ჸოროფა დო სამართლიანობა უბადობაშ წინააღმდეგ (ნაწილ 3)

1—3. ა) ფსალმუნიშ 5:4—6-იშ თანახმათ, მუნერ დამოკიდებულება უღჷ იეჰოვას უბადობაშენ? ბ) მუშენ შემლებნა ფთქუათ, ნამდა ბაღანაშ მიმართ სექსუალურ ძალადობა ოწინააღმდეგ „ქრისტეშ კანონს“?

იეჰოვა ღორონც ჯოგჷ ირნერ უბადობა (წეკითხით ფსალმუნი 5:4—6). თის განსაკუთრებულო ჯოგჷ სექსუალურ ძალადობა ბაღანაშ მიმართ, მუთ საშინელ დანაშაულ რე! მუჭოთ იეჰოვაშ მოწმეეფს, ჩქი ხოლო ბჯოგნა სექსუალურ ძალადობა დო მუთუნნერო ვა ვამართლენთ თეცალ საქციელს (რომ. 12:9; ებრ. 12:15, 16).

² ბაღანაშ მიმართ სექსუალურ ძალადობაშ ირნერ ფორმა ოწინააღმდეგ „ქრისტეშ კანონს“ (გალ. 6:2). მუშენ შემლებნა თეშ რაგად? წოხოლენ სტატიაშე ქიგებგით, ნამდა ქრისტეშ კანონი, შხვა სიტყვეფით ქოფთქუათინ, ირფელ მუდგას ქრისტე სიტყვათ დო საქმეთ ოგურუანდჷ, ჸოროფაშა რე გერსხილ დო სამართლიანობას უნწყუნს ხეს. თე კანონიშ თანახმათ, ნამდვილ ქრისტიანეფ თეშ ოქცუნა ბაღანეფს, ნამდა თინეფქ ჸოროფა ქიგინან დო თხილერ რდან. ბაღანაშ მიმართ სექსუალურ ძალადობა ეგოისტურ დო უბადო მოქციება რე, მუთ ბაღანას ოფიქრებაფუანს, ნამდა თხილერ ვა რე დო შხვეფს ვა უჸორს.

³ სანარღოთ, თე პრობლემა მთელ მსოფლიოს რე მოდვალირ დო თიქ შილებე ჭეშმარიტ ქრისტიანეფწკუმა ხოლო ქიმოქმედას. მუშენ შემლებნა თეშ რაგად? ბიბლიას ჭარჷ, ნამდა „უბადოეფ დო თვალთმაქცეფ“ ირდიხას რენა დო თეცალეფქ შილებე ორგანიზაციაშა მოულას ხოლო ეცადან (2 ტიმ. 3:13). თეს გეძინელ, კრებას ნამთინექ, მით იეჰოვაშ მსახურო აცხადენდჷ დუც, არაბუნებრივ სექსუალურ სურვილეფს გეიაჸუნ დო ბაღანაშ მიმართ გარყვნილ ქმედება ჩედინ. მორთ, გუვარჩუათ, მუშენ ითვალუ ბაღანეფიშ სექსუალურ ძალადობა საშინელ დანაშაულო. თეშ უკულ ქიგებგენთ, მუჭო იქციებნა უხუცესეფ, მუჟამსით საქმე ოხუ სერიოზულ დანაშაულს, მაგალთო ბაღანაშ მიმართ სექსუალურ ძალადობას დო მუჭო შეულებნა მშობლეფს დოთხილუან მუნეფიშ ბაღანეფ.b

საშინელ დანაშაულ

4, 5. მუშენ ითვალუ სექსუალურ ძალადობა მსხვერპლიშ წინააღმდეგ დაშებათ?

⁴ ბაღანაშ მიმართ სექსუალურ ძალადობას გლახა შედეგეფ მოჸუნს, ნამუთ დიდ ხანს იგრძელებ. თეცალ ქმედება ემოციურო ანადგურენს მუჭოთ ბაღანას, თეშ თინეფიშ ოჯახიშ წევრეფ დო თანაქრისტიანეფს. თაშ ნამდა, ბაღანაშ მიმართ სექსუალურ ძალადობა საშინელ ცოდვა რე.

