გურშა ევუქექუათ სექსუალურ ძალადობათ დაზარალებურეფს (ნაწილ 4)

1, 2. ა) ნამ მაგალითშე იძირე, ნამდა არძას მოსაჭირნა გურიშ ექექაფა დო შემლებნა შხვეფს ხოლო ევუქექუათ გურშა? ბ) მუშ მსხვერპლ რე ნამთინე ბაღანა?

არძას მოსაჭირნა გურიშ ექექაფა, მუშენდა თაშ ვორეთ გოჭყაფილ. თეს გეძინელ, მიღნა შესაძლებლობა შხვეფს ხოლო ევუქექუათ გურშა. მაგალთო, მუჟამსით ჭიჭე ბაღანა ლაჸაფიშ დროს ქუდანთხუ დო ბირგულს იწყუნუანს, თინა ნგარას იჭყანს დო დიდაშა ვარდა მუმაშა მირულე. მშობლეფს ვეშულებნა წყუნაფილ ადგილ დუსკილიდუან, მარა შეულებნა დამშვიდან თინა. თინეფ ბაღანას ოკითხნა, მუქ მოხვად, ჩილამურეფს ელუწიმინდანა, უფერუანა დო წყუნაფილ ადგილს მალამოს უსვანა ვარდა უკირნა. ჭიჭე ხანშა ბაღანა მიოტენს ნგარას დო შილებე ლაჸაფ ხოლო გაგრძელას. დრო ხანიშ უკულ დაზიანებულ ადგილ ხოლო დუსკიდუ.

² სანარღოთ, მინშა ბაღანეფს უმოს დიდ ზიანს მიორინუანა. მაგალთო, ნამთინე სექსუალურ ძალადობაშ მსხვერპლ რე. ბაღანაქ შილებე სექსუალურ ძალადობაშ მსხვერპლიქ ართშა იჸუას ვარდა თენა წანეფს იგრძელებდას. მუჭოდგა ვა რდას, თენა დიდ ემოციურ ზიანს მიორინუანს ბაღანას. ნამთინე შემთხვევას მოძალადეს კანონით ასაჯენა. მარა რე შემთხვევეფ, მუჟამსით მოძალადე დუც ეუჩილითუანს დასაჯებას. თიმწკუმა ხოლო, მუჟამსით დასაჯენა, ბაღანა, ნამუთ სექსუალურ ძალადობაშ მსხვერპლ რდუ, დიდობას ხოლო გენიცადენს მოხვალამირს.

3. მუჭოთ 2 კორინთელეფიშ 1:3, 4-ს რე მოჩამილ, მუ რე იეჰოვაშ ნება დო ნამ კითხვეფს გუვარჩიენთ?

³ მუჭო შემლებნა მივეხვარათ ქრისტიანს, ნამუთ ბაღანობას სექსუალურ ძალადობაშ მსხვერპლ რდუ დო ამდღარშა ობრძოლ ემოციურ ჭუას? (წეკითხით 2 კორინთელები 1:3, 4). არგამა რე, იეჰოვას ოკო მუშ ძვირფას მსახურეფს ჸოროფათ მექცუან დო გურშა ეუქექუან. მორთ, გუვარჩუათ თეცალ კითხვეფ: 1) მუშენ ოსაჭირნა გურიშ ექექაფა თინეფს, მით ბაღანობას სექსუალურ ძალადობაშ მსხვერპლ რდეს? 2) მის შეულებ გურშა ეუქექუას სექსუალურ ძალადობათ დაზარალებურეფს? დო 3) მუჭო შემლებნა თინეფიშ გურიშ ექექაფა?

მუშენ მოსაჭირნა გურიშ ექექაფა

4, 5. ა) მუშენ რე საჭირო მარჩქილედან, ნამდა ბაღანეფ გენესხვავებნა დიდეფშე? ბ) მუშენ შილებე სექსუალურ ძალადობაშ მსხვერპლ ბაღანას გუჭირდას შხვეფშა მენდებაქ?

⁴ ნამთინეს, მით ბაღანობას სექსუალურ ძალადობაშ მსხვერპლ რდუ, შილებე ამდღა ხოლო ოსაჭირდას გურიშ ექექაფა, თიშ უმკუჯინუო ნამდა, წანეფ რე მიკულირ. მუშენ შილებე თეშ რაგად? თეს უჯგუშო ქინვანჭათინ, პირველ რიგის ოკო მარჩქილედან, ნამდა ბაღანეფ გენესხვავებნა დიდეფშე. ხშირას გლახათ მოქციება ბაღანაწკუმა გვალო შხვანერო მოქმედენს ვინემ დიდეფწკუმა. მორთ, თენა უმოს დეტალურო გუვარჩუათ.

