Abril

Para magpahimulos kita ha unod ngan dugo ni Jesus, kinahanglan naton magpakita hin pagtoo ha lukat. (Efe. 1:7) Adton gintawag ni Jesus nga “iba nga mga karnero” diri gud dapat kumaon han tinapay ngan uminom han bino ha tinuig nga Panihapon han Ginoo. (Juan 10:16) Bisan pa hito, nagpapahimulos hira han unod ngan dugo ni Jesu-Kristo. Iginpapakita nira ito pinaagi ha pagpakita hin pagtoo ha iya halad nga nakakatubos. (Juan 6:53) Ha kabaliktaran, adton dapat kumaon han tinapay ngan uminom han bino nagpapakita nga kaapi hira ha bag-o nga kasabotan nga may paglaom nga magin manurunod han Ginhadian ha langit. Salit mga dinihogan man kita o iba nga mga karnero, importante gud an pagpakita hin pagtoo basi magkaada kinabuhi nga waray kataposan. w24.12 13 ¶14, 16

Ha panahon han Panihapon han Ginoo, naghatag hi Jesus ha iya mga apostol hin tinapay nga waray libadura ngan ginsidngan hira nga nagsisimbolo ito han iya lawas. Katapos, iginhatag niya ha ira an bino ngan nagsiring hiya nga nagsisimbolo ito han “dugo han kasabotan.” (Mar. 14:​22-25; Luc. 22:20; 1 Cor. 11:24) An bag-o nga kasabotan ginhimo “ha panimalay [han espirituwal nga] Israel”—nga magigin “ha Ginhadian han Dios.” (Heb. 8:​6, 10; 9:15) Ha panahon han Panihapon han Ginoo, nagpokus hi Jesus ha “gutiay nga panon.” An siyahan nga bahin hito nga gutiay nga grupo amo an iya matinumanon nga mga apostol nga kaupod niya ha kwarto. Magkakaada hira lugar ha langit kaupod hi Jesus. w24.12 11 ¶9-10

Hi Jesus gintraydor, gin-aresto, gin-insulto, ginpakaraot, ginsentensyahan, ngan gin-torture pa ngani. Gindara hiya han mga sundalo ha lugar diin hiya papatayon ngan iginraysang hiya ha kahoy. Samtang matinumanon nga gin-iilob niya an ngatanan hito nga kasakit, may-ada mas nasasakitan pa gud—hi Jehova nga Dios. Waray niya gamita an iya waray tubtoban nga gahum ngan waray hiya manginlabot. Kay ano? Tungod han gugma. An halad ni Jesus amo an pinakadaku nga ebidensya nga hinigugma ka gud ni Jehova. Iginsakripisyo niya an iya kalugaringon nga hinigugma nga Anak ngan gin-ilob an duro nga kasakit nga imo maiimadyin basi matalwas ka tikang ha sala ngan kamatayon. (1 Juan 4:​9, 10) Oo, karuyag niya nga buligan an kada tagsa ha aton nga makig-away ha sala—ngan magdaog! w24.08 6 ¶13-14

Mas masasabtan naton kon ano kadaku an gugma ni Jehova ha aton kon huhunahunaon naton an kasakit nga iya gin-abat han nakita niya nga nag-aantos an iya Anak. Siring ni Satanas nga waray alagad han Dios nga magpapabilin nga maunungon ha iya kon makuri an pagbuhat hito. Basi mapamatud-an nga buwa ito nga akusasyon, gintugotan ni Jehova nga mag-antos hi Jesus antes hiya mamatay. (Job 2:​1-5) Nakita ni Jehova nga gintamay hi Jesus han relihiyoso nga mga parakontra, ginkastigo han mga sundalo, ngan ginraysang ha kahoy. Katapos, nakita ni Jehova an iya hinigugma nga Anak nga namatay ha masakit gud nga paagi. (Mat. 27:​28-31, 39) May gahum hi Jehova nga pugngan nga mahitabo ito ngatanan. (Mat. 27:​42, 43) Pero kon nanginlabot an Dios, waray unta lukat nga naibayad ngan waray unta kita paglaom. Salit ginpabay-an ni Jehova nga mag-antos an iya anak tubtob nga mamatay. w25.01 22 ¶7

