ, დუდიშ რწმენა უღდან (ეს. 41:10). ხოლო მუშ გურაფა შეულებნა იეჰოვაშე თინეფს, მიდგას გარკვეულ ძალაუფლება უღჷ?

⁷ ბიბლიაშე იძირე, ნამდა იეჰოვას ოინტერეს მუშ ზეციერ სქუალეფიშ აზრ (1 მეფ. 22:19—22). მშობლეფ, მუჭო შეილებნა მიაჸუნათ იეჰოვაშ მაგალითის? მუჟამსით შეიოლებერ რე, თქვან სქუალეფს ქელაკითხეთ აზრ შხვადოშხვა საკითხეფიშ გურშენ დო შეიოლებერ ქორენ-და, გეთვალისწინით თინა.

8. მუჭო გიმირჩქინ იეჰოვაქ მოთვინება აბრაამ დო სარაშ მიმართ?

⁸ იეჰოვაშ თანდაბლობა თიშ მოთვინებაშე ხოლო იძირე. მაგალთო, იეჰოვა მოთვინებას გიმირჩქინანს, მუჟამსით მუშ მსახურეფს ბოლოშა ვარჩქილენა, მუშენ ღებულენს თინა მუდგარენ გადაწყვეტილებას. თიქ აბრაამს მურჩქილუ, მუჟამსით თიქ თქუ, ნამდა სოდომ დო გომორაშ განადგურება სამართლიან ვეჸუაფუდ (დაბ. 18:22—33). ქიგიფშინათ, მუჭო მექცუ იეჰოვაქ აბრაამიშ ოსურს, სარას. თის ვართ წყინებ დო ვართ გარისხებე, მუჟამსით სარას გაძიცინ თიშ დუნაპირებშე, ნამდა მოხუცებულობას ბაღანა ქაშიდ (დაბ. 18:10—14). თეშ მანგიორო, იეჰოვაქ პატიცემათ მექცუ სარას.

9. მუშ გურაფა შეულებნა მშობლეფს დო უხუცესეფს იეჰოვაშ მაგალითშე?

⁹ მშობლეფ დო უხუცესეფ, მუშ გურაფა შეილებნა იეჰოვაშე? დეფიქრით, მუნერ რეაქცია გიღნა, მუჟამსით შხვეფს თქვან გადაწყვეტილებეფ ვა მოწონა. მუ რეაქცია გიღნა თე დროს? ხომ ვა ურაგადუთ, ნამდა არასწორო ფიქრენა დოვარ ოცადუთ, ქუგუგათ თინეფს? მუჟამსით იეჰოვაშ მაგალითის მეჸუნთ, თეს ოჯახეფშო დო კრებეფშო ჯგირობუა მოუღ. ჩქი უკვე გუვარჩით, მუშ გურაფა შემლებნა იეჰოვაშ თანდაბლობაშ მაგალითშე. ასე ქობძირათ, მუს ბგურაფლენთ მოკრძალებაშ გურშენ ღორონთიშ სიტყვას ინოჭარილ მაგალითეფშე.

მუს ბგურაფლენთ ბიბლიას ინოჭარილ შხვა მაგალითეფშე?

10. მუჭო გიმირინუანს იეჰოვა შხვეფიშ მაგალითის ჩქინ ოგურაფალო?

¹⁰ ჩქინ „დიდებულ მოძღვარ“, იეჰოვა, მუშ სიტყვაშე მოგურუანა (ეს. 30:20, 21). ბიბლიას ინოჭარილ მაგალითეფშე ბგურაფლენთ თინეფიშ გურშენ, მით ღორონთიშ მოსაწონ თვისებეფს, თინეფ შქას მოკრძალებას გიმირჩქინანდეს. თეს გეძინელ, თიმწკუმა ხოლო ბგურაფლენთ, მუჟამსით გიმიბრკვიენთ, მუქ აღოლეს თინეფს, მით თე თვისებეფს ვეგმირჩქინანდეს (ფსალმ. 37:37; 1 კორ. 10:11).

