გათელებაშ იმენდშე იეჰოვაშ ჸოროფა, სიბრძნე დო მოთვინება იძირე

1. მუშენ გაჭყჷ იეჰოვაქ სიცოცხლე?

ართ დროს ხვალე იეჰოვა არსებენდჷ. მარა თინა ხვალახეთ ვა გინაფლენდჷ დუდის; თის ბედნერობაშო მითინ ვასაჭირუდ. თეშ უმკუჯინუო, ღორონთის ოკოდ, შხვეფქ ხოლო იცოცხლესკო დო ბედნერეფ ჸოფედესკო. იეჰოვა ჸოროფაქ აღძრჷ, ირფელ გაჭყუკო (ფსალმ. 36:9; 1 იოან. 4:19).

2. მუს გინაფლენდეს იესო დო ანგელოზეფ, მუჟამსით იეჰოვაქ ირფელ გაჭყჷ?

² პირველო იეჰოვაქ მუშ სქუა, იესო გაჭყჷ. უკულ, „თიშ მონაწილებათ გორჩქინდჷ შხვა ირფელქ“, თინეფ შქას მილიონობით სულიერ ქმნილებაქ (კოლ. 1:16). იესოშა დიდ ხიოლ მოუღუდ მუამუშწკუმა თანამშრომლობას (იგავ. 8:30). ანგელოზეფს ხოლო უღდეს ხიოლიშ მიზეზ, მუშენდა მუნეფიშ თოლით ორწყედეს, მუჭო გაჭყეს ირფელ ზეცას დო დედამიწას ღორონთიქ დო თიშ ოსტატიქ, იესოქ. მუჭო გიმოხანტეს ანგელოზეფქ ხიოლ? თინეფ „ხონარმაღალო განადიდენდეს ღორონთის“, მუჟამსით იეჰოვაქ დედამიწა გაჭყჷ. მუშო ოკო რაგად, თეცალ განწყობა აღვენუდეს თიმწკუმა ხოლო, მუჟამსით ღორონთიქ შხვა ირფელ გაჭყჷ, თინეფ შქას შემოქმედებაშ გვირგვინ — ადამიან (იობ. 38:7; იგავ. 8:31). თითოულ გუნაჭყეფშე იეჰოვაშ ჸოროფა დო სიბრძნე იძირედ (ფსალმ. 104:24; რომ. 1:20)

3. მუჭოთ 1 კორინთელეფიშ 15:21, 22-ს ჭარჷ, მუ გინაშქვჷ შეიოლებერო იესოშ გიშაჸიდირალ მსხვერპლიქ?

³ იეჰოვას ოკოდ, ადამიანეფქ მარადიულო იცხოვრესკო დედამიწას, ნამუთ თინეფშო გაჭყჷ. მარა, მუჟამსით ადამ დო ევაქ მუნეფიშ მოჸოროფე მუმაშ წინააღმდეგ მიდართეს მარადიულ ცხოვრება მიოდინეს. ხვალე თენა ვარინ მუნეფიშ გამნარყის ცოდვა დო ღურა გეგნოჩეს (რომ. 5:12). მუჭო მიქცუ იეჰოვაქ? თიქ ხეთეშე იმოქმედ დო თქუ, მუჭო დერსხენდჷ კაცობრიობას (დაბ. 3:15). ღორონთიქ გეგნოჭყვიდ, მუშ სქუა შეწირკო გიშაჸიდირალ მსხვერპლო, ნამდა ადამ დო ევაშ გამნარყ გათავისფალკო ცოდვა დო ღურაშე. თენა მარადიულ სიცოცხლეშ საშვალებას ქიმეჩანდ თინეფს, მით ღორონთიშ მსახურებას გიშეგორუნდეს (იოან. 3:16; რომ. 6:23; წეკითხით 1 კორინთელეფიშ 15:21, 22).

4. ნამ კითხვეფს გუვარჩიენთ თე სტატიას?

⁴ შილებე ბრელ მუდგარენ მოინტერესდან გათელებაშ გურშენ, ნამდგას ღორონთ მოპირნა. მაგალთო, მუჭო შილებე მოხვადას გათელებაშ პროცესიქ? ქიფჩინენთო ჩქინ ხოლოშიანეფს, მუჟამსით გეთელებნა? მუჭო მომღანა ხიოლს ღურელეფიშ გათელება? დო მუჭო მიმეხვარებნა გათელებაშ იმენდშე ფიქრ, ხოლო უმოსო გეგმოფხანტათ მარდულობა იეჰოვაშ ჸოროფა, სიბრძნე დო მოთვინებაშო? მორთ ქობძირათ თე კითხვეფიშ პასუხეფ.

