მუშენ რე მოკრძალება მნიშვნელოვან?

1, 2. მუშენ თქუ ვარია ღორონთიქ ართ დროს მოკრძალებულ საულშენ? (ქოძირით სურათ თე გვერდის).

საულქ მეფობა დიჭყუნ, მოკრძალებულ დო პატიგედვალირ კოჩი რდუ (1 სამ. 9:1, 2, 21; 10:20—24). მარა გამეფებაშე ბრელ დროს ვამკურთუმუნ თეშ, თიქ ბრელშა ვემიქცუ სწორას. მაგალთო, მუჟამსით ღორონთიშ წინასწარმეტყველ სამუელს გილგალშა მუშ დროს ვემიართინუნ, საულს მეტიქ ვამათვინებუ. თინა ორწყედ, ნამდა ფილისტიმელეფი ჩხუპშო იმზადებუდეს დო ისრაელიშ ჯარი ხოლო ჭიჭე-ჭიჭეთ ეკმოცენდ. ათეშგურშენ შილებედ თიქ იფიქრუკონ: „მუდგაინ ოკო გუვაკეთე სასწრაფოთ!“. თიქ ღორონთის მსხვერპლი შეწირ, მუდგაშ უფლება თის ვა უღუდ. თეცალ საქციელქ ღორონთის მანგარაშო ვემეწონ (1 სამ. 13:5—9).

² მუჟამსით სამუელქ გილგალშა ქუმორთუნ, საყვედურ ქიმეჩ საულს. თიშ მანგიორო, ნამდა სამუელს ქუმურჩქილუკონ, თიქ დუდიშ მართლება დო შეცდომაშ შხვეფშა გინობრალება ქიდიჭყუ; თიქ დანაშაულო ვემირჩქინ მუშ საქციელი (1 სამ. 13:10—14). თეშ უკულ საულქ ბრელშა მიქცუ გლახათ დო საბოლათ მიოდინუ მეფობა დო მუთ არძაშ უმოს მნიშვნელოვან რე, ღორონთიშ მოწონა (1 სამ. 15:22, 23). საულქ ჯგირო დიჭყუ მეფობა, მარა ბოლოს თიშ მეფობაქ ტრაგიკულო გეთუ (1 სამ. 31:1—6).

3. ა) მუს ფიქრენს ბრელ მოკრძალებაშენ? ბ) ნამ კითხვეფს მიაჩამუ პასუხეფი?

³ ამდღარ ქიანას ხალხი ართიანიშ გარძახო ოცადუ წიმიულას დო თის, ნამდა შხვეფშე უჯგუშ დო ირნერო გიმორჩქინელ რდან. თე ირფელს ქიმიოჭირინუანინ თიშენ, თეცალ ხალხი მოკრძალებას ოდინუანს. მაგალთო, ართ გიმორჩქინელ მსახიობი დო პოლიტიკოსი იჩიებ: „მუთუნ საერთო ვა მიღუ მოკრძალებაწკუმა დო იმენდი მიღუ, დღას ვა მაღვენუ“. მარა, მუშენ რე მოკრძალება მნიშვნელოვან? მუს ნიშნენს დო მუს ვა ნიშნენს მოკრძალება? მუჭო შემლებუნა ვორდათ მოკრძალებულეფი რთულ სიტუაციეფს ვარდა მუჟამსით, შხვეფიშ ზეგავლენაშ თუდო ვორეთ? პირველ ჟირ კითხვაშა პასუხეფს თე სტატიაშე მიბღენთ. მასმა საკითხშენ თეშ უკულიან სტატიას იჸუაფ რაგად.

მუშენ რე მოკრძალება მნიშვნელოვან?

4. მუს ნიშნენს კადნიერ საქციელი?