⁵ მსხვერპლიშ წინააღმდეგ დაშება. თენა რე დანაშაულ, ნამდგას შხვეფშა ტანჯება დო დიდ გურჭუა მოუღ. თეშ უკულიან სტატიაშე ქობძირუნთ, ნამდა სექსუალურ მოძალადე დიდ ზიანს მიორინუანს ბაღანას. თე პიროვნება გლახათ გიმირინუანს ბაღანაშ ნდობას დო ოფიქრებაფუანს, ნამდა ვა რე თხილერ. ჩქი ოკო დოფთხილუათ ბაღანეფ თეცალ უბადობაშე; თეს გეძინელ, თეცალ ქმედებაშ მსხვერპლისc გურიშ ელაკინა დო მოხვარა ოსაჭირ (1 თეს. 5:14).

6, 7. მუ გაგებათ ითვალუ სექსუალურ ძალადობა კრებაშ დო ხელისუფლებაშ წინააღმდეგ დაშებათ?

⁶ კრებაშ წინააღმდეგ დაშება. ქრისტიან, ნამუქით ბაღანაშ მიმართ სექსუალურო იძალად, მთელ კრებას გილულუანს რეპუტაციას (მათ. 5:16; 1 პეტ. 2:12). უსამართლობა იჸუაფუდ თიშ რაგად, ნამდა ქრისტიანულ კრება ამართლენს თეცალ საქციელს, მუშენდა ღორონთიშ მილიონობით ართგურ მსახურ დუც ვა ზოგენს იეჰოვაშ ოდიდებელო (იუდ. 3). ღორონთიშ ორგანიზაციას ვა დოსკიდუ თიცალ პიროვნება, მით ვა ნარღენს დაშებულს, აგრძელენს თეცალ უბადობაშ კეთებას დო სახელს უტახუნს კრებას.

⁷ ხელისუფლებაშ წინააღმდეგ დაშება. ქრისტიანეფქ ოკო „დემორჩილან უმაღლეს ხელისუფლებას“ (რომ. 13:1). ხელისუფლებაშ მორჩილებას გიმიფრჩქინანთ, მუჟამსით პატის ფცენთ დო იფცვენთ თინეფიშ კანონეფს. მუჟამსით კრებას მიდგაინ არღვიენს სისხლიშ სამართალიშ კანონს, მაგალთო სექსუალურო ძალადენს ბაღანაშ მიმართ, თეთ ხელისუფლებაშ წინააღმდეგ აშენს (შეადარით საქმეები 25:8). მუშო ოკო რაგად, უხუცესეფს ვა უღნა უფლებამოსილება ხელისუფლებაშ მანგიორო აღასრულან კანონეფ, მარა ხეს ვეგნუფორუანა სექსუალურ მოძალადეს დო დუც ვეიოჩილითაფუანა კანონით გათვალისწინებურ სასჯელშე (რომ. 13:4). თაშ ნამდა, დუმაშებელ მუშ საქციელიშ შედეგეფს მიღენს (გალ. 6:7).

8. მუნერ დამოკიდებულება უღჷ იეჰოვას, მუჟამსით ართ პიროვნება მაჟიაშ წინააღმდეგ აშენს?

⁸ ღორონთიშ წინააღმდეგ დაშება (ფსალმ. 51:4). მუჟამსით ართ პიროვნება მაჟიაშ წინააღმდეგ აშენს, თინა პირველ რიგის იეჰოვაშ წინააღმდეგ ცოდენს. დეფიფქრათ კანონშე, ნამუთ იეჰოვაქ ისრაელეფს მეჩჷ. კანონს ჭარუდ, ნამდა კოჩ, ნამუთ მუშ მოყვასის გოხირუნდჷ ვარდა ღორებულო მიდუღანდჷ მუდგაინს, „იეჰოვას ღალატენდჷ“ (ლევ. 6:2—4). თაშ ნამდა, მუჟამსით კრებას მიდგაინ ძალადენს ბაღანაშ მიმართ, თეთ ბაღანას უდინუანს თიშ განცდას, ნამდა თხილერ რე, მუთ იეჰოვაშ ღალატ რე. თეცალ პიროვნება მანგარო უტახუნს სახელს იეჰოვას. თაშ ნამდა, ბაღანაშ მიმართ სექსუალურ ძალადობა ღორონთიშ წინააღმდეგ მძიმე ცოდვა რე, ნამუთ ოკო ბჯოგდან.

