გიშაჸიდირალი — ღორონთიშ დიდებულ საჩუქარი

1, 2. ა) მუჟამ უღუ საჩუქარს სქანო დიდ ფასი? ბ) მუშენ ირაგადე, ნამდა გიშაჸიდირალ არძაშ უმოს ძვირფას საჩუქარ რე?

მუ უჩუქებუნა სქანდა არძაშ უმოს ძვირფას? აუცილებერ ვა რე ჯგირ საჩუქარ ძვირიან რდას. საჩუქარიშ სიჯგირა იშენდოიშენ ფასშა ვა რე დამოკიდებული. მახიოლენა დო მოსაჭირნან ფერ მუთუნ ქუმაჩუქეს-და, საჩუქარს ჩქინო დიდ ფას აღვენუ.

² არსებენს მუთუნშა ვეშიდარებენ ფერ საჩუქარი. თინა იეჰოვაქ მეჩუ კაცობრიობას. იეჰოვაქ ბრელ მუთუნ მუჩეს, მარა არძაშ უმოს დიდებულ საჩუქრ გიშაჸიდირალ რე, ნამუთ თიშ სქუა იესო ქრისტეშ მსხვერპლო შეწირუათ იჸუ გინოგაფილქ (წეკითხი მათეშ 20:28). თე დუდშე ბძირუნთ, ნამდა გიშაჸიდირალ არძაშ უმოს დიდებულ საჩუქარ რე, მუშენდა თის შეულებ დიდ ბედნერობა მოიღას დო მერჩას თინა, მუთ არძაშ უმოსო გოსაჭირუ. გიშაჸიდირალშე იძირე, ნამდა იეჰოვას სქან დიდ ჸოროფა უღუ.

მუს ნიშნენს გიშაჸიდირალი?

3. მუს ნიშნენს გიშაჸიდირალ დო მუ ოკო მარჩქილედან თე ძვირფას საჩუქარ დუვაფასათინ თიშენ?

³ უბრალოთ ქოფთქუათი, გიშაჸიდირალ რე საშვალება, ნამუთ იეჰოვაქ გიშაგორ კაცობრიობაშ ცოდა დო ღურაშე ორსხებელო (ეფესოელები 1:7). თე ბიბლიურ გურაფაშ უჯგუშო გაგებელო, ქიგიფშინათ, მუქ მოხვად ედემიშ ბაღის. მუჟამს ჯგირო ქიგებგენთ, მუ ოდინუ ადამქინ, უმოსო დუვაფასენთ თე ძვირფას საჩუქარს.

4. მუს ნიშნენდ ადამშო სრულყოფილ სიცოცხლე?

⁴ მუჟამს იეჰოვაქ ადამ გაჭყუნ, თის სრულყოფილ სიცოცხლე მეჩუ, მუთ მართალო ძვირფას რდუ. წერმიდგინ, მუს ნიშნენდ თენა ადამშო. თინა ფიზიკურო დო გონებრივო სრულყოფილ რდუ, ათეშგურშენ დღას ვედელახებუდ, ვერჩინუდ დო ვა ღურუდ. ადამს, მუჭო სრულყოფილ კოჩის, იეჰოვაწკუმა განსაკუთრებულ ურთიერთობა უღუდ. ბიბლია იჩიებ, ნამდა ადამი „ღორონთიშ სქუა“ რდუ (ლუკა 3:38). თინა თიცალ ხოლოს რდუ იეჰოვაწკუმა, მუჭოთ სქუა მოჸოროფე მუმაწკუმა. იეჰოვა ურაგადუდ მუშ მიწიერ სქუას, არზენდ თის ოჰამუდუნ ფერ სამუშას დო ეუნწყუნდ, მუს ითხინდ თიშე (დაბადება 1:28—30; 2:16, 17).

5. მუს ნიშნენს ბიბლიას ინოჭარილ სიტყვეფი, ნამდა ადამ „ღორონთიშ ამნახანტო“ რდუ გოჭყაფილი?

