6-12 A ABRIL A 2026
NCIPO 82 “Warya Wanyu Wamwaleleke Atthu”
Nin’ya Waakhalihera Dhai Amudhi nhu Ahininrumeela Yehova?
“Nihikhulumuwe ovara miteko sooreera.”—AGAL. 6:9.
ETTHU NIN’YA NHU OHUDHA
Nin’ya woona moopora wa ohihiya okhalana waataana wooreera ni amudhi nhu ahininrumeela Yehova ni moopora woolotta naawo voohima dha Yehova vaaweryaneyaka.
1-2. Eseeni ekhanle okhumihera ohiiwanana ni amudhi nhu vaavo nimpacera nhu ohudha ekhweeli?
YEESU aahinleela nlopwana mmodha yoowo aatthuna okhala ntthareli-ye wiira: ‘Nrowe owaani, ariwo amudhi nnyu, mwaaleele itthu dhootheene Yehova owiirenleiyeni.’ (Mar. 5:19) Yeesu aahilotta moolumo ale okhala wiira aanidhuwela wiira atthu awaatta waadhivela waaleela itthu dhooreera amudhi-ya.
2 Niire nyuwo munnuupuwela moopora moonenle nnyu nuumala wiiwa ihapari dhooreera? Woonawene nyuwo mwaahihakalala vawaatta nkatthuna waaleela amudhi nnyu ele mwaahudhenre nnyu. Woonawene nuumala waaleela awo khiyaahakalanle. Aahiidho pooti wiira moopora mwaalontte nnyu waahikhumihera ohiiwanana. Akhala wiira ti dhiidho, mun’ya owerya dhai ohihiya aahiidho otthikela okhalana waataana wooreera ni amudhi nnyu masi voohivonyera malamulo a Yehova?
3. Eseeni nin’ya nhu woona yoosoma ela?
3 Yoosoma ela nin’ya woona: (1) Moopora othunku on’ya awa onitumererya okhalana waataana wooreera ni amudhi nhu ahininrumeela Yehova, hata awo ehitthunaka oniwiriyana; (2) etthu ninreerela nhu opaka vaavo amudhi nhu annilottela awa aahiidho opaka etthu enninanara; (3) moopora opisa wihu nrima okhanle awa waakhalihera amudhi nhu ohudhera ekhweeli; ni (4) moopora nikhanle nhu woonihera wiira ninnaapheta.
NWOONELE OTHUNKU
4. Yeesu aawoonela dhai atthu yahoonihera odhiveliwa nhupi aalaleya iye?
4 Yeesu khaahin’ye waakhalihera atthu yaale yahoonihera odhiveliwa nhupi aalaleya iye. Owo aahiilikanyiha ni nanteko mmodha a ematta ya efiiku, yoowo aailipihera arumeelaka inamuna dhoovirikana wiira akhapelele nttaikho wahaaima, wiira opacere wiima. (Luka 13:6-9) Okathi Yeesu aalontte iye nlikanyiho nna, aaira avirinhe iyaakha tthaaru aakhaliheraka ayuuda wiira ekhalena waamini ni ekhale ahudheri-ye. Eseeni yaamwiirinhe Yeesu ohihiya waakhalihera? Okhala wiira owo aaniwoonela othunku atthu. Ndho elo yaahimwiiriha waapisera nrima.
5. Eseeni yaamwiirinhe Yeesu owoonela othunku atthu?
5 Yeesu aahiwoonela othunku atthu okhala wiira ahooleli a itiini khiyaawerya waakhalihera odhuwela ekhweeli voohima dha Yehova. Owo aahiwoona wiira yaari nkhama ‘iputthiputthi ihaarina makampusi.’ (Mar. 6:34) Ahalaka vakhaani okhwa, Yeesu aahimunlela Yerusaleemu okhala wiira aanidhuwela wiira atthu awaatta a nttetthe ole yaampwetesiwa mwaha wa ohimwaamini owo vamodha ni Yehova. (Luka 19:41-44) Mwa enamuna emodharu, vaavo ninuupuwelela nhu seeni amudhi nhu antthuneya awa wiiwa ihapari dhooreera, elo enoonitumererya owoonela othunku ni waakhalihera.
