13-19 A ABRIL A 2026
NCIPO 52 Wiivahererya wa eKristau
Ele Opatiisu Ontaphulela awa ni Seeni ori awa Wootthuneya
“Mwawiixuttiheke . . . wiira akhale awiixutti aka, mwaapatisaka.”—MATH. 28:19.
ETTHU NIN’YA NHU OHUDHA
Nin’ya woona ele opatiisu ontaphulela awa, seeni ori awa wootthuneya ni ele enhela mpuwa opatisiwa.
1. Eseeni enoonihera wiira opatiisu yoohudhiha ya mbiibiliyani yootepa otthuneya?
HIYO ninnihakalala vawaatta vaavo nimmoona nhu ntthu apatisiwaka! Niire mwaanidhuwela wiira makristau a eseekulu yoopacera yoonenle dhiidho? Makristau awo yaahipaka nthukumano woopacera nihiku na Pentekoosti mwaakha wa 33 ni yaahiwoona atthu awaatta epatisiwaka. Nitho okathi owo nrummwa Pheeduru aahilotta mwaha atthokiheraka seeni opatiisu ori awa wootthuneya. (Mit. 2:38, 40, 41) Nrummwa Paaulu aatinkhe wiira ‘dhoohudhiha dhoopacera ininlotta Kriistu,’ enhela mpuwa ‘yoohudhiha ya opatiisu.’ (aHeb. 6:1, 2) Ndho okhala wiira opatiisu onhela mpuwa dhoohudhiha dhoopacera dha mbiibiliyani, ninnitthuneya wiiwasasa saana ele ontaphulela awa. Mwaha wa seeni?
2. Seeni nintthuneya nhu wiiwasasa saana ele opatiisu ontaphulela awa?
2 Nkhama dhiidhaale alisensu oolipa onkhalihera iye empa okhala yoolipa, wiiwasasa saana ele opatiisu ontaphulela awa ni seeni ori awa wootthuneya onoonikhalihera olipiha waamini wihu. Moohixikha akhala wiira nenna-va mumpaka marukunuso wiira mpatisiwe aahiidho akhala wiira mpatisiwe khalai, ootheene nhu ninnitthuneya wiiwasasa saana mwaha ola wootepa otthuneya. Tivondho yoosoma ela nin’ya waakhula makoho ala anttharelana: Opatiisu ontaphulelani ni seeni ori awa wootthuneya? Opatiisu onhela mpuwa eseeni? Ni seeni nimpatisiwa nhu mwa ndhina na Tiithi, Mwaana ni munepa wawaarya?
OPATIISU ONTAPHULELANI NI SEENI ORI AWA WOOTTHUNEYA?
3. Opatiisu onoonihera eseeni?
3 Opatiisu onniwoonihera atthu ootheene wiira nyuwo nhaakhulela ekhweeli voohima dha Yehova Muluku ni Yeesu Kriistu, moottharuwa itampi dhinyu ni moopaka marukunuso mweekumini mwinyu wiira mmurumeele Yehova. Nitho opatisiwa onnoonihera wiira nyuwo nhiiwasasa wiira Yehova oonrumeela Yeesu wiira onoopole itampi ni okhwa. Ohiya-vo vaavo mumpatisiwa nnyu, munnoonihera wiira nhiivahererya wa Yehova, niire dho, moopaka nivekelo mmulaiheraka wiira mun’ya nkaanrumeela veene vamodha ni ntthenkeso-ye. Wiivahererya ni opatisiwa, ontaphulela opacera ekumi epheya ya onrumeela Yehova mahiku ootheene.
4. Ontaphulelani opwinihiwa moomalela mmaadhini? (Moone-tho efootu.)
4 Okathi ntthu ompatisiwa iye onnipwinihiwa moomalela mmaadhini ni aasuliwa.a Ndho opwinihiwa onlikana ni okhwa avithiwa ni waasuliwa onlikana ni ohihimusiwa. (Mmoone aKolosi 2:12.) Opatisiwa onoonihera wiira ntthu oopaka marukunuso muulupale mweekumini-mwe. Mooporani? Okathi ntthu ompwinihiwa iye ontaphulela wiira woohiya ontthu-ye wa khalai, ni vaavo ntthu onaasuliwa iye, ontaphulela wiira woopacera ekumi epheya ya opaka yootthuna ya Muluku.