⁵ ადამი „ღორონთიშ ამნახანტო“ რდუ გოჭყაფილი (დაბადება 1:27). მარა თენა ვა ნიშნენს, ნამდა ადამ ფიზიკურო გუდ ღორონთის. მუჭო თე წიგნიშ პირველ დუდშე გებგით, ღორონთი თოლით უძირაფ შურ რე (იოანე 4:24). თაშ ნამდა, იეჰოვას ვა უღუ კოჩიშნერ ხორციელ სხეული. ღორონთიშ ამნახანტო გოჭყაფილ ადამს თიშნერ თვისებეფი უღუდ, მუნერით ღორონთის უღუ. მაგალთო, ჸოროფა, სიბრძნე, სამართლიანობა დო ძალა. ადამ თით ხოლო გუდ ღორონთის, ნამდა ნებაშ თავისუფლება უღუდ. თინა ვა გუდ დაპროგრამებულ რობოტის. თის შეულებუდ ჯგირ დო ფურიშ გიშაგორუა. ადამს ღორონთშა ქუდუჯერებუდკონ, მარადიულო იცხოვრენდ სამოთხეთ გინორთელ დედამიწას.

6. მუ ოდინუ ადამქ, მუჟამს თიქ ღორონთის შეცოდუ დო მუჭო იმოქმედუ თექ თიშ არძა გამნარყშა?

⁶ მუჟამს ადამქ შეცოდუ ღორონთის, თიქ ღურა დემსახურუ. უდუჯერებუობაქ ადამს ძვირქ ქუდუდოხოდუ. თიქ მიოდინუ სრულყოფილ სიცოცხლე დო არძანერ ხვამა მუთ ქუღუდუნ (დაბადება 3:17—19). ადამქ სრულყოფილო ცხოვრებაშ საშვალება ქოთ მუშ დუდის დო ქოთ მუშ გამნარყის მიდუღ. ბიბლია იჩიებ: „ათეშენ, მუჭოთ ართ კოჩშე [ადამშე] მიშართუ ცოდაქ ქიანაშა დო ცოდაშე ღურაქინ, თეგვარო ღურაქ ირ კოჩშა გეგნორთ, თიშენ ნამდა არძაქ შეცოდ“ (რომაელები 5:12). ადამიშ ცოდაქ მემკვიდრეობათ არძას გეგნადუ. ათეშენ იჩიებუ ბიბლია, ნამდა ადამქ მუშ დუდ დო მუშ გამნარყი ცოდა დო ღურაშ მონობას ქიმეჸიდუ (რომაელები 7:14). ადამ დო ევაშო უჯგუშობაშ მუთუნნერ იმენდ ვა არსებენდ, მუშენდა თინეფქ მუნეფიშ ნებათ ეირჩის ღორონთიშ უდუჯერებუობა. მარა მუ ირაგადე ადამ დო ევაშ გამნარყშენ დო ჩქინ გურშენ ხოლო?

7, 8. მუ ჟირ ძირითად მნიშვნელობა უღუ გიშაჸიდირალს?

⁷ იეჰოვაქ კაცობრიობა გიშაჸიდირალით გიშერსხუ. მუს ნიშნენს გიშაჸიდირალი? თე სიტყვას ჟირ ძირითად მნიშვნელობა უღუ. პირველი: გიშაჸიდირალ რე საფასურ, ნამდგათ მიდგარენს გიშერსხენა, ვარა უკახალე ირთინუანა მუდგარენს. მაგალთო, ჭოფილ კათა გეგშერსხანი თიშენ, მუდგარენ საფასურ რე საჭირო. მაჟია: გიშაჸიდირალ მუდგარენიშ ღირებულებაშ გინაფორალ საფასურ რე. თეცალ საფასურს გინმიგანა მერინაფილ ზარალიშ ოფორალო. მაგალთო, მითინთქ ზარალი ქიმიორინუ შხვას-და, თიქ სრულაშე ოკო გინიგას მერინაფილ ზარალიშ ღირებულება.

