Nhihiye Wiilipihera Wiira Mpatisiwe

1. (a) Seeni opatisiwa eri awa yoothanla yootthuneya? (b) Eseeni nin’ya nhu woona yoosoma ela?

NIIRE nyuwo nhiivahererya wa Yehova ni mpatisiwa? Akhala wiira ti dhiidho, nyuwo moonveka Yehova yawuupusera ya nrima yooreera. (1 Ped. 3:21) Ohiya-vo, nyuwo nhaavaha ntakihero nooreera marapasi ni ale apacenre naanaano woona mithukumano dhihu. Moohaakanyera, nyuwo moopaka yoothanla yooreera! Masi ankhi akhala wiira nanlelo nyuwo khampatisiwe? Moohaakanyera, nyuwo munnimpheta Yehova ni munnitthuna opaka yootthuna-ye. Nitho, munnidhuwela wiira opatisiwa etthu yootepa otthuneya wiira nleveleliwe itampi dhinyu ni mwaakhuleliwe ni Yehova. (Mit. 2:38-40) Masi ankhi akhala wiira yookhala etthu enwooceelihani opaka yoothanla elo, eseeni en’ya wookhaliherani? Yoosoma ela, nin’ya woona (1) itthu dhinwiiriha atthu akina oviliwa opatisiwa, (2) seeni eri awa etthu yootthuneya odhuwela wiira omala wa olumwinku ola ori vakhiviru, ni (3) mareeliho mun’ya nnyu ophwanya mwaahihiye wiilipihera opaka marukunuso wiira mpatisiwe mwawaakuveya.

ITTHU DHINWIIRIHA ATTHU AKINA OVILIWA OPATISIWA

2. Eseeni enwiiriha atthu akina olekela opaka yoothanla ya opatisiwa?

² Atthu akina annilekela opaka yoothanla ya opatisiwa mwaha wa woova. Mwa ntakihero, atthu akina annitthuna onrumeela Yehova, masi annoova yuupuwelaka wiira khanre ekawerya opaka itthu dhooreera dhin’ya ikanhakalaliha. Akhala wiira nnuupuwela dhiidho, nsome dhawaatikhiwa dha mbiibiliyani dhin’ya wookhaliherani okhupali wiira Yehova khanlipelela wiira nkhale oomalela ni inoonihera wiira owo onnihakalala vaavo muniilipihera nnyu opaka ele munwerya nnyu. (Esal. 103:13, 14; aKol. 3:23) Akhala wiira nnoova ottharatthariwa, munvekele Yehova wiira oovaheni nroromelo nimodharu nenno aariiyena nasaalimu mmodha, yoowo aatinkhe wiira: ‘Yehova ori ni miyo; nkinrowa woova etthu. Eseeni ntthu onwerya iye okiiriha?’—Esal. 118:6.

3. Muupuwelo seeni onwiiriha atthu akina oviliwa opatisiwa? (Moone-tho efootu ya ekaapa.)

³ Atthu akina anniviliwa opatisiwa yuupuwelaka wiira khandhuwela itthu dhawaatta dha mbiibiliyani. Masi niire nhaana odhuwela itthu dhawaatta dha mbiibiliyani wiira mpatisiwe? Naari. Nirowe noone ntakihero nimodha na mbiibiliyani. Nuumala okhumelela esikinyaatthi ekateya aatthukeliwe Paaulu ni Siila, awo yaahinlaleerya kwaarta a nkateya vamodha ni atthu a ettheko-ye. Woonawene kwaarta ole vamodha ni atthu a ettheko-ye, yaahiwerya woona wiira esikinyaatthi ele waari mwiiriirya waakhuma wa Muluku. Ohiya-vo, awo yaahihudhera ikhweeli dhootepa otthuneya voohima dha Yehova ni Yeesu. Ndho itthu yaahudhenre awa ohiyu ole, dhaahiphiyera wiira ‘epatisiwe mwawaakuveya.’ (Mit. 16:25-33) Akhala wiira moondhuwela Yehova, moodhuwela dhoohudhiha dhoopacera dha mbiibiliyani, moottharuwa itampi dhinyu ni moolakela okhala moovarihana ni malamulo a xariya a Yehova, elo enoonihera wiira moolikana wiira mpatisiwe.—Mar. 12:30.

