Mayo

Katapos talwason ni Jehova an iya katawohan ha pagkauripon ha Ehipto, nagpili hiya hin mga saserdote basi mag-alagad ha tabernakulo. An mga Levita gintokahan basi bumulig ha mga buruhaton may kalabotan ha baraan nga tolda. Mas gin-ataman ba ni Jehova adton nag-alagad ha tabernakulo o an mga nag-ukoy hirani hito? Waray! Hi Jehova waray gud ginpapaurog. An tagsa nga Israelita mahimo magin duok nga sangkay ni Jehova. Pananglitan, ginsiguro ni Jehova nga an bug-os nga nasud makakakita han milagroso nga harigi nga kalayo ngan harigi nga dampog nga nakapwesto ha bawbaw han tabernakulo. (Ex. 40:38) Kon an dampog nabalhin na ha bag-o nga direksyon, bisan adton pinakahirayo ha tabernakulo makakakita hito, makakag-impaki han ira mga gamit, makakagdismantol han ira mga tolda, ngan makakadungan hira ha bug-os nga nasud. (Num. 9:​15-23) Yana liwat, hain man kita nga parte han kalibotan naukoy, makakapahimulos kita han gugma, pag-ataman, ngan proteksyon ni Jehova. w24.06 4 ¶10-12

Namimilegro an kinabuhi ni David. An iya anak nga hi Absalom determinado nga agawon ha iya an ginhadian. (2 Sam. 15:​12, 13) Kinahanglan ni David bumaya dayon ha Jerusalem! Samtang nabaya an mga surugoon ni David, nahunahuna niya nga kinahanglan may magpabilin basi magsumat ha iya han mga plano ni Absalom. Salit iya ginpabalik ha syudad hira Zadok ngan an iba pa nga saserdote basi magin mga espiya. (2 Sam. 15:​27-29) Kinahanglan gud nira maghirot. Naghangyo hi David kan Zadok ngan ha usa han iya mga maunungon nga sangkay, hi Husai, nga buligan hiya ha usa nga plano. (2 Sam. 15:​32-37) Pinaagi ha pagsunod han plano, nakuha ni Husai an pagtapod ni Absalom ngan nagsuhestyon hin estratihiya han pag-atake nga maghahatag kan David hin panahon basi makapangandam para hito. Sunod, ginsumatan ni Husai hira Zadok ngan Abiatar mahitungod han plano. (2 Sam. 17:​8-16) Katapos, ginsiguro hini nga duha nga lalaki nga maisumat ito nga plano kan David ngan nagkaada ito importante nga papel ha pagprotektar ha kinabuhi ni David.​—2 Sam. 17:​21, 22. w24.07 4-5 ¶9-10

An pipira han mga surugoon ni Jehova naiistres la gihapon mahitungod ha mga sala nga ira nabuhat ha naglabay, antes o katapos pa ngani han ira bawtismo. Pero maopay nga hinumdoman naton nga igintagana ni Jehova an lukat tungod han iya hilarom nga gugma ha aton. Sigurado nga karuyag niya nga karawaton naton an iya regalo. Ginpapasarig kita ni Jehova nga katapos naton “tadungon . . . an mga butang” ha iya atubangan, diri na niya ginhihinumdom an aton mga sala kontra ha aton. Mahigugmaon gud hi Jehova kay diri na niya ginhihinumdom an aton naglabay nga mga sala! Diri liwat niya ginkakalimtan an aton mag-opay nga nabuhat. (Sal. 103:​9, 12; Heb. 6:10) Kon naiistres ka tungod han imo nabuhat ha naglabay, buhata an pinakamaopay nga magpokus ha presente ngan ha tiarabot imbes nga ha naglabay. Diri mo mababag-o an naglabay. Pero mahimo mo pasidunggan hi Jehova ha imo presente nga kahimtang ngan pamulaton an makaruruyag nga tiarabot nga iya iginsaad ha imo. w24.10 8 ¶8-9

Kon nagbabasa ka ha Biblia ngan nagbibiling hin mga paagi ha pag-aplikar han giya hito, bangin abaton mo usahay an panluya. Hunahunaa ini nga sitwasyon: Yana an imo eskedyol ha pagbasa ha Biblia nag-uupod han sagdon mahitungod ha pagpakita hin paboritismo. (San. 2:​1-8) Nakita mo nga puydi mo pauswagon an imo pagtratar ha iba salit nagdesisyon ka nga maghimo hin pipira nga pagbag-o. Katapos, kinabuwasan ginbasa mo an pipira nga bersikulo nga nagpapabug-at han pagkaimportante han pagkontrol han imo panyakan. (San. 3:​1-12) Nasantop mo nga usahay negatibo an imo panyakan. Salit nagdesisyon ka nga magin mas positibo ngan makaparig-on. Ha sunod nga adlaw, an imo pagbasa ha Biblia nag-uupod hin pahamangno kontra ha pakigsangkay ha kalibotan. (San. 4:​4-12) Napansin mo nga kinahanglan mo mas maghirot ha imo pagpili hin kaliawan. Ngan ha ikaupat na ka adlaw, baga hin nanluya ka lugod tungod han tanan nga butang nga kinahanglan mo bag-uhon. Ayaw panluya. Hinumdumi nga an pagsul-ot han “bag-o nga personalidad” usa nga nagpapadayon nga proseso. w24.09 5-6 ¶11-12