Vaavo ntthu ompatisiwa iye, elo entaphulela wiira owo oohiya ontthu-ye wa khalai, ni oopacera ekumi epheya ya opaka yootthuna ya Muluku (Moone ettima 4)
5. Seeni ninlotta nhu wiira wiilipihera ntthu ompaka iye wiira apatisiwe onoolikana ni wiilipihera wa Nowe wiira ateke ekalawa? (1 Pedru 3:18-21)
5 Munsome 1 Pedru 3:18-21. Mwa enamuna ekina hiyo pooti olikanyiha wiilipihera ntthu ompaka iye wiira apatisiwe, ni wiilipihera wa Nowe okathi aateka iye ekalawa. Akhala wiira nyuwo mpacenre naanaano onsoma Biibiliya, pooti woona olipa opaka marukunuso antthuneya wiira mpatisiwe. Woonawene nyuwo pooti woona olipa opaka elo oxira wiilipihera wa Nowe wiira ateke ekalawa. Masi niire munnitthuneya wiilipihera? Moohaakanyera nyuwo munnitthuneya wiilipihera muntakihaka Nowe. Muluku aahinleela Nowe moopora wooteka ekalawa, ndho wiira owo oopowe okathi wa epula ya Mutaaseke aatthuneya otthara malakihero aavahiwe iye ni Yehova. Mwaha wa waamini ni akhaliheriwaka ni Yehova, Nowe aahiiwelela ni aahiteka ekalawa. Owo ‘aahipaka dhootheene aarummwale iye ni Muluku,’ ni nyuwo nnoowerya opaka etthu emodharu.—Maph. 6:22.
6. Mwa enamuna seeni opatiisu onwoopolaawani?
6 Eveersu 21, nrummwa Pheeduru aatinkhe wiira: ‘Opatiisu onniwoopolani.’ Ekhweeli wiira opwinihiwa pahi mmaadhini khommwiiriha ntthu woopowa aahiidho oleveleliwa itampi-dhe, okhala wiira elo enweryaneya pahi oreela wa ephome ya Yeesu. (1 Yoh. 1:7) Masi hata eri dhiidho, opatisiwa etthu yootepa otthuneya okhala wiira Yehova olontte wiira etthu ninreerela nhu opaka. Opatiisu enamuna emodha ya ‘onvekela Muluku yawuupusera ya nrima yooloka.’ Yehova onoohakalala waakhula yooveka elo, alevelelaka itampi dhihu oreela wa nkuttho wa Yeesu. Ndho elo enamuna opatiisu ‘onwoopolaawani,’ niire dho, owo onniiriha oweryaneya wiira nyuwo mphwanye ekumi yoohimala.
ESEENI ENHELA MPUWA OPATIISU?
7. Malakihero seeni Biibiliya onvaha iye voohima dha opatiisu?
7 Nkhama noonne nhu, ohikhanle pahi opwinihiwa moomalela mmaadhini, Biibiliya khanlotta yooruma ekina voohima dha ele enreerela opakiwa okathi wa opatiisu. Masi owo ookhalana malakihero annikhalihera odhuwela etthu yoopaka okathi owo. Mwa ntakihero, owo onnaakhalihera ale an’ya opatisiwa odhuwela moopora woowara ni mweettelo atthu ari opuro owo anreerela awa okhalana. (1 aKor. 14:40; 1 Tim. 2:9) Okhala wene, asitokweene tanaapatisa atthu, masi hiyo khannaavuwiha anna anvahiwa eparakha elo. (1 aKor. 1:14, 15) Yehova onnaakhulela opatiisu moohixikha mwaattelo wa atthu ari opuro owo.—Mit. 8:36.
