ვემგოჩილითუან ქვეყნიერებაშ სიბრძნექ

1. მუ ჯგირობუა მოუღ ღორონთიშ სიტყვას?

ჩქი შემლებნა მივერუათ ირნერ სირთულეს, მუშენდა იეჰოვა რე ჩქინ დიდებულ მასწავლებერ (ეს. 30:20, 21). თიშ სიტყვა მარზენა ირფელს, მუთ მოსაჭირნა, ვორდათ „ირფელს რკვიებულ“ დო მზათ „ირნერ ჯგირ საქმეშო“ (2 ტიმ. 3:17). მუჟამსით ბიბლიას მოჩამილ მითითებეფს მეპჸუნთ, უმოს სიბრძნეს ბღებულენთ, ვინემ თინეფ, მით ქვეყნიერებაშ სიბრძნეთ ცხოვრენა (1 კორ. 3:19; ფსალმ. 119:97—100).

2. მუს გუვარჩიენთ თე სტატიას?

² თე სტატიაშე ქობძირუნთ, ნამდა ქვეყნიერებაშ სიბრძნე ხშირას მომწოდენა, დეპკმაყოფილათ ხორციელ სურვილეფ. ათეშენ შილებე გამჭირდან ქივეწინააღმდეგათ თიცალ აზროვნებას დო მოქმედებას, ნამუთ თე ქვეყნიერებას რე გავრცელებურ. ბიბლია ელამჩანა: „კურცხას რდათ: შილებე ნამთინექ მიგოჩილითუან ფილოსოფიათ დო პოტიკ ცთუნებეფით, ნამუთ მეურე ხალხიშ ადათ-წესეფს“ (კოლ. 2:8). თე სტატიას გუვარჩიენთ სატანაშ გავრცელებურ ჟირ ტყურას, ნამუთიქ მთელ ქიანას იჸუ მოდვალირქ. თეწკუმა ართო, თის ხოლო ქობძირუნთ, მუშენ ვა რე გონივრულ ქვეყნიერებაშ სიბრძნეშ მეჸუნა დო მუჭო გენესხვავებ თიშე ღორონთიშ სიბრძნე.

ქვეყნიერებაშ დამოკიდებულება ზნეობრივ საკითხეფშე ითირუ

3, 4. მუჭო ითირ ზნეობრივ საკიხთეფწკუმა ხალხიშ დამოკიდებულებაქ შეერთებულ შტატეფს მა-20 საუკუნეშ დაჭყაფუს?

³ მა-20 საუკუნეშ დაჭყაფუს ამერიკაშ შეერთებულ შტატეფს ხალხიშ დამოკიდებულებაქ ზნეობრივ საკითხეფშე მანგარო დითირ. თეიშახ ბრელ ფიქრენდჷ, ნამდა სექსი ხვალე დაქორწინებულეფ შკას რდუ დაშვებულ დო თე საკითხშე რაგად მეღებულ ვარდჷ საზოგადოებას. მარა დრო ხანიშ უკულ, ხალხიშ დამოკიდებულებაქ დითირ დო ახალ შეხედულებეფქ გევრცელ.

⁴ პირველ მსოფილო ჩხუპიშ უკულ, მა-20 საუკუნეშ 20-იან წანეფს ხალხიშ ქცევეფქ დო სექსიშ გურშენ დამოკიდებულებაქ მანგარო დითირ. ართ მარკვიებელ იჩიებ: „ფილმეფ, თეატრალურ დადგმეფ, ობირეშეფ, წიგნეფ დო რეკლამეფ უმოსო სექსუალურ საკითხეფშე ამახვილენდჷ ყურადღებას“. თე წანეფს სხაპუაშ სტილ ხოლო სექსუალურ აზრეფს ურჩქინანდჷ ხალხის დო მიკოქუნაშ სტილ ნაკლებო მოკრძალებულ რდუ. მუჭოთ ბიბლიას ბოლო დღალეფიშ გურშენ რდუ ნაწინასწარმეტყველებ, ხალხიქ უმოსო სიამოვნებაშ მოჸოროფეთ გინირთჷ (2 ტიმ. 3:4).

5. მუჭო ითირ ხალხიშ დამოკიდებულებაქ ზნეობრივ საკითხეფშე 1960-იან წანეფშე მოჸუნაფილ?