მუჭო შილებე მოხვადას გათელებაშ პროცესიქ?

5. მუშენ რე გონივრულ იფიფქრათ, ნამდა არძა ართათ ვეგეთელებუ?

⁵ გონივრულ რე იფიფქრათ, ნამდა, მუჟამსით იეჰოვა იესოშ საშვალებათ გათელენს მილიონობით ადამიანს, არძა ართათ ვეგეთელებუ. მუშენ იფჩიებუთ თეს? მუშენდა დედამიწაშ მოსახლეობაშ თეცალ უცფაშიან მოძინას ქაოს ქუმაჸუნუ. ღორონთ დღას ვაკეთენს თიცალ მუდგარენს, მუთ ქაოსის გეგმიწვიენს. თის უჩქჷ, ნამდა ადამიანეფქ მშვიდობიან გარემოს ქიცხოვრანინ, ირფელ წესრიგის ოკო რდას (1 კორ. 14:33). იეჰოვაქ სიბრძნე დო მოთვინება გიმირჩქინ, მუჟამსით იესოწკუმა ართო დედამიწას ადამიანეფიშ ოცხოვრებელო ამზადენდჷ. იესო ხოლო თე თვისებეფს გეგმირჩქინანს მუშ ანთასწანიან მართველობაშ დროს, მუჟამსით არმაგედონს გინოსქილადირეფწკუმა ართო გათელებურეფშო მამზადენს დედამიწას.

6. მუჭოთ საქმეეფიშ 24:15-ის ჭარჷ, მი იჸუაფ გათელებურეფ შქას?

⁶ არძაშ უმოს მნიშვნელოვან თინა რე, ნამდა არმაგედონს გინოსქილადირეფქ გათელებურეფს ღორონთიშ სამეფოშ დო იეჰოვაშ მოთხოვნეფიშ გურშენ ოკო დაგურუან. მუშენ იფჩიებუთ თეს? გათელებურეფიშ უმენტაშ უმართლოეფ შქას იჸუაფ (წეკითხით საქმეეფიშ 24:15). თინეფს მუნეფიშ ცხოვრებას ბრელ მუდგარენ აჸინა ოთირალ, ნამდა ქრისტეშ გიშაჸიდირალქ ჯგირობუა ქუმუღას. დეფიქრით, მუზმა იჸუაფ ოხანდებელ, ნამდა მილიონობით გათელებურქ მიღას რჩქინა იეჰოვა ღორონთიშ გურშენ, ნამდგას დღას ვეჩინენდეს. არძას მუშ მასწავლებერ აჸვენუნო, მუჭოთ ამდღა ჩქი ვოგურუანთ ხალხის ბიბლიას? კრებეფს დენიშნებნანო გათელებურეფ, ნამდა მემზადან შხვა გათელებურეფშა ოგურაფალო? თეს ახალ ქვეყნიერებას ქობძირუნთ. მარა, მუთ ასე მიჩქნა თინა რე, ნამდა ქრისტეშ ანთასწანიან მართველობაშ ბოლოს „დედამიწა იეჰოვაშ რჩქინათ ეიფშაფუ“ (ეს. 11:9). წოხლე მართალო ბრელ, მარა სასიამოვნო საქმე მელნა!

7. მუშენ შეიალებენა ღორონთიშ მსახურეფს, გაუგან გათელებურეფს?

⁷ ქრისტეშ ანთასწანიან მართველობაშ დროს, იეჰოვაშ მიწიერ სქუალეფ კინ გაგრძელენა მუნეფიშ ცხოვრებაშ თირუას, ნამდა ასიამოვნან ღორონთის. ათეშენ თინეფს შეიალებენა, ჯგირო გაუგან გათელებურეფს, მიდგაქ ცოდვას ოკო გიორჯგინან დო იეჰოვაშ მოთხოვნეფიშ შესაბამისო იცხოვრან (1 პეტ. 3:8). გათელებურეფ ქოძირნა, ნამდა ღორონთიშ მსახურეფ თანდაბალეფ რენა დო თინეფ ხოლო ოცადნა, დითირან. ათეშენ გათელებურეფს სურვილ აღვენუნა, თინეფწკუმა ართო ემსახურან იეჰოვას (ფილ. 2:12).

