იეჰოვაშ განზრახვა შესრულებუ!

1, 2. ა) მუ გამცხადეს იეჰოვაქ? ბ) მუშა მარწმუნენა ესაიაშ 46:10, 11 დო 55:11?

ბიბლიას ინოჭარილ პირველ სიტყვეფი: „დუდშე ღორონთიქ გაჭყუ ცა დო დიხა“ უბრალოთ რე რაგადებულ, მარა თინა ტომბა აზრის გინოჩანს (დაბ. 1:1). ღორონთიშ გუნაჭყეფშენ, მუნერით რე სივრცე, სინთე დო გრავიტაცია, ბრელ მუთუნ ვამჩქუნა; ჩქი ხვალე სამყაროშ ჭიჭე ნაწილს ვორწყეთ (ეკლ. 3:11). მარა, იეჰოვაქ გამცხადეს მუშ განზრახვა, ნამუთ დედამიწას დო კაცობრიობას ოხუ. ღორონთიშ ამნახანტო გორჩქინელ ხალხშო დედამიწაქ იდეალურ ოცხოვრებელქ ოკო იჸუკო (დაბ. 1:26). თინეფ იეჰოვაშ სქუალეფქ ოკო იჸუესკო დო იეჰოვაქ თინეფიშ — მუმაქ.

² დაბადებაშ მა-3 დუდშე ბგებულენთ, ნამდა იეჰოვაშ განზრახვას წინააღმდეგობაქ ქეშეხვად (დაბ. 3:1—7). მარა თენა ვარდ ვემიგვარებედუნ ფერ საკითხი, მუშენდა იეჰოვაშა მითინს ვაცილებე (ეს. 46:10, 11; 55:11). ათეშგურშენ, შემლებუნა დარწმუნებულ ვორდათ, ნამდა იეჰოვაშ განზრახვა დანიშნულ დროს შესრულებუ!

3. ა) ნამ ძირითად გურაფეფ მოხვარუნა, ქიგებგათ ბიბლიას ინოჭარილ ცნობა? ბ) მუშენ გენიფხილენთ თე გურაფეფს ასე? გ) ნამ კითხვეფს გუვარჩიენთ?

³ მუშო ოკო რაგად, ჩქი მიჩქუნა ბიბლიურ ჭეშმარიტება ღორონთიშ განზრახვაშენ, ნამუთ დედამიწას დო კაცობრიობას ოხუ დო თინა ხოლო, მუშმადიდა როლი უკინებ იესო ქრისტეს თიშ შესრულებას. შხვა გურაფეფწკუმა ართო თენა რე თი ძირითად გურაფეფ, ნამუშ გურშენ გებგით, მუჟამსით დიბჭყით ღორონთიშ სიტყვაშ გურაფა. ჩქინ თია მხარეშე, მოკონა ალალგურიშ კათას ხოლო ქუგვოგებაფუათ თე მნიშვნელოვან გურაფეფ. თეშ კეთებაშ საშვალება მაღვენუნა წირ წანას, მუჟამსით ქეშვეცადებუთ, მუთ შილებენ ბრელ ხალხი ქუდვაპეჯათ ქრისტეშ გოშინაშ ონჯუაშა (ლუკ. 22:19, 20). თე შეხვალამაშა მოულან თინეფ უმოს მეტის ქიგეგენა ღორონთიშ განზრახვაშ გურშენ. თაშ ნამდა, ქრისტეშ გოშინაშ ონჯუაშახ მუსხირენ დღათ ადრე, ჯგირ იჸუაფ დეფიფქრათ კონკრეტულ კითხვეფშენ, ნამუსით ქუდუსვენთ ბიბლიაშ მაგურაფალეფს დო ალალგურიშ კათას, ნამდა თინეფქ დეინტერესან დო ქიდესწრან თე მნიშვნელოვან შეხვალამას. თე სტატიას ჩქი გენიფხილენთ სუმ კითხვას: მუ რდუ ღორონთიშ დუდშეიან განზრახვა, ნამუთ დედამიწას დო კაცობრიობას ოხუდ? მუშენ ვეშესრულ თე განზრახვაქ? მუშენ რე იესოშ გიშაჸიდირალ მნიშვნელოვან ღორონთიშ განზრახვაშ შეიოსრულებელო?

მუ რდუ გუმაჭყაფალიშ დუდშეიან განზრახვა?