⁵ 1960-იან წანეფს ქორწინებაშ უმშო ართო ცხოვრებაქ, ჰომოსექსუალიზმიქ დო უბრალო მიზეზით ჩათხიებაქ უმოსო გევრცელ. გართობაშ უმენტაშ სახეობეფს სექსუალურ სცენეფს არგამათ ოძირანდეს. მუ შედეგიქ მაჸუნ თე ირფელს? ართ რჩქინელ კოჩ აღნიშნენს, ნამდა მუჟამსით ადამიანეფ ზნეობრივ პრინციპეფს ვეთვალისწინენა თეს გლახა შედეგეფ მოჸუნს: მაგალთო, ოჯახეფიშ აკორღვაფა, ემოციურ სტრესი, პორნოგრაფიაშა დამოკიდებულება. სქესობრივ ურთიერთობათ გინმადვალუნ ფერ ლახალეფიშ, მაგალთო შიდს—იშ გავრცელება, ართ-ართ ნიშან რე თიშ, ნამდა ქვეყნიერებაშ სიბრძნეშ მეჸუნა გონივრულ ვა რე (2 პეტ. 2:19).

6. მუჭო უნწყუნს ხეს ქვეყნიერებაშ დამოკიდებულება სექსიშ გურშენ სატანაშ მიზანს?

⁶ სატანაშ მიზან რდუ, ხალხის არასწორ დამოკიდებულება უღუდკო სექსიშ გურშენ. მუშო ოკო რაგად, თის ოსიამოვნჷ, მუჟამსით ორწყე, ნამდა ადამიანეფ გლახათ გიმირინუანა ღორონთშე მეღებულ ძღვინს დო ვაფასენა ქორწინებას (ეფეს. 2:2). თინეფ, მით უზნეო ცხოვრებაშ წესიშ მეჸუნა, ოძირანა, ნამდა ვაფასენა ღორონთიშ ძღვინს, ჸუნდან ბაღანეფ. თეს გეძინელ, თინეფს შილებე ვემიაჩან მარადიულ ცხოვრებაშ საშვალებაქ (1 კორ. 6:9, 10).

ბიბლიაშ დამოკიდებულება ზნეობაშე

7, 8. მუნერ დამოკიდებულება უღჷ ბიბლიას სქესობრივ ურთიერთობაშენ?

⁷ თი ხალხის, მით ქვეყნიერებაშ სიბრძნეს მეჸუნს, ოძიცეთ ვა უბაღ ბიბლიაშ თვალსაზრის ზნეობრივ საკითხეფშენ დო აცხადენა, ნამდა თე მოთხოვნეფ რეალურ ვა რე. თინეფ შილებე იჩიებდან: „მუშენ მიწინდეს ღორონთ ვარიას სექსუალურ მოთხოვნილებეფიშ დაკმაყოფილებაშო, მუჟამსით მუქ მუჩეს თეშ მოთხოვნილება?“. თე კითხვას თიშ გამართლებერო სვენა, ნამდა კოჩის შეულებ ირფელ გაკეთას მუშ სურვილეფიშ დაკმაყოფილებერო. მარა ბიბლია შხვა მუდგარენს მირაგადნა. ღორონთიშ სიტყვა იჩიებ, ნამდა იეჰოვაქ მუჩეს უნარ ქივეწინააღმდეგათ დო ვევაჸუნათ არასწორ სურვილეფს; თაშ მოქციება ღირსებაშ გრძნობას მიმაღალენა (კოლ. 3:5). თეს გეძინელ, იეჰოვაქ მუჩეს ქორწინებაშ ძღვინ, მუდგაშ საშვალებათ შემლებნა მართებულო დეპკმაყოფილათ სექსუალურ მოთხოვნილებეფ (1 კორ. 7:8, 9). თეშნერო ჩილ დო ქომონჯის შეულებნა ისიამოვნან სქესობრივ ურთიერთობათ დანარღებაშ უმშო, მუთ ხშირას უზნეობაშ შედეგ რე.

