მუჭო თირანს ჩილ დო ქომონჯიშ ცხოვრებას ბაღანა

ბაღანაშ დაბადებას ხიოლწკუმა ართო პრობლემეფ ხოლო მოჸუნს. მით ახალ მშობლეფ რეთინ, შილებე გიკვენდან, ნამდა თქვან დრო დო ენერგია ბაღანაშ მუკოლუაფას მეუღუ. სერიშ ტახუა დო ემოციურო გინოშულადაშ გურშენ შილებე ართიანწკუმა ურთიერთობაქ გილგელან. ბაღანას მუკულუათ დო ოჯახი ხოლო ვაკარღვათინ თიშ გურშენ, ჟირხოლოს გაჸინა მუდგაინ ოთირალ. მუჭო მოხვარნა ბიბლია თე პრობლემეფიშ გიშანწყუალას?

1 გიჩქუდან, ნამდა ბაღანაშ დაბადება თირანს თქვან ცხოვრებას

მუს იჩიებ ბიბლია: „ჸოროფა ითვინენს დო კეთილ რე . . . მუშის ვემეთხოზ, ვეღიზიანებ“ (1 კორინთელები 13:4, 5). თქვა ახალ დუნაბად სქუა ქორჸუნან-და, ვა რე გასაკვირ, მთელ ყურადღებას თის უთმენდათინ. თეცალ დროს შილებე თქვან ქომონჯიქ დუდ ხვალახეთ იგინას; ათეშგურშენ ვაგგოჭყორდან, ნამდა თქვან ყურადღება თის ხოლო ოსაჭირ. მითვინენთ დო ირნერ ჯგირს გაკეთენთ-და, თქვან მეუღლე ქიგინანს, ნამდა ბაღანაშ რდუალაშ დროს თიშ მონაწილება ხოლო რე საჭირო.

„თქვა ხოლო ქომონჯეფი, მიღითინ თი რჩქინათ გაგრძელით თქვან ოსურეფწკუმა ცხოვრება“ (1 პეტრე 3:7). გიჩქუდან, ნამდა თქვან ოსური მთელ მუშ ძალეფს ბაღანაშ მუკოლუაფას მიკალიენს. თის ასე ახალ პასუხიშმგებლობაქ ქიგიაძინ დო შილებე ნერვეფ აფდას მოფაჩილ, გინოშულადირ რდას ვარდა დეპრესია უღდას. მინშა შილებე თიქ გეჩხუპან, მარა თეცალ დროს ქეცადით მშვიდას რდათ, მუშენდა „გაჟღამებას ვა ჩქარენსინ ფერ კოჩი ძალიერს უჯგუ“ (იგავები 16:32). რდათ გონიერ დო საჭიროქ ქიჸუ-და, ქიმეხვარით (იგავები 14:29).

მუ ოკო ქიმინათ:

• მუმალეფი: ქიმეხვარით თქვან ოსურეფს ბაღანაშ მუკოლუაფას, სერქ გაჸუან ოტახალქინ ხოლო. შხვა საქმეეფს ჭიჭე დრო გეგმურთით დო თქვან ოსურ დო სქუას ქიმკაჯინით.

• დიდალეფი: ვარია ვა უწუათ თქვან ქომონჯეფს, ქიმგეხვარან ბაღანაშ მუკოლუაფას. თქვან ქომონჯის საქმექ ჯგირო ვაკეთებუ-და, ვა გაკრიტიკათ. ჸოროფათ გეუნწყით, მუჭო ოკო იკეთინას შხვადოშხვა საქმექ.

2 გამანგარით თქვან ურთიერთობეფი

მუს იჩიებ ბიბლია: „ართ ხორცი იჸუაფნა“ (დაბადება 2:24). მართალ რე, თქვან ოჯახის ძინა რე დო ახალ ოჯახიშ წევრი რჸუნა, მარა ვაგგოჭყორდან, ნამდა თქვა იშენით „ართ ხორცი“ რეთ. ირფელ გაკეთით თქვან ურთიერთობეფიშ გამანგარებელო.