4. Itthu seeni dhinwiiriha atthu akina oviliwa opatisiwa? (Moone-tho efootu.)

⁴ Atthu akina annitthuna onhakalaliha Yehova ni opatisiwa, masi anniviliwa opaka yoothanla elo yuupuweleka itthu anreerela awa ohiya. Ekhweeli wiira ntthu ahinaakuve opaka yoothanla elo, ohaana wuupuwela itthu dhinhela mpuwa. (Luka 14:27-30) Masi atthu akina annitepa oxankiheya yuupuwelaka itthu an’ya awa opaka wiira enhakalalihe Yehova. Candace, yoowo aaiwale ekhweeli ari mwaana, nuumala wunnuwa aahipacera onsoma Biibiliya, masi waaninliperya opatisiwa. Owo onlotta wiira: “Miyo kaanidhuwela etthu kaareerela aka opaka wiira kinhakalalihe Yehova, masi kaanixanka okhala wiira dhaanikidhivela itthu dha nlaponi. Ni kaanidhuwela wiira waankiliperya ohiya itthu idho.” Atthu akina annixanka vaavo anuupuwela awa mweettelo anreerela awa okhalana nuumala opatisiwa. Awo annoova opaka etampi yuulupale nuumala opatisiwa ni ekhumihiwe mmulokoni. Akhala wiira itthu idho dhinniwiirihani woovelela opatisiwa, eseeni munreerela nnyu opaka?

5. Eseeni ninreerela nhu ohela mpuwa vaavo ninuupuwela nhu opatisiwa? (Matheyo 13:44-46)

⁵ Vaavo nintthuna nhu othuma etthu, khaninlipela pahi esapo-ya aahiidho eperesu, masi-tho mireerelo en’ya awa oniphwanyiha. Akhala wiira etthu elo enooniphwanyiha mireerelo dhawaatta oxira nsurukhu nin’ya nhu othumana, woonawene ninnithuma mwawaakuveya. Mwa enamuna emodharu, vaavo ninuupuwela nhu opatisiwa, nihaana ohela mpuwa ohiya pahi itthu nin’ya nhu oleva, masi-tho moopora waataana wihu ni Yehova ori awa etthu yootepa otthuneya. Yeesu aahilotta malikanyiho maili atthunaka ottittimihera mwaha owo. (Munsome Matheyo 13:44-46.) Khuta nlikanyiho, nlopwana mmodha onniphwanya etthu erina efaita yuulupale ni onnihakalala othumiha itthu dhootheene oriiyena wiira awerye othuma etthu ophwannye iye. Ni nyuwo-tho moophwanya etthu ya faita yuulupale: Ekhweeli voohima dha Omwene wa Muluku. Akhala wiira munnaakanyera vaareerelaka okhala moovarihana ni ekhweeli, mwiivahe okathi wiira muupuwelele malikanyiho a Yeesu. Nyuwo pooti opaka elo mwiikohaka wiira: ‘Kiire kinnikhupali wiira koophwanya etthu erina efaita yuulupale? Kiire kinnithokorerya waataana waka ni Yehova, nlipelelo onkivaha iye ni anna ni arokora nkhama itthu dha efaita yuulupale?’ Waakhula winyu onawookhaliherani odhuwela akhala wiira munnivaha efaita ekhweeli aahiidho etthu munreerela nnyu opaka wiira mpatisiwe.

6. Nin’ya owerya dhai wunnuwihera nrima wooreera?

⁶ Okathi Yeesu aalontte iye nlikanyiho na nlipa a waala, aahoonihera wiira nrima wa ntthu pooti onkhoottihera orowa vahoolo moomunepani. Masi-tho owo aahitthokihera wiira atthu akina yaamwaakhulela wiiwa nhupi wa Omwene ni ‘nrima wootheene’ ni ovarihela nteko. (Luka 8:5-15) Akhala wiira onnooliperyani okhupali wiira nnoowerya ovarihela nteko ele nhudhenre nnyu, nhikhulumuwe! Nkhaliheriwaka ni Yehova, nyuwo nnoowerya okhalana ‘nrima wooreera’ ni okhala oolikana ene wiiwelela. Munvekele Yehova wiira ookhalihereni wunnuwihera vanrimani vinyu opheta ikhweeli dha Omwene wa Muluku.—Ezek. 18:31; 36:26.