4. მუჭო აცხადენს გუნაჭყეფ ღორონთიშ დიდებას?

⁴ ჩქინ გუმაჭყაფალიშ, იეჰოვაშ მოწიწება მირჩქინდუნა, მუშენდა თის ირფელ მაღალ ნორმეფით აფუ გოჭყაფილ (დაბ. 1:31; იერ. 10:12). მუშ გურაფა შემლებუნა თი სისქვამე დო წესრიგშე, ნამუთ რჩქუ ღორონთიშ გუნაჭყეფშე? მუჟამსით ვოკვირუთ ღორონთიშ ჭიჭე დო დიდ გუნაჭყეფუს, ნამუთ გარკვეულ მიზანს ომსახურუნ, თენა ჩქინწკუმა დიდ შთაბეჭდილებას იტენს. მის ვაუკვენს კოჩიშ ორგანიზმის უჯრედიშ რთულ სისტემა, ახალდაბადებულ თოთო ბაღანა დო ბჟაშ ინულაშ სისქვამე? თე ირფელით აღფრთოვანებულ ვორეთ, მუშენდა ჩქინდა ინოდვალირ რე თიშ უნარი, იბსიამოვნათ სისქვამეთ (წეკითხით ფსალმუნიშ 19:1; 104:24).

5. მუ აკეთ იეჰოვაქ თიშო, ნამდა თიშ გუნაჭყეფუქ ირფელქ ჰარმონიულო ქიარსებას?

⁵ მუჭოთ გოჭყაფილშე იძირენ, იეჰოვაქ ჸოროფათ დადგინ ზღვარი. ირფელქ ჰარმონიულო ქიარსებასინ თიშ გურშენ, თიქ დადგინ მუჭოთ ბუნებრივ თეშ ზნეობრივ კანონეფ (ფსალმ. 19:7—9). თაშ ნამდა, სამყაროს ირფელს მუშ ადგილ უღუ დო თი ფუნქციას ასრულენს, მუთ საჭირო რე ღორონთიშ განზრახვაშ შეოსრულებელო. იეჰოვაქ მუშ გუნაჭყეფუეფს ართიანწკუმა თანამშრომლობაშო წესეფი დუდგინ. მაგალთო, გრავიტაციაშ კანონი აჩერენს ატმოსფეროს დედამიწაშ მუკი-მუკი, არეგულირენს ზღვა დო ოკეანეშ მიმოქცევას დო ხეს უნწყუნს წესრიგის, ნამუთ საჭირო რე დედამიწას სიცოცხლეშ არსებობაშო. არძა გუნაჭყეფ, ნამდგაშა კათა ხოლო მიშურს, მოქმედენს თე დოდგინელ ზღვარიშ დინახალე. არგამა რე, წესრიგი, ნამუთ ღორონთიშ გუნაჭყეფუეფს არსებენსინ, ამტკიცენს, ნამდა თის უღუ განზრახვა დედამიწა დო კაცობრიობაწკუმა. ჩქი შემლებუნა ხალხიშ ყურადღება გუვამახვილათ თიშა, მიდგაქ თე წესრიგ დადგინ (გამოცხ. 4:11).

6, 7. მუ დო მუნერ ძღვინ მეჩუ იეჰოვაქ ადამ დო ევას?

⁶ იეჰოვაშ დუდშეიან განზრახვა რდუ, ნამდა კაცობრიობას მარადიულო უცხოვრებუდკო დედამიწას (დაბ. 1:28; ფსალმ. 37:29). თიქ ადამ დო ევას ქიმეჩ არძანერ ძღვინ, ნამდა ცხოვრებათ გეხარესკო (წეკითხით იაკობიშ 1:17). იეჰოვაქ ქიმეჩ თინეფს ნებაშ თავისუფლება, განსჯაშ, ჸოროფაშ დო მეგობრობაშ უნარი. გუმაჭყაფალქ ადამს მეჩ მითითება, მუჭო შეულებუდ თის მორჩილებაშ გიმორჩქინა. ადამქ თინა ხოლო ქიგეგ, მუჭო იზრუნკო მუშ მოთხოვნილებეფშენ, თეშ გარდა, მუჭო მიკაჯინკო ცხოველეფს დო დედამიწას (დაბ. 2:15—17, 19, 20). იეჰოვაქ ადამ დო ევა გაჭყუ პიჯიშ გემოშ, შეხებაშ, ძირაფაშ, რჩქილაშ დო ყნოსვაშ უნარით. თაშ ნამდა, თინეფს შეულებდეს გეხარესკო დო ისიამოვნეკსო თი სისქვამეთ დო სიხვეიანეთ, ნამუთ სამოთხეს რდუ. პირველ წყვილს უღუდ საშვალება, ირიათო უსიამოვნებუდკო სამუშათ, ბრელ მუთუნშა მეუჭირინუაფუდკო დო შხვადოშხვა აღმოჩენეფ უკეთებუდკო.

