რშუდან ლოტიშ ოსურ!

ლოტ მუშ ბიძია აბრაამწკუმა ართო ქანაანს ცხოვრენდჷ. დროქ გემკორთუნ, აბრაამიშ დო ლოტიშ საქონელქ თეშ გემრავლჷ, ნამდა დანტირუ დიხა ვა უღუდეს. ათეშენ აბრაამქ ლოტის უწუ, ქარწყექ, თე დიხას უკვე ვემნტირეთ; რთხინქჷ, გეგშეგორ სოვრე გისხუნ ულა დო მა მაჟია მხარეს მიდურქია. არგამა რე, აბრაამ ხვალე მუშ დუდშო ვა ფიქრენდჷ.

ლოტიქ ქალაქ სოდომიშ გოხოლუას სქვამ ადგილ ქოძირ, სოდეთ წყარ ხვეიანო რდჷ დო ირდიხას მწვანე ოდიარე ჩანდჷ. ათეშენ თე ადგილ გეგშეგორ დო ოჯახამო გეგნორთჷ ოცხოვრებშა.

სოდომს დო თიშ გოხოლუა ქალაქის, გომორას, მანგარ გლახა ხალხ ცხოვრენდჷ. თინეფ თიცალ უბადოეფ რდესჷ, ნამდა იეჰოვაქ თე ქალაქეფიშ მოსპუალა გინოჭყვიდ. მარა ღორონთის ოკოდ, გინასქილიდუკო ლოტ დო თიშ ოჯახ, ათეშენ ჟირ ანგელოზ მიდაშქვჷ, ნამდა გაფრთხილკო თინეფ. ანგელოზეფქ თინეფს უწუეს: ქიჩქარით! ქიდიტეთ თე ქალაქ! იეჰოვას თიშ მოსპუალა ულამ!

ლოტის ხეთეშე ვა დუტებ ქალაქ დო ვართ ჩქარენდჷ თეშ კეთებას. ათეშენ ანგელოზეფქ ხე ქიმეთხეს ლოტის, თიშ ოსურს დო თინეფიშ ჟირ ცირასქუას დო სასწრაფოთ გეგშეჸუნეს თევრეშე. ურაგადუდეს: ინტით, დუდის მეხვარით! უკახალე ვემკიჯინათ! ქიმკიჯინეთ-და, დოღურუთ!

ქალაქ ცოარშა გენორთესინ, იეჰოვაქ სოდომს დო გომორას დაჩხირიშ დო წურწუფაშ ჭვემა გოუტუ. ჟირხოლო ქალაქიქ ქიგიფაფალ. ლოტიშ ოსურქ ვედემორჩილ იეჰოვას დო უკახალე მიკიჯინ, ათეშენ თიქ ჯიმუშ ქანდაკებათ გინირთჷ. მარა ლოტის დო თიშ ძღაბეფს მუთუნ ვა ღოლამუნა, მუშენდა დემორჩილეს იეჰოვას. მუშო ოკო რაგად, ლოტიშ ოსურიშ დაუმორჩილებლობა თიშ ოჯახიშ წევრეფს მანგარ გინაღალარ აჸიდეს. მარა თით იჸუაფუდეს ბედნერეფ, ნამდა მიაჸუნეს იეჰოვაშ მითითებეფს.