Nisan 16, 33 C.E. adto nga adlaw. An mga disipulo ni Jesus nasusubo ngan waray nahihimo tungod han kahadlok. An duha ha ira binaya ha Jerusalem ngan kinadto ha Emaus. Usa nga estranghero an dinaop ngan inupod ha ira ha pagbaktas. Igin-istorya han mga disipulo an ira kasubo ha nahitabo kan Jesus. Ito nga estranghero nagtikang pakiistorya ha ira ha mga butang nga diri gud nira makakalimtan. “Tikang kan Moises ngan ha ngatanan nga sinurat han mga Propeta,” ginsaysay niya kon kay ano nga an Mesias kinahanglan mag-antos ngan mamatay. Han an tulo nga kalalakin-an inabot ha Emaus, nagsumat an estranghero kon hin-o hiya—an ginbanhaw nga hi Jesus. (Luc. 24:​13-35) Nagpakita hi Jesus ha iya mga disipulo hin damu ka beses ha sulod han iya ultimo nga 40 ka adlaw ha tuna. Hito nga panahon, an mga sumurunod ni Jesus nga nasusubo ngan nahahadlok nagin malipayon, may kompyansa, ngan maisugon nga parasangyaw ngan magturutdo han Ginhadian. w24.10 12 ¶1-3

Natural la nga magtubo kita ha pagin adulto paglabay han panahon, pero waray nag-uuswag hin awtomatiko ha pagin hamtong ha espirituwal. Pananglitan, an kabugtoan ha Corinto kinarawat han maopay nga sumat, nagpabawtismo, kinarawat han baraan nga espiritu, ngan nagpahimulos tikang ha pagtutdo ni apostol Pablo ha ira. (Buh. 18:​8-11) Pero pipira ka tuig katapos han ira bawtismo, damu la gihapon an diri hamtong. (1 Cor. 3:2) Basi magin hamtong, kinahanglan anay naton kultibaron an hingyap nga magin hamtong. Adton ‘naruruyag ha pagin waray eksperyensya,’ ngan naruruyag magpabilin nga bata ha espirituwal, diri gud magigin hamtong. (Prob. 1:22) Diri naton karuyag nga magin pariho hadton mga adulto na ha pisikal pero nadepende la gihapon ha ira mga kag-anak ha paghimo hin mga desisyon. Lugod, karuyag naton magin responsable para ha aton pag-uswag ha espirituwal. Kon nangangalimbasog ka la gihapon nga magin hamtong, pag-ampo kan Jehova nga tagan ka han “hingyap ngan han gahum ha pagbuhat.”​—Fil. 2:13. w24.04 4 ¶9-10

Kon may kalabotan ha paagi ni Jehova ha paghukom ha katawohan, may pagkabuotan nga iginsusumat niya ha aton an iya mga inaabat. (Ezek. 33:11) Hi Jehova diri dayon nagbubungkag ha mga tawo ha kadayonan. Puno gud hiya hin kalooy ngan nagpapakita hiya hin kalooy tubtob nga posible. Ano la an aton nahibabaroan mahitungod ha mga tawo nga diri babanhawon? An Biblia may gin-uunabi nga pipira la nga ehemplo. Gin-unabi ni Jesus nga hi Judas Iscariote diri babanhawon. (Mar. 14:21; kitaa liwat an Juan 17:12 ngan study note.) Hi Judas maaram gud ngan tinuyo nga ginkontra niya hi Jehova nga Dios ngan an Iya Anak. (Kitaa an Marcos 3:29 ngan study note.) Sugad man, hi Jesus nagsiring nga may mga lider han relihiyon nga kinontra ha iya an mamamatay nga waray paglaom nga mabanhaw. (Mat. 23:33; kitaa an Juan 19:11 ngan study note nga “taong.”) Ngan hi apostol Pablo nagpahamangno nga an diri nagbabasol nga mga apostata diri babanhawon.​—Heb. 6:​4-8; 10:29. w24.05 4 ¶10-11

Kon magpapabilin kita nga duok kan Jehova, hi Satanas waray mahihimo nga nagpapadayon nga kadaot ha aton. (1 Juan 3:8) Ha bag-o nga kalibotan, padayon nga puproteksyonan ni Jehova an iya matinumanon nga kasangkayan diri la tikang ha espirituwal nga kadaot kondi pati liwat ha kamatayon. (Pah. 21:4) Daku gud nga dungog nga magin bisita ha tolda ni Jehova—nga mapahimulsan an personal nga nagpapadayon nga relasyon ha iya. (Ezek. 37:27) Ano an dapat naton buhaton kon karuyag naton nga padayon kita niya nga magin bisita? Kon gin-iimbitar ka ha usa nga balay, karuyag mo mahibaroan kon ano an mga ginlalaoman han nag-imbitar ha imo. Ha pariho nga paagi, karuyag gud naton mahibaroan kon ano an mga ginkikinahanglan ni Jehova hadton naruruyag nga padayon nga magin bisita niya. An aton gugma kan Jehova nagpapagios ha aton nga buhaton an ngatanan nga aton makakaya basi “bug-os nga mapalipay hiya.” (Col. 1:10) Dapat diri gud naton ito hingalimtan ngan pirme magkaada hilarom nga respeto ha iya. Mabulig ito ha aton nga malikyan an panggawi nga makakapasubo ha iya. Sigurado nga ginhihingyap naton nga ‘maglakat nga mapainubsanon’ kaupod han aton Dios.​—Mic. 6:8. w24.06 4 ¶8-9