ქიფჩინენთო ჩქინ ხოლოშიანეფს, მუჟამსით გეთელებნა?

8. მუშენ რე გონივრულ ბჯერდან, ნამდა მით საჸოროფო გათელებურეფს შეხვადნა, ქიჩინენა თინეფს?

⁸ მუსხირენ მიზეზიშ გურშენ შემლებნა ბჯერდან, ნამდა მით საჸოროფო გათელებურეფს შეხვადნა, ქიჩინენა თინეფს. მაგალთო, მუჭოთ უკვე მოხვალამირ გათელებაშ შემთხვევეფშე იძირე, იეჰოვა თეშ გათელენს ადამიანეფს, ნამდა თიცალ მეჯინა, ხონარ დო მახსოვრობა უღდან, მუნერით ღურაშახ უღდეს. იესოქ ღურა ლურს შეადარ დო გათელება — გოკურცხინაფას (მათ. 9:18, 24; იოან. 11:11—13). მუჟამსით ადამიან გოკურცხუ, თის თიცალ მეჯინა, ხონარ დო მეხსიერება უღჷ, მუნერით დორულაფაშახ უღუდ. გუვარჩუათ ლაზარეშ მაგალით. თინა ოთხ დღაშ ნაღურა რდუ დო თიშ სხეულს ჸორადუა აფუდ დოჭყაფილ. მუჟამსით იესოქ ლაზარე გათელ, მუშ დალეფქ, მართა დო მარიამქ, ქიჩინეს თინა დო მუჭოთ იძირენ, ლაზარეს ხოლო შუდჷ მუშ დალეფ (იოან. 11:38—44; 12:1, 2).

9. მუშენ ვაღვენუნა გათელებურეფს სრულყოფილ გონება დო სხეულ?

⁹ იეჰოვა მოპირნა, ნამდა ქრისტეშ მართველობაშ დროს მითინ „ვა თქუანს ლეხ ვორექია“ (ეს. 33:24; რომ. 6:7). თაშ ნამდა, გათელებურეფს ჯამრთელ სხეულ აღვენუნა. მარა ხეთეშე სრულყოფილეფ ვეჸუაფნა. მუშენდა თაშ ქუმოხვადასინ, შილებე მუნეფიშ ხოლოშიანეფს ვაჩინებუან გათელებურეფქ. მუჭოთ იძირენ, ქრისტეშ ანთასწანიან მართველობაშ დროს მთელ კაცობრიობა ჭიე-ჭიეთ გესრულყოფილებ. ანთასწანიან მართველობაშ ბოლოს იესო სამეფოს კინ მუამუშის გეგნოჩანს. თი დროს სამეფოს მუშ საქმე შესრულებურ აჸი, ღურელეფიშ გათელებაშე დოჭყაფილ ადამიანეფიშ გასრულყოფილებათ თებულ (1 კორ. 15:24—28; გამოცხ. 20:1—3).

მუჭო მომღანა ხიოლს ღურელეფიშ გათელება?

10. მუს იგინანთ ღურელეფიშ გათელებაშ დროს?

¹⁰ წერმიდგინით მუს იგინანთ, მუჟამსით თქვან ხოლოშიანეფს კინ ქოძირუნთ. ხიოლით გიძიცანთო დოვარ ნგარა გეიოლნა? ხონარმაღალო უძღვინენთო იეჰოვას განმადიდებელ ობირეშის? შემლებნა ართ მუდგარენშა დარწმუნებულ ვორდათ — ხოლო უმოსო ქიმეჸოროფებნა ჩქინ მზრუნველ ზეციერ მუმა დო თიშ სქუა, მუშენდა თინეფ რეალობათ გინაშქვანა გათელებაშ იმენდის.

11. იოანეშ 5:28, 29-ს ინოჭარილ იესოშ სიტყვეფიშ თანახმათ, მუშ საშვალება აღვენუნა თინეფს, მით ღორონთიშ სამართლიან ნორმეფით იცხოვრენა?