⁵ ბაღანეფს ოსაჭირნა უღდან ხოლოშიან ურთიერთობა დო მიენდან თინეფს, მით რდუნს დო ზრუნენს თინეფშა. თეცალ ურთიერთობა ბაღანეფს დუც თხილერო ოგინაფუანს დო ოგურუანს, მიენდან თინეფს, მით თინეფიშ ჸოროფას გიმირჩქინანს (ფსალმ. 22:9). სანარღოთ, ხშირას სექსუალურ მოძალადეეფ ოჯახიშ წევრეფ ვარდა ოჯახიშ ხოლოშიან მეგობრეფ რენა. ათეშენ სექსუალურ ძალადობაშ მსხვერპლ ბაღანას შილებე წანეფიშ უკულ ხოლო უჭირდას შხვეფიშ მენდება.

6. მუშენ რე სექსუალურ ძალადობა სისასტიკე დო ზიანიშ მუმაღალარ დანაშაულ?

⁶ ბაღანეფს ვეშულებნა დუდ დეცვან სექსუალურ ძალადობაშე, ნამუთ სისასტიკე დო ზიანიშ მუმაღალარ დანაშაულ რე. სექსუალურ ძალადობა ბაღანას დიდ ზიანს მიორინუანს, მუშენდა წანეფიშ უკულ ხოლო ვართ ფიზიკურო, ემოციურო დო ვართ გონებრივო ვეჸუაფ მზათ ქორწინებაშო დო სქესობრივ ცხოვრებაშო. სექსუალურ ძალადობა ბაღანას სექსშენ არასწორ შეხედულებას უვითარენს დო უღირსობაშ გრძნობას ურჩქინანს. თეს გეძინელ, თინეფიშ უნდობლობას ხოლო ურჩქინანს, მით თიწკუმა დაახლოებას ეცადებ.

7. ა) მუშენ შეულებ მოძალადეს ადვილო მიოჩილითუას ბაღანა დო მუჭო შილებე აკეთას თენა? ბ) მუ შედეგეფ მაჸუნუ თეცალ ტყურეფს?

⁷ ბაღანეფს ვეშულებნა სრულას გაანალიზან სიტუაცია დო დუდ ეუჩილითუან საფრთხეს (1 კორ. 13:11). ათეშენ მოძალადეეფს ადვილო შეულებნა მიოჩილითუან ბაღანა. თინეფ ბაღანეფს ოჯერუანა, ნამდა მოხვალამირ მუნეფიშ ბრალ რე დო თეშ გურშენ მითინს ვა უწუან, მუშენდა ვა დუჯერენა დო ვემეხვარებნა. თეს გეძინელ, ურაგადნა, ნამდა ბაღანეფ დო დიდეფ შკას სექსუალურ ურთიერთობა ნორმალურ რე, მუდგათ ჸოროფა გიმიხანტუ. თეცალ ტყურეფ ბაღანაშ აზროვნებაწკუმა გლახათ მოქმედენს დო შილებე წანეფქ დესაჭირას, ქიმეხვადას, ნამდა თე ირფელ სიმართლე ვა რე. მუჟამსით მირდუ, შილებე იფიქრას, ნამდა ვა რე ღირს მითინწკუმა ნორმალურ ურთიერთობა უღდას.

8. მუშენ შემლებნა ვორდათ დარწმუნებულ, ნამდა იეჰოვას შეულებ გურშა ეუქექუას თინეფს, მით იტანჯებ?