9. მუჭოთ ადრენ, თეშ ამდღა ხოლო, მუ მნიშვნელოვან ინფორმაციას მარზენა იეჰოვაშ ორგანიზაცია დო მუშენ?

⁹ წანეფიშ დინახალე, იეჰოვაშ ორგანიზაციაქ ბიბლიაშა გერსხილ ბრელ ინფორმაცია მუჩეს, ნამუთ ბაღანაშ მიმართ სექსუალურ ძალადობას ოხუ. მაგალთო, ჟურნალეფს „გინაჯინალ კოშკი“ დო „გეგშაკურცხით!“ გარჩიებულ რდუ, მუჭო შეულებ სექსუალურ ძალადობაშ მსხვერპლის მერუას ემოციურ სტრესის. თეს გეძინელ, მოჩამილ რდუ, მუჭო მეხვარან დო გურშა ელუკინან შხვეფქ დაზარალებურეფს, დო მუჭო შეულებნა მშობლეფს დოთხილუან მუნეფიშ ბაღანეფი. უხუცესეფს ორგანიზაციაშე მეღებულ აფნა ბიბლიაშა გერსხილ კონკრეტულ მითითებეფ, მუჭო მიქცუან, მუჟამსით საქმე ოხუ ბაღანაშ მიმართ სექსუალურ ძალადობას. ორგანიზაციას პერიოდულო იახალებ თი მითითებეფ, ნამდგათ ოკო იხემძღვანელან უხუცესეფქ თეცალ დროს. თეშ მიზან რე, უხუცესეფქ დერწმუნან, ნამდა თეცალ პრობლემაშ გინოჭყვიდუაშ დროს ქრისტეშ კანონით ხემძღვანელენა.

მუჟამსით კრებაშ წევრი სერიოზულო აშენს

10—12. ა) მუ ოკო შუდან უხუცესეფს დო მუ რე თინეფიშ მთავარ მიზან, მუჟამსით საქმე სერიოზულ დაშებას ოხუ? ბ) იაკობიშ 5:14, 15-იშ თანახმათ, მუშ კეთებას ოცადნა უხუცესეფ?

¹⁰ მუჟამსით უხუცესეფ გინოჭყვიდნა თიცალ საკითხეფს, ნამუთ სერიოზულ დაშებას ოხუ, თინეფს შუდან ოკო, ნამდა ქრისტეშ კანონით მეთხიებნა, ღორონთიშ ჭყიშის ჸოროფათ დო სამართლიანო მექცუან. შედეგო, მუსხირენ საკითხის ითვალისწინენა, მუჟამსით გებულენა, ნამდა მიდგარენქ სერიოზულ ცოდვა ჩედინ. უხუცესეფიშ მთავარ მიზან, პირველ რიგის, იეჰოვაშ განდიდება დო თიშ რეპუტაციაშ თხილუა რე (ლევ. 22:31, 32; მათ. 6:9). თინეფ კრებაშ წევრეფიშ სულიერობაშო ხოლო ზრუნენა დო თეწკუმა ართო, გურშა ელუკინანა დო ელურენა თინეფს, მით სერიოზულ ცოდვაშ მსხვერპლ რენა.

¹¹ თეს გეძინელ, დუმაშებელ კრებას ქაკუთვნ-და, უხუცესეფ ოცადნა ქიგეგან, ქონარღენს დო ვარ თინა, ნამდა ქიმეხვარან, დირთინუას იეჰოვაწკუმა ურთიერთობა (წეკითხით იაკობი 5:14, 15). პიროვნება, ნამუთ არასწორ სურვილეფს ეჸუნს დო სერიოზულო აშენს, სულიერო დალახებურ რე. თენა ნიშნენს, ნამდა თის იეჰოვაწკუმა ჯგირ ურთიერთობა ვა უღჷ.d უხუცესეფ შემლებნა შევადარათ ექიმეფს, მუშენდა ოცადნა გეგშაჯგირან სულიერო დალახებურ. მთელ გურით ქონარღენს-და, ბიბლიაშა გერსხილ რჩევეფ მეხვარებ დუმაშებელს, დირთინუას იეჰოვაწკუმა ურთიერთობა (საქ. 3:19; 2 კორ. 2:5—10).