6. Seeni nintthuneya nhu waapisera nrima amudhi nhu ahininrumeela Yehova? (aGalasia 6:9)
6 Munsome aGalasia 6:9. Hata amudhi nhu ehooniheraka odhiveliwa ni ekhweeli nenna-va, nihihiye waapisera nrima ni ‘ovara miteko dhooreera.’ Hiyo noodhuwela wiira onnivira okathi wiira ntthu ahiye dhookhupali-dhe dha khalai, wiira apacere omwaamini Yehova. Woonawene, khalai ni nyuwo-tho mwaari nkhama atthu yaale ‘yahaarina nlipelelo ni yahaandhuwela Muluku.’ (aEefe. 2:12) Masi moohaakanyera, aahuura ntthu yoowo moopisa nrima okhalihenreni ondhuwela Yehova. Ndho niire elo khenwiirihani waapisera nrima amudhi nnyu wiira vaaweryaneyaka mwaakhalihere ondhuwela Yehova?
ESEENI NINREERELA NHU OPAKA VAAVO AMUDHI NHU ANNILOTTELA AWA AAHIIDHO ONIPAKELA ETTHU ENNINANARA?
7. Woonawene eseeni yaawiiriha ahimaye Yeesu ohimwaamini?
7 Woonawene ahimaye Yeesu yaahiiwa voohima dha miiriirya owo aapanke iye Okalileya. (Luka 4:14, 22-24) Masi hata eri dhiidho, awo khiyaamwaaminni. (Yohani 7:5) Mwaha wa seeni? Biibiliya khanlotta. Masi onnitthokihera mathowa maili anoonihera etthu yaawiirinhe ayuuda akina ohimwaamini Yeesu. Atthu akina yoova wiikariwa mmuttettheni. (Yohani 9:18-22) Atthu akina mwaha wa ondhuwela Yeesu okhuma enaahimaye, waanaaliperya okhupali wiira owo aarummwe ni Muluku. (Mar. 6:1-4) Pooti wiira ti yeelo yaawiiriha ahimaye Yeesu ohimwaamini. Ndho niire mathowa nkhama awo anniwiiriha amudhi nnyu ohidhiveliwa ni ekhweeli?
8. Eseeni ekhanle owiiriha amudhi nhu ahininrumeela Yehova onilottela aahiidho onipakela etthu yoohiloka?
8 Mwaadhye odhuwela etthu enwiiriha amudhi nnyu olotta aahiidho opaka itthu inoonanarani. Woonawene ahimaye Yeesu yaari mpuwa wa amudhi-ye yaawo yaalontte wiira Yeesu aari ‘nlolo.’ (Mar. 3:21) Eseeni yaawiirinhe awo olotta moolumo awo oohiloka? Yawiiraneya ela ennoonihera wiira Yeesu aahaatteliwa miteko mpakha ahikawerya ophwanya okathi wiira ace. (Mar. 3:20) Woonawene amudhi-ye Yeesu yaahilotta moolumo awo okhala wiira aaniluttuweliwa ovara nteko woolaleerya. Nitho amudhi nhu pooti opacera wuupuwela wiira ninniviriha okathi wawaatta nivaraka miteko dha etiini nhu. Akhala wiira ti dhiidho, ninawiira saana woonihera wiira ninnaathokorerya oreela wa miteko dhihu.
9. Eseeni en’ya waakhalihera amudhi nhu orukunsa moonelo-ya voohima dha Anamoona a Yehova? (1 Pedru 3:1, 2) (Moone-tho ifootu.)
9 Moonihere wiira munnaathokorerya ni waareerela nrima. Moolumo ni miteko dhihu pooti owiiriha amudhi nhu orukunsa moonelo-ya voohima dha Anamoona a Yehova. (Munsome 1 Pedru 3:1, 2.) Mwa ntakihero, nrokora otheliwe ni nlopwana ohininrumeela Yehova, amamune pooti wiidhoona ohivahiwa efaita ni onyoonyiheya vaavo nrokora owo onrowela iye mithukumano mmulokoni ni nteko woolaleerya. Ndho okhala wiira nrokora owo khantthuna waanyoonyiha amamune, woonawene owo pooti orukunsa eprokaraama-ye ya miteko dha omunepani wiira akawerya oviriha okathi wawaatta vamodha ni mamune. Mwa ntakihero, nrokora owo pooti orowela nteko woolaleerya okathi amamune anvara awa miteko dhikina aahiidho ankhuma awa owaani. Vaavo nrokora owo onoonihera iye onthokorerya ni onreerela nrima mamune, owo pooti onkhalihera mamune orukunsa moonelo-ye voohima dha Anamoona a Yehova.