Maaram hi Jesus nga an panhunahuna ni Jehova ha iya sitwasyon amo an pinakaimportante. Nasarig hiya nga susolusyonan ni Jehova an kawaray-hustisya ha tama nga panahon. Masusubad naton hi Jesus pinaagi ha pagkontrol han aton ginyayakan kon nakakaeksperyensya kita hin kawaray-hustisya. An iba nga kawaray-hustisya diri sugad kaseryoso ngan puydi naton palabyon la. O puydi kita magpabilin nga hilom basi waray kita maiyakan nga makakadugang ha problema. (Ecles. 3:7; San. 1:​19, 20) Ha iba nga mga higayon, bangin kinahanglan naton magyakan kon may nakikita kita nga gintatratar hin maraot o kon kinahanglan naton depensahan an kamatuoran. (Buh. 6:​1, 2) Kon magyayakan kita, dapat himoon naton an aton pinakamaopay nga buhaton ito ha kalmado ngan may respeto nga paagi. Masusubad liwat naton hi Jesus pinaagi ha pagtapod han aton kalugaringon ngadto “ha Dios nga naghuhukom ha matadong nga paagi.”​—1 Ped. 2:23. w24.11 5-6 ¶10-12

Kon nagbabasol an makasasala, makalilipay gud ito! (Luc. 15:7) Hin-o an angay dayawon? An mga tigurang ba? Hinumdumi an ginsurat ni apostol Pablo mahitungod ha magpakasasala: “Bangin itugot han Dios nga magbasol hira.” (2 Tim. 2:25) Salit hi Jehova, diri an bisan hin-o nga tawo, an nabulig ha usa nga Kristiano nga bag-uhon an iya panhunahuna ngan disposisyon. Iginsaysay ni Pablo an mag-opay nga resulta han sugad nga pagbasol. Mahimo hiya magkaada dugang nga husto nga kahibaro, makapamurubuot, ngan makalikay han mga bitik ni Satanas. (2 Tim. 2:26) Kon an nakasala nagbabasol, maghihikay an komite hin mga pag-shepherding basi padayon hiya nga makakarawat hin bulig nga iya kinahanglan ha pag-ato han mga bitik ni Satanas ngan basi maitadong an mga dalan para ha iya mga tiil.​—Heb. 12:​12, 13. w24.08 23 ¶14-15

An mga tawo nga ginpakaon ni Jesus nakapokus ha pagtagbaw han ira pisikal nga mga panginahanglan ngan mga hingyap. Paonan-o? Ha sunod nga adlaw, nakita nira hi Jesus ngan an iya mga apostol nga binaya na. Salit an mga tawo sinakay ha mga sakayan nga inabot tikang ha Tiberias, ngan kinadto ha Capernaum basi bilngon hi Jesus. (Juan 6:​22-24) Ginhimo ba nira ito basi mas makabati pa mahitungod han Ginhadian? Diri. An ira prayoridad amo an pakakaon hin tinapay. Kay ano nga makakasiring kita hito? Pansina kon ano an nahitabo han nabilngan han mga tawo hi Jesus hirani ha Capernaum. Ginprangka hira ni Jesus nga ginbiling nira hiya kay karuyag la nira hin materyal nga pagkaon. Nagsiring hiya nga “nangaon [hira] han mga tinapay ngan nabusog” han “pagkaon nga nadudunot.” Lugod, gin-aghat niya hira nga mangalimbasog para ha “pagkaon nga nagpapadayon ngadto ha kinabuhi nga waray kataposan.” (Juan 6:​26, 27) Nagsiring hi Jesus nga an iya Amay magtatagana hin sugad nga pagkaon. w24.12 5 ¶8-9

Mga brother, basi magin mas epektibo nga magturutdo, siguroha nga uyon ha Pulong han Dios an iyo igintututdo ngan iginsasagdon ha kabugtoan. Admi hin maopay an Biblia ngan an aton mga publikasyon. (Prob. 15:28) Ha iyo pag-aram, tigamni an husto nga pag-aplikar han Kasuratan. Ngan kon nagtututdo, pangalimbasugi nga maabot an kasingkasing han iyo mamarati. Mahimo mag-uswag an iyo abilidad ha pagtutdo kon mangangaro kamo hin suhestyon ha eksperyensyado nga mga tigurang ngan iaaplikar ito. (1 Tim. 5:17) An mga tigurang dapat may kapas ha pag-aghat ha kabugtoan; pero may mga panahon nga kinahanglan hira sagdonan han mga tigurang o sawayon pa ngani. Hain man hito an kahimtang, dapat magin buotan pirme an mga tigurang. Kon buotan ka ngan mahigugmaon ngan iginbabasar ha Pulong han Dios an imo pagtutdo, magigin epektibo ka kay ginsusubad mo an Bantogan nga Magturutdo, hi Jesus.​—Mat. 11:​28-30; 2 Tim. 2:24. w24.11 24 ¶16