⁸ მუჭო შილებედ ადამშე მერინაფილ თეშმადიდა ზარალიშ გინოფორუა დო ჩქინ გათავისუფლება ცოდა დო ღურაშე? მორთ ქობძირათ, მუ აკეთუ იეჰოვაქ ჩქინ გიშაჸიდირალო დო მუს ნიშნენს თენა ჩქინო.

მუ აკეთუ იეჰოვაქ ჩქინ გიშაჸიდირალო?

9. მუნერ გიშაჸიდირალ რდუ საჭირო?

⁹ ადამქ სრულყოფილ სიცოცხლე მიოდინუ. ათეშენ ნამთინ არასრულყოფილ კოჩიშ სიცოცხლეს ვეშულებუდ სრულყოფილ სიცოცხლეშ გიშაჸიდირი (ფსალმუნი 49:7, 8). საჭირო რდუ თიცალ გიშაჸიდირალი, ნამუთ სრულაშე გეგნოფორუნდ მუდგაქ დინუნ თიშ ღირებულებას. თენა ოთანხმუ ღორონთიშ სრულყოფილ სამართლიანობაშ პრინციპის, ნამუთ ბიბლიას ჭარ: „შურ შურიშ მანგიორო“ (კანონი 19:21). მუ გინოფორუნდ სულყოფილ სიცოცხლეშ ღირებულებას, ნამუთ ადამქ ოდინუ? შხვა სრულყოფილ სიცოცხლე — „მანგურ გიშაჸიდირალი“ (1 ტიმოთე 2:6).

10. მუ აკეთუ იეჰოვაქ ჩქინ გიშაჸიდირალო?

¹⁰ მუ აკეთ იეჰოვაქ ჩქინ გიშაჸიდირალო? თიქ მუშ ართ-ართ სრულყოფილ სულიერ სქუა მაშქუ დედამიწაშა. იეჰოვაშო არძა ართ ვა რდუ, მის მაშქვანდუ. თიქ არძაშ უმოს საჸოროფო, ხვალეგუნაჭყეფ სქუა მაშქუ (წეკითხი 1 იოანეშ 4:9, 10). ღორონთიშ სქუაქ მუშ ნებათ დიტუ ზეცა (ფილიპელები 2:7). მუჭოთ წოხოლენ დუდშე ბძირით, ღორონთიქ სასწაულ აკეთუ დო მუშ სქუაშ სიცოცხლე მარიამიშ სასქუოშა გინიღუ. ღორონთიშ შურით იესოქ სრულყოფილ დო უცოდარქ დებადუ (ლუკა 1:35).

11. მუჭო შეულებუდ ართ კოჩის, მილიონობით კოჩიშ გიშაჸიდირი?

¹¹ მუჭო შეულებუდ ართ კოჩის მილიონობით კოჩიშ გიშაჸიდირი? დეფიფქრათ, მუჭო გინირთ დუდშე მილიონობით კოჩიქ ცოდაშ მონათ? ქიგიფშინათ, შეცოდებათ ადამქ მიოდინუ სრულყოფილ სიცოცხლე. თაშ ნამდა, თის ვეშულებუდ სრულყოფილება გეგნოჩუკო მუშ გამნარყის. თის ხვალე ცოდა დო ღურაშ გინოჩამა შეულბუდ. იესოს, ნამუსით ბიბლია „უკანასკნელი ადამს“ უძახ, სრულყოფილ სიცოცხლე უღუდ დო დღას ვეშუცოდებ (1 კორინთელები 15:45). იესოქ ჩქი მირსხესკონ თიშენ, ადამიშ ადგილ ქიდეკინ. სიცოცხლეშ მუშ ნებათ შეწირუათ დო ღორონთიშ დაჯერათ, იესოქ გეგნიგუ ადამიშ ცოდაშ საფასური. თეგვარო, იესოქ ადამიშ გამნარყი უიმენდობაშე ირსხუ (რომაელები 5:19; 1 კორინთელები 15:21, 22).

12. მუ დამტკიც იესოქ ნინათ ვეიჭარენ ფერ ტანჯებაშ დროს?