Moolumo ni miteko dhihu dhooreera pooti omwiiriha ole nithelannenhuna orukunsa moonelo-ye voohima dha Anamoona a Yehova (Moone ettima 9)f
10. Nin’ya ontakiha dhai Yeesu vaavo ninlotteliwa nhu itthu dhoohiloka?
10 Nxake owaakhula amudhi nnyu okathi wootheene anoolottelaawani itthu dhoohiloka. Okathi Yeesu ootheriwe iye wiira aanuuca ni owurya mootepana, owo khaakhunle atthunaka wiidhaakiha. Ohiya-vo, owo aatthuna wiira atthu yoone oreela wa miteko-dhe, akhala wiira itthu aalotteliwa iye dhaari dheekhweeli aahiidho naari. (Math. 11:19) Nitho oreela wa ntakihero-ne, owo aahoonihera wiira aanaathokorerya atthu akina ni aari ntthu oohakalala. (Mmoone Yohani 2:2, 6-10.) Nkhama Yeesu, khamuntthuneya owaakhula amudhi nnyu okathi wootheene anoolottelaawani itthu dhoohiloka. Ohiya-vo, nwoonihere oreela wa miteko dhinyu wiira munnaathokorerya ni mwa ntthu oohakalala. Ndho vaavo awo anoona awa elo, enawaakhalihera okhupali wiira itthu dhoohiloka dhinlottiwa voohima dha Anamoona a Yehova ti dhawoothiwa.
NHIHIYE WAAPISERA NRIMA AMUDHI NNYU NI OKHALANA NLIPELELO
11. Yeesu aathokorerya dhai ahimaye?
11 Biibiliya onnoonihera wiira Yeesu khaahin’ye waapisera nrima ahimaye. Mwa ntakihero, awo yaari vamodha nuuwo Okana vaavo aapanke iye mwiiriirya-ye woopacera. (Yohani 2:11, 12) Hata nuumala woona elo, awo khiyaakhupanli wiira owo aari Mesiya. Masi hata eri dhiidho, Yeesu khaanyanyanle ahimaye. Biibiliya onnoonihera wiira nuuvira iyaakha tthaaru okhuma okathi Yeesu aapanke iye mwiiriirya-ye woopacera Okana, owo khaahin’ye olotta ni ahimaye mooreera nrima.—Yohani 7:5-8.
12. Eseeni ekhanle onikhalihera ohihiya okhalana nlipelelo na wiira woonawene amudhi nhu pooti othanla onrumeela Yehova?
12 Wiiwasasa wihu saana omoriwa ikharari wa Yehova, onoonikhalihera ohihiya okhalana nlipelelo na wiira woonawene amudhi nhu pooti othanla onrumeela Yehova. Nuumala opwetesiwa itiini dhawootha, woonawene amudhi nhu pooti wuupuwela wiira naataka waaleela wiira elo yaamwiiraneya.a (Wiis. 17:16) Ndho elo pooti owiiriha othanla onrumeela Yehova nuumala opacera maxakha muulupale. Ohinaakuve ophiya okathi owo, nipake itthu dhootheene ninwerya nhu wiira naakhalihere amudhi nhu vaavo inaaphwanya awa mixankiho. Vaavo niniilipihera nhu owoonihera wiira ninnaapheta ni waareerela nrima, elo pooti owiiriha otthuna ohudhera ikhweeli dha mbiibiliyani.
MOONIHERE WIIRA MUNNAAPHETA
13. Hata niluttuweliwaka ovara miteko dha Yehova, eseeni ninreerela nhu oxaka?
13 Hata niluttuweliwaka ovara miteko dha Yehova, nihaana oxaka owiiriha amudhi nhu wuupuwela wiira khanintthuna oviriha okathi naawo aahiidho noohiya waapheta. (Math. 7:12) Ndho nin’ya woonihera dhai wiira ninnaathokorerya? Nirowe noone inamuna vakhaani dha moopora woopaka elo.
14-15. Nin’ya woonihera dhai wiira ninnaapheta amudhi nhu ahikhanle Anamoona a Yehova? Nvahe ntakihero.