Mahihimaya naton hi Jehova pinaagi ha aton ginyayakan mahitungod ha iya. An katawohan ni Jehova gin-aaghat nga ‘magkanta kan Jehova,’ ‘dayawon an iya ngaran,’ “ipasamwak an maopay nga sumat han iya pagtalwas,” ngan “ipahayag an iya himaya ha mga nasud.” (Sal. 96:​1-3) Ito ngatanan, mga paagi nga mahihimaya naton an aton Amay ha langit. (Buh. 4:29) Mahihimaya liwat naton hi Jehova pinaagi han aton mga panag-iya. Pirme ginpapasidunggan han tinuod nga mga magsiringba hi Jehova hito nga paagi. (Prob. 3:9) Pananglitan, nagdonar an mga Israelita para ha pagtukod ngan ha pagmintinar han templo. (2 Hadi 12:​4, 5; 1 Cron. 29:​3-9) An mga disipulo han Kristo nag-asikaso ha iya ngan ha iya mga apostol gamit an “ira mga panag-iya.” (Luc. 8:​1-3) An mga Kristiano ha siyahan nga siglo naghatag liwat hin ayuda para ha ira espirituwal nga kabugtoan. (Buh. 11:​27-29) Yana, mahihimaya liwat naton hi Jehova pinaagi han aton boluntaryo nga mga donasyon. w25.01 4 ¶8; 5 ¶11

Ano an nakabulig kan Cornelio nga magpabawtismo? Aton mababasa nga “may kahadlok [hiya] ha Dios pati an iya bug-os nga panimalay.” Ngan hi Cornelio padayon nga nangamuyo ha Dios. (Buh. 10:2) Han iginsumat ni Pedro kan Cornelio an maopay nga sumat, ginkarawat niya ngan han iya pamilya an Kristo ngan nagpabawtismo dayon. (Buh. 10:​47, 48) Sigurado nga andam hi Cornelio nga maghimo hin bisan ano nga pagbag-o basi masingba hi Jehova kaupod an iya pamilya. (Jos. 24:15; Buh. 10:​24, 33) Pariho kan Saul, puydi unta makaulang kan Cornelio an iya posisyon nga magin Kristiano. Pero waray niya tuguti nga mahitabo ito. An pagkarawat ba han kamatuoran nagkikinahanglan hin dagku nga pagbag-o ha imo kinabuhi? Kon oo, magigin Parabulig mo hi Jehova. Bibendisyonan niya an imo determinasyon nga mag-alagad ha iya uyon ha mga prinsipyo ha Biblia. w25.03 5 ¶12-13

Kon nakakabati ka hin negatibo nga mga istorya mahitungod ha organisasyon o ha kabugtoan nga nangunguna, hinumdumi kon paonan-o gintratar han mga kaaway han Dios hi Jesus ngan an siyahan-siglo nga mga disipulo. Yana, gintitimaraot ngan ginpapakaraot an katawohan ni Jehova sugad la han igintagna han Biblia. (Mat. 5:​11, 12) Diri kita matoo ha buwa nga mga istorya kon nasasabtan naton kon hin-o an nagpapasarang hito ngan kon magios kita dayon basi protektaran an aton kalugaringon. Paonan-o naton mapuprotektaran an aton kalugaringon? Isalikway an buwa nga mga istorya. Hi apostol Pablo naghatag hin klaro nga mga instruksyon han bubuhaton kon nakabati kita hin buwa nga mga istorya. Ginsidngan niya hi Timoteo nga “sugoon . . . an pipira nga diri . . . maghatag hin atensyon ha buwa nga mga istorya” ngan “isalikway an buwa nga mga istorya nga diri nagpapasidungog ha Dios.” (1 Tim. 1:​3, 4) Ginsasalikway naton an buwa nga mga istorya kay maaram kita han gintitikangan hito nga impormasyon. Lugod, an aton la ginpapamatian amo an “mag-opay nga mga pulong” han kamatuoran.​—2 Tim. 1:13. w24.04 11 ¶16; 13 ¶17

Magpabilin nga kahiusa ha mga maunungon kan Jehova. Karuyag han Dios nga magkaurosa kita ha aton pagsingba. Magpapabilin kita nga nagkakaurosa tubtob nga nakapot kita ha kamatuoran. An bisan hin-o nga nasimang ha kamatuoran naghihimo hin pagkabahin-bahin ha kongregasyon, salit an Dios nagpapahamangno ha aton nga ‘maglikay ha ira.’ Kay kon diri, mahimo kita maipahirayo ha kamatuoran. (Roma 16:17) Kon nakikilala naton an kamatuoran ngan nakapot hin marig-on dida hito, magpapabilin kita nga talwas ngan mahimsog ha espirituwal. (Efe. 4:​15, 16) Mapuprotektaran kita tikang ha buwa nga mga katutdoan ngan propaganda ni Satanas, ngan magpapabilin kita nga talwas ha pag-ataman ni Jehova ha panahon han daku nga kasakitan. Padayon nga kapti hin marig-on kon ano an kamatuoran, “ngan an Dios han kamurayawan maupod ha iyo.”​—Fil. 4:​8, 9. w24.07 13 ¶16-17