⁸ თაშ ნამდა, ვა რე გასაკვირ, სექსუალურ ძალადობათ მერინაფილ ზიანქ დიდ ხანს გეგრძელას. მუ სისასტიკე რე! სექსუალურ ძალადობა ირდიხას რე მოდვალირინ თენა ამტკიცენს, ნამდა ბოლო დღალეფს ფცხოვრენთ, სოდეთ ბრელ „ჸოროფას ვეგმირჩქინანსინ ფერ“ რე დო „უბადოეფ დო თვალთმაქცეფ უფრაშო“ იქციებნა (2 ტიმ. 3:1—5, 13). სატანას უბადო ზრახვეფ უღჷ, ათეშენ გურსაჭუო რე, მუჟამსით ხალხი თიშ მოსაწონო იქციებ. მარა იეჰოვა სატანა დო თიშ მსახურეფშე ბრელით ძალიერ რე. თინა ორწყე ირფელს, მუდგას სატანა ორთჷ. შემლებნა დარწმუნებულ ვორდათ, ნამდა იეჰოვას სრულას ესმებ ჩქინ გაჭირება დო გურშა ემქექუანა. ბედნერეფ ვორეთ, ნამდა ვომსახურუთ ღორონც, მით რე „ირნერ გურიშ ექექაფაშ მუმა, ნამუთ ირნერ გაჭირებას გურშა ემქექუანა, ნამდა ჩქი ხოლო შემალებუან ირნერ გაჭირებას რენან თინეფშა გურიშ ექექაფაქ, თეშ, მუჭოთ ღორონთ ემქექუანა გურშა“ (2 კორ. 1:3, 4). მის გიმირინუანს იეჰოვა ჩქინ გურიშ ეიოქექაფალო?

მის შეულებ გურიშ ექექაფა

9. ფსალმუნიშ 27:10-ის ინოჭარილ დავითიშ სიტყვეფიშ თანახმათ, მუჭო იზრუნენს იეჰოვა თინეფშო, მით ოჯახიშ წევრეფქ მიოტუეს?

⁹ გურიშ ექექაფა ოსაჭირნა თიცალ ბაღანეფს, მით მშობლეფქ მიოტუეს ვარდა ვა თხილუეს ახლობელშე, ნამუქით იძალად ბაღანაშ მიმართ. ფსალმუნმაბირე დავითი დარწმუნებულ რდუ თიშა, ნამდა იეჰოვა ირიათო გურშა ემქექუანდეს (წეკითხით ფსალმუნი 27:10). თის ჯერდჷ, ნამდა იეჰოვა იზრუნენდჷ თინეფშო, მით საჸოროფო ადამიანეფქ მიოტუეს. მუჭო აკეთენს თეს იეჰოვა? თეშო მუშ ართგურ მსახურეფს გიმირინუანს. თანაქრისტიანეფ ჩქინო ოჯახიშ წევრეფცალო რენა. იესოქ ჯიმალეფ, დალეფ დო დიდა დუძახ თინეფს, მიდგაქ იეჰოვაშ თაყვანიშმცემელო გინირთჷ (მათ. 12:48—50).

10. მუჭო ეჭარ ართშა პავლექ მუშ, მუჭოთ უხუცესიშ საქმიანობა?

¹⁰ გუვარჩუათ, მუჭო შილებე კრებაქ ჩქინო ოჯახცალო იჸუას. პავლე მოციქულ ხანდაშ მოჸოროფე დო ართგურ უხუცეს რდუ. თიქ ჯგირ მაგალით დიტუ დო ღორონთიშ შთაგონებათ თქუ, ნამდა შხვეფქ ხოლო მიაჸუნესკო თიშ მაგალითის, მუჭოთ მუ მეჸუნდჷ ქრისტეშ მაგალითის (1 კორ. 11:1). ყურადღება ქიმიაქცით, მუ თქუ ართშა პავლექ მუშ, მუჭოთ უხუცესიშ საქმიანობაშენ: „გიფერუანდით თეშ, მუჭოთ მეძუძურ დიდა გალუაფ დუც მუშ სქუალეფს“ (1 თეს. 2:7). თეშნერო, ართგურ უხუცესეფ ამდღა ხოლო გიმირინუანა ღორონთიშ სიტყვას დო გურშა ეუქექუანა შხვეფს.

11. მუშენ შემლებნა თიშ რაგად, ნამდა ხვალე უხუცესეფს ვავალნა შხვეფიშ გურიშ ექექაფა?

¹¹ ხვალე უხუცესეფს შეულებნანო სექსუალურ ძალადობათ დაზარალებურეფიშ გურიშ ექექაფა? არძას მიღნა თიშ პასუხიშმგებლობა, „გურშა ევუქექუათ ართიანს“ (1 თეს. 4:18). განსაკუთრებულო სულიერო მოწიფულ დალეფს შეულებნა გურშა ელუკინან თი დალეფს, მიდგას ოსაჭირ გურიშ ექექაფა. ართშა იეჰოვაქ მუშ დუდ დიდას შეადარ, ნამუთ გურშა ეუქექუანს მუშ სქუას (ეს. 66:13). ბიბლიას მოჩამილ რე ოსურკათაშ მაგალითეფ, მით გურშა ეუქექუანდეს გაჭირებას რდესინ თინეფს (იობ. 42:11). იეჰოვას ოხიოლ, მუჟამსით ქრისტიან დალეფ გურშა ეუქექუანა თი დალეფს, მით ემოციურო იტანჯებ! მინშა შილებე უხუცესეფქ ქოთხუან მოწიფულ დას, ქეშიალებე-და, ქიმეხვარას თეცალ სიტუაციას რენ ფერ დას.b

მუჭო შემლებნა გურშა ევუქექუათ შხვეფს

12. მუს ოკო ავარიდათ დუდ, მუჟამსით ვოცადუთ შხვეფიშ მოხვარას?