⁴ ბიბლიას მოკრძალება კადნიერებაწკუმა რე დაპირისპირებულ (წეკითხით იგავეფიშ 11:2). დავითიქ ჭკვერულო მიქცუ, მუჟამსით იეჰოვას თხუ: „გაჩერ სქან მსახურ კადნიერ საქციელშე“ (ფსალმ. 19:13). მუს ნიშნენს „კადნიერ საქციელი“? კადნიერ საქციელს იგულისხმებ უდუფიქრებუო დო თავხედურო თიცალ მუდგარენიშ კეთება, ნამუშ უფლება ვა უღუ კოჩის. მინშა ჩქი არძა იფქციებუთ თაშ, მემკვიდრეობათ გინოჩამილ ცოდაშ გურშენ. მარა მუჭო მეფე საულიშ მაგალითშე იძირენ, თეცალ საქციელ ხშირას ქუმმალენან-და, საბოლათ ღორონთწკუმა ურთიერთობა გემეფუჭებუნა. 119 ფსალმუნიშ 21-ა მუხლის იეჰოვაშ გურშენ ჭარ: „სი უდღანუქ . . . კადნიერ ხალხის“. მუშენ იქციებ იეჰოვა თაშ?

5. მუშენ რე კადნიერ საქციელ უბრალო შეცდომეფშე უმოს სერიოზულ?

⁵ კადნიერ საქციელ უბრალო შეცდომეფშე უმოს სერიოზულ რე. პირველ რიგის, თეცალ საქციელით ჩქი იეჰოვაშ უპატიცემუობას გიმიფრჩქინანთ, ნამუთ ჩქინ სამართლიან უზენაეს მართველ რე. თეშ გარდა, შხვეფწკუმა ურთიერთობა გილმელებუნა, მუჟამსით ვორთუთ თის, ნამუშ კეთებაშ უფლება ვამღუნა (იგავ. 13:10). დო ბოლოს, მუჟამსით ჩქინ კადნიერ საქციელ გეგმიარგამებუნ, შილებე უხერხულ მდგომარეობას ქინვოლათ დო ონჯღორე ქობძირათ (ლუკ. 14:8, 9). კადნიერ საქციელს მუთუნ ჯგირ ვამაჸუნუ. მუჭოთ ბიბლიაშე იძირენ, მოკრძალებულ საქციელ ირო სწორ რე.

მუს ნიშნენს მოკრძალება?

6, 7. მუს ნიშნენს თანდაბლობა დო მუ კავშირ უღუ თის მოკრძალებაწკუმა?

⁶ მოკრძალება დო თანდაბლობა ართიანწკუმა რე კავშირს. ბიბლიას თანდაბლობა, სიამაყე დო ქედმაღლობაწკუმა რე დაპირისპირებულ (ფილ. 2:3). თანდაბალ კოჩი მოკრძალებულ ხოლო რე; თინა მუშ შესაძლებლობეფს დო მეჭირინაფილს სწორას აფასენს, აღიარენს შეცდომეფს, მზათ რე მიღას რჩევეფი დო ქიმირჩქილუას შხვეფიშ აზრი. თანდაბლობა ღორონთიშ მოსაწონ თვისება რე.

⁷ მუჭოთ ბიბლიაშე იძირენ, მოკრძალებას თინა ხოლო იგულისხმებ, ნამდა ჩქინ დუდი სწორას შევაფასათ დო მიჩქუდან, მუსხიშ კეთება შემლებუნა. ორიგინალშე ნათარგმნა სიტყვა მოკრძალება ყურადღებას ამახვილენს თიშა, მუჭო ოკო იმოქმედას ჩქინ შესაძლებლობეფიშ აღიარებაქ თიშა, მუნერ დამოკიდებულება მაღვენუნა შხვეფწკუმა.

8. სოვრეშე შილებე იძირედას, ნამდა ვა ფიფქრენთ დო ვეფქციებუთ მოკრძალებულო?

