მუ რე გედვალირ ჩქინ ვებ-გვერდის?

იესო ქრისტექ მუშ მიმაჸუნალეფს უწუ: „თქვან სინთე ხოლო სინთანდას კათაშ წოხოლე, მუშენდა ორწყედან თქვან ჯგირ საქმეეფს დო განადიდენდან თქვან ზეციერ მუმას“ (მათე 5:16). ზუსტას ათეშგურშენ გიმიბრინუანთ ამდღარ ტექნოლოგიეფს, თიწკუმა ართო ინტერნეტის ხოლო. იეჰოვაშ მოწმეეფიშ ოფიციალურ ვებ-გვერდი რე jw.org, სოდეთ შეილებნა წეკითხათ ინფორმაცია თინეფიშ გურაფეფიშ დო საქმეეფიშ გურშენ. მორთ გეფჩინებაფუათ თე ვებ-გვერდი.

ბიბლიაშ პასუხეფ მნიშვნელოვან კითხვეფშე. თქვა შეილებნა ქიდაჭყათ პასუხეფიშ გორუა თიცალ მნიშვნელოვან კითხვეფშე, ნამუთ ხალხის ოინტერეს. თე კითხვეფშე ამშვ კითხვაშ პასუხი მოჩამილ რე ბუკლეტის „გოკონანო გიჩქუდან სიმართლე“, ნამუთ ვებ-გვერდის 400-შე მეტ ნინაშა რე ხეშამალაფარი. კინ თე ვებ-გვერდის შეილებნა ქოძირათ „ბიბლია — ახალ ქიანაშ თარგმანი“ 120-შე მეტ ნინაშა დო ბიბლიაშ გურაფას მიმეხვარებნან ფერ მუსხირენ პუბლიკაცია, მაგალთო, „მუს მოგურუანა ბიბლია სინამდვილეს?“, „საგუშაგო კოშკი“ დო „გამოიღვიძეთ“-იშ უახალაშ ნომერეფი. თე პუბლიკაციეფშე უმენტაშიშ მორჩქილაფა დო კითხირ ვებ-გვერდის რე შეიოლებერი; ქუგოკონა-და, შეილებნა გეგნოჭარათ პუბლიკაციაშ აუდიოჩანაწერი ვარდა პუბლიკაციეფი PDF ვარდა EPUB ელექტრონულ ფორმატით. შეილებნა პუბლიკაციაშ მუსხირენ გვერდი გოკონან თი ნინაშა გეშაბეშტუათ დო დაინტერესებულს ქიმეჩათ. პუბლიკაციეფიშ ვიდეო-ჩანაწერეფი ხეშამალაფარ რე ჟესტეფიშ ბრელ ნინაშა. შეილებნა ვებ-გვერდშე გეგნიჭარათ ბიბლიურ დრამეფი, „ბიბლიაშ მხატვრულო კითხირ“ დო სქვამ მელოდიეფი.

სწორ ინფორმაცია იეჰოვაშ მოწმეეფიშ გურშენ. თე ვებ-გვერდის თქვა შეილებნა ქიგეგათ ახალ ამბეფი დო ქოძირათ უახალაშ ვიდეოეფი, ნამუთ იჩიებ ჩქინ საქმეეფიშ გურშენ მთელ მსოფლიოს; თი ამბეეფიშ გურშენ ხოლო, ნამუთ ოხუ იეჰოვაშ მოწმეეფს დო თის, მუჭო მეხვარეს გაჭირებას რენან ფერ და დო ჯიმალეფს. თეშ გარდა, შეილებნა დოგორათ ინფორმაცია, მუ დროშო რე გინოჭყვიდილ რეგიონულ კონგრესეფიშ ჩატარება დო მუჭო შეილებნა დეკავშირათ თქვა გოინტერესნან თი ქიანაშ ფილიალს.

თეცალ საშუალებეფით შეიოლებერ რე, ჭეშმარიტებაშ სინთექ დედამიწაშ გვალო ბოლო წერტილს ხოლო სინთუას. ჩქინ ვებ-გვერდიშ გიმორინაფა ირ კონტინენტის რე შეიოლებერ, დო მუდგა გასაკვირ ვა რდასინ ანტარქტიდას ხოლო. ბლოცულენთ, ნამდა „იეჰოვაშ სიტყვაქ მუთ შილებე მალას გევრცელას“ მთელ ქიანას დო ღორონთიშ სახელქ გენდიდას (2 თესალონიკელები 3:1).

• მუჭო ოხვარ კათას ვებ-გვერდი jw.org ბიბლიურ ჭეშმარიტებაშ გაგებას?

• მუ ინფორმაციაშ გორუა გოკონა ჩქინ ვებ-გვერდის?