Ginhangyo ni Jehova hi Abraham nga ihalad an iya kalugaringon nga anak hi Isaac. Sigurado gud nga inabat ni Abraham nga ito gud an pinakamasakit nga toka ha iya. Bisan pa hito, sinugot hiya kan Jehova. Pero ginpugngan hiya han Dios han papatayon na niya an iya anak. Ito nga ehemplo nagtututdo hin importante nga kamatuoran para ha ngatanan nga tawo nga may pagtoo—andam hi Jehova nga ihatag an iya kalugaringon nga hinigugma nga Anak sugad nga halad. Sugad gud hito kahinigugma ni Jehova an mga tawo. (Gen. 22:​1-18) Paglabay hin mga siglo, an Balaud nga iginhatag ha nasud han Israel nagkikinahanglan hin damu nga halad nga hayop basi mapara an mga sala han katawohan han Dios. (Lev. 4:​27-29; 17:11) Ini nga mga halad nagpapakita nga hi Jehova magtatagana hin mas maopay nga halad nga bug-os nga makakagwara ha sala han mga tawo. An mga propeta han Dios gin-giyahan nga isaysay nga an iginsaad nga tulin, nga amo ngay-an an espesyal nga Anak han Dios, mag-aantos ngan papatayon basi ihalad para matalwas an mga tawo—upod ka na—tikang ha sala ngan kamatayon!—Isa. 53:​1-12. w24.08 4 ¶7-8

Kon nagbabasa ka ha Biblia, hunahunaa kon paonan-o mo maiaaplikar an imo ginbabasa. Samtang nagbabasa ka han usa nga bahin han Pulong han Dios, pakianhi an imo kalugaringon, ‘Paonan-o ko ini maiaaplikar nga impormasyon yana o ha tiarabot?’ Pananglitan, sidngon ta nga kaupod an 1 Tesalonica 5:​17, 18 ha imo pagbasa ha Biblia. Katapos mo basahon ito nga duha nga bersikulo, puydi ka umundang ngan maghunahuna kon ano ka kaagsob ngan kasinsero ha imo pag-ampo. Puydi mo liwat pamalandungon an mga butang nga imo gud iginpapasalamat. Mahimo ka magpasalamat kan Jehova para ha tulo nga espisipiko nga butang. Bisan ha pipira la ka minuto han sugad nga pokus nga atensyon, magigin parapamati ka ngan magburuhat han Pulong han Dios. Hunahunaa kon paonan-o ka magpapahimulos pinaagi ha pauroutro nga pagbuhat hini kada adlaw ha iba nga bahin han Biblia nga imo nabasa! Oo, mag-uuswag ka sugad nga magburuhat han Pulong han Dios. w24.09 4-5 ¶9-10

Ginlarang kita ni Jehova nga may espesyal nga abilidad. Bisan kon nag-i-enjoy kita ha pagkarawat, mas nalilipay kita kon naghahatag kita ha iba. Nalilipay kita kon nakakabulig kita ha aton mga igkasi-tumuroo. Ngan nalilipay kita kon ira iginpapahayag an ira apresasyon. Pero ipahayag man o diri han aton gintagan an iya apresasyon, mahimo kita magin malipayon nga ginbuhat naton an tama. Ayaw gud hingalimti nga anoman an imo iginhahatag, “hi Jehova makakaghatag ha imo hin mas damu pa.” (2 Cron. 25:9) Salit mas damu gud an naihahatag ni Jehova ha imo kay ha aton naihahatag ha iba! Ngan kon ginbabalosan kita ni Jehova, ito an pinakamaopay gud nga balos. Salit magin determinado kita nga padayon nga subaron an aton mahinatagon nga Amay ha langit. w24.09 31 ¶20-21

Maloloy-on hi Jehova ngan mapinairon. (Sal. 103:13; Isa. 49:15) May empatiya hiya; kon nasasakitan kita, nasasakitan liwat hiya. (Zac. 2:8) Ginhihimo niya nga masayon an paghirani ha iya basi magin Sangkay naton hiya. (Sal. 25:14; Buh. 17:27) Ngan mapainubsanon hiya; “natamod hiya basi kitaon an langit ngan an tuna, ginbabangon an ubos tikang ha tapotapo.” (Sal. 113:​6, 7) Salit may-ada ba diri maruruyag nga himayaon an aton harangdon nga Dios? Ginhihimaya naton hi Jehova kay karuyag naton nga makilala hiya han iba. Damu an diri maaram han kamatuoran mahitungod kan Jehova. Kay ano? Kay ginbuta ni Satanas an ira mga panhunahuna pinaagi ha pagpasarang hin grabe nga kabuwaan mahitungod ha iya. (2 Cor. 4:4) Ginkukombinse ni Satanas an mga tawo nga hi Jehova mahilig bumulos, diri interesado ha aton kaopayan, ngan hiya an hinungdan han duro nga pag-antos han kalibotan. Pero maaram kita han kamatuoran mahitungod ha aton Dios! May oportunidad kita nga isumat ha iba kon ano gud hiya nga klase hin Dios ngan tungod hito mahihimaya hiya.​—Isa. 43:10. w25.01 3 ¶6-7