⁷ ხოლო მუ მიშეშ ღორონთიშ განზრახვაშა? იეჰოვაქ თეშ გაჭყუ ადამ დო ევა, ნამდა თინეფს შეულებდეს ჸუნდესკო სრულყოფილ სქუალეფი. ღორონთის თინა ხოლო აფუდ განზრახულ, ნამდა თინეფიშ სქუალეფს ქოშიებდესკო სქუალეფი დო დედამიწა სრულყოფილ შთამომავლობათ ეუფშაფდესკო. ღორონთის ოკოდ ადამ დო ევას დო არძა მშობლეფს უჸორდესკო მუნეფიშ სქუალეფ თეშ, მუჭოთ იეჰოვას უჸორდ პირველ სრულყოფილ სქუალეფი. დედამიწაქ მთელ მუშ რესურსეფით თინეფიშ სამუდამო ოცხოვრებელქ ოკო იჸუკო (ფსალმ. 115:16).

მუშენ ვეშესრულ თე განზრახვაქ?

8. მუ მიზანს ომსახურუდ დაბადებაშ 2:16, 17-ის მოჩამილ კანონი?

⁸ ირფელქ თეშ ვამოხვად, მუჭოთ ღორონთის აფუდ დუდშე განზრახული. მუშენ? იეჰოვაქ ადამ დო ევას მეჩუ უბრალო კანონი, ნამუთ ქაძირანდ, მუჭო ესმებუდეს თინეფს მუნეფშა მეჩამილ ნებაშ თავისუფლებაშ საზღვრეფი. ღორონთიქ უწუ ადამს: „ბაღიშ არძა ჯაშე შეილებუ ჭკომე, მუსხი გოკონ, მარა ჯგირ დო ფურიშ ჩინებაშ ჯაშე ვაჭკომა, მუშენდა მუ დღას ოჭკომუნქინ, თიმ დღას დოღურუქ“ (დაბ. 2:16, 17). ადამ დო ევაშო რთულ ვარდ თე კანონიშ გაგება დო ვართ თიშ დაცვება. თინეფს ოჭკომალ დასაბაღშე უმოს უღუდეს დო შეულებდეს თი ჯაშ მუკნაღელიშ მეტ, მუთ ოკოდესინ თინა ჭკომესკო.

9, 10. ა) მუ დაბრალ სატანაქ იეჰოვას? ბ) მუ გინოჭყვიდეს ადამ დო ევაქ? (ქოძირით სურათ მა-3 გვერდის)

⁹ სატანა ეშმაკიქ გვერიშ გიმორინაფათ მიოჩილითუ ევა დო თიქ მუშ მუმას, იეჰოვას ვედემორჩილ (წეკითხით დაბადებაშ 3:1—5; გამოცხ. 12:9). სატანაქ საეჭოთ გინართინუ თი ფაქტი, ნამდა ღორონთიშ სქუალეფს ვეშულებუდეს „ბაღიშ არძა ჯაშე“ ჭკომუა. ფაქტიურო თიქ იკითხ: „მართალო ვეშეილებუნანო მუთ გოკონან თიშ კეთება?“. თეშ უკულ არგამა ტყურა უწუ თინეფს: „ვარ, ვაღურუთ“. უკულ სატანაქ ქეშეცად, დარწმუნუკო ევა, ნამდა ვარდ აუცილებერ თიქ ღორონთის ქურჩქილუკო დო უწუ: „უჩქ ღორონთის, ნამდა მუ დღას ოჭკომუნთ თიშ ნაყოფისინ, თოლ გუგანჯამუნა“. თინა თის გულისხმენდ, ნამდა ღორონთის ვაკოდ თე ნაყოფი ჭკომესკო თიშენ ნამდა, თეშ უკულ გონება განწყუმუდეს. სატანაქ თინეფს ტყურა დაპირება მეჩუ დო უწუ: „ღორონთცალო ჯგირ დო ფურ გარჩქვენუდან იჸი“.