¹¹ წერმიდგინით, მუ ხიოლს იგინანა გათელებურეფ, მუჟამსით ჩეთხინუანა მუნეფიშ ჯვეშ პიროვნებას დო ღორონთიშ სამართლიან ნორმეფით იცხოვრენა. თინეფს, მით ცხოვრებას დითირანა, სამოთხეს მარადიულ ცხოვრებაშ საშვალება აღვენუნა. თეშ გინაწონს, თინეფს, მით ღორონთიშ ნებაშ წინააღმდეგ მიდულა, ვემიაჩამნა საშვალება, სამოთხეს მშვიდობიან ცხოვრებას ეცილან (ეს. 65:20; წეკითხით იოანეშ 5:28, 29).

12. მუ კურთხევეფს მიღენა იეჰოვაშე მორჩილ ადამიანეფ?

¹² ღორონთიშ სამეფოშ მართველობაშ დროს, თიშ არძა მსახურ მუშ დუდშა გეგმოცადუნს იგავეფიშ 10:22-ს ინოჭარილ სიტყვეფიშ ჭეშმარიტებას: „იეჰოვაშ ხვამას სიმდიდრე მოუღ კოჩშა დო ვა მოჸუნს ჭუა“. იეჰოვაშ წმინდა შურიშ მოქმედებათ, თიშ მსახურეფ სულიერო მდიდარეფო გინირთუნა, შხვა სიტყვეფით ქოფთქუათინ, ხოლო უმოს უჯგუშო გეგმირჩქინანა ქრისტეშ თვისებეფს, უმოსო ქაგურუნა თიშ პიროვნებას დო გესრულყოფილებნა (იოან. 13:15—17; ეფეს. 4:23, 24). ირდღას უმოს ჯამრთელ დო უმოს უჯგუშ ადამიანეფო გინირთუნა. მართალო, მუ დიდებულ იჸუაფ ცხოვრება თი დროს! (იობ. 33:25). მუჭო მიგეხვარებნა გათელებაშ იმენდშე ფიქრ ამდღა?

გეგმოხანტით მარდულობა იეჰოვაშ ჸოროფაშო

13. მუჭო იძირე ფსალმუნიშ 139:1—4-შე, ნამდა იეჰოვა ჯგირო მიჩინენა დო მუჭო დამტკიცენს თეს ღურელეფიშ გათელება?

¹³ მუჭოთ უკვე გუვარჩით, მუჟამსით იეჰოვა ღურელეფს გათელენს, თინეფს იგივე მეხსიერება დო პიროვნულ თვისებეფ აღვენუნა, მუნერით ღურაშახ უღდეს. ართ წუთით დეფიქრით მუს ნიშნენს თენა. იეჰოვას თეშ ვუჸორთ, ნამდა იმახსოვრენს ირფელს, მუდგას ფიფქრენთ, ბგინაფლენთ, იფჩიებუთ დო ვორთუთ. თაშ ნამდა, ახალ ქვეყნიერებაშახ დობღურათინ ხოლო, იეჰოვა თიცალ მეხსიერებათ, დამოკიდებულებეფით დო პიროვნულ თვისებეფით გუმათელენა, მუნერით ამდღა მიღნა. მეფე დავითის ჯგირო უჩქუდ, მუჭო რდუ დაინტერესებულ იეჰოვა თითოულ ადამიანით (წეკითხით ფსალმუნიშ 139:1—4). მუჭო მოქმედენს ჩქინდე თიშ რჩქინა, ნამდა იეჰოვა ჯგირო მიჩინენა?

14. მუჭო ოკო იმოქმედას ჩქინწკუმა თიშე ფიქრიქ, ნამდა იეჰოვა ჯგირო მიჩინენა?

¹⁴ მუჟამსით ფიფქრენთ თიშე მუსხით ჯგირო მიჩინენა იეჰოვა, ოკო ვა ბწუხენდათ, შხვა სიტყვეფით ქოფთქუათინ, ოკო ვა მოშქურდან თიშა, ნამდა ღორონთ ჩქინ სისუსტეეფს ოკვირ. მუშენ იფჩიებუთ თეს? იეჰოვა ირნერო ზრუნენს ჩქინდე, აფასენს თითოულიშ პიროვნულ თვისებეფს დო ძვირფასეფ ვორეთ თიშო. თინა ოკვირ ირფელს, მუთ ჩქინ ცხოვრებას ხვადუ დო მუდგას გავლენა უღჷ ჩქინწკუმა. თეშ რჩქინა გურშა ელამკინანა. დღას ოკო ვებგინათ დუდ ხვალახეთ. ირ დღას, ირ წუთის იეჰოვა ელამრენა, ნამდა მიმეხვარან (2 მატ. 16:9).