⁸ ქვეყნიერებაშ სიბრძნეშ გინაწონს, ღორონთიშ სიტყვა მოხვარნა სწორ დამოკიდებულება მიღდან სექსიშ გურშენ. ბიბლიაშე ბგებულენთ, ნამდა სქესობრივ ურთიერთობას შეულებ ასიამოვნას ადამიან (იგავ. 5:18, 19). მარა თეწკუმა ართო ბიბლიას თეცალ სიტყვეფ ხოლო ინოჭარ: „არძას გიჩქუდან თქვან სხეულიშ გიმორნაფა სიწმინდეთ დო პატით დო ვართ ხოლო დუდუშუკებელ ვნებათ თი კათაცალო, მით ვეჩინენა ღორონც“ (1 თეს. 4:4, 5).

9. ა) მუჭო მეხვარ იეჰოვაშ ხალხის ღორონთიშ აღმატებულ სიბრძნექ მა-20 საუკუნეშ ადრეიან წანეფს? ბ) მუ გონივრულ რჩევა რე ინოჭარილ 1 იოანეშ 2:15, 16-ის? გ) მუჭოთ რომაელეფიშ 1:24—27-ის რე ინოჭარილ მუნერ უზნეო მოქმედებფს ოკო ევუჩილითუათ დუდ?

⁹ მა-20 საუკუნეშ ადრეიან წანეფიშ განმავლობას, ზნეობრივ საკითხეფშე იეჰოვაშ ხალხიშ დამოკიდებულებაშა ვემოქმედ თინეფიშ გავლენაქ, მით „ირნერო გარყვნილეფ“ რდეს (ეფეს. 4:19). თეშ გინაწონს თინეფ ირნერო ოცადდეს მიაჸუნესკო იეჰოვაშ ნორმეფს. 1926 წანაშ მესიშ „გინაჯინალ კოშკის“ თეცალ სიტყვეფ ჭარუდ: „მუჭოთ კოჩ, თეშ ოსურ ხოლო წმინდა ოკო რდას აზროვნებათ დო საქმეეფით, განსაკუთრებულო საპირისპირო სქესწკუმა“. თიშ უმკუჯინუო, მუნერ სიტუაციას უხვადუდეს ცხოვრება, იეჰოვაშ ხალხ მეჸუნდჷ ღორონთიშ სიტყვას მოჩამილ აღმატებულ სიბრძნეს (წეკითხით 1 იოანე 2:15, 16). მარდულეფ ვორეთ, ნამდა მიღნა ღორონთიშ სიტყვა დო დროულ სულიერ საზრდო, ნამუთ მოხვარნა ქივეწინააღმდეგათ ქვეყნიერებაშ სიბრძნეს ზნეობრივ საკითხეფწკუმა დაკავშირებითb (წეკითხით რომაელები 1:24—27).

ხალხ დუდიშ მოჸოროფეთ გინმირთუ

10, 11. მუ გაფრთხილება რდუ მოჩამილ ბიბლიას ბოლო დღალეფს მახორუ ხალხიშ გურშენ?

¹⁰ ბიბლიაქ გუმაფრთხილეს, ნამდა ბოლო დღალეფს “ხალხ იჸუაფუდ დუდიშ მოჸოროფე“ (2 ტიმ. 3:1, 2). ათეშენ ვამკვენა, ნამდა ქვეყნიერებაშ პროპაგანდა ოცად ხალხის ეგოისტურ აზრეფ გურჩქინას. ართ ენციკლოპედია იჩიებ, ნამდა 1970-იან წანეფს უმოსო თიცალ წიგნეფ იბეშტუდ, ნამუთ ხალხის არზენდჷ რჩევეფს, მუჭო მიოჭირნუესკო წარმატებეფს ცხოვრებას. ნამთინე წიგნი ელუჩანდჷ ხალხის, მუნეფიშ დუდ თეშ მიღესკო, მუნერით სინამდვილეს რდეს დო იამაყესკო თეთ. მაგალთო, ართ წიგნის ჭარუდ: „ქიჸოროფე სქან დუდ, მუშენდა სი არძაშ უმოს სკვამ დო ღირსეულ პიროვნება რექ, მიდგას უარსებებ“. თეს გეძინელ, თე წიგნი ხუც უკინენდჷ თი აზრის, ნამდა პიროვნებას მუშით შეულებ გინოჭყვიდას, მუჭო მიქცუას დო აკეთას თინა, მუთ სწორო დო მუშო მოხუჯურო მიორჩქ.

