მუშენი რე ჯგირი ბიბლიური პრინციპეფით ცხოვრება?

1. მუშენი მოსაჭირუნა ხელმძღვანელობა?

ჩქინი გუმარჩქინე ღორონთი ჩქინდე ბრელით უმოს ბრძენი რე. თინა მოჸოროფე მუმაცალო ზრუნენს ჩქინო. ღორონთის თეშ ვავაფუთი გორჩქინელი, ნამდა მუშე დამოუკიდებელო იფცხოვრათი (იერემია 10:23). მუჭოთ ბაღანას ოსაჭირუ მშობლეფიშ ხელმძღვანელობა, თეშ ჩქი ხოლო მოსაჭირუნა ღორონთიშ ხელმძღვანელობა (ესაია 48:17, 18). ღორონთი ბიბლიაშ მეშვეობით ხელმძღვანელენს მუში ხალხის. თე წიგნი ნამდვილო დიდი საჩუქარი რე ღორონთიშე. წეკითხით 2 ტიმოთეშ 3:16.

ღორონთიშ კანონეფი დო პრინციპეფი მოხვარუნა, უკვე ამდღარშე იფცხოვრათი, მუთ შილებე უჯგუშო დო მოძირანა მუჭო მიბღათ მომავალს მარადიული სიცოცხლე. ჩქი ღორონთიშ შექმნილი ვორეთ დო ათეშგურშენი სწორი რე დო სამართლიანი, მივაჸუნათ თიშ ხელმძღვანელობას დო ვორდათ მადლიერეფი. წეკითხით ფსალმუნიშ 19:7, 11; გამოცხადებაშ 4:11.

2. მუჭო ბხელმძღვანელენა ღორონთიშ სიტყვა?

ძირითადო ბიბლიური პრინციპეფი მოძირანა, მუჭო იფცხოვრათ ღორონთიშ მოსაწონო. მარა ბიბლიას კანონეფი ხოლო ინოჭარუ, ნამუთ მოგურუანა, მუჭო მიფქცუათი კონკრეტული სიტუაციეფს (კანონი 22:8). საჭირო რე გონიერება, ნამდა მიჩქუდანი, მუ შემთხვევას მუ პრინციპი გიმიბრინუათი (იგავები 2:10—12). მაგალთო, ბიბლია მოგურუანა, ნამდა სიცოცხლე ღორონთიშ საჩუქარი რე. თეშ რჩქინა მოხვარუნა, ფრთხილას ვორდათ ირდიხას, სოდგა ვავორდათი — სამუშას, ჸუდეს თუ შარას, დო საფრთხეს ვენვოჸოთათი ჩქინი დუდი დო შხვეფი. წეკითხით საქმეეფიშ 17:28.

3. ნამუ ჟირი პრინციპი რე არძაშ უმოსი მთავარი?

იესოქ არძაშ უმოსო ჟირი პრინციპის მიაქცუ ყურადღება. პირველი პრინციპი ოხუ ადამიანიშ ცხოვრებაშ მთავარი მიზანს — იჩინენდას ღორონთის, უჸორდას თინა დო ერთგულო ომსახურუდას თის. თე პრინციპი ჩქინი ცხოვრებაშ არძა გინოჭყვადილ საქმეს ოკო რჩქუდას (იგავები 3:6). მიდგა თე პრინციპით იცხოვრენს, დეახლოებუ ღორონთის, ბედნიერი იჸუაფუ დო მარადიულო იცხოვრენს. წეკითხით მათეშ 22:36—38.

მაჟია პრინციპი შხვეფწკუმა მშვიდობიან ურთიერთობას უნწყუნს ხეს (1 კორინთელები 13:4—7). თე პრინციპით ცხოვრება ნიშნენს, შხვეფს თეშ მივექცუათი, მუჭო ღორონთი ოქცუ. წეკითხით მათეშ 7:12; 22:39, 40.

4. მუშენი რე ჯგირი ბიბლიური პრინციპებით ცხოვრება?

ბიბლიური პრინციპეფი ოხვარუ ოჯახებს, უჸორდანი ართიანი (კოლოსელები 3:12—14). ბიბლიას შხვა პრინციპი ხოლო ინოჭარუ, ნამუთ ოხვარუ ჩილ დო ქომონჯის, თინეფიშ ქორწინება იროიანი რდას. წეკითხით დაბადებაშ 2:24.

ბიბლიური პრინციპეფიშ მეჸუნა მიმეხვარებუნა, ეიბჯუმუათი ჩქინი დუდი დო ოჯახი დო მიღუდანი შინაგანი სიმშვიდე. მაგალთო, დამსაქმებელეფი თიჯგუა მუშეფს გორუნა, ნამუთ ბიბლიური პრინციპეფით ცხოვრენა, შრომაშ მოჸოროფე დო პატიოსანი რენა (იგავები 10:4, 26; ებრაელები 13:18). ღორონთიშ სიტყვა თის ხოლო მოგურუანა, ნამდა კმაყოფილი ვორდათ აუცილებერი ნივთებით დო არძაშ უმოსო ღორონთიწკუმა ურთიერთობა დუვაფასათ. წეკითხით მათეშ 6:24, 25, 33; 1 ტიმოთეშ 6:8—10.

ბიბლიური პრინციპეფით ცხოვრება მოხვარუნა, მიღუდანი ჯგირი ჯამრთელობა (იგავები 14:30; 22:24, 25). მაგალთო, უზომოთ შუმაწკუმა დაკავშირებული ბიბლიური პრინციპეფი დამცვენა ლახალეფშე დო უბედური შემთხვევეფშე (იგავები 23:20). ღორონთი მარზენა შუმაშ უფლებას, მარა აუცილებერი რე ზომა მიჩქუდანი (ფსალმუნი 104:15; 1 კორინთელები 6:10). ღორონთიშ პრინციპეფი მოხვარუნა, ყურადღება მივაქცუათ, მუჭოთ ჩქინი საქციელს, თეშ ჩქინი ფიქრეფს (ფსალმუნი 119:97—100). მარა ჭეშმარიტი ქრისტიანეფი ღორონთიშ პრინციპეფს დო კანონეფს ხვალე მუნეფიშ საჯგირობუოთ ვეცვენა; პირველი რიგის, თეს იეჰოვაშ განსადიდებელო ორთუნა. წეკითხით მათეშ 5:14—16.