⁸ სოვრეშე შილებე რჩქუდას, ნამდა ვა ფიფქრენთ დო ვეფქციებუთ მოკრძალებულო? გუვარჩუათ მუსხირენ ნიშანი, ნამუთ მეუთითენს თეშა. შილებე თეოკრატიულ პასუხიშმგებლობეფი მიღუნან თიშენ, ჩქინ დუდშა დიდ წარმოდგენაქ ქუმაშუან (რომ. 12:16). შილებე ვოცადუდათ, ქიმიფქცუათ შხვეფიშ ყურადღება თიცალ საქციელით, ნამუთ ვა რე სწორ (1 ტიმ. 2:9, 10). შილებე ჩქინ აზრიშ გოჸუნას ვეცადათ თიშ ოჭიშით, ნამდა მუდგარენ მდგომარეობა მიკინებუნა, ნათესეფ პჸუნა ვარდა ფიფქრენთ, ნამდა ჩქი ვორეთ მართალ (1 კორ. 4:6). მუჟამსით თაშ იფქციებუთინ, შილებე შურო ვავორდათ თიშ აზრის, ნამდა უკვე გეგნოფრთით მოკრძალებაშ ზღვარს.

9. მუშენ მიქცუ ნამთინექ კადნიერო? ქიმიჸონით ბიბლიას მოშინაფილ მაგალითეფ.

⁹ არძაქ შილებე ქიმიქცუას კადნიერო, სწორ ვარენ ფერ კორნებეფს შურო გასაქან ქიმეჩ-და. ბრელქ მიქცუ კადნიერო, მუჟამსით ვა გაკონტროლეს დუდი დო ადგილ ქიმეჩეს ამბიციას, შურს დო ღანჯის. ბიბლიას მოშინაფილ პერსონაჟეფქ, მაგალთო აბესალომქ, უზიაქ დო ნაბუქოდონოსორქ გეიაჸუნეს „ხორციშ საქმეეფს“, მარა იეჰოვაქ დამცირ თინეფ თეცალ კადნიერ საქციელიშ გურშენ (2 სამ. 15:1—6; 18:9—17; 2 მატ. 26:16—21; დან. 5:18—21).

10. მუშენ ოკო ვეგნუვორთინუათ საეჭოთ შხვეფიშ მოტივეფი? ქიმიჸონით მაგალითეფი ბიბლიაშე.

¹⁰ რე ხოლო შხვა მიზეზეფი, ნამუშ გურშენ შილებე კოჩიქ კადნიერო ქიმიქცუას. მორთ, დეფიფქრათ დაბადებაშ 20:2—7-ს დო მათეშ 26:31—35-ს მოშინაფილ შემთხვევეფშენ. მუჭოთ ართ უცფას იძირენ თეშ, გეიაჸუნესო ცოდამ კორნებეფს აბიმელექიქ დო პეტრექ დო თიშგურშენ მიქცუესო კადნიერო? ეგბა თინეფს არძა ფაქტი ვა უჩქუდეს-და, ვარდა კურცხას ვარდეს-და? ჩქი ვეშემლებუნა ქობძირათ, მუ უღუნა შხვეფს გურს, ათეშგურშენ ვეფჩქარათ ოკო დო შხვეფიშ მოტივეფი საეჭოთ ვეგნუვორთინუათ ოკო (წეკითხით იაკობიშ 4:12).

მიჩქუდან ჩქინ ადგილ

11. მუჭო ოკავშირ მოკრძალება თის, ნამდა მიჩქუდან მუ ადგილ მიღუნა ღორონთიშ ორგანიზაციას?

