Marso

Mababasa naton ha Biblia nga may matadong nga mga tawo nga nagin diri matadong. An usa hito amo hi Hadi Solomon. Gintutdoan gud hiya hin maopay han mga paagi han Dios ngan ginbendisyonan gud ni Jehova; pero ha urhi, nagsingba hiya ha buwa nga mga Dios. Nakapasina gud kan Jehova an iya mga sala ngan nag-antos an nasud han Israel han maraot nga mga epekto hito ha sulod hin ginatos nga katuigan. Oo, an Kasuratan nasiring nga hi Solomon “pinahuway kaupod han iya mga kaapoy-apoyan,” upod hito nga matinumanon nga kalalakin-an an sugad kan Hadi David. (1 Hadi 11:​5-9, 43; 2 Hadi 23:13) Pero an paagi ba han iya paglubong naggagarantiya nga babanhawon hiya? Waray ginsisiring an Biblia. An pagkabanhaw regalo tikang ha mahigugmaon nga Dios. Iginhahatag niya ito ha mga karuyag niya tagan hin oportunidad nga mag-alagad ha iya ha waray kataposan. (Job 14:​13, 14; Juan 6:44) Makakakarawat ba hi Solomon hin sugad nga regalo? Hi Jehova an maaram; kita diri. Pero maaram gud kita nga bubuhaton ni Jehova an tama. w24.05 4 ¶9

Kon igdedikar naton an aton kinabuhi kan Jehova, magigin mga bisita kita niya ha iya simboliko nga tolda. Nagpapahimulos kita ha abunda nga espirituwal nga pagkaon ngan ha pakig-upod ha iba nga nagin mga bisita liwat ni Jehova. An Iya simboliko nga tolda diri kay aada la ha usa nga lugar. An tolda ni Jehova aadto hain man an iya matinumanon nga mga surugoon. (Pah. 21:3) Kumusta naman adton matinumanon nga namatay? Mga bisita la ba gihap hira ha tolda ni Jehova? Oo! Kay ano nga makakasiring kita hito? Kay nahinunumdoman gud hira ni Jehova, para ha iya buhi la gihap hira. Hi Jesus nagsiring: “Mahitungod ha pagbuhi han mga patay, bisan hi Moises nag-unabi hito ha asoy may kalabotan ha tunukon nga tanom, han gintawag niya hi Jehova nga ‘an Dios ni Abraham ngan Dios ni Isaac ngan Dios ni Jacob.’ Dios hiya, diri han mga patay, kondi han mga buhi, kay para ha iya hira ngatanan buhi.”​—Luc. 20:​37, 38. w24.06 3 ¶6-7

Hi Zadok kinadto ha Hebron nga may dara nga armas ngan andam ha pakiggirra. (1 Cron. 12:38) Andam hiya nga sumunod kan David ha pakiggirra ngan depensahan an Israel tikang ha mga kaaway. Posible nga kulang hin eksperyensya hi Zadok ha pakig-away sugad nga sundalo, pero maisugon gud hiya. Diin nahibaro an usa nga saserdote pariho kan Zadok nga magin maisugon? Damu an iya kilala nga kalalakin-an nga makusog ngan maisugon. Sigurado nga nahibaro hiya tikang ha ira ehemplo. Pananglitan, an ehemplo ni David ha pagin maisugon ha ‘pagpanguna ha Israel ha mga pakiggirra’ nagpagios ha bug-os nga Israel nga suportaran hiya hin bug-os-kasingkasing. (1 Cron. 11:​1, 2) Hi David pirme nasarig kan Jehova nga bubuligan hiya kontra ha iya mga kaaway. (Sal. 138:3) Hi Zadok nahibaro liwat han maisugon nga ehemplo han iya mga nakaupod—sugad kanda Jehoiada ngan ha iya girriro nga anak nga lalaki nga hi Benaias, pati liwat ha 22 nga iba pa nga lider han mga tribo nga sinuporta kan David.​—1 Cron. 11:​22-25; 12:​26-28. w24.07 3 ¶5-6

Hi Saul han Tarso mabangis nga paratimaraot han hinigugma nga mga sumurunod han Kristo. Posible gud nga an kadam-an han mga Kristiano naghuhunahuna nga diri na gud hiya magbabag-o. Pero an binanhaw nga hi Jesus iba gud an panhunahuna kay ha diri perpekto nga panhunahuna han tawo. Nakita niya ngan han iya Amay an mag-opay nga kalidad ni Saul. Hi Jesus nagsiring: “Ini nga tawo usa nga pinili ko nga surudlan.” (Buh. 9:15) Naggamit pa ngani hi Jesus hin milagro basi buligan hi Saul nga magbasol. (Buh. 7:58–8:3; 9:​1-9, 17-20) Han nagin Kristiano na hi Saul—nga ha urhi nakilala sugad nga apostol Pablo—agsob hiya magpahayag hin apresasyon ha pagkabuotan ngan kalooy nga iginpakita ha iya ni Jehova ngan ni Jesus. (1 Tim. 1:​12-15) Han nabatian ni Pablo an eskandaloso nga problema mahitungod ha imoralidad ha Kristiano nga kongregasyon ha Corinto, ano an ginsiring ha ira ni Pablo nga buhaton? Tikang hito nga iya ginsiring, may mahibabaroan kita nga importante nga leksyon mahitungod han mahigugmaon nga pagdisiplina ni Jehova ngan han pagkaimportante han pagpakita hin kalooy. w24.08 13 ¶15-16

Paglabay hin mga siglo, hinay-hinay nga mas ginklaro ni Jehova kon paonan-o mahimo magin duok ha iya an makasasala nga mga tawo. Hi Abel, an ikaduha nga anak nira Adan ngan Eva, an siyahan nga tawo nga nagpakita hin pagtoo kan Jehova katapos han nahitabo nga pagrebelde ha Eden. Tungod kay hinigugma ni Abel hi Jehova ngan karuyag niya nga mapalipay Hiya ngan magin duok ha Iya, naghalad hiya. Hi Abel paraataman hin karnero, salit nagkuha hiya hin pipira han iya nati nga mga karnero ngan gin-ihaw, ngan iginhalad kan Jehova. Ano an nagin reaksyon ni Jehova? “Nalipay [hiya] kan Abel ngan ha iya halad.” (Gen. 4:4) Iginpahayag ni Jehova an pag-uyon ha pariho nga mga halad han mga tawo nga nahigugma ha iya ngan nasarig ha iya—sugad kan Noe. (Gen. 8:​20, 21) Pinaagi ha pagkarawat ha sugad nga mga halad, iginpakita ni Jehova nga puydi makarawat han makasasala nga mga tawo an iya pag-uyon ngan magin duok ha iya. w24.08 3 ¶5-6

Bangin masakitan gud kita ngan masubo tungod han kawaray-hustisya. (Ecles. 7:7) Ito liwat an gin-abat han matinumanon nga mga surugoon sugad kanda Job ngan Habakuk. (Job 6:​2, 3; Hab. 1:​1-3) Natural la nga abaton naton ito, pero kinahanglan maghirot kita ha aton reaksyon basi malikyan naton nga makabuhat hin sayop nga mahimo magresulta hin dugang nga mga problema. Kon an mga nagbubuhat hin kawaray-hustisya baga hin diri nasisirotan, bangin maghunahuna kita kon sulit ba an pagbuhat han tama. Pansina an salmista nga nakayakan nga an magraot baga hin may-ada maopay nga kinabuhi bisan kon maraot an ira pagtratar ha magtadong. “Ini an magraot, nga pirme hayahay an kinabuhi,” siring niya. (Sal. 73:12) Nasakit liwat hiya hinduro han kawaray-hustisya nga iya nakita salit nahunahuna niya kon mapulsanon pa ba an pag-alagad kan Jehova. Nagsiring hiya: “Han nangalimbasog ako nga masabtan ito, nagin makuri ito para ha akon.”​—Sal. 73:​14, 16. w24.11 3 ¶5-7

Ginhihimaya naton hi Jehova kay ginrirespeto gud naton hiya. Damu an aton rason nga respetuhon hiya. Hi Jehova makagarahum-ha-ngatanan ngan waray tubtoban an iya gahum. (Sal. 96:​4-7) An iya daku nga kinaadman nakikita gud ha mga butang nga iya ginhimo. Hiya an naghatag ha aton hin kinabuhi ngan han ngatanan nga aton kinahanglan basi padayon nga mabuhi. (Pah. 4:11) Maunungon hiya. (Pah. 15:4) Naglalampos an ngatanan niya nga ginbubuhat ngan pirme niya gintutuman an iya mga saad. (Jos. 23:14) Ito an rason nga hi propeta Jeremias nagsiring mahitungod kan Jehova: “Ha ngatanan nga maaramon nga tawo han mga nasud ngan ha ngatanan nira nga ginhadian, waray gud bisan usa nga pariho ha imo”! (Jer. 10:​6, 7) Sigurado nga may-ada kita mag-opay nga rason nga respetuhon an aton Amay ha langit. Pero labaw pa ha pagrespeto an angay naton ihatag kan Jehova—dapat naton hiya higugmaon. Ngan labaw ha ngatanan, ginhihimaya naton hi Jehova kay hinigugma gud naton hiya. w25.01 3 ¶5-6

Nangangalimbasog an mga parakontra han Dios nga himoon an mag-opay nga butang han organisasyon ni Jehova nga baga hin maraot. Pananglitan, nahibaroan naton ha Kasuratan nga naglalaom hi Jehova nga magigin malimpyo ha pisikal, moral, ngan espirituwal an iya mga magsiringba. Hiya nagsiring nga dapat tanggalon ha kongregasyon an bisan hin-o nga diri mabinasulon ngan padayon nga nagbubuhat hin maraot. (1 Cor. 5:​11, 12; 6:​9, 10) Ginsusunod naton iton Kasuratanhon nga sugo. Pero nangangalimbasog an aton mga parakontra nga gamiton ito kontra ha aton pinaagi ha pag-akusar nga mga panatiko kita, kritiko, ngan diri mahigugmaon. Dapat naton kilalahon an gintitikangan hini nga mga pag-atake. Hi Satanas nga Yawa an nagpapaluyo han buwa nga mga istorya. Hiya an “amay han kabuwaan.” (Juan 8:44; Gen. 3:​1-5) Salit dapat kita maglaom nga gagamiton ni Satanas an mga nasuporta ha iya basi magpasarang hin buwa nga mga istorya mahitungod ha organisasyon ni Jehova. w24.04 10-11 ¶13-14

Bisan kon magtikang na an daku nga kasakitan, posible nga an pipira nga nakakita han kabungkagan han “Babilonya nga Gamhanan” makakahinumdom nga an mga Saksi ni Jehova maiha na nga nagyiyinakan hini nga panhitabo. Posible ba nga tumoo kan Jehova an pipira nga makakakita hini nga mga panhitabo? (Pah. 17:5) Kon ito an mahitabo, magigin pariho ito ha kon ano an nahitabo ha Ehipto ha panahon ni Moises. Hinumdumi nga “usa ka daku hinduro nga grupo han magkadurodilain nga mga tawo” an inupod ha mga Israelita han binaya hira ha Ehipto. An pipira hini nga indibiduwal bangin nagtikang tumoo kan Jehova han nakita nira nga natuman an mga pahamangno ni Moises mahitungod han Napulo nga Peste. (Ex. 12:38) Kon puropariho hito an mahitabo katapos mabungkag an Babilonya nga Gamhanan, masusubo ba kita nga makakaupod ha aton an mga tawo bisan kon hirani na umabot an kataposan? Syempre diri! Karuyag naton subaron an personalidad han aton langitnon nga Amay, nga “usa nga Dios nga maloloy-on ngan mapinairon, diri madagmit masina ngan hura hin maunungon nga gugma ngan kamatuoran.”​—Ex. 34:6. w24.05 11 ¶12-13

Ano an puydi mahitabo kon diri na naton ibasar an aton mga gintotoohan ha “suruklan han mag-opay nga mga pulong”? Pansina ini nga ehemplo. Ha siyahan nga siglo, an pipira nga Kristiano nagpapasarang hin buwa nga istorya nga an adlaw ni Jehova inabot na. Bangin may surat hadto, nga ginhuhunahuna han mga tawo nga hi apostol Pablo an nagsurat, nga nagsiring hito. Tungod kay waray hira mag-usisa kon ano an kamatuoran, an pipira nga Kristiano ha Tesalonica tinoo hito nga buwa nga istorya ngan iginpasarang pa ngani nira ito. Diri unta hira mauuwat kon ginhinumdom nira an mga igintutdo ni Pablo ha ira han kaupod pa nira hiya. (2 Tes. 2:​1-5) Ginsagdonan ni Pablo an iya kabugtoan nga diri tumuod ha bisan ano nga ira nabatian. Ngan basi buligan hira ha tiarabot, gintapos ni Pablo an iya ikaduha nga surat ha mga taga-Tesalonica hini nga mga pulong: “Ako, hi Pablo, ako an nagsurat hini nga akon pangumusta, nga amo an pangirilal-an han ngatanan ko nga surat; amo ini an akon agi.”​—2 Tes. 3:17. w24.07 12 ¶13-14

An Hebreo nga mga Kristiano kinahanglan magpailob ha ira pag-alagad kan Jehova kay nagtitikaraot an kahimtang ha Judea. Bisan kon an iba nga Hebreo nga mga Kristiano inatubang hin duro nga pagtimaraot, damu an nagin mga Kristiano ha panahon nga medyo murayaw. Salit hi apostol Pablo nagpahinumdom ha ira nga magin andam ha mas makuri nga pagtimaraot, ngan magin matinumanon tubtob ha kamatayon, pariho kan Jesus. (Heb. 12:4) Pero tungod ha pagtikadamu han mga Kristiano, an Judio nga mga parakontra mas nasina ngan nagin bayolente. Mga tuig antes hito, sobra 40 nga Judio an “nanumpa nga maghihikaraot hira kon kumaon hira o uminom nga diri pa nira napapatay hi Pablo.” (Buh. 22:22; 23:​12-14) Bisan kon may mga nasisina ha ira ngan nagtitimaraot, an mga Kristiano kinahanglan padayon nga magkatirok para ha pagsingba, magsangyaw han maopay nga sumat, ngan padayon nga parig-unon an ira pagtoo. w24.09 12 ¶15

Hi Juan usa nga hinigugma nga apostol ni Jesu-Kristo. (Mat. 10:2) Inupod hi Juan kan Jesus ha bug-os niya nga ministeryo, nakakita han iya mga milagro, ngan nagpabilin nga maunungon ha iya ha makuri nga mga panahon. Nakita ni Juan han ginpatay hi Jesus ngan nakita niya an nabanhaw nga hi Jesus. Nakita liwat ni Juan an pag-uswag han Kristiano nga kongregasyon ha siyahan nga siglo tikang ha gutiay nga grupo han matinumanon nga mga Kristiano tubtob nga an maopay nga sumat ‘naisangyaw na ha ngatanan nga linarang ha ilarom han langit.’ (Col. 1:23) Han hirani na matapos an hilawig nga kinabuhi ni Juan, nakapribilehiyo hiya nga maghimo hin mga sinurat nga nagin bahin han giniyahan nga Pulong han Dios. Iginrekord niya an urusahon gud nga “pahayag ni Jesu-Kristo.” (Pah. 1:1) Iginsurat ni Juan an usa han mga Ebanghelyo. Naghimo liwat hiya hin tulo nga giniyahan nga surat. An iya ikatulo nga surat para ha matinumanon nga Kristiano nga hi Gayo, nga iya ginhigugma sugad nga anak ha espirituwal. (3 Juan 1) An iginsurat hinin matinumanon nga lagas nakakadasig ha ngatanan nga sumurunod ni Jesus tubtob ha aton panahon. w24.11 12 ¶15-16

Kon hinigugma han bana an iya asawa, iya hiya gin-aapresyar. Gintatratar hiya nga presyoso nga regalo tikang kan Jehova. (Prob. 18:22; 31:10) Sugad nga resulta, buotan an iya pagtratar ngan may respeto, bisan ha pribado nga mga butang nga ginbubuhat han mag-asawa la. Diri niya pipresyuron an iya asawa ha seksuwal nga mga buhat nga diri hiya komportable, nga nakakaminos, o nakakapakonsensya. Dapat liwat an bana maningkamot nga tipigan an limpyo nga konsensya ha atubangan ni Jehova. (Buh. 24:16) Mga bana, makakasiguro kamo nga nakikita ngan gin-aapresyar ni Jehova an iyo mga paningkamot nga pasidunggan an iyo asawa ha ngatanan nga bahin han iyo kinabuhi. Magin determinado nga pasidunggan hiya pinaagi ha paglikay ha mga butang nga makakasakit ha iya, ngan magin buotan, may respeto, ngan palanggaon hiya. Kon ito an imo buhaton, iginpapakita mo ha iya nga hinigugma mo hiya ngan gin-aapresyar. Pasidunggi an imo asawa ngan mapuprotektaran mo an imo pinakaimportante nga relasyon—an imo pakigsangkay kan Jehova.​—Sal. 25:14. w25.01 13 ¶17-18

An usa nga kalidad nga an katawohan ni Jehova naiiba tikang ha mga nag-aangkon nga mga Kristiano amo an ira kadasig ha ministeryo. Ano an makakabulig ha aton nga matipigan o madugangan pa ngani an aton kadasig ha pagsangyaw? May mahibabaroan kita ha ehemplo ni Jesus kon paonan-o kita magigin madasigon ha pagsangyaw. Ha panahon han iya ministeryo, waray gud mawara an iya kadasig. Ngani, paglabay han panahon, nagin mas maduruto pa hiya. Pariho ha trabahador han urubasan nga nagtrabaho hin tulo ka tuig basi atamanon an kahoy nga igos nga waray mamunga, nagsangyaw liwat hi Jesus hin mga tulo ka tuig ha mga Judio, pero an kadam-an ha ira waray magin makinarawaton. Kondi pariho han trabahador ha urubasan nga waray mawad-i hin paglaom ha kahoy nga igos, waray liwat hi Jesus mawad-i hin paglaom ha mga tawo o manluya ha iya ministeryo. (Luc. 3:​6-9) An paghibaro han iya mga igintutdo ngan pagsubad han iya mga ginbuhat mabulig ha aton nga magpabilin nga madasigon yana. w25.03 14-15 ¶1-4

Ano man kon ha hunahuna mo an usa baga hin maopay nga maarasawa? Dapat mo ba dayon isumat ha iya an imo inaabat? An Biblia nasiring nga an maaramon nga tawo nagkukuha hin kahibaro antes gumios. Salit maaramon ka kon oobserbaran mo anay hiya hin diri abat antes mo isumat an imo interes ha iya. Paonan-o mo hiya mahimo maobserbaran hin diri abat? Ha mga katirok han kongregasyon o ha mga pagturotarampo, bangin may mapansin ka mahitungod ha iya espirituwalidad, personalidad, ngan batasan. Hin-o an iya kasangkayan, ngan ano an iya gin-iistorya? (Luc. 6:45) Magkapariho ba kamo mga goal? Mahimo ka magpakiana ha mga tigurang ha iya kongregasyon o ha iba nga hamtong nga Kristiano nga nakilala ha iya hin maopay. (Prob. 20:18) Mahimo mo igpakiana an iya reputasyon ngan mga kalidad. (Ruth 2:11) Samtang imo hiya gin-oobserbaran, siguroha nga diri hiya umabat hin pagin diri komportable. Respetoha an iya mga pag-abat, privacy, ngan likyi nga magsinunod-sunod ha iya ngan magpinan-usisa hin sobra mahitungod ha iya. w24.05 22 ¶7-8

An mga tigurang diri dayon naghihimo hin konklusyon nga diri na magbabasol an nagbubuhat hin sala. An iba bangin magbasol dayon ha siyahan pa la nga pakiistorya han komite, samtang an iba naman bangin magkinahanglan hin dugang nga panahon. Salit an mga tigurang bangin maghikay nga kaistoryahon hiya hin diri la makausa. Katapos han siyahan nga pakiistorya, bangin magtikang hiya paghunahuna hin seryoso mahitungod han ginsiring ha iya. Bangin mapainubsanon nga mag-ampo hiya kan Jehova. (Sal. 38:18) Salit ha sunod nga pakiistorya, bangin an iya disposisyon iba na kay han iya iginpakita ha siyahan nga pakiistorya. Basi mabuligan an nagbubuhat hin sala nga magbasol, iginpapakita han mga tigurang an empatiya ngan pagkabuotan. Naglalaom hira ngan nag-aampo kan Jehova nga bibendisyonan an ira mga paningkamot ngan an matinalapason nga Kristiano makapamurubuot ngan magbasol.​—2 Tim. 2:​25, 26. w24.08 22-23 ¶12-13

Diri ni Jehova karuyag nga mabungkag an bisan hin-o! Karuyag niya nga an mga nagbubuhat hin sala bumalik ha iya. (2 Cor. 5:20) Amo ito nga ha bug-os nga kasaysayan, pauroutro nga gin-aghat ni Jehova an iya matinalapason nga katawohan nga magbasol ngan bumalik ha iya, pati na an matinalapason nga mga indibiduwal. An mga tigurang ha kongregasyon may pribilehiyo nga magin igkasi-magburuhat ni Jehova samtang naniningkamot hira nga giyahan nga magbasol an mga nagbubuhat hin sala. (Roma 2:4; 1 Cor. 3:9) Imadyina la an kalipay ha langit kon nagbabasol an magpakasasala! Gin-aabat mismo han aton Amay ha langit, hi Jehova, an kalipay ha kada panahon nga an iya nawara nga karnero nabalik ha kongregasyon. An aton gugma kan Jehova padayon nga naghihilarom samtang aton ginpapamalandong an iya pagpaid, kalooy, ngan diri matupngan nga pagkabuotan.​—Luc. 1:78. w24.08 31 ¶16-17

Kon nagpadara hi Jesus ha presyur han mga tawo nga himoon hiya nga hadi, magigin kaapi hiya ha politika han mga Judio, nga sakop han pagmando han Roma. Aton nabasa nga ‘kinadto dayon hi Jesus ha bukid.’ Salit bisan pa han pagpresyur han iba, diri hiya magigin kaapi ha politika. Importante gud ini nga leksyon para ha aton! Syempre, diri kita hahangyoon han iba nga padamuon an tinapay o tambalon an mga may sakit pinaagi hin milagro; o hihimoon kita nira nga hadi o lider han usa nga nasud. Pero bangin presyuron kita nira nga umapi ha politika pinaagi ha pagbutos o pagsuporta ha usa nga ginhuhunahuna nira nga magigin maopay nga magmarando. Pero klaro an ehemplo ni Jesus. Diniri hiya nga makigbahin ha politika, ha urhi nagsiring pa ngani hiya: “An akon Ginhadian diri bahin hini nga kalibotan.” (Juan 17:14; 18:36) Sugad nga mga Kristiano, kinahanglan naton subaron an panhunahuna ngan mga buhat ni Jesus. Nasuporta kita ha Ginhadian, nagsasangyaw mahitungod hito, ngan nag-aampo nga umabot na ito.​—Mat. 6:10. w24.12 4 ¶5-6

Samtang nag-aaram ka, hunahunaa kon paonan-o mo maiaaplikar an imo nahibaroan. Pananglitan, subara an hustisya ni Jehova pinaagi ha pagtratar ha iba nga waray ginpapaurog. Subara an gugma ni Jesus ha iya Amay ngan ha iba pinaagi ha pagin andam nga mag-antos para ha ngaran ni Jehova ngan ha pagbulig ha imo mga igkasi-Kristiano. Subara liwat hi Jesus pinaagi ha pagsangyaw ha iba basi magkaada hira oportunidad nga karawaton an presyoso gud nga regalo ni Jehova. Kon mas nasasabtan naton ngan gin-aapresyar an lukat, mas hihigugmaon naton hi Jehova ngan an iya Anak. Salit mas hihigugmaon liwat kita nira. (San. 4:8) Gamiton naton an mga tagana ni Jehova basi padayon nga mahibaro mahitungod ha lukat. w25.01 25 ¶16-17

An mga pulong ha teksto yana puydi ighubad hin: “Imo ginkuha tikang ha imo atubangan an ngatanan ko nga sala.” Ini nga ilustrasyon nagpapakita nga ginkukuha ni Jehova an mga sala han usa nga mabinasulon ngan iginlalabog ito nga diri na nakikita. Ini nga mga pulong puydi liwat ighubad hin: “Ginhimo mo [an akon mga sala] nga sugad hin waray ito mahitabo.” Ginpapabug-atan pa han Biblia ini nga punto ha usa pa nga ilustrasyon nga nakarekord ha Micas 7:​18, 19. Nasiring ito nga mga bersikulo nga iginlalabog ni Jehova an aton mga sala ha kahiladman han dagat. Ha kadaan nga panahon, imposible gud nga makuha pa an usa nga butang nga iginlabog na ngadto kahiladman han dagat. Pinaagi hini nga mga ilustrasyon, aton nahibaroan nga kon ginpapasaylo kita ni Jehova, bug-os nga gintatanggal niya an sala salit diri na kita dapat makonsensya. Tinuod gud ito sugad han ginsiring ni David, “malipayon an mga ginpasaylo ha mga pagtalapas ngan adton ginpara an mga sala.” (Roma 4:7) Ito an tinuod nga pagpasaylo! w25.02 9 ¶7-8

May paraiso yana ha tuna nga puno hin kinabuhi ngan buruhaton. Minilyon nga tawo an aada hito ngan nag-i-enjoy han totoo nga kamurayawan. Adton aada na hini nga paraiso determinado nga diri gud bumaya. Karuyag liwat nira nga damu gud nga tawo an umapi ha ira tubtob nga posible hinin kakaiba nga kahimtang. Ano ito? An espirituwal nga paraiso! Nakakaimpres gud nga naghimo hi Jehova hin murayaw nga palibot ha butnga hinin kalibotan ni Satanas nga puno hin kangalas, karaotan, ngan peligro. (1 Juan 5:19; Pah. 12:12) Nakikita han aton mahigugmaon nga Dios an nakakadaot nga epekto hini nga sistema han mga butang ngan nagtatagana hiya hin seguridad nga aton kinahanglan basi padayon nga makag-alagad hin malipayon. Iginhulagway ha Iya Pulong an espirituwal nga paraiso sugad nga talwas nga “arayopan” ngan “garden nga ginsaribohan hin maopay.” (Isa. 4:6; 58:11) Pinaagi han bendisyon ni Jehova, an mga naukoy hini nga paraiso naabat hin kalipay ngan seguridad hinin makuri nga kataposan nga mga adlaw.​—Isa. 54:14; 2 Tim. 3:1. w24.04 20 ¶1-2

Kon karuyag mo mag-asawa, sigurado nga igin-aampo mo ito. Syempre, hi Jehova diri nagsasaad ha bisan hin-o nga magkakaada hiya asawa. Pero interesado hiya han imo mga panginahanglan ngan inaabat, ngan mabubuligan ka niya ha proseso ha pamiling hin maarasawa. Salit padayon nga isumat ha iya an imo mga hingyap ngan inaabat. (Sal. 62:8) Ig-ampo nga magkaada ka kinaadman ngan magin pasensyoso. (San. 1:5) Bisan kon diri ka dayon makabiling hin maopay nga maarasawa, nagsasaad hi Jehova nga padayon niya nga aatamanon an imo mga panginahanglan ha pisikal ngan emosyon. (Sal. 55:22) Pero paghirot nga an pagbiling hin maarasawa diri dapat an magin pinakaimportante ha imo kinabuhi. (Fil. 1:10) An tinuod nga kalipay diri nakadepende ha imo pagin inasaw-an o solo, lugod, nakadepende ito ha imo relasyon kan Jehova. (Mat. 5:3) Ngan samtang solo ka pa, mahimo ka magkaada mas daku nga kagawasan nga mapahaluag an imo ministeryo. (1 Cor. 7:​32, 33) Gamita ha pinakamaopay ito nga panahon. w24.05 21 ¶4; 22 ¶6

Tubtob san-o dapat an iyo pagin mag-uyab? An dinalidali nga mga desisyon agsob nga nagriresulta hin diri maopay. (Prob. 21:5) Salit an iyo pagin mag-uyab dapat eksakto la nga makilala mo hiya hin maopay. Pero kon diri man kinahanglan, diri niyo dapat paihaon an iyo pag-uyab. An Biblia liwat nasiring: “An ginpapamulat nga nalalangan nakakapasubo han kasingkasing.” (Prob. 13:12) Ano an mahihimo han iba samtang mag-uyab an duha? Puydi naton hira imbitaron nga umupod ha aton pangaon, ha pagsingba han pamilya, o ha pagpahalibway. (Roma 12:13) Kinahanglan ba nira hin tsaperon, masasakyan, o lugar nga makakag-istorya hira hin pribado? Kon oo, puydi ba kita bumulig? (Gal. 6:10) Kon ginhahangyo ka nga magtsaperon, hunahunaa ito sugad nga oportunidad basi makabulig. Ayaw bayai an mag-uyab nga hira la nga duha, pero magin mahunahunaon liwat kon kinahanglan nira hin panahon ngan lugar basi makag-istorya hin pribado. w24.05 30 ¶13-14

Naniningkamot an mga tigurang nga mahibaroan an mga hinungdan han pakasala. Pananglitan, hinay-hinay ba nga nanluya an usa nga Kristiano tungod kay ginpabay-an niya an iya personal nga pag-aram o pagministeryo? Talagsa na la ba hiya mag-ampo kan Jehova? Inundang ba hiya ha paningkamot nga atohan an sayop nga mga hingyap? Nakahimo ba hiya hin diri maaramon nga mga desisyon parte ha pagpili hin mga kaupod o kaliawan? Paonan-o ito nga mga desisyon nakaapekto ha iya panhunahuna ngan mga hingyap? Nasasabtan ba niya nga an iya mga nagin desisyon pa la ngan panggawi nakaapekto ha iya Amay, hi Jehova? Pinaagi ha pagbangon hin importante nga mga pakiana nga diri man sobra ka pribado, mabubuligan han mga tigurang an nagbubuhat hin sala nga makapanhunahuna ha iya ginbubuhat. (Prob. 20:5) Dugang pa, mahimo hira gumamit hin mga ilustrasyon nga mabulig ha usa nga makapanhunahuna ngan makita nga sayop an iya mga buhat. Posible ha siyahan nga pag-istorya, dida pa la hiya umabat hin tinuod nga kasubo ha iya ginbubuhat. Bangin pa ngani hiya magbasol. w24.08 22 ¶9-11

Madasigon nga iginsangyaw ni Jesus an “maopay nga sumat han Ginhadian” kay maaram hiya nga ito nga buruhaton an karuyag han Dios nga buhaton niya. Para kan Jesus, an pagsangyaw han maopay nga sumat amo an pinakaimportante nga buruhaton ha iya kinabuhi. Bisan ha kataposan nga mga bulan han iya ministeryo, nagbiyahe hiya ha “tagsa nga syudad ngan ha tagsa nga baryo,” nga nagtututdo ha iba. (Luc. 13:22) Nag-train liwat hiya hin iba pa nga disipulo basi magsangyaw han maopay nga sumat pariho ha iya. (Luc. 10:1) Yana liwat, an pagsangyaw han maopay nga sumat amo an nangunguna nga buruhaton nga karuyag ni Jehova ngan ni Jesus nga buhaton naton. (Mat. 24:14; 28:​19, 20) Mapaparig-on naton an aton kadasig ha ministeryo kon kikitaon naton an mga tawo pariho han pagkita ni Jehova ha ira. Karuyag niya nga damu gud an makabati han maopay nga sumat tubtob nga posible ngan kumarawat hito. (1 Tim. 2:​3, 4) Salit ginti-train kita niya nga magin mas epektibo ha pagpasamwak hinin mensahe nga nakakatalwas hin kinabuhi. Bisan kon diri mamati yana an mga tawo bangin may-ada pa hira oportunidad antes matapos an daku nga kasakitan. w25.03 15-16 ¶5-7

Kinahanglan gamiton han tagsa nga Kristiano an iya konsensya nga binansay ha Biblia ha pagdesisyon kon paonan-o niya tatrataron an usa nga gintanggal ha kongregasyon. An iba bangin komportable nga magyakan hin pangumusta o i-welcome ha katirok ito nga indibiduwal. Pero diri kita makikig-istorya hin hilaba o makikig-upod-upod ha iya. An iba bangin maghunahuna, ‘Diri ba an Biblia nagsusumat nga an usa nga Kristiano nga nangungumusta ha sugad nga tawo makikigbahin ha iya magraot nga buhat?’ (2 Juan 9-11) Iginpapakita han konteksto hini nga teksto nga ini nga instruksyon aplikado ha mga apostata ngan ha iba pa nga aktibo nga nag-aaghat ha iba hin sayop nga buhat. (Pah. 2:20) Salit kon an usa aktibo nga nag-aaghat hin apostata nga mga katutdoan o iba pa nga sayop nga buhat, an mga tigurang diri maghihikay nga bisitahon hiya. Syempre, may-ada pa paglaom nga makapamurubuot hiya nga magbasol. Pero tubtob nga diri pa ito nahitatabo, diri naton hiya kukumustahon o iimbitaron ha katirok han kongregasyon. w24.08 30-31 ¶14-15

Katapos ni Jesus pakaunon an usa nga grupo hin mga tawo, ginpabaya niya an iya mga apostol hito nga lugar ngan ginpabalik ha Capernaum sakay hin sakayan ngan kinadto hiya ha bukid, salit nalikyan niya an paningkamot han mga tawo nga himoon hiya nga hadi. (Juan 6:​16-20) Samtang nagbibiyahe an mga apostol, nagkaada subasko, salit nagkusog gud an hangin ngan nagkaada dagku nga balud. Ngan hi Jesus kinadto ha ira, nga naglalakat ha bawbaw han tubig. Katapos, ginsidngan niya hi Pedro nga maglakat liwat ha tubig. (Mat. 14:​22-31) Pakasakay ni Jesus ha sakayan, nagkalma an hangin. Salit an mga disipulo nakasiring: “Ikaw gud an Anak han Dios.” (Mat. 14:33) Bisan pa hito, waray nira makita an koneksyon hito nga milagro ngan ha nahitabo pa la kaupod an damu nga tawo. Hi Marcos nagdugang hini nga detalye: “Nahipausa gud [an mga apostol], kay waray nira masabti an kahulogan han milagro may kalabotan han mga tinapay.” (Mar. 6:​50-52) Oo, waray nira masabti an kadaku han gahum nga iginhatag ni Jehova kan Jesus ha paghimo hin mga milagro. w24.12 5 ¶7

Maipapakita naton an aton apresasyon ha gugma ni Jehova pinaagi ha pagbuhat han ngatanan naton nga mahihimo ha mga semana antes ngan katapos han Memoryal basi ipakita kan Jehova nga mapasalamaton gud kita ha lukat. Labot pa ha pagplano nga makaatender ha Memoryal, puydi naton imbitaron an iba nga makaatender. Isaysay ha imo mga gin-imbitar kon ano an hihimoon ha Memoryal. Makikita mo nga makakabulig ha ira an pagpakita han mga video ha jw.org nga Kay Ano nga Namatay hi Jesus? ngan Hinumdumi an Kamatayon ni Jesus. Dapat siguruhon han mga tigurang nga maimbitar an mga diri aktibo. Imadyina la an kalipay ha langit ngan ha tuna kon an mga nawara nga karnero ni Jehova, napapagios nga bumalik ha iya panon! (Luc. 15:​4-7) Ha Memoryal, abiabihon naton an usa kag usa ngan labi na adton bag-ohan ngan maiha na nga waray makaatender. Karuyag naton nga umabat hira nga welcome hira!—Roma 12:13. w25.01 29 ¶15

Bisan kon nabulig ha aton an lukat nga mahibaroan nga matadong hi Jehova, labi nga nabulig ito ha aton nga masabtan an kahilarom han iya gugma. (Juan 3:16; 1 Juan 4:​9, 10) An katutdoan mahitungod ha lukat, nagpapakita nga diri la basta karuyag ni Jehova nga magkaada kita kinabuhi nga waray kataposan, kondi karuyag liwat niya nga magin kaapi kita han iya pamilya. Hunahunaa ini: Han nakasala hi Adan, diri na hiya kaapi ha pamilya ni Jehova. Salit kita ngatanan, natawo nga diri kaapi ha pamilya han Dios. Pero tungod han lukat, ginpapasaylo ni Jehova an aton mga sala ngan ha urhi magigin kaapi ha iya pamilya an ngatanan nga tawo nga nagpapakita hin pagtoo ngan pagkamasinugtanon. Bisan yana, puydi kita magkaada duok nga relasyon kan Jehova ngan ha aton mga igkasi-magsiringba. Oo, hinigugma gud kita ni Jehova!—Roma 5:​10, 11. w25.01 21 ¶6

Sigurado nga mauyon ka nga presyoso gud nga regalo an lukat! (2 Cor. 9:15) Tungod kay iginhalad ni Jesus an iya kinabuhi sugad nga tawo, puydi ka magkaada duok nga pakigsangkay kan Jehova nga Dios. Mahimo ka liwat magkaada han paglaom nga kinabuhi nga waray kataposan. Angay gud la nga ipakita naton an pagin mapasalamaton ha lukat ngan kan Jehova nga tungod han iya gugma igintagana ito! (Roma 5:8) Basi buligan kita nga magpabilin nga mapasalamaton ngan diri gud igbalewaray an lukat, ginsugo kita ni Jesus nga umatender ha tinuig nga Memoryal han iya kamatayon. (Luc. 22:​19, 20) Yana nga tuig, an Memoryal paghihimoon ha Huwebes, Abril 2, 2026. Sigurado nga nagpaplano kita ngatanan nga umatender. Daku an aton mapapahimulsan kon maggagahin kita hin panahon ha pagpamalandong ha panahon han Memoryal kon ano an ginhimo ni Jehova ngan han iya Anak para ha aton. w25.01 20 ¶1-2

Padayon ka nga mahibabaro mahitungod ha gugma ha aton ni Jehova nga Dios ngan ni Kristo Jesus kon padayon mo ito nga papamalandungon. Ha mga semana antes ngan katapos han Memoryal hini nga tuig, puydi mo basahon hin maopay an usa han mga Ebanghelyo o sobra pa. Ha kada mo pagbabasa, ayaw pagbasa hin sobra kadamu nga kapitulo. Lugod, hinay-hinay la ngan pamiling hin iba pa nga mga rason kon kay ano nga dapat naton higugmaon hi Jehova ngan hi Jesus. Kon maiha ka na ha kamatuoran, bangin maghunahuna ka kon posible pa ba makadiskobre hin bag-o nga hilarom nga mga pagsabot ha pamilyar nga mga topiko sugad han hustisya han Dios, iya gugma, ngan han lukat. Ha pagkamatuod, waray kataposan an aton paghibaro mahitungod hini ngan ha iba pa nga mga topiko. Salit pahimulsi an damu gud nga impormasyon nga makikita ha aton mga publikasyon. w25.01 24-25 ¶13-15