14 Nkhalena yoolema ya olotta naawo, ni nwoonihere wiira munnaapheta. Ninawoonihera wiira ninnaapheta amudhi nhu nilottaka naawo khuta nihiku ni waaleela akhala wiira naakumi. Mwa ntakihero, nyuwo pooti owinviyarela mensaaxe ni ifootu ntiranri nnyu okathi woohakalaliha naanaano. Nitho waavaha epresenti hata ekhalaka ekhaani aahiidho owaatikhela ewarakha, pooti okhalihera wiira nkhalena waataana wooreera naawo. Vaavo niniilipihera nhu waareerela nrima amudhi nhu, ninniwiiriha woona wiira ninnaapheta.
15 Nirowe nithokorerye ntakihero na nrokora mmodha oniitthaniwa Anna, yoowo onkhala wArmênia. Amudhi-ye anniviriha okathi wawaatta eri vamodha saasaasa mahiku a aniversaariyu ni ifeesta. Nuumala Anna ohudhera ekhweeli, amudhi-ye yaahipacera oxankiheya yuupuwelaka wiira owo aanhiya oviriha okathi naawo. Nitho awo yaanixankiheya yuupuwelaka moopora ekumi-ye yaaya awa okhala nhoolo mwaha wa othanla okhala Namoona a Yehova. Eseeni Anna ompaka iye wiira avukule oxankiheya wa amudhi-ye? Owo onlotta wiira: “Vaavo kinaasekurya aka amudhi aka, kinnaaleela moopora ekumi aka eri awa ni itthu kimpaka aka. Nitho kinnaalaleya wiira ere owaani wiira kaadhuwelihe axirikha aka. Ndho yookhumelela-ya, amudhi aka awaatta annaadhuwela axirikha aka ni ankhala otaphuwa olotta naawo.” Owo onnaacerera airaka: “Nenna, amudhi aka awaatta anlotta wiira ka ntthu oohakalala ni aahiya oxankiheya ni miyo.”
16. Yeesu oonihenre dhai wiira aaninvaha efaita nhimaye Yakobu? (Moone-tho enoota.)
16 Nwoonihere wiira munnaavaha efaita. Nuumala Yeesu ohihimusiwa, aahoonihera wiira aaninvaha efaita nhimaye Yakobu vaavo aankhumelenle iye. (1 aKor. 15:7) Nnoona wiira Yakobu oonenle dhai nuumala odhuwela wiira Yeesu khaannyanyanle? Woonawene waari okathi yoowo Yakobu aakhupanli iye wiira Yeesu aari Mesiya. Nuumala elo wiiraneya, woonawene Yakobu aahaakhalihera amudhi-ye akina odhuwela wiira Yeesu aari Mesiya.b—Mit. 1:14.
17. Nin’ya ovarihela dhai nteko miruku iri aRoma 12:15? (Moone-tho efootu.)
17 Munsome aRoma 12:15. Vaavo ninoonihera nhu wiira ninnaavaha efaita amudhi nhu okathi woohakalaliha ni wooxankiha, pooti owiiriha awo orukunsa moopora annoonela awa.c Mwa ntakihero, vaavo mmudhi nhu mmodha onin’yara iye mwaana, hiyo pooti olotta moolumo anoonihera wiira noohakalala aahiidho onvaha epresenti. Ni okathi amudhi nhu ankhweliwa awa ntthu yaampheta awa, hiyo pooti waalipiha ni moolumo nhu, owinviyarela mensaaxe aahiidho waadhya inamuna ikina wiira naakhalihere. Nitho nihihiye waalikarela, owinviyarela mensaaxe aahiidho waasekurya, saasaasa okathi anviriha awa mixankiho.
Vaavo munoonihera nnyu wiira munnaathokorerya amudhi nnyu saasaasa okathi dhinaaphwanya awa mixankiho, elo pooti orukunsa moopora anwoonelaawani vamodha ni dhookhupali dhinyu (Moone ettima 17)g
18. Nin’ya ontakiha dhai Andre?
18 Mwaadhuwelihe anna ni arokora akina. Nuumala Andre odhuwela wiira Yeesu aari Mesiya, aahindhuweliha nhimaye Pheeduru. (Yohani 1:40-42) Niire mwaanwerya opaka etthu emodharu? Mwa ntakihero, nnoonela dhai onlaleya mmudhi nnyu mmodha wiira arowele nthukumano aahiidho ace vamodha ni axirikha nnyu? Vaavo nnaadhuweliha nnyu amudhi nnyu anna ni arokora, awo anoowerya woona wiira Anamoona a Yehova khavirikanne ni atthu akina ni tooreera nrima.
