მუჭო ოკო მორდათ სქუა

მუჟამსით იეჰოვაქ ოჯახი გაჭყუნ, სქუალეფიშ რდუალა მშობლეფს დავალუ (კოლოსელები 3:20). მშობლეფი, თქვა გოვალნა ქოუჸოროფუათ სქუას იეჰოვა დო თეშ მორდათ, ნამდა პასუხიშმგებლობას გინაფლენსინ ფერ კოჩიქ ქიჸუას (2 ტიმოთე 1:5; 3:15). თინა ხოლო გოვალნა, ქიგეგათ გურს მუ უღუ თქვან სქუას. მუშო ოკო რაგადი, თქვა ხოლო ოკო ირზენდათ მაგალითის. პირველ რიგის თქვა ოკო გიჸორდან ღორონთიშ სიტყვა დო თეშ უკულ შეგალებენა თქვან სქუალეფს ხოლო ქუჸოროფუათ თინა (ფსალმუნი 40:8).

1 სქუალეფ თავისფალო ოკო იჩიებდან თქვანწკუმა

მუს იჩიებ ბიბლია: „რდათ ჩქარ მორჩქილაფას დო ვეჩქარათ რაგადის“ (იაკობი 1:19). სქუალეფს თქვანწკუმა რაგადი თავისფალო ოკო შეულებდან. ბაღანეფს ოკო უჩქუდან, ნამდა თქვა დღას ვედგეზარებნა თინეფიშ მორჩქილაფა. თეშ ქიმუდირთით, ნამდა თქვან სქუალეფქ თავისუფალო ქოთქუან, მუთ გურს ელაძნან თინა (იაკობი 3:18). თინეფს თეშ ქიმიორჩქნა, ნამდა თქვა ჸინჩას ქიმექციებუთ დო ირფელშე გაკრიტიქენთ-და, შილებე გურშა ქენიხვილან დო შურო მუთუნ ვაიწუან. მუთვინით თქვან სქუალეფს დო ქაგინებაფეთ, გიჸორან თინა (მათე 3:17; 1 კორინთელები 8:1).

მუ ოკო ქიმინათ:

• ირო ქიმიჩომილეთ, მუჟამსით სქუალეფ თქვანწკუმა მიკორინუანა რაგადის.

• სქუალეფწკუმა ხვალე პრობლემეფიშ დროს ვარინ, ირიათო რაგადეთ.

2 ქეცადით ქიგეგათ, მუს ფიქრენა

მუს იჩიებ ბიბლია: „მით საქმეს ინონჭაფაშ უნარს გიმირჩქინანსინ, ირფელ ჯგირ აში“ (იგავები 16:20). ქუგოკონა ქიგეგათ, თქვან სქუალეფ მუს ფიქრენან-და, ქენანჭათ ოკო, მუ გერე თინეფიშ სიტყვეფიშ უკახალე. ეში, ახალგაზრდეფს სიტყვეფიშ გომბარუა უჩქნა დო ხშირას ართის იჩიებნან თი დროს, მაჟიას ფიქრენა. ბიბლიას ჭარ: „მორჩქილაფაშახ პასუხიშ მეჩამა, უჭკუობა რე“ (იგავები 18:13). თაშ ნამდა, უცფას გურ ვემიჸონათ (იგავები 19:11).

მუ ოკო ქიმინათ:

• სქუალეფქ მუდგა ვაიწუანინ, რაგად ვემიოტებაფუათ დო ვეგეჸალათ.

• ქიგიშინით, მუს გინაფლნედით, მუჟამსით თინეფიშ მახანა რდით დო მუ რდუ თქვანო მნიშვნელოვანი.

3 ქაძირეთ სქუალეფს, ნამდა ართ აზრიშ რეთ

მუს იჩიებ ბიბლია: „ქუმურჩქილე, სქუა, მუასქანიშ ზუკოლს დო დიასქანიშ კანონს ვეურთა“ (იგავები 1:8). იეჰოვაქ სქუალეფიშ რდუალა ჟირხოლო მშობელს დავალუ. მშობლეფი, ქუდაგურეთ თქვან სქუალეფს პატი რცან დო დაიჯერან (ეფესოელები 6:1—3). ბაღანეფი გინაფლენა, მუჟამსით მშობლეფი ართ აზრიშ ვა რენა (1 კორინთელები 1:10). ნამთინე საკითხშე ვემირიგით-და, ქეცადით თენა ბაღანეფიშ წოხოლე ვეგმოხანტათ, მუშენდა თინეფქ შილებე თქვან პატიცემა მიოდინუან.

მუ ოკო ქიმინათ:

• ქიმირაგადეთ, მუჭო რდუნთ თქვან სქუალეფს.

• ბაღანეფიშ რდუალაშ გურშენ შხვადოშხვა აზრი ქოიღუნან-და, ქეცადით, ქუგუგათ თქვან მეუღლეს.

4 ქიმიფიქრით რდუალაშ მეთოდეფი

მუს იჩიებ ბიბლია: „სქუა თეშ მორდი, ნამდა სწორ შარათ გილართას“ (იგავები 22:6). სქუალეფიშ რდუალა ვემიეფუათ. ქიმიფიქრით რდუალაშ მეთოდეფი, ნამდგაშა ბაღანეფიშ დასაჯება ხოლო მიშურს (ფსალმუნი 127:4; იგავები 29:17). ბიბლიას მოშინაფილ სიტყვა „დასაჯებაშა“ თინა ხოლო მიშურს, ნამდა ქაძირუათ სქუალეფს, მუ გერე თე წესეფიშ უკახალე (იგავები 28:7). ქუჸოროფეთ იეჰოვაშ სიტყვა დო ქიმეხვარით, ქინანჭან თექ მოჩამილ პრინციპეფს (ფსალმუნი 1:2). თენა ქიმეხვარებ თინეფს სინდისიშ რწაფუას, ნამდა ქეშიალებუან ჯგირ დო ფურიშ გიშაგორუაქ (ებრაელები 5:14).

მუ ოკო ქიმინათ:

• ქეცადით, ნამდა თქვან სქუალეფშო ღორონთი რეალურ დო სანდო რდას.

• ქიმეხვარით თინეფეს, გეგშეჩინან დო დუდ ეუჩილითუან თი ღამაკის, ნამუსით შილებე ინტერნეტის ვარდა სოციალურ ქსელეფს შეხვადან. ქუდაგურეთ, მუჭო ითხილუან დუდ სექსუალურ მონძალეეფშე.