ოსურეფი, მარდიელეფ რდათ თიშ, ნამდა ქომონჯეფი გოხვარნა დო ელაირენან. თქვან გემუან სიტყვეფს შეულებ კოჩი დასკილიდუას (იგავები 12:18). ქომონჯეფი, ქოუწით თქვან ოსურეფს, ნამდა თინეფიშ ოსხუნურ მითინ ვა რჸუნა დო მანგარო გიჸორან. ქაცქვეთ თის, ოჯახიშ მუკალუაფარო ირფელს ორთუნ თიშენ (იგავები 31:10, 28).

„თითოულქ თინა ვაგორას, მუთ მუშო რე მარგებელინ, მუთ შხვაშო რე მარგებელინ თინა გორას“ (1 კორინთელები 10:24). მუთ მეუღლეს ახიოლენ თინა აკეთით. მეუღლეეფი, ქაცქვეთ ართიანს, დოგორით დრო ართიანიშ დარაგადაფალო დო მარჩქილაფარო. სექსუალურ ურთიერთობაშ დროს ხვალე თქვან დუდშო ვეფიქრათ. მეუღლეშენ ხოლო ქიფიქრით. ბიბლიას ჭარუ: „ვემიარკათ ართიანს თენა, ხვალე თი შემთხვევეფიშ გარდა, მუჟამსით მირაგადუანთ“ (1 კორინთელები 7:3—5). თაშ ნამდა, ალალას ქორაგადეთ თე საკითხიშ გურშენ. მუჟამსით თქვან მეუღლეს ქუგუგენთ დო მოთვინებას გეგმირჩქინანთინ, თქვან ურთიერთობა უმოსო გემანგარებუ.

მუ ოკო ქიმინათ:

• ირო გეგმურთით ართიანს დრო.

• გეგმირჩქინით მეუღლეშ ჸოროფა დო ჭიჭე მუდგარენეფით ქაგინებაფეთ, გიჸორან თინა; ქუდუტეთ წერილი ვარდა ქაჩუქით მუდგაინ.

3 ჯგირო მორდით სქუალეფ

მუს იჩიებ ბიბლია: „ჭიჭენობაშე გიჩქუ წმინდა წერილეფი, ნამუსით იესო ქრისტეშ რწმენათ შეულებ სქან დაბრძენება გინასქილადარო“ (2 ტიმოთე 3:15). მიფიქრით მუშ კეთება შეილებნა თქვან სქუას ქუდაგურუათინ თიშო. ბაღანას ფარსაკო შეულებ ირფელიშ დოგურაფა; თინა დაბადებაშახ ხოლო გურაფლენს. თქვან ბაღანა ქვარას რენ თეშ იჩინენს თქვან ხონარს დო გინაფლენს თქვან ემოციეფს. ჭიჭენობაშე უკითხით. მართალ რე, თინა ვეგეგენს ნაკითხირს, მარა მუჟამს გემწირდუნ კითხირ უჸორდას იჸი.

ჭიჭე რდასინ ხოლო, ეჩით თქვან სქუას ღორონთიშ გურშენ. ქარჩქილეთ თქვან ლოცვეფშა (კანონი 11:19). ლაჸაფიშ დროს ხოლო ეჩით თქვან სქუას ღორონთიშ გუნაჭყეფუშ გურშენ (ფსალმუნი 78:3, 4). მუჟამსით თქვან ჭიჭე გემწირდუნ, ქოძირუნს, მუჭო გიჸორა ღორონთი დო მუ ხოლო ქიჸოროფუანს თის.

მუ ოკო ქიმინათ:

• ბაღანაშ ორდალო ღორონთის ქოთხით სიბრძნე.

• გაუმეორით სქუას მთავარ სიტყვეფი დო აზრეფი, ჭიჭენობაშე ქიდიჭყას გურაფან თიშენ.