¹¹ მოკრძალებულეფქ ქიპჸუათინ თიშო, საჭირო რე მიჩქუდან, მუ ადგილ მიკინებუნა ღორონთიშ ორგანიზაციას. წესრიგიშ ღორონთ იეჰოვაქ, არძას ჩქინ-ჩქინ ადგილ მუჩეს ორგანიზაციას. კრებას არძას შხვადოშხვა დანიშნულება მიღუნა დო არძა საჭირო ვორეთ. იეჰოვაქ მუშ ჭყოლოფუათ არძას მუჩეს მუდგარენ ძღვინ, უნარი დო ტალანტი. ჩქი შემლებუნა თენა ღორონთიშ ოდიდებელო დო შხვეფიშ საჯგირობუოთ გეგმიბრინუათ (რომ. 12:4—8). იეჰოვაქ „მართველეფო“ ქუდმორინუეს, მაფასენა, მონდუნა დო პასუხიშმგებლობეფს მარზენა (წეკითხით 1 პეტრეშ 4:10).

12, 13. მუშენ ვაგამკვირდან ოკო, დრო-ხანიშ უკულ ჩქინ მდგომარეობაქ დო პასუხიშმგებლობეფქ დითირ-და?

¹² შილებე დრო-ხანიშ უკულ დუმათირან ჩქინ პასუხიშმგებლობეფქ ღორონთიშ ორგანიზაციას. გუვარჩუათ იესოშ მაგალით. დუდშე თინა ხვალე რდუ იეჰოვაწკუმა (იგავ. 8:22). უკულ თინა ღორონთის ოხვარუდ შხვა სულიერ ქმნილებეფიშ, ფიზიკურ სამყაროშ დო პირველ კოჩიშ გოჭყაფას (კოლ. 1:16). უმოს გვიანო იესოქ ახალ დავალება მიღუ; თიქ ქიდებადუკო ოკო ბაღანათ დედამიწას დო იცხოვრუკო ოკო (ფილ. 2:7). მუშ დუდი მსხვერპლო შეწირუნ თიშ უკულ, იესოქ ზეცაშა დირთ, მუჭოთ სულიერ ქმნილება, ნამდა 1914 წანას ღორონთიშ სამეფოშ მეფეთ გინორთედკონ (ებრ. 2:9). თეშ უმკუჯინუო, თიშ მდგომარეობა კინ დითირუ. ანთასწანიან მართველობაშ უკულ იესო იეჰოვას გეგნოჩანს მუშ სამეფოს, „ნამდა იჸუას ირფელქ ირ კოჩშო“ (1 კორ. 15:28).

¹³ თეგვარო ჩქი ხოლო ვაგამკვირდან ოკო, დრო-ხანიშ უკულ ჩქინ მდგომარეობაქ დო პასუხიშმგებლობეფქ ხოლო დითირ-და. თეშ მიზეზიქ შილებე იჸუას თი საკითხეფიშ გინოჭყვიდუაქ, ნამდგას ბღებულენთ ჩქინ ცხოვრებას. მაგალთო, დაოჯახება, სქუალეფიშ ერჩქინა ვარდა ცხოვრებაშ გამარტივება დო პიონერო მსახურებაშ დოჭყაფა. თე ირფელს დადებით მხარეეფი უღუ, მარა გარკვეულ პასუხიშმგებლობეფი ხოლო მოჸუნს. მდგომარეობაშ თირუათ შილებე ისხით ვამამსახურებუან ვარდა პირიქით, უმოს მეტიშ კეთებაქ შემალებუან. მნიშვნელობა ვა უღუ ახალგაზრდეფი ვორეთ დო ვარ ხანშა მიშულირეფ, ჯგირ ჯამრთელობა მიღუნა დო ვარ გლახა, იეჰოვა ირიათო ითვალისწინენს, მუშ კეთება შემლებუნა არძაშ უჯგუშო თიშ მსახურებას. თინა დღას ვამოფთხინა შემლებუნან თიშე მეტის დო მანგარო აფასენს ირფელს, მუდგას შურ დო გურით ვორთუთ (ებრ. 6:10).

14. მუჭო მოხვარუნა მოკრძალება, ვორდათ კმაყოფილ ჩქინ საქმეთ დო ვა ვოდინუათ ხიოლ?