¹² მუჟამსით ვოცადუთ მივეხვარათ თანაქრისტიანს, თე დროს ფრთხილას ოკო ვორდათ, ნამდა ვადუსვათ პირადულ ვარდა თიცალ კითხვეფ, მუდგაშეთ ჩიება ვაკო (1 თეს. 4:11). მუჭო მივეხვარათ თინეფს, მიდგას ოსაჭირ გურიშ ექექაფა დო მოხვარა? მორთ, ბიბლიაშე გუვარჩუათ ხუთ საშვალება, ნამუთ მიმეხვარებნა თეშ კეთებას.

13. მუჭო მეხვარ 1 მეფეეფიშ 19:5—8-ს მოშინაფილ ანგელოზიქ წინასწარმეტყველ ელიას დო მუჭო შემლებნა მივაჸუნათ თიშ მაგალითის?

¹³ პრაქტიკულ მოხვარა. წინასწარმეტყველ ელიას გურ აფუდ გოტახილ დო ღურას ნატრენდჷ, მუჟამსით ატყობუდ თი ხალხის, მიდგას თიშ ჸვილუა ოკოდ. თე დროს იეჰოვაქ თიშა ძალიერ ანგელოზ მიდაშკვჷ, ნამდა გურშა ელუკინკო. ანგელოზიქ თის პრაქტიკულო ქიმეხვარ. თიქ ელიას ჩხე ოჭკუმალ ქიმეჩ დო გემუანო უწუ, ოჭკუმკო (წეკითხით 1 მეფეები 19:5—8). თე მაგალითშე ართ მუდგარენს ბგურაფლენთ: მინშა ჭიჭე ჯგირობუაშ კეთებათ შემლებნა მივეხვარათ შხვეფს. მაგალთო ოჭკუმალიშ კეთებათ, საჩუქარიშ მეჩამათ ვარდა გურიშ ემაკინალ წერილიშ მეჭარუათ ვოძირანთ, ნამდა მიჸორა დო ბზრუნენთ ჩქინ და დო ჯიმალეფშე. მუჟამსით შხვეფწკუმა მუნეფიშ პირად გრძნობეფშე ჩიება მოუხერხულნა, თე დროს შემლებნა ჟიშე მოშინაფილ საშვალებეფით მივეხვარათ.

14. მუშ გურაფა შემლებნა ელიაშ მაგალითშე?

¹⁴ დუდ თხილერო ქაგინაფეთ. ელიაშ მაგალითშე ხოლო ართ მუდგარენიშ გურაფა შემლებნა. იეჰოვაქ სასწაულებრივო მეხვარ თე წინასწარმეტყველს, გეკურთუმუდკო ხორებიშ გვალაშა. შილებე ელიაქ თე შორეულ ადგილს, სოდეთ იეჰოვაქ საუკუნეეფით ადრე შეთანხმება დოდვჷ მუშ ხალხწკუმა, დუდ თხილერო იგინკო, მუშენდა შორს იჸუაფუდ მუშ ნტერეფშე. მუს ბგურაფლენთ თავრეშე? მუჟამსით მოკონა მივეხვარათ სექსუალურ ძალადობაშ მსხვერპლის, პირველ რიგის ოკო ვეცადათ, დუდ თხილერო ქუვოგინაფუათ. მაგალთო, უხუცესეფქ გურგოტახილ დაწკუმა ჩიებაშ დროს ოკო გეთვალისწინან, ნამდა შილებე თის მუშ ჸუდეს უსხუნდას რაგად, სოდეთ დუც უმოს თხილერო იგინანს, ვინემ სამეფო დარბაზის. შხვა შემთხვევას შილებე პირიქით რდას.

15, 16. მუს ნიშნენს რდე ჯგირ მარჩქილე?