¹² ბიბლიას კილკილშა რე ეჭარილ ტანჯება, ნამუთ იესოქ ღურაშ წოხლე გინიღუ: ჟგერთუა, ძელს მიკოჭკადუა დო წამება (იოანე 19:1, 16—18, 30; გეძინელ თემეფი, „მუშენ ვეგმირინუანა ჭეშმარიტ ქრისტიანეფი ჯვარს თაყვანიშცემაშ დროს?“). მუშენ რდუ აუცილებერ, იესოქ თაშ იწვალკონ? თე წიგნიშ ართ-ართ უკულიან დუდშე გებგენთ, ნამდა სატანაქ ეჭვიშ თუდო გიორინუ, ქოჸუნდ დო-ვარ იეჰოვას თიცალ მსახურეფი, ნამუთ განსაცდელიშ დროს თიშ ართგურო ქუდოსკიდუდეს. იესოქ ღორონთიშ ართგურო ქუდოსქიდ ნინათ ვეიჭარენ ფერ ტანჯებაშ დროს ხოლო დო ათეთ პასუხ ქიმეჩუ სატანაშ წუმოჭკირილ საკითხის. იესოქ დამტკიც, ნამდა სატანაქ მუდგა ვაკეთუკონ, ნებაშ თავისუფლება უღუნფერ სრულყოფილ კოჩის შეულებუდ ბოლოშა ღორონთიშ ართგურო ქუდოსქიდკონ. მუშო ოკო რაგად, ღორონთშო მანგარ სახიოლო რდუ მუშ საჸოროფო სქუაშ ართგურო დოსქილადა! (იგავები 27:11).

13. მუჭო მოხვად გიშაჸიდირალიშ გინოგაფაქ?

¹³ მუჭო მოხვად გიშაჸიდირალიშ გინოგაფაქ? იეჰოვაქ დაუშუ, ნამდა ახალ წანაკოროცხუათ 33 წანას, ებრაულ კალენდარით ნისანიშ თუთაშ მა-14 დღას, მუშ სრულყოფილ დო უცოდარ სქუა დოღურედკონი. თეგვარო, იესოქ „ხვალე ართშა“ შეწირუ მუშ სრულყოფილ სიცოცხლე (ებრაელები 10:10). ღურაშე მასმა დღას ღორონთიქ იესო გათელუ დო სულიერ სიცოცხლე დურთინუ. ზეცას იესოქ ღორონთის წარუდგინ მსხვერპლო შეწირულ სრულყოფილ სიცოცხლეშ საფასური, ნამუთ გინოგაფილ რდუ ადამიშ გამნარყიშ გიშაჸიდირალო (ებრაელები 9:24). იეჰოვაქ მიღუ იესოშ მსხვერპლიშ საფასურ, მუჭოთ კაცობრიობაშ ცოდა დო ღურაშ მონობაშე ორსხებელ გიშაჸიდირალი (წეკითხი რომაელეფიშ 3:23, 24).

მუს შილებე ნიშნენდას სქანო გიშაჸიდირალი?

14, 15. მუ ოკო ვაკეთათ ცოდეფქ ქიმეპატუანინ თიშენ?

¹⁴ მართალ რე, ცოდამეფ ვორეთ, მარა გიშაჸიდირალს შეულებ დიდ ჯგირობუა მომღან. მორთ ქობძირათ, მუ ჯგირობუაშ მოღალა შეულებ თე დიდებულ საჩუქარს ამდღა დო ანწიან წიმი.

¹⁵ ცოდეფიშ პატიება. მემკვიდრეობათ მიღებულ არასრულყოფილებაშ გურშენ ჩქინო ნამდვილო ვა რე ადვილ, ვაკეთათ თინა, მუთ სწორ რე. სიტყვათ იჸინო დო-ვარ საქმეთ, ირ კოჩ ფცოდენთ. მარა იესოშ გიშაჸიდირალით შილებე მეპატუან ჩქინ ცოდეფქ (კოლოსელები 1:13, 14). ცოდეფქ ქიმეპატუანინ თიშენ, აუცილებერ რე მთელ გურით მიმნანუათ. თეშ გარდა, ჩქი ოკო ბწანდან ქრისტეშ გინოგაფილ გიშაჸიდირალ დო თიშა გერსხილო თანდაბლურო ოკო ფთხუათ იეჰოვას ცოდეფიშ პატიება (წეკითხი 1 იოანეშ 1:8, 9).

