ᲒᲐᲙᲕᲔᲗᲘᲚ 11
რწმენაშ გამოცდა
აბრაამქ მუშ სქუას, ისაკის, გურშა ქინუდვჷ იეჰოვაშ ჸოროფა დო თიშ დუნაპირებუეფიშ მიმართ ნდობა გუვითარ. ისაკ სოდგარენ 25 წანერ რდუნ თეშ, იეჰოვაქ აბრაამს მანგარ რთულ მუდგარენიშ კეთება თხუ. გიჩქუნო, მუ თხუ იეჰოვაქ აბრაამს?
ღორონთიქ აბრაამს უწუ: რთხინქჷ, ხე ქიმეთხჷ სქან სქუას, გეკიჸუნ მორიაშ გვალაშა დო თექ მსხვერპლო შემოპწირ თინა. აბრაამ აზრის ვა რდჷ, მუშენ თხინდჷ იეჰოვა თეცალ მუდგარენიშ კეთებას, მარა იშენით დემორჩილ ღორონთის.
მაჟია დღას, იალონშა, აბრაამქ მიდეჸუნ ისაკ დო ჟირ მსახურ დო მიდართჷ მორიაშ გვალაჸურე. სუმ დღაშ ოულარ შარა გემკორთესინ, თე გვალაქ გემკორჩქინდჷ. აბრაამქ მუშ მსახურეფს უწუ, თექ ქუდოსქიდესკო დო ქუჯინესკო, ონდო მუ დო ისაკ გვალაშა ეკიშეს დო მსხვერპლის შეწირენდეს. უკულ აბრაამქ ისაკის დიშქა ქიმეჩ ოღალარო დო მუქ ხამ გეჭოფ. ისაკიქ მუამუშის კითხჷ: ქო მარა, მსხვერპლო შესაწირ ცხოველ სო რე? აბრაამქ უპასუხ: იეჰოვა გემკარჩქინანს, სქუა.
გვალაშა გეკორთესინ, სამსხვერპლო გეიაშენეს. უკულ აბრაამქ ისაკის ხელეფ დო კუჩხეფ დოუბორკჷ დო სამსხვერპლოს ქიგიონჯირუ.
აბრაამქ ხამ გეჭოფუნ, ხეთეშე იეჰოვაშ ანგელოზიქ ზეცაშე ქუდუძახ: აბრაამ! მუთუნ ვა დუშუა ბოშის! ასე უკვე მიჩქჷ, ნამდა გიღჷ რწმენა, მუშენდა მსხვერპლო სქან სქუაქ ვედგენარღჷ. უკულ აბრაამქ ბართვის ქალეფით მიშახართილ ოჩ ქოძირ; ისაკის ხეთეშე გოუნწყჷ თოკით ბორკილ ხე დო კუჩხ დო თიშ მანგიორო ოჩ შეწირ მსხვერპლო.
თიმ დღაშე მოჸუნაფილ, იეჰოვა აბრაამს მუშ მეგობარო მიშინუანდჷ. ქოიჩქუნო მუშენ? თიშენ, ნამდა აბრაამქ თინა აკეთ, მუთ იეჰოვას ოკოდ, ვარინ ვა უჩქუდ, მუშენ თხუ იეჰოვაქ თენა.
იეჰოვაქ კინ გუმეორ აბრაამს მუშ დუნაპირებ: დორხვამანქ დო გუვამრავლენქ სქან გამნარყის. თე დუნაპირებ თის ნიშნენდჷ, ნამდა იეჰოვა არძა ჯგირ ადამიანს აბრაამიშ ოჯახიშ საშვალებათ დოხვამანდ.
„ღორონთიქ ქიანა თიშმანწარათ ქიჸოროფუ, ნამდა მუშ ხვალეგუნაჭყეფ სქუა ქიმეჩ, მუშენდა მიდგას თიშ წანსჷ, ვა ღურას დო ულიებ სიცოცხლე უღუდას“ (იოანე 3:16).