¹⁰ ასე ადამ დო ევას გინაჭყვიდირალ აფუდეს, მუჭო მიქცუესკო. იეჰოვას დემორჩილებუდეს დო ვარ გვერიშ სიტყვეფს დეჯერენდეს? თინეფქ გინოჭყვიდეს, ვედემორჩილესკო ღორონთის. თეგვარო, სატანაშ მხარე ქიდეკინეს დო ღორონთიშ წინააღმდეგ მიდართეს. ადამ დო ევაქ ვარია ქოთქუეს იეჰოვაშენ, მუნეფიშ მუმაშენ დო თიშ მფარველობაშ უმშო ქუდოსკიდეს (დაბ. 3:6—13).

11. მუშენ ვაწკურ თოლ იეჰოვაქ ადამ დო ევაშ ცოდაშენ?

¹¹ იეჰოვაშ წინააღმდეგ ულათ, ადამ დო ევაქ სრულყოფილება მიოდინეს. თეს გეძინელ, თინეფქ დეშორეს იეჰოვას, მუშენდა თიშ „თოლეფ თიშ მასუფთა რე, ნამდა ვეშულებ უბადობაშ ჯინა“ (აბაკ. 1:13). ღორონთის ცოდვაშენ თოლ დუწკურუდკონ, მუშ გუნაჭყეფუშ ჯგირობუა, მუჭოთ ზეცასინ თეშ დედამიწას, საფრთხეშ თუდო იჸიდ. თეშ გარდა, ღორონთის ედემიშ ბაღის მოხვალამირ ცოდვაშენ მუთუნ ზომეფი ვემუღებუდკონი, თიშ ნდობა საეჭო იჸიდ. მარა იეჰოვა მუშ კანონეფიშ ართგურ რე დო დღას ვეგნურთანს თის (ფსალმ. 119:142). თაშ ნამდა, ნებაშ თავისუფლება უფლებას ვარზენდ ადამ დო ევას, ღორონთიშ კანონშა გეგნურთაფდესკო. ღორონთიშ წინააღმდეგ ულაშ შედეგ თინა რდუ, ნამდა თინეფქ დოღურეს დო დართეს ტვერს, სოვრეშეთ რდეს გორჩქინელი (დაბ. 3:19).

12. მუქ აღოლ ადამიშ გამნარყის?

¹² თიმ დღარშე, მუჟამსით ადამ დო ევაქ ოჭკუმეს ჯაშ მუკნაღელინ, თინეფ ვეთვალუდეს ღორონთიშ ოჯახიშ წევრეფო. ღორონთიქ გეგნორაუ თინეფ ედემშე, სოდეთ დღას ვადართინედეს (დაბ. 3:23, 24). იეჰოვაქ სამართლიანო მიქცუ დო ვედეცვუ თინეფ თი შედეგეფშე, ნამუთიქ მაჸუნ თინეფიშ გინოჭყვიდილ საქმეს (წეკითხით კანონიშ 32:4, 5). თინეფ უკვე არასრულყოფილეფ რდეს დო ვეშულებდეს ღორონთიშ თვისებეფიშ სრულყოფილო გიმოხანტუა. ადამს ხვალე დიდებულ მომავალიშ იმენდი ვაუდინუაფუნ, თიქ მუშ გამნარყის ხოლო გეგნოჩ არასრულყოფილება, ცოდა დო ღურა (რომ. 5:12). ადამქ მუშ გამნარყის მარადიულ სიცოცხლეშ იმენდი მეუდინუ. ვართ ადამ დო ევას დო ვართ თინეფიშ სქუალეფს სრულყოფილ გამნარყი ვაჸვენუდეს. თიმ დღარშე მოჸუნაფილ, მუჟამსით ადამ დო ევაქ ღორონთის დეშორესინ, სატანა ეშმაკი ამდღარ დღაშა აგრძელენს ხალხიშ შეცდომაშა მიშაჸუნაფას (იოან. 8:44).

გიშაჸიდირალქ გეგშანწყუ მდგომარეობა

13. მუ აფუ განზრახულ იეჰოვას კაცობრიობაშო?