7-8. Eseeni enwiiriha marapasi makina oviliwa opatisiwa? (Moone-tho efootu.)

⁷ Marapasi makina animpheta Yehova, onnaavila orowa vahoolo mpakha opatisiwa mwaha wa itthu dhoohiloka anleeliwa awa ni atthu akina. Mwa ntakihero, maporoisoori makina annaatumererya anaskola opaka itthu dhoovirikana mweekumini-mwa, hata elo etaphulelaka ohiiwelela malamulo a xariya a Yehova. Masi otthara miruku idho pooti okhumihera mixankiho dhawaatta. (Esal. 1:1, 2; Mir. 7:1-5) Nyuwo pooti oxaka mixankiho idho nttharaka ntakihero na nasaalimu, yoowo aanleenle Yehova wiira: ‘Kookhalana akhili awaatta waaxira ootheene ale ankihudhiha okhala wiira kinnuupuwelela ikano dhinyu.’—Esal. 119:99.

⁸ Nitho ninniiwa elottiwaka wiira anaan’yari akina annaaviliha anaya opatisiwa. Etthu antepa awa wuupuwelela ori osoma ni miteko anaya anreerela awa ovara aahiidho khanaakhalihera anaya okhalana dhoolukama dha omunepani. Nyuwo nnoona wiira anaan’yari nnyu anoowerya wookhaliherani wiira nrowe vahoolo moomunepani? Akhala wiira ti dhiidho, nvaanele naawo voohima dha mwaha owo. Nkhupali wiira moohixikha iyaakha nrinnyuna nyuwo nnoowerya wunnuwihera waataana woolipa ni Yehova.—Mir. 20:11.

9. Eseeni enwiiriha atthu akina oviliwa opatisiwa?

⁹ Atthu akina ari oolikana ene wiira epatisiwe, masi anniviliwa opaka elo elipelelaka wiira epatisiwe nihiku nimodharu on’ya iye opatisiwa nxirikha-ya aahiidho mmudhi-ya mmodha. Ekhweeli wiira kahi etthu yootthekeya otthuna wiira mpatisiwe vamodha ni ntthu nnimpheta nnyu. Masi niire elo ehaana woovilihani opatisiwa nenna-va? Nhiliyale wiira wiivahererya winyu wa Muluku yoolaihera ya ntthu mwaneene. Wiira nyuwo mpatisiwe khamuntthuneya olipelela ele atthu akina ampaka awa okhala wiira owo mwaha wa ntthu mwaneene.—aRoma 14:12.

NHILIYALE WIIRA OMALA WA OLUMWINKU OLA ORI VAKHIVIRU

10. Etthu seeni-tho enwiiriha atthu akina oviliwa opatisiwa?

¹⁰ Ohiya pahi mathowa nithokorenrye nhu ottuli, atthu akina anniviliwa opatisiwa yuupuwelaka wiira omala wa olumwinku ola khopaceren’ye. Masi niire ti va miruku okhalana muupuwelo owo? Yeesu aahaalopola ahudheri-ye airaka: ‘Nkhale oolikana ene, okhala wiira Mwaana a ntthu onra ewoora nhinuupuwela nnyu.’—Luka 12:40.