11. მუს ბგურაფლენთ საულიშ გლახა მაგალითშე?

¹¹ ქიგიფშინათ მუქ აღოლ მეფე საულს. თინა ახალგაზრდობას მოკრძალებურ რდუ. საულ სწორას აფასენდჷ მუშ შესაძლებლობეფს დო ხვალე თენა ვარინ, მინშა ფიქრენდჷ, ნამდა უმოს პასუხიშმგებლობაშ მიოღებელო მზათ ვარდჷ (1 სამ. 9:21; 10:20—22). მარა დროშ მიკულაწკუმა ართო, საულქ გეამაყ დო თის ორთუდ, მუდგაშ ნება ვა უღუდ. თაშ მოქციება მეფეთ გინორთაშ უკულ მალას დიჭყჷ. ართშა, მუჟამსით წინასწარმეტყველ სამუელს ელუდ, მოთვინება მიოდინუ. თიშ მანგიორო, ნამდა მოკრძალება გეგმირჩქინკო დო მიენდკო იეჰოვას, თიქ ოჭვალ შესაწირავ შეწირ იეჰოვას, მუდგაშ უფლება ვა უღუდ. შედეგო, საულქ მიოდინუ ღორონთიშ მოწონა დო საბოლათ იეჰოვაქ მეფობა მიდუღ თის (1 სამ. 13:8—14). ჭკვერულ იჸუაფ, თე გუმაფრთხილებერ მაგალითშე დიბგურუათ დო ვა ვაკეთათ თინა, მუდგაშ უფლება ვა მიღნა.

12. მუჭო გიმირჩქინ დანიელქ მოკრძალება?

¹² საულიშ გინაწონს, წინასწარმეტყველ დანიელქ ჯგირ მაგალით დომტეს. თინა მთელ ცხოვრებას თანდაბალ დო მოკრძალებურ რდუ დო ირიათო იეჰოვას თხინდჷ ხემძღვანელობას. მაგალთო, მუჟამსით იეჰოვაქ დანიელ გიმირინუ, ნამდა ნაბუქოდონოსორშა სიზმარ გეუნწყუმუდკო, დანიელქ მუშ დუდშა ვეცქუ. თეშ მანგიორო, მოკრძალება გეგმირჩქინ დო მთელ დიდება იეჰოვას უძღვინ (დან. 2:26—28). მუს ბგურაფლენთ თავრეშე? შილებე და დო ჯიმალეფს ჩქინ მოხსენებეფ მოწონა ვარდა მსახურებას ჯგირ შემთხვევეფ მიღნა. მოკონა ირიათო ფშუდან, ნამდა მთელ დიდება იეჰოვას ვუძღვინათ. ჩქი მოკრძალება ოკო გიმიფრჩქინათ დო ვაღიარათ, ნამდა იეჰოვაშ მოხვარაშ უმშო თე ირფელ ვა მაკეთებედეს (ფილ. 4:13). თეცალ დამოკიდებულებათ იესოშ ჯგირ მაგალითის მივაჸუნუთ. მუშენ იფჩიებუთ თეს?

13. მუს ბგურაფლენთ მოკრძალებაშ გურშენ იესოშ მაგალითშე, მუჭოთ თენა იოანეშ 5:19, 30-ის ჭარჷ?

¹³ მართალ რე, იესო ღორონთიშ სრულყოფილ სქუა რდუ, მარა თინა იეჰოვაშა რდუ მენდებულ (წეკითხით იოანე 5:19, 30). თის დღას ვა მუნდომებ, მუშ ზეციერ მუმაშ ძალაუფლებაშ მეღება. ფილიპელეფიშ 2:6-ის ჭარჷ, ნამდა იესოს „თეშ ხოლო ვა უფიქრებ, მიღუკო თინა, მუთ მუს ვაკუთვნუდ, შხვა სიტყვეფით ქოფთქუათინ, ღორონთის გაუმანგკო დუდ“. მუჭოთ მორჩილ სქუა, იესო სწორას აფასენდჷ მუშ უფლებამოსილებას დო პატის ცენდჷ მუმაშ ძალაუფლებას.