¹³ ირფელიშ უმკუჯინუო, ღორონთის იშენით უჸორს ხალხი. მართალ რე ადამ დო ევაქ შეცოდეს, მარა იეჰოვას ოკო ხალხის ჯგირ ურთიერთობა უღუდას მუწკუმა. თის მითინიშ ღურა ვაკო (2 პეტ. 3:9). ათეშგურშენ ღორონთიქ ხეთეშე ქიზრუნ თიშო, ნამდა ხალხის ქეშიალებუკო თიწკუმა ურთიერთობაშ აღდგენაქ თეშ, ნამდა მუშ სამართლიან ნორმეფქ ხოლო დაცვებულქ იჸუკო. მუჭო მიონჭირინუ თეს იეჰოვაქ?

14. ა) მუჭოთ იოანეშ 3:16-შე იძირენ, მუ ზომეფი მიღუ იეჰოვაქ კაცობრიობაშ მდგომარეობაშ გიშასწორებელო? ბ) ნამ კითხვა შემლებუნა გუვარჩუათ დაინტერესებულეფწკუმა?

¹⁴ წეკითხით იოანეშ 3:16. ბრელს, მიდგას ქრისტეშ გოშინაშ ონჯუაშა ვაპეჯენთინ, შილებე თე მუხლი ზეპირო უჩქუდას. მარა წიმიჭკირუ კითხვა: მუჭო რე შეიოლებერ მარადიულ სიცოცხლეშ მეღება იესოშ გიშაჸიდირალით? მოსაწვევეფიშ გავრცელებაშ კამპანია, ქრისტეშ გოშინაშ ონჯუა დო თე შეხვალამას დესწრებუნ თი ხალხიშ მაჟიაშა მეკითხირ მუჩანა თიშ საშვალებას, ნამდა ქიმვეხვარათ ჭეშმარიტებაშ ალალგურით მაგორუეფს, პასუხი მიღან თე მნიშვნელოვან კითხვაშა. თიშ უმოს ტომბაშე გაგებაქ, მუჭო იძირე გიშაჸიდირალშე იეჰოვაშ ჸოროფა დო სიბრძნე, შილებე მანგარო იმოქმედას თეცალ პიროვნებეფწკუმა. გიშაჸიდირალიშ ნამ მხარეეფშა ოკო გუვამახვილათ ყურადღება?

15. მუჭო გენესხვავებუდ იესო ადამშე?

¹⁵ იეჰოვაქ სრულყოფილ კოჩი ქუმაშკუ დედამიწაშა, ნამუთ დუც შეწირენდ დო იჸუაფუდ გიშმაჸიდირალი. თე სრულყოფილ კოჩიქ იეჰოვაშ ართგურქ ოკო იჸუკო დო თიშ სურვილ ოკო უღუდკო, ნამდა დათმუკო მუშ სიცოცხლე ოღურალო გინოდვალირ კაცობრიობაშ დარსხებელო (რომ. 5:17—19). იეჰოვაქ მუშ პირველ გუნაჭყეფუშ სიცოცხლე ზეცაშე დედამიწაშა გეგნიღუ (იოან. 1:14). თეგვარო იესოქ სრულყოფილ კოჩო გინირთუ, მუჭოთ ართ დროს — ადამი. მარა ადამიშ გინაწონს, იესოქ თეშ გატარ მუშ ცხოვრება, მუჭოთ იეჰოვა ელუდ სრულყოფილ კოჩშე. ურთულეს გამოცდეფიშ დროს ხოლო, იესოს დღას ვეშუცოდებ დო ვართ ღორონთიშ კანონეფშა გინურთაფ.

16. მუშენ რე გიშაჸიდირალ ძვირფას ძღვინ?

¹⁶ მუშ დუდიშ შეწირუათ, იესოს, მუჭოთ სრულყოფილ კოჩის, შეულებუდ დერსხუკო კაცობრიობა ცოდა დო ღურაშე. იესო აკმაყოფილენდ ირფელს, მუთ ადამს ოკო უღუდკო — თინა სრულყოფილ, ირიათო ართგურ დო ღორონთიშ მორჩილ რდუ (1 ტიმ. 2:6). იესოშ ღურათ გინოგაფილქ იჸუ გიშაჸიდირალქ, ნამუქით საშვალება ქიმეჩ „ბრელს“, იცხოვრან მარადიულო (მათ. 20:28). ნამდვილო, გიშაჸიდირალიშ საშვალებათ შესრულებუ ღორონთიშ დუდშეიან განზრახვა (2 კორ. 1:19, 20). გიშაჸიდირალ ართგურ კათას არზენს საშვალებას იცხოვრან მარადიულო.