¹¹ ქუმოირჩქილუაფნანო თქვა ხოლო თეცალ აზრი? სატანაქ ხოლო ზუსტას თეშა ახნარ ევა, მუჟამსით უწუ, ნამდა შეიალებედ ღორონთცალო ჯგირ დო ფურიშ გიშაგორუა (დაბ. 3:5). ამდღა ხოლო, ხალხიშ უმენტაშის დიდ წარმოდგენა უღჷ მუნეფიშ დუდშე დო ფიქრენა, ნამდა მითინს, ვართ ღორონც უღჷ თიშ უფლება უკარნახან, მუ რე ჯგირ დო ფურ. მაგალთო, თეცალ აზროვნება განსაკუთრებულო იძირე ქორწინებაშ მიმართ ხალხიშ დამოკიდებულებაშე.

12. მუნერ დამოკიდებულება უღჷ ქვეყნიერებას ქორწინებაშენ?

¹² ბიბლია ჩილ დო ქომონჯის არზენს მითითებას, პატი ცანჷ ართიანს დო ქორწინებაშ აღთქმაშ ართგურეფქ ქუდოსკიდან. ბიბლიას ჭარჷ: „მიოტენს კოჩ მუმას დო დიდას, ქუმკაჭაბუ ოსურს დო ართ ხორცი იჸუაფნა“ (დაბ. 2:24). ბიბლიას ინოჭარილ თე სიტყვეფ წყვილეფს მოუწოდენს, ხოლოშიან ურთიერთობა უღდან ართიანწკუმა. თეშ გინაწონს თინეფ, მით ქვეყნიერებაშ სიბრძნეს მეჸუნა, განსხვავებულ დამოკიდებულება უღნა თე საკითხშენ დო ფიქრენა, ნამდა მეუღლექ ხვალე მუშ პირად მოთხოვნილებეფშე ოკო იზრუნას. ართ წიგნის, ნამუთ ჩილ დო ქომონჯიშ ჩათხიებას ოხუ, ინოჭარ, ნამდა ნამთინე ქიანას საქორწინო აღთქმას, ნამუსით ჩილ დო ქომონჯ ხალხიშ წოხოლე დვანს, ფრაზა, „ართო იპჸით სიცოცხლეშ ბოლოშა“, დოთირუეს ფრაზათ, „ართო იპჸით, სოიშახ ართიან მიჸორა“. თეცალ დამოკიდებულებაშ გურშენ ბრელ ოჯახ აკმოცენს, მუდგას ემოციურ გურჭუა მოჸუნს. თავრეშე ჯგირო იძირე, ნამდა ქვეყნიერებაშ დამოკიდებულება ქორწინებაშენ გონივრულ ვა რე.

13. მუშენ ჯოგჷ იეჰოვას ამაყ კათა?

¹³ ბიბლიას ინოჭარ: „ამაყ გურიშ პიროვნება ჯოგჷ იეჰოვას“ (იგავ. 16:5). მუშენ ჯოგჷ იეჰოვას ამაყ ხალხი? ართ-ართ მიზეზ თინა რე, ნამდა თინეფ, მით მუნეფიშ დუდიშ ზედმეტ ჸოროფას ივითარენა დო შხვეფს ხოლო უბიძგენა თეშა, სატანაცალ ამაყეფ გინმირთუნა. წერმიდგინით, სატანა ფიქრენდჷ, ნამდა იესო, ნამუთ ირფელიშ გოჭყაფას ღორონც ოხვარუდ, მუს ქოცენდჷ თაყვანს (მათ. 4:8, 9; კოლ. 1:15, 16). თინეფ, მიდგას მუნეფიშ დუდშე დიდ წარმოდგენა უღჷ დო ქვეყნიერებაშ სიბრძნეს მეჸუნს, უგუნურეფ რენა ღორონთიშ თოლს.

ბიბლიაშ თვალსაზრის დუდიშ ჸოროფაშე

14. მუჭო მოხვარნა რომაელეფიშ 12:3, გაწონასწორებულ დამოკიდებულება მიღუდან ჩქინ დუდშე?