გეგმოხანტით მარდულობა იეჰოვაშ სიბრძნეშო

15. მუჭო ამტკიცენს გათელებაშ იმენდ, ნამდა იეჰოვა ბრძენ ღორონთ რე?

¹⁵ ღურაშ შიშ ძალიერ იარაღ რე. თი ადამიანეფ, მით სატანაშ გავლენაშ თუდო რენა, გიმირინუანა თე ძალიერ იარაღის, ნამდა აძულან შხვეფ, უღალატან მეგობრეფს ვარდა კომპრომისშა მიდართან. მარა ჩქინ შემთხვევას თენა ვა მოქმედენს. ჩქი მიჩქნა, ნამდა ნტერეფქ დოპჸილანინ ხოლო, იეჰოვა სიცოცხლეს დომრთინუანა (გამოცხ. 2:10). ჩქი დარწმუნებულ ვორეთ, ნამდა თინეფს თიცალ მუთუნ ვაკეთებენა, მუთ იეჰოვაშ მსახურებას მიმოტებაფუანა (რომ. 8:35—39). იეჰოვა გათელებაშ იმენდის მარზენა, მუდგათ ამტკიცენს, ნამდა ბრძენ ღორონთ რე! მუშენ იფჩიებუთ თეს? თე იმენდიშ საშვალებათ იეჰოვა ძალას უდინუანს სატანაშ ართ-ართ ძალიერ იარაღის — ღურაშ შიშის დო თეწკუმა ართო, თე იმენდ დიდ გაბედულებას მარზენა.

16. მუ ოკო კითხათ თქვან დუდის დო მუჭო მიგეხვარებნა თე კითხვეფიშ პასუხეფ თიშ ძირაფას, ქანდუთ დო ვარ იეჰოვას?

¹⁶ იეჰოვაშ ნტერეფქ ჸვილუათ დუგოშქურინუანინ, მზათ ქიჸუაფუთო, თქვან სიცოცხლე იეჰოვას ქიმიანდათ? მუჭო შეილებნა თეშ გაგება? ქოკითხით თქვან დუდის: ქუვოძირანქო ჩქიმ ირდღაშიან ჭიჭე გადაწყვეტილებეფით ხოლო, ნამდა იეჰოვას ვონდუქ? (ლუკ. 16:10). ქუვამტკიცენქო ჩქიმ ცხოვრებაშ წესით, ნამდა ღორონთიშ სამეფო პირველ ადგილშა გემრე დო ქობჯერსო იეჰოვაშ დაპირებაშ, ნამდა იზრუნენს ჩქიმ მატერიალურ საჭიროებეფშო? (მათ. 6:31—33). თე კითხვეფს დადებითო ქუპასუხით-და, ამტკიცენთ, ნამდა ონდუთ იეჰოვას დო მზათ იჸუაფუთ რწმენაშ ირნერ გამოცდაშო (იგავ. 3:5, 6).

გეგმოხანტით მარდულობა იეჰოვაშ მოთვინებაშო

17. ა) მუჭო იძირე იეჰოვაშ მოთვინება გათელებაშ იმენდშე? ბ) მუჭო შემლებნა მარდულობა გეგმოფხანტათ იეჰოვაშ მოთვინებაშო?

¹⁷ იეჰოვას უკვე დანიშნულ აფჷ თე სისტემაშ მოსპუალაშ დღა დო საათ (მათ. 24:36). თინა ვადინუანს მოთვინებას დო ვედიჭყანს მოქმედებას, ონდო თეშ დრო ვამურს. იეჰოვა მთელ გურით ელჷ თი დროს, მუჟამსით გათელენს ღურელეფს, მარა თეიშახ მოთვინებას გიმირჩქინანს (იობ. 14:14, 15). თინა მოთვინებათ იჯინე ონდო ღურელეფიშ გათელებაშ დრო მიშას (იოან. 5:28). ჩქი მიღნა მიზეზეფ, ნამდა მარდულობა გეგმოფხანტათ იეჰოვაშ მოთვინებაშო. დეფიქრით, ბრელ ადამიანს, თინეფ შქას ჩქი ხოლო, ზუსტას იეჰოვაშ მოთვინებაშ ჭყოლოფათ უღჷ დრო მონანიებაშო (2 პეტ. 3:9). იეჰოვას ოკო, მუთ შილებე ბრელ ადამიანქ მიღას მარადიულ ცხოვრებაშ საშვალება. თაშ ნამდა, მორთ მარდულობა გეგმოფხანტათ თიშ მოთვინებაშო. მუჭო შემლებნა თეშ კეთება? ირფელ გაკეთით თინეფიშ ოგორალო, მით „მარადიულ სიცოცხლეშო [რენა] განწყობილ“ (საქ. 13:48). თაშ ქიმიქციებუთ-და, იეჰოვაშ მოთვინება თინეფს ხოლო მუღანს ჯგირობუას.