¹⁵ რდათ ჯგირ მარჩქილე. ბიბლია თეცალ რჩევას მარზენა: „თითოულ ჩქარ რდას მორჩქილაფას დო წყნარ რაგადის“ (იაკ. 1:19). ქოპკითხათ ჩქინ დუც: ქუვორექო ჯგირ მარჩქილე? შილებე ფიფქრენდათ, ნამდა ჯგირ მორჩქილაფა ნიშნენს, მუთუნ ვა ფთქუათ დო უბრალოთ ვურჩქილათ თი პიროვნებას, მით რაგადანს. მარა სინამდვილეს ჯგირ მორჩქილაფაშა თეშე უმოს მიშურს. მაგალთო, მუჟამსით ელიაქ ქუწუ იეჰოვას, მუჭო გინაფლენდჷ დუც, თიქ შურ დო გურით ქუმურჩქილუ. იეჰოვაქ მიშელ ელიაშ მდგომარეობაშა დო ქიმეხვად, ნამდა თინა შკურნაფილ რდუ, ხვალახეთ გინაფლენდჷ დუც დო მუშ კეთებულ საქმეეფ მუთუნო ვემიორჩქუდ. იეჰოვაქ ჸოროფათ ქიმეხვარ თის გიორჯგინკო თეცალ არასწორ ფიქრეფს. თიქ ქაძირუ, ნამდა შურ დო გურით ურჩქილედ ელიას (1 მეფ. 19:9—11, 15—18).

¹⁶ მუჭო შეილებნა მორჩქილაფაშ დროს თანაქრისტიანს გურშა ეუქექუათ დო ჸოროფა გიმოხანტათ? მინშა ტაქტიან დო ჰამო სიტყვეფით შეილებნა ოძირათ, ნამდა მიშურთ თინეფიშ მდგომარეობაშა. მაგალთო, შეილებნა თეცალ მუდგარენ უწუათ: „მანგარო მოწუხ სქან მდგომარეობა! ნამთინ ბაღანას ოკო ვემექცუან თაშ!“. თეს გეძინელ, ქუდუსვით ართ ვარდა ჟირ კითხვა თიშ გაგებელო, სწორას ქიგეგით დო ვარ თიშ ნარაგად. მაგალთო შეილებნა ქოკითხათ: „ქეშეილებუნო გემინწყე, მუს გულისხმენქ?“ ვარდა „მუჭოთ გებგინ, თენა ნიშნენს . . . სწორას გებგიო?“. თეცალ მოქმედება დარწმუნენს პიროვნებას, ნამდა შურ დო გურით ურჩქილეთ დო ოცადუთ დერწმუნათ, ირფელ სწორას ქიგეგით (1 კორ. 13:4, 7).

17. მუშენ ოკო გიმიფრჩქინათ მოთვინება დო ვეფჩქარათ რაგად?

¹⁷ მორჩქილაფაშ დროს მნიშვნელოვან რე გეთვალისწინათ ბიბლიურ რჩევა დო ვეჩქარათ რაგად. ვემიოტებაფუათ ჩიება რჩევაშ მიოჩამალო ვარდა აზროვნებაშ შეიოსწორებელო. გეგმირჩქინით მოთვინება. მუჟამსით ელია იეჰოვას მუშ გრძნობეფიშ გურშენ ურაგადუდ, გურგოტახილ რდუ დო შეწუხებულო იჩიებუდ. უმოს გვიანო, მუჟამსით იეჰოვაქ თის რწმენა გუმანგარ, თიქ კინ თეცალო გიმოხანტ მუშ გრძნობეფ დო იგივე სიტყვეფ გიმირინუ (1 მეფ. 19:9, 10, 13, 14). მუს ბგურაფლენთ თავრეშე? მინშა გურგოტახილ პიროვნებას ოკო მუსხირენშა გეგმოხანტას მუშ გრძნობეფ. თე დროს მოკონა მივაჸუნათ იეჰოვაშ მაგალითის დო მოთვინებათ ქუმურჩქილუათ თის. თიშ მანგიორო, ვუწუათ, მუჭო მერუას პრობლემას, ქუვოძირათ, ნამდა გურშა მემღუნა თიშ გაჭირება (1 პეტ. 3:8).

18. მუჭო შემლებნა ლოცვათ გურშა ევუქექუათ გაჭირებას რენ ფერ პიროვნებას?