14. მუნერ რეაქცია უღუდ იესოს, მუჟამსით თიცალ მუდგარენ ქოთხის, მუდგაშ კეთებაშ უფლება ვა უღუდ?

¹⁴ ქიგიფშინათ მუნერ რეაქცია უღუდ იესოს, მუჟამსით მუშ მოწაფეეფქ, იაკობ დო იოანექ დიდაწკუმა ართო ქიმერთეს დო ქოთხის, ღორონთიშ სამეფოს განსაკუთრებულ ადგილ ქიმუჩამუდკო თინეფშა, მუდგაშ უფლება იესოს ვა უღუდ. თიქ ხეთეშე უწუ, ნამდა ხვალე მუშ ზეციერ მუმას უღუდ უფლება, გეგნოჭყვიდკო, მი დოზოჯუნდჷ ღორონთიშ სამეფოს იესოშ მარძგვანშე დო კვარჩხანშე (მათ. 20:20—23). თეთ იესოქ ოძირუ, ნამდა სწორას აფასენდჷ მუშ უფლებამოსილებას. თინა მოკრძალებურ რდუ დო დღას ვა უკეთებ თინა, მუდგაშ უფლება იეჰოვას ვემუჩამ (იოან. 12:49). მუჭო შემლებნა მივაჸუნათ იესოშ მაგალითის?

15, 16. მუჭო შემლებნა 1 კორინთელეფიშ 4:6-ის ინოჭარილ ბიბლიურ რჩევაშ გიმორნაფა?

¹⁵ ჩქი მეპჸუნთ იესოშ მოკრძალებაშ მაგალითის, მუჟამსით 1 კორინთელეფიშ 4:6-ის ინოჭარილ ბიბლიურ რჩევას გიმიბრინუანთ, სოდეთ ჭარჷ: „ვეგნურთათ ჭარილს“. ათეშენ, მუჟამსით რჩევას ელმაკითხანა, ვა მოკონა ჩქინ აზრ ვუწუათ ვარდა უბრალოთ თინა ფთქუათ, მუთ პირველო მუმალენა აზრო. თეშ მანგიორო, ყურადღება ბიბლიას დო ჩქინ პუბლიკაციეფს მოჩამილ რჩევეფშა ოკო გინიბღათ. თეშნერო ვოძირანთ, ნამდა სწორას ვაფასენთ ჩქინ შესაძლებლობეფს. თეს გეძინელ, მოკრძალებას გიმიფრჩქინანთ დო დიდებას ვუძღვინენთ ირფელიშშემალებე ღორონთის (გამოცხ. 15:3, 4).

¹⁶ მართალ რე, მოკრძალებათ იეჰოვას განვადიდენთ, მარა თე თვისებაშ გიმორჩქინაშ შხვა მიზეზეფ ხოლო მიღნა. თუდო ქობძირუნთ, მუჭო მოხვარნა თანდაბლობა დო მოკრძალება, მიღდან ხიოლ დო ჯგირ ურთიერთობა შხვეფწკუმა.

მუშენ რე ჯგირ თანდაბლობა დო მოკრძალებაშ გიმორჩქინა?

17. მუშენ რენა თანდაბალ დო მოკრძალებურ კათა ბედნერეფ?