11. Moovarihana ni Esalimo 119:60, ninoonela dhai malamulo a Yehova?

¹¹ Nthowa ninniiriha wiivahererya wa Yehova ni opatisiwa ori ompheta wihu. Vaavo nintepa nhu ondhuwela Muluku nhu oopheta, ninnipheta malamulo-ye, ndho elo enniniiriha wiiwelela malamulo awo oxira khalai. (Nsome Esalimo 119:60.) Nhudheri Yakobu aahilotta nthowa nikina ninniiriha okhala oolikana ene wiiwelela malamulo a Yehova. Owo aalontte wiira: Khaavo ntthu ondhuwela itthu dha meelo. Woonawene khaninre nikhalena nihiku nikina wiira ‘nipake itthu dhooreera.’ Ndho ola okathi wooreerela nintthuneya nhu opaka itthu ininhakalaliha Yehova.—Yak. 4:13-17.

12. Eseeni ninhudhera nhu ni ananteko a ematta ya ewuuva a nlikanyiho na Yeesu?

¹² Niire nyuwo munniwuupuwela ananteko a ematta ya ewuuva a nlikanyiho na Yeesu? Yeesu aalontte wiira ananteko akina yaavanre ewoora emodha, masi hata eri dhiidho nsurukhu yaakhenle awa waamphwana ni wa ananteko ale yaavanre nihiku nootheene. Masi moone nthowa naawiirinhe alopwana ale ohipacera ovara ohiihiyu. Alopwana awo yaalontte wiira ‘khaavo ntthu onivanhe nteko.’ Kahi wiira alopwana ale yaanhitthuna ovara nteko, masi mwaha wa wiira khaavo ntthu aawiitthanne. Masi nuumala awo ovahiwa nteko, yaahipacera ovara. (Math. 20:1-16) Olelo-va, Yeesu onninilaleya wiira nikhale ahudheri-ye ni wiirela mphantta nteko woolaleerya. Ndho hiyo nihaana waakhulela nlaleyo nno mwawaakuveya.

13. Yawiiraneya ya mwaara a Looti ennihudhihani?

¹³ Atthu akina annilekela opaka marukunuso mweekumini-mwa, yuupuwelaka wiira anoopaka nhoolo ohinatthi ophiya omala wa olumwinku ola. Masi ekhweeli wiira vaavo okathi on’ya awa okavira, okaantepa wooliperyani opaka marukunuso wiira mmuhakalalihe Muluku. Okhala wiira Yeesu aanidhuwela elo, aahaalopola ahudheri-ye airaka: ‘Mmuupuwele mwaara a Looti.’ (Luka 17:31-35) Mwaara a Looti aanidhuwela wiira ophukeliwa wa epooma ya Osodoma ni Okomora waanaattamela. Masi onkhala nkhama wiira owo khaawenrye oliyala itthu aahin’ye iye ottuli. (Maph. 19:23-26) Yawiiraneya ela enninuupusera wiira okathi Yehova aavanhe iye atthu wiira epake marukunuso onoomala. Ndho okathi ola wamala, khonre-tho oweryaneye ntthu opaka marukunuso okhala wiira Yehova onoowala moomalela mikhora dhootheene. —Luka 13:24, 25.

14. Seeni muntthuneya nnyu ovaha ephoole waakhwanela wa iprofesiiya dhinlotta voohima dha omala wa olumwinku?

¹⁴ Khuta nihiku ninvira, itthu dhinkhumelela dhinnoonihera wiira iprofesiiya dhinlotta voohima dha omala wa olumwinku dhinnaakhwanela. Hata itthu idho ihoophwanyakani mooluluwanya, masi woona idhe dhinkhumelela mapuro makina ihaana wootumereryani opaka marukunuso anreerela wiira mpatisiwe mwawaakuveya. Moone ele nrummwa Pheeduru aaleenle iye Makristau a eseekulu yoopacera airaka: ‘Omala wa itthu dhootheene ori vakhiviru. Tivondho, . . . nkavekela okathi wootheene [aahiidho okathi wootheene nkhale oolikana ene].’ (1 Ped. 4:7; enoota) Onkhala nkhama wiira “omala” onlottiwa eveersu ela, Pheeduru aalotta opwetesiwa wa Yerusaleemu ni etempulu. Makristau Pheeduru aawaatikhenle iye moolumo ala yaakhala ottaiwene ni Yerusaleemu. Ndho awo khidhaare dhaaphwanye mooluluwanya mixankiho dhaaya okhumelela mwaha wa opwetesiwa epooma ele. (1 Ped. 1:1) Masi vaavo yaaya awa woona yaakhwanelaka eprofesiiya ele, elo yaanlipiha ororomela-wa dhoolaihera dhikina dha Muluku. Mwa enamuna emodharu, woona iprofesiiya dhinlotta voohima dha omala wa olumwinku ola, ohaana wootumereryani ohihiya okhala awiikocela ni opaka marukunuso anreerela wiira mpatisiwe.