16. მუ მარზენა თიშ საშვალებას, ნამდა სუფთა სინდისით ფცათ იეჰოვას თაყვანი დო მუშენ რე სუფთა სინდის მნიშვნელოვანი?

¹⁶ სუფთა სინდის ღორონთიშ წოხოლე. შილებე სინდის მაწუხენან თიშენ, გურქ გომტირხან დო მუთუნიშ მოღე ვა ვორეთინ თეშ მიფრჩქინათ დუდი. მარა იეჰოვა გიშაჸიდირალით ცოდეფს მაპატიენა. მართალ რე, არასრულყოფილეფ ვორეთ, მარა ღორონთი იშენ მარზენა საშვალებას, სუფთა სინდისით ფცათ თის თაყვანი (ებრაელები 9:13, 14). თენა ხეს მინწყუნა, იეჰოვაწკუმა „სიტყვაშ სითამამე“ მიღდან დო თავისუფალო დევეახლოვათ თის ლოცვათ (ებრაელები 4:14—16). სუფთა სინდის სულიერ სიმშვიდეს მარზენა, მოხვარნა დაფასებულო იბგინათ დუდი დო ვორდათ ბედნერეფი.

17. მუ ხვამა-ჯგირობუაშ მოღალა შეულებ ჩქინო ქრისტეშ ღურას?

¹⁷ სამოთხეთ გინორთელ დედამიწას მარადიულო ცხოვრებაშ იმენდი. „ცოდაშ ოგაფური ღურა რე“, — იჩიებ რომაელეფიშ 6:23. კინ თი მუხლის ჭარ: „მარა ძღვენ, ნამუსით ღორონთი მარზენა — მარადიულ სიცოცხლე ჩქინ უფალი იესო ქრისტეთ“. თე წიგნიშ მა-3 დუდშე ქიგებგით, მუნერ ცხოვრება იჸუაფუ სამოთხეთ გინორთელ დედამიწას (გამოცხადება 21:3, 4). მარადიულ სიცოცხლე, სრულყოფილ ჯამრთელობა დო შხვა ხვამა-ჯგირობუა ქრისტეშ ღურაშ ჭყოლოფუათ შემლებნა მიბღათ. თე ირფელ მიბღათინ თიშ გურშენ, გიშაჸიდირალიშ მარდიელ ოკო ვორდათ.

მუჭო შეილებ მარდიელ რდე?

18. მუშენ ოკო ვორდათ იეჰოვაშ მარდიელ გიშაჸიდირალიშ გურშენ?

¹⁸ მუშენ ოკო ვორდათ გიშაჸიდირალიშ მარდიელ? საჩუქარ განსაკუთრებულო მუმაჰამაფალ რე, მუჟამს გიჩქუ, ნამდა მიდგარენქ თის ბრელ დრო დო ფარა გიახარჯუ. საჩუქარ ხოლო უმოს ძვირფას რე, მუჟამს თინა ჸოროფათ რე მოჩამილი. გიშაჸიდირალ არძაშ უმოს ძვირფას საჩუქარ რე, მუშენდა ღორონთიქ თეშ გურშენ დიდ მსხვერპლშა იდუ. „ღორონთიქ თეშ ქიჸოროფუ ქიანა, ნამდა ქიმეჩუ მუშ ხვალეგუნაჭყეფ სქუა“, — ნარაგად რე იოანეშ 3:16-ს. გიშაჸიდირალიშ გინოგაფათ ჯგირო ქიძირუ, მუჭო უჸორთ ღორონთის. გიშაჸიდირალშე იესოს უჸორთინ თიქ ხოლო ქიძირუ, მუშენდა თიქ ჩქინ გურშენ სიცოცხლე დათმუ (წეკითხი იოანეშ 15:13). თაშ ნამდა, გიშაჸიდირალქ დუმარწმუნან ოკო, იეჰოვას დო იესოს თითოულ ჩქინთაგან უჸორთინ თიშა (გალატელები 2:20).