Ha siyahan nga siglo, gin-gamit ni Satanas an mga tawo basi magpasarang hin kabuwaan mahitungod ha Anak han Dios bisan kon perpekto hiya ngan naghimo hin mag-opay nga milagro. Pananglitan, ginsidngan han mga lider han relihiyon an mga tawo nga an gahum ni Jesus ha pagpagawas ha mga demonyo iginhatag ha iya pinaagi han “magmarando han mga demonyo.” (Mar. 3:22) Han ginbista hi Jesus, gin-akusaran hiya han mga lider han relihiyon hin pagpasipara ngan ginkombinse an mga tawo nga ipapatay hiya. (Mat. 27:20) Ha urhi, han an mga sumurunod han Kristo nagsangyaw han maopay nga sumat, adton mga nakontra ha ira “nag-aghat ngan nag-impluwensya ha mga tawo” nga timarauton an mga Kristiano. (Buh. 14:​2, 19) Mahitungod ha Buhat 14:​2, An Barantayan han Disyembre 1, 1998, nagsaysay: “Tungod kay diri kontento ha pagsalikway han mensahe mismo, an Judio nga mga parakontra nagtikang ha maraot nga kampanya, nangangalimbasog ha pag-aghat ha mga Hentil nga magkaada maraot nga pagtrato kontra ha mga Kristiano.” Yana, ginlilimbongan la gihapon ni Satanas an “bug-os nga inuukyan nga tuna.” w24.04 11 ¶15-16

An paglaom nga kinabuhi nga waray kataposan han usa nga tawo diri nakadepende kon san-o hiya mamamatay. Hi Jehova perpekto nga Hukom—matadong ngan may hustisya an iya mga desisyon. (Sal. 33:​4, 5) Makakasarig kita nga bubuhaton han “Hukom han bug-os nga tuna” kon ano an tama. Makatadunganon liwat hunahunaon nga an oportunidad han usa nga tawo nga mabuhi ha waray kataposan diri nakadepende kon diin hiya naukoy. Diri gud dayon huhukman ni Jehova sugad nga “mga kanding” an minilyon nga tawo nga naukoy ha katunaan nga waray gud magkaada oportunidad nga mahibaro ha mensahe han Ginhadian. (Mat. 25:46) Diri gud naton matutupngan an gugma han matadong nga Hukom han bug-os nga tuna para hini nga mga tawo. Diri kita maaram kon paonan-o ni Jehova mamaniobrahon an mga panhitabo ha panahon han daku nga kasakitan. Posible nga an pipira hini nga tawo magkaada oportunidad nga mahibaro mahitungod kan Jehova, tumoo ha iya, ngan dumapig ha iya kon baraanon na niya an iya kalugaringon ha atubangan han ngatanan nga nasud.​—Ezek. 38:16. w24.05 12 ¶14-15

An katawohan ni Jehova naruruyag gud ha pagbinuligay ha usa kag usa. (2 Cor. 8:4) Pero danay, nagkikinahanglan ito hin kaisog. Pananglitan, kon may-ada girra, maaram an mga tigurang ha kongregasyon nga an ira kabugtoan nagkikinahanglan hin pagdasig, suporta, ngan bangin espirituwal o pisikal nga bulig. Hinigugma han mga tigurang an kabugtoan, salit iginhahatag nira an ira kinahanglan bisan pa kon delikado gud an pagbuhat hito. Ha sugad nga mga kahimtang, importante nga magin masinugtanon kita basi magpabilin nga nagkakaurosa. Sunda an mga instruksyon han branch office ha iyo lugar. (Heb. 13:17) An mga tigurang dapat regular nga magrepaso han lokal nga mga kahikayan para ha pagpangandam ha mga kalamidad pati na liwat han mga instruksyon han organisasyon kon ano an bubuhaton kon may tiabot nga kalamidad. (1 Cor. 14:​33, 40) Magin maisugon pero naghihirot. (Prob. 22:3) Paghunahuna anay antes gumios. Magpabilin nga talwas tubtob nga posible. Sarig kan Jehova. Mabubuligan ka niya basi mabuligan mo an imo kabugtoan ha safe nga paagi. w24.07 4 ¶8; 5 ¶11