15. Nin’ya owerya dhai olipelela nihiku na Yehova? (2 Pedru 3:10-13)

¹⁵ Ewarakha-ye ya naaili, Pheeduru ootthokihera moopora nikhanle nhu wiikocihera wiira nikhale oolikana ene “nihiku na Yehova” niire dho, omala wa olumwinku. Okathi Pheeduru aatinkhe iye moolumo awo, dhaanvira iyaakha dhawaatta wiira niphiye nihiku nno. Masi hata eri dhiidho, Pheeduru aahaaleela wiira yaahaana ‘olipelela’ aahiidho ‘ohiliyala’ nihiku na Yehova. (Munsome 2 Pedru 3:10-13.) Nin’ya owerya dhai olipelela nihiku na Yehova? Ninoowerya olipelela nuupuwelelaka okathi wootheene wiira omala wa olumwinku ola ori vakhiviru ni wiikocihera ‘nivaraka miteko dhooreera ni opaka itthu inoonihera wiira ninniroromeleya wa Muluku.’ Muupuwele moopora Yehova aaya iye ohakalala owoonani mpakaka ‘itthu inoonihera wiira munninroromela’! Moohaakanyera, owo aanhakalala vawaatta owoonani mwiivahereryaka wa veene ni opatisiwa.

MAREELIHO MUN’YA NNYU OPHWANYA MWAPATISIWA MWAWAAKUVEYA

16. Okathi seeni wooreerela opaka marukunuso wiira mpatisiwe? (2 aKorinto 6:1, 2) (Moone-tho ifootu.)

¹⁶ Ola tori okathi wooreerela opaka marukunuso wiira mpatisiwe. (Munsome 2 aKorinto 6:1, 2.) Nlopwana mmodha a Weetiyoopiya yoowo Filipi aanlaleenrye iye aahoona otthuneya-wa opatisiwa mwawaakuveya. Nuumala owo olaleeriwa ni Filipi ni okhalana eparakha ya opatisiwa, owo khuupuwenle wiira: ‘Kihinaakuve opatisiwa, kihaana toko-toko odhuwela itthu dhawaatta voohima dha ihapari dhooreera. Okhala wiira ohoolo nin’yanhuwo ninoophwanya nratthi nkina mphuroni.’ Ohiya-vo, owo aahinkoha Filipi wiira: ‘Niire yookhala etthu enkiwateeriha opatisiwa?’ (Mit. 8:26, 27, 35-39) Nlopwana owo oonivaha ntakihero nooreera! Nuumala owo opatisiwa, ‘aahitthikela weetta nkwaha-ye aatteeliwe nrima.’

17. Eseeni ninreerela nhu okhupali?

¹⁷ Akhala wiira munniviliwa opatisiwa, nkhupali wiira Yehova onawoovahani nikhalihero munramela nnyu wiira nlipihe waataana winyu nuuwo. (aRoma 2:4) Owo pooti wookhaliherani ovilela mixankiho woonawene dhinwiirihani oviliwa opatisiwa nkhama woova, oxankiheya aahiidho mwaha wa itthu dhoohiloka munleeliwa nnyu ni atthu akina. Nuumala opatisiwa, nnookhalana yawuupusera ya nrima yooreera ni woonawene nnawiiwasasa wiira ‘itthu ihanle ottuli’ khidhaana efaita wa nyuwo. (aFil. 3:8, 13) Nitho nnookhalana nroromelo na ‘itthu dha nhoolo’, niire dho, mareeliho Yehova onlaihera iye waavaha atthu ale aivaherenrye wa veene ni epatisiwa.—Mit. 3:19.