8. Makoho seeni ampakeliwa awa atthu an’ya opatisiwa, ni mwaha wa seeni? (Miteko 2:38-42) (Moone-tho efootu.)
8 Biibiliya onnoonihera wiira nihaana ‘olaleya woopoliwa wihu,’ niire dho, woonihera waamini wihu. (aRoma 10:9, 10) Hiyo ninnipaka elo ohiya pahi vaavo ninlaleerya nhu, masi-tho nihiku nimpatisiwa nhu okhala wiira woopoliwa wihu onlipa ni elo. Ndho mwaha wa elo, atthu ale an’ya opatisiwa annipakeliwa makoho maili. Noopacera ti nna: Niire moottharuwa dhoottheka dhinyu, nhiivahererya wa Yehova ni munnaamini wiira apinaatamu anoowerya woopoliwa pahi oreela wa nkuttho wa Yeesu Kriistu? Nikoho nna ninninuupusera mwaha Pheeduru aalontte iye nihiku na Pentekoosti, ni yoolakela-ya ori odhuwela ele ntthu owo opanke iye wiira apatisiwe. Nanaaili ti nna: Niire munnidhuwela wiira opatisiwa winyu onoonihera wiira nyuwo mun’ya okhala Namoona a Yehova ni nnoopacera wiirela mphantta ntthenkeso wa Yehova? Yoolakela ya nikoho nna, ori odhuwela ele ntthu owo on’ya iye akapaka. Owo onnilaihera wiira aakaantthara malakihero a ntthenkeso wa Yehova ni onrumeela owo vamodha ni anna ni arokora. Ti yeelo yaapanke awa atthu yaapatisiwe nihiku na Pentekoosti. (Nsome Miteko 2:38-42.) Ndho ale anaakhula ni nrima wootheene makoho ala maili yiiraka aayo, pooti opatisiwa.
Nihiku ntthu ompatisiwa iye ‘onnilaleya woopoliwa-we’ (Moone ettima 8)d
9. Eseeni ootheene nhu ninreerela nhu opaka wiira ninhakalalihe Mululu?
9 Pooti wiira hata nhinaakuve ohudhera ekhweeli, mwaari ntthu ooreera nrima ni khantanke opaka etampi yuulupale. Aahiidho pooti wiira nyuwo nhuiwe ni anaan’yari nnyu ari Anamoona a Yehova, yaawo yookhalihenreni ompheta Yehova. Ndho akhala wiira ti dhiidho, niire munnitthuneya ottharuwa itampi dhinyu ni opatisiwa wiira munhakalalihe Muluku? Aayo, moohixikha mweettelo nhu wa khalai, ootheene nhu ninnitthuneya odhuwela wiira noorava etampi yeelo ennikhoottiha waataana ni Muluku. (Esal. 51:5) Vaavo nintepa nhu ondhuwela saana Yehova, nihaana opweha yootthuna-ye ohoolo wihu oxira itthu dhinnidhivela. Ndho wiira nipake elo, nihaana ottharuwa mweettelo nhu wa khalai ni opacera okhala mwa enamuna eninhakalaliha Yehova. Nuumala opaka itthu idho, hiyo pooti opatisiwa.—Mit. 3:19.
10. Eseeni munreerela nnyu opaka hata akhala wiira mwaahipatisiwa etiini mweettela nnyu khalai?
10 Akhala wiira mwaahipatisiwa etiini mweettela nnyu khalai, nanlelo munnitthuneya opatisiwa nkhama Namoona a Yehova. Mwaha wa seeni? Mwaha wa wiira khalai, khimwaarina odhuwela woomalela wa ekhweeli voohima dha Yehova Muluku ni Yeesu. Hata akhala wiira mwaahipaka nivekelo mwiivahereryaka wa Muluku, okathi owo mwaaira nhaana odhuwela weekhweeli voohima dha yoolakela-ye. Nrummwa Paaulu aahaadhuwela alopwana kamodha-kamodha a wEefesu yaawo yaapatisiwe ehikhanlena odhuwela makristau yaareerela awa okhalana. Ndho mwaha wa elo, awo yaanitthuneya otthikela opatisiwa.b (Mit. 19:1-5) Nitho olelo-va, Yehova onnaakhulela opatiisu wa ale ampatisiwa erina odhuwela weekhweeli voohima dha yootthuna-ye.