¹⁴ იესო ხიოლით ორთუდ მუშა მენდებულ დავალებეფს დო ჩქი ხოლო ხიოლ ოკო მიღუდან, ირნერ საქმეშ კეთებაშ დროს (იგავ. 8:30, 31). მოკრძალებულ კოჩი კმაყოფილ რე თი დავალებეფით დო პასუხიშმგებლობეფით, ნამუთ კრებას უღუ. თინა ვა წუხენს თიშო, მიღენს დო ვარ მეტ პასუხიშმგებლობეფს დო შხვეფიშ წიმიულა ხოლო ვანჯარ. პირიქით, ოცად კმაყოფილ რდას დო ხიოლით აკეთას თი საქმე, ნამუთ ასე ობარ, მუშენდა უჯინე თის, მუჭოთ იეჰოვაშე დავალებულ საქმეს. თეწკუმა ართო, თინა პატის ცენს შხვეფიშ საქმეს ხოლო, ნამუთ იეჰოვაქ დავალ თინეფს. მოკრძალება მოხვარუნა დავაფასათ შხვეფ დო ხუჯი ქუდუკინათ თინეფს (რომ. 12:10).

მუს ვა ნიშნენს მოკრძალება

15. მუს ბგურაფლენთ გედეონიშ მოკრძალებაშ მაგალითშე?

¹⁵ გედეონი მარზენა მოკრძალებაშ ჯგირ მაგალითის. მუჟამსით თის პირველო იეჰოვაშ ანგელოზიქ გეგმეცხადუნ, აღიარ, ნამდა თის ვართ დიდ წარმომავლობა უღუდ დო ვართ მუთუნნერ უფლებამოსილება (მსაჯ. 6:15). ღორონთშე დავალება მიღუნ თიშ უკულ, გედეონქ დეფიქრუ, ქარჩქილედ დო ვარ ჯგირო, მუთ იეჰოვაქ მითხუ თიშე დო ხემძღვანელობა ქოთხუ (მსაჯ. 6:36—40). გედეონი უშქურანჯ დო გამბედავ რდუ. მარა თინა გურგოჩამილ დო დაკვირებულ ხოლო რდუ (მსაჯ. 6:11, 27). თე დავალება თის თიშგურშენ ვა უკეთებ, ნამდა მუშ სახელ ირ კოჩის ქარჩქინუკო. პირიქით, თე დავალება შეასრულუნ თიშ უკულ თიქ მუშ ჯვეშ საქმეს დართ (მსაჯ. 8:22, 23, 29).

16, 17. მუ ოკო გეთვალისწინას პიროვნებაქ, მუჟამსით სულიერ პროგრესშე ფიქრენს?

¹⁶ მოკრძალება ვა ნიშნენს პასუხიშმგებლობეფიშ მეღებაშ ინტერესი ვამღუდანინ თის. ბიბლია არძას მომწოდენა სულიერ წარმატებაშე (1 ტიმ. 4:13—15). მარა თენა ირო პასუხიშმგებლობეფიშ თირუას ხოლო ვეთხინს. იეჰოვაშ კურთხევათ შემლებუნა სულიერ პროგრესის მივოჭირინუათ თი საქმეს ხოლო, ნამუსით ასე ვორთუთ. შემლებუნა გუვაუჯგუშათ ღორონთშე მოჩამილ უნარეფ დო უმოს საქმეეფ ვაკეთათ.