¹² არგამა რე, უხუცესეფს სერიოზულ პასუხიშმგებლობა ოკისრნა. თინეფ ჸოროფათ ზრუნენა კრებაშ წევრეფშე, ნამუთ ღორონთიქ მიანდჷ თინეფს (1 პეტ. 5:1—3). უხუცესეფს ოკონა და დო ჯიმალეფქ კრებას თხილერო იგინან დუდ. ათეშენ, თინეფ ხეთეშე იჭყანა მოქმედებას, მუჟამსით სერიოზულ დაშებაშ გურშენ გებულენა, მაგალთო ბაღანაშ მიმართ სექსუალურ ძალადობაშენ. მორთ, დეფიფქრათ მა-13, მა-15 დო მა-17 აბზაცეფიშ დაჭყაფუს მოჩამილ კითხვეფშე.

13, 14. დემორჩილანიო ოკო უხუცესეფქ ფაქტიშ გაცხადებაწკუმა დაკავშირებულ კანონს, მუჟამსით გებულენა ბაღანაშ მიმართ სავარაუდო სექსუალურ ძალადობაშ ფაქტიშ გურშენ? გენწყით.

¹³ დემორჩილანიო ოკო უხუცესეფქ ფაქტიშ გაცხადებაწკუმა დაკავშირებულ კანონს, მუჟამსით გებულენა ბაღანაშ მიმართ სავარაუდო სექსუალურ ძალადობაშ ფაქტიშ გურშენ? მუშო ოკო რაგად, ქო. თი ქიანეფს, სოდეთ თეცალ კანონ არსებენს, უხუცესეფ ოცადნა დემორჩილან თის (რომ. 13:1). თეცალ კანონეფ ვაწინააღმდეგ ღორონთიშ კანონს (საქ. 5:28, 29). თაშ ნამდა, მუჟამსით ქიგეგენა თეცალ შემთხვევაშენ, უხუცესეფქ ხეთეშე ოკო დეკავშირან ფილიალს, ნამდა მიღან უმოს კონკრეტულ მითითებეფ თე კანონიშ გათვალისწინებერო.

¹⁴ უხუცესეფქ მსხვერპლის დო თიშ მშობლეფს ვარდა შხვეფს, მიდგას უღჷ ინფორმაცია ბაღანაშ მიმართ სავარაუდო სექსუალურ ძალადობაშენ, ოკო ქუგაგებაფუან, ნამდა უფლება უღნა ქაცნობან სამართალდამცავ ორგანოეფს თე ფაქტიშ გურშენ. მარა მუშ რაგად შილებე, მუჟამსით კრებას მიდგაინს ბრალს გედვანა თეცალ საქციელს დო თე ამბექ ბრელდიხას გისიმ? ოკო იფიქრასო ქრისტიანქ, ნამუქით თე ფაქტიშ გურშენ შესაბამის ორგანოეფს გაგებაფუ, ნამდა თეთ ღორონთიშ სახელს რეპუტაცია გილულუ? მუშო ოკო რაგად, ვარ! ღორონთიშ სახელს თი პიროვნება გილულუანს რეპუტაციას, მით ბაღანაშ მიმართ ძალადენს.

15, 16. ა) მუჭოთ 1 ტიმოთეშ 5:19-ს რე მოჩამილ, მუშენ რე საჭირო ჟირ მოწმე, სოიშახ ქეშედირთუ სამართლებრივ კომიტეტი? ბ) მუ ოკო აკეთან უხუცესეფქ, მუჟამსით კრებას მიდგაინს აბრალუაფნა ბაღანაშ მიმართ სექსუალურ ძალადობას?

¹⁵ მუშენ რე საჭირო არძაშ უნაკლებაშ ჟირ მოწმე, ნამდა ქეშედირთას სამართლებრივ კომიტეტიქ? მუშენდა თაშ მოქციება ბიბლიაშ სამართლიან ნორმეფშა რე გერსხილ. მუჟამსით პიროვნება ვაღიარენს დაშებულს, თე დროს საჭირო რე ჟირ მოწმე, ნამდა ქეშედირთას სამართლებრივ კომიტეტიქ (კან. 19:15; მათ. 18:16; წეკითხით 1 ტიმოთე 5:19). ნიშნენსო თენა, ნამდა საჭირო რე ჟირ მოწმე თიმწკუმა ხოლო, მუჟამსით მიდგაინ სამართალდამცავ ორგანოეფს ოგებაფუანს ბაღანაშ მიმართ სავარაუდო სექსუალურ ძალადობაშ გურშენ? ვარ! მუჟამსით უხუცესეფ ვარდა შხვეფ სავარაუდო დანაშაულიშ გურშენ პოლიციას ოგებაფუანა, თე დროს ჟირ მოწმე საჭირო ვა რე.