Kilala ni Hadi David hi Jehova ngan sinarig hiya ha Iya. Han hi David igin-ikaparatay han iya mga kaaway, upod na hi Hadi Saul, nag-ampo hiya kan Jehova para hin bulig. Katapos batunon han Dios an iya pag-ampo ngan talwason hiya, hi David nagsiring: “Hi Jehova buhi!” (Sal. 18:46) Pinaagi hini nga mga pulong, hi David diri la kay basta maaram nga may Dios. An usa nga reperensya nasiring nga hi David nagpahayag han iya pagsarig kan Jehova “sugad nga buhi nga Dios nga padayon nga nagios para ha iya katawohan.” Oo, nahibaro hi David tikang ha iya eksperyensya nga buhi an iya Dios, ngan tungod hito determinado hiya nga padayon nga mag-alagad ngan dayawon hi Jehova. (Sal. 18:​28, 29, 49) An aton pagin kombinsido nga hi Jehova buhi nga Dios nakakabulig ha aton nga mag-alagad ha iya nga may kadasig. Magkakaada kita han kusog basi mailob an mga problema ngan determinasyon nga padayon nga maningkamot ha pag-alagad ha iya. Magigin determinado liwat kita nga magpabilin nga duok kan Jehova. w24.06 20-21 ¶3-4

Ano an aton mahibabaroan tikang ha mga ginsiring ni apostol Pablo ha mga taga-Tesalonica? Kon may mabatian kita nga diri uyon ha aton nahibaroan na tikang ha Biblia o kon makabati kita hin kakaiba nga istorya, kinahanglan gamiton naton an husto nga pagturotimbang. Ha Unyon Sobyet hadto, an aton mga kaaway nagpasarang hin surat nga tikang kuno ha world headquarters. An surat nag-aaghat ha pipira nga kabugtoan nga maghimo hin bulag nga independente nga organisasyon. An surat baga hin tinuod gud nga tikang ha world headquarters. Pero an matinumanon nga kabugtoan waray mauwat. Nasantop nira nga an surat diri uyon ha kon ano an igintinutdo ha ira. Yana, an mga kaaway han kamatuoran danay nagamit hin moderno nga teknolohiya tungod han paningkamot nga mawurok kita ngan magkabahin-bahin. Imbes nga ‘mawurok dayon ha aton pangatadongan,’ mapuprotektaran naton an aton kalugaringon pinaagi ha paghunahuna hin maopay kon an aton ba nabatian o nabasa uyon ha mga kamatuoran nga aton nahibaroan na.​—2 Tes. 2:2; 1 Juan 4:1. w24.07 12 ¶14-15

An pinakaimportante nga desisyon nga mahihimo han bisan hin-o amo an pagdedikar han iya kalugaringon kan Jehova ngan pagin bahin ha Iya pamilya han mga magsiringba. Karuyag ni Jehova nga ito an buhaton han ngatanan. Kay ano? Karuyag niya nga malipay hira ha pakigsangkay ha iya ngan mabuhi hin waray kataposan. (Deut. 30:​19, 20; Gal. 6:​7, 8) Pero diri ni Jehova ginpipirit an bisan hin-o nga mag-alagad ha iya. Ginpapabay-an niya an kada tagsa nga magdesisyon kon ano an iya bubuhaton. Ano man kon an usa nga bawtismado nga Kristiano nakabuhat hin seryoso nga sala? Kon diri hiya magbasol, dapat hiya tanggalon ha kongregasyon. (1 Cor. 5:13) Pero bisan pa hito, naglalaom gud hi Jehova nga an nagbubuhat hin sala mabalik ha Iya. Ngani, ito an usa han importante nga rason kon kay ano nga igintagana niya an lukat—basi magin posible an kapasayloan ha mga mabinasulon nga nakasala. An aton mahigugmaon nga Dios may pagkabuotan nga nanginginyupo ha mga nagbubuhat hin sala, nga gin-aaghat hira nga magbasol.​—Zac. 1:3; Roma 2:4; San. 4:8. w24.08 14 ¶1-2

Ha panahon nga ginhimo ni apostol Juan an iya ikatulo nga surat, may mga indibiduwal na nga nagpapasarang hin buwa nga mga katutdoan ngan nagigin hinungdan hin pagkabahin-bahin. Pero an iba padayon nga ‘naglakat ha kamatuoran.’ Sinugot hira kan Jehova ngan ‘naglakat uyon ha iya mga sugo.’ (2 Juan 4, 6) Inin matinumanon nga mga Kristiano nakapalipay diri la kan Juan kondi pati liwat kan Jehova mismo. (Prob. 27:11) Ano an leksyon hini para ha aton? An pagin matinumanon nagriresulta hin kalipay. (1 Juan 5:3) Pananglitan, nalilipay kita kay maaram kita nga napapalipay naton hi Jehova. Nalilipay hiya nga makita nga gin-aatohan naton an mga pagsulay hini nga kalibotan ngan ginkakarawat an kamatuoran. An iba nga aadto ha langit nalilipay liwat. (Luc. 15:10) Kita liwat nalilipay nga makita nga an aton kabugtoan nagpapabilin nga matinumanon. (2 Tes. 1:4) Ngan kon matapos na ini nga sistema, magigin malipayon kita kay maaram kita nga nagpabilin kita nga maunungon kan Jehova bisan ha kalibotan nga ginmamandoan ni Satanas. w24.11 12 ¶17-18