19, 20. მუჭო შეილებ ოძირუე, ნამდა მარდიელ რექ გიშაჸიდირალიშ?

¹⁹ მუჭო შეილებ თიშ ძირაფა, ნამდა ღორონთიშ ძღვენიშ, გიშაჸიდირალიშ, მარდიელ რექ? პირველ რიგის, უმოს ქიგეგი იეჰოვაშ გურშენ, მიდგაქ მუჩეს თენა (იოანე 17:3). ათე წიგნით ბიბლიაშ გურაფა უჯგუშო გუგოჩინებაფუანს ღორონთის. მუთ უმოსის გეგენქ იეჰოვაშენ, თით უმოსო ქიჸოროფუანქ თის. მუჟამს თეცალ ჸოროფა გიღუნ, მუთ შილებენ ოცადუქ თიშ მოსაწონქ ქიჸუე (1 იოანე 5:3).

²⁰ რწანდას ქრისტეშ გიშაჸიდირალ მსხვერპლი. იესოქ თქუ: „მიდგას ღორონთიშ სქუა წანს, თის მარადიულ სიცოცხლე უღუ“ (იოანე 3:36). მუჭო შემლებნა ვოძირათ, ნამდა ბწანა იესო? რწმენა ხვალე სიტყვეფშე ვეძირე. იაკობიშ 2:26-ს ბკითხულენთ, ნამდა „რწმენა ღურელ რე საქმეეფიშ უმშო“. მართალ რე, ნამდვილ რწმენაქ „საქმეეფით“ ოკო დემტკიცას. ჩქი ოკო ვეცადათ, ირნერო მიფქცუათ იესოცალო, ხვალე რაგადით ვარინ, საქმეშ კეთებათ ხოლო. თენა ართ-ართ საშვალება რე, ქუვოძირათ, ნამდა ბწანა იესო (იოანე 13:15).

21, 22. ა) მუშენ ოკო დევესწრათ უფალიშ გოშინაშ ონჯუას, ნამუთ ირ წანას იტარებუაფ? ბ) მუ საკითხშენ მაღვენუნა რაგად მა-6 დო მა-7 დუდეფს?

²¹ ქიდესწრი უფალიშ გოშინაშ ონჯუას, ნამუსით ირ წანას აღნიშნენა. თე დღა იესოქ ახალ წანაკოროცხუათ 33 წანაშ 14 ნისანიშ ონჯუას დაწესუ დო ბიბლიას თინა „უფალიშ ოსერშეთ“ რე მოშინაფილ (1 კორინთელები 11:20; მათე 26:26—28). თის ქრისტეშ ღურაშ გოშინაშ ონჯუა ხოლო ჯოხო. თე დღა იესოქ მუშ მოციქულეფშო დო არძა ჭეშმარიტ ქრისტიანშო დაწეს, თიშ გასაშინეთ, ნამდა თიქ მუშ სრულყოფილ სიცოცხლე გიშაჸიდირალო დათმუ. იესოქ თე განსაკუთრებულ დღაშენ თქუ: „თენა აკეთით ჩქიმ გასაშინეთ“ (ლუკა 22:19). გოშინაშ ონჯუა გუმოშინანა, ნამდა იეჰოვაქ დო იესოქ დიდ ჸოროფა გიმირჩქინეს ჩქინ გიშაჸიდირით. გიშაჸიდირალიშ მარდიელ იპჸით, ქრისტეშ გოშინაშ ონჯუას ქიდვესწრებუთ-და.a

²² გიშაჸიდირალ ნამდვილო იეჰოვაშ დიდებულ საჩუქარ რე (2 კორინთელები 9:14, 15). თე ძვირფას საჩუქარ ღურელეფს ხოლო მოუღანს ჯგირობუას. მა-6 დო მა-7 დუდეფს ქიფჩიებუთ თე საკითხშენ.