უბრალო ცხოვრებას ხიოლ მოუღ

დანიელქ დო მირიამქ 2000 წანაშ სექტემბერს დექორწინეს დო ქიდიხორეს ესპანეთის, ქალაქ ბარსელონას. „ჩქი ნორმალურო ბცხოვრენდით. სამუშა თიშ საშვალებას მარზენდეს, ნამდა ჯგირ რესტორანეფს მიჭკომდესკო, შხვადოშხვა ქიანეფშა გილამთუმდესკო დო ხარისხიან მიკაქუნალ მიჸიდირდესკო. თეწკუმა ართო, რეგულარულო ხოლო მსახურენდით“, — იჩიებ დანიელ. მარა თინეფქ გეგნოჭყვიდეს, მუნეფიშ ცხოვრებას მუდგარენ დუთირდესკონ.

2006 წანაშ კონგრესის, დანიელწკუმა მანგარო იმოქმედ ართ მოხსენებაქ, სოდეთ ათეცალ კითხვა რდუ მოჩამილ: „ქუვორთუთო ირფელს, მუთ შემლებნა, ნამდა მარადიულ სიცოცხლეშ შარას ქიგვორინუათ თინეფ, მით ოღურალ შარას გერენა? (იგავ. 24:11). თე თემა ყურადღებას ამახვილენდ ქრისტიანეფიშ პასუხიშმგებლობაშა, ნამდა სიცოცხლეშ მუმაჩამალ სახიოლო ამბე არძაშა გუცხადებდესკო (საქ. 20:26, 27). დანიელ იშინანს: „იეჰოვა მა მირაგადუდკო თეშ ბგინაფლენდ დუც“. თე თემას თიშე ხოლო რდუ რაგად, ნამდა მსახურებაშ გაფართოებას მეტ ხიოლ მოუღუდ. დანიელს უჩქუდ, ნამდა თენა მართალო თაშ რდუ. მირიამს ახალ დოჭყაფილ აფუდ პიონერო მსახურება დო უკვე მუშ თოლო ორწყედ კურთხევეფს, ნამუთ თეცალ მსახურებას მოჸუნს.

დანიელ იჩიებ: „ქიმეფხვად, უკვე თიშ დრო რდუ, ჩქიმ ცხოვრება 180 გრადუსით დომთირუდკო“. თიქ მართალო თაშ ქიმიქცუ. შეამცირ სამუშა საათეფი, ქიდიჭყუ პიონერო მსახურება დო ფიქრენდ თი ხიოლშენ, ნამუთ შილებედ მუს დო მირიამს მუღკონ თექ მსახურებაქ, სოდეთ მაქადაქებელეფიშ მეტ საჭიროება რე.

სირთულეეფიშ უკულ ხიოლ

2007 წანაშ მესის დანიელ დო მირიამქ მიოტეს მუნეფიშ სამუშა დო გეგნორთეს პანამაშა, სოდეთ ადრე ხოლო რდეს ნარინა. თინეფიშ ახალ ტერიტორია შითმოდირთუდ მუსხირენ კუნძულშე ბოკას-დელ-ტოროს, კარიბიშ ზღვაშ არქიპელაგის, სოდეთ უმენტაშო გუამი ნინაშა მორაგადე ხალხი ცხოვრენდ. დანიელ დო მირიამ ფიქრენდეს, ნამდა მუნეფიშ შაყარელ ფარათ, შეულებდეს ბრუო თუთას ქუდოსკიდესკო პანამას.

თინეფ ნავით დო ველისპეტით გილეშეს კუნძულეფს. დანიელს დო მირიამს ჯგირო შუნა, პირველო მუჭო იდეს ველისპეტით 32 კილომეტრი გვალეფს, თაკარია ჩხანას. დანიელს დახე ესუსტ. თექ მახორუ ხალხი ხიოლით ღებულენდ თინეფს, განსაკუთრებულო თიშ უკულ, მუჟამსით მუსხირენ წინადადება ქიდიგურეს თექიან ნინაშა. დანიელს დო მირიამს 23 ბიბლიაშ გურაფა უღდეს.

მუჟამსით ფარაქ ქეშელუესინ, გურქ დოჭყორდეს. დანიელ იშინანს: „თოლეფ ჩილამურით ემაფშაფდეს, მუჟამსით ფიფქრენდით, ნამდა კინ ესპანეთშა მაჸიდეს დართინალ. გურ მაფდეს ელაჭვილ, მუშენდა ჩქინ დაინტერესებულეფ მაჸიდეს დატებელ“. მარა ართ თუთაშ უკულ გურიშ ემაკინალ ამბე ქიგეგეს. მირიამ იჩიებ: „ჩქი სპეციალურ პიონერეფო დაბნიშნეს. ჩქინო დიდ ხიოლი რდუ თაქ დოსკილადა დო მსახურება!“.

არძაშ უმოს დიდ ხიოლი

2015 წანას ორგანიზაციას ცვლილებეფქ ქუმოხვად; დანიელ დო მირიამს სრულ დროთ პიონერეფო ოკო გუგრძელებდესკო მსახურება. მუჭო მიქცის თინეფქ? დანიელ დო მირიამქ მიენდეს ღორონთიშ დაპირებას, ნამუთ ფსალმუნებიშ 37:5-ის ინოჭარ: „იეჰოვას მიანდ სქან შარა, თიშ იმენდი გიღდას დო თინა იმოქმედენს“. თინეფქ დოგორეს სამუშა, ნამუთ ხეს შეუნწყუნდ პიონერულ მსახურებას დო ამდღა პანამას, ვერაგუასიშ პროვინციაშ კრებას მსახურენა.

დანიელ იჩიებ: „სოიშა ესპანეთის დიბტენდითკონ, დარწმუნებულ ვა ვორდით, ქეშმალებედეს დო ვარ უბრალოთ ცხოვრება. მარა ამდღა თაშ ფცხოვრენთ დო ირფელ მიღნა, მუთ აუცილებერ რე“. მუს მოუღ თინეფშო არძაშ უმოს ხიოლი? დანიელ დო მირიამი იჩიებნა: „თიშ უმოს ხიოლი მუთუნს ვა მოუღ, მუჟამსით თანდაბალ ხალხის ოხვარუქ იეჰოვაშ გაჩინებაფას!“.