Ano dapat kaiha an imo pag-obserbar ha usa antes mo isumat nga naruruyag ka ha iya? Kon isusumat mo dayon an imo intensyon ha iya, bangin hunahunaon niya nga nagdesisyon ka nga waray maghunahuna hin maopay. (Prob. 29:20) Pero kon mag-iniha-iha ka naman, bangin hunahunaon niya nga nagruruhaduha ka, labi na kon inaabat niya nga interesado ka ha iya. (Ecles. 11:4) Hinumdumi nga antes ka makig-istorya, diri mo kinahanglan magin kombinsido nga hiya na an imo magigin asawa. Lugod, dapat magin kombinsido ka nga andam ka na mag-asawa ngan mahimo hiya magin maopay nga padis para ha imo. Pero ano man kon mapansin mo nga may naruruyag ha imo? Kon diri ka naruruyag ha iya, ipakita ito ha imo mga panggios. Diri maopay kon maipaabat mo ha iya nga may posibilidad nga magin kamo kon diri ka man naruruyag ha iya.​—Efe. 4:25. w24.05 22-23 ¶9-10

An totoo la ngan matinumanon nga dinihogan an kakarawaton ni Jesus ha Ginhadian ha langit. An bisan hin-o nga mga dinihogan nga diri nagpapabilin nga alerto ha espirituwal diri titirukon kaupod han “mga pinili.” (Mat. 24:31) Ngan an ngatanan nga may paglaom nga mabuhi ha waray kataposan ha tuna, dapat liwat magpabilin nga mabinantayon ngan matinumanon. Nakilala naton hin maopay hi Jehova, salit nasarig kita nga tama an bisan ano nga iya ginhihimo. Diri kita nababaraka kon nagpipili hi Jehova basi dihogan an pipira nga matinumanon ha aton panahon. Aton hinumdoman an ginsiring ni Jesus ha iya ilustrasyon mahitungod ha mga trabahador nga inabot ha urubasan ha ika-11 ka oras. (Mat. 20:​1-16) Adton gin-imbitar nga magtrabaho ha urubasan ha kulop kinarawat hin suhol pariho hadton nagtrabaho hin mas temprano. Sugad man, bisan san-o pilion an mga dinihogan, makakarawat nira an balos ha ira ha langit kon magpabilin hira nga matinumanon. w24.09 24 ¶15-17

Hi Jesus nagpakita hin perpekto nga ehemplo kon paonan-o aatubangon an kawaray-hustisya. Pansina an iya naeksperyensyahan nga kawaray-hustisya tikang ha iya pamilya ngan ha iba nga mga tawo. An iya diri tumuroo nga mga paryente nag-akusar nga nalulurong hiya, an mga lider han relihiyon nag-akusar nga nakikigkooperar hiya ha mga demonyo, ngan ginyaangyaangan hiya, ginkastigo, ngan ha urhi ginpatay han Romano nga mga sundalo. (Mar. 3:​21, 22; 14:55; 15:​16-20, 35-37) Bisan pa hito, gin-ilob ni Jesus ini ngatanan nga kawaray-hustisya ngan waray bumulos. Ano an aton mahibabaroan ha iya ehemplo? (1 Ped. 2:​21-23) Naghatag hi Jesus ha aton hin perpekto nga ehemplo basi sundon kon naatubang kita hin kawaray-hustisya. Maaram hiya kon san-o magpapabilin nga hilom ngan san-o mayakan. (Mat. 26:​62-64) Usahay kon an iba nagyayakan hin mga buwa mahitungod ha iya, diri hiya nabaton. (Mat. 11:19) Kon nagyayakan hiya, diri niya gin-iinsulto o gintatarhog an mga nagtitimaraot ha iya. w24.11 4-5 ¶9-10