იეჰოვაქ მუშა დართალ შარა გომინწყეს

17. მუშ საშვალება მუჩეს გიშაჸიდირალქ?

¹⁷ იეჰოვას გიშაჸიდირალო ძვირქ აჸუ გინაგაფალქ (1 პეტ. 1:19). თინა მანგარო აფასენს ხალხის, ათეშგურშენ მზათ რდუ მუშ ხვალეგუნაჭყეფ სქუა ქეშეწირკონ ჩქინ გურშენ (1 იოან. 4:9, 10). მუდგარენ გაგებათ იესოქ ჩქინ პირველ მუმაშ ადამიშ ადგილ ქიდეკინ (1 კორ. 15:45). თეგვარო, იესოქ სიცოცხლეშე უმოს დომრთინუეს; თიქ ქომჩეს საშვალება, საბოლათ დუვართათ ღორონთიშ ოჯახის. იესოშ მსხვერპლიშ საფუძველშა იეჰოვას შეულებ მუშ სამართლიან ნორმეფს ვეგნურთას თეშ, კინ მიღას ხალხი მუშ ოჯახშა. მართალო გურიშემაკინალ ვარენო თი დროშე ფიქრი, მუჟამსით არძა ართგურ კოჩ კინ სრულყოფილებას დართუნ?! თიმ დროს ღორონთიშ ოჯახიშ ზეციერ დო მიწიერ ნაწილ შკას ართობა იჸუაფ. თიმწკუმა ჩქი მართალო ღორონთიშ სქუალეფ იპჸით (რომ. 8:21).

18. მუჟამ გინირთუ იეჰოვა „ირფელ არძაშო“?

¹⁸ სატანაშ წინააღმდეგობაქ ხე ვეშუშალ ღორონთის კაცობრიობაშ ჸოროფა გეგმურჩქინუდკო დო ვართ არასრულყოფილ კათას ცილებ, ჸოფედესკო ღორონთიშ ართგურეფ. გიშაჸიდირალიშ საშვალებათ, იეჰოვაქ ქიმეხვარ მუშ სქუალეფს, მართალეფ ჸოფედესკო. წერმიდგინით, მუნერ ცხოვრება იჸუაფ, მუჟამსით „არძა, მით ღორონთიშ სქუას ძირუნს დო ირწმუნენსინ“, მარადიულ სიცოცხლეს მიღენს (იოან. 6:40). მუჭოთ დუდშე აფუდ განზრახულინ, იეჰოვა მუშ დიდ ჸოროფაშ დო სიბრძნეშ ჭყოლოფუათ, კაცობრიობას გასრულყოფილენს. ჩქინ მუმა, იეჰოვა, იჸუაფ „ირფელ არძაშო“ (1 კორ. 15:28).

19. ა) მუს მოკეთებაფუანა გიშაჸიდირალიშ მარდულობა? (ქოძირით ჩარჩო „მორთ, ვემვოტუათ ღირსუანეფიშ გორუა“) ბ) გიშაჸიდირალიშ ნამ მხარეს გუვარჩიენთ თეშ უკულიან სტატიას?

¹⁹ გიშაჸიდირალიშ მარდულობა მოხვარუნა, გავაკეთათ, ირფელ მუთ შემლებუნა, ნამდა ქუგვოგებაფუათ ხალხის, მუჭო თინეფს ხოლო შეულებუნა თე ძვირფას ძღვინშე სარგებლობაშ მეღება. ხალხის ოკო უჩქუდას, ნამდა გიშაჸიდირალით იეჰოვა ჸოროფას გიმირჩქინანს დო კაცობრიობას მარადიულ ცხოვრებაშ იმენდის არზენს. მარა გიშაჸიდირალით თეშე უმოს მეტიქ იჸუ შეიოლებერქ. თეშ უკულიან სტატიას გუვარჩიენთ, მუჭო პასუხენს იესოშ გიშაჸიდირალ თი ონირზებელ საკითხეფს, ნამუთ სატანაქ ედემიშ ბაღის წიმოჭკირ.