¹⁶ მუჟამსით უხუცესეფ გებულენა, ნამდა კრებას მიდგაინს აბრალუაფნა ბაღანაშ მიმართ სექსუალურ ძალადობას, თინეფ მეჸუნა ფაქტიშ გაცხადებაწკუმა დაკავშირებულ ხელისუფლებაშ კანონს, თეშ უკულ ბიბლიას მოჩამილ რჩევეფიშ საფუძველშა იჭყანა თიშ გიმორკვიებას, ქეშედირთას დო ვარ სამართლებრივ კომიტეტიქ. თე პიროვნება დაშებულს ვაღიარენს-და, უხუცესეფ შხვა მოწმეეფს ქუმურჩქილუანა. სამართლებრივ კომიტეტ ქეშედირთუ, მუჟამსით არძაშ უნაკლებაშ, ჟირ პიროვნება ადასტურენს თიშ დანაშაულს — ართ, მით ბრალს გედვანს დო მაჟია, მიდგას შეულებ დადასტურას თე ბრალდება ვარდა შხვა დროს თე პიროვნებაშე შხვა ბაღანაშ მიმართ სექსუალურ ძალადობაშ ფაქტეფ.e მაჟია მოწმე ვა არსებენს-და, თენა შილებე ვა ნიშნენს თის, ნამდა თინა, მით ბრალს გედვანს, ტყურას ეკაწამენს. თი შემთხვევას ხოლო, მუჟამსით ვა არსებენს ჟირ მოწმე, მით ადასტურენს, ნამდა პიროვნებაქ იძალად ბაღანაშ მიმართ, უხუცესეფს არჩქილენა, ნამდა შილებე სერიოზულ ცოდვას უღუდ ადგილ, მუდგაქ დიდ გურჭუა მიორინუ შხვეფს. უხუცესეფქ გაგრძელან ოკო დაზარალებურეფიშ გურიშ ელაკინა დო ელარნა. თეწკუმა ართო, უხუცესეფ კურცხას რენა დო ოკვირნა სავარაუდო მოძალადეს, ნამდა კრება დოთხილუან ზიანშე (საქ. 20:28).

17, 18. გენწყით, მუ ოვალ სამართლებრივ კომიტეტის.

¹⁷ მუ ოვალ სამართლებრივ კომიტეტის? სიტყვა „სამართლებრივ“ ვა ნიშნენს, ნამდა უხუცესეფ ასამართლენა დო განაჩენს გიშუღანა, დასაჯან დო ვარ სამართალდამცავეფქ პიროვნება კანონიშ დარღვევაშ გურშენ. უხუცესეფ ვემშულა თეცალ საკითხეფშა, მუშენდა უჩქნა, თენა სამართალდამცავ ორგანოეფიშ საქმე რე (რომ. 13:2—4; ტიტ. 3:1). უხუცესეფიშ მოვალეობა რე, გეგმირკუან საკითხ დო გეგნოჭყვიდან, გერიცხას დო ვარ თეცალ პიროვნებაქ.

¹⁸ სამართლებრივ კომიტეტის მსახურენან თი უხუცესეფ ხვალე რელიგიურ მხარეთ გენიხილენა თე საკითხის. წმინდა წერილეფიშ საფუძველშა, თინეფს შეულებნა ქოძირან, ნარღენს დო ვარ თინა მუშ საქციელს; ვა ნარღენს-და, გერიცხებ დო თეშ გურშენ კრებას განცხადებას გაკეთენა (1 კორ. 5:11—13). ქონარღენს-და, შილებე ვეგერიცხას კრებაშე. მარა უხუცესეფქ ოკო ქუგაგებაფუან, ნამდა მთელ მუშ ცხოვრებას შილებე მუთუნნერ პასუხიშმგებლობეფქ ვაშუას კრებას. ბაღანეფიშ უსაფრთხოებაშ მიზნით, უხუცესეფქ შილებე პირადო გაფრთხილან მშობლეფ, კურცხას რდან, მუჟამსით ბაღანეფ თე პიროვნებაშ გოხოლუას იჸუაფნა. უხუცესეფქ მშობლეფს ვა უწუან ოკო თი ბაღანეფიშ სახელეფ, მიდგაწკუმა იძალად თე პიროვნებაქ.