19. Hata amudhi nhu ehiiwasasaka saana dhookhupali dhihu, naathokorerye dhai? (1 Pedru 3:15)
19 Munsome 1 Pedru 3:15. Amudhi nhu pooti ohiiwasasa saana dhookhupali dhihu, masi awo anoowerya wuupuwelela oreera wihu nrima ni nttittimiho. Nitho awo anooxukhurela vaavo niniilipihera nhu waadhya okathi wooreerela wiira nivirihe niri vamodha naawo. Mwa ntakihero, hata nihiweryaka okhala vamodha naawo okathi ampaka awa ifeesta ni dhoolema dhihinvarihana ni Biibiliya, ninoowerya waasekurya, oca vamodha naawo ni okathi nkina waavaha ipresenti.
NHIKHALA-KHALE MWAANYANYALAKA AMUDHI NNYU
20. Seeni ntakihero na Yakobu niri awa noolipiha wa hiyo?
20 Hata Yakobu aayeleenle eparakha ya weetta ni Yeesu okathi aalaleerya iye valaponi, nuuvira okathi aahikhala nhudheri a Yeesu. (aGal. 1:18, 19; 2:9) Nnaamwi Yakobu aahaari nhudheri oopacera a Yeesu, owo aanivaha efaita dhoohudhiha-dhe. Mwa ntakihero, uupuseriwaka ni Muluku, owo ohaatikha ewarakha yeelo enlotta itthu Yeesu ohudhinhe iye okathi aalotta iye Mwaha Vamwaako.d
21. Seeni nihintthuneya nhu waanyanyala amudhi nhu ahininrumeela Yehova?
21 Hata niilipiheraka waareerela nrima amudhi nhu ahininrumeela Yehova, woonawene awo pooti ohaakhulela ekhweeli aahiidho ohinithokorerya saana. Masi seeni nihintthuneya nhu waanyanyala? Okhala wiira okathi wootheene ninaareerela nhu nrima amudhi nhu ninintakiha Muluku nhu oomooriwa ikharari Yehova, vamodha ni Mwane Yeesu. (Luka 6:33, 36) Ndho akhala wiira ninawoonihera wiira ninnaapheta, nuuvira okathi elo pooti owiiriha orukunsa moopora anwoonela awa Anamoona a Yehova. Nitho elo pooti owiiriha wuupuwelela itthu naahudhinhe nhu voohima dha Yehova ni dhoolaihera-dhe. Ndho naahihiye waakhalihera amudhi nhu, ninoohakalala owoona akina a yaawo epaceraka onkokhorela Yehova vamodha ni hiyo!
NCIPO 60 Aniiwa Moolumo Anoophwanya Okumi
a Moone mwaha oni: “Moota Xeeni Yehova Onrowa Awe Waaphukela Atthu Muhoolo?” ori Owehaweha a Maio a 2024 epaax. 11, etti. 11-13.
b Ahima aili a Yeesu, Yakobu ni Yuuda, yaahikhala makristau ooluttuweliwa nuumala Yeesu ohihimusiwa.
c Moone ekwaaturu eni: “Niire Nyuwo Nhaana Orowela Ekasamentu Aahiidho Nkhwelo wa Mmudhi Nnyu Ahaanrumeela Yehova?
d Munlikanyihe Yakobo 1:2 ni Matheyo 5:11, 12; Yakobo 1:19 ni Matheyo 5:22; Yakobo 1:22; 2:24 ni Matheyo 7:21; Yakobo 2:13 ni Matheyo 5:7; 6:14, 15.
e Wiira ndhuwele itthu dhikina voohima dha mwaha owo, moone “Perguntas dos Leitores” ari A Sentinela 15 a Maio a 2002 ni 15 a Novembro a 2007.
f OLEELIHERIWA WA IFOOTU: Ahinaakuve orowa nteko woolaleerya, nrokora mmodha onniwaapela eyooca amamune yaawo ahininrumeela Yehova.
g OLEELIHERIWA WA EFOOTU: Nrokora mmodharu aasekuryaka apiyanhano-ye ahikhanle Namoona a Yehova.