Imadyina nga naghatag ka ha usa nga imo hinigugma hin espesyal nga regalo nga maopay ngan magagamit gud niya. Masusubo ka gud kon itago la ito niya ha kabinet ngan diri na panginanoon! Pero sigurado nga malilipay ka gud kon magpasalamat hiya ha imo ngan gamiton niya ito hin maopay. Ano an aton mahibabaroan hini nga ilustrasyon? Ginhatag ni Jehova an iya Anak basi mamatay para ha aton. Sigurado nga malipayon gud hi Jehova kon mapasalamaton kita hito nga presyoso nga regalo ngan ha iya gugma, nga nagpagios ha iya nga itagana an lukat! (Juan 3:16; Roma 5:​7, 8) Pero ha paglabay han panahon, posible nga hinay-hinay nga mawara an aton apresasyon ha lukat. Maipapariho ito ha pagtago han regalo han Dios ha kabinet. Malipayon kita nga nagkaada hito, pero iginbutang naton ito ha lugar nga diri nakikita. Basi diri ito mahitabo, dapat pirme naton hunahunaon an aton pagin mapasalamaton ha ginbuhat ha aton han Dios ngan han Kristo. w25.01 26 ¶1-2

An brother nga nagigin kwalipikado nga magin tigurang diri bag-o la nga nakombirte. Bisan kon diri kinahanglan nga bawtismado ka hin damu ka tuig, kinahanglan mo hin panahon para magin hamtong nga Kristiano. Antes ka pilion nga magin tigurang, dapat ipakita mo nga pariho kan Jesus, mapainubsanon ka ngan kontento samtang naghuhulat kan Jehova para hin dugang nga toka. (Mat. 20:23; Fil. 2:​5-8) Mapapamatud-an mo nga maunungon ka kon nagpapabilin ka nga matinumanon kan Jehova ngan nagkikinabuhi uyon ha iya mga suruklan ngan kon nasunod ka ha giya nga iginhahatag pinaagi han iya organisasyon. An Kasuratan klaro nga nasiring nga an mga paramangno kinahanglan kwalipikado ha pagtutdo. Nagpapasabot ba ini nga kinahanglan maopay ka gud nga mamumulong? Diri man. Diri ngatanan nga tigurang maopay gud nga mamumulong, pero epektibo hira ha pagtutdo ha ministeryo ngan kon nagsi-shepherding. w24.11 23-24 ¶14-15

Kon may mabasa ka ha Biblia nga diri mo bug-os nga nasasabtan, ig-research ito. Katapos, ha bug-os nga adlaw, pamalandonga an imo nadiskobrehan ngan an igintututdo hito mahitungod kan Jehova, ha iya Anak, ngan an ira gugma para ha imo. (Sal. 119:​97, ftn.) Ayaw panluya kon waray ka nakikita nga bag-o o makapainteres nga butang ha kada mo pagbabasa o pagri-research. Pariho ka hin tawo nga nagpipinamiling hin bulawan. An mga tawo nga nagpipinamiling hin bulawan mapailubon nga naggagahin hin mga oras o mga adlaw antes hira makaagi bisan la han gutiay gud nga tipik han bulawan. Pero nagpapadayon hira kay importante ha ira an kada tipik han bulawan. Labi na gud nga mas importante an kada hiyas han kamatuoran ha Biblia! (Prob. 8:10) Salit magin pasensyoso ngan sunda an imo eskedyol ha pagbasa ha Biblia.​—Sal. 1:2. w25.01 25 ¶14-15

Hi Jehova naglalaom nga magigin andam kita pagpasaylo hadton nakakapasakit ha aton. (Sal. 86:5; Luc 17:4; Efe. 4:32) Posible nga masakitan gud kita ha ginbubuhat o ginsisiring han usa, labi na kon ito nga tawo duok nga sangkay o kapamilya. (Sal. 55:​12-14) Danay, an kasakit nga aton inaabat ha emosyon pariho hin ginbuno kita. (Prob. 12:18) Bangin mangalimbasog kita nga igbalewaray an kasakit nga aton inaabat. Pero an pagbuhat hito baga hin ginbuno ka ngan waray hulbota an kutsilyo. Sugad man, diri kita makakalaom nga mag-oopay an aton inaabat kon basta na la nga igbabalewaray naton ito. Kon may nakasakit ha aton, an aton dayon reaksyon bangin an kasina. An Biblia nasiring nga posible kita mapungot. Pero nagpapahamangno ito ha aton nga diri kita dapat magpabilin nga nasisina. (Sal. 4:4; Efe. 4:26) Kay ano? Kay an kasina talagsa la magkaada mag-opay nga resulta. (San. 1:20) Hinumdumi nga an kasina usa nga reaksyon, pero an pagpabilin nga nasisina, ikaw an nagpipili hito. w25.02 15 ¶4-6

Gin-ilustrar ni Jesus an kalurongan ha pagtirok hin kwarta pero “diri riko ha Dios.” (Luc. 12:​16-21) Waray maaram kon ano an mahitatabo buwas. (Prob. 23:​4, 5; San. 4:​13-15) May gin-aatubang kita nga makuri nga sitwasyon sugad nga mga sumurunod han Kristo. Nagsiring hi Jesus nga dapat kita magin andam ha ‘pagsalikway’ ha ngatanan naton nga panag-iya basi magin mga disipulo niya. (Luc. 14:​33, ftn.) Ito an nahitabo ha mga Kristiano ha Judea ha siyahan nga siglo, pero bisan pa hito nagin malipayon hira. (Heb. 10:34) Ha moderno nga panahon, damu nga kabugtoan an kinahanglan bumaya ha ira trabaho o isakripisyo an ira panag-iya tungod la kay diri hira nasuporta ha politika. (Pah. 13:​16, 17) Ano an nakabulig ha ira nga buhaton ito? Bug-os gud nga nasarig hira ha saad ni Jehova: “Diri ko gud ikaw babayaan, ngan diri ko gud ikaw papabay-an.” (Heb. 13:5) Ginhihimo naton an pinakamaopay nga pagplano para ha aton mga panginahanglan ha tiarabot, ngan kon may diri ginlalaoman nga mga panhitabo nga aton maeksperyensyahan, nasarig kita ha bulig ni Jehova. w25.03 29 ¶13-14

Diri naglalaom hi Jehova nga mag-uuswag kita ha pagkahamtong ha aton la kalugaringon nga pangalimbasog. Adton nag-aalagad sugad nga mga paraataman ngan magturutdo ha Kristiano nga kongregasyon andam bumulig ha aton ha pag-uswag ngadto ha pagin “adulto” ha espirituwal, “nga nakakaabot ha sukol han kahamtong han Kristo.” (Efe. 4:​11-13) Igintatagana liwat ni Jehova an iya baraan nga espiritu basi buligan kita nga magkaada han “panhunahuna han Kristo.” (1 Cor. 2:​14-16) Dugang pa, iginhatag han Dios an upat nga Ebanghelyo basi ipakita ha aton kon paonan-o hi Jesus naghunahuna, nagyakan, ngan ginios ha panahon han iya ministeryo dinhi ha tuna. Pinaagi ha pagsubad han paagi han paghunahuna ngan panggawi ni Jesus, makakab-ot mo an imo tumong nga magin hamtong nga Kristiano. Pero basi mag-uswag ha pagkahamtong, kinahanglan liwat naton hibaroan an “nangunguna nga doktrina mahitungod han Kristo,” nga amo an nangunguna nga mga katutdoan han Kristiano. w24.04 4-5 ¶11-12

Kada adlaw kinahanglan naton maghimo hin mga desisyon. An iba bangin masayon la, sugad han kon ano an ipapamahaw o kon san-o makaturog. An iba naman mas makuri desisyonan. Bangin makaapekto ito ha aton kahimsog, kalipay, mga hinigugma, o pagsingba. Karuyag naton nga magpahimulos kita ngan an aton pamilya ha aton mga desisyon. Labaw ha ngatanan, naglalaom kita nga an aton mga desisyon magpapalipay kan Jehova. (Roma 12:​1, 2) An importante nga dapat himoon basi makahimo hin maopay nga desisyon amo an pag-usisa han tama nga mga impormasyon. Kay ano nga importante ito? Imadyina nga an usa nga pasyente nagpapa-check-up ha doktor han iya grabe nga sakit. Magdidesisyon ba dayon an doktor kon ano nga klase hin pagtambal an hihimoon nga diri anay gin-ieksamin an pasyente o ginpapakianhan? Syempre diri. Makakahimo ka liwat hin mas maopay nga mga desisyon kon imo anay uusisahon an tama nga mga impormasyon nga nakakaapekto ha imo sitwasyon. w25.01 14 ¶1-3

Ano an aton nahibabaroan mahitungod ha kalooy ni Jehova? Hi Jehova puno hin kalooy ngan “diri niya karuyag nga mabungkag an bisan hin-o.” (2 Ped. 3:9) Paonan-o niya iginpakita an kalooy ha pipira nga nakabuhat hin seryoso nga mga sala? Hi Hadi David nakabuhat hin sunod-sunod nga seryoso nga mga sala, sugad han pag-adulteryo ngan pagpatay. Pero nagbasol hi David, salit maloloy-on nga ginpasaylo hiya ni Jehova. (2 Sam. 12:​1-12) Nagin maraot gud hi Hadi Manases ha sulod hin maiha nga panahon. Pero bisan pa hito nga sobra nga karaotan, ginkaloy-an ni Jehova hi Manases ngan ginpasaylo tungod kay nagbasol hiya. (2 Cron. 33:​9-16) Ini nga mga ehemplo nagpapahinumdom ha aton nga hi Jehova nagpapakita hin kalooy kon may nakikita hiya nga basihan. Babanhawon niya an sugad nga mga tawo kay nasantop nira nga nakabuhat hira hin seryoso nga mga sala ngan nagbasol. w24.05 4 ¶12