¹⁷ მუჟამსით თანდაბლობა დო მოკრძალებას გიმიფრჩქინანთ, თეს ხიოლ მოუღ. მუშენ იფჩიებუთ თეს? ჩქინ შესაძლებლობეფს სწორას ქუვაფასენთ-და, მარდულეფ დო ბედნერეფ იპჸით, მუჟამსით შხვეფ მიმეხვარებნა. მაგალთო, დეფიფქრათ თი შემთხვევაშე, მუჟამსით იესოქ ვით კეთროვან დასქილიდუ. ხვალე ართიქ დირთჷ იესოშა მადლობაშ ორაგადეთ, მუშენდა თიცალ ლახალაშე დასქილიდუ, მუდგაშათ მუს მუთუნ ვა მახვარებედ. თე თანდაბალ დო მოკრძალებურ კოჩ მარდულ რდუ თიშო, ნამდა იესოქ მეხვარ დო ათეშენ განადიდ ღორონთ (ლუკ. 17:11—19).

18. მუჭო მოხვარნა თანდაბლობა დო მოკრძალება, ნამდა შხვეფწკუმა ჯგირ ურთიერთობა მიღდან? (რომაელები 12:10)

¹⁸ თანდაბალ დო მოკრძალებურ კათა ირო ოცად, შხვეფწკუმა ჯგირ ურთიერთობა უღდას დო ათეშენ, უმოსო თეცალ კათას ჸუნს ხოლოშიან მეგობრეფ. მუშენ იფჩიებუთ თეს? თინეფ აღიარენა, ნამდა შხვეფს ჯგირ თვისებეფ უღნა დო ონდუნა თინეფს. თანდაბალ დო მოკრძალებურ კათას ოხიოლ, მუჟამსით შხვეფ ჯგირო ასრულენა მუნეფიშ დანიშნულებეფს. თინეფს ვა უჭირა, ნამდა ქაცქუან დო პატიცემა გეგმირჩქინან შხვეფიშ მიმართ (წეკითხით რომაელეფიშ 12:10).

19. მუ მიზეზეფიშ გურშენ ოკო ავარიდათ დუდ სიამაყეს?

¹⁹ თეშ გინაწონს, ამაყეფს უჭირა, შხვეფს ქაცქუან დო უსხუნნა, ირო აშო ოცქვანდან. თინეფ დუდის შხვეფს უდარენა დო ოცადნა, შხვეფს დარჯგინან. თიშ მანგიორო, ნამდა შხვეფ მამზადან დო ძალაუფლება გუნაწილან, თეცალ აზროვნება უღნა: „მუდგარენიშ ჯგირო კეთება ქუგოკონ-და, სი ოკო აკეთე“. ამაყ პიროვნება ამბიციურ დო მენჯარიშ რე (გალ. 5:26). თეცალეფს იშვიათო ჸუნა ხოლოშიან მეგობრეფ. ჩქინ დუდის სიამაყეშ ნიშნეფს ქუვორწყეთ-და, მთელ გურით ოკო ფთხუათ იეჰოვას ლოცვას მოხვარა, ნამდა დიფთირუათ აზროვნება დო თე გლახა თვისებაქ ჩქინ პიროვნებაშ ნაწილო ვეგნირთას (რომ. 12:2).

20. მუშენ ოკო ვორდათ თანდაბალ დო მოკრძალებურ?

²⁰ ჩქი მანგარ მარდულეფ ვორეთ იეჰოვაშ თანდაბლობაშ მაგალითშენ! ჩქი თიშ თანდაბლობას თევრეშე ვორწყეთ, მუჭო ოქცუ მუშ მსახურეფს დო მოკონა, მივაჸუნათ თიშ მაგალითის. თეს გეძინელ, მოკონა, ბიბლიას ინოჭარილ თი მოკრძალებურ ადამიანეფიშ მაგალითეფშე დიბგურუათ, მით ღორონთწკუმა ართო გილეშეს. მორთ დიდება დო პატი ირიათო იეჰოვას ვუძღვინათ, მით თეს იმსახურენს (გამოცხ. 4:11). თაშ ქიმიფქციებუთ-და, ჩქი ხოლო შემალებენა, გილაფრთათ ჩქინ ზეციერ მუმაწკუმა ართო, მიდგას უჸორს თანდაბალ დო მოკრძალებურ ადამიანეფ.