Naghatag hi Jesus hin espesyal nga atensyon ha mga tawo nga binubug-atan tungod han sala ngan gin-imbitar niya hira nga magin iya mga sumurunod. Maaram hiya nga an rason gud han pag-antos han mga tawo amo an sala. Salit ginbuligan niya an kalalakin-an ngan kababayin-an nga kilalá nga makasasala. Nagsaysay hiya pinaagi hin ilustrasyon: “An maghimsog nga mga tawo diri nanginginahanglan hin doktor, kondi an mga may sakit.” Nagsiring pa hiya: “Kinanhi ako basi tawagon, diri an magtadong nga mga tawo, kondi an magpakasasala.” (Mat. 9:​12, 13) Ngan ito an iya ginbuhat. Mahigugmaon nga ginpasaylo niya an mga sala han babaye nga naghugas han iya tiil pinaagi han iya mga luha. (Luc. 7:​37-50) Nagtutdo hiya hin importante nga mga kamatuoran ha Samaritana ha may bubon, o atabay, bisan kon maaram hiya han iya imoral nga pagkinabuhi. (Juan 4:​7, 17-19, 25, 26) Gintagan pa ngani han Dios hi Jesus hin gahum basi wad-on an kataposan nga resulta han ngatanan nga sala—an kamatayon. Paonan-o? Nagbanhaw hi Jesus hin mga tawo—lalaki ngan babaye, kabataan ngan mga adulto.​—Mat. 11:5. w24.08 4 ¶9-10

Paonan-o ni Jehova hihimayaon an iya ngaran ha diri na maiha? Pinaagi han iya mga paghukom. Diri na maiha, bubungkagon niya an Babilonya nga Gamhanan tungod han pagpasipara ha iya baraan nga ngaran. (Pah. 17:​5, 16; 19:​1, 2) An pipira nga makakakita han kabungkagan han Babilonya nga Gamhanan posible nga umupod ha aton ha tinuod nga pagsingba. Ha urhi, ha Armagedon, bubungkagon ni Jehova an bug-os nga sistema ni Satanas, tungod hito mawawara an ngatanan nga nakontra ha iya ngan an nagpapasipara ha iya ngaran. Pero tatalwason an ngatanan nga nasugot ngan nahigugma ha iya ngan an mga nalilipay ha paghatag ha iya hin himaya. (Mar. 8:38; 2 Tes. 1:​6-10) Katapos han ultimo nga pagsari nga mahitatabo katapos han Usa ka Yukot ka Tuig nga Pagmando han Kristo, bug-os na nga nabaraan ni Jehova an iya ngaran. (Pah. 20:​7-10) Hito nga panahon, “an tuna mapupuno han kahibaro mahitungod han himaya ni Jehova sugad la nga an dagat nalulukop hin katubigan.” (Hab. 2:14) Eksayted gud kita nga makita nga an ngatanan nga buhi maghahatag hin himaya kan Jehova nga angay ha iya ngaran! w25.01 7 ¶15-16

Ano an mabulig ha Hebreo nga mga Kristiano nga mailob nira an pagkontra? Maaram hi apostol Pablo nga kinahanglan nira an tama nga panhunahuna han ira mga kakurian. Ginsaysay niya nga posible nga tugotan han Dios nga matestingan an pagtoo han mga Kristiano sugad nga bahin han pag-train ha ira. An sugad nga training makakabulig ha usa nga makultibar ngan mapauswag an importante nga mga kalidad han Kristiano. Pinaagi ha pagpokus ha mag-opay nga resulta han mga kakurian, magigin mas masayon para ha Hebreo nga mga Kristiano nga magin mapailubon. (Heb. 12:11) Gin-aghat ni Pablo an Hebreo nga mga Kristiano nga magin mas determinado nga ilubon an mga kakurian. Usa hiya nga makakahatag hin maopay nga sagdon mahitungod han pag-ilob ha pagtimaraot. Sugad nga paratimaraot hadto ha mga Kristiano, maaram hiya kon ano karaot hira gintratar. Maaram liwat hiya kon paonan-o maiilob an pagtimaraot. Ngani, naeksperyensyahan niya an iba-iba nga klase han pagkontra han nagin Kristiano hiya.​—2 Cor. 11:​23-25. w24.09 12-13 ¶16-17