¹⁷ ონდო ახალ პასუხიშმგებლობას მიღენდასინ, მოკრძალებულ პიროვნება დეინტერესებუ, მუს მუ მეთხიებუნ თით. თეშ უკულ შეულებ შეაფასას მუშ მდგომარეობა. მაგალთო, ქეშიალებენ დო ვარ ასე უღუნ თი მნიშვნელოვან საქმეეფიშ კეთება, შხვა პასუხიშმგებლობეფ ქიგიაძინუნ თიშ უკულ? ქეშულებუნ-დო ვარ ნამთინე ასე უღუნ თი საქმე შხვას გეგნოჩას, ნამდა დროქ ქუდასკიდას ახალ პასუხიშმგებლობეფიშ შეიოსრულებელო? თე კითხვეფშე ართ ვარდა ჟირხოლო პასუხი უარყოფით ქორენ-და, უჯგუშ რე მითინ შხვაქ შეასრულას თე საქმე. ქილოცენთ დო თე საქმეს რეალურო შეაფასენთ-და, გარჩქვენუნა, მუ შეილებუნა დო მუ ვარ. თე დროს მოკრძალება მიგეხვარებუნა, ვარია ქოთქუათ პასუხიშმგებლობეფიშ გეძინაშენ.

18. ა) მუჭო მიმეხვარებუნა მოკრძალება ახალ პასუხიშმგებლობეფიშ მეღებაშ დროს? ბ) მუ ჭარ რომაელეფიშ 12:3-ს მოკრძალებულ პიროვნებაშ გურშენ?

¹⁸ ახალ პასუხიშმგებლობას ბღებულენთინ თი დროს, გედეონიშ მაგალით გუმოშინანა, ნამდა ჩქი ვეშემლებუნა წარმატებაშ მენჭირნაფა იეჰოვაშ მითითებეფიშ დო კურთხევაშ უმშო. ბიბლია მომწოდენა, მოკრძალებულო გილაფრთათ ჩქინ ღორონთწკუმა ართო (მიქ. 6:8). თაშ ნამდა, ირ პასუხიშმგებლობაშ მიღებაშ დროს ოკო იბლოცათ დო დეფიფქრათ, მუს მირაგადუნა იეჰოვა მუშ სიტყვაშ დო ორგანიზაციაშ საშვალებათ. ჩქი ოკო დიბგურუათ, ზუსტაშე მუჭო მივაჸუნათ იეჰოვაშ ხემძღვანელობას. მორთ, ირო ფშუდან თინა, ნამდა ჩქინ უნარი ვარინ, იეჰოვაშ თანდაბლობა „განმადიდენა“ (ფსალმ. 18:35). ათეშგურშენ ღორონთწკუმა ართო მოკრძალებულო გილულა მიმეხვარებუნა, ჩქინ დუდშენ, ვორეთინ თიშე ვართ მეტ დო ვართ ნაკლებ იფიფქრათ (წეკითხით რომაელეფიშ 12:3).

19. მუ მიზეზეფიშ გურშენ ოკო გიმიფრჩქინათ მოკრძალება?

¹⁹ მოკრძალებულ პიროვნება განადიდენს იეჰოვას, ნამუსით თინა იმსახურენს, მუშენდა თინა რე ჩქინ გუმარჩქინე დო უზენაეს მთელ სამყაროს (გამოცხ. 4:11). მოკრძალება მოხვარუნა კმაყოფილ ვორდათ თი საქმეშ კეთებათ, ნამუთ მაფუნა მენდებულ ღორონთიშ ორგანიზაციაშე. მოკრძალება მარზენა საშვალებას, დუდ დეფცვათ უღირს საქმეეფშე დო ხეს უნწყუნს იეჰოვაშ ხალხიშ ართობას. თე თვისება მოხვარუნა ჩქინ ინტერესეფიშ წოხოლე შხვაშ გივორინუათ დო კურცხას ვორდათ, ნამდა დუდ ეუჩილითუათ სერიოზულ შეცდომეფს. თე მიზეზეფიშ გურშენ მოკრძალება მნიშვნელოვან რე ღორონთიშ ხალხშო დო იეჰოვა აფასენს თინეფს, მით ავითარენს თე თვისებას. მარა მუშ რაგად შილებე, ზეგავლენაშ თუდო ქუვორეთ-და? თეშ უკულიან სტატია ქუმოძირანა, მუჭო შილებე მოკრძალებაშ გიმორჩქინა რთულ სიტუაციეფიშ დროს.