მუჭო შეილებნა დოთხილუათ თქვან ბაღანეფ

19—22. მუშ კეთება შეულებნა მშობლეფს, ნამდა დოთხილუან მუნეფიშ ბაღანეფ? (ქოძირით სურათ პირველ გვერდის).

¹⁹ მშობლეფიშ მოვალეობა რე, ბაღანეფ ზიანშე დოთხილუან.f სქუალეფ იეჰოვაშე მემკვიდრეობა რე, ნამუთ მშობლეფს მეჩჷ ჯილდოთ (ფსალმ. 127:3). ათეშენ, მშობლეფ, თქვან პასუხიშმგებლობა რე, დოთხილუათ თქვან ბაღანეფ. მუჭო შეილებნა დოთხილუათ ბაღანეფ სექსუალურ ძალადობაშე?

²⁰ პირველ, დოგორით მეტ ინფორმაცია სექსუალურ ძალადობაშენ. ქიგეგით, მუნერ პიროვნებეფ ძალადენა ბაღანეფწკუმა დო მუ მეთოდეფს გიმირინუანა თინეფიშ მიოჩილითაფარო. კურცხას რდათ, მუჟამსით ორწყეთ ოშკურანჯ სიტუაციეფს დო ხალხის (იგავ. 22:3; 24:3). ხშირ შემთხვევას მოძალადეეფ თინეფ რენა, მიდგას ბაღანა იჩინენს დო ონდჷ.

²¹ მაჟია, ჯგირ ურთიერთობა გიღდან თქვან ბაღანეფწკუმა (კან. 6:6, 7). თეშა შურ დო გურით მორჩქილაფა ხოლო მიშურს (იაკ. 1:19). რშუდან, ხშირას ბაღანეფს, მიდგაწკუმა იძალადეს, ოშკურნა თეშ რაგადშა. შილებე თინეფ ფიქრენდან, ნამდა მითინ ვა დუჯერენს ვარდა მოძალადექ დარცქინ, მითინს ქუწინდ-და, მუდგაინს ქუდუშენდჷ. თეცალ მუთუნს ქოეჭვენთ-და, ტაქტიანო ქუდუსვით ბაღანას კითხვეფ დო მოთვინებათ ქურჩქილით.

²² მასმა, ოგურეთ თქვან ბაღანეფს. გეგნოჩით თინეფს ასაკწკუმა შესაფერის ინფორმაცია სექსიშ გურშენ. ქუდაგურეთ, მუ უწუან ვარდა მუჭო მიქცუან, მუჟამსით მიდგაინ ოცად შეუფერებელო ქეშეხუას თინეფს. გეგმირინეთ თი ინფორმაცია, ნამდგას ჩქინ ორგანიზაცია მარზენა ბაღანეფიშ დაცვებელო (ქოძირით ჩარჩო „მიღით მეტ ინფორმაცია დო ოგურეთ ბაღანეფს“).

23. მუჭო ვუჯინეთ ბაღანაშ მიმართ სექსუალურ ძალადობას დო მუ კითხვას გუვარჩიენთ უკულიან სტატიას?

²³ იეჰოვაშ მოწმეეფ ბაღანაშ მიმართ სექსუალურ ძალადობას უჯინენა, მუჭოთ მძიმე ცოდვას დო დიდ უბადობას. ჩქი ქრისტეშ კანონით ფხემძღვანელენთ, ათეშენ ხეს ვეგნვუფორუანთ სექსუალურ მოძალადეს დო ვეფცვენთ თი შედეგეფშე, მუთ ცოდვაშ ჩადენას მოჸუნს. მარა მუჭო შემლებნა მივეხვარათ თანაქრისტიანს, მიდგაქ ძალადობაშ მსხვერპლიქ იჸუ? თე კითხვას უკულიან სტატიას გუვარჩიენთ.