SEENI NIMPATISIWA NHU ‘MWA NDHINA NA TIITHI, NA MWAANA NI NA MUNEPA WAWAARYA’?
11. Ontaphulelani opatisiwa ‘mwa ndhina na Tiithi, na Mwaana ni na munepa wawaarya’? (Matheyo 28:18-20)
11 Yeesu olontte wiira ahudheri apheya ahaana opatisiwa ‘mwa ndhina na Tiithi, na Mwaana ni na munepa wawaarya.’ (Munsome Matheyo 28:18-20.) Eseeni Yeesu aatthuna iye olotta ni moolumo ala? Okhala wene, vaavo Biibiliya onlotta iye nuulumo na wiira “ndhina,” onhima mweettelo wa ntthu. Nitho pooti ohimmwa nritti ni okhulupale ntthu owo oriiyena. Ndho vaavo nimpatisiwa nhu mwa ndhina na Yehova ni Yeesu, ninnoonihera wiira ninnidhuwela wiira awo tariina okhulupale ni ehakhi ya onileela etthu ninreerela nhu opaka. Ni vaavo nimpatisiwa nhu mwa ndhina na munepa wawaarya, ninnoonihera wiira ninnidhuwela nritti oraawana wa onivaha malakihero. Vano nirowe noone moopora nin’ya nhu owerya opaka elo.
12. Eseeni enhela mpuwa opatisiwa mwa ndhina na Tiithi? (Wiisuupulula 4:11) (Moone-tho efootu.)
12 Mwa ndhina na Tiithi. Hiyo ninnikhupali wiira Yehova Tiithi nhu a wiirimu, yoowo onivanhe ekumi. Owo Nanwerya Dhootheene ni Mpattusa a itthu dhootheene. (Munsome Wiisuupulula 4:11.) Hiyo ninnikhupali wiira owo onniiwa mavekelo nhu ni ninnirumeela ndhina-ne vaavo ninvekela nhu ni ninlotta nhu ni atthu akina voohima dha owo. (Esal. 65:2) Masi yookhala etthu ekina enhela mpuwa opatisiwa mwa ndhina na Tiithi. Mwa ntakihero, atthu yaamwiinwe Pheeduru alottaka mwaha nihiku na Pentekoosti yaanindhuwela Yehova. Masi okhuma nihiku nne mpakha nhoolo, awo yaanitthuneya okhupali wiira Yehova aaya waavaha ekumi yoohimala pahi oreela wa Yeesu Kriistu. Ni hiyo-tho nihaana okhupali etthu emodharu.—aRoma 5:8.
Nuumala opatisiwa nhihiye okhupali okhulupale wa Tiithi ni Mwaana ohela mpuwa nritti munepa wawaarya oraawana (Moone ettima 12)
13. Eseeni enhela mpuwa opatisiwa mwa ndhina na Mwaana? (Moone-tho efootu.)
13 Mwa ndhina na Mwaana. Hiyo ninnikhupali wiira Yeesu Mwaana Mmodheene a Muluku. Owo ‘ephuro’ ni oreela wa yoowo pahi, ninniwerya okhala axirikha a Yehova. (Yohani 14:6) Nitho Yeesu Moopoli nhu. Owo oonikhwela wiira niwerye okhalana eparakha ya ophwanya ekumi yoohimala. Odhuwela elo enninitumererya otthara ntakihero-ne mahiku ootheene, ohiya pahi vaavo nimpatisiwa nhu. (1 Yoh. 2:6) Ni nkhama Yeesu, ninnilaleerya mooluttuweliwa ni khaninhiya etthu ekina enooceelihaka opaka elo. (Luka 4:43) Hiyo niri oolikana ene ovilela hata okathi ninttharatthariwa nhu mwaha wa onrumeela Muluku moororomeleya. (2 Tim. 3:12) Hiyo ninninttittimiha Yeesu nkhama “muru wa muloko.” (aEefe. 5:23) Tivondho ninnihakalala owiiwelela ale Yeesu onaathanla iye wiira ekahoolela muloko ni ekaakhapelela atthareli-ye.—aEefe. 4:8, 11, 12.
