კითხვა დო პასუხი

მუშენ ვეშილებე იეჰოვაშ მოწმეეფიშ პუბლიკაციეფიშ პირად ვებ-გვერდის ვარდა სოციალურ ქსელეფს გედვალა?

ჩქი პუბლიკაციეფს უფასოთ ვავრცელენთ, ათეშენ ნამთინექ შილებე იფიქრას, ნამდა პირად ვებ-გვერდის ვარდა სოციალურ ქსელეფს თინეფიშ გედვალა პრობლემა ვა რე. მარა, თეშ კეთება ოწინააღმდეგ ჩქინ საიტიშ „გიმორინაფაშ წესეფს“a დო თეს სერიოზულ პრობლემეფ მოჸუნს. ვებ-გვერდიშ თე განყოფილებას გასაგებო რე ჭარილ, ნამდა ვეშილებე „თე ვებ-გვერდის მოჩამილ მასალაშ ინტერნეტის გედვალა (ნებისმიერ ვებ-გვერდის, ფაილეფიშ გაზიარებაშ გვერდის დო ვარდა სოციალურ ქსელს)“. მუშენ იჸუ საჭიროქ თე აკრძალვაქ?

ჩქინ ვებ-გვერდის მოჩამილ არძა მასალაშ საავტორო უფლებეფ დაცულ რე. განდგომილეფ დო შხვა მოწინააღმდეგეფ ოცადნა, ვებ-გვერდის მოჩამილ პუბლიკაციეფ თეშ გეგმირინუან, ნამდა შეცთომაშა გემშიჸონან, მუჭოთ იეჰოვაშ მოწმეეფინ თეშ, შხვეფ ხოლო. თე მასალა, ნამუთ თინეფიშ ვებ-გვერდის რე მოჩამილინ, თექ მიშულირ კოჩის ეჭვის ურჩქინანს (ფსალმ. 26:4; იგავ. 22:5). შხვეფ რეკლამეფშო გიმირინუანა ჩქინ პუბლიკაციეფს მოჩამილ მასალას დო ჩქინ ვებ გვერდიშ ლოგოს. თეშ საშვალებათ თინეფ შხვადოშხვა პროდუქციას დო აპლიკაციეფს გიმოჩანა. ჩქი მიღნა კანონიერ უფლება მიფთხუათ ჩქინ ლოგოშ დო საავტორო უფლებეფიშ დაცვება თით, ნამდა შხვეფს ვემეფჩათ თიშ უფლება, არასწორო გეგმირინუან ჩქინ საკუთრება (იგავ. 27:12). მარა, გლახა შედეგიქ შილებე ქუმაჸუნას, მუჟამსით შხვეფს, თინეფ შკას ჩქინ ჯიმალეფს ხოლო თიშ უფლებას ქიმეფჩანთ, ნამდა ვებ-გვერდის მოჩამილ მასალა, შხვა საიტეფს ქიგედვან დო ჩქინ ვებ-გვერდიშ ლოგო მუდგარენ მასალაშ გიმაჩამალო გეგმირინუან. თე დროს სასამართლოქ შილებე ვადაკმაყოფილას ჩქინ მოთხოვნა დო ვეშეზღუდას მოწინააღმდეგეფ დო კომერციულ საწარმოეფი.

ვებ-გვერდი jw.org-იშ გარდა, შხვა საიტეფშე ჩქინ პუბლიკაციეფიშ გინოჭარუა ვა რე უსაფრთხო. იეჰოვაქ სულიერ საზრდოშ გინოჩამა „ართგურ დო გონიერ მონას“ დავალ (მათ. 24:45). თინეფ, სულიერ საზრდოშ გინაჩამალო გიმირინუანა ვებ-გვერდეფს: www.jw.org, tv.jw.org დო wol.jw.org. თეს გეძინელ, მიღნა სუმ ოფიციალურ აპლიკაცია მობილურ მოწყობილობეფშო: „JW ნინეფი^®“, „JW ბიბლიოთეკა^®“ დო „JW ბიბლიოთეკა ჟესტეფიშ ნინაშა^®“. შემლებნა ბჯერდან, ნამდა თე აპლიკაციეფს ვეშეფხვადუთ შხვადოშხვა რეკლამეფს დო თი გლახა მუდგარენეფს, მუთ სატანაშ ქვეყნიერებას რე. სულიერ საზრდოს შხვა საშვალებეფშე ქობღებულენთ-და, თინა შილებე მიდგარენს შხვანერო აფდას გინოკეთებულ (ფსალმ. 18:26; 19:8).

თეს გეძინელ, მუჟამსით ჩქინ პუბლიკაციეფს თიცალ ვებ-გვერდის ქიგებდვანთ, სოდეთ კომენტარეფიშ ჭარუა შილებენ, თეთ განდგომილეფს დო შხვა კრიტიკოსეფს მეფჩანთ თიშ საშვალებას, ნამდა იეჰოვაშ ორგანიზაციაშ გურშენ ეჭვეფ გომრჩქინან. ნამთინე ჯიმა ონლაინ დებატეფშა მიშურს დო თეშნერ საქციელით იეჰოვაშ სახელს ონჯღორეს ოძირანს, მუშენდა, ონლაინ ფორუმეფ ვა რე თიცალ ადგილ, სოდეთ ქრისტიანს შეულებ „რბილაშე მეუდირთას უარყოფით განწყობა უღნან თინეფს დო თაშ არიგენდას ჭკუას“ (2 ტიმ. 2:23—25; 1 ტიმ. 6:3—5). თიქ ხოლო გეგმორჩქინდჷ, ნამდა არსებენს თიცალ სოციალურ ქსელეფიშ ექაუნთეფი დო ვებ-გვერდეფი, ნამუთ ჩქინ ორგანიზაციაშ, ხემძღვანელ საბჭოშ ვარდა თიშ ნამთინე წევრიშ სახელშა რე კეთებული. მარა ხემძღვანელ საბჭოშ ნამთინ წევრის ვა უღჷ პირად ვებ-გვერდი დო ვართ სოციალურ ქსელს რენა დარეგისტრირებული.

„სახიოლო ამბეშ“ გავრცელებას ხეს ვუნწყუნთ, მუჟამსით ხალხის ჩქინ ვებ-გვერდშა მივოწურუანთ (მათ. 24:14). თი ციფრულ საშვალებეფ, ნამუსით ჩქი მსახურებაშ დროს გიმიბრინუანთინ, ჭიჭე-ჭიჭეთ იუჯგუშებ. ჩქი მოკონა, ნამდა თეშე არძაქ მიღას სარგებელი. თეს გეძინელ, მუჭოთ „გიმორინაფაშ წესეფს“ რდუ ენწყუმილინ, თქვა შეილებნა შხვეფს ელექტრონულ ფოსტაშ საშვალებათ გეგნუჯღონათ საიტის მოჩამილ პუბლიკაცია ვარდა გაუზიარათ თე პუბლიკაციაშ ლინკი. მუჟამსით ხალხის ჩქინ ოფიციალურ ვებ-გვერდშა მივოწურუანთინ, ვარზენთ საშვალებას, ნამდა ნამდვილ სულიერ საზრდო მიღან „ართგურ დო გონიერ მონაშე“.