¹⁸ თიწკუმა ართო ქილოცით. ემოციურო განადგურებულ პიროვნებას შილებე ლოცვაქ ხოლო ვარაგადუას. შილებე თის მუშ დუდ ღორონთწკუმა ურთიერთობაშ ღირსო ვემიორჩქუდას. თეცალ პიროვნებას შემლებნა გურშა ევუქექუათ თით, ნამდა ქიბლოცათ თიწკუმა ართო დო სახელით ქიმიფშინუათ. ლოცვაშ დროს შემლებნა თინა ხოლო ქოფთქუათ, მუჭო მიჸორა ჩქი დო შხვა და დო ჯიმალეფს თე პიროვნება დო ქოფთხუათ იეჰოვას, დამშვიდას დო გურშა ელუკინას მუშ საჸოროფო შხურს. თეცალ ლოცვას დასურო შეულებ გურშა ეუქექუას გურგოტახილს (იაკ. 5:16).

19. მუ მიგეხვარებნა, მემზადათ, ნამდა შხვეფს გურშა ელუკინათ?

¹⁹ გეგმირინეთ სიტყვეფ, ნამუთ ოსკილიდუანს დო გურშა ელუკინანს. სოიშახ მუდგაინს თქუანდათ, ჯგირო დეფიქრით. უდუფიქრებუო რაგადებულ სიტყვეფქ, შილებე შხვეფს ზიან ქიმიორინუას, მარა გემუან სიტყვეფ ოსკილიდუანს (იგავ. 12:18). ქილოცით, ნამდა იეჰოვაქ ქიმგეხვარან გურიშ ემაკინალ დო საჭირო სიტყვეფიშ გორუას. რშუდან, ბიბლიას ინოჭარილ იეჰოვაშ სიტყვეფს დიდ ძალა უღჷ (ებრ. 4:12).

20. მუ გლახა ფიქრეფ შილებე უღდან თინეფს, მით ბაღანობას ძალადობაშ მსხვერპლ რდუ დო მუშა ოკო დუვარწმუნათ?

²⁰ ნამთინე და დო ჯიმა, მით ძალადობაშ მსხვერპლ რდუ, შილებე ფიქრენდას, ნამდა მითინს ვა უჸორს დო დუც უღირსო გინაფლენდას. მარა სინამდვილეს თენა თაშ ვა რე. გეგმირინეთ ბიბლიურ მუხლეფ, ნამუთ დარწმუნენს თინეფს, ნამდა იეჰოვაშ თოლს ძვირფას რენა (ქოძირით ჩარჩო „გურშა ეუქექეთ ღორონთიშ სიტყვათ“). ქიგიშინით, მუჭო გამანგარ ანგელოზიქ წინასწარმეტყველ დანიელ, მუჟამსით გლახათ გინაფლენდჷ დუც. იეჰოვას ოკოდ დარწმუნკო, ნამდა მანგარო აფასენდჷ თის (დან. 10:2, 11, 19). თეშნერო იეჰოვაშ თოლს ხოლო ძვირფას რენა თი და დო ჯიმალეფ, მით ძალადობაშ მსხვერპლ რდეს!

21. მუ მელჷ თინეფს, მით ვა ნარღენს მუშ საქციელს დო მუშ კეთება ოკო მაფდან გინოჭყვიდილ თე დროშ მოულაშახ?

²¹ მუჟამსით შხვეფს გურშა ევუქექუანთ, თეთ გუვოშინანთ, ნამდა იეჰოვას უჸორს თინეფ. დღას ოკო ვაგმოჭყორდან, ნამდა იეჰოვა სამართლიან ღორონთ რე. შილებე შხვეფ ვარწყედან, მარა იეჰოვაშ თოლს მუთუნ ვეფულუ დო ორწყე არძას, მით თეცალ ძალადობაშ მსხვერპლი რე. თინა ვა დუშვენს, ნამდა უდუსაჯებუო ქუდოსკიდას მოძალადექ, ნამუთ ვა ნარღენს მუშ საქციელს დო აგრძელენს თაშ მოქციებას (რიცხ. 14:18). მარა თე დროშ მოულაშახ, მორთ, ირნერო ვეცადათ, გეგმიფრჩქინათ თინეფიშ ჸოროფა, მიდგაქ იჸუ ძალადობაშ მსხვერპლიქ. მუ გურიშ ემაკინალ რე თიშ რჩქინა, ნამდა იეჰოვა დასკილიდუანს არძას, მით სატანა დო თიშ ქვეყნიერებაშ მხვერპლიქ იჸუ. მალას თეცალ უბადო საქმეეფ, ნამდგას ჭუა დო ტანჯება მოუღ, მისპუ დო დღას ვეგიფშინანთ (ეს. 65:17).