Nuumala opatisiwa nhihiye okhupali okhulupale wa Tiithi ni wa Mwaana (Moone ettima 13)
14. (a) Eseeni enhela mpuwa opatisiwa mwa ndhina na munepa wawaarya? (Moone-tho efootu.) (b) Inamuna seeni ikina ikhanle dha opatiisu wa makristau Oothanliwa? (Moone ekwaaturu eni: “Inamuna Ikina dha Opatiisu wa Makristau Oothanliwa.”)
14 Mwa ndhina na munepa wawaarya. Hiyo noodhuwela ekhweeli voohima dha munepa wawaarya. Nkhama nindhuwela nhu, munepa wawaarya kahi ntthu ni khoniirela mphantta yoohudhiha ya amuluku araru, masi ikuru dha Muluku. Nitho ninnidhuwela wiira Yehova aahirumeela munepa wawaarya wiira aakhalihere maprofeeta ni atthu yaamwaatikha Biibiliya. Tivondho ninsoma nhu Nuulumo na Muluku ni nintthara nhu ele ninhudhiha awa. (2 Ped. 1:20, 21) Nitho ninnipaka itthu dhootheene ninwerya nhu wiira nihipake etampi yuulupale, okhala wiira ninnidhuwela wiira elo, pooti oniiriha hiyo aahiidho muloko oyeleela waakhela munepa wawaarya.—aEefe. 4:30.
Nuumala opatisiwa nhihiye okhupali nritti munepa wawaarya oraawana (Moone ettima 14)
15. Yoolakela seeni munreerela nnyu okhalana?
15 Akhala wiira moopatisiwa, nkhalena yoolakela ya wiiwasaasa saana ‘inamuna dhoovirikana dha opatiisu’c ni okhala moovarihana ni ele mwalaihenre nnyu okathi mwaaivahererya nnyu ni opatisiwa. Masi ankhi akhala wiira nanlelo khampatisiwe? Niire yookhala etthu enwoocelihaani? Yoosoma enttharelana, enoolotta ele munreerela nnyu opaka wiira mpatisiwe.
NCIPO 161 Miyo-va Okidhivela Owiiwelelani Tiithi
a Nuulumo na ekereku na wiira baptisma, nenno nitaphuleliwe nkhama “opatiisu,” nintaphulela “opwinihiwa” aahiidho “osuweiwa.” Tivondho ompatisa ntthu, ontaphulela ompwiniha moomalela mmaadhini ohiya onttonyera maadhi vamuru nkhama itiini dhikina dhinhudhiha awa.
b Alopwana ale a wEefesu yaapatisiwe ni ‘opatiisu wa Yoohaani.’ (Mit. 19:3) Yoohaani Mpatisa aahaalopola ayuuda wiira yaanitthuneya ottharuwa itampi yaapanke awa evonyeraka Nlamulo na Moise, nuumala-vo owo aanaapatisa ale yaattharuwa. (Mar. 1:4, 5) Masi Muluku aahihiya waakhulela opatiisu wa Yoohaani vaavo Nlamulo na Moise naahin’ye awa ovara nteko. Ndho okhuma okathi owo mpakha nenna-va, Muluku onnaakhulela ‘opatiisu omodha pahi’ yoowo onoopola.—aEefe. 4:5.
c Moone mwaha oni: “O que é o batismo?” opuro oni: “Perguntas Bíblicas Respondidas” va jw.org ni va aplikatiivu JW Library.
d OLEELIHERIWA WA EFOOTU: Waasembeleiyani atthu an’ya opatisiwa yeemenle ohoolo wa atthu ootheene wiira yoonihere waamini-wa yaakhulaka makoho maili.