18. მუშენ ოკო გიმიფრჩქინათ მოთვინება შხვეფწკუმა?

¹⁸ იეჰოვა მოთვინებათ იჯინედას იჸი ქრისტეშ ანთასწანიან მართველობაშ ბოლოშახ, მუჟამსით სრულყოფილეფ იპჸით. თე დროშ დინახალე იეჰოვა კინ მზათ იჸუაფ, ნამდა ქუმაპატუან ცოდვეფ. ათეშენ, ჩქი ხოლო მაღვენუნა თიშ მიზეზ, ნამდა შხვეფიშ პიროვნებას ჯგირ ბგორათ დო მოთვინება გიმიფრჩქინათ თინეფიშ მიმართ. გუვარჩუათ ართ დაშ მაგალით, ნამდგაშ ქომონჯის ნერვულ შეტევეფ უღუდ დო ათეშენ კრებაშ შეხვალამეფშა გილულა მიოტუ. თე და იჩიებ: „თენა მანგარ გინაღალარ რდუ ჩქიმო. ჩქინ ოჯახურ გეგმეფქ დუდშე ბოლოშახ დითირ“. ირფელიშ უმკუჯინუო, თე და მუშ ქომონჯიშ მიმართ მოთვინებას გიმირჩქინანდჷ. თინა იეჰოვას ონდუდ დო ირიათო ელურდჷ მეუღლეს. თიქ იეჰოვაშ მაგალითის მიაჸუნ დო მთელ ყურადღება პრობლემაშა ვარინ მუშ ქომონჯიშ ჯგირ თვისებეფშა გეგნიღ. თე და იჩიებ: „ჩქიმ ქომონჯის მანგარ ჯგირ თვისებეფ უღჷ დო ირნერო ოცად, ჭიე-ჭიეთ მუშ პრობლემას გიორჯგინას“. მანგარ მნიშვნელოვან რე, მოთვინება გიმიფრჩქინათ ჩქინ ოჯახიშ წევრეფ დოვარ თანაქრისტიანეფწკუმა, მით ირნერო ოცადნა, გიორჯგინან სირთულეეფს!

19. მუ ოკო მაფდან გინოჭყვიდილ?

¹⁹ იესო დო ანგელოზეფ გახარებულეფ რდეს, მუჟამსით იეჰოვაქ დედამიწა გაჭყჷ. წერმიდგინით, მუჭო გახარენს თინეფს სრულყოფილ ადამიანეფით ეფშა დედამიწაშ ძირაფა, მით ჸოროფათ ემსახურებნა იეჰოვას. ვარდა მუნერ გახარებულეფ იჸუაფნა იესოშ თანამართველეფ, მუჟამსით ქოძირნა, ნამდა კაცობრიობას ჯგირობუა მოუღ თინეფიშ მართველობაქ (გამოცხ. 4:4, 9—11; 5:9, 10). წერმიდგინით, მუნერ იჸუაფ ცხოვრება, მუჟამსით ტანჯებაშ ჩილამურეფს ხიოლიშ ჩილამურეფ დოთირანს, მუჟამსით ლახალა, ოწუხებელ დო ღურა სადღამუშოთ მისპუ (გამოცხ. 21:4). თე დროშ მოულაშახ გინოჭყვიდილ მაფდან, ნამდა მივაჸუნათ ჩქინ მოჸოროფე, ბრძენ დო მოთვინებას გიმირჩქინანსინ ფერ ზეციერ მუმაშ მაგალითის. თეს გუვაკეთენთ-და, მუდგა პრობლემას ვეშეფხვადათინ, ხიოლს ვა ვოდინუანთ (იაკ. 1:2—4). მუსხით მარდულეფ ოკო ვორდათ იეჰოვაშ დუნაპირებშე, ნამდა „იჸუაფ ღურელეფიშ გათელება“! (საქ. 24:15).