¹⁴ ბიბლია მოხვარნა, გაწონასწორებულ დამოკიდებულება მიღუდან ჩქინ დუდშე. თინა მირაგადნა, ნამდა თითოულს ზომიერო მიჸორდან ჩქინ დუდ. იესოქ თქუ: „მოყვას სქან დუდცალო გიჸორდას“, მუთ ნიშნენს, ნამდა ზომიერო მივაქცუათ ყურადღება ჩქინ საჭიროებეფს (მათ. 19:19). მარა ბიბლია თის ვა მოგურუანა, ნამდა ჩქინ დუდ შხვეფშე უმოს მნიშვნელოვანო მიფრჩქინათ. პირიქით, თინა მირაგადნა: „მუთუნ ვაკეთათ ართიანიშ ჯინით დო ეგოისტობათ, თანდაბლურო მირჩქინით შხვეფ თქვან დუდშე აღმატებულო“ (ფილ. 2:3; წეკითხით რომაელები 12:3).

15. მუშენ შილებე თიშ რაგად, ნამდა დუდიშ ჸოროფაწკუმა დაკავშირებით ბიბლიას მოჩამილ რჩევა პრაქტიკულ რე?

¹⁵ ამდღა თი კათაშ უმენტაშ, მიდგას დუდ გურაფილო მეუღ, ბიბლიურ რჩევეფს, ნამუთ დუდიშ ჸოროფას ოხუ, მუთუნო ვემირჩქინანს. თინეფიშ აზრით, შხვეფს სქანდე უმოს მნიშვნელოვანო ქიმირჩქინანქ-და, დუგაჩაგრენა დო გეგმოირინუანა. მარა სინამდვილეს, მუ შედეგეფ მოჸუნს თე თვისებაშ გიმორჩქინას, ნამუთ სატანაშ ქვეყნიერებაშე მოურს? თქვან აზრით, ქორენო დუდიშ მოჸოროფე კათა ბედნერ? ქოუღნანო თინეფს ბედნერ ოჯახეფ? ქოჸუნანო ნამდვილ მეგობრეფ? ქოუღნანო ხოლოშიან ურთიერთობა ღორონთწკუმა? მუს მოჸუნს უჯგუშ შედეგეფ, ქვეყნიერებაშ სიბრძნეშ მეჸუნას დო ვარ ღორონთიშ სიბრძნეს, ნამუთ ბიბლიას ინოჭარ?

16, 17. მუშ მარდულეფ შემლებნა ვორდათ დო მუშენ?

¹⁶ თინეფ, მით ქვეყნირებაშ თოლს ბრძენო იძირენან ფერ კათაშ რჩევეფს მეჸუნა, ქოგნა შარას ეჩილათირ ტურისტეფს, ნამუთ ართიანს შარას ოკითხნა. იესოქ პირველ საუკუნეს მახორუ „ბრძენ“ ხალხიშ გურშენ თეცალ სიტყვეფ თქუ: „ჸვერე მაჸალეფ რენა. ჸვერეს ჸვერე ქეწოჸუნს-და, ჟირხოლო ნთხორილს ქინანთხუ“ (მათ. 15:14). ნამდვილო, ქვეყნიერებაშ სიბრძნე, უგუნურება რე ღორონთიშ თოლს.

¹⁷ ბიბლიას ინოჭარილ გონივრულ რჩევეფ ოძირანს, ნამდა „მარგებელ რე ოგურაფალო, შეგონებაშ მიოჩამალო, გიშასწორებელო დო ორდალო სიმართლეს“ (2 ტიმ. 3:16). მარდულეფ ვორეთ, ნამდა იეჰოვა, მუშ ორგანიზაციაშ საშვალებათ ფთხილანა, ქვეყნიერებაშ სიბრძნეშე! (ეფეს. 4:14). სულიერ საზრდო, ნამუსით თინა მარზენა, მოხვარნა, გინოჭყვიდილ მაფდან, მივაჸუნათ ბიბლიას ინოჭარილ მითითებეფს. ბედნერეფ ვორეთ, ნამდა იეჰოვა, მუშ სიტყვაშ საშვალებათ ბრძენო გინმოშკვანა დო მარზენა სანდო მითითებეფს!