Ha kada adlaw nga nalabay, nagigin mas apurado an aton ministeryo. Kay ano? Kay gutiay na la nga panahon an nahibibilin. Hunahunaa an igintagna ni Jesus mahitungod han pagsangyaw nga buruhaton ha kataposan nga mga adlaw, sugad han nakarekord ha Marcos 13:10. Sumala ha kapariho nga rekord ni Mateo, hi Jesus nagsiring nga an maopay nga sumat kinahanglan maisangyaw ha ngatanan nga inuukyan nga tuna antes umabot an “kataposan.” (Mat. 24:14) Iginpapasabot hito nga mga pulong an bug-os nga kataposan han maraot nga sistema ni Satanas. Hi Jehova nag-eskedyol na han “adlaw ngan oras” para hito nga mga panhitabo nga hirani na matuman. (Mat. 24:36; Buh. 1:7) Kada adlaw mas nagtitikahirani kita hito nga adlaw. (Roma 13:11) Pero yana, dapat kita padayon nga magsangyaw tubtob nga umabot an kataposan. Samtang ginpapamalandong naton an aton ministeryo, ini an importante nga pakiana nga dapat naton hunahunaon hin maopay: Kay ano nga iginsasangyaw naton an maopay nga sumat? Tungod han gugma napapagios kita nga magsangyaw. Kon nagsasangyaw kita, iginpapakita naton an aton gugma—an aton gugma ha maopay nga sumat, an aton gugma ha mga tawo, ngan labaw ha ngatanan, an aton gugma kan Jehova ngan ha iya ngaran. w24.05 14-15 ¶2-3

Mga kag-anak, aghata an iyo anak nga hunahunaon an mga linarang ni Jehova. Samtang naglalakat ha parke o naggagarden, ipakita ha iyo anak an makapainteres nga mga pattern nga makikita ha mga linarang. Kay ano? Ini nga mga pattern nagpapakita nga may baltok gud ngan maaramon nga nagdisenyo hito. Pananglitan, gin-inadman na han mga syentista hin damu ka tuig an spiral nga mga pattern. Iginsaysay han biophysicist nga hi Nicola Fameli nga kon iihapon mo an mga spiral ha usa nga linarang, makikita mo nga may ginsusundan ito nga pattern hin mga numero. Ini nga mga numero gintatawag nga Fibonacci sequence. An spiral nga mga pattern makikita ha damu nga linarang, sugad han kurti han pipira nga galaksi, han pattern han shell han nautilus, han mga dahon han mga tanom, ngan han butnga han bukad han sunflower. w24.12 16 ¶7

Hira Moises, David, ngan Juan nabuhi ha iba nga panahon, ngan an ira kahimtang iba kay han aton. Pero damu an aton kaparihoan ha ira. Nag-alagad hira ha tinuod nga Dios, ngan ito liwat an aton ginbubuhat. Pariho ha ira, nag-aampo kita, nasarig, ngan nagpapagiya kan Jehova. Ngan pariho hito nga mga lalaki ha kadaan nga panahon, natoo kita nga hura nga ginbibendisyonan ni Jehova an mga nasugot ha iya. Salit sundon naton an ultimo nga mga pulong hito nga lagas nga mga lalaki pinaagi ha pagsugot ha mga sugo ni Jehova. Kon bubuhaton ta ito, magigin tinuod kita nga malampuson ha ngatanan nga aton ginbubuhat. ‘Mabubuhi kita hin maiha nga panahon,’ oo, ha waray kataposan! Ngan magigin malipayon kita kay napapalipay naton an aton mahigugmaon nga langitnon nga Amay, nga nagtutuman han ngatanan niya nga saad ha mga paagi nga labaw pa gud kay han anoman nga aton ginlalaoman o naiimadyin pa ngani.​—Efe. 3:20. w24.11 13 ¶20-21

Ha siyahan nga siglo, ginpili an pipira nga brother nga magin mga ministeryal nga surugoon. (1 Tim. 3:8) Baga hin hira an gin-unabi ni apostol Pablo ha iya surat nga ‘binulig ha iba.’ Salit masisiring naton nga an mga ministeryal nga surugoon nag-aasikaso han importante nga mga butang basi an mga tigurang makapokus ha pagtutdo ngan pag-shepherding. Pananglitan, an mga ministeryal nga surugoon bangin binulig ha pagkopya han Kasuratan o ha pagpalit han mga materyales nga kinahanglan ha pagkopya. Pansina an pipira nga pagbulig nga ginbubuhat han mga ministeryal nga surugoon ha iyo kongregasyon. (1 Ped. 4:10) Bangin ig-asayn hira ha panginano han account o ha mga teritoryo han kongregasyon, ha pag-order hin literatura basi magkaada hito an mga magwarali, ha pag-operate han audio ngan video equipment, ha pagin attendant, o ha pagbulig ha pagmintinar han Kingdom Hall. Ito ngatanan importante para magin mahapsay an buruhaton han kongregasyon.​—1 Cor. 14:40. w24.10 19 ¶4-5

Maiilob naton an bisan ano nga problema, daku man ito o guti, kon hihinumdumon naton nga hi Jehova buhi ngan aada hiya basi buligan kita. Hiya an Makagarahum-ha-ngatanan, ngan mahahatagan kita niya hin gahum basi makailob. Naghahatag ini ha aton hin pasarig kon naatubang kita hin mga problema. An pakaeksperyensya han bulig ni Jehova kon naatubang hin gutiay nga mga problema nagpapasarig ha aton nga bubuligan liwat kita niya kon naatubang kita hin mas dagku nga problema. Pansina an duha nga eksperyensya mismo ni Hadi David nga nakadugang han iya pagsarig kan Jehova. Han bata pa hi David nga paraataman han panon, usa nga oso ngan leon an inabot ngan gintabag, o ginkuha, an karnero han iya tatay. Hiton duha nga sitwasyon, maisugon nga ginlanat ni David an mga hayop ngan gintalwas an mga karnero. Pero waray niya hunahunaa nga nahimo niya ito nga hiya la. Maaram hiya nga ginbuligan hiya ni Jehova. (1 Sam. 17:​34-37) Pinaagi ha pagpamalandong hito nga mga eksperyensya nagkaada hi David pagsarig nga an buhi nga Dios magpapakusog ha iya ha tiarabot. w24.06 21 ¶5-6

Pananglitan, gin-imbitar ka ha usa nga party. Maatender ka ba? Kon diri mo kilala an nag-iimbitar o diri ka maaram han iya mga plano hito nga party, kinahanglan ipakiana mo ini ha iya: “Diin ngan san-o ini hihimoon? Damu ba an maatender? Hin-o an manginginano hito? Hin-o an mga maatender? Ano nga mga activity an nakaplano himoon? May makahurubog ba nga irimnon nga isiserbi?” An mga baton hini nga mga pakiana mabulig ha imo nga makahimo hin maaramon nga desisyon. Sunod, katapos mo mahibaroan an tama nga mga impormasyon, hunahunaa hin maopay an bug-os nga sitwasyon. Pananglitan, ano man kon nahibaroan mo nga may mga maatender nga waray mga prinsipyo uyon ha Biblia o may makahurubog nga irimnon nga isiserbi ngan waray manginginano? Nakikita mo ba nga ito nga party posible magin karisyohan nga waray kontrol? (1 Ped. 4:3) Kon nasabtan mo na an ngatanan nga mahitatabo, mas masayon an paghimo hin maopay nga desisyon. w25.01 15 ¶4-5

Gin-gamit ni Jehova an mga ilustrasyon basi buligan kita nga masabtan kon paonan-o niya ginpapara pinaagi han halad-lukat an mga sala han usa nga mabinasulon. Makuri gud tanggalon ha tela an mga mantsa nga sugad kapula han dugo o krimson. Pero pinaagi hini nga ilustrasyon, ginpapasarig kita ni Jehova nga an aton mga sala mahimo mahugasan hin maopay nga diri na gud ito makikita. An mga sala iginpariho liwat ha “mga utang.” (Mat. 6:12; Luc. 11:4) Ha kada pakakasala naton kan Jehova, sugad hin nagtitikadaku an aton utang! Daku gud an aton utang ha iya! Pero kon ginpapasaylo kita ni Jehova, sugad hin iya ginkakansela an utang nga aton unta baraydan. Diri hiya nag-oobligar ha pagpabayad ha mga sala nga ginpasaylo na. Nakakaliaw gud ito nga ilustrasyon ha pagpakita nga nagigin magaan an aton pag-abat kon ginpapasaylo kita ni Jehova! w25.02 9-10 ¶9-10

Bangin pagkinahanglanon han mga kag-anak an pipira nga praktikal nga bulig samtang nagtitikalagas hira, ngan damu nga anak an nalilipay paghatag han panginahanglan han ira mga kag-anak. (1 Tim. 5:4) Pero maaram an Kristiano nga mga kag-anak nga an gintitikangan han ira pinakadaku nga kalipay amo an pagbulig ha ira mga anak nga magin mga alagad ni Jehova, diri an pagkaada hin mga anak nga ginhuhunahuna nira nga makakabulig ha ira ha pinansyal. (3 Juan 4) Pinaagi han iyo ehemplo, tutdui an iyo mga anak nga sumarig kan Jehova samtang ginbubuligan niyo hira nga magin andam ha pagsuporta ha ira kalugaringon. Tikang pa ha ira pagkabata, ipakita ha ira an pagkaimportante han pagin maduruto. (Prob. 29:21; Efe. 4:28) Samtang nagtutubo hira, buligi hira nga mag-aram hin maopay ha eskwelahan. An Kristiano nga mga kag-anak dapat mag-research ngan iaplikar an mga prinsipyo ha Biblia basi mabuligan an ira mga anak nga makahimo hin maaramon nga desisyon kon ano nga edukasyon an ira kukuhaon. Mag-aandam ini ha ira mga anak nga masuportahan an ira kalugaringon ngan basi bug-os nga makasuporta ha ministeryo. w25.03 30-31 ¶15-16

Mababasa ha Isaias kapitulo 65 an paghulagway ni Jehova ha kahimtang hadton maukoy ha espirituwal nga paraiso. Han 537 B.C.E an una nga katumanan hini nga tagna. Hito nga panahon, ginpagawas an mabinasulon nga mga Judio tikang ha pagkabihag ha Babilonya ngan binalik hira ha ira tuna nga natawhan. Ginbendisyonan ni Jehova an iya katawohan ngan ginbuligan hira nga himoon nga mahusay utro an ginbungkag nga syudad han Jerusalem ngan ipahiuli an templo hito sugad nga sentro han tinuod nga pagsingba ha Israel. (Isa. 51:11; Zac. 8:3) An ikaduha nga katumanan han tagna ni Isaias nagtikang han 1919 C.E. han an mga magsiringba ni Jehova ha moderno nga panahon nakagawas tikang ha pagkabihag ha Babilonya nga Gamhanan. Katapos, nagtikahaluag an espirituwal nga paraiso ha bug-os nga tuna. An madasigon nga mga parasamwak han Ginhadian nagporma hin damu nga kongregasyon ngan nagkaada espirituwal nga mga bunga. An kalalakin-an ngan kababayin-an nga bayolente ngan imoral hadto ‘nagsul-ot han bag-o nga personalidad nga ginlarang uyon ha kaburut-on han Dios.’ w24.04 20-21 ¶3-4

Ha pipira nga lugar, ginlalaoman nga an mga kag-anak o iba nga adulto an magpipili hin maarasawa para ha ira solo nga paryente. Ha iba naman nga lugar, an pamilya o kasangkayan an namimiling hin potensyal nga maarasawa para ha usa nga solo ngan hira an nagpaplano basi mahibaroan kon compatible ba hira. Kon ginhangyo ka nga magplano hin usa nga panguyab o pag-asawa, ikonsiderar an mga karuyag ngan mga panginahanglan han lalaki ngan babaye. Kon may nakilala ka nga maopay nga maarasawa para ha imo sangkay o paryente, hibaroi tubtob ha imo mahihimo kon ano an iya personalidad, mga kalidad, ngan labaw ha ngatanan, espirituwalidad. An duok nga relasyon kan Jehova amo an mas importante kay ha kwarta, edukasyon, o estado han kinabuhi. Pero hinumdumi nga an solo nga brother ngan sister an dapat magdesisyon kon mag-aasawa ba hira. w24.05 23 ¶11

Mabubuligan naton an mga mag-uyab kon maghihirot kita ha aton iyayakan o diri iyayakan. Danay, kinahanglan naton kontrolon an aton kalugaringon. (Prob. 12:18) Pananglitan, bangin eksayted kita nga isumat ha iba nga nagin mag-uyab na hira, pero bangin karuyag han mag-uyab nga hira mismo an magsumat hito. Dapat diri naton igtsismis an mag-uyab o magin kritiko mahitungod ha ira personal nga mga desisyon. (Prob. 20:19; Roma 14:10; 1 Tes. 4:11) Dugang pa, diri naton angay sidngan o pakianhan an mag-uyab nga makakapresyur ha ira nga magpakasal. Ano man kon an mag-uyab nagdesisyon nga magbulag? Kinahanglan likyan naton an pagpinakiana hin personal o basulon an usa ha ira tungod han ira pagbulag. (1 Ped. 4:15) An pagbulag han mag-uyab diri nagpapasabot nga nagsayop hira ha ira desisyon. Kasagaran na nga nagpapasabot la ito nga natuman han pag-uyab an katuyoan hito—nakabulig ito ha mag-uyab nga makahimo hin maopay nga desisyon. Pero ito nga desisyon bangin makapasakit la gihapon ha ira emosyon. Salit mahimo kita mamiling hin mga paagi ha pagbulig ha ira. w24.05 31 ¶15-16

An usa han pinakamakuri nga mga problema amo an kon an usa nga membro han pamilya o an usa nga duok nga sangkay binaya kan Jehova. (Sal. 78:40) Kon mas duok ka hito nga tawo, mas makuri an pagkarawat han sitwasyon. Kon nakakaeksperyensya ka hin sugad nga masakit nga sitwasyon, makakaparig-on ha imo an ehemplo ni Zadok han pagkamaunungon. Nagpabilin hiya nga maunungon kan Jehova han an iya duok nga sangkay nga hi Abiatar waray magin maunungon. Han hi Hadi David lagas na ngan tikamatay na, an iya anak nga hi Adonias naningkamot nga agawon an trono nga iginsaad ni Jehova kan Solomon. (1 Cron. 22:​9, 10) Ginpili ni Abiatar nga suportaran hi Adonias. (1 Hadi 1:​5-8) Ha pagbuhat hito, waray magin maunungon hi Abiatar diri la kan David ngan Zadok kondi pati liwat kan Jehova. Ha sulod hin sobra 40 ka tuig, nagin duok hira Zadok ngan Abiatar nga magkatrabaho sugad nga mga saserdote.​—2 Sam. 8:17; 15:29; 19:​11-14. w24.07 6 ¶14-15

Makakasiguro kita nga sulit an aton paningkamot ha padayon nga pagbantay kontra ha pagsulay. Mahimo kita umabat hin ‘temporaryo nga kalipay’ ha pagbuhat hin sala, pero kon magkikinabuhi kita ha paagi nga karuyag ni Jehova para ha aton magigin mas malipayon gud kita. (Heb. 11:25; Sal. 19:8) Tungod ito kay gindisenyo kita nga magkinabuhi uyon ha iya mga paagi. (Gen. 1:27) Salit magkakaada kita limpyo nga konsensya ngan ha urhi mahimo kita magkaada hin kinabuhi nga waray kataposan. (1 Tim. 6:12; 2 Tim. 1:3; Jud. 20, 21) Tinuod, “an unod maluya.” (Mat. 26:41) Pero diri ito nagpapasabot nga waray makakabulig ha aton. Hi Jehova andam ha paghatag ha aton han ginkikinahanglan nga gahum. (2 Cor. 4:7) Pero tigamni, nga ito an diri ordinaryo nga gahum nga iginhahatag han Dios. An normal nga gahum—an aton paningkamot kada adlaw basi makabantay kontra ha pagsulay—amo an aton responsabilidad nga gamiton. Babatunon ni Jehova an aton mga pag-ampo nga tagan kita hin dugang nga kusog kon ginkikinahanglan naton ito. (1 Cor. 10:13) Oo, ha bulig ni Jehova, makakapadayon kita ha pagbantay kontra ha pagsulay. w24.07 19 ¶19-21

Ginsurat ni apostol Pablo an mga pulong han aton teksto yana ha iya igkasi-tigurang nga hi Timoteo kon paonan-o aasikasuhon adton “nagbibinuhat hin sala.” Ano an iya karuyag sidngon? Diri niya karuyag sidngon nga an “nagkikita” amo an bug-os nga kongregasyon. Lugod, an karuyag sidngon niya adton maaram na nga daan han sala. Posible nga hira an mga testigo, o an ginsumatan han nakasala. Mataktika nga papahibaroon hira han mga tigurang nga gin-asikaso na an problema ngan gintadong na an nakasala. Ha pipira nga kahimtang, bangin damu an nahibaro ha kongregasyon han sayop nga buhat o posible gud nga mahibabaroan. Salit an mahiuupod ha mga ‘nakakita’ amo an bug-os nga kongregasyon. Tungod hito ipapahibaro han tigurang ha kongregasyon nga an bugto ginsaway. Kay ano? Hi Pablo nagsiring: “Sugad nga pahamangno ha iba” basi diri hira makasala. w24.08 23-24 ¶16-17

Dapat kita magpabilin nga busy ha pag-alagad kan Jehova tubtob ha kataposan. An mga dinihogan dapat magpabilin nga mabinantayon basi ‘kuhaon’ hira ni Jesus ngadto ha langit sugad nga balos ha ira. (Mat. 24:40) Eksayted gud ito nga mga dinihogan nga ‘tirukon’ hira ni Jesus ngadto ha langit. Katapos han girra han Armagedon, hira an magigin maarasawa ni Jesus ha kasal han Kordero. (2 Tes. 2:1) Bisan kon an paghukom madagmit nga nagtitikahirani, waray kita rason nga mahadlok. Kon magpabilin kita nga matinumanon, an aton mahigugmaon nga langitnon nga Amay maghahatag ha aton hin “diri ordinaryo nga gahum” basi kita “maglampos . . . ha pagtindog ha atubangan han Anak han tawo.” (2 Cor. 4:7; Luc. 21:36) Ha langit man o ha tuna an aton paglaom, mapapalipay naton an aton Amay kon mamamati kita ha mga pahamangno nga makikita ha mga parabola ni Jesus. Pinaagi han diri matupngan nga pagkabuotan ni Jehova an aton mga ngaran makikita nga “nakasurat ha libro” han kinabuhi.​—Dan. 12:1; Pah. 3:5. w24.09 24-25 ¶19-20

Magkakaada ka kamurayawan ha hunahuna ha bulig han Pulong han Dios. Paonan-o? Hunahunaa an mag-opay nga butang nga may-ada ka—upod na an mga bahandi ha langit—ngan ikompara ini hadton an balos amo an kon ano la an maihahatag hini nga kalibotan. Bangin bug-os hira nga sumarig ha ira mga kalamposan hini nga kinabuhi kay waray hira ginpapamulat ha tiarabot. Pero nagsasaad hi Jehova ha imo hin mga bendisyon labaw pa kay ha imo maiimadyin. (Sal. 145:16) Hunahunaa liwat ini: Mahibabaroan gud ba naton kon ano an aton nagin kinabuhi kon iba an aton nagin desisyon? Usa la an sigurado: Adton nagdesisyon basado ha ira gugma ha Dios ngan gugma ha igkasi-tawo magkakaada pirme mga butang ha kinabuhi nga maghihimo ha ira nga magin malipayon gud. w24.10 27 ¶12-13