ღორონთიქ გაჭყჷ პირველ ქომოლკოჩ დო ოსურკოჩ

იეჰოვაქ ართ ადგილს, ნამდგას ედემ ჯოხოდ, გაშენ ბაღ. თე ბაღ ეფშა რდჷ ყვავილეფით, ჯალეფით დო ცხოველეფით. თეშ უკულ ღორონთიქ ტვერშე ადამიანიშ ფორმა გეგშეჸუნ დო შურ ქინამბარ. ქოიჩქუნო, მუქ მოხვად უკულ? თიქ ცოცხალ კოჩო გინირთჷ. თეშნერო გაჭყჷ ღორონთიქ პირველ კოჩ, ადამ. იეჰოვაქ თის ედემიშ ბაღიშ მიკოლუაფა დო ცხოველეფშა სახელეფიშ გედვალა ქუდავალ.

იეჰოვაქ ადამს ართ მნიშვნელოვან წეს დაუდგინ. ღორონთიქ თის უწუ: ართიშ მეტ, ბაღიშ არძა ჯაშე შეილებ ჭკუმე. გიჩქუდას, თი ართ ჯაშე ოჭკუმუნქ-და, დოღურუქ.

დრო-ხანიშ მიკულაშ უკულ იეჰოვაქ თქუ, მორთ ადამს მოხვარეს გოუჭყანქია. თიქ ადამ თეშ ქუდარულუ, ნამდა მუთუნს ვა გინაფლენდჷ. ღორონთიქ თის ხასლაშ ძვალ გეგშუღ დო თე ძვალშე ადამშო ოსურ გაჭყჷ. თის ევა ჯოხოდ. თენა რდჷ ღორონთიშ გუნაჭყეფ პირველ ოჯახ. ქიმეწონუო ადამს მუშ ოსურქ? ადამ თიცალ ბედნერ რდჷ, ნამდა თქუ: ქუჯინით, მუ გაჭყჷ იეჰოვაქ ჩქიმ ძვალშე! მუ მანგარ რე! თინა გვალო ჩქიმცალ რე!

იეჰოვაქ ადამ დო ევას უწუ, ნამდა სქუალეფ გეიორჩქინესკო დო დედამიწა გეიოფშესკო. თეს გეძინელ, ღორონთის ოკოდ, თინეფქ დედამიწა სამოთხეთ გინაშქვესკო, შხვანერო ქოფთქუათინ, თიცალ სქვამ ბაღო, მუნერით ედემიშ ბაღ რდჷ. თენა მანგარ სასიამოვნო საქმე იჸუაფუდ თინეფშო. მარა, სანარღოთ, თექ თაშ ვა მოხვად. მუშენ? თეს